ယံးရမံယၤ
၉ ယခိၣ်သၣ်ဃံ မ့မ့ၢ်ထံကမျၢ
ဒီးယမဲာ်ချံ မ့မ့ၢ်ထံထီၣ်ပၢၢ်န့ၣ်+
ယကဟီၣ် ဒီနံၤဒီနၤလၢ
ယပှၤကလုာ်လၢ အဘၣ်တၢ်မၤသံအီၤတဖၣ် အဃိလီၤ.
၂ ယမ့ၢ်အိၣ်ဒီး တၢ်အိၣ်ဘှံးအလီၢ်လၢ ပှၢ်မုၢ်ကနၢအပူၤန့ၣ်
ယကပာ်တ့ၢ် ယပှၤကလုာ် ဒီးဟးထီၣ်လၢ အဝဲသ့ၣ်အအိၣ်လီၤ.
၃ အဝဲသ့ၣ် ကတဲာ်ကတီၤပာ်စၢၤအသးလၢ ကလံၣ်တၢ်အဂီၢ် ဒ်ပှၤ ဖ့ၣ်ထီၣ်ချံၣ်လၢ ကခးတၢ် အသိးလီၤ.
လၢကီၢ်ပူၤန့ၣ် အိၣ်ပှဲၤဒီး တၢ်လံၣ် တၢ်လီ ဒီးတၢ်သးတီတအိၣ်ဘၣ်.+
ယဟိဝၤယွၤ တဲဝဲလၢ “အဝဲသ့ၣ် မၤတၢ်အၢ တခါဝံၤတခါ
ဒီးတကနၣ်ဃုာ်ယၤ နီတစဲးဘၣ်.”+
၄ “သုဝဲကိးဂၤဒဲးန့ၣ် ပလီၢ်သုသးလၢ ပှၤလၢသုဃၢၤ
ဒီးသုဒီပုၢ်ဝဲၢ်ခွါဒၣ်လဲာ် တဘၣ်နာ်န့ၢ်အီၤတဂ့ၤ.
ပှၤဒီပုၢ်ဝဲၢ်ခွါ ကိးဂၤဒဲးန့ၣ် မ့ၢ်ပှၤလၢ အသးတတီဘၣ်+
ဒီးပှၤလၢသုဃၢၤ ကိးဂၤဒဲးန့ၣ် မ့ၢ်ပှၤလၢ အဟးတဲဟးဂီၤပှၤဂၤလီၤ.+
၅ အဝဲသ့ၣ် တဂၤစုာ်စုာ်န့ၣ် လံၣ်အီၣ် ပှၤလၢအဃၢၤ
ဒီးပှၤတတဲ တၢ်မ့ၢ်တၢ်တီ နီတဂၤဘၣ်.
အဝဲသ့ၣ် သိၣ်လိအပျ့ၤလၢ ကတဲ တၢ်လံၣ်တၢ်လီလီၤ.+
ဒီးအဝဲသ့ၣ် မၤတၢ်အၢတၢ်သီ တုၤလၢအလီၤဘှံးလီၤ.
၆ နအိၣ်ဘၣ်လၢ ပှၤလံၣ်တၢ်လီတၢ်တဖၣ် အကျါလီၤ.
အဝဲသ့ၣ် လံၣ်တၢ်လီတၢ် ဒီးတအဲၣ်ဒိးသ့ၣ်ညါယၤ နီတစဲးဘၣ်.” ယဟိဝၤယွၤ တဲဝဲဒ်န့ၣ်လီၤ.
၇ လၢတၢ်န့ၣ်အဃိ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ
“လၢယပှၤဂီၢ်မုၢ်အံၤ* အဂီၢ် ယမၤတၢ်မနုၤ ကသ့ဒံးလဲၣ်.
ယကမၤကဆှီထီၣ်* ဒီးသမံသမိး အဝဲသ့ၣ်လီၤ.+
၈ အဝဲသ့ၣ် အပျ့ၤန့ၣ် တဲတၢ်လံၣ် တၢ်လီ ဒီးအလီၤဂာ်ဒ်သိးဒီး ပျၢ်လၢအမၤသံတၢ်သ့လီၤ.
အဝဲသ့ၣ် တဲတၢ်ဃူတၢ်ဖိးဒီး ပှၤလၢအဃၢၤ
ဘၣ်ဆၣ် လၢအသးပူၤန့ၣ် အဝဲသ့ၣ် ကတဲာ်ကတီၤပာ်စၢၤဝဲ ပျံၤသကွီၤလီၤ.”
၉ ယဟိဝၤယွၤ တဲဝဲလၢ “အဝဲသ့ၣ် မၤဝဲဒ်န့ၣ်န့ၣ် ယတကြၢး ဟံးန့ၢ်အီၤ အရ့ဧီၤ.
ပှၤကလုာ် ဒ်အံၤတကလုာ်န့ၣ် ယတကြၢး ဟ့ၣ်ကၣ်အီၤဧီၤ.+
၁၀ ယကဟီၣ်ဒီး သးအုးလၢ ကစၢၢ်ကလိတဖၣ်အဃိ
ဒီးယကသးဝံၣ်ထီၣ် ထါဟီၣ်တယုၢ်လၢ ပှၢ်မုၢ်ကနၢ အတၢ်အီၣ်ဆၣ် အလီၢ်တဖၣ် အဃိလီၤ.
တၢ်လီၢ်တဖၣ်န့ၣ် ကဘၣ်တၢ်ဒွဲၣ်အူထီၣ်အီၤ ဒီးပှၤတလ့ၢ်ထီၣ်လ့ၢ်လိၤဖဲန့ၣ် နီတဂၤလၢၤဘၣ်
ဒီးပှၤတနၢ်ဟူဘၣ် ဆၣ်ဖိကီၢ်ဖိအဒၢတဖၣ် သီၣ်ဝဲဖဲန့ၣ်လၢၤဘၣ်.
ထိၣ်တဖၣ်စ့ၢ်ကီး ယူၤကွံာ်ဝဲ ဒီးဆၣ်ဖိကီၢ်ဖိအမံၤတဖၣ် ဃ့ၢ်ထီၣ်ကွံာ်ဝဲအဃိ အဝဲသ့ၣ် တအိၣ်ဖဲန့ၣ်လၢၤဘၣ်.+
၁၁ ယကဒုးကဲထီၣ် ဝ့ၢ်ယရူၤၡလ့ၣ်လၢ လၢၢ်ပူၣ်တဖၣ်+ ဒီးဒုးကဲထီၣ်အီၤလၢ တၢ်လီၢ်လၢ ထွံၣ်မံၤကအိၣ်ဝဲ အဂီၢ်လီၤ.+
ယကဒုးအိၣ်သယုၢ် ယူဒၤအဝ့ၢ်တဖၣ် ဒီးပှၤတအိၣ်လၢအပူၤ နီတဂၤလၢၤဘၣ်.+
၁၂ ပှၤလၢ အအိၣ်ဒီး တၢ်ကူၣ်သ့လၢ ကနၢ်ပၢၢ်ဝဲလၢ ဘၣ်မနုၤအဃိ တၢ်သ့ၣ်တဖၣ်အံၤ ကဲထီၣ်အသးလဲၣ်န့ၣ် အိၣ်တဂၤဂၤဧါ.
ပှၤလၢ ယၤ, ယဟိဝၤယွၤ တဲဘၣ်အီၤ ဘၣ်ဃးဒီးတၢ်ဂ့ၢ်အံၤ ဒ်သိး အကတဲဖျါထီၣ်က့ၤလၢ ပှၤဂၤအအိၣ်န့ၣ် အိၣ်တဂၤဂၤဧါ.
ဘၣ်မနုၤအဃိ တၢ်လီၢ်အံၤ ဟးဂီၤကွံာ်ဝဲလဲၣ်.
ဘၣ်မနုၤအဃိ တၢ်လီၢ်အံၤ ဘၣ်တၢ်ဒွဲၣ်အူထီၣ်အီၤ ဒီးကဲထီၣ်ဒ်သိးဒီး ပှၢ်မုၢ်ကနၢ
ဒီးပှၤတလ့ၢ်ထီၣ်လ့ၢ်လိၤဖဲန့ၣ် နီတဂၤဘၣ်လဲၣ်.”
၁၃ ယဟိဝၤယွၤ တဲဆၢက့ၤဝဲလၢ “ခီဖျိလၢ အဝဲသ့ၣ် တတူၢ်လိာ် ယတၢ်သိၣ်တၢ်သီ* လၢယပာ်လီၤန့ၢ် အဝဲသ့ၣ်ဘၣ် ဒီးခီဖျိလၢ အဝဲသ့ၣ် တမၤထွဲဝဲ ဒီးတဒိကနၣ် ယကလုၢ်ဘၣ် အဃိလီၤ. ၁၄ အဝဲသ့ၣ် အခိၣ်ကိၤ ဒီးလဲၤဝဲဒ် အနီၢ်ကစၢ်အသး ဟံးစုနဲၣ်ကျဲအီၤ အသိးလီၤ.+ ဒီးအဝဲသ့ၣ် ဘူၣ်ထီၣ်ဘါထီၣ် ဘဧၤလး အတၢ်ဂီၤတၢ်ဖှီၣ်တဖၣ် ဒ်အဝဲသ့ၣ် အပၢ်တဖၣ် သိၣ်လိတ့ၢ် အီၤအသိးလီၤ.+ ၁၅ အဃိ ယၤ, တၢ်သုးမုၢ်ဂီၢ်မုၢ်အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘ယကဒုးအီၣ် အဝဲသ့ၣ်လၢ တၢ်မုၢ်တၢ်ဘိလၢအခၣ် ဒီးယကဒုးအီ အဝဲသ့ၣ်လၢ ထံလၢအအိၣ်ဒီး အစုၣ်လီၤ.+ ၁၆ ယကမၤလီၤပြံလီၤပြါ အဝဲသ့ၣ်လၢ ပှၤကလုာ်တဖၣ်လၢ အဝဲသ့ၣ် ဒီးအဝဲသ့ၣ် အမိၢ်ပၢ်ဖံဖု လၢပျၢၤတဖၣ် တသ့ၣ်ညါဝဲဘၣ် အကျါလီၤ.+ ယကပျဲလီၤနးတဘ့ၣ် တုၤလၢ ယမၤဟးဂီၤကွံာ် အဝဲသ့ၣ် ခဲလၢာ်လီၤ.’+
၁၇ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ မၤလိာ်ပှၤလၢ
ပကဆိကမိၣ်ထံ တၢ်လၢအမၤအသး
ဒီးကိးဖှိၣ် ပိာ်မုၣ်တဖၣ်လၢ အသးဝံၣ်ထါဟီၣ်လီၤ.+
ဒီးအမၢပလဲၤကိးန့ၢ် ပိာ်မုၣ်တဖၣ်လၢ အဟီၣ်သ့
၁၈ ဒ်သိးအဝဲသ့ၣ် ကကရီဟဲဝဲ ဒီးက သးဝံၣ် ထါဟီၣ်တယုၢ်လၢပဂီၢ်
တုၤလၢ ပမဲာ်ထံလီၤ
ဒီးပမဲာ်ထံ ပုာ်ထီၣ်ယွၤလီၤလီၤ.+
၁၉ ပှၤနၢ်ဟူ ပှၤဟီၣ်ကိးပသူထီၣ်လၢ ဝ့ၢ်စံယိၣ် ဒီးတဲဝဲလၢ+
“ပဘၣ်နးဘၣ်ဖှီၣ်နးမး.
၂၀ သုဝဲပိာ်မုၣ်သ့ၣ်ဧၢ, ဒိကနၣ် ယဟိဝၤယွၤ အတၢ်ကတိၤတက့ၢ်.
မ်သုတူၢ်လိာ် တၢ်လၢ ကစၢ်ယွၤ တဲဝဲတက့ၢ်.
သိၣ်လိ သုဖိမုၣ်တဖၣ်လၢ တၢ်ဟီၣ်တၢ်ယၢၤအံၤအဂ့ၢ်
ဒီးသိၣ်လိလိာ်သုသး တဂၤဒီးတဂၤလၢ ထါဟီၣ်အံၤ အဂ့ၢ်တက့ၢ်.+
၂၁ တၢ်သံ ဟဲထီၣ်လၢ ပပဲတြီဖိတဖၣ် ဒ်ဒုၣ်ဒါအသိးလီၤ.
အဟဲနုာ်လၢ ပတၢးလၢအကျၢၤတဖၣ်အပူၤ
ဒ်သိး ကဖီၣ်န့ၢ်ဝဲ ဖိသၣ်လၢ ကျဲပူၤ
ဒီးပိာ်ခွါသးစၢ်တဖၣ်လၢ တၢ်ဆါ တၢ်ပှ့ၤအလီၢ်တဖၣ်လီၤ.’+
၂၂ တဲလၢ ‘ယဟိဝၤယွၤ တဲဝဲလၢ
“ပှၤအစိၣ်တဖၣ် ကအိၣ်ဝဲလၢ ဟီၣ်ခိၣ်လိၤ ဒ်တၢ်အ့ၣ်တၢ်ဆံၣ် အသိး
ဒီးကလီၤဂာ် ဒ်သိးဒီး ဘုကၠူၣ်တဂ့ၢ်လၢ ပှၤကူးတၢ်ဖိ ကူးဝဲဝံၤသီသီဒီး ပာ်လီၤဝဲလၢ အလီၢ်ခံလီၤ.
ဒီးပှၤလၢ ကထၢဖှိၣ် ဘုကၠူၣ်တဖၣ် တအိၣ်နီတဂၤဘၣ်.”’”+
၂၃ ယၤ, ယဟိဝၤယွၤ တဲဝဲလၢ
“မ်ပှၤကူၣ်တၢ်သ့ သုတပာ်ကဖၢလၢအသးလၢ အတၢ်ကူၣ်သ့ အဃိတဂ့ၤ.+
မ်ပှၤလၢ အဂံၢ်ဆူၣ်ဘါဆူၣ် သုတပာ်ကဖၢလၢအသးလၢ အဂံၢ်ဆူၣ် ဘါဆူၣ် အဃိတဂ့ၤ.
ဒီးမ်ပှၤထူးပှၤတီၤ သုတပာ်ကဖၢလၢအသးလၢ အတၢ်ထူးတၢ်တီၤ အဃိတဂ့ၤ.”+
၂၄ ယၤ, ယဟိဝၤယွၤ တဲဝဲလၢ “ပှၤလၢ အပာ်ကဖၢလၢအသးန့ၣ်
မ်အပာ်ကဖၢလၢအသး ခီဖျိလၢ အသ့ၣ်ညါနၢ်ပၢၢ်ယၤ+
ဒီးသ့ၣ်ညါလၢ ယမ့ၢ် ယဟိဝၤယွၤ လၢအမ့ၢ်ကစၢ်လၢ အပာ်ဖျါထီၣ် တၢ်အဲၣ်လၢအတီ, တၢ်တီတၢ်လိၤ ဒီးစံၣ်ညီၣ်တၢ် တီတီလိၤလိၤလၢ ဟီၣ်ခိၣ်ချၢ အဃိန့ၣ်တက့ၢ်.+
တၢ်ဂ့ၤတၢ်ဝါတဖၣ်န့ၣ် မ့ၢ်တၢ်လၢ ယဘၣ်သူၣ်ဘၣ်သးလီၤ.”+
၂၅ ယဟိဝၤယွၤ တဲဝဲလၢ “ပှၤလၢ အဒိးတၢ်ကူးတရံး ဘၣ်ဆၣ် တဒိးဘၣ် တၢ်တကူးတရံး နီၢ်ကီၢ်ဘၣ် ကိးဂၤဒဲးန့ၣ် မုၢ်နံၤတဖၣ်လၢ ယကဟံးန့ၢ် အဝဲသ့ၣ်အရ့န့ၣ် ဟဲဘူးထီၣ်လံ.+ ၂၆ ပှၤတဖၣ်န့ၣ် မ့ၢ်ဝဲ ပှၤအဲၤကူပတူးဖိ,+ ယူဒၤအပှၤဂီၢ်မုၢ်,+ ပှၤအဒိၣ်ဖိ,+ ပှၤဧၣ်မိၣ်ဖိ,+ ပှၤမိၤအးဖိ+ ဒီးပှၤလၢ အတံာ်ဖုၣ်လီၤ အနၢ်သက့ၤထံး လၢအအိၣ်ဝဲဆိးဝဲလၢ ပှၢ်မုၢ်ကနၢအပူၤလီၤ.+ ပှၤကလုာ်တဖၣ်အံၤခဲလၢာ် ဃုာ်ဒီး ပှၤအံၣ်စရ့လးဖိစ့ၢ်ကီး တဒိးတၢ်ကူးတရံး လၢသးဘၣ်.”+