၁ စီၤပၤ

၈ ဖဲန့ၣ်အခါ စီၤၡလိၤမိၤ ကိးဖှိၣ်+ အံၣ်စရ့လး အပှၤသူၣ်က့သးပှၢ်တဖၣ်, အံၣ်စရ့လးအဒူၣ်တဖၣ်​ အခိၣ်​ ဒီးအံၣ်စရ့လး အဒူၣ်ဖိထၢဖိတဖၣ်​ အခိၣ်အနၢ်ခဲလၢာ်လီၤ.+ အဝဲသ့ၣ်လဲၤလၢ စီၤၡလိၤမိၤအအိၣ်လၢ ဝ့ၢ်ယရူၤၡလ့ၣ်​ ဒ်သိးကလဲၤဆှၢထီၣ်​ ယဟိဝၤယွၤ အတၢ်အၢၣ်လီၤအီလီၤ အတလါ လၢအအိၣ်လၢ စီၤဒၤဝံးအဝ့ၢ်+ လၢအမ့ၢ် စံယိၣ်န့ၣ်လီၤ.+ ၂ ဖဲလါအ့သၤနံၣ်* လၢအမ့ၢ် လါနွံလါတလါ ဖဲဘူၣ်* ဘၣ်ဝဲအဆၢကတီၢ်န့ၣ်​ ပှၤအံၣ်စရ့လးဖိခဲလၢာ် ပာ်ဖှိၣ်ထီၣ်အသးလၢ စီၤပၤၡလိၤမိၤ အမဲာ်ညါလီၤ.+ ၃ ဒီးအံၣ်စရ့လး အပှၤသူၣ်က့သးပှၢ်ခဲလၢာ် လဲၤတုၤဝဲ ဒီးပှၤလုၢ်တၢ်ဒိၣ်တဖၣ်​ ယိးထီၣ်ဝဲ တလါစီဆှံလီၤ.+ ၄ ပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်​ လဲၤဆှၢဝဲ တၢ်သ့ၣ်တဖၣ်အံၤလီၤ. အဝဲသ့ၣ်လဲၤဆှၢဝဲ ယဟိဝၤယွၤ အတလါစီဆှံ, တၢ်အိၣ်ဖှိၣ်အဒဲ+ ဒီးတၢ်ပီးတၢ်လီစီဆှံခဲလၢာ် လၢအအိၣ်လၢ ဒဲအပူၤန့ၣ်လီၤ. ၅ စီၤပၤၡလိၤမိၤ ဒီးပှၤအံၣ်စရ့လးဖိခဲလၢာ် လၢစီၤၡလိၤမိၤ ကိးဖှိၣ်ဝဲန့ၣ်​ အိၣ်ဝဲလၢ တလါစီဆှံအမဲာ်ညါလီၤ. ဒီးပှၤလုၢ်ထီၣ်သိ ဒီးကျီၢ်ဒီဒူၣ်+ တုၤဒၣ်လဲာ် ပှၤဂံၢ်အနီၣ်ဂံၢ် တဘၣ်လၢၤဘၣ်.

၆ ဒီးပှၤလုၢ်တၢ်ဒိၣ်​ လဲၤယိးနုာ်ဝဲ ယဟိဝၤယွၤ အတၢ်အၢၣ်လီၤအီလီၤ အတလါလၢ+ ဒၢးလၢ အလီၢ်ခံတဖျၢၣ်အပူၤ လၢအမ့ၢ် တၢ်လီၢ်စီဆှံကတၢၢ်လီၤ. ဒီးအဝဲသ့ၣ်​ ပာ်လီၤဝဲ လၢအလီၢ် ဖဲခ့ရူာ်အဒံးဆ့တဖၣ်​ အဖီလာ်လီၤ.+

၇ ဒီးခ့ရူာ် အဒံးဆ့တဖၣ်န့ၣ်​ ယူာ်ထီၣ်အသးလၢ တလါစီဆှံ အိၣ်ဝဲအလီၢ်အဃိ ခ့ရူာ် အကဒုလီၤဘၣ်လၢ တလါစီဆှံ ဒီးအနီၣ်ယိးဘိတဖၣ်​ အလိၤလီၤ.+ ၈ ဒီးနီၣ်ယိးဘိတဖၣ်န့ၣ်+ ထီဒိၣ်မးအဃိ နီၣ်ယိးဘိ အစိးနါတဖၣ်​ အိၣ်ဖျါဝဲလၢ တၢ်လီၢ်စီဆှံ လၢအအိၣ်ဝဲလၢ ဒၢးလၢအလီၢ်ခံတဖျၢၣ်န့ၣ်​ အမဲာ်ညါလီၤ. ဘၣ်ဆၣ်​ တဖျါထီၣ်​ တုၤလၢတၢ်ချၢဘၣ်. ဒီးအအိၣ်ဝဲဖဲန့ၣ်​ တုၤလၢ မုၢ်မဆါတနံၤအံၤလီၤ. ၉ လၢတလါစီဆှံအပူၤန့ၣ်​ အိၣ်ဝဲထဲ လၢၢ်ဘ့ၣ်ဘၣ်​ ခံဘ့ၣ်လီၤ.+ စီၤမိၤၡ့ပာ်လီၤဝဲ လၢၢ်ဘ့ၣ်ဘၣ်​ ခံဘ့ၣ်အံၤ+ ဖဲပှၤအံၣ်စရ့လးဖိတဖၣ်​ ဟးထီၣ်လၢ ကီၢ်အဲၤကူပတူးအပူၤ+ ဖဲယဟိဝၤယွၤ မၤတၢ်အၢၣ်လီၤအီလီၤဒီး+ အဝဲသ့ၣ်လၢ ဃိၤရ့းအခါန့ၣ်လီၤ.

၁၀ ဖဲပှၤလုၢ်တၢ်ဒိၣ်တဖၣ်​ ဟးထီၣ်လၢ တၢ်လီၢ်စီဆှံအပူၤအခါ ယဟိဝၤယွၤ အဟံၣ်န့ၣ်+ ပှဲၤဝဲဒီးတၢ်အၢၣ်လီၤ.+ ၁၁ ဒီးမ့ၢ်လၢ ယဟိဝၤယွၤ အဟံၣ်န့ၣ်​ ပှဲၤဝဲဒီးယဟိဝၤယွၤ အလၤကပီၤ ဒီးလၢတၢ်အၢၣ်အဃိ ပှၤလုၢ်တၢ်ဒိၣ်တဖၣ်​ ဆၢထၢၣ်မၤတၢ်အခ့အပှၤ အတၢ်မၤတသ့လၢၤဘၣ်.+ ၁၂ ဖဲန့ၣ်​ စီၤၡလိၤမိၤ တဲဝဲလၢ “ယဟိဝၤယွၤဧၢ, နတဲလၢ နကအိၣ်လၢ တၢ်အၢၣ်ခံးသူ အကျါလီၤ.+ ၁၃ ဒီးဟံၣ်လီၤဘီလီၤမုၢ်တဖျၢၣ်အံၤ လၢအမ့ၢ်တၢ်လီၢ် လီၤတံၢ်လီၤဆဲး လၢနကအိၣ်လၢ အပူၤ လီၤထူလီၤယိာ်န့ၣ်​ ယတ့ထီၣ်န့ၢ်နၤဝံၤလံ.”+

၁၄ ဒီးဖဲအံၣ်စရ့လး အတၢ်အိၣ်ဖှိၣ်ဒီတဖု ဆၢထၢၣ်အခါ စီၤပၤ ဃၣ်ဃီၤအသးလၢ အဝဲသ့ၣ်အအိၣ်​ ဒီးဆိၣ်ဂ့ၤအဝဲသ့ၣ်လီၤ.+ ၁၅ ဒီးအဝဲတဲဝဲလၢ “မ်အံၣ်စရ့လး အကစၢ် ယဟိဝၤယွၤ ဘၣ်တၢ်စံးထီၣ်ပတြၢၤအီၤတက့ၢ်. တၢ်လၢ အဝဲအၢၣ်လီၤ ယပၢ်စီၤဒၤဝံးလၢ အထးခိၣ်န့ၣ်​ အဝဲမၤလၢထီၣ်ပှဲၤထီၣ်ဝဲလၢ အစုလီၤ. အဝဲတဲဝဲလၢ ၁၆ ‘စးထီၣ်​ မုၢ်တနံၤလၢ ယဒုးဟးထီၣ်​ ယပှၤဂီၢ်မုၢ် အံၣ်စရ့လးလၢ ကီၢ်အဲၤကူပတူးအပူၤန့ၣ်​ လၢအံၣ်စရ့လး အဒူၣ်တဖၣ်​ အဟီၣ်ကဝီၤအပူၤ ယတဃုထၢထီၣ်ဝ့ၢ်လၢ ပှၤကတ့ထီၣ်ဟံၣ်လၢ ယမံၤကအိၣ်ဝဲ ဖဲန့ၣ်အဂီၢ်ဒံးဘၣ်.+ ဘၣ်ဆၣ်​ ယဃုထၢထီၣ်​ စီၤဒၤဝံး ဒ်သိးအကအိၣ်လၢ ယပှၤဂီၢ်မုၢ် အံၣ်စရ့လး အဖီခိၣ်လီၤ.’ ၁၇ ဒီးယပၢ်စီၤဒၤဝံး အသးဆူၣ်လၢ ကတ့ထီၣ်​ ဟံၣ်တဖျၢၣ်လၢ အံၣ်စရ့လး အကစၢ် ယဟိဝၤယွၤ အမံၤအဂီၢ်လီၤ.+ ၁၈ ဒီးယဟိဝၤယွၤ တဲဘၣ်ယပၢ် စီၤဒၤဝံးလၢ ‘နသးဆူၣ်လၢ နကတ့ထီၣ်​ ဟံၣ်တဖျၢၣ်လၢ ယမံၤအဂီၢ် ဒီးနတၢ်သးဆူၣ်န့ၣ်​ ဂ့ၤဒိၣ်မး. ၁၉ ဘၣ်ဆၣ်​ နတမ့ၢ်ပှၤလၢ အကတ့ထီၣ်​ ယဟံၣ်ဘၣ်. နဖိခွါလၢ အကအိၣ်ဖျဲၣ်ထီၣ်န့ၣ်​ ကမ့ၢ်ပှၤလၢ အကတ့ထီၣ်​ ဟံၣ်တဖျၢၣ်လၢ ယမံၤအဂီၢ်လီၤ.’+ ၂၀ ယဟိဝၤယွၤ မၤလၢပှဲၤထီၣ်​ အတၢ်အၢၣ်လီၤအဃိ ခဲအံၤ ယထီၣ်​ ယပၢ်စီၤဒၤဝံး အလီၢ် ဒီးယဆ့ၣ်နီၤလၢ အံၣ်စရ့လး အလီၢ်ပစိာ် အဖီခိၣ်​ ဒ်ယဟိဝၤယွၤ အၢၣ်လီၤဝဲအသိးလီၤ. ဒီးယတ့ထီၣ်​ ဟံၣ်တဖျၢၣ်လၢ အံၣ်စရ့လး အကစၢ် ယဟိဝၤယွၤ အမံၤအဂီၢ်လီၤ.+ ၂၁ ဒီးယသူၣ်ထီၣ်​ တၢ်လီၢ်ဖဲန့ၣ်လၢ တလါစီဆှံလၢ အအိၣ်ဒီး တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်+ အဂီၢ်လီၤ. ယဟိဝၤယွၤ မၤဝဲတၢ်အၢၣ်လီၤအီလီၤအံၤဒီး ပမိၢ်ပၢ်ဖံဖု လၢပျၢၤတဖၣ်​ ဖဲအဒုးဟးထီၣ်​ အဝဲသ့ၣ်လၢ ကီၢ်အဲၤကူပတူး အပူၤန့ၣ်လီၤ.”

၂၂ ဒီးစီၤၡလိၤမိၤ ဆၢထၢၣ်လၢ ယဟိဝၤယွၤ အတၢ်လုၢ်လီၢ် အမဲာ်ညါ ဒီးအံၣ်စရ့လး အတၢ်အိၣ်ဖှိၣ်ဒီတဖု အမဲာ်ညါလီၤ. ဒီးအဝဲယူာ်ထီၣ်အစုလၢ မူခိၣ်+ ၂၃ ဒီးအဝဲတဲဝဲလၢ “အိ အံၣ်စရ့လး အကစၢ် ယဟိဝၤယွၤဧၢ, လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ကစၢ်ယွၤ ဒ်သိးဒီးနၤ တအိၣ်ဘၣ်.+ နမ့ၢ်ယွၤလၢ အတီဒီး အတၢ်အၢၣ်လီၤအီလီၤ ဒီးနပာ်ဖျါထီၣ်​ တၢ်အဲၣ်လၢအတီ+ လၢနခ့နပှၤတဖၣ်​ လၢအမၤထွဲ နတၢ်ဘၣ်သးလၢ အသးဒီဖျၢၣ်​ အဖီခိၣ်လီၤ.+ ၂၄ နတီဒီး တၢ်အၢၣ်လီၤလၢ နမၤအီၤဒီး ယပၢ်စီၤဒၤဝံးလီၤ. နအၢၣ်လီၤတၢ်လၢ နထးခိၣ်​ ဒီးတနံၤအံၤ နမၤလၢထီၣ်ပှဲၤထီၣ်အီၤလၢ နစုလီၤ.+ ၂၅ အိ အံၣ်စရ့လး အကစၢ် ယဟိဝၤယွၤဧၢ, နတဲစ့ၢ်ကီး ယပၢ်စီၤဒၤဝံးလၢ ‘နဖိနလံၤ မ့ၢ်ပလီၢ်အသး ဒ်သိးအကအိၣ်မူလၢ ယမဲာ်ညါ လၢတၢ်သးတီအပူၤ ဒ်နအိၣ်မူလၢ တၢ်သးတီအပူၤအသိးန့ၣ်​ နစၢၤနသွဲၣ်တဂၤ ကဆ့ၣ်နီၤလၢ အံၣ်စရ့လး အလီၢ်ပစိာ် အဖီခိၣ်ထီဘိလီၤ.’+ အဃိ ဝံသးစူၤ တီဒီး နတၢ်အၢၣ်လီၤအံၤတက့ၢ်. ၂၆ အိ အံၣ်စရ့လး အကစၢ်ယွၤဧၢ, တၢ်အၢၣ်လီၤလၢ နမၤအီၤဒီး ယပၢ်စီၤဒၤဝံးန့ၣ်​ ဝံသးစူၤ မၤလၢပှဲၤအီၤတက့ၢ်.

၂၇ “မ့ၢ်ကစၢ်ယွၤ ကအိၣ်လၢ ဟီၣ်ခိၣ်​ အနီၢ်ကီၢ်ဧါ.+ မူခိၣ်လၢ အလဲၢ်အထီအံၤဒၣ်လဲာ် နအိၣ်တတြီၢ်ဘၣ်အဃိ+ ဟံၣ်လၢ ယတ့ထီၣ်တဖျၢၣ်အံၤ နအိၣ်ကတြီၢ်ဒ်လဲၣ်.+ ၂၈ အိ ယကစၢ် ယဟိဝၤယွၤဧၢ, ခဲအံၤ ဒိကနၣ်​ ယတၢ်ထုကဖၣ်​ ဒီးနခ့နပှၤယၤအံၤ အတၢ်ဃ့ကညးလၢ တၢ်သးကညီၤ အဂီၢ်တက့ၢ်. ယဃ့နၤ တၢ်မၤစၢၤဒီး ဃ့ထုကဖၣ်လၢ နမဲာ်ညါ လၢတနံၤအံၤန့ၣ်​ ဒိကနၣ်တက့ၢ်. ၂၉ ဘၣ်ဃးဒီး တၢ်လုၢ်ဟံၣ်အံၤ နတဲပာ်စၢၤလၢ နမံၤကအိၣ်ဖဲန့ၣ်လီၤ.+ အဃိ မ်နမဲာ်ကွၢ်လီၤ တၢ်လုၢ်ဟံၣ်တဖျၢၣ်အံၤ လၢမုၢ်ဆါ ဒီးလၢမုၢ်နၤ ဒ်သိးနကဒိကနၣ်​ နခ့နပှၤယၤအံၤ အတၢ်ထုကဖၣ်​ ဖဲယဃၣ်ဃီၤယသးဆူ တၢ်လုၢ်ဟံၣ်အံၤအအိၣ်​ ဒီးယဃ့ထုကဖၣ်​ အခါန့ၣ်တက့ၢ်.+ ၃၀ ဖဲနပှၤဂီၢ်မုၢ် အံၣ်စရ့လး ဃၣ်ဃီၤအသးလၢ တၢ်လုၢ်ဟံၣ်အံၤ ဒီးဃ့ကညးတၢ်လၢ တၢ်သးကညီၤ အဂီၢ်အခါ ဒီးဖဲနခ့နပှၤယၤအံၤ ဃ့ထုကဖၣ်အခါ ဒိကနၣ်ဘၣ်​ ပတၢ်ထုကဖၣ်​ လၢနတၢ်အိၣ်တၢ်ဆိးအလီၢ် လၢမူခိၣ်တက့ၢ်.+ ဝံသးစူၤ ဒိကနၣ်ပှၤ ဒီးပျၢ်ပတၢ်ကမၣ်တက့ၢ်.+

၃၁ “ပှၤတဂၤမ့ၢ် မၤကမၣ်​ အသကိးတဂၤ ဒီးအမ့ၢ်ဘၣ်မၤတၢ်အၢၣ်လီၤ* လၢအပၣ်ဃုာ်ဒီး တၢ်ဆိၣ်အၢန့ၣ်​ ဖဲအဟဲ လၢနတၢ်လုၢ်လီၢ် အမဲာ်ညါ လၢအအိၣ်ဝဲလၢ ဟံၣ်တဖျၢၣ်အံၤ အပူၤအခါ+ ၃၂ လၢမူခိၣ်န့ၣ်​ မ်နဒိကနၣ်​ ဒီးစံၣ်ညီၣ်န့ၢ်တၢ်လၢ နခ့နပှၤတဖၣ်အံၤအဂီၢ်တက့ၢ်. ဒီးပှၤလၢအအၢအသီတဂၤန့ၣ်​ မ်နစံၣ်ညီၣ်ဆၢတဲာ်လၢ အတၢ်ကမၣ်အိၣ်​ ဒီးသိၣ်ဃီၣ်အီၤ ဒ်အတၢ်မၤ အိၣ်ဝဲအသိးတက့ၢ်. ဒီးမ့မ့ၢ် ပှၤလၢအတီအလိၤတဂၤန့ၣ်​ မ်နစံၣ်ညီၣ်ဆၢတဲာ်လၢ အတၢ်ကမၣ်တအိၣ်ဘၣ်​ ဒီးဟ့ၣ်ဆၢက့ၤအီၤ ဒ်အတၢ်တီတၢ်လိၤ အိၣ်ဝဲအသိးတက့ၢ်.+

၃၃ “ဒီးနပှၤဂီၢ်မုၢ် အံၣ်စရ့လး မ့ၢ်မၤကမၣ်နၤ ခဲအံၤခဲအံၤ ဒီးအဒုၣ်အဒါတဖၣ်​ မ့ၢ်မၤနၢၤကွံာ် အဝဲသ့ၣ်န့ၣ်+ ဖဲအဝဲသ့ၣ်ဟဲက့ၤလၢ နအိၣ်​ ဒီးမၤလၤကပီၤနမံၤ+ ဒီးဃ့ထုကဖၣ်​ ဒီးဃ့ကညးနၤ လၢဟံၣ်တဖျၢၣ်အံၤအပူၤ ဒ်သိးနကသးကညီၤ အဝဲသ့ၣ်အဂီၢ်အခါ+ ၃၄ လၢမူခိၣ်န့ၣ်​ မ်နဒိကနၣ်​ ဒီးပျၢ်နပှၤဂီၢ်မုၢ် အံၣ်စရ့လး အတၢ်ကမၣ်​ ဒီးဟဲက့ၤကိး အဝဲသ့ၣ်လၢ ကီၢ်လၢ နဟ့ၣ်ပာ်စၢၤ အဝဲသ့ၣ်​ အမိၢ်ပၢ်ဖံဖု လၢပျၢၤတဖၣ်တက့ၢ်.+

၃၅ “ဒီးအဝဲသ့ၣ်မ့ၢ် မၤကမၣ်နၤ ခဲအံၤခဲအံၤ ဒီးမူခိၣ်မ့ၢ်ကးတံာ်ဃာ်အသး ဒီးမူခိၣ်မ့ၢ် တစူၤလၢၤဘၣ်+ ဘၣ်ဆၣ်​ နမ့ၢ်ဆီၣ်လီၤအဝဲသ့ၣ်+ ဒီးအဝဲသ့ၣ်မ့ၢ် ပီၢ်ယၢ်လီၤက့ၤအသး လၢအတၢ်ဒဲးဘး ဒီးအဝဲသ့ၣ်မ့ၢ် ဃၣ်ဃီၤအသးလၢ ဟံၣ်တဖျၢၣ်အံၤအအိၣ်​ ဒီးဃ့ထုကဖၣ်တၢ်ဒီး မၤလၤကပီၤနမံၤန့ၣ်+ ၃၆ လၢမူခိၣ်န့ၣ်​ မ်နဒိကနၣ်​ နပှၤဂီၢ်မုၢ် အံၣ်စရ့လး အတၢ်ထုကဖၣ်​ ဒီးပျၢ်ကွံာ် နခ့နပှၤတဖၣ်​ အတၢ်ကမၣ်​ တက့ၢ်. ဒီးသိၣ်လိ အဝဲသ့ၣ်+ ကျဲလၢအဂ့ၤလၢ အဝဲသ့ၣ်ကြၢးပိာ်ဝဲ ဒီးဒုးစူၤလီၤမူခိၣ်လၢ ကီၢ်လၢ+နဟ့ၣ်ပာ်စၢၤ နပှၤဂီၢ်မုၢ် ဒ်တၢ်န့ၢ်သါအသိးန့ၣ်​ အပူၤတက့ၢ်.

၃၇ “ဒီးတၢ်သၣ်ဝံၤလီၤဒိမ့ၢ်ဂ့ၤ,+ တၢ်ဆါသံသတြိာ်မ့ၢ်ဂ့ၤ, တၢ်မုၢ်တၢ်ဘိ မ့ၢ်ဟးဂီၤမ့ၢ်ဂ့ၤ, ဘုအဃၢ်လီၤမ့ၢ်ဂ့ၤ,+ ဒွဲၣ်အဖုတဖၣ်မ့ၢ်ဂ့ၤ, တၢ်ဆါမ့ၢ်အိၣ်ထီၣ်​ တမံၤဂ့ၤတမံၤဂ့ၤ လၢကီၢ်ပူၤ မ့တမ့ၢ် ဒုၣ်ဒါမ့ၢ်ကဝီၤဃာ် အဝဲသ့ၣ်​ အဝ့ၢ်တဖျၢၣ်ဖျၢၣ်လၢ ကီၢ်ပူၤန့ၣ်+ ၃၈ ဖဲပှၤတဂၤဂၤမ့ၢ်ဂ့ၤ, နပှၤဂီၢ်မုၢ် အံၣ်စရ့လး ဒီတဖုမ့ၢ်ဂ့ၤ ဃၣ်ဃီၤအသးလၢ ဟံၣ်တဖျၢၣ်အံၤ အအိၣ်အခါ ကယဲၢ်တၢ်ဃ့ထုကဖၣ်​ ဒီးတၢ်ဃ့ကညးလၢ+ တၢ်သးအကညီၤအဂီၢ် (မ့ၢ်လၢ ပှၤတဂၤစုာ်စုာ် သ့ၣ်ညါအနီၢ်ကစၢ် အတၢ်သူၣ်ဘၣ်ဒိ သးဘၣ်ထံး) န့ၣ်+ ၃၉ မ်နဒိကနၣ်​ ဖဲနတၢ်အိၣ်တၢ်ဆိးအလီၢ်လၢ မူခိၣ်+ ဒီးမ်နပျၢ်အဝဲသ့ၣ်​ အတၢ်ကမၣ်+ ဒီးမၤစၢၤ အဝဲသ့ၣ်တက့ၢ်. ဒီးမ့ၢ်လၢ နသ့ၣ်ညါ တၢ်အိၣ်လၢ ပှၤတဂၤစုာ်စုာ် အသးပူၤ (ပှၤလၢအသ့ၣ်ညါ တၢ်အိၣ်လၢ ပှၤကိးဂၤဒဲး အသးပူၤ နီၢ်ကီၢ်ကီၢ်န့ၣ်​ အိၣ်ထဲနၤတဂၤ)+ အဃိ မ်နဟ့ၣ်ဆၢက့ၤ ပှၤတဂၤစုာ်စုာ် ဒ်အတၢ်မၤအိၣ်ဝဲအသိး+ ၄၀ ဒ်သိးအဝဲသ့ၣ်​ ကပျံၤနၤ ဖဲမုၢ်နံၤခဲလၢာ်လၢ အဝဲသ့ၣ်အိၣ်လၢ ကီၢ်လၢနဟ့ၣ်ပာ်စၢၤ ပမိၢ်ပၢ်ဖံဖု လၢပျၢၤတဖၣ်​ အပူၤန့ၣ်တက့ၢ်.

၄၁ “ဘၣ်ဃးဒီး ပှၤထံဂၤကီၢ်ဂၤဖိတဂၤလၢ အတဘၣ်ထွဲဒီး နပှၤဂီၢ်မုၢ် အံၣ်စရ့လးဘၣ်န့ၣ်​ အဝဲမ့ၢ်ဟဲလၢ တၢ်လီၢ်ဖးယံၤ ခီဖျိလၢနမံၤအဃိ+ ၄၂ (အဝဲသ့ၣ်​ ကနၢ်ဟူဘၣ်ဃးဒီး နမံၤလၢ အဒိၣ်အမုၢ်,+ နစုလၢ အဂံၢ်ဆူၣ်ဘါဆူၣ်​ ဒီးနယူာ်ဃီၤနစုလၢ နကမၤတၢ်အဂ့ၢ်) ဒီးဖဲအဝဲဟဲ ဒီးဃၣ်ဃီၤအသး လၢတၢ်လုၢ်ဟံၣ်အံၤအအိၣ်​ ဒီးဃ့ထုကဖၣ်တၢ်အခါ ၄၃ မ်နဒိကနၣ်ဘၣ်​ အတၢ်ထုကဖၣ်​ လၢနတၢ်အိၣ်တၢ်ဆိးအလီၢ် လၢမူခိၣ်+ ဒီးမၤဒ် ပှၤထံဂၤကီၢ်ဂၤဖိတဂၤန့ၣ်​ ဃ့နၤအသိး ခဲလၢာ် ဒ်သိးပှၤခဲလၢာ်လၢ ဟီၣ်ခိၣ်ချၢ ကသ့ၣ်ညါနမံၤ ဒီးပျံၤနၤ+ ဒ်နပှၤဂီၢ်မုၢ် အံၣ်စရ့လးအသိး ဒီးကသ့ၣ်ညါလၢ ဟံၣ်လၢ ယတ့ထီၣ်တဖျၢၣ်အံၤ ဘၣ်တၢ်ကိးအီၤလၢ နမံၤန့ၣ်တက့ၢ်.

၄၄ “နပှၤဂီၢ်မုၢ်တဖၣ်​ မ့ၢ်လဲၤဒုးတၢ်ဒီး အဒုၣ်အဒါ ဒ်နမၢ အဝဲသ့ၣ်အသိး+ ဒီးအဝဲသ့ၣ်​ မ့ၢ်ဃၣ်ဃီၤအသးလၢ ဝ့ၢ်လၢ နဃုထၢထီၣ်အီၤတဖျၢၣ်+ ဒီးလၢဟံၣ်တဖျၢၣ်လၢ ယတ့ထီၣ်လၢ နမံၤအဂီၢ်+ ဒီးဃ့ထုကဖၣ်လၢနၤ,+ ယဟိဝၤယွၤ အအိၣ်န့ၣ်​ ၄၅ အဝဲသ့ၣ်​ အတၢ်ထုကဖၣ်​ ဒီးအတၢ်ဃ့ကညးလၢ တၢ်သးကညီၤအဂီၢ်န့ၣ်​ မ်နဒိကနၣ်​ လၢမူခိၣ်​ ဒီးစံၣ်ညီၣ်န့ၢ်တၢ်လၢ အဝဲသ့ၣ်​ အဂီၢ်တက့ၢ်.

၄၆ “အဝဲသ့ၣ်​ မ့ၢ်မၤကမၣ်ဘၣ်နၤ (ပှၤလၢ အတမၤကမၣ်ဘၣ်တၢ်န့ၣ်​ တအိၣ်နီတဂၤဘၣ်),+ ဒီးနမ့ၢ်သးပှံၢ်ထီၣ်​ အဝဲသ့ၣ်ဒီး နမ့ၢ်ဟ့ၣ်လီၤအဝဲသ့ၣ်လၢ အဒုၣ်အဒါအစုပူၤ ဒီးအဒုၣ်အဒါတဖၣ်​ မ့ၢ်က့ၤဖီၣ်အီၤလၢ အဒုၣ်အဒါအကီၢ် လၢအယံၤမ့ၢ်ဂ့ၤ, လၢအဘူးမ့ၢ်ဂ့ၤ,+ ၄၇ ဖဲအဝဲသ့ၣ်အိၣ်လၢ ကီၢ်လၢ အဘၣ်တၢ်က့ၤဖီၣ်အီၤ အပူၤအခါ အဝဲသ့ၣ်​ မ့ၢ်သ့ၣ်ညါလီၤက့ၤအသး+ ဒီးဟဲက့ၤကဒါက့ၤ လၢနအိၣ်+ ဒီးဃ့ကညးနၤလၢ တၢ်သးကညီၤအဂီၢ် လၢအဝဲသ့ၣ်​ အဒုၣ်အဒါတဖၣ်​ အကီၢ်ပူၤ+ ဒီးတဲလၢ ‘ပမၤဘၣ်တၢ်ဒဲးဘး ဒီးပမၤကမၣ်ဘၣ်တၢ်လံ ဒီးပမၤဘၣ်တၢ် အၢအၢသီသီလံ’+ ၄၈ ဒီးဖဲအဝဲသ့ၣ်​ အိၣ်ဝဲလၢ အဒုၣ်အဒါလၢ အက့ၤဖီၣ်အီၤတဖၣ်​ အထံကီၢ်အခါ အဝဲသ့ၣ်​ မ့ၢ်ဟဲက့ၤကဒါက့ၤလၢ နအိၣ်လၢ အသးဒီဖျၢၣ်ညါ+ ဒီးလၢအဂံၢ်အဘါခဲလၢာ် ဒီးအဝဲသ့ၣ်​ မ့ၢ်ဃၣ်ဃီၤအသးဆူ ထံကီၢ်လၢ နဟ့ၣ်လီၤ အဝဲသ့ၣ်​ အမိၢ်ပၢ်ဖံဖု လၢပျၢၤတဖၣ်​ အအိၣ်​ ဒီးလၢဝ့ၢ်လၢ နဃုထၢထီၣ်အီၤ တဖျၢၣ်အအိၣ်​ ဒီးလၢဟံၣ်လၢ ယတ့ထီၣ်လၢ နမံၤအဂီၢ်အအိၣ်​ ဒီးမ့ၢ်ဃ့ထုကဖၣ်လၢ နအိၣ်န့ၣ်+ ၄၉ မ်နဒိကနၣ်​ အဝဲသ့ၣ်​ အတၢ်ထုကဖၣ်​ ဒီးအတၢ်ဃ့ကညးလၢ တၢ်သးကညီၤအဂီၢ် လၢနတၢ်အိၣ်တၢ်ဆိးအလီၢ် လၢမူခိၣ်+ ဒီးစံၣ်ညီၣ်န့ၢ်တၢ်လၢ အဝဲသ့ၣ်အဂီၢ်တက့ၢ်. ၅၀ ဒီးမ်နပျၢ်ကွံာ် နပှၤဂီၢ်မုၢ်လၢ အမၤကမၣ်နၤ ဒီးပျၢ်ကွံာ်အဝဲသ့ၣ်​ အတၢ်ကမၣ်ခဲလၢာ် လၢအမၤကမၣ်ဘၣ်နၤတက့ၢ်. ဒီးဖဲန့ၣ်​ နကမၤဒ်သိး အဝဲသ့ၣ်​ ကဖျါလီၤသးကညီၤလၢ အဒုၣ်အဒါတဖၣ်​ အမဲာ်ညါ ဒီးအဒုၣ်အဒါတဖၣ်​ ကသးကညီၤ အဝဲသ့ၣ်+ ၅၁ (မ့ၢ်လၢ အဝဲသ့ၣ်မ့ၢ် နပှၤဂီၢ်မုၢ် ဒီးနတၢ်န့ၢ်သါလၢ+ နဒုးဟးထီၣ်အီၤလၢ ကီၢ်အဲၤကူပတူးအပူၤ+ ဖဲအဝဲသ့ၣ်​ ဘၣ်တူၢ်တၢ် နးနးကျံၤကျံၤ လီၤဂာ်ဒ် အဝဲသ့ၣ်အိၣ်လၢ ဖၣ်ကပူၤထးအပူၤအသိး) လီၤ.+ ၅၂ မ်နဒိကနၣ်​ နခ့နပှၤယၤအံၤ အတၢ်ဃ့ကညးလၢ တၢ်သးကညီၤ အဂီၢ်တက့ၢ်.+ ဒီးဖဲနပှၤဂီၢ်မုၢ် အံၣ်စရ့လး ကိးထီၣ်နၤဒီး ဃ့ကညးတၢ်လၢ တၢ်သးကညီၤအဂီၢ် တဘျီဂ့ၤတဘျီဂ့ၤန့ၣ်​ ဒိကနၣ်န့ၢ် အဝဲသ့ၣ်တက့ၢ်.+ ၅၃ အိ တၢ်ပၢကစၢ် ယဟိဝၤယွၤဧၢ, လၢပှၤခဲလၢာ် အကျါန့ၣ်​ နပာ်လီၤဆီ အဝဲသ့ၣ်+ ဒ်နတၢ်န့ၢ်သါအသိး ဒ်နတဲဖျါထီၣ်ပာ်စၢၤ ခီဖျိနခ့နပှၤ စီၤမိၤၡ့ ဖဲနဒုးဟးထီၣ်​ ပမိၢ်ပၢ်ဖံဖု လၢပျၢၤတဖၣ်​ လၢကီၢ်အဲၤကူပတူး အပူၤအသိးလီၤ.”

၅၄ ဖဲစီၤၡလိၤမိၤ ဃ့ထုကဖၣ်​ ဒီးဃ့ကညးတၢ်လၢ တၢ်သးကညီၤအဂီၢ် လၢယဟိဝၤယွၤ အအိၣ်ဝံၤအခါ အဝဲဂဲၤဆၢထၢၣ်လၢ ယဟိဝၤယွၤ အတၢ်လုၢ်လီၢ် အမဲာ်ညါ ဖဲတၢ်လီၢ်လၢ အဝဲချံးလီၤတ့ၢ်အခီၣ်​ ဒီးယူာ်ထီၣ်အစုလၢ မူခိၣ်န့ၣ်လီၤ.+ ၅၅ ဒီးစီၤၡလိၤမိၤ ဆၢထၢၣ်ဒီး ဆိၣ်ဂ့ၤဝဲ အံၣ်စရ့လး အတၢ်အိၣ်ဖှိၣ်ဒီတဖု ဒီးတဲဝဲလၢ အကလုၢ်ဒိၣ်ဒိၣ်လၢ ၅၆ “ယဟိဝၤယွၤလၢ အဟ့ၣ်လီၤ အပှၤဂီၢ်မုၢ် ပှၤအံၣ်စရ့လးဖိလၢ တၢ်အိၣ်ဘှံးအလီၢ် ဒ်အအၢၣ်လီၤပာ်စၢၤဝဲအသိးန့ၣ်+ မ်အဘၣ်​ တၢ်စံးထီၣ်ပတြၢၤအီၤတက့ၢ်. တၢ်အၢၣ်လီၤလၢအဂ့ၤလၢ အအၢၣ်လီၤဝဲ ခီဖျိအခ့အပှၤ စီၤမိၤၡ့ လၢအတဟဲ လၢထီၣ်ပှဲၤထီၣ်ဘၣ်န့ၣ်​ တအိၣ်နီတထံၣ်ဘၣ်.+ ၅၇ မ်ပကစၢ် ယဟိဝၤယွၤ အိၣ်ဒီးပှၤ ဒ်အအိၣ်ဒီး ပမိၢ်ပၢ်ဖံဖု လၢပျၢၤတဖၣ်​ အသိးတက့ၢ်.+ မ်အသုတပာ်တ့ၢ်ကွံာ်ပှၤ ဒီးဟးသဒၣ်ပှၤတဂ့ၤ.+ ၅၈ မ်အထိၣ်ဟူးထိၣ်ဂဲၤထီၣ်​ ပသး*+ ဒ်သိးပကမၤ အတၢ်ဘၣ်သးခဲလၢာ်, အိၣ်မူမၤထွဲ အတၢ်မၤလိာ်တဖၣ်, အတၢ်ဘျၢတဖၣ်​ ဒီးအတၢ်သိၣ်တၢ်သီတဖၣ်​ လၢအမၤလိာ်ပာ်စၢၤ ပမိၢ်ပၢ်ဖံဖု လၢပျၢၤတဖၣ်​ လၢကမၤထွဲဝဲ အဂီၢ်န့ၣ်တက့ၢ်. ၅၉ ဒီးယတၢ်ကတိၤတဖၣ်အံၤ လၢယဃ့ကညး ယဟိဝၤယွၤအတၢ်သးကညီၤန့ၣ်​ မ်ပကစၢ် ယဟိဝၤယွၤ နီၣ်ဘၣ်က့ၤအီၤ လၢမုၢ်ဆါဒီး လၢမုၢ်နၤ ဒ်သိးအကစံၣ်ညီၣ်န့ၢ်တၢ်လၢ အခ့အပှၤယၤအံၤအဂီၢ် ဒီးလၢအပှၤဂီၢ်မုၢ် အံၣ်စရ့လးအဂီၢ် ဒ်တနံၤဘၣ်တနံၤ အတၢ်လိၣ်ဘၣ်တဖၣ်​ အိၣ်ဝဲအသိး ၆၀ ဒ်သိး ပှၤခဲလၢာ် ကသ့ၣ်ညါဝဲလၢ ယဟိဝၤယွၤ မ့ၢ်ကစၢ်ယွၤလၢ အမ့ၢ်အတီလီၤ.+ ကစၢ်ယွၤလၢ အဂုၤအဂၤ တအိၣ်နီတဂၤဘၣ်.+ ၆၁ အဃိ မ်သုသးတီဒီး ပကစၢ် ယဟိဝၤယွၤလၢ သုသးဒီဖျၢၣ်+ ခီဖျိသုမၤထွဲ အတၢ်ဘျၢတဖၣ်​ ဒီးဆဲးမၤထွဲ အတၢ်မၤလိာ်တဖၣ်​ ဒ်သုမၤအီၤလၢ မုၢ်မဆါတနံၤအံၤ အသိးတက့ၢ်.”

၆၂ ဒီးစီၤပၤ ဒီးပှၤအံၣ်စရ့လးဖိခဲလၢာ် လၢအိၣ်ဒီးအီၤန့ၣ်​ လုၢ်ထီၣ်ဝဲ တၢ်လုၢ်တၢ်ပာ် အါအါဂီၢ်ဂီၢ် လၢယဟိဝၤယွၤ အအိၣ်လီၤ.+ ၆၃ စီၤၡလိၤမိၤ လုၢ်ထီၣ်ဝဲ တၢ်လုၢ်အိၣ်ဃူအိၣ်ဖိးတဖၣ်+ လၢယဟိဝၤယွၤ အအိၣ်လီၤ. အဝဲလုၢ်ထီၣ်ဝဲ ကျီၢ်အဒု ၂၂,၀၀၀ ဒီးသိအဒု ၁၂၀,၀၀၀ လီၤ. အဃိ စီၤၡလိၤမိၤ ဒီးပှၤအံၣ်စရ့လးဖိခဲလၢာ် မၤဝဲမူးခီဖျိလၢ ယဟိဝၤယွၤအဟံၣ်​ ဝံၤဝဲအဃိလီၤ.+ ၆၄ တၢ်လုၢ်လီၢ်တိၢ်ဘီ+ လၢအအိၣ်လၢ ယဟိဝၤယွၤ အမဲာ်ညါန့ၣ်​ ဆံးတလၢ အဃိ ပှၤလုၢ်ထီၣ်​ တၢ်လုၢ်ဒွဲၣ်အူ, တၢ်လုၢ်ဘု ဒီးတၢ်အသိ+ အကူာ်အခီတဖၣ်လၢ တၢ်လုၢ်အိၣ်ဃူအိၣ်ဖိးတဖၣ်​ အဂီၢ်တတြီၢ်ဘၣ်. အဃိ စီၤပၤ ဘၣ်လုၢ်ထီၣ်ဝဲ တၢ်လုၢ်ဒွဲၣ်အူတဖၣ်, တၢ်လုၢ်ဘုတဖၣ်​ ဒီးတၢ်အသိ အကူာ်အခီတဖၣ်လၢ တၢ်လုၢ်အိၣ်ဃူအိၣ်ဖိးတဖၣ်​ အဂီၢ် လၢတၢ်ပျီအခၢၣ်သးလီၤ. လၢတၢ်န့ၣ်အဃိ ဖဲနံၤအဝဲန့ၣ်​ စီၤပၤ ဘၣ်ပာ်စီဆှံဝဲ တၢ်ပျီအခၢၣ်သး လၢအအိၣ်လၢ ယဟိဝၤယွၤ အဟံၣ်အမဲာ်ညါလီၤ. ၆၅ ဒီးဖဲန့ၣ်အခါ စီၤၡလိၤမိၤ ဒီးပှၤအံၣ်စရ့လးဖိခဲလၢာ် လၢအဟဲလၢ လံၤဘိၤဃမါသး တုၤလၢ အဲၤကူပတူး အတၢ်တြီၤန့ၣ်+ မၤဝဲ ဘူၣ်လၢ+ ပကစၢ်ယဟိဝၤယွၤ အမဲာ်ညါ နွံသီဝံၤဒီး မၤကဒီးဝဲနွံသီလီၤ. အဃိ အဝဲသ့ၣ်မၤဝဲဘူၣ်န့ၣ်​ ခဲလၢာ်ခဲဆ့အိၣ်ဝဲ ၁၄ သီလီၤ. ၆၆ လၢခံတသီန့ၣ်​ စီၤပၤပျဲက့ၤ ပှၤဂီၢ်မုၢ်ခဲလၢာ် ဒီးပှၤဂီၢ်မုၢ် ဆိၣ်ဂ့ၤစီၤပၤ ဝံၤဒီးအဝဲသ့ၣ်​ က့ၤဝဲလၢ အဟံၣ်လၢ တၢ်သူၣ်ဖှံသးညီအပူၤ ဒီးတၢ်သူၣ်မံသးမုာ်အပူၤ ခီဖျိလၢ တၢ်အဂ့ၤခဲလၢာ်လၢ+ ယဟိဝၤယွၤ ပာ်ဖျါထီၣ်လၢ အခ့အပှၤ စီၤဒၤဝံး ဒီးအပှၤဂီၢ်မုၢ် အံၣ်စရ့လးအဖီခိၣ်​ အဃိလီၤ.