မၤတၢ်
၂ ဖဲဘူၣ်ယဲၢ်ဆံအမုၢ်နံၤ ဘၣ်အခါ အဝဲသ့ၣ်ခဲလၢာ် အိၣ်ဖှိၣ်ဝဲလၢ တၢ်လီၢ်တပူၤဃီလီၤ. ၂ ဒီးတၢ်သီၣ်တခါ ဟဲလီၤလၢမူခိၣ် သတူၢ်ကလာ် လီၤဂာ်ဒ် ကလံၤအူတၢ် ဆူၣ်ဆူၣ်အသိးဒီး သီၣ်ထီၣ်ဝဲပှဲၤ ဟံၣ်လၢအဝဲသ့ၣ် ဆ့ၣ်နီၤဝဲတဖျၢၣ်န့ၣ် အပူၤလီၤ. ၃ ဒီးအဝဲသ့ၣ် ထံၣ်ဝဲတၢ်လၢ အလီၤဂာ်ဒီးပျ့ၤတဖၣ် အိၣ်ဖျါထီၣ်ဒ် မ့ၣ်အူလၣ်အသိး ဒီးရၤလီၤအသး ဒီးဟဲလီၤလၢ အဝဲသ့ၣ်အလိၤ တဂၤတခါလီၤ. ၄ ဒီးအဝဲသ့ၣ်ကိးဂၤဒဲး လၢထီၣ်ပှဲၤထီၣ်ဒီး သးစီဆှံ ဒီးစးထီၣ်တဲတၢ်လၢ ကျိာ်အဂၤတဖၣ် ဒ်သးစီဆှံ ဒုးတဲအဝဲသ့ၣ် အသိးန့ၣ်လီၤ.
၅ ဖဲန့ၣ်အဆၢကတီၢ် ပှၤယူဒၤဖိလၢ အယူးယီၣ်ယွၤ လၢအဟဲလၢ ထံကီၢ်ကိးဘ့ၣ်ဒဲး လၢဟီၣ်ခိၣ်ဒီဘ့ၣ်န့ၣ် အိၣ်ဝဲလၢ ယရူၤၡလ့ၣ်အပူၤလီၤ. ၆ အဃိ ဖဲတၢ်သီၣ်ထီၣ်ဝဲအခါ ပှၤဂီၢ်မုၢ်တဖၣ် အိၣ်ဖှိၣ်ဝဲ ဒီးကမၢကမၣ်ဝဲ မ့ၢ်လၢ အဝဲသ့ၣ်တဂၤစုာ်စုာ် နၢ်ဟူဘၣ် ယ့ၣ်ၡူး အပျဲၢ်အဘီၣ်တဖၣ် တဲတၢ်လၢ အဝဲသ့ၣ်အနီၢ်ကစၢ် အကျိာ်အဃိလီၤ. ၇ အဝဲသ့ၣ် ကမၢကမၣ်ဝဲဒိၣ်မး ဒီးတဲဝဲလၢ “ကွၢ်မီၤ, ပှၤကိးဂၤဒဲးလၢ အတဲတၢ်န့ၣ် မ့ၢ်ပှၤကၤလံၤလါဖိ တမ့ၢ်ဘၣ်ဧါ. ၈ ဘၣ်မနုၤအဃိ ပဝဲတဂၤစုာ်စုာ် ပနၢ်ဟူဘၣ်လၢ ပနီၢ်ကစၢ်အကျိာ်လဲၣ်. ၉ ပှၤပၢ်သ့ၤဖိ, ပှၤမၤဒဲဖိ, ပှၤဧ့ၤလၣ်ဖိ, ပှၤမ့းစပတၤမံဖိ, ပှၤယူဒၤဖိ, ပှၤကးပၤဒကံဖိ, ပှၤပီၣ်တူးဖိ ဒီးပှၤအၤစံဖိ, ၁၀ ပှၤဖြူၤကံဖိ, ပှၤပၣ်ဖူၤလံဖိ, ပှၤအဲၤကူပတူးဖိ, ပှၤလံၤဘူဖိ လၢအအိၣ်ဘူးဒီး ကူၤရ့ၤန့ ဒီးပှၤတမှံၤလၢအဟဲလၢ ရိမ့ၤ လၢအပၣ်ဃုာ်ဒီး ပှၤယူဒၤဖိ ဒီးပှၤလၢအနုာ်လီၤလၢ ပှၤယူဒၤဖိအတၢ်ဘူၣ်တၢ်ဘါအပူၤ, ၁၁ ပှၤကြ့တ့ၤဖိ ဒီးပှၤဧ့ရ့းဖိ ပဝဲဒၣ်အံၤ ပနၢ်ဟူအဝဲသ့ၣ်တဲတၢ်လၢ ပနီၢ်ကစၢ်အကျိာ် ဘၣ်ဃးဒီးကစၢ်ယွၤ အတၢ်လီၤလိၢ်လီၤလးတဖၣ်အဂ့ၢ်လီၤ.” ၁၂ အဝဲသ့ၣ်ကိးဂၤဒဲး ကမၢကမၣ် ဒီးအခိၣ်နူာ်ဘံဘူဝဲအဃိ တဲလိာ်အသး တဂၤဒီးတဂၤလၢ “တၢ်မၤအသးတခါအံၤ အခီပညီဒ်လဲၣ်.” ၁၃ ဘၣ်ဆၣ် မ့မ့ၢ် ပှၤအဂၤတနီၤန့ၣ် ဒုၣ်ဒွဲၣ်အဝဲသ့ၣ်ဒီး တဲဝဲလၢ “ပှၤတဖၣ်အံၤ မူၤစပံးထံလီၤ.”
၁၄ ဘၣ်ဆၣ် စီၤပ့းတရူးဒီး ပှၤတဆံတဂၤန့ၣ် ဂဲၤဆၢထၢၣ် ဒီးတဲဝဲလၢ အကလုၢ်ဖးဒိၣ်လၢ “ပှၤအိၣ်လၢ ကီၢ်ယူဒၤပူၤ ဒီးပှၤခဲလၢာ်လၢအိၣ်လၢ ယရူၤၡလ့ၣ်အပူၤသ့ၣ်ဧၢ, ယကဒုးသ့ၣ်ညါသု တၢ်တမံၤအဃိ ဒိကနၣ် ယတၢ်ကတိၤတဖၣ် လီၤတံၢ်လီၤဆဲးတက့ၢ်. ၁၅ ခဲအံၤ မ့ၢ်ဒၣ်ဂီၤခီ ၉ နၣ်ရံၣ်ဃၣ်ဃၣ်* ဒံးလီၤ. အဃိ ပှၤသ့ၣ်တဖၣ်အံၤ တမူၤဒ် သုဆိကမိၣ်အသိးဘၣ်. ၁၆ လၢတၢ်န့ၣ်အလီၢ် ဝံယိၤအ့လး တဲဝဲဒ်အံၤ ၁၇ ‘ကစၢ်ယွၤတဲဝဲဒၣ်, “လၢမုၢ်နံၤခံကတၢၢ်တဖၣ် အတီၢ်ပူၤ ယကလူလီၤ ယသးစီဆှံလၢ ပှၤအကလုာ်ကလုာ်အလိၤ အဃိ သုဖိမုၣ်ဒီးသုဖိခွါတဖၣ် ကတဲတၢ်ဒ်ဝံအသိး ဒီးသုပိာ်ခွါသးစၢ်တဖၣ် ကထံၣ် တၢ်ထံၣ်လၢညါခီတဖၣ် ဒီးသုပိာ်ခွါသးပှၢ်တဖၣ် ကမံမီၢ်တၢ်မံမီၢ်တဖၣ်လီၤ. ၁၈ တကးဒံးဘၣ် ဖဲမုၢ်နံၤတဖၣ်န့ၣ်အတီၢ်ပူၤ ယကလူလီၤ ယသးစီဆှံလၢ ယကုၢ်ပိာ်မုၣ်တဖၣ် ဒီးယကုၢ် ပိာ်ခွါတဖၣ်အလိၤ ဒီးအဝဲသ့ၣ် ကတဲတၢ် ဒ်ဝံအသိးလီၤ. ၁၉ ဒီးယကပာ်ဖျါထီၣ် တၢ်လီၤလိၢ်လီၤလးတဖၣ် လၢမူခိၣ်ထး ဒီးတၢ်ပနီၣ်လီၤလးတဖၣ်လၢ ဟီၣ်ခိၣ်လာ်လီၤ. တၢ်သ့ၣ်တဖၣ်အံၤကမ့ၢ်ဝဲ တၢ်သွံၣ်, မ့ၣ်အူ ဒီးမ့ၣ်အူပလုၢ် ခုၣ်ထီၣ်ဝဲလီၤ. ၂၀ တချုးလၢ ယဟိဝၤယွၤ အမုၢ်နံၤဖးဒိၣ် လၢအပှဲၤဒီး တၢ်လၤကပီၤ ဘၣ်ဒံးဘၣ်န့ၣ် မုၢ်ကခံးလီၤ ဒီးလါကကဲထီၣ် တၢ်သွံၣ်လီၤ. ၂၁ ဒီးပှၤလၢအကိးထီၣ် ယဟိဝၤယွၤအမံၤ ကိးဂၤဒဲးန့ၣ် ကတုၤလၢ တၢ်အုၣ်က့ၤခီၣ်က့ၤလီၤ.”’
၂၂ “ပှၤအံၣ်စရ့လးဖိသ့ၣ်ဧၢ, ကနၣ် တၢ်ကတိၤတဖၣ်အံၤတက့ၢ်. ကစၢ်ယွၤ ပာ်ဖျါထီၣ်န့ၢ်သုလၢ ပှၤနစၤရ့းဖိ ယ့ၣ်ၡူးလီၤ. ခီဖျိလၢအီၤအဃိ ကစၢ်ယွၤမၤဝဲ တၢ်ဖံးတၢ်မၤလၢ အအိၣ်ဒီးအစိအကမီၤ, တၢ်လီၤလးတဖၣ် ဒီးတၢ်ပနီၣ်လီၤလးတဖၣ် လၢသုကျါ ဒ်သုသ့ၣ်ညါအသိးလီၤ. ၂၃ ဒီးဒ်ကစၢ်ယွၤ တိာ်ပာ် ဒီးသ့ၣ်ညါပာ်စၢၤဝဲအသိး ပှၤတဂၤအံၤ ဘၣ်တၢ်ဟ့ၣ်လီၤကွံာ်အီၤ ဒီးခီဖျိလၢ သုဟ့ၣ်လီၤကွံာ်အီၤလၢ ပှၤအၢပှၤသီ အစုပူၤအဃိ မ့ၢ်ဒၣ်သုပျၤထီၣ်အီၤလၢ သ့ၣ်တၢၣ်အလိၤ ဒီးသုမၤသံအီၤလီၤ. ၂၄ ဘၣ်ဆၣ် မ့ၢ်လၢ ကစၢ်ယွၤ မၤသမူထီၣ်က့ၤအီၤ ဒီးမၤထူၣ်ဖျဲးထီၣ်အီၤလၢ တၢ်သံ အပျံၤသကွီၤအဃိ တၢ်သံ ဖီၣ်တံၢ်ဃာ်အီၤ တသ့ဘၣ်. ၂၅ ဘၣ်ဃးဒီးအီၤန့ၣ် စီၤဒၤဝံးတဲဝဲလၢ ‘ယပာ်ယဟိဝၤယွၤလၢ ယမဲာ်ညါထီဘိ မ့ၢ်လၢအဝဲအိၣ်လၢ ယစုထွဲတခီ ဒ်သိးယသု တဟူးတဝး နီတဘျီ တဂ့ၤအဂီၢ်လီၤ. ၂၆ လၢတၢ်ဂ့ၢ်အံၤအဃိ ယသးပှဲၤဝဲဒီး တၢ်သးခု ဒီးယပျ့ၤ သးခုဝဲဒိၣ်မးလီၤ. ဒီးယကအိၣ်လၢ တၢ်မုၢ်လၢ်အပူၤ ၂၇ မ့ၢ်လၢ နတပာ်တ့ၢ်ယၤလၢ တၢ်သွၣ်ခိၣ်အပူၤ ဒီးနတဟ့ၣ်အခွဲးလၢ ပှၤလၢ အတီဒီးနၤတဂၤန့ၣ် ကအုၣ်သံကျၣ်သံဘၣ် အဃိလီၤ. ၂၈ နဒုးသ့ၣ်ညါယၤလၢ တၢ်မူအကျဲ ဒီးနကမၤပှဲၤယသးဒီး တၢ်သူၣ်ခုသးခု ဒိၣ်ဒိၣ်လၢ နမဲာ်ညါလီၤ.’
၂၉ “ဒီပုၢ်ဝဲၢ်ခွါသ့ၣ်ဧၢ, ဟ့ၣ်ယၤအခွဲးလၢ ယကတဲသုပျီပျီ ဘၣ်ဃးဒီး ပဖုဖးဒိၣ် စီၤဒၤဝံးအဂ့ၢ်တက့ၢ်. အဝဲသံဒီး တၢ်ခူၣ်လီၤအီၤ ဒီးအသွၣ်ခိၣ်အိၣ်ဒီးပှၤဖဲအံၤ တုၤလၢ မုၢ်မဆါတနံၤအံၤလီၤ. ၃၀ မ့ၢ်လၢ အဝဲကဲဝံတဂၤ ဒီးသ့ၣ်ညါဝဲလၢ ကစၢ်ယွၤ မၤတၢ်အၢၣ်လီၤအီလီၤဒီးအီၤလၢ အချံအသၣ်တဂၤ ကဆ့ၣ်နီၤလၢ အလီၢ်ပစိာ်အလိၤအဃိ ၃၁ အဝဲထံၣ်စိပာ်ဝဲ ဒီးတဲဆိပာ်ဝဲ ဘၣ်ဃး ခရံာ်အတၢ်ဂဲၤဆၢထၢၣ် သမူထီၣ်က့ၤအဂ့ၢ်လၢ အဝဲတဘၣ် တၢ်ပာ်တ့ၢ်အီၤလၢ တၢ်သွၣ်ခိၣ်အပူၤဘၣ် ဒီးအဖံးအညၣ် တအုၣ်သံကျၣ်သံ စ့ၢ်ကီးဘၣ်. ၃၂ ကစၢ်ယွၤ မၤသမူထီၣ်က့ၤ ယ့ၣ်ၡူးတဂၤအံၤ ဒီးပဝဲခဲလၢာ် ပမ့ၢ်ပှၤအုၣ်အသးလီၤ. ၃၃ မ့ၢ်လၢအဝဲဘၣ် တၢ်ပာ်ထီၣ်ထီအီၤလၢ ကစၢ်ယွၤ အစုထွဲတခီ ဒီးဒိးန့ၢ်ဘၣ် သးစီဆှံလၢ ပၢ်အၢၣ်လီၤဝဲအဃိ အဝဲလူလီၤအီၤ ဒီးသုထံၣ်ဘၣ် ဒီးသုနၢ်ဟူဘၣ်လီၤ. ၃၄ စီၤဒၤဝံး တထီၣ်ဘၣ်ဆူ မူခိၣ်ဘၣ်. ဘၣ်ဆၣ် အဝဲတဲဝဲလၢ ‘ယဟိဝၤယွၤတဲဘၣ် ယကစၢ်လၢ “ဆ့ၣ်နီၤလၢ ယစုထွဲ ၃၅ တုၤလီၤလၢ ယပာ်နဒုၣ်နဒါ ဒ်တၢ်ယီၢ်လီၤခီၣ်အလီၢ်လၢ နခီၣ်အဂီၢ်တက့ၢ်.”’ ၃၆ အဃိ ယ့ၣ်ၡူးလၢ သုမၤသံအီၤလၢ သ့ၣ်တၢၣ်အလိၤတဂၤန့ၣ် မ်ပှၤအံၣ်စရ့လး အဟံၣ်ဖိခဲလၢာ် သ့ၣ်ညါသပှၢ်ကတၢၢ်လၢ ကစၢ်ယွၤ ဒုးကဲထီၣ်အီၤလၢ ကစၢ်ဒီးခရံာ်န့ၣ်တက့ၢ်.”
၃၇ ဖဲအဝဲသ့ၣ် နၢ်ဟူဒ်န့ၣ်အခါ အဝဲသ့ၣ် အသးဘၣ်ဒိဒိၣ်မး အဃိ အဝဲသ့ၣ် တဲဘၣ် စီၤပ့းတရူး ဒီးတၢ်မၢဖိအဂၤတဖၣ်လၢ “ဒီပုၢ်ဝဲၢ်ခွါသ့ၣ်ဧၢ, ပကဘၣ်မၤဒ်လဲၣ်.” ၃၈ စီၤပ့းတရူးတဲဘၣ် အဝဲသ့ၣ်လၢ “ပီၢ်ယၢ်လီၤက့ၤသုသး ဒီးသုဝဲတဂၤစုာ်စုာ် မ်သုဒိးဘျၢထံလၢ ယ့ၣ်ၡူးအမံၤအပူၤလၢ တၢ်ပျၢ်တၢ်ဒဲးဘး အဂီၢ်န့ၣ်တက့ၢ်. ဒီးသုကဒိးန့ၢ်ဘၣ် တၢ်ဟ့ၣ်လၢအမ့ၢ် သးစီဆှံ ၃၉ မ့ၢ်လၢကစၢ်ယွၤ အၢၣ်လီၤသု ဒီးသုဖိသုလံၤ ဒီးပှၤကိးဂၤဒဲးလၢ အအိၣ်လၢတၢ်လီၢ်အယံၤ ဒီးပှၤခဲလၢာ်လၢ ပကစၢ်ယဟိဝၤယွၤ ကိးဃီၤအီၤဆူ အအိၣ်တဖၣ်န့ၣ်လီၤ.” ၄၀ ဒီးအဝဲအုၣ်အသး လီၤတံၢ်လီၤဆဲးလၢ တၢ်ကတိၤအါထံၣ် ဒီးဟ့ၣ်သဆၣ်ထီၣ် အဝဲသ့ၣ်လၢ “ဒ်သိးသုကန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ထုးဖးသုသးဒီး ပှၤအၢပှၤသီ တစိၤအံၤန့ၣ်တက့ၢ်.” ၄၁ အဃိ ပှၤလၢအတူၢ်လိာ် အတၢ်ကတိၤ လၢတၢ်သူၣ်အိၣ်သးအိၣ် အပူၤန့ၣ် ဒိးဘျၢအသးလၢထံ ဒီးဖဲနံၤအဝဲန့ၣ် ပှၤစူၢ်က့ၤနာ်က့ၤတၢ် အနီၣ်ဂံၢ် အါထီၣ်ဝဲအဂၤ ၃,၀၀၀ ညါလီၤ. ၄၂ ဒီးအဝဲသ့ၣ် ဆဲးဒိကနၣ်ဝဲ တၢ်မၢဖိတဖၣ် အတၢ်သိၣ်လိဒီး ရ့လိာ်အသးကဒဲကဒဲ, အီၣ်တၢ်အီတၢ် ဒီးဃ့ဘါထုကဖၣ်တၢ်လီၤ.
၄၃ ဒီးတၢ်ပျံၤတၢ်ဖုးလီၤဘၣ်လၢ ပှၤခဲလၢာ်အလိၤဒီး တၢ်ပနီၣ်လီၤလး ဒီးတၢ်လီၤလးအါမံၤ ဟဲအိၣ်ထီၣ်ဝဲ ခီဖျိလၢ တၢ်မၢဖိတဖၣ်လီၤ. ၄၄ ပှၤလၢအစူၢ်က့ၤနာ်က့ၤတၢ် ကိးဂၤဒဲးန့ၣ် အိၣ်ဝဲတပူၤဃီ ဒီးတၢ်လၢအအိၣ်ဒီး အဝဲသ့ၣ်န့ၣ် အဝဲသ့ၣ်ဟ့ၣ်နီၤလီၤ လိာ်အသးလီၤ. ၄၅ ဒီးအဝဲသ့ၣ်ဆါလီၤကွံာ် အတၢ်စုလီၢ်ခီၣ်ခိၣ် ဒီးအတၢ်ဖိတၢ်လံၤတဖၣ် ဒီးနီၤလီၤဝဲ ကျိၣ်စ့တဖၣ် ဆူပှၤကိးဂၤဒဲး ဒ်ပှၤတဂၤစုာ်စုာ် အတၢ်လိၣ်ဘၣ် အိၣ်ဝဲအသိးန့ၣ်လီၤ. ၄၆ ဒီးတနံၤဘၣ်တနံၤန့ၣ် အဝဲသ့ၣ်လဲၤထီၣ်ဆူ တၢ်လုၢ်ဟံၣ်ထီဘိ လၢတၢ်တိာ်ပာ် တမံၤဃီအပူၤ ဒီးအီၣ်သကိးတၢ်လၢ အဝဲသ့ၣ် အဟံၣ်တဖၣ်အပူၤ ဒီးဟ့ၣ်နီၤလီၤ လိာ်အသး တၢ်အီၣ်တၢ်အီ လၢတၢ်သူၣ်ခုသးခု ဒိၣ်ဒိၣ်မုၢ်မုၢ်အပူၤ ဒီးလၢ တၢ်သူၣ်ဘျၢသးဘျၢအပူၤ ၄၇ ဒီးစံးထီၣ်ပတြၢၤကစၢ်ယွၤ ဒီးပှၤခဲလၢာ် ဘၣ်သူၣ်ဘၣ်သး အဝဲသ့ၣ်လီၤ. တကတီၢ်ဃီန့ၣ် ပှၤလၢအဘၣ် တၢ်အုၣ်က့ၤခီၣ်က့ၤ အဝဲသ့ၣ်တဖၣ်န့ၣ် ယဟိဝၤယွၤ ဆဲးပာ်ဖှိၣ်အါထီၣ် အဝဲသ့ၣ်ကိးနံၤဒဲးလီၤ.