ယံးရမံယၤ
၈ ယဟိဝၤယွၤ တဲဝဲလၢ “ဖဲန့ၣ်အဆၢကတီၢ် ယူဒၤအစီၤပၤတဖၣ်အဃံ, အဝဲသ့ၣ် အပဒိၣ်ဖးဒိၣ်တဖၣ်အဃံ, ပှၤလုၢ်တၢ်ဒိၣ်တဖၣ်အဃံ, ဝံတဖၣ်အဃံ ဒီးပှၤလၢ အအိၣ်လၢ ဝ့ၢ်ယရူၤၡလ့ၣ် အပူၤတဖၣ် အဃံန့ၣ် ကဘၣ်တၢ်ထုးထီၣ်ကွံာ်အီၤလၢ အဝဲသ့ၣ် အသွၣ်ခိၣ်တဖၣ် အပူၤလီၤ. ၂ ဒီးအဝဲသ့ၣ်အဃံ ကအိၣ်ပြၤလီၤအသးလၢ မုၢ်, လါ ဒီးဆၣ်တဖၣ်* လၢအဝဲသ့ၣ် ဃုတ့ၢ်, ပိာ်တ့ၢ်ဝဲအခံ, အဲၣ်တ့ၢ်, ဘူၣ်ထီၣ်ဘါထီၣ် ဒီးမၤတ့ၢ်ဝဲအတၢ်န့ၣ် အမဲာ်ညါလီၤ.+ ပှၤတထၢဖှိၣ် ဒီးခူၣ်လီၤ အဝဲသ့ၣ် အဃံတဖၣ်အံၤဘၣ် ဒီးအကကဲထီၣ် ဒ်သိးဒီး တၢ်အ့ၣ်တၢ်ဆံၣ်လၢ ဟီၣ်ခိၣ်လိၤလီၤ.”+
၃ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ပှၤတနီၤလၢ ပှၤအၢပှၤသီ တကလုာ်အံၤအကျါ ကဆဲးအိၣ်မူဒံး ဒီးဖဲကယဲၢ်တၢ်လီၢ်တဖၣ်လၢ ယမၤလီၤပြံလီၤပြါ အဝဲသ့ၣ်န့ၣ် အဝဲသ့ၣ် ကဃုထၢ တၢ်သံ ဒီးတဃုထၢ တၢ်မူဘၣ်.”
၄ “ဒီးနကဘၣ်တဲ အဝဲသ့ၣ်လၢ ‘ယဟိဝၤယွၤ တဲဝဲဒ်အံၤ,
“အဝဲသ့ၣ် မ့ၢ်လီၤဃံၢ်န့ၣ် မ့ၢ်အတဂဲၤဆၢထၢၣ် ကဒါက့ၤဘၣ်ဧါ.
ပှၤတဂၤ မ့ၢ်ဃၣ်ကဒါက့ၤအသးန့ၣ် မ့ၢ်ပှၤအဂၤတဂၤ တဃၣ်ကဒါက့ၤအသး စ့ၢ်ကီးဘၣ်ဧါ.
၅ ဝ့ၢ်ယရူၤၡလ့ၣ် အပှၤဂီၢ်မုၢ်တဖၣ်အံၤ ဘၣ်မနုၤအဃိ အဝဲသ့ၣ် ဆဲးမၤတၢ်လၢ အတအိၣ်ဒီး တၢ်သးတီဘၣ်လဲၣ်.
အဝဲသ့ၣ် ဟံးဃာ် တၢ်လံၣ် တၢ်လီအကျဲ
ဒီးအဝဲသ့ၣ် တအဲၣ်ဒိး ဃၣ်က့ၤအသး နီတစဲးဘၣ်.+
၆ ယဒိကနၣ်တၢ် ဒီးကနၣ်ထံတၢ် ဘၣ်ဆၣ် အဝဲသ့ၣ် တတဲ တၢ်လၢအမ့ၢ်အတီဘၣ်.
ပှၤတဂၤမး တပီၢ်ယၢ်လီၤက့ၤအသးလၢ အတၢ်အၢတၢ်သီ ဒီးတသံကွၢ်ဝဲလၢ ‘ယမၤတ့ၢ် တၢ်မနုၤလဲၣ်’ န့ၣ်ဘၣ်.+
အဝဲသ့ၣ် တဂၤစုာ်စုာ် ဆဲးက့ၤကဒါက့ၤလၢ ကျဲလၢ ပှၤပိာ်ဝဲအါ ဒ်ကသ့ၣ်ဃ့ၢ်သဖှိလၢ တၢ်ဒုးပျီပူၤအသိးလီၤ.
၇ ထိၣ်ထီကိာ်တဖၣ်ဒၣ်လဲာ် သ့ၣ်ညါ တၢ်ဆၢကတီၢ်လၢ အကဘၣ် သုးလီၢ်သုးကျဲလီၤ.
ထိၣ်လွံၢ်တဖၣ်, ထိၣ်ဘျ့ၣ်ဘျီၣ်တဖၣ် ဒီးထိၣ်အဂၤတဖၣ် သ့ၣ်ညါ တၢ်ဆၢကတီၢ်လၢ အကဘၣ်ဟဲက့ၤ ဒီးဟဲက့ၤဝဲလီၤ.
ဘၣ်ဆၣ် ယပှၤဂီၢ်မုၢ် တနၢ်ပၢၢ် တၢ်ဆၢကတီၢ်လၢ ယၤ, ယဟိဝၤယွၤ ကစံၣ်ညီၣ် အဝဲသ့ၣ်ဘၣ်.”’+
၈ ‘သုတဲလၢ “ပဝဲဒၣ်အံၤ ပအိၣ်ဒီး တၢ်ကူၣ်သ့ ဒီးပအိၣ်ဒီး ယဟိဝၤယွၤ အတၢ်သိၣ်တၢ်သီ” န့ၣ်ကသ့ဒ်လဲၣ်.
နီၢ်ကီၢ်န့ၣ် ပှၤကွဲးလံာ်ဖိတဖၣ် သူဝဲ အထိၣ်ဒံးဘိ+ ထဲလၢ ကကွဲးဝဲ တၢ်လံၣ်တၢ်လီ အဂီၢ်လီၤ.
၉ ပှၤကူၣ်တၢ်သ့ ဘၣ်တၢ်မၤမဲာ်ဆှးအီၤလံ.+
အဝဲသ့ၣ် ပျံၤတၢ်ဒီး ပှၤကဖီၣ်န့ၢ် အဝဲသ့ၣ်လီၤ.
ကွၢ်မီၤ, အဝဲသ့ၣ် တတူၢ်လိာ် ယဟိဝၤယွၤ အတၢ်ကတိၤဘၣ်အဃိ
အဝဲသ့ၣ်အိၣ်ဒီး တၢ်ကူၣ်သ့ မနုၤလဲၣ်.
၁၀ အဃိ ယကဟ့ၣ်လီၤကွံာ် အဝဲသ့ၣ် အမါတဖၣ်လၢ ပှၤပိာ်ခွါအဂၤတဖၣ်
ဒီးဟ့ၣ်လီၤကွံာ် အစံာ်ပျီတဖၣ်လၢ ပှၤအဂၤတဖၣ်လီၤ.+
စးထီၣ်လၢ ပှၤအဒိၣ်ကတၢၢ် တုၤလီၤလၢ ပှၤအဆံးကတၢၢ်န့ၣ် အဝဲသ့ၣ် မၤတၢ်တတီတလိၤ ဒ်သိးအကမၤန့ၢ်ဘၣ် တၢ်လၢအနီၢ်ကစၢ် အဂီၢ်လီၤ.+
ဒီးစးထီၣ်လၢဝံ တုၤလီၤလၢ ပှၤလုၢ်တၢ်ဒိၣ်တဖၣ်န့ၣ် အဝဲသ့ၣ် လံၣ်အီၣ်လီအီၣ်တၢ်လီၤ.+
၁၁ ယပှၤဂီၢ်မုၢ်* ဘၣ်ဒိဘၣ်ထံးလၢာ်လံ ဘၣ်ဆၣ် အဝဲသ့ၣ် အဲၣ်ဒိးမၤဘျါယပှၤဂီၢ်မုၢ် ထဲလၢအဘ့ၣ်ခိၣ် ခီဖျိ တဲအီၤယိယိဖိလၢ
“တၢ်ခဲလၢာ် အိၣ်ဝဲမုာ်မုာ်ခုၣ်ခုၣ်, တၢ်ခဲလၢာ် အိၣ်ဝဲမုာ်မုာ်ခုၣ်ခုၣ်လီၤ.”
ဘၣ်ဆၣ် နီၢ်ကီၢ်န့ၣ် တၢ်တမုာ်တခုၣ် နီတစဲးဘၣ်.+
၁၂ မ့ၢ်အဝဲသ့ၣ် တူၢ်ဘၣ်တၢ်မဲာ်ဆှး ခီဖျိလၢတၢ်လီၤသးဘၣ်အၢလၢ အဝဲသ့ၣ် မၤဝဲတဖၣ်အဃိန့ၣ်ဧါ.
အဝဲသ့ၣ် တမဲာ်ဆှးဘၣ်.
အဝဲသ့ၣ် တသ့ၣ်ညါ တၢ်မဲာ်ဆှး နီတစဲးဘၣ်+
အဃိ အဝဲသ့ၣ် ကလီၤဃံၢ်ဒ်သိးဒီး ပှၤလၢအလီၤဃံၢ်တ့ၢ်တဖၣ်လီၤ.
ဖဲယစံၣ်ညီၣ် အဝဲသ့ၣ်အခါ အဝဲသ့ၣ် ကလီၤဃံၢ်ဝဲလီၤ.’+ ယဟိဝၤယွၤ တဲဝဲဒ်န့ၣ်လီၤ.
၁၃ ယဟိဝၤယွၤ တဲဝဲလၢ ‘ဖဲယပာ်ဖှိၣ်ထီၣ် အဝဲသ့ၣ်အခါ ယကမၤဟးဂီၤ အဝဲသ့ၣ်လီၤ.
လၢစပံးမုၢ်အလိၤန့ၣ် စပံးသၣ်တအိၣ် နီတဖျၢၣ်လၢၤဘၣ်. လၢချၢၣ်ဒၢထူၣ်အလိၤန့ၣ် ချၢၣ်ဒၢသၣ် တအိၣ်လၢၤဘၣ် ဒီးအလၣ်ကလီၤညွံး ကွံာ်ဝဲလီၤ.
ဒီးတၢ်လၢ ယဟ့ၣ်ပာ်စၢၤ အဝဲသ့ၣ်န့ၣ် ကလီၤမၢ်ကွံာ်ဝဲလီၤ.’”
၁၄ “ဘၣ်မနုၤအဃိ ပဆ့ၣ်နီၤဖဲအံၤလဲၣ်.
မ်ပပာ်ဖှိၣ်ထီၣ်သကိးပသး ဒီးလဲၤနုာ်လီၤလၢ ဝ့ၢ်တဖၣ်လၢ အအိၣ်ဒီးအဒူၣ်လၢအကျၢၤ+ ဒီးသံဖဲန့ၣ်ဟီ.
၁၅ လၢညါန့ၣ် ပမုၢ်လၢ်လၢ ပကန့ၢ်ဘၣ် တၢ်ဃူတၢ်ဖိး ဘၣ်ဆၣ် ပတန့ၢ်ဘၣ် တၢ်လၢအဂ့ၤ နီတမံၤဘၣ်.
ပမုၢ်လၢ်တ့ၢ်လၢ ပကဘျါက့ၤ ဘၣ်ဆၣ် တၢ်လီၤပျံၤလီၤဖုး လီၤဘၣ်ပှၤလီၤ.+
၁၆ ပနၢ်ဟူစိ ဒုၣ်ဒါအကသ့ၣ်တဖၣ် သါသဖှိထီၣ် သီၣ်ဝဲလၢ ဝ့ၢ်ဒၣ် အပူၤလီၤ.
ဖဲအဝဲသ့ၣ် အကသ့ၣ်တဖၣ် ကိးသီၣ်ဝဲ ဟံးဟံးဟဲးဟဲး အခါ
ထံကီၢ်ဒီတဘ့ၣ် ဟူးဝးဝဲလီၤ.
ဒုၣ်ဒါတဖၣ် ဟဲနုာ် မၤဟးဂီၤကွံာ် ထံကီၢ် ဒီးတၢ်အိၣ်လၢ အပူၤခဲလၢာ်,
ဝ့ၢ်ဒီး ပှၤအိၣ်လၢ ဝ့ၢ်ပူၤခဲလၢာ်လီၤ.”
၁၇ ယဟိဝၤယွၤ တဲဝဲလၢ “ယကဆှၢလီၤ ဂုၢ်တဖၣ် လၢသုကျါ,
ဂုၢ်လၢအစုၣ်အၢတဖၣ် လၢပှၤအူအီၤတန့ၢ်ဘၣ်
ဒီးဂုၢ်တဖၣ်န့ၣ် ကအ့ၣ်သု သပှၢ်တၢၢ်လီၤ.”
၁၈ ယတၢ်သးအုးန့ၣ် ပှၤမၤဘျါက့ၤအီၤတန့ၢ်ဘၣ်
ဒီးယသးဘၣ်ဖှီၣ်ဒိၣ်မးလီၤ.
၁၉ ယပှၤကလုာ်လၢ အအိၣ်လၢ တၢ်လီၢ်ဖးယံၤန့ၣ်
ကိးပသူထီၣ်လၢ တၢ်မၤစၢၤ အဂီၢ်လၢ
“ယဟိဝၤယွၤ တအိၣ်လၢ စံယိၣ် အပူၤဧီၤ.
စံယိၣ်အစီၤပၤ တအိၣ်လၢ စံယိၣ် အပူၤဧီၤ.”
“ဘၣ်မနုၤအဃိ အဝဲသ့ၣ် မၤဆါယသးလၢ အဝဲသ့ၣ် အတၢ်ဂီၤတၢ်ဖှီၣ်တဖၣ်
ဒီးအဝဲသ့ၣ် အယွၤအဂၤတဖၣ်လၢ အဘျုးတအိၣ်ဘၣ်န့ၣ်လဲၣ်.”
၂၀ “ကူးတၢ်အကတီၢ် တလၢကွံာ်လံ ဒီးတၢ်ကိၢ်ခါ ကတၢၢ်လံ.
ဘၣ်ဆၣ် ပတပူၤဖျဲးဒံးဘၣ်.”
၂၁ ယပှၤကလုာ် ဘၣ်ဒိဘၣ်ထံးလၢာ်လံအဃိ ယသးဟးဂီၤ+
ဒီးယသူၣ်အုးသးအုးလီၤ.
ယပျံၤတၢ်ဖုးတၢ်ဒိၣ်မးလီၤ.
၂၂ လၢကံးလဧး အဟီၣ်ကဝီၤပူၤန့ၣ် သ့ၣ်စရံအထုး* တအိၣ်လၢၤဧီၤ.+
ကသံၣ်သရၣ် တအိၣ်ဖဲန့ၣ် နီတဂၤဧီၤ.+
ဘၣ်မနုၤအဃိ ယပှၤကလုာ် တအိၣ်ဆူၣ်ထီၣ်ဒံးဘၣ်လဲၣ်.+