မၤတၢ်

၂ ဖဲဘူၣ်ယဲၢ်ဆံအမုၢ်နံၤ+ ဘၣ်အခါ အဝဲသ့ၣ်ခဲလၢာ် အိၣ်ဖှိၣ်ဝဲလၢ တၢ်လီၢ်တပူၤဃီလီၤ. ၂ ဒီးတၢ်သီၣ်တခါ ဟဲလီၤလၢမူခိၣ်​ သတူၢ်ကလာ် လီၤဂာ်ဒ် ကလံၤအူတၢ် ဆူၣ်ဆူၣ်အသိးဒီး သီၣ်ထီၣ်ဝဲပှဲၤ ဟံၣ်လၢအဝဲသ့ၣ်​ ဆ့ၣ်နီၤဝဲတဖျၢၣ်န့ၣ်​ အပူၤလီၤ.+ ၃ ဒီးအဝဲသ့ၣ်​ ထံၣ်ဝဲတၢ်လၢ အလီၤဂာ်ဒီးပျ့ၤတဖၣ်​ အိၣ်ဖျါထီၣ်ဒ် မ့ၣ်အူလၣ်အသိး ဒီးရၤလီၤအသး ဒီးဟဲလီၤလၢ အဝဲသ့ၣ်အလိၤ တဂၤတခါလီၤ. ၄ ဒီးအဝဲသ့ၣ်ကိးဂၤဒဲး လၢထီၣ်ပှဲၤထီၣ်ဒီး သးစီဆှံ+ ဒီးစးထီၣ်တဲတၢ်လၢ ကျိာ်အဂၤတဖၣ်​ ဒ်သးစီဆှံ ဒုးတဲအဝဲသ့ၣ်​ အသိးလီၤ.+

၅ ဖဲန့ၣ်အဆၢကတီၢ် ပှၤယူဒၤဖိလၢ အယူးယီၣ်ယွၤ လၢအဟဲလၢ ထံကီၢ်ကိးဘ့ၣ်ဒဲး လၢဟီၣ်ခိၣ်ဒီဘ့ၣ်န့ၣ်​ အိၣ်ဝဲလၢ ဝ့ၢ်ယရူၤၡလ့ၣ်အပူၤလီၤ.+ ၆ အဃိ ဖဲတၢ်သီၣ်ထီၣ်ဝဲအခါ ပှၤဂီၢ်မုၢ်တဖၣ်​ အိၣ်ဖှိၣ်ဝဲ ဒီးကမၢကမၣ်ဝဲ, မ့ၢ်လၢ အဝဲသ့ၣ်တဂၤစုာ်စုာ် နၢ်ဟူဘၣ်​ ယ့ၣ်ၡူး အပျဲၢ်အဘီၣ်တဖၣ်​ တဲတၢ်လၢ အဝဲသ့ၣ်အနီၢ်ကစၢ် အကျိာ်အဃိလီၤ. ၇ အဝဲသ့ၣ်​ ကမၢကမၣ်ဝဲဒိၣ်မး ဒီးတဲဝဲလၢ “ကွၢ်မီၤ, ပှၤကိးဂၤဒဲးလၢ အတဲတၢ်န့ၣ်​ မ့ၢ်ပှၤကၤလံၤလါဖိ+ တမ့ၢ်ဧီၤ. ၈ ဘၣ်မနုၤအဃိ ပဝဲတဂၤစုာ်စုာ် ပနၢ်ဟူဘၣ်တၢ်လၢ ပနီၢ်ကစၢ်အကျိာ်လဲၣ်. ၉ ပှၤလၢပကျါန့ၣ်​ ပၣ်ဃုာ်ဒီး ပှၤပၢ်သ့ၤဖိ, ပှၤမၤဒဲဖိ,+ ပှၤဧ့ၤလၣ်ဖိ,+ ပှၤမ့းစပတၤမံဖိ, ပှၤယူဒၤဖိ, ပှၤကးပၤဒကံဖိ, ပှၤပီၣ်တူးဖိ ဒီးပှၤအၤစံဖိ,+ ၁၀ ပှၤဖြူၤကံဖိ, ပှၤပၣ်ဖူၤလံဖိ, ပှၤအဲၤကူပတူးဖိ, ပှၤလံၤဘူဖိ လၢအအိၣ်ဘူးဒီး ကူၤရ့ၤန့ ဒီးပှၤတမှံၤလၢအဟဲလၢ ရိမ့ၤ လၢအပၣ်ဃုာ်ဒီး ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိ အတၢ်ဘူၣ်တၢ်ဘါအပူၤ,+ ၁၁ ပှၤကြ့တ့ၤဖိ ဒီးပှၤဧ့ရ့းဖိလီၤ. ဘၣ်ဆၣ်​ ပနၢ်ဟူ အဝဲသ့ၣ်တဲ ကစၢ်ယွၤ အတၢ်လီၤလိၢ်လီၤလးတဖၣ်အဂ့ၢ် လၢပနီၢ်ကစၢ်အကျိာ်လီၤ.” ၁၂ ပှၤကိးဂၤဒဲး ကမၢကမၣ်​ ဒီးအခိၣ်နူာ်ဘံဘူဝဲအဃိ တဲလိာ်အသး တဂၤဒီးတဂၤလၢ “တၢ်မၤအသးတခါအံၤ အခီပညီဒ်လဲၣ်.” ၁၃ ဘၣ်ဆၣ်​ မ့မ့ၢ် ပှၤအဂၤတနီၤန့ၣ်​ ဒုၣ်ဒွဲၣ်အဝဲသ့ၣ်ဒီး တဲဝဲလၢ “ပှၤတဖၣ်န့ၣ်​ မူၤစပံးထံလီၤ.”

၁၄ ဘၣ်ဆၣ်​ စီၤပ့းတရူးဒီး ပှၤတဆံတဂၤန့ၣ်+ ဂဲၤဆၢထၢၣ်​ ဒီးတဲဝဲလၢ အကလုၢ်ဖးဒိၣ်လၢ “ပှၤအိၣ်လၢ ယူဒၤအဟီၣ်ကဝီၤအပူၤ ဒီးပှၤခဲလၢာ်လၢအိၣ်လၢ ဝ့ၢ်ယရူၤၡလ့ၣ်အပူၤသ့ၣ်ဧၢ, ယကဒုးသ့ၣ်ညါသု တၢ်တမံၤအဃိ ဒိကနၣ်​ ယတၢ်ကတိၤတဖၣ်​ လီၤတံၢ်လီၤဆဲးတက့ၢ်. ၁၅ ခဲအံၤ အိၣ်ဝဲဂီၤခီ ၉ နၣ်ရံၣ်ဃၣ်ဃၣ်* ဒံးလီၤ. အဃိ ပှၤတဖၣ်အံၤ တမူၤဒ် သုဆိကမိၣ်​ အသိးဘၣ်. ၁၆ လၢတၢ်န့ၣ်အလီၢ် ဝံယိၤအ့လး တဲပာ်စၢၤဝဲလၢ ၁၇ ‘ကစၢ်ယွၤတဲဝဲဒၣ်, “လၢမုၢ်နံၤခံကတၢၢ်တဖၣ်​ အတီၢ်ပူၤ ယကလူလီၤ ယသးစီဆှံလၢ ပှၤအကလုာ်ကလုာ်အလိၤ အဃိ သုဖိမုၣ်ဒီးသုဖိခွါတဖၣ်​ ကတဲတၢ်ဒ်ဝံအသိး ဒီးသုပိာ်ခွါသးစၢ်တဖၣ်​ ကထံၣ်​ တၢ်ထံၣ်လၢညါခီတဖၣ်​ ဒီးသုပိာ်ခွါသးပှၢ်တဖၣ်​ ကမံမီၢ် တၢ်မံမီၢ်တဖၣ်လီၤ.+ ၁၈ တကးဒံးဘၣ်​ ဖဲမုၢ်နံၤတဖၣ်န့ၣ်အတီၢ်ပူၤ ယကလူလီၤ ယသးစီဆှံလၢ ယကုၢ်ပိာ်မုၣ်တဖၣ်​ ဒီးယကုၢ် ပိာ်ခွါတဖၣ်အလိၤ ဒီးအဝဲသ့ၣ်​ ကတဲတၢ် ဒ်ဝံအသိးလီၤ.+ ၁၉ ဒီးယကပာ်ဖျါထီၣ်​ တၢ်လီၤလိၢ်လီၤလးတဖၣ်​ လၢမူခိၣ်​ ဒီးတၢ်ပနီၣ်လီၤလးတဖၣ်လၢ ဟီၣ်ခိၣ်လီၤ. တၢ်သ့ၣ်တဖၣ်န့ၣ်​ ကမ့ၢ်ဝဲ တၢ်သွံၣ်, မ့ၣ်အူ ဒီးမ့ၣ်အူခုၣ်လီၤ. ၂၀ တချုးလၢ ယဟိဝၤယွၤ* အမုၢ်နံၤဖးဒိၣ်​ လၢအပှဲၤဒီး တၢ်လၤကပီၤ ဘၣ်ဒံးဘၣ်န့ၣ်​ မုၢ်ကခံးလီၤ ဒီးလါကကဲထီၣ်​ တၢ်သွံၣ်လီၤ. ၂၁ ဒီးပှၤလၢအကိးထီၣ်​ ယဟိဝၤယွၤအမံၤ ကိးဂၤဒဲးန့ၣ်​ ကတုၤလၢ တၢ်အုၣ်က့ၤခီၣ်က့ၤလီၤ.”’+

၂၂ “ပှၤအံၣ်စရ့လးဖိသ့ၣ်ဧၢ, ကနၣ်​ တၢ်ကတိၤတဖၣ်အံၤတက့ၢ်. ကစၢ်ယွၤ ပာ်ဖျါထီၣ်န့ၢ်သုလၢ ပှၤနစၤရ့းဖိ ယ့ၣ်ၡူးလီၤ. ခီဖျိလၢအီၤအဃိ ကစၢ်ယွၤမၤဝဲ တၢ်ဖံးတၢ်မၤလၢ အအိၣ်ဒီးအစိအကမီၤ, တၢ်လီၤလးတဖၣ်​ ဒီးတၢ်ပနီၣ်လီၤလးတဖၣ်​ လၢသုကျါ+ ဒ်သုသ့ၣ်ညါအသိးလီၤ. ၂၃ ဒီးဒ်ကစၢ်ယွၤ တိာ်ပာ် ဒီးသ့ၣ်ညါပာ်စၢၤဝဲအသိး ယ့ၣ်ၡူးဘၣ်တၢ်ဟ့ၣ်လီၤကွံာ်အီၤလီၤ.+ ဒီးခီဖျိလၢ သုဟ့ၣ်လီၤကွံာ်အီၤလၢ ပှၤအၢပှၤသီ အစုပူၤအဃိ မ့ၢ်ဒၣ်သုပျၤထီအီၤလၢ သ့ၣ်တၢၣ်အလိၤ ဒီးသုမၤသံအီၤလီၤ.+ ၂၄ ဘၣ်ဆၣ်​ မ့ၢ်လၢ ကစၢ်ယွၤ မၤသမူထီၣ်က့ၤအီၤ+ ဒီးမၤထူၣ်ဖျဲးထီၣ်အီၤလၢ တၢ်သံ အပျံၤသကွီၤအဃိ တၢ်သံ ဖီၣ်တံၢ်ဃာ်အီၤ တသ့ဘၣ်.+ ၂၅ ဘၣ်ဃးဒီးအီၤန့ၣ်​ စီၤဒၤဝံး တဲဝဲလၢ ‘ယပာ်ယဟိဝၤယွၤလၢ ယမဲာ်ညါထီဘိလီၤ. ဒီးမ့ၢ်လၢ အဝဲအိၣ်လၢ ယစုထွဲတခီအဃိ ယကဆၢထၢၣ်​ ဂၢၢ်ဂၢၢ်ကျၢၤကျၢၤထီဘိလီၤ. ၂၆ လၢတၢ်ဂ့ၢ်အံၤအဃိ ယပှဲၤဒီး တၢ်သးခု ဒီးယတဲတၢ်လၢ တၢ်သးခုဖးဒိၣ်​ အပူၤလီၤ. ဒီးယကအိၣ်မူလၢ တၢ်မုၢ်လၢ်အပူၤ ၂၇ မ့ၢ်လၢ နတပာ်တ့ၢ်ယၤလၢ တၢ်သွၣ်ခိၣ်* အပူၤဘၣ်​ ဒီးပှၤလၢ အတီဒီးနၤတဂၤန့ၣ်​ နတပျဲလၢ အကအုၣ်သံကျၣ်သံဘၣ်​ အဃိလီၤ.+ ၂၈ နဒုးသ့ၣ်ညါယၤလၢ တၢ်မူအကျဲ ဒီးနကမၤပှဲၤယသးဒီး တၢ်သူၣ်ခုသးခု ဒိၣ်ဒိၣ်လၢ နမဲာ်ညါလီၤ.’+

၂၉ “ဒီပုၢ်ဝဲၢ်ခွါသ့ၣ်ဧၢ, ဟ့ၣ်လီၤယၤအခွဲးလၢ ယကတဲသုပျီပျီ ဘၣ်ဃးဒီး ပဖုဖးဒိၣ်​ စီၤဒၤဝံးအဂ့ၢ်တက့ၢ်. အဝဲသံဒီး ပှၤခူၣ်လီၤအီၤ+ ဒီးအသွၣ်ခိၣ်အိၣ်ဒီးပှၤဖဲအံၤ တုၤလၢ မုၢ်မဆါတနံၤအံၤလီၤ. ၃၀ အဝဲကဲဝံတဂၤ ဒီးအသ့ၣ်ညါဝဲလၢ ကစၢ်ယွၤ မၤတၢ်အၢၣ်လီၤအီလီၤဒီးအီၤလၢ အချံအသၣ်တဂၤ ကဆ့ၣ်နီၤလၢ အလီၢ်ပစိာ်အလိၤလီၤ.+ ၃၁ အဃိ အဝဲထံၣ်စိပာ်ဝဲ ဒီးတဲဆိပာ်ဝဲ ဘၣ်ဃး ခရံာ်အတၢ်ဂဲၤဆၢထၢၣ်​ သမူထီၣ်က့ၤအဂ့ၢ် ဒီးတဲဝဲလၢ ခရံာ်တဘၣ်​ တၢ်ပာ်တ့ၢ်အီၤလၢ တၢ်သွၣ်ခိၣ်အပူၤဘၣ်​ ဒီးအဖံးအညၣ်​ တအုၣ်သံကျၣ်သံ စ့ၢ်ကီးဘၣ်.+ ၃၂ ကစၢ်ယွၤ မၤသမူထီၣ်က့ၤ ယ့ၣ်ၡူးတဂၤအံၤ ဒီးပဝဲခဲလၢာ် ပမ့ၢ်ပှၤအုၣ်အသးလီၤ.+ ၃၃ မ့ၢ်လၢအဝဲဘၣ်​ တၢ်ပာ်ထီၣ်ထီအီၤလၢ ကစၢ်ယွၤ အစုထွဲတခီ+ ဒီးဒိးန့ၢ်ဘၣ်​ သးစီဆှံလၢ ပၢ်အၢၣ်လီၤဝဲအဃိ+ အဝဲလူလီၤ သးစီဆှံဒ်သုထံၣ်ဘၣ်​ ဒီးသုနၢ်ဟူဘၣ်တၢ် အသိးလီၤ. ၃၄ စီၤဒၤဝံး တလဲၤထီၣ်ဘၣ်လၢ မူခိၣ်ဘၣ်. ဘၣ်ဆၣ်​ အဝဲတဲဝဲလၢ ‘ယဟိဝၤယွၤ တဲဘၣ်​ ယကစၢ်လၢ “ဆ့ၣ်နီၤလၢ ယစုထွဲ ၃၅ တုၤလီၤလၢ ယပာ်နဒုၣ်နဒါ ဒ်တၢ်ယီၢ်လီၤခီၣ်အလီၢ်လၢ နခီၣ်အဂီၢ်တက့ၢ်.”’+ ၃၆ အဃိ မ်ပှၤအံၣ်စရ့လးဖိခဲလၢာ် သ့ၣ်ညါသပှၢ်ကတၢၢ်လၢ ယ့ၣ်ၡူးလၢ သုမၤသံအီၤလၢ သ့ၣ်တၢၣ်အလိၤတဂၤန့ၣ်+ ကစၢ်ယွၤ ဒုးကဲထီၣ်အီၤလၢ ကစၢ်+ ဒီးခရံာ်လံ.”

၃၇ ဖဲအဝဲသ့ၣ်​ နၢ်ဟူဝဲဒ်န့ၣ်အခါ အဝဲသ့ၣ်​ သးဘၣ်ဒိဒိၣ်မး အဃိ အဝဲသ့ၣ်​ တဲဘၣ်​ စီၤပ့းတရူး ဒီးတၢ်မၢဖိအဂၤတဖၣ်လၢ “ဒီပုၢ်ဝဲၢ်သ့ၣ်ဧၢ, ပကဘၣ်မၤဒ်လဲၣ်.” ၃၈ စီၤပ့းတရူးတဲဘၣ်​ အဝဲသ့ၣ်လၢ “ပီၢ်ယၢ်လီၤက့ၤသုသး+ ဒီးသုဝဲတဂၤစုာ်စုာ်န့ၣ်​ ဒိးဘျၢထံလၢ+ ယ့ၣ်ၡူးခရံာ်အမံၤအပူၤလၢ တၢ်ပျၢ်တၢ်ဒဲးဘး အဂီၢ်တက့ၢ်.+ ဒီးသုကဒိးန့ၢ်ဘၣ်​ တၢ်ဟ့ၣ်လၢအမ့ၢ် သးစီဆှံ, ၃၉ မ့ၢ်လၢ ပကစၢ် ယဟိဝၤယွၤ အၢၣ်လီၤပာ်စၢၤသု+ ဒီးသုဖိသုလံၤ ဒီးပှၤကိးဂၤဒဲးလၢ အအိၣ်လၢ တၢ်လီၢ်အယံၤ ဒီးပှၤခဲလၢာ်လၢ ကစၢ်ယွၤ ကိးဃီၤအီၤဆူ အအိၣ်တဖၣ်လီၤ.”+ ၄၀ ဒီးစီၤပ့းတရူး အုၣ်အသး လီၤတံၢ်လီၤဆဲးလၢ တၢ်ကတိၤအါထံၣ်​ ဒီးဟ့ၣ်သဆၣ်ထီၣ်​ အဝဲသ့ၣ်လၢ “ဒ်သိးသုကန့ၢ်ဘၣ်​ တၢ်အုၣ်က့ၤခီၣ်က့ၤအဂီၢ် ထုးဖးသုသးဒီး ပှၤအၢပှၤသီ တစိၤအံၤတက့ၢ်.”+ ၄၁ အဃိ ပှၤလၢအတူၢ်လိာ် အတၢ်ကတိၤ လၢတၢ်သူၣ်အိၣ်သးအိၣ်​ အပူၤန့ၣ်​ ဒိးဘျၢထံ+ ဒီးဖဲနံၤအဝဲန့ၣ်​ ပှၤစူၢ်က့ၤနာ်က့ၤတၢ် အနီၣ်ဂံၢ် အါထီၣ်ဝဲအဂၤ ၃,၀၀၀ ညါလီၤ.+ ၄၂ ဒီးအဝဲသ့ၣ်​ ဆဲးဒိကနၣ်ဝဲ တၢ်မၢဖိတဖၣ်​ အတၢ်သိၣ်လိဒီး ရ့လိာ်အသးကဒဲကဒဲ* ဒီးအီၣ်တၢ်အီတၢ်+ ဒီးဃ့ထုကဖၣ်တၢ်လီၤ.+

၄၃ တၢ်မၢဖိတဖၣ်+ မၤတၢ်ပနီၣ်လီၤလး ဒီးတၢ်လီၤလးအါမံၤလီၤ. အဃိ ပှၤခဲလၢာ် ယူးယီၣ်ပာ်ကဲ ကစၢ်ယွၤလီၤ. ၄၄ ပှၤလၢအစူၢ်က့ၤနာ်က့ၤတၢ် ကိးဂၤဒဲးန့ၣ်​ အိၣ်ဝဲတပူၤဃီ ဒီးတၢ်လၢအအိၣ်ဒီး အဝဲသ့ၣ်န့ၣ်​ အဝဲသ့ၣ်​ ဟ့ၣ်နီၤလီၤ လိာ်အသးလီၤ. ၄၅ ဒီးအဝဲသ့ၣ်ဆါလီၤကွံာ် အတၢ်စုလီၢ်ခီၣ်ခိၣ်+ ဒီးအတၢ်ဖိတၢ်လံၤတဖၣ်​ ဒီးဟ့ၣ်နီၤလီၤ ပှၤကိးဂၤဒဲး လၢကျိၣ်စ့ ဒ်ပှၤတဂၤစုာ်စုာ် အတၢ်လိၣ်ဘၣ်​ အိၣ်ဝဲအသိးလီၤ.+ ၄၆ ဒီးတနံၤဘၣ်တနံၤန့ၣ်​ အဝဲသ့ၣ်လဲၤထီၣ်ဆူ တၢ်လုၢ်ဟံၣ်ထီဘိ လၢတၢ်တိာ်ပာ် တမံၤဃီအပူၤ ဒီးအီၣ်သကိးတၢ်လၢ တဂၤဒီးတဂၤအဟံၣ်ပူၤ ဒီးဟ့ၣ်နီၤလီၤ လိာ်အသး တၢ်အီၣ်တၢ်အီ လၢတၢ်သးခု ဒိၣ်ဒိၣ်မုၢ်မုၢ်အပူၤ ဒီးလၢ တၢ်သူၣ်ဘျၢသးဘျၢအပူၤလီၤ. ၄၇ ဒီးအဝဲသ့ၣ်စံးထီၣ်ပတြၢၤ ကစၢ်ယွၤ ဒီးပှၤခဲလၢာ် ဘၣ်သူၣ်ဘၣ်သး အဝဲသ့ၣ်လီၤ. တကတီၢ်ဃီန့ၣ်​ ပှၤလၢအကဒိးန့ၢ်ဘၣ်​ တၢ်အုၣ်က့ၤခီၣ်က့ၤန့ၣ်​ ယဟိဝၤယွၤ ဆဲးပာ်ဖှိၣ်အါထီၣ်​ အဝဲသ့ၣ်​ ကိးနံၤဒဲးလီၤ.+