စံၣ်တဲၤတဲလီၤတၢ်

၁ တၢ်ကတိၤတဖၣ်အံၤ မ့ၢ်ဝဲ ပှၤစံၣ်တဲၤတဲလီၤတၢ်တဂၤ*+ အတၢ်ကတိၤလီၤ. အဝဲမ့ၢ် စီၤဒၤဝံးအဖိခွါ ဒီးမ့ၢ်စ့ၢ်ကီး စီၤပၤလၢ ဝ့ၢ်ယရူၤၡလ့ၣ်​ အပူၤလီၤ.+

 ၂ ပှၤစံၣ်တဲၤတဲလီၤတၢ်တဂၤ တဲဝဲဒၣ်လၢ “တၢ်ကလီကလီလီၤ. တၢ်ကလီကလီလီၤ.

တၢ်ခဲလၢာ်န့ၣ်​ မ့ၢ်ဝဲ တၢ်ကလီကလီလီၤ.”+

 ၆ ကလံၤအူတၢ်ဆူ ကလံၤထံးတခီ ဒီးကလံၤက့ၤကဒါက့ၤလၢ ကလံၤစိးတခီလီၤ.

ကလံၤ လဲၤတရံးဝဲ တဝီဝံၤတဝီ ဒီးဟဲက့ၤကဒီးဝဲလီၤ.

 ၇ ထံကျိဖိတဖၣ်​ ယွၤလီၤဝဲလၢ ပီၣ်လဲၣ်ပူၤ ဘၣ်ဆၣ်​ ပီၣ်လဲၣ် တပှဲၤဘၣ်.+

ထံတဖၣ်​ က့ၤကဒါက့ၤလၢ တၢ်လီၢ်လၢ ထံကျိတဖၣ်ဟဲယွၤလီၤအလီၢ် ဒီးယွၤလီၤကဒီးဝဲလီၤ.+

ပှၤထံၣ်လၢ ပှၤမဲာ် သနာ်က့ ပှၤသးတမံဒံးဘၣ်.

ဒီးပှၤနၢ်ဟူဘၣ်အီၤ သနာ်က့ ပှၤသးတမံဒံးဘၣ်.

 ၉ တၢ်လၢ အကဲထီၣ်အသး လၢညါန့ၣ်​ ကဆဲးအိၣ်ဝဲ ဒ်န့ၣ်လီၤ.

တၢ်လၢ ပှၤမၤတ့ၢ်အီၤ လၢညါန့ၣ်​ ကဘၣ်တၢ်မၤကဒီးအီၤလီၤ.

တၢ်အသီလၢ ဟီၣ်ခိၣ်ချၢန့ၣ်​ တအိၣ် နီတမံၤဘၣ်.+

၁၀ ဘၣ်ဃးဒီး တၢ်တမံၤဂ့ၤ တမံၤဂ့ၤန့ၣ်​ ပှၤတဂၤမ့ၢ်တဲလၢ “ကွၢ်လၢအံၤ, တၢ်တခါအံၤ ကဲတၢ်အသီ” န့ၣ် ကဘၣ်ဧါ.

၁၁ ပှၤလၢပျၢၤတဖၣ်န့ၣ်​ ပှၤလၢအသ့ၣ်နီၣ်ထီၣ်က့ၤ အဝဲသ့ၣ်​ တအိၣ်​ နီတဂၤလၢၤဘၣ်.

ပှၤလၢ အကဟဲလၢခံတဖၣ်စ့ၢ်ကီး ပှၤလၢအကသ့ၣ်နီၣ်ထီၣ်က့ၤ အဝဲသ့ၣ်​ တအိၣ်​ နီတဂၤဘၣ်.

ဒီးပှၤတဖၣ်န့ၣ်စ့ၢ်ကီး ပှၤလၢအကဟဲလၢခံတဖၣ်​ တမ့ၢ်လၢ အကသ့ၣ်နီၣ်ထီၣ်က့ၤ အဝဲသ့ၣ်ဘၣ်.+

၁၂ ယၤ, ပှၤစံၣ်တဲၤတဲလီၤတၢ်တဂၤ ကဲပာ်စၢၤ စီၤပၤလၢ ပှၤအံၣ်စရ့လးဖိ အဖီခိၣ်​ လၢဝ့ၢ်ယရူၤၡလ့ၣ်အပူၤလီၤ.+ ၁၃ ယပာ်လီၤယသးလၢ ယကသူ ယတၢ်ကူၣ်သ့ ဒ်သိး ယကမၤလိ ဒီးဃုသ့ၣ်ညါ+ တၢ်ခဲလၢာ်လၢ ပှၤမၤတ့ၢ်အီၤလၢ ဟီၣ်ခိၣ်ချၢလီၤ.+ ဒီးအမ့ၢ်ဝဲ တၢ်မၤလၢ အလီၤသးဘၣ်တံာ်တာ်လၢ ပှၤဟီၣ်ခိၣ်ဖိအဂီၢ်လၢ ကစၢ်ယွၤဟ့ၣ်လီၤ အဝဲသ့ၣ်​ ဒ်သိး အဝဲသ့ၣ်​ အတၢ်မၤ ကအိၣ်ဝဲအဂီၢ်လီၤ.

၁၅ တၢ်လၢအက့ၣ်န့ၣ်​ ပှၤမၤဘျၢထီၣ်အီၤ တသ့ဘၣ်.

ဒီးတၢ်လၢအတအိၣ်ဘၣ်န့ၣ်​ ပှၤဂံၢ်အီၤတသ့ဘၣ်.

၁၆ ဒီးယတဲလီၤယသးလၢ “ယန့ၢ်ဘၣ်​ တၢ်ကူၣ်သ့ အါန့ၢ်ဒံး ပှၤတဂၤဂ့ၤ တဂၤဂ့ၤ လၢအအိၣ်မူတ့ၢ် လၢယမဲာ်ညါ လၢဝ့ၢ်ယရူၤၡလ့ၣ်​ အပူၤလီၤ.+ ဒီးယအိၣ်ဒီး တၢ်ကူၣ်သ့ ဒီးတၢ်သ့ၣ်ညါ ဒီဒူၣ်လီၤ.”+ ၁၇ ယဂုာ်ကျဲးစၢး ဃုသ့ၣ်ညါ တၢ်ကူၣ်သ့, တၢ်လၢအခီပညီတအိၣ်ဘၣ်* ဒီးတၢ်လၢအနါစိၤတဖၣ်လီၤ.+ ဘၣ်ဆၣ်​ ယထံၣ်လၢ ပှၤမ့ၢ်ဂုာ်ကျဲးစၢး ဃုသ့ၣ်ညါ တၢ်သ့ၣ်တဖၣ်န့ၣ်​ အလီၤဂာ်ဒ်သိးဒီး ပှၤလူၤဖီၣ်ကလံၤ စ့ၢ်ကီးလီၤ.

၁၈ နီၢ်ကီၢ်န့ၣ်​ ပှၤအိၣ်ဒီး တၢ်ကူၣ်သ့မ့ၢ်အါန့ၣ်​ အသးဘၣ်တံာ်တာ် ဒံးအါလီၤ.

အဃိ ပှၤလၢ အတၢ်သ့ၣ်ညါ ဒံးအါန့ၣ်​ အသးဘၣ်ဒိ ဒံးအါလီၤ.+

၂ ယတဲလီၤယသးလၢ “ယကမၤကွၢ် တၢ်မုာ်တၢ်ပၠီၣ်တထံၣ်.* မ့ၢ်အကကဲဘျုးဒ်လဲၣ်.” ဘၣ်ဆၣ်​ ယသ့ၣ်ညါထီၣ်ဘၣ်လၢ အဝဲန့ၣ်စ့ၢ်ကီး မ့ၢ်ဝဲတၢ်ကလီကလီလီၤ.

 ၂ ဘၣ်ဃးဒီး တၢ်နံၤတၢ်အ့န့ၣ်​ ယတဲလၢ “အခီပညီတအိၣ်ဘၣ်.”*

ဒီးဘၣ်ဃးဒီး တၢ်မုာ်တၢ်ပၠီၣ်န့ၣ်​ ယတဲလၢ “မ့ၢ်အဘျုးအိၣ်​ တမံၤမံၤဧါ.”

၃ ယအဲၣ်ဒိး သ့ၣ်ညါလၢ ဖဲပှၤဟီၣ်ခိၣ်ဖိ အိၣ်မူဘၣ်ဖုၣ်ဖုၣ်ဖိ လၢဟီၣ်ခိၣ်ချၢ အခါ တၢ်လၢအဂ့ၤကတၢၢ် လၢအဝဲသ့ၣ်မၤဝဲသ့န့ၣ်​ မ့ၢ်တၢ်မနုၤလဲၣ်. အဃိ ဒ်သိး ယကဃုသ့ၣ်ညါ လီၤတံၢ်လီၤဆဲးအဂီၢ် ယမၤမုာ်မၤဖှံယသးလၢ စပံးထံ+ ဘၣ်ဆၣ်​ ယတအီအီၤတုၤလၢ အမၤလီၤမၢ် ယတၢ်ကူၣ်သ့ နီတဘျီဘၣ်. တကးဒံးဘၣ်​ တၢ်မၤကြီတၢ်တဖၣ်​ အဘျုးအိၣ်ဒ်လဲၣ်န့ၣ်​ ယဃုသ့ၣ်ညါစ့ၢ်ကီးလီၤ. ၄ ယမၤတၢ်လၢ အဒိၣ်အမုၢ်တဖၣ်,+ ယသူၣ်ထီၣ်​ ယဟံၣ်တဖၣ်+ ဒီးယသူၣ်လီၤ ယနီၢ်ကစၢ် စပံးကျီးတဖၣ်လီၤ.+ ၅ ယတ့ထီၣ်​ ယနီၢ်ကစၢ် ကရၢၢ်ဒီးဖီကရၢၢ်တဖၣ်​ ဒီးလၢအပူၤန့ၣ်​ ယသူၣ်လီၤ တၤသူတၤသၣ်အထူၣ်​ အကလုာ်ကလုာ်လီၤ. ၆ ယတ့ထီၣ်​ ယနီၢ်ကစၢ် ထံကမါတဖၣ်​ လၢကမၤဘၣ်စီၣ်ဝဲ သ့ၣ်ထူၣ်လၢအမဲထီၣ်လၢ ယပှၢ်ပူၤလီၤ. ၇ ယမၤန့ၢ်ဘၣ်​ ကုၢ်မုၣ်, ကုၢ်ခွါ ဒီးယကုၢ်တဖၣ်+ အိၣ်ဖျဲၣ်ထီၣ်လၢ ယဟံၣ်ပူၤလီၤ. ယမၤန့ၢ်ဘၣ်စ့ၢ်ကီး ဆၣ်ဖိကီၢ်ဖိ ဒ်သိးဒီး ကျီၢ်, သိဒီးမဲာ်တဲးလဲး+ အါန့ၢ်ဒံး ပှၤတဂၤဂ့ၤ တဂၤဂ့ၤ လၢအအိၣ်မူတ့ၢ် လၢယမဲာ်ညါ လၢဝ့ၢ်ယရူၤၡလ့ၣ်​ အပူၤလီၤ. ၈ ယပာ်ဖှိၣ်​ ထူ, စ့ညၣ်​ ဒီးတၢ်လုၢ်ဒိၣ်ပှ့ၤဒိၣ်တဖၣ်+ လၢအဟဲလၢ စီၤပၤတဖၣ်အအိၣ်​ ဒီးလၢကီၢ်ရ့ၣ်တဖၣ်​ အပူၤလီၤ.+ ယပာ်ဖှိၣ်စ့ၢ်ကီး ပှၤသးဝံၣ်တၢ်ဖိ လၢအမ့ၢ် ပှၤပိာ်မုၣ်​ ဒီးပှၤပိာ်ခွါတဖၣ်လၢ ယနီၢ်ကစၢ်အဂီၢ်လီၤ. ဒီးယဒိးန့ၢ်ဘၣ်​ တၢ်လၢအမၤမုာ် ပှၤပိာ်ခွါတဖၣ်အသးဒိၣ်မး လၢအမ့ၢ် ပှၤပိာ်မုၣ်တဂၤ ဒီးတကးဒံးဘၣ်​ ယဒိးန့ၢ်ဘၣ်​ ပှၤပိာ်မုၣ်အါဂၤလီၤ. ၉ အဃိ ယတၢ်အါထီၣ်​ ဒီးယတၢ်အိၣ်အါန့ၢ်ဒံး ပှၤတဂၤဂ့ၤ တဂၤဂ့ၤ လၢအအိၣ်မူတ့ၢ်လၢ ယမဲာ်ညါ လၢဝ့ၢ်ယရူၤၡလ့ၣ်အပူၤလီၤ.+ ဘၣ်ဆၣ်​ ယအိၣ်ဒီး တၢ်ကူၣ်သ့ဒံးလီၤ.

၁၀ တၢ်လၢ ယလီကီ တမံၤဂ့ၤ တမံၤဂ့ၤန့ၣ်​ ယမၤန့ၢ်အီၤခဲလၢာ်.+ တၢ်လၢ အမၤသူၣ်ဖှံသးညီ ယသးန့ၣ်​ ယမၤအီၤခဲလၢာ်. ဒီးခီဖျိလၢ ယမၤတ့ၢ်တၢ် ဆူၣ်ဆူၣ်အဃိ ယသးခုလီၤ. အဝဲန့ၣ်​ မ့ၢ်ဝဲခိၣ်ဖးလၢ ယန့ၢ်ဘၣ်​ ခီဖျိလၢ ယမၤတ့ၢ်တၢ်ဆူၣ်ဆူၣ်​ အဃိလီၤ.+ ၁၁ ဖဲယဆိကမိၣ်ထံက့ၤ တၢ်မၤခဲလၢာ် လၢယမၤတ့ၢ်အီၤ ဒီးတၢ်မၤခဲလၢာ်လၢ ယမၤအီၤဆူၣ်ဆူၣ်​ အခါ ယသ့ၣ်ညါဘၣ်လၢ တၢ်ခဲလၢာ်န့ၣ်​ မ့ၢ်ဝဲတၢ်ကလီကလီ+ ဒီးလီၤဂာ်ဒ်သိးဒီး ပှၤလူၤဖီၣ်ကလံၤလီၤ.+ လၢဟီၣ်ခိၣ်ချၢအံၤ တၢ်လၢအလုၢ်အပှ့ၤ အိၣ်နီၢ်ကီၢ်န့ၣ်* တအိၣ်နီတမံၤဘၣ်.+

၁၂ ဝံၤဒီး ယဃုသ့ၣ်ညါ တၢ်ကူၣ်သ့, တၢ်လၢအခီပညီတအိၣ်ဘၣ်* ဒီးတၢ်လၢအနါစိၤတဖၣ်လီၤ.+ ဒီးယဆိကမိၣ်လီၤယသးလၢ ပှၤလၢအဟဲလၢ စီၤပၤအလီၢ်ခံန့ၣ်​ မၤတၢ်မနုၤကသ့ဒံးလဲၣ်. အဝဲမၤသ့ထဲဒၣ်​ တၢ်လၢပှၤမၤတ့ၢ် ဝံၤလံတဖၣ်လီၤ. ၁၃ ဒ်တၢ်ကပီၤ ဂ့ၤဒိၣ်န့ၢ်ဒံး တၢ်ခံးအသိး ယထံၣ်ဘၣ်လၢ တၢ်ကူၣ်သ့န့ၣ်​ ဂ့ၤဒိၣ်န့ၢ်ဒံး တၢ်လၢအနါစိၤတဖၣ်လီၤ.+

၁၄ ပှၤကူၣ်တၢ်သ့န့ၣ်​ ထံၣ်လီၤအကျဲ ဖျါၡဲၡဲလီၤ.*+ မ့မ့ၢ် ပှၤဟးဂီၤဖိန့ၣ်​ ဟးဝဲလၢ တၢ်ခံးကျါလီၤ.+ ဘၣ်ဆၣ်​ ယသ့ၣ်ညါဘၣ်စ့ၢ်ကီးလၢ အလီၢ်ခံကတၢၢ်န့ၣ်​ တၢ်ကမၤအသးဒီးအဝဲသ့ၣ်ခဲလၢာ် ဒ်သိးသိးလီၤ.+ ၁၅ ဝံၤဒီး ယတဲလီၤယသးလၢ “တၢ်လၢ အကဲထီၣ်သးဒီး ပှၤဟးဂီၤဖိန့ၣ်​ ကကဲထီၣ်သးဒီးယၤစ့ၢ်ကီးလီၤ.+ အဃိ ယဒိးန့ၢ်ဘၣ်​ တၢ်ကူၣ်သ့အါအါ သနာ်က့ အဘျုးအိၣ်ဒ်လဲၣ်.” အဃိ ယတဲလီၤယသးလၢ “အဝဲန့ၣ်စ့ၢ်ကီး မ့ၢ်ဝဲတၢ်ကလီကလီလီၤ.” ၁၆ ပှၤကူၣ်တၢ်သ့မ့ၢ်ဂ့ၤ, ပှၤဟးဂီၤဖိမ့ၢ်ဂ့ၤ ပှၤတသ့ၣ်နီၣ်ထီၣ်က့ၤ အဝဲသ့ၣ်​ လီၤစိၤဘၣ်.+ မုၢ်နံၤလၢကဟဲတဖၣ်န့ၣ်​ ပှၤကိးဂၤဒဲး ကဘၣ်တၢ်သးပ့ၤနီၣ်ကွံာ်အီၤလီၤ. ဒီးပှၤကူၣ်တၢ်သ့ ကသံဝဲဒ်လဲၣ်. အဝဲသ့ၣ်​ ကသံဒ် ပှၤဟးဂီၤဖိသံဝဲအသိးလီၤ.+

၁၇ အဃိ ယသးဟ့ တၢ်အိၣ်မူဒ်အံၤ+ ခီဖျိလၢ တၢ်ခဲလၢာ်လၢ ပှၤမၤလၢ ဟီၣ်ခိၣ်ချၢအံၤန့ၣ်​ ဖျါလၢအမၤတံာ်တာ်ယသးလီၤ. ဒီးတၢ်ခဲလၢာ်န့ၣ်​ မ့ၢ်ဝဲတၢ်ကလီကလီ+ ဒီးလီၤဂာ်ဒ်သိးဒီး ပှၤလူၤဖီၣ်ကလံၤလီၤ.+ ၁၈ မ့ၢ်လၢ ယဘၣ်ပာ်တ့ၢ်န့ၢ် ပှၤလၢအကဟဲလၢ ယလီၢ်ခံတဂၤ လၢတၢ်ခဲလၢာ်လၢ ယန့ၢ်ဘၣ်+ ခီဖျိလၢ ယမၤတ့ၢ်တၢ်ဆူၣ်ဆူၣ်​ လၢဟီၣ်ခိၣ်ချၢအံၤအဃိ ယသးဟ့ တၢ်သ့ၣ်တဖၣ်န့ၣ်​ ခဲလၢာ်လီၤ.+ ၁၉ ဒီးအဝဲ ကမ့ၢ်ပှၤကူၣ်တၢ်သ့ဧါ ပှၤဟးဂီၤဖိဧါန့ၣ်​ ပှၤတသ့ၣ်ညါ နီတဂၤဘၣ်.+ ယထဲးဂံၢ်ထဲးဘါ ဒီးယသူ ယတၢ်ကူၣ်သ့ ဒ်သိး ယကန့ၢ်ဘၣ်​ တၢ်အိၣ်လၢ ဟီၣ်ခိၣ်ချၢအံၤအါမံၤ သနာ်က့ ပှၤတဂၤန့ၣ်​ ကပၢက့ၤအီၤ ခဲလၢာ်လီၤ. တၢ်အဝဲန့ၣ်စ့ၢ်ကီး မ့ၢ်ဝဲတၢ်ကလီကလီလီၤ. ၂၀ အဃိ ယသးဟးဂီၤ ဘၣ်ဃးဒီး တၢ်မၤခဲလၢာ်လၢ ယမၤအီၤလၢ ဟီၣ်ခိၣ်ချၢလီၤ. ၂၁ ပှၤတဂၤ မ့ၢ်မၤတၢ်ဆူၣ်ဆူၣ်ဒီး မ့ၢ်သူဝဲအတၢ်ကူၣ်သ့, တၢ်သ့ၣ်ညါ ဒီးတၢ်သ့တၢ်ဘၣ်​ သနာ်က့ အဘၣ်ဟ့ၣ်လီၤက့ၤဝဲ တၢ်လၢအမၤန့ၢ်ဝဲ လၢပှၤလၢ အတမၤတၢ်ဘၣ်တဂၤ အအိၣ်လီၤ.+ တၢ်အဝဲန့ၣ်စ့ၢ်ကီး မ့ၢ်ဝဲတၢ်ကလီကလီ ဒီးတၢ်မၤအသးလၢ အနးဒိၣ်မးတခါလီၤ.

၂၂ ပှၤတဂၤ မ့ၢ်မၤတၢ်ဆူၣ်ဆူၣ်​ ဒီးအသးမ့ၢ်ဆူၣ်လၢ အကမၤတၢ်လၢ ဟီၣ်ခိၣ်ချၢအံၤ သနာ်က့ မ့ၢ်အကဲဘျုးလၢ အဂီၢ်ဒ်လဲၣ်.+ ၂၃ လၢအတၢ်အိၣ်မူ ဒီတစိၤန့ၣ်​ အတၢ်မၤ မၤဘၣ်ဒိအီၤ ဒီးမၤတံာ်တာ်အသးလီၤ.+ အဃိ လၢမုၢ်နၤခီ ဒၣ်လဲာ် အတအိၣ်ဘှံးဘၣ်ဘၣ်.+ တၢ်အဝဲန့ၣ်စ့ၢ်ကီး မ့ၢ်ဝဲတၢ်ကလီကလီလီၤ.

၂၄ တၢ်လၢအဂ့ၤကတၢၢ် လၢပှၤတဂၤ မၤဝဲသ့န့ၣ်​ မ့ၢ်ဝဲ အကအီၣ်တၢ်အီတၢ် ဒီးကသူၣ်ဖှံသးညီလၢ အတၢ်မၤအပူၤလီၤ.+ ယနၢ်ပၢၢ်ထီၣ်ဘၣ်လၢ အဝဲန့ၣ်စ့ၢ်ကီး ဟဲလၢ ယွၤလၢ အမ့ၢ်အတီတဂၤ အအိၣ်လီၤ.+ ၂၅ နီၢ်ကီၢ်န့ၣ်​ ပှၤလၢအအီၣ်ဘၣ်တၢ် ဒီးအီဘၣ်တၢ် ဂ့ၤန့ၢ်ဒံးယၤန့ၣ်​ တအိၣ်နီတဂၤဘၣ်.+

၂၆ ယွၤလၢအမ့ၢ်အတီတဂၤ ဟ့ၣ်လီၤဝဲ တၢ်ကူၣ်သ့, တၢ်သ့ၣ်ညါ ဒီးတၢ်သူၣ်ဖှံသးညီ+ လၢပှၤလၢ အဘၣ်သူၣ်ဘၣ်သးဝဲလီၤ. မ့မ့ၢ် ပှၤတၢ်ဒဲးဘးဖိန့ၣ်​ အဝဲဟ့ၣ်အီၤ တၢ်မၤလၢ ကပာ်ဖှိၣ်တၢ် ဒီးထၢဖှိၣ်တၢ် ဒ်သိး အကဟ့ၣ်လီၤက့ၤဝဲလၢ ပှၤလၢ ကစၢ်ယွၤ ဘၣ်သူၣ်ဘၣ်သးဝဲ အဂီၢ်လီၤ.+ အဝဲန့ၣ်စ့ၢ်ကီး မ့ၢ်ဝဲတၢ်ကလီကလီ ဒီးလီၤဂာ်ဒ်သိးဒီး ပှၤလူၤဖီၣ်ကလံၤလီၤ.

၉ ပှၤမၤတၢ်ဖိ မၤတၢ်ဆူၣ်ဆူၣ်​ သနာ်က့ အဒိးန့ၢ်ဘၣ်​ အဘျုးမနုၤလဲၣ်.+ ၁၀ ယထံၣ်ဘၣ်လၢ ကစၢ်ယွၤ ဟ့ၣ်လီၤပှၤဟီၣ်ခိၣ်ဖိ လၢတၢ်မၤ ဒ်သိးအဝဲသ့ၣ်​ အတၢ်မၤ ကအိၣ်ဝဲအဂီၢ်လီၤ. ၁၁ ကစၢ်ယွၤ မၤတ့ၢ်တၢ်ခဲလၢာ် ဃံဃံလၤလၤ လၢဆၢကတီၢ်လၢ အကြၢးအဘၣ်လီၤ.+ အဝဲတ့လီၤ ပှၤဟီၣ်ခိၣ်ဖိ ဒ်သိး အဝဲသ့ၣ်​ ကအဲၣ်ဒိးအိၣ်မူ လီၤထူလီၤယိာ် အဂီၢ်လီၤ.* ဘၣ်ဆၣ်​ တၢ်မၤလၢ ယွၤလၢအမ့ၢ်အတီတဂၤ မၤဝဲစးထီၣ်လၢ အခီၣ်ထံး တုၤအကတၢၢ်န့ၣ်​ ပှၤဟီၣ်ခိၣ်ဖိ ဃုသ့ၣ်ညါဝဲ တလၢာ်နီတဘျီဘၣ်.

၁၂ ယထံၣ်ဘၣ်လၢ တၢ်လၢအဂ့ၤကတၢၢ်လၢ ပှၤဟီၣ်ခိၣ်ဖိ မၤသ့န့ၣ်​ မ့ၢ်ဝဲ ဖဲအဝဲသ့ၣ်​ အိၣ်မူအခါ အဝဲသ့ၣ်​ ကသူၣ်ဖှံသးညီ ဒီးကမၤတၢ်ဂ့ၤလီၤ.+ ၁၃ ဒီးပဝဲခဲလၢာ် ပကြၢးအီၣ်တၢ်အီတၢ် ဒီးသးခုလၢ ပတၢ်မၤခဲလၢာ် အပူၤလီၤ. အဝဲန့ၣ်​ မ့ၢ်တၢ်ဟ့ၣ်တခါလၢ အဟဲလၢ ကစၢ်ယွၤ အအိၣ်လီၤ.+

၁၄ ယသ့ၣ်ညါထီၣ်ဘၣ်လၢ တၢ်လၢ ယွၤလၢအမ့ၢ်အတီတဂၤ တ့လီၤဝဲ ခဲလၢာ်န့ၣ်​ ကအိၣ်ဝဲ လီၤထူလီၤယိာ်လီၤ. ဒီးပှၤပာ်ဖှိၣ်အါထီၣ်​ တၢ်တမံၤမံၤမ့ၢ်ဂ့ၤ, ထုးကွံာ်တၢ်တမံၤမံၤမ့ၢ်ဂ့ၤ တသ့ဘၣ်. ယွၤလၢအမ့ၢ်အတီတဂၤ တ့လီၤတၢ်ခဲလၢာ်ဒ်အံၤန့ၣ်​ မ့ၢ်ဒ်သိး ပှၤကပျံၤအီၤ အဂီၢ်လီၤ.+

၁၅ တၢ်လၢအကဲထီၣ်အသး တမံၤဂ့ၤတမံၤဂ့ၤန့ၣ်​ မ့ၢ်တၢ်လၢ အကဲထီၣ်တ့ၢ်အသးလံ. ဒီးတၢ်လၢ အကဟဲခါဆူညါန့ၣ်​ မ့ၢ်တၢ်လၢ အအိၣ်ပာ်စၢၤလံ.+ ဘၣ်ဆၣ်​ ယွၤလၢအမ့ၢ်အတီတဂၤ ကဒုးအိၣ်ထီၣ်​ တၢ်လၢပှၤလူၤဝဲတဖၣ်လီၤ.*

၁၆ လၢဟီၣ်ခိၣ်ချၢအံၤ ယထံၣ်ဘၣ်စ့ၢ်ကီးလၢ ဖဲတၢ်စံၣ်ညီၣ်တီ ကြၢးအိၣ်ဝဲန့ၣ်​ တၢ်အၢတၢ်သီအိၣ်ဝဲ ဒီးဖဲတၢ်တီတၢ်လိၤ ကြၢးအိၣ်ဝဲန့ၣ်​ တၢ်အၢတၢ်သီ အိၣ်ဝဲလီၤ.+ ၁၇ ဒီးယတဲလီၤယသးလၢ “ယွၤလၢအမ့ၢ်အတီတဂၤ ကသမံသမိး ပှၤတီပှၤလိၤ ဒီးပှၤအၢပှၤသီလီၤ.+ အဃိ တၢ်ဆၢကတီၢ်အိၣ်ဝဲလၢ တၢ်မၤတမံၤဂ့ၤ တမံၤဂ့ၤအဂီၢ်လီၤ.”

၁၈ ယတဲလီၤစ့ၢ်ကီးယသးလၢ ဘၣ်ဃးဒီး ပှၤဟီၣ်ခိၣ်ဖိန့ၣ်​ ယွၤလၢအမ့ၢ်အတီတဂၤ ကမၤကွၢ်အဝဲသ့ၣ်​ ဒီးပာ်ဖျါထီၣ်န့ၢ်အဝဲသ့ၣ်လၢ အဝဲသ့ၣ်န့ၣ်​ လီၤဂာ်ဒ်သိးဒီး ဆၣ်ဖိကီၢ်ဖိတဖၣ်, ၁၉ မ့ၢ်လၢ လၢခံကတၢၢ်န့ၣ်​ ပှၤဟီၣ်ခိၣ်ဖိ ဒီးဆၣ်ဖိကီၢ်ဖိတဖၣ်န့ၣ်​ တၢ်ကမၤအသးဒီးအီၤ ဒ်သိးသိးလီၤ.+ ဒ်ဆၣ်ဖိကီၢ်ဖိ သံအသိး ပှၤဟီၣ်ခိၣ်ဖိ သံဝဲစ့ၢ်ကီး ဒီးဆၣ်ဖိကီၢ်ဖိမ့ၢ်ဂ့ၤ ပှၤဟီၣ်ခိၣ်ဖိမ့ၢ်ဂ့ၤ အိၣ်ဝဲဒီးသး* ထဲတမံၤလီၤ.+ အဃိ ပှၤဟီၣ်ခိၣ်ဖိ တဂ့ၤဒိၣ်န့ၢ်ဒံး ဆၣ်ဖိကီၢ်ဖိတဖၣ်ဘၣ်. တၢ်ခဲလၢာ် မ့ၢ်ဝဲတၢ်ကလီကလီလီၤ. ၂၀ အဝဲသ့ၣ်ခဲလၢာ် ကလဲၤလၢ တၢ်လီၢ်တပူၤဃီလီၤ.+ အဝဲသ့ၣ်ခဲလၢာ်န့ၣ်​ ဘၣ်တၢ်တ့အီၤလၢ ဟီၣ်ခိၣ်ကမူၣ်+ ဒီးအဝဲသ့ၣ်ခဲလၢာ် ကကဲထီၣ်က့ၤ ဟီၣ်ခိၣ်ကမူၣ်လီၤ.+ ၂၁ မ့ၢ်ပှၤဟီၣ်ခိၣ်ဖိအသး* လဲၤထီၣ်လၢ ထးခီဧါ ဒီးဆၣ်ဖိကီၢ်ဖိအသး လဲၤလီၤလၢ ဟီၣ်ခိၣ်လာ်ဧါ. မတဂၤ သ့ၣ်ညါကသ့ နီၢ်ကီၢ်လဲၣ်.+ ၂၂ ဒီးယထံၣ်ဘၣ်လၢ တၢ်လၢအဂ့ၤကတၢၢ်လၢ ပှၤဟီၣ်ခိၣ်ဖိ မၤသ့န့ၣ်​ မ့ၢ်ဝဲ အကသူၣ်ဖှံသးညီလၢ အတၢ်မၤအပူၤ,+ မ့ၢ်လၢ အဝဲန့ၣ်​ မ့ၢ်ဝဲအခိၣ်ဖးအဃိလီၤ. ဒီးအသံဝံၤအလီၢ်ခံ ပှၤဒုးနဲၣ်အီၤလၢ တၢ်လၢကမၤအသးတဖၣ်န့ၣ်​ တသ့နီတဂၤဘၣ်.+

၄ ယဆိကမိၣ်အါထီၣ်​ ဘၣ်ဃးဒီး တၢ်ဆီၣ်တံၢ်မၤနၢၤခဲလၢာ် လၢအကဲထီၣ်အသး လၢဟီၣ်ခိၣ်ချၢအံၤလီၤ. ယထံၣ်ဘၣ်​ ပှၤလၢ အဘၣ်တၢ်ဆီၣ်တံၢ်မၤနၢၤအီၤတဖၣ်​ အမဲာ်ထံမဲာ်နိ ဘၣ်ဆၣ်​ ပှၤလၢကမၤမုာ်ထီၣ်က့ၤ အဝဲသ့ၣ်န့ၣ်​ တအိၣ်နီတဂၤဘၣ်.+ ဒီးပှၤလၢ အဆီၣ်တံၢ်မၤနၢၤ အဝဲသ့ၣ်န့ၣ်​ အိၣ်ဒီး တၢ်စိတၢ်ကမီၤအဃိ ပှၤလၢ ကမၤမုာ်ထီၣ်က့ၤ အဝဲသ့ၣ်န့ၣ်​ တအိၣ်နီတဂၤဘၣ်. ၂ ဒီးယထံၣ်ဘၣ်လၢ ပှၤလၢအသံပာ်စၢၤတဖၣ်န့ၣ်​ အတၢ်အိၣ်သး ဂ့ၤဒိၣ်န့ၢ်ဒံး ပှၤလၢအမူဒံးတဖၣ်​ အတၢ်အိၣ်သးလီၤ.+ ၃ ဒီးပှၤလၢ အတအိၣ်ဖျဲၣ်ထီၣ်ဒံးဘၣ်​ ဒီးတထံၣ်ဘၣ်​ တၢ်ကီတၢ်ခဲတဖၣ်လၢ အကဲထီၣ်သး လၢဟီၣ်ခိၣ်ချၢအံၤဘၣ်န့ၣ်+ အတၢ်အိၣ်သး ဂ့ၤဒိၣ်န့ၢ်ဒံး+ အဝဲသ့ၣ်​ ခံဒူၣ်လၢာ်လီၤ.

၄ ဒီးယထံၣ်ဘၣ်စ့ၢ်ကီးလၢ ပှၤထဲးဂံၢ်ထဲးဘါ ဒီးပှၤမၤတၢ်သ့ဂ့ၤဂ့ၤ ခီဖျိလၢ တၢ်ပြၢလိာ်သးလၢ တဂၤဒီးတဂၤ အဘၢၣ်စၢၤန့ၣ်​ အိၣ်ဝဲဒီဒူၣ်.+ အဝဲန့ၣ်စ့ၢ်ကီး မ့ၢ်ဝဲ တၢ်ကလီကလီ ဒီးအလီၤဂာ်ဒ်သိးဒီး ပှၤလူၤဖီၣ်ကလံၤလီၤ.

၅ ပှၤဟးဂီၤဖိ သံၣ်ထီၣ်အစု ဒီးတမၤတၢ်နီတမံၤဘၣ်အဃိ အမၤဟးဂီၤလီၤ အနီၢ်ကစၢ်အသးလီၤ.*+

၆ တၢ်အိၣ်ဘှံးတစဲးန့ၣ်* ဂ့ၤဒိၣ်န့ၢ်ဒံး ပှၤမၤတၢ်ဆူၣ်တလၢ* ဒီးလူၤဖီၣ်ကလံၤလီၤ.+

၇ ယဆိကမိၣ်ကဒီး ဘၣ်ဃးဒီး တၢ်အဒိအဂၤတခါလၢ အပာ်ဖျါထီၣ်​ တၢ်ကလီကလီ လၢဟီၣ်ခိၣ်ချၢအံၤလီၤ. ၈ ပှၤအိၣ်ဝဲတဂၤ ဒီးအသကိးတအိၣ်နီတဂၤဘၣ်. အဖိခွါမ့ၢ်ဂ့ၤ အဒီပုၢ်ဝဲၢ်ခွါမ့ၢ်ဂ့ၤ တအိၣ်ဘၣ်. ဘၣ်ဆၣ်​ အမၤတၢ်ဆူၣ်ဆူၣ်​ ထီဘိလီၤ. အတသးမံဒီး တၢ်ထူးတၢ်တီၤလၢ အအိၣ်ဒီးအီၤနီတဘျီဘၣ်.+ မ့ၢ်အဝဲသံကွၢ်လီၤအသးလၢ ‘ယမၤတၢ်ဆူၣ်ဆူၣ်လၢ မတဂၤအဂီၢ်လဲၣ်, ဘၣ်မနုၤအဃိ ယတမၤတၢ်လၢ အလီၤသူၣ်ဖှံသးညီ နီတဘျီဘၣ်လဲၣ်’ န့ၣ်တဘျီဘျီဧါ.+ အဝဲန့ၣ်စ့ၢ်ကီး မ့ၢ်ဝဲ တၢ်ကလီကလီ ဒီးတၢ်မၤလၢ အလီၤသးဘၣ်တံာ်တာ်လီၤ.+

၉ ပှၤခံဂၤန့ၣ်​ ဂ့ၤဒိၣ်န့ၢ်ဒံး ပှၤတဂၤ+ မ့ၢ်လၢ အဝဲသ့ၣ်​ ကဒိးန့ၢ်ဘၣ်​ ခိၣ်ဖးလၢအဂ့ၤ လၢအမၤတၢ်ဆူၣ်​ အဃိလီၤ. ၁၀ အဝဲသ့ၣ်​ မ့ၢ်လီၤဃံၢ်တဂၤဒီး အဝဲတဂၤ ကဝံၣ်ဆၢထၢၣ်အီၤလီၤ. ဘၣ်ဆၣ်​ ပှၤလၢအအိၣ်ထဲတဂၤ မ့ၢ်လီၤဃံၢ်ဒီး ပှၤအဂၤတဂၤလၢ ကဝံၣ်ဆၢထၢၣ်အီၤ မ့ၢ်တအိၣ်ဘၣ်န့ၣ်​ တၢ်ကကဲထီၣ်အသးဒီးအီၤဒ်လဲၣ်.

၁၁ တကးဒံးဘၣ်​ ပှၤမ့ၢ်မံနီၤ တပူၤဃီခံဂၤန့ၣ်​ အဝဲသ့ၣ်​ ကကလၢၤဝဲလီၤ. ဘၣ်ဆၣ်​ ပှၤမ့ၢ်အိၣ်ထဲတဂၤန့ၣ်​ အကကလၢၤဝဲဒ်လဲၣ်. ၁၂ ပှၤမ့ၢ်အိၣ်ထဲတဂၤန့ၣ်​ ပှၤတဂၤ ဟဲမၤနၢၤအီၤကသ့ ဘၣ်ဆၣ်​ မ့ၢ်အိၣ်ခံဂၤန့ၣ်​ အဝဲသ့ၣ်​ တြီဆၢပှၤတဂၤန့ၣ်​ ကသ့လီၤ. ဒီးပျံၤဖိ ပိၤအသးသၢဘိန့ၣ်​ ပှၤမၤတဲာ်အီၤချ့ချ့* တန့ၢ်ဘၣ်.

၁၃ ဖိသၣ်လၢအဖှီၣ်​ ဘၣ်ဆၣ်​ အကူၣ်တၢ်သ့န့ၣ်​ အတၢ်အိၣ်သး ဂ့ၤဒိၣ်န့ၢ်ဒံး စီၤပၤလၢ အသးပှၢ် ဘၣ်ဆၣ်​ အကဲပှၤဟးဂီၤဖိလၢ+ အတဒိကနၣ်​ တၢ်ဟ့ၣ်ကူၣ်လၢၤဘၣ်လီၤ.+ ၁၄ ဖဲစီၤပၤတဂၤန့ၣ်​ ပၢတၢ်ဒံးအခါ အဝဲ* အိၣ်ဖျဲၣ်ထီၣ်​ ဒ်ပှၤဖှီၣ်ဖိယာ်ဖိအသိး+ ဘၣ်ဆၣ်လၢခံ အဝဲဟးထီၣ်ဘၣ်လၢ ဃိာ်ပူၤ ဒ်သိးအကကဲထီၣ်​ စီၤပၤအဂီၢ်လီၤ.+ ၁၅ ယဆိကမိၣ်ထံ ဘၣ်ဃးဒီး တၢ်မၤအသးဒီး ပှၤလၢအအိၣ်မူလၢ အဟးဝ့ၤဝီၤလၢ ဟီၣ်ခိၣ်ချၢခဲလၢာ် ဃုာ်ဒီး ပှၤသးစၢ်တဂၤန့ၣ်လၢ အပၢက့ၤတၢ်လၢ စီၤပၤအလီၢ်လီၤ. ၁၆ ပှၤလၢအဆီၣ်ထွဲအီၤန့ၣ်​ မ့ၢ်အိၣ်ဝဲ ဒီဒူၣ်သနာ်က့ ပှၤလၢအဟဲလၢခံတဖၣ်​ တဘၣ်သူၣ်ဘၣ်သးအီၤလၢၤဘၣ်.+ အဝဲန့ၣ်စ့ၢ်ကီး မ့ၢ်ဝဲ တၢ်ကလီကလီ ဒီးလီၤဂာ်ဒ်သိးဒီး ပှၤလူၤဖီၣ်ကလံၤလီၤ.

၅ ဖဲနလဲၤလၢ ယွၤလၢ အမ့ၢ်အတီတဂၤ အဟံၣ်​ တဘျီဂ့ၤ တဘျီဂ့ၤအခါ ပလီၢ်နသးတက့ၢ်.+ နလဲၤဒိကနၣ်တၢ်ဖဲန့ၣ်န့ၣ်+ ဂ့ၤဒိၣ်န့ၢ်ဒံး နလဲၤဟ့ၣ်လုၢ်ထီၣ်တၢ် ဒ်ပှၤဟးဂီၤဖိ မၤဝဲအသိး,+ မ့ၢ်လၢ ပှၤဟးဂီၤဖိ တသ့ၣ်ညါလီၤအသးလၢ အတၢ်မၤန့ၣ်​ ကမၣ်ဝဲဘၣ်.

၂ တချုးလၢ နတဲတၢ်ဒံးဘၣ်န့ၣ်​ ဆိကမိၣ်ထံတၢ်တက့ၢ်. မ့ၢ်လၢ ယွၤလၢအမ့ၢ်အတီတဂၤန့ၣ်+ အိၣ်လၢမူခိၣ်​ ဒီးနအိၣ်လၢ ဟီၣ်ခိၣ်အဃိ တဘၣ်ကရီတဲတၢ်လၢ ယွၤလၢအမ့ၢ်အတီတဂၤန့ၣ်​ အမဲာ်ညါတဂ့ၤ. ပလီၢ်နသးလၢ တၢ်လၢနတဲတဖၣ်​ တက့ၢ်.+ ၃ တၢ်မံမီၢ်န့ၣ်​ ဟဲအိၣ်ထီၣ်လၢ ပှၤတၢ်ဆိကမိၣ်​ အါတလၢအဃိလီၤ.+ ဒ်န့ၣ်အသိး ပှၤဟးဂီၤဖိ အတၢ်ကတိၤန့ၣ်​ ဟဲအိၣ်ထီၣ်​ ခီဖျိ ပှၤတဲတၢ်အါတလၢ အဃိလီၤ.+ ၄ ဖဲနမၤ တၢ်အၢၣ်လီၤဒီး ကစၢ်ယွၤ တဘျီဂ့ၤ တဘျီဂ့ၤအခါ တဘၣ်​ မၤယံာ်မၤနီၢ်နသးလၢ နကမၤလၢပှဲၤအီၤ တဂ့ၤ.+ ကစၢ်ယွၤ တဘၣ်သူၣ်ဘၣ်သးဝဲ ပှၤဟးဂီၤဖိဘၣ်.+ တၢ်လၢနအၢၣ်လီၤန့ၣ်​ မၤလၢပှဲၤအီၤတက့ၢ်.+ ၅ နမ့ၢ်တအၢၣ်လီၤတၢ်ဘၣ်န့ၣ်​ အဂ့ၤဒိၣ်န့ၢ်ဒံး နအၢၣ်လီၤတၢ် ဘၣ်ဆၣ်​ နတမၤလၢပှဲၤအီၤဘၣ်လီၤ.+ ၆ တဘၣ်ပျဲလၢ နထးခိၣ်​ ကဒုးအိၣ်ထီၣ်​ နတၢ်ဒဲးဘးတဂ့ၤ.+ ဒီးလၢမူခိၣ်ကလူးတဂၤန့ၣ်​ အမဲာ်ညါန့ၣ်​ တဘၣ်တဲလၢ နအၢၣ်လီၤကမၣ်ဘၣ်တၢ်တဂ့ၤ.+ မ့ၢ်နကြၢး မၤသးထီၣ်​ ကစၢ်ယွၤ ခီဖျိတၢ်လၢ နတဲအဃိဧါ. နမ့ၢ်မၤ ဒ်န့ၣ်န့ၣ်​ အဝဲကမၤဟးဂီၤဘၣ်ဖုး တၢ်လၢနမၤတ့ၢ်အီၤတဖၣ်လီၤ.+ ၇ ဒ်တၢ်မံမီၢ် ဟဲအိၣ်ထီၣ်လၢ ပှၤတၢ်ဆိကမိၣ်​ အါတလၢအဃိ+ အသိး တၢ်ကတိၤလၢ အခီပညီ တအိၣ်ဘၣ်န့ၣ်​ ဟဲအိၣ်ထီၣ်လၢ တၢ်ကတိၤအါထံၣ်​ အကျါလီၤ. အဃိ ပျံၤယွၤလၢအမ့ၢ်အတီတဂၤ န့ၣ်တက့ၢ်.+

၈ လၢနဟီၣ်ကဝီၤအပူၤ နမ့ၢ်ထံၣ်ဘၣ်​ ပဒိၣ်တဂၤ ဆီၣ်တံၢ်မၤနၢၤ ပှၤဖှီၣ်ဖိယာ်ဖိ, တစံၣ်ညီၣ်တၢ် တီတီလိၤလိၤဘၣ်​ ဒီးတမၤတၢ်တီတၢ်လိၤဘၣ်န့ၣ်​ တဘၣ်ကမၢကမၣ်လၢ တၢ်ဂ့ၢ်တဖၣ်န့ၣ်​ အဃိတဂ့ၤ.+ နီၢ်ကီၢ်န့ၣ်​ ပဒိၣ်လၢ အပတီၢ်ထီန့ၢ်ဒံးအီၤန့ၣ်​ ကွၢ်အီၤ ဒီးပှၤလၢအပတီၢ်ထီန့ၢ်ဒံး အဝဲသ့ၣ်န့ၣ်​ အိၣ်ဒံးဝဲလီၤ.

၉ တၢ်အဘျုးလၢ ပှၤဒိးန့ၢ်ဘၣ်အီၤ ခီဖျိ ဟီၣ်ခိၣ်အဃိန့ၣ်​ အဝဲသ့ၣ်​ ကိးဂၤဒဲး နီၤလီၤလိာ်အသး ဒီးစီၤပၤဒၣ်လဲာ် အီၣ်ဘၣ်တၢ်လၢ အမဲထီၣ်သၣ်ထီၣ်​ လၢဟီၣ်ခိၣ်လီၤ.+

၁၀ ပှၤလၢအအဲၣ်ကျိၣ်အဲၣ်စ့န့ၣ်​ တသးမံဒီး ကျိၣ်စ့လၢ အအိၣ်ဒီးအီၤ နီတဘျီဘၣ်. ဒီးပှၤလၢအအဲၣ်​ တၢ်ထူးတၢ်တီၤန့ၣ်​ အလီကီအါထီၣ်ဝဲ တၢ်ထူးတၢ်တီၤ ထီဘိလီၤ.+ အဝဲန့ၣ်စ့ၢ်ကီး မ့ၢ်ဝဲ တၢ်ခီလီလီလီၤ.+

၁၁ ဖဲပှၤတဂၤ အတၢ်ထူးတၢ်တီၤ အါထီၣ်အခါ ပှၤလၢအန့ၢ်ဘၣ်​ အတၢ်ထူးတၢ်တီၤန့ၣ်​ အိၣ်အါထီၣ်ဝဲစ့ၢ်ကီးလီၤ.+ ဒီးတၢ်ထူးတၢ်တီၤအကစၢ်န့ၣ်​ အိၣ်ဒၣ်ထဲ အဘၣ်ကွၢ်အတၢ်ထူးတၢ်တီၤတဖၣ်ဒ်န့ၣ် အဃိ မ့ၢ်အဘျုးအိၣ်လၢ အဂီၢ်ဒ်လဲၣ်.+

၁၂ ပှၤမၤတၢ်ဖိတဂၤ အအီၣ်ဘၣ်တၢ် အါမ့ၢ်ဂ့ၤ စှၤမ့ၢ်ဂ့ၤ အမံဘၣ်မုာ်မုာ်လီၤ. မ့မ့ၢ် ပှၤထူးပှၤတီၤန့ၣ်​ ခီဖျိလၢအတၢ်အိၣ်​ အါအါဂီၢ်ဂီၢ်အဃိ အမံဝဲတန့ၢ်ဘၣ်.

၁၃ ယထံၣ်ဘၣ်​ တၢ်မၤအသးလၢ အနးဒိၣ်မးတခါ လၢဟီၣ်ခိၣ်ချၢလီၤ. ခီဖျိလၢ ပှၤတဂၤ ပာ်ဖှိၣ်ဃာ် အတၢ်ထူးတၢ်တီၤ အါအါဂီၢ်ဂီၢ်အဃိ မ့ၢ်ဒၣ်​ အမၤဘၣ်ဒိလီၤ အနီၢ်ကစၢ်လီၤ. ၁၄ ဒီးလၢခံ အဝဲပာ်ဒူအသး ဒီးမၤတၢ်မၤတခါလၢ အတလဲၤအသးဂ့ၤဂ့ၤဘၣ်​ အဃိ အတၢ်ထူးတၢ်တီၤတဖၣ်န့ၣ်​ လီၤမၢ်ကွံာ်ဝဲလီၤ.+ ဖဲအဝဲ ဒိးန့ၢ်ဘၣ်ဝဲ အဖိခွါတဂၤအခါ တၢ်တအိၣ်ဒီးအီၤ နီတမံၤလၢၤဘၣ်.

၁၅ ဒ်ပှၤတဂၤ ဟဲထီၣ်ဘ့ၣ်ဆ့ လၢအမိၢ် အဒၢလီၢ်ပူၤအသိး အကက့ၤကဒါက့ၤ ဘ့ၣ်ဆ့ ဒ်အဟဲအသိးလီၤ.+ ဒီးတၢ်လၢအမၤန့ၢ်ဝဲ ခီဖျိလၢ အမၤတၢ်ဆူၣ်ဆူၣ်အဃိန့ၣ်​ အက့ၤစိာ်ဝဲ တသ့နီတမံၤဘၣ်.+

၁၆ အကက့ၤကဒါက့ၤ ဒ်အဟဲဝဲအသိးလီၤ. ပှၤတဂၤ မ့ၢ်ဆဲးမၤတၢ်ဆူၣ်ဆူၣ်​ ဘၣ်ဆၣ်​ အလီၤဂာ်ဒ်သိးဒီး ပှၤလူၤဖီၣ်ကလံၤအဃိ မ့ၢ်အဘျုးအိၣ်လၢ အဂီၢ်ဒ်လဲၣ်.+ အဝဲန့ၣ်စ့ၢ်ကီး မ့ၢ်ဝဲ တၢ်လၢအနးဒိၣ်မး တခါလီၤ. ၁၇ တကးဒံးဘၣ်​ ကိးနံၤဒဲးန့ၣ်​ အတအီၣ်ဘၣ်တၢ်လၢ တၢ်သးခု အပူၤဘၣ်. အတၢ်အိၣ်မူန့ၣ်​ ပှဲၤဝဲဒီး တၢ်သူၣ်အ့န့သးအ့န့, တၢ်ဆူးတၢ်ဆါ ဒီးတၢ်သူၣ်ဒိၣ်သးဖျိးလီၤ.+

၁၈ ယထံၣ်လၢ တၢ်လၢအဂ့ၤ ဒီးတၢ်လၢအကြၢးအဘၣ်န့ၣ်​ မ့ၢ်ဝဲဒ်အံၤလီၤ. ဖဲပှၤတဂၤ အိၣ်မူဘၣ်​ ဖုၣ်ဖုၣ်ဖိလၢ ဟီၣ်ခိၣ်ချၢအံၤ ဒ်ယွၤလၢအမ့ၢ်အတီတဂၤ ဟ့ၣ်ဒုးအိၣ်မူအီၤအသိးအခါ အကြၢးအီၣ်တၢ်အီတၢ် ဒီးသူၣ်ဖှံသးညီလၢ အတၢ်မၤခဲလၢာ်အပူၤ,+ မ့ၢ်လၢ အဝဲန့ၣ်မ့ၢ်ဝဲ ခိၣ်ဖးလၢအဂီၢ် အဃိလီၤ.+ ၁၉ ဖဲယွၤလၢအမ့ၢ်အတီတဂၤ ဟ့ၣ်ပှၤတဂၤလၢ တၢ်ထူးတၢ်တီၤ ဒီးတၢ်စုလီၢ်ခီၣ်ခိၣ်တဖၣ်အခါ+ ကစၢ်ယွၤ မ့ၢ်ဟ့ၣ်ဝဲအခွဲးလၢ အဝဲကသူ တၢ်သ့ၣ်တဖၣ်န့ၣ်လၢ အကကဲထီၣ်​ တၢ်သူၣ်ဖှံသးညီအဂီၢ်န့ၣ်​ အကြၢးဟံးန့ၢ် အခိၣ်ဖးတခါအံၤ ဒီးသူၣ်ဖှံသးညီလၢ အတၢ်မၤအပူၤလီၤ. အဝဲန့ၣ်​ မ့ၢ်စ့ၢ်ကီး တၢ်ဟ့ၣ်တခါလၢ အဟဲလၢ ကစၢ်ယွၤ အအိၣ်လီၤ.+ ၂၀ မ့ၢ်လၢ ယွၤလၢအမ့ၢ်အတီတဂၤ ဟ့ၣ်အီၤ တၢ်သးခုအါမးအဃိ အတၢ်အိၣ်မူ တနံၤဘၣ်တနံၤ လဲၤအသးချ့မးန့ၣ်​ အနီၢ်ကစၢ်မး တပာ်သူၣ်ပာ်သးဘၣ်ဝဲဘၣ်.+

၆ ယထံၣ်ဘၣ်​ တၢ်မၤအသးလၢ အနးဒိၣ်မး အဂၤတခါလၢ ဟီၣ်ခိၣ်ချၢ ဒီးညီနုၢ် အကဲထီၣ်အသးလၢ ပှၤဟီၣ်ခိၣ်ဖိ အကျါလီၤ. ၂ ယွၤလၢအမ့ၢ်အတီတဂၤ ကဟ့ၣ်လီၤပှၤတဂၤလၢ တၢ်ထူးတၢ်တီၤ, တၢ်စုလီၢ်ခီၣ်ခိၣ်​ ဒီးတၢ်လၤကပီၤ အဃိ တၢ်လၢပှၤတဂၤန့ၣ်​ လီကီဝဲန့ၣ်​ အိၣ်ဒီးအီၤခဲလၢာ်လီၤ. ဘၣ်ဆၣ်​ ယွၤလၢအမ့ၢ်အတီတဂၤ တပျဲလၢ ပှၤတဂၤန့ၣ်​ ကအိၣ်ဒီး တၢ်သူၣ်ဖှံသးညီလၢ တၢ်သ့ၣ်တဖၣ်န့ၣ်​ အဃိဘၣ်. လၢတၢ်န့ၣ်အလီၢ် အဝဲကပျဲလၢ ပှၤအဂၤတဂၤ ကဒိးန့ၢ်ဘၣ်​ တၢ်သူၣ်ဖှံသးညီလၢ တၢ်သ့ၣ်တဖၣ်န့ၣ်​ အဃိလီၤ. အဝဲအံၤ မ့ၢ်ဝဲတၢ်ကလီကလီ ဒီးတၢ်လၢအနးဒိၣ်မး တခါလီၤ. ၃ ပှၤတဂၤ အဖိမ့ၢ်အိၣ်​ အဂၤတကယၤ ဒီးအမ့ၢ်အိၣ်မူ အနံၣ်အါမး တုၤလၢအပှၢ်တဃဲး သနာ်က့ တချုးလၢ အသံဒံးဘၣ်​ အဝဲမ့ၢ်တသူ တၢ်လၢအဂ့ၤလၢ အအိၣ်ဒီးအီၤ ဒ်သိးကဒိးန့ၢ်ဘၣ်​ တၢ်သူၣ်ဖှံသးညီအဂီၢ်ဘၣ်န့ၣ်​ ယကဘၣ်တဲလၢ ဖိသၣ်အိၣ်ဖျဲၣ်လီၤ လၢအသံတဂၤန့ၣ်​ အတၢ်အိၣ်သး ဂ့ၤဒိၣ်န့ၢ်ဒံးအီၤလီၤ.+ ၄ ဖိသၣ်တဂၤန့ၣ်​ အိၣ်ဖျဲၣ်ထီၣ်​ ကလီကလီ ဒီးလီၤဂာ်ဒ်သိး အသံလၢ တၢ်ခံးကျါ ဒီးအမံၤတအိၣ်ဘၣ်. ၅ ဖိသၣ်တဂၤန့ၣ်​ တထံၣ်ဘၣ်​ မုၢ်နီတဘျီဘၣ်​ ဒီးအတသ့ၣ်ညါ တၢ်နီတမံၤဘၣ်​ သနာ်က့ အတၢ်အိၣ်သး ဂ့ၤဒိၣ်န့ၢ်ဒံး ပှၤလၢအအိၣ်မူ အနံၣ်အါမးတဂၤန့ၣ်လီၤ.+ ၆ နမ့ၢ်အိၣ်မူဘၣ်​ အနံၣ်ခံကထိ သနာ်က့ နမ့ၢ်တသူၣ်ဖှံသးညီ နီတဘျီဘၣ်န့ၣ်​ အဘျုးကအိၣ်ဒ်လဲၣ်. လၢခံကတၢၢ်န့ၣ်​ ပှၤခဲလၢာ် ဘၣ်လဲၤလၢ တၢ်လီၢ်တပူၤဃီ တမ့ၢ်ဧီၤ.+

၇ ပှၤတဂၤ အမၤတၢ်ဆူၣ်ဆူၣ်​ လၢအဟၢဖၢကကးအဂီၢ်*+ ဘၣ်ဆၣ်​ အသးတမံ နီတဘျီဘၣ်. ၈ ပှၤလၢအကူၣ်တၢ်သ့တဂၤန့ၣ်​ အတၢ်အိၣ်သး ဂ့ၤဒိၣ်န့ၢ်ဒံး ပှၤဟးဂီၤဖိတဂၤလၢ ကျဲဒ်လဲၣ်.+ ဒီးပှၤဖှီၣ်ဖိယာ်ဖိတဂၤ လဲၤခီဖျိတၢ်အိၣ်မူ အတၢ်ကီတၢ်ခဲတဖၣ်​ မ့ၢ်ဘၣ်​ သနာ်က့ မ့ၢ်အကဲဘျုးဒ်လဲၣ်. ၉ နမ့ၢ်သးစၢၢ်ဆၢ တၢ်လၢနထံၣ်အီၤလၢ နမဲာ်သ့န့ၣ်​ ဂ့ၤဒိၣ်န့ၢ်ဒံး နဟးလီကီတၢ်လၢ နမၤန့ၢ်အီၤ တန့ၢ်ဘၣ်တဖၣ်လီၤ. အဝဲန့ၣ်​ မ့ၢ်စ့ၢ်ကီး တၢ်ကလီကလီ ဒီးအလီၤဂာ်ဒ်သိးဒီး ပှၤလူၤဖီၣ်ကလံၤလီၤ.

၁၀ တၢ်လၢ အအိၣ်ဝဲခဲလၢာ်န့ၣ်​ တၢ်ကိးန့ၢ်အမံၤလံ. ဒီးပှၤကညီ အန့ဆၢၣ်​ အိၣ်ဒ်လဲၣ်န့ၣ်​ အိၣ်ဖျါထီၣ်တ့ၢ်လံ. ဒီးပှၤကညီန့ၣ်​ တဲအါလိာ်အသးဒီး ပှၤလၢအစိအကမီၤဒိၣ်န့ၢ်အီၤ တဂၤန့ၣ်​ တန့ၢ်ဘၣ်. ၁၁ တၢ်ကတိၤဒံးအါန့ၣ်​ အကဲထီၣ်တၢ်လၢ အဘျုးတအိၣ်ဘၣ်​ ဒံးအါလီၤ. အဃိ အကဲဘျုးလၢ ပှၤကညီအဂီၢ်ဒ်လဲၣ်. ၁၂ ဖဲပှၤတဂၤ အိၣ်မူဘၣ်​ ဖုၣ်ဖုၣ်ဖိအခါ တၢ်လၢအဂ့ၤကတၢၢ်လၢ အမၤဝဲသ့န့ၣ်​ မတဂၤ သ့ၣ်ညါဝဲသ့လဲၣ်. အတၢ်အိၣ်မူန့ၣ်​ မ့ၢ်တၢ်ကလီကလီ ဒီးအလီၤဂာ်ဒ်သိးဒီး တၢ်ကဒုလၢ အကလီၤမၢ်ကွံာ်ဝဲလီၤ.+ အသံဝံၤအလီၢ်ခံ ပှၤတဲဘၣ်အီၤလၢ တၢ်လၢအမၤအသးလၢ ဟီၣ်ခိၣ်ချၢ တသ့နီတဂၤဘၣ်.

၇ တၢ်မံၤဂ့ၤသၣ်ဂ့ၤန့ၣ်​ ဂ့ၤဒိၣ်န့ၢ်ဒံး သိလၢအဂ့ၤလီၤ.+ ဒီးပှၤသံအနံၤန့ၣ်​ အဂ့ၤဒိၣ်န့ၢ်ဒံး အအိၣ်ဖျဲၣ်ထီၣ်အနံၤလီၤ. ၂ ပှၤလဲၤလၢ ဟံၣ်တဖျၢၣ်လၢ ပှၤဟီၣ်လၢပှၤသံအဃိန့ၣ်​ ဂ့ၤဒိၣ်န့ၢ်ဒံး ပှၤလဲၤလၢ ဟံၣ်လၢ ပှၤအီၣ်သကိး အီသကိးတၢ်,+ မ့ၢ်လၢ ပှၤကိးဂၤဒဲး အကျဲကတၢၢ်လၢ တၢ်သံ ဒီးပှၤလၢ အမူတဖၣ်​ ကြၢးသ့ၣ်နီၣ်ထီၣ်​ တၢ်ဂ့ၢ်အဝဲန့ၣ်လီၤ. ၃ တၢ်သူၣ်ကိၢ်သးဂီၤန့ၣ်​ ဂ့ၤဒိၣ်န့ၢ်ဒံး တၢ်နံၤတၢ်အ့,+ မ့ၢ်လၢ တၢ်သးအုးန့ၣ်​ မၤဂ့ၤထီၣ်​ ပှၤတဂၤအဃိလီၤ.+ ၄ ပှၤကူၣ်တၢ်သ့လၢ အအိၣ်ဝဲလၢ ဟံၣ်တဖျၢၣ်လၢ ပှၤဟီၣ်လၢပှၤသံအဃိန့ၣ်​ ဆိကမိၣ်ထံလီၤ တၢ်အိၣ်မူအဂ့ၢ်လီၤ. မ့မ့ၢ် ပှၤဟးဂီၤဖိန့ၣ်​ ဆိကမိၣ်ထဲ တၢ်သူၣ်ဖှံသးညီအဂ့ၢ်လီၤ.+

၅ ပှၤဒိကနၣ်​ ပှၤကူၣ်တၢ်သ့ အတၢ်သိၣ်ဃီၣ်န့ၣ်+ ဂ့ၤဒိၣ်န့ၢ်ဒံး ပှၤဒိကနၣ်​ ပှၤဟးဂီၤဖိ အတၢ်စံးပတြၢၤလီၤ.* ၆ ပှၤဟးဂီၤဖိတဂၤ အတၢ်နံၤန့ၣ်​ လီၤဂာ်ဒ်သိးဒီး တၤဆှုၣ်တဖၣ်လၢ အကဲၤလၢ သပၢၤဖီလာ် ဒီးသီၣ်ဝဲ ပြီးပြီးပြးပြးလီၤ.+ အဝဲန့ၣ်စ့ၢ်ကီး မ့ၢ်ဝဲ တၢ်ကလီကလီလီၤ. ၇ တၢ်ဆီၣ်တံၢ်မၤနၢၤန့ၣ်​ ဒုးကဲထီၣ်​ ပှၤကူၣ်တၢ်သ့တဂၤ ဒ်ပှၤပျုၢ်အသိး သ့ဝဲလီၤ. ဒီးတၢ်ထီးကျိၣ်ထီးစ့န့ၣ်​ မၤအၢမၤသီထီၣ်​ ပှၤတဂၤအသး သ့ဝဲလီၤ.+

၈ တၢ်ဂ့ၢ်တမံၤမံၤ အကတၢၢ်န့ၣ်​ ဂ့ၤဒိၣ်န့ၢ်ဒံး တၢ်အခီၣ်ထံးလီၤ. ဒီးတၢ်ဝံသးစူၤန့ၣ်​ ဂ့ၤဒိၣ်န့ၢ်ဒံး တၢ်ပာ်ထီၣ်ထီသးလီၤ.+ ၉ ပှၤဟးဂီၤဖိတဖၣ်​ သးထီၣ်တၢ် ဒီးစၢဃာ်တၢ်ကမၣ်*+ အဃိ တဘၣ်သးထီၣ်တၢ် ချ့ချ့တဂ့ၤ.+

၁၀ တဘၣ်တဲလၢ “မုၢ်နံၤလၢအပူၤကွံာ်န့ၣ်​ အဂ့ၤဒိၣ်န့ၢ်ဒံး မုၢ်နံၤခဲအံၤ” တဂ့ၤ. နမ့ၢ်တဲဒ်န့ၣ်န့ၣ်​ နတမ့ၢ်ပှၤလၢ အကူၣ်တၢ်သ့ဘၣ်.+

၁၁ ပှၤလၢအအိၣ်ဒီး တၢ်ကူၣ်သ့ မ့ၢ်ဒိးန့ၢ်ဘၣ်​ တၢ်န့ၢ်သါန့ၣ်​ ဂ့ၤဝဲလီၤ. တၢ်ကူၣ်သ့ ကဲဘျုးလၢ ပှၤလၢအမူတဖၣ်* အဂီၢ်လီၤ. ၁၂ တၢ်ကူၣ်သ့ မ့ၢ်တၢ်ဒီသဒၢ+ ဒ်ကျိၣ်စ့ မ့ၢ်တၢ်ဒီသဒၢ အသိးလီၤ.+ ဘၣ်ဆၣ်​ တၢ်သ့ၣ်ညါ ဒီးတၢ်ကူၣ်သ့န့ၣ်​ ဂ့ၤဒိၣ်န့ၢ်ဒံး ကျိၣ်စ့ ခီဖျိလၢ ပှၤလၢအအိၣ်ဒီး တၢ်ကူၣ်သ့န့ၣ်​ အတၢ်ကူၣ်သ့ ကမၤပူၤဖျဲးအီၤ အဃိလီၤ.+

၁၃ ဆိကမိၣ်ထံ တၢ်လၢ ယွၤလၢအမ့ၢ်အတီတဂၤ မၤတ့ၢ်ဝဲန့ၣ်တက့ၢ်. တၢ်လၢ ကစၢ်ယွၤ မၤက့ၣ်တ့ၢ်အီၤန့ၣ်​ မတဂၤ မၤဘျၢထီၣ်အီၤ ကသ့လဲၣ်.+ ၁၄ ဖဲမုၢ်နံၤလၢ တၢ်လဲၤအသး ဂ့ၤဂ့ၤလၢ နဂီၢ်န့ၣ်​ ပာ်ဖျါထီၣ်​ တၢ်သူၣ်ဂ့ၤသးဝါတက့ၢ်.+ မ့မ့ၢ်ဖဲ တၢ်ကီတၢ်ခဲအမုၢ်နံၤန့ၣ်​ သ့ၣ်နီၣ်ထီၣ်လၢ ကစၢ်ယွၤ ဟ့ၣ်အခွဲးလၢ မုၢ်နံၤလၢအဂ့ၤ ကအိၣ်ဝဲ ဒီးတၢ်ကီတၢ်ခဲ အမုၢ်နံၤ ကအိၣ်ဝဲ စ့ၢ်ကီးတက့ၢ်.+ အဃိ တၢ်ကကဲထီၣ်အသး ဒီးပှၤဟီၣ်ခိၣ်ဖိလၢ ခါဆူညါဒ်လဲၣ်န့ၣ်​ အဝဲသ့ၣ်​ သ့ၣ်ညါလီၤတံၢ်ဝဲ တသ့ဘၣ်.+

၁၅ ဖဲယအိၣ်မူဘၣ်​ ဖုၣ်ဖုၣ်ဖိ* အခါ+ ယထံၣ်ဘၣ်​ တၢ်ကိးမံၤဒဲးလီၤ. ယထံၣ်ဘၣ်လၢ ပှၤတီပှၤလိၤတဖၣ်​ မၤတၢ်တီတၢ်လိၤ ဘၣ်ဆၣ်​ ဘၣ်သံဝဲဆိဆိ+ ဒီးပှၤအၢပှၤသီတဖၣ်​ မၤတၢ်အၢတၢ်သီ ဘၣ်ဆၣ်​ မူဒံးဝဲ ဖးယံာ်ဒံးလီၤ.+

၁၆ တဘၣ်​ ပာ်တီပာ်လိၤနသး အါတလၢတဂ့ၤ.+ တဘၣ်​ ပာ်နသးလၢ နကူၣ်တၢ်သ့ အါတလၢတဂ့ၤ.+ မ့ၢ်နအဲၣ်ဒိး မၤဟးဂီၤလီၤနသးဧါ.+ ၁၇ တဘၣ်ပာ်လီၤနသးလၢ နကမၤတၢ်အၢတၢ်သီအါအါ ဒီးကဲထီၣ်​ ပှၤဟးဂီၤဖိတဂ့ၤ.+ မ့ၢ်နအဲၣ်ဒိးသံ ဆိဆိဧါ.+ ၁၈ နမ့ၢ်ဟံးဃာ် တၢ်ဟ့ၣ်ပလီၢ် အဆိကတၢၢ်တခါ* ဒီးတကတီၢ်ဃီ နမ့ၢ်တပျၢ်ကွံာ် တၢ်ဟ့ၣ်ပလီၢ် အဝဲတခါဘၣ်န့ၣ်* အမ့ၢ်တၢ်လၢ အဂ့ၤကတၢၢ်လီၤ.+ ပှၤလၢ အပျံၤကစၢ်ယွၤန့ၣ်​ ကမၤထွဲ တၢ်ဟ့ၣ်ပလီၢ် ခံခါလၢာ်လီၤ.

၁၉ လၢတၢ်ကူၣ်သ့အဃိ ပှၤကူၣ်တၢ်သ့တဂၤ အဂံၢ်အဘါ ဆူၣ်ဒိၣ်န့ၢ်ဒံး ပှၤပိာ်ခွါလၢ အဂံၢ်ဆူၣ်ဘါဆူၣ်​ အဂၤတဆံလၢ အအိၣ်လၢဝ့ၢ်ပူၤလီၤ.+ ၂၀ လၢဟီၣ်ခိၣ်ချၢအံၤ ပှၤတီပှၤလိၤလၢ အမၤတၢ်လၢအဘၣ်ထီဘိ ဒီးတမၤကမၣ်တၢ် နီတဘျီဘၣ်န့ၣ်​ တအိၣ်နီတဂၤဘၣ်.+

၂၁ တၢ်လၢ ပှၤတဲဝဲန့ၣ်​ တဘၣ်​ ပာ်လၢနသးပူၤ ကိးထံၣ်ဒဲးတဂ့ၤ.+ နမ့ၢ်မၤဒ်န့ၣ်န့ၣ်​ နကနၢ်ဟူဘၣ်ဖုး နခ့နပှၤ တဲအၢတဲသီ* နဂ့ၢ်လီၤ. ၂၂ နသ့ၣ်ညါလီၤနသးဂ့ၤဂ့ၤလၢ နၤစ့ၢ်ကီး နတဲအၢတဲသီဘၣ်​ ပှၤဂၤအဂ့ၢ် အဘျီအါမးလီၤ.+

၂၃ ယသူ ယတၢ်ကူၣ်သ့ ဒ်သိး ယကမၤကွၢ် တၢ်သ့ၣ်တဖၣ်န့ၣ်ခဲလၢာ် ဒီးယတဲလၢ “ယကကူၣ်တၢ်သ့ ဒိၣ်ထီၣ်လီၤ.” ဘၣ်ဆၣ်​ ယမၤအီၤတန့ၢ်ဘၣ်. ၂၄ တၢ်လၢ အဟဲကဲထီၣ်တ့ၢ်အသးတဖၣ်န့ၣ်​ ပှၤနၢ်ပၢၢ်အီၤ တသ့ဘၣ်​ ဒီးယိာ်တလၢလီၤ. မတဂၤ နၢ်ပၢၢ်အီၤ ကသ့လဲၣ်.+ ၂၅ ယပာ်လီၤ ယသးဒ်သိး ယကဃုသ့ၣ်ညါ, ယကဃုတၢ်ကူၣ်သ့ ဒီးယကဃုသ့ၣ်ညါလၢ ဘၣ်မနုၤအဃိ တၢ်တမံၤဂ့ၤ တမံၤဂ့ၤ ကဲထီၣ်အသးလဲၣ်န့ၣ်လီၤ. တကးဒံးဘၣ်​ ယပာ်လီၤယသးလၢ ယကနၢ်ပၢၢ်ထီၣ်လၢ တၢ်လၢအနါစိၤတဖၣ်န့ၣ်​ မ့ၢ်တၢ်လၢ အအၢအသီ ဒီးတၢ်လၢ အခီပညီတအိၣ်ဘၣ်န့ၣ်​ မ့ၢ်ဝဲတၢ်ကလီကလီလီၤ.+ ၂၆ ဒီးယနၢ်ပၢၢ်ထီၣ်တခါလၢ ပိာ်မုၣ်တဂၤလၢ အလီၤဂာ်ဒီးထု* န့ၣ်အၢ* ဒိၣ်န့ၢ်ဒံး တၢ်သံလီၤ. ပိာ်မုၣ်တဂၤန့ၣ်​ အသးလီၤဂာ်ဒီး ပျံၤသကွီၤတဖၣ်​ ဒီးအစုလီၤဂာ်ဒီး ထးသွဲတဖၣ်လီၤ. ပှၤလၢ အမၤသးခု ယွၤလၢအမ့ၢ်အတီတဂၤ အသးန့ၣ်​ ကပူၤဖျဲးလၢ ပိာ်မုၣ်တဂၤန့ၣ်​ အစုပူၤလီၤ.+ မ့မ့ၢ် ပှၤတၢ်ဒဲးဘးဖိန့ၣ်​ ပိာ်မုၣ်အံၤ ကဖီၣ်န့ၢ် အဝဲသ့ၣ်လီၤ.+

၂၇ ပှၤစံၣ်တဲၤတဲလီၤတၢ်တဂၤ* တဲဝဲလၢ+ “ယသ့ၣ်ညါဘၣ်ဒ်အံၤလီၤ. ယဃုသ့ၣ်ညါ တၢ်တခါဝံၤတခါ ဒ်သိး ယကသ့ၣ်ညါဘၣ်​ တၢ်စံးဆၢအဂီၢ် ၂၈ ဘၣ်ဆၣ်​ တၢ်လၢယဆဲးဃုန့ၣ်​ ယတထံၣ်န့ၢ်ဒံးဘၣ်. လၢပှၤပိာ်ခွါ အဂၤတကထိအကျါန့ၣ်​ ယထံၣ်န့ၢ် ပှၤပိာ်ခွါလၢ အတီအလိၤတဂၤ ဘၣ်ဆၣ်​ လၢပိာ်မုၣ်အဂၤတကထိအကျါန့ၣ်​ ယတထံၣ်န့ၢ် ပိာ်မုၣ်လၢ အတီအလိၤ နီတဂၤဘၣ်. ၂၉ ယသ့ၣ်ညါဘၣ်ထဲ တၢ်တမံၤအံၤလီၤ. ယွၤလၢအမ့ၢ်အတီတဂၤ တ့လီၤပှၤဟီၣ်ခိၣ်ဖိ လၢအတီအလိၤ+ ဘၣ်ဆၣ်​ အဝဲသ့ၣ်​ ဃုကူၣ်ထီၣ်တၢ် ဒီဒူၣ်လီၤ.”+

၈ မတဂၤ မ့ၢ်ပှၤကူၣ်တၢ်သ့ နီၢ်ကီၢ်လဲၣ်. မတဂၤ သ့ၣ်ညါ တၢ်စံးဆၢလၢ ကမၤဘၣ်ဂီၢ်က့ၤ တၢ်ကီတၢ်ခဲ တခါခါ အဂီၢ်လဲၣ်. ပှၤတဂၤ အတၢ်ကူၣ်သ့န့ၣ်​ အိၣ်ဖျါထီၣ်လၢ အမဲာ် ဒီးအမဲာ်မ့ၢ်ဖျါဟ့ သနာ်က့ ခီဖျိလၢ တၢ်ကူၣ်သ့အဃိ ကလီၤကပုာ်ဝဲလီၤ.

၂ ယကတဲနၤလၢ “မ့ၢ်လၢ နအၢၣ်လီၤလၢ ကစၢ်ယွၤ အမဲာ်ညါ ဝံၤလံအဃိ+ ဒိကနၣ်​ စီၤပၤ အတၢ်မၤလိာ်တဖၣ်တက့ၢ်.+ ၃ တဘၣ်​ ကရီဟးထီၣ်ကွံာ်လၢ စီၤပၤအမဲာ်ညါတဂ့ၤ.+ တဘၣ်ဆီၣ်ထွဲ တၢ်လၢအအၢ နီတမံၤတဂ့ၤ.+ စီၤပၤန့ၣ်​ မၤတၢ်လၢ အအဲၣ်ဒိးမၤဝဲ တမံၤဂ့ၤ တမံၤဂ့ၤသ့, ၄ မ့ၢ်လၢ စီၤပၤ အတၢ်ကတိၤန့ၣ်​ အိၣ်ဒီးအစိကမီၤအဃိ+ ပှၤတဲ စီၤပၤလၢ ‘နမၤမနုၤလဲၣ်’ န့ၣ်တသ့နီတဂၤဘၣ်.”

၅ ပှၤလၢ အအိၣ်မူမၤထွဲ တၢ်မၤလိာ်န့ၣ်​ တတူၢ်ဘၣ်​ တၢ်ဘၣ်ဒိဘၣ်ထံးဘၣ်.+ ဒီးပှၤကူၣ်တၢ်သ့ ကဘၣ်​ မၤဘၣ်ဂီၢ်က့ၤ တၢ်ဂ့ၢ်တခါဘၣ်တခါလၢ အခါဖဲလဲၣ်​ ဒီးကဘၣ်မၤဝဲဒ်လဲၣ်န့ၣ်​ အကသ့ၣ်ညါဝဲလီၤ.+ ၆ ပှၤဟီၣ်ခိၣ်ဖိ အတၢ်ကီတၢ်ခဲ အိၣ်ဝဲဒီဒူၣ်လီၤ. အဃိ တၢ်ဂ့ၢ်ခဲလၢာ်န့ၣ်​ ကဘၣ်တၢ်မၤဘၣ်ဂီၢ်က့ၤအီၤ လၢကျဲလၢအဘၣ်​ ဒီးလၢတၢ်ဆၢကတီၢ်လၢ အကြၢးအဘၣ်လီၤ.+ ၇ တၢ်မနုၤ ကကဲထီၣ်အသးလဲၣ်န့ၣ်​ ပှၤတသ့ၣ်ညါဝဲ နီတဂၤဘၣ်အဃိ တၢ်ကမၤအသး ဒ်လဲၣ်န့ၣ်​ မတဂၤတဲဝဲ ကဘၣ်လဲၣ်.

၈ ပှၤဟံးဃာ်ပၢၤဃာ် တၢ်မူအသဟီၣ်* တန့ၢ်နီတဂၤဘၣ်, ဒ်န့ၣ်အသိး ပှၤဟံးဃာ်ပၢၤဃာ် တၢ်သံအမုၢ်နံၤ တန့ၢ်နီတဂၤစ့ၢ်ကီးဘၣ်.+ ဖဲတၢ်ဒုးအိၣ်အခါ ပှၤတပျဲက့ၤ ပှၤသုးဖိနီတဂၤဘၣ်, ဒ်န့ၣ်အသိး ပှၤလၢအမၤတၢ်အၢတၢ်သီန့ၣ်​ တၢ်အၢတၢ်သီ တပျဲပူၤဖျဲး အဝဲသ့ၣ်ဘၣ်.

၉ ယမၤလိဘၣ်​ တၢ်ဂ့ၢ်သ့ၣ်တဖၣ်န့ၣ်​ ဒီးယဆိကမိၣ်ထံ တၢ်ခဲလၢာ်လၢအမၤအသးလၢ ဟီၣ်ခိၣ်ချၢအံၤလီၤ. ဖဲပှၤဟီၣ်ခိၣ်ဖိ ကဒဲကဒဲ ပၢလိာ်သး အဆၢကတီၢ်န့ၣ်​ ပှၤဘၣ်နးဘၣ်ဖှီၣ်​ ထီဘိလီၤ.+ ၁၀ ဒီးယထံၣ်ဘၣ်​ ပှၤခူၣ်လီၤ ပှၤအၢပှၤသီလီၤ. လၢညါန့ၣ်​ အဝဲသ့ၣ်​ နုာ်လီၤဟးထီၣ်လၢ တၢ်လီၢ်စီဆှံလီၤ.* ဘၣ်ဆၣ်​ လၢခံတယံာ်တမီၢ်န့ၣ်​ ပှၤသးပ့ၤနီၣ်ကွံာ် အဝဲသ့ၣ်​ ဖဲဝ့ၢ်လၢ အဝဲသ့ၣ်မၤပာ်စၢၤ တၢ်အၢတၢ်သီ လၢအပူၤလီၤ.+ အဝဲန့ၣ်​ မ့ၢ်စ့ၢ်ကီး တၢ်ကလီကလီလီၤ.

၁၁ ပှၤမ့ၢ်မၤတၢ်အၢတမံၤ ဒီးပှၤမ့ၢ်တသိၣ်ဃီၣ်​ အဝဲသ့ၣ်လၢ အဆိအချ့ဘၣ်န့ၣ်+ အဝဲသ့ၣ်​ ကပာ်ဒူထီၣ်အသးလၢ ကမၤတၢ်အၢတၢ်သီ အဂီၢ်လီၤ.+ ၁၂ ပှၤတၢ်ဒဲးဘးဖိတဂၤ မ့ၢ်မၤတၢ်အၢတၢ်သီ အဘျီတကယၤ ဒီးမ့ၢ်အိၣ်မူဘၣ်ဝဲဖးယံာ် ဘၣ်ဆၣ်​ ယသ့ၣ်ညါဘၣ်လၢ ပှၤလၢအပျံၤ ယွၤလၢအမ့ၢ်အတီတဂၤန့ၣ်​ တၢ်ကလဲၤအသးဒီးအီၤ ဂ့ၤဂ့ၤဘၣ်ဘၣ်​ ခီဖျိလၢ အပျံၤကစၢ်ယွၤအဃိလီၤ.+ ၁၃ မ့မ့ၢ် ပှၤအၢပှၤသီတဂၤန့ၣ်​ အတပျံၤ ကစၢ်ယွၤဘၣ်အဃိ တၢ်တလဲၤအသးဒီးအီၤ ဂ့ၤဂ့ၤဘၣ်ဘၣ်ဘၣ်.+ ဒီးအတၢ်အိၣ်မူလၢ အလီၤဂာ်ဒ်သိးဒီး တၢ်ကဒုန့ၣ်​ အထုးထီထီၣ်ဝဲ တန့ၢ်ဘၣ်.+

၁၄ လၢဟီၣ်ခိၣ်ချၢအံၤ တၢ်လၢအဘျုးတအိၣ်ဘၣ်* ကဲထီၣ်သးတမံၤလီၤ. ပှၤတီပှၤလိၤတဖၣ်န့ၣ်​ ပှၤရ့အီၤဒ် အဝဲသ့ၣ်​ မၤတၢ်အၢတၢ်သီ အသိးလီၤ.+ မ့မ့ၢ် ပှၤအၢပှၤသီတဖၣ်န့ၣ်​ ပှၤရ့အီၤဒ် အဝဲသ့ၣ်​ မၤတၢ်တီတၢ်လိၤ အသိးလီၤ.+ ဒီးယတဲလၢ အဝဲန့ၣ်​ မ့ၢ်စ့ၢ်ကီး တၢ်ကလီကလီလီၤ.

၁၅ အဃိ ယဟ့ၣ်ကူၣ်ပှၤဂၤလၢ အဝဲသ့ၣ်​ ကသူၣ်ဖှံသးညီလီၤ.+ ပှၤလၢအိၣ်လၢ ဟီၣ်ခိၣ်ချၢအံၤ မ့ၢ်အီၣ်တၢ်အီတၢ် ဒီးသူၣ်ဖှံသးညီန့ၣ်​ အမ့ၢ်တၢ်လၢ အဂ့ၤကတၢၢ်လီၤ. ဖဲအဝဲသ့ၣ်​ မၤတၢ်ဆူၣ်ဆူၣ်​ ဒီးအိၣ်မူဘၣ်လၢ ဟီၣ်ခိၣ်ချၢအံၤ ဒ်ယွၤလၢအမ့ၢ်အတီတဂၤ ဟ့ၣ်ဒုးအိၣ်မူအီၤအသိးအခါ+ အဝဲသ့ၣ်​ ကြၢးအီၣ်တၢ်အီတၢ် ဒီးသူၣ်ဖှံသးညီလီၤ.

၁၆ ယပာ်လီၤယသးလၢ ယကဒိးန့ၢ်ဘၣ်​ တၢ်ကူၣ်သ့ ဒီးကွၢ်တၢ်ခဲလၢာ်လၢ အမၤအသးလၢ ဟီၣ်ခိၣ်ချၢ+ တုၤဒၣ်လဲာ် လၢမုၢ်နၤမ့ၢ်ဂ့ၤ လၢမုၢ်ဆါမ့ၢ်ဂ့ၤ ယတမံဘၣ်. ၁၇ ဝံၤဒီးယဆိကမိၣ်ထံ တၢ်လၢ ယွၤလၢအမ့ၢ်အတီတဂၤ မၤဝဲခဲလၢာ် ဒီးယနၢ်ပၢၢ်ထီၣ်လၢ တၢ်လၢအမၤသးလၢ ဟီၣ်ခိၣ်ချၢန့ၣ်​ ပှၤဟီၣ်ခိၣ်ဖိတဖၣ်​ နၢ်ပၢၢ်ဝဲ တသ့ဘၣ်.+ ပှၤမ့ၢ်ကျဲးစၢး ထဲလဲၣ်သနာ်က့ အဝဲသ့ၣ်​ နၢ်ပၢၢ်ဝဲ တသ့ဘၣ်. ဒီးအဝဲသ့ၣ်​ မ့ၢ်တဲလၢ အကူၣ်တၢ်သ့ဒိၣ်မးအဃိ အနၢ်ပၢၢ်လံ သနာ်က့ နီၢ်ကီၢ်န့ၣ်​ အဝဲသ့ၣ်​ နၢ်ပၢၢ်ဝဲ တသ့ဘၣ်.+

၉ တၢ်သ့ၣ်တဖၣ်အံၤ ယဆိကမိၣ်ထံအီၤ လီၤတံၢ်လီၤဆဲး ဒီးယသ့ၣ်ညါဘၣ်လၢ ပှၤတီပှၤလိၤ ဒီးပှၤကူၣ်တၢ်သ့ ဃုာ်ဒီးအဝဲသ့ၣ်​ အတၢ်မၤတဖၣ်န့ၣ်​ အိၣ်လၢ ယွၤလၢအမ့ၢ်အတီတဂၤ အစုပူၤလီၤ.+ ပှၤလၢအအိၣ်မူပာ်စၢၤ လၢညါတဖၣ်​ ပာ်ဖျါထီၣ်​ တၢ်အဲၣ်တၢ်ကွံ ဒီးတၢ်သးဟ့လၢ တဂၤဒီးတဂၤ အဖီခိၣ်ထဲလဲၣ်န့ၣ်​ ပှၤဟီၣ်ခိၣ်ဖိတဖၣ်​ တသ့ၣ်ညါဝဲဘၣ်. ၂ ပှၤတီပှၤလိၤမ့ၢ်ဂ့ၤ, ပှၤအၢပှၤသီမ့ၢ်ဂ့ၤ,+ ပှၤဂ့ၤမ့ၢ်ဂ့ၤ, ပှၤလၢအစီဆှံမ့ၢ်ဂ့ၤ, ပှၤလၢအတစီဆှံဘၣ်မ့ၢ်ဂ့ၤ, ပှၤလၢအလုၢ်ထီၣ်တၢ်မ့ၢ်ဂ့ၤ ဒီးပှၤလၢ အတလုၢ်ထီၣ်တၢ်ဘၣ်မ့ၢ်ဂ့ၤန့ၣ်​ လၢခံကတၢၢ် တၢ်မၤအသးဒီးအဝဲသ့ၣ်​ ဒ်သိးသိးလီၤ. တၢ်လၢအအိၣ်ခိး ပှၤအဂ့ၤတဂၤ ဒီးပှၤတၢ်ဒဲးဘးဖိတဂၤန့ၣ်​ မ့ၢ်တၢ်တမံၤဃီလီၤ. ဒီးတၢ်လၢ အအိၣ်ခိး ပှၤလၢအအၢၣ်လီၤတၢ်တဂၤ ဒီးပှၤလၢအအၢၣ်လီၤကြီတၢ် တဘူၣ်ဘၣ်တဂၤန့ၣ်​ မ့ၢ်တၢ်တမံၤဃီလီၤ.+ ၃ အဝဲအံၤမ့ၢ်ဝဲတၢ်လၢ အလီၤသးဘၣ်တံာ်တာ်လၢ အကဲထီၣ်အသးလၢ ဟီၣ်ခိၣ်ချၢအံၤလီၤ. လၢခံကတၢၢ်န့ၣ်​ တၢ်ကမၤအသးဒီး ပှၤခဲလၢာ် တမံၤဃီအဃိ+ လၢပှၤဟီၣ်ခိၣ်ဖိတဖၣ်​ အသးပူၤန့ၣ်​ ပှဲၤဒီးတၢ်အၢလီၤ. ဒီးလၢအဝဲသ့ၣ်​ အတၢ်အိၣ်မူပူၤန့ၣ်​ အဝဲသ့ၣ်​ ဆိကမိၣ်ထဲ တၢ်လၢအခီပညီတအိၣ်ဘၣ်* ဒီးလၢခံ အဝဲသ့ၣ်​ သံဝဲလီၤ.

၄ ပှၤလၢအမူဒံးတဖၣ်န့ၣ်​ အတၢ်မုၢ်လၢ်အိၣ်ဒံး, မ့ၢ်လၢ ထွံၣ်လၢအမူတဒုန့ၣ်​ ဂ့ၤဒိၣ်န့ၢ်ဒံး ခ့ယုၢ်လၢ အသံတဒုလီၤ.+ ၅ ပှၤလၢအမူန့ၣ်​ သ့ၣ်ညါဝဲလၢ အကသံလီၤ.+ မ့မ့ၢ် ပှၤသံန့ၣ်​ တသ့ၣ်ညါ တၢ်နီတမံၤဘၣ်.+ ဒီးအဝဲသ့ၣ်တန့ၢ်ဘၣ်​ ခိၣ်ဖး* နီတမံၤလၢၤဘၣ်, မ့ၢ်လၢ ပှၤကိးဂၤဒဲး ကသးပ့ၤနီၣ်ကွံာ် အဝဲသ့ၣ်​ အဃိလီၤ.+ ၆ တကးဒံးဘၣ်​ အဝဲသ့ၣ်​ အတၢ်အဲၣ်တၢ်ကွံ, တၢ်သးဟ့ ဒီးတၢ်သူၣ်က့ၣ်သးကါန့ၣ်​ လီၤမၢ်ကွံာ်ဝဲလံ. ဒီးအဝဲသ့ၣ်​ ပၣ်ဃုာ်လၢ တၢ်မၤလၢ ဟီၣ်ခိၣ်ချၢအံၤ တသ့နီတမံၤလၢၤဘၣ်.+

၇ ယွၤလၢအမ့ၢ်အတီတဂၤ ဘၣ်သူၣ်ဘၣ်သး နတၢ်မၤတဖၣ်လံအဃိ+ အီၣ်တၢ်လၢ တၢ်သးခုအပူၤ ဒီးအီစပံးထံလၢ တၢ်သူၣ်ဖှံသးညီ အပူၤတက့ၢ်.+ ၈ မ်နတၢ်ကူတၢ်ကၤဝါဝဲ* ထီဘိ ဒီးဖှူနခိၣ်​ လၢသိ ထီဘိတက့ၢ်.+ ၉ ဖဲနအိၣ်မူဖုၣ်ဖုၣ်ဖိ* လၢနတၢ်အိၣ်မူ လၢအခီပညီတအိၣ်ဘၣ်​ ဒ်ကစၢ်ယွၤ ဒုးအိၣ်မူနၤလၢ ဟီၣ်ခိၣ်ချၢအသိးအခါ အိၣ်မူပှဲၤဒီး တၢ်သူၣ်ဖှံသးညီ ဃုာ်ဒီးနမါသးဘိ+ တစိၤသးတက့ၢ်. အဝဲန့ၣ်​ မ့ၢ်နခိၣ်ဖးလၢ နတၢ်အိၣ်မူပူၤလၢ နန့ၢ်ဘၣ်​ ခီဖျိလၢ နမၤတၢ်ဆူၣ်ဆူၣ်လၢ ဟီၣ်ခိၣ်ချၢ အဃိလီၤ.+ ၁၀ တၢ်သွၣ်ခိၣ်* လၢနကလဲၤလီၤ လၢအပူၤန့ၣ်​ တၢ်မၤမ့ၢ်ဂ့ၤ, တၢ်ကူၣ်မ့ၢ်ဂ့ၤ, တၢ်သ့ၣ်ညါမ့ၢ်ဂ့ၤ, တၢ်ကူၣ်သ့မ့ၢ်ဂ့ၤ တအိၣ်ဘၣ်.+ အဃိ ဖဲနအိၣ်မူအခါ တၢ်တမံၤဂ့ၤ တမံၤဂ့ၤလၢ နမၤအီၤသ့န့ၣ်​ မၤအီၤလၢ နဂံၢ်နဘါခဲလၢာ်တက့ၢ်.

၁၁ လၢဟီၣ်ခိၣ်ချၢအံၤ ယထံၣ်ဘၣ်ကဒီး တၢ်အဂၤတမံၤလီၤ. ပှၤလၢအဃ့ၢ်ချ့န့ၣ်​ ဃ့ၢ်ပြၢတၢ် တနၢၤထီဘိဘၣ်. ပှၤလၢအဂံၢ်ဆူၣ်န့ၣ်​ ဒုးတၢ်တနၢၤ ထီဘိဘၣ်.+ ပှၤလၢ အကူၣ်တၢ်သ့န့ၣ်​ အတၢ်အီၣ်​ တအိၣ်ထီဘိဘၣ်. ပှၤလၢအဖၠဲးန့ၣ်​ အတထူးတီၤ ထီဘိဘၣ်+ ဒီးပှၤလၢ အအိၣ်ဒီး တၢ်သ့ၣ်ညါန့ၣ်​ မၤတၢ်တကဲထီၣ်လိၣ်ထီၣ်​ ထီဘိဘၣ်,+ မ့ၢ်လၢ တၢ်ဆၢကတီၢ် ဒီးတၢ်ဘၣ်န့ၢ်အတီၤ* လီၤဘၣ်အဝဲသ့ၣ်​ ခဲလၢာ်အဃိလီၤ. ၁၂ ပှၤဟီၣ်ခိၣ်ဖိတဖၣ်​ ကသံဝဲ အဆၢကတီၢ်ဖဲလဲၣ်န့ၣ်​ အဝဲသ့ၣ်​ တသ့ၣ်ညါဝဲဘၣ်.+ ဒ်ညၣ်လၢ အဘၣ်ဒီးစၤ ဒီးဒ်ထိၣ်လၢ အလီၤဘၣ်လၢ ပျံၤသကွီၤပူၤ အသိးန့ၣ်​ ပှၤဟီၣ်ခိၣ်ဖိတဖၣ်စ့ၢ်ကီး လီၤဘၣ်လၢ တၢ်ကီတၢ်ခဲဖးဒိၣ်​ အပျံၤသကွီၤအပူၤ သတူၢ်ကလာ်လီၤ.

၁၃ လၢဟီၣ်ခိၣ်ချၢအံၤ ယနၢ်ပၢၢ်ထီၣ်ဘၣ်​ တၢ်အဂၤတမံၤလၢ အဘၣ်ဃးဒီး တၢ်ကူၣ်သ့ ဒီးယကမၢကမၣ်​ ဒိၣ်မးလီၤ. ၁၄ ဝ့ၢ်ဆံးဆံးဖိ အိၣ်ဝဲတဖျၢၣ်လၢ ပှၤပိာ်ခွါ အိၣ်လၢအပူၤ ထဲစှၤဂၤလီၤ. ဒီးစီၤပၤလၢ အစိကမီၤဒိၣ်တဂၤ ဟဲကဝီၤဃာ် ဝ့ၢ်တဖျၢၣ်အံၤ ဒီးတ့ထီၣ်​ တၢ်ဒူၣ်​ ဝးတရံးဝ့ၢ်လီၤ. ၁၅ လၢဝ့ၢ်ပူၤန့ၣ်​ ပှၤဖှီၣ်ဖိယာ်ဖိလၢ အကူၣ်တၢ်သ့ အိၣ်ဝဲတဂၤ ဒီးအသူအတၢ်ကူၣ်သ့ ဒီးမၤပူၤဖျဲးဝဲ ဝ့ၢ်န့ၣ်လီၤ. ဘၣ်ဆၣ်​ ပှၤဖှီၣ်ဖိယာ်ဖိတဂၤအံၤ ပှၤတသ့ၣ်နီၣ်ထီၣ်က့ၤအီၤ နီတဂၤဘၣ်.+ ၁၆ ဒီးယတဲလီၤယသးလၢ ‘တၢ်လၢ တၢ်ကူၣ်သ့န့ၣ်​ ဂ့ၤဒိၣ်န့ၢ်ဒံး တၢ်ဂံၢ်တၢ်ဘါလီၤ.+ ဘၣ်ဆၣ်​ ပှၤဆိကမိၣ်ဆံး ပှၤဖှီၣ်ဖိယာ်ဖိတဂၤ အတၢ်ကူၣ်သ့ ဒီးတဒိကနၣ်​ တၢ်လၢ အတဲဝဲတဖၣ်ဘၣ်.’+

၁၇ ပှၤမ့ၢ်ဒိကနၣ်​ ပှၤကူၣ်တၢ်သ့ အတၢ်ကတိၤ ကပုာ်လုးဖိတဖၣ်န့ၣ်​ ဂ့ၤဒိၣ်န့ၢ်ဒံး ပှၤဒိကနၣ်​ ပှၤတဂၤလၢ အပၢတၢ်လၢ ပှၤဟးဂီၤဖိတဖၣ်အကျါ အတၢ်ကိးပသူကိးပသီ တဖၣ်လီၤ.

၁၈ တၢ်ကူၣ်သ့န့ၣ်​ ဂ့ၤဒိၣ်န့ၢ်ဒံး တၢ်စုကဝဲၤတဖၣ်လီၤ. ဘၣ်ဆၣ်​ ပှၤတၢ်ဒဲးဘးဖိထဲ တဂၤန့ၣ်​ မၤဟးဂီၤဝဲ တၢ်လၢအဂ့ၤ န့ၢ်ဝဲအါမးလီၤ.+

၁၀ သၣ်ဘုလါ လၢအသံတဖၣ်န့ၣ်​ မ့ၢ်တၢ်လၢ အမၤနၢအုၣ်​ သိနၢမူလီၤ. ဒ်န့ၣ်အသိး တၢ်မၤကြီဘၣ်တၢ် တစဲးန့ၣ်​ မ့ၢ်တၢ်လၢ အမၤဟးဂီၤ ပှၤလၢအကူၣ်တၢ်သ့ ဒီးအလီၤပာ်ကဲတဂၤ အမံၤဂ့ၤသၣ်ဂ့ၤလီၤ.+

၂ ပှၤကူၣ်တၢ်သ့ အသးန့ၣ်​ ဆှၢအီၤလၢ ကျဲလၢအဘၣ်.* မ့မ့ၢ် ပှၤဟးဂီၤဖိ အသးန့ၣ်​ ဆှၢအီၤလၢ ကျဲလၢ အကမၣ်လီၤ.*+ ၃ ဖဲပှၤဟးဂီၤဖိ လဲၤကျဲတဘိဂ့ၤ တဘိဂ့ၤအခါ အဝဲပာ်ဖျါထီၣ်လၢ အသးတဆးဘၣ်+ ဒီးဒုးသ့ၣ်ညါ ပှၤကိးဂၤဒဲးလၢ အမ့ၢ်ပှၤဟးဂီၤဖိတဂၤလီၤ.+

၄ ပှၤပၢတၢ်တဂၤ မ့ၢ်သးထီၣ်နၤန့ၣ်​ တဘၣ်ဟးထီၣ်လၢ နလီၢ်တဂ့ၤ.+ တၢ်ပာ်သးမုာ်မုာ်ခုၣ်ခုၣ်န့ၣ်​ မၤစှၤလီၤ တၢ်ကမၣ်ဖးဒိၣ်သ့လီၤ.+

၅ လၢဟီၣ်ခိၣ်ချၢအံၤ ယထံၣ်ဘၣ်​ တၢ်လၢ အလီၤသးဘၣ်တံာ်တာ်တမံၤ လၢအမ့ၢ်ဝဲ တၢ်ကမၣ်​ တကလုာ်လၢ ပှၤလၢ အအိၣ်ဒီးတၢ်စိတၢ်ကမီၤတဖၣ်​ မၤဝဲန့ၣ်လီၤ.+ ၆ ပှၤဟးဂီၤဖိတဖၣ်​ န့ၢ်ဘၣ်​ အလီၢ်အလၤလၢ အပတီၢ်ထီတဖၣ်​ ဘၣ်ဆၣ်​ ပှၤလၢ အတုၤထီၣ်ထီၣ်ဘးတဖၣ်န့ၣ်* အိၣ်ဒံးလၢ အလီၢ်အလၤလၢ အပတီၢ်ဖုၣ်လီၤ.

၇ ယထံၣ်ဘၣ်လၢ တၢ်အခ့အပှၤတဖၣ်​ ဒိးဝဲကသ့ၣ်လီၤ. မ့မ့ၢ် ပဒိၣ်တဖၣ်န့ၣ်​ ဟးဝဲလၢအခီၣ်​ ဒ်တၢ်အခ့အပှၤတဖၣ်​ အသိးလီၤ.+

၈ ပှၤတဂၤလၢ အခူၣ်လီၤ တၢ်ပူၤန့ၣ်​ ဘၣ်သ့ၣ်သ့ၣ်​ အကလီၤတဲာ်က့ၤလၢ တၢ်ပူၤလီၤ.+ ဒီးပှၤတဂၤလၢ အမၤလီၤပှီၢ်ဝဲ တၢ်ဒူၣ်လၢ အဘၣ်တၢ်တ့အီၤလၢလၢၢ်န့ၣ်​ ဘၣ်သ့ၣ်သ့ၣ်​ ဂုၢ်ကအ့ၣ်အီၤလီၤ.

၉ ပှၤတဂၤလၢ အခူၣ်လၢၢ်တဖၣ်န့ၣ်​ ဘၣ်သ့ၣ်သ့ၣ်​ အကဘၣ်ဒိ လၢလၢၢ်လီၤ. ဒီးပှၤတဂၤလၢ အဖျးသ့ၣ်ဖး သ့ၣ်ဖူန့ၣ်​ ဘၣ်သ့ၣ်သ့ၣ်​ အကဘၣ်ဒိဘၣ်ထံးလၢ သ့ၣ်ဖူလီၤ.*

၁၀ ပှၤတဂၤ အကွါအကနၣ်​ မ့ၢ်တအ့ၣ်ဘၣ်​ ဒီးအမ့ၢ် တကျ့အ့ၣ်ထီၣ်အီၤဘၣ်န့ၣ်​ အကဘၣ်သူ အဂံၢ်အဘါ အါမးလီၤ. ဘၣ်ဆၣ်​ တၢ်ကူၣ်သ့န့ၣ်​ မၤစၢၤအီၤ ဒ်သိး အတၢ်မၤ ကကဲထီၣ်လိၣ်ထီၣ်​ အဂီၢ်လီၤ.

၁၁ ဂုၢ်မ့ၢ်အ့ၣ်​ ပှၤအူတၢ်သမူတၢ်တဂၤ တချုးလၢ အအူဂုၢ်ဒံးဘၣ်န့ၣ်​ ပှၤတဂၤအံၤ အတၢ်သ့တၢ်ဘၣ်လၢ ကအူတၢ်န့ၣ်​ အဘျုးတအိၣ်ဘၣ်.

၁၂ ပှၤကူၣ်တၢ်သ့ အတၢ်ကတိၤန့ၣ်​ ဘၣ်ပှၤသးမုာ်လီၤ.+ မ့မ့ၢ် ပှၤဟးဂီၤဖိ အထးခိၣ်န့ၣ်​ မၤဟးဂီၤက့ၤ အနီၢ်ကစၢ်လီၤ.+ ၁၃ ဖဲပှၤဟးဂီၤဖိ တဲတၢ်အခါ အတၢ်ကတိၤ အဆိကတၢၢ်တဖၣ်လၢ အဟဲထီၣ်လၢ အကိာ်ပူၤန့ၣ်​ မ့ၢ်တၢ်တဲကြီတၢ်+ ဒီးအတၢ်ကတိၤ လၢအလီၢ်ခံကတၢၢ်တဖၣ်န့ၣ်​ မ့ၢ်တၢ်လၢ အခီပညီတအိၣ်ဘၣ်လၢ* အဆှၢပှၤဂၤလၢ တၢ်ကီတၢ်ခဲ ဖးဒိၣ်လီၤ. ၁၄ ဘၣ်ဆၣ်​ ပှၤဟးဂီၤဖိ တဂၤန့ၣ်​ ဆဲးတဲဒံးတၢ်လီၤ.+

တၢ်မနုၤ ကကဲထီၣ်အသးလဲၣ်န့ၣ်​ ပှၤတသ့ၣ်ညါဝဲဘၣ်. အဃိ ဖဲပှၤတဂၤ သံဝံၤအလီၢ်ခံ တၢ်လၢ အကကဲထီၣ်အသးတဖၣ်န့ၣ်​ ပှၤတဲဘၣ်အီၤ တသ့နီတဂၤဘၣ်.+

၁၅ ပှၤဟးဂီၤဖိတဂၤန့ၣ်​ အမၤတၢ်ဆူၣ်ဆူၣ်​ ဘၣ်ဆၣ်​ အမၤလီၤဘှံး အနီၢ်ကစၢ်သး, မ့ၢ်လၢ အကဘၣ်လဲၤလၢ ဝ့ၢ်ပူၤလၢကျဲဖဲလဲၣ်တဘိလဲၣ်မး အတသ့ၣ်ညါဝဲဘၣ်.

၁၆ လၢထံကီၢ်တဘ့ၣ်အပူၤ ပှၤသးစၢ်တဂၤ မ့ၢ်ကဲ စီၤပၤ+ ဒီးပဒိၣ်ဖးဒိၣ်တဖၣ်​ မ့ၢ်မၤဝဲ တၢ်အီၣ်တၢ်အီအမူး လၢဂီၤခီန့ၣ်​ ထံကီၢ် တၢ်အိၣ်သး ကနးထဲလဲၣ်. ၁၇ ဘၣ်ဆၣ်​ စီၤပၤတဂၤ အမ့မ့ၢ် ပှၤဒိၣ်ပှၤပှၢ် အဖိခွါ ဒီးအပဒိၣ်ဖးဒိၣ်တဖၣ်​ မ့ၢ်တအီမူၤအီဘှီးအသးဘၣ်​ ဒီးမ့ၢ်အီၣ်တၢ်လၢ အဆၢကတီၢ်ဘၣ်​ ဒ်သိး အဂံၢ်အဘါ ကအိၣ်အဂီၢ်န့ၣ်​ ထံကီၢ်တၢ်အိၣ်သး ကလီၤသးခု ထဲလဲၣ်.+

၁၈ ခီဖျိလၢ ပှၤတဂၤ ကၢၣ်တလၢအဃိ အဟံၣ်ခိၣ်ဒုး ဒ့ခံ ဒီးခီဖျိလၢ အစုအိၣ်ကလီကလီ အဃိ အဟံၣ်ခိၣ်​ လီၤစီၤလီၤ.+

၁၉ တၢ်အီၣ်န့ၣ်​ မ့ၢ်ဝဲလၢ ကမၤသးခု ပှၤသးအဂီၢ်*+ ဒီးစပံးထံန့ၣ်​ မၤဖှံထီၣ်​ ပှၤသး ဘၣ်ဆၣ်​ ကျိၣ်စ့ မၤလၢပှဲၤ တၢ်လိၣ်ဘၣ်​ ခဲလၢာ်လီၤ.+

၂၀ လၢနသးပူၤဒၣ်လဲာ်* တဘၣ်ဆိၣ်အၢ စီၤပၤတဂ့ၤ.+ လၢနလီၢ်မံခိၣ်န့ၣ်​ တဘၣ်​ ဆိၣ်အၢ ပှၤထူးပှၤတီၤတဂ့ၤ. နမ့ၢ်မၤဒ်န့ၣ်န့ၣ်​ ထိၣ်ကလဲၤစိာ်ဘၣ်ဖုး တၢ်ကစီၣ်​ ဒီးတၢ်လၢအအိၣ်ဒီး အဒံးတဖၣ်​ ကတဲကဒါဘၣ်ဖုး တၢ်လၢနတဲလီၤ.

၁၁ ကွံာ်လီၤနတၢ်အီၣ်လၢ* ထံကျါတက့ၢ်.+ လၢခံတဘျုးသီ ဝံၤအလီၢ်ခံ နကထံၣ်ကဒီးအီၤလီၤ.+ ၂ လၢဟီၣ်ခိၣ်ချၢအံၤ တၢ်နးတၢ်ဖှီၣ်​ မနုၤကမၤအသးလဲၣ်န့ၣ်​ နတသ့ၣ်ညါဘၣ်အဃိ တၢ်လၢအအိၣ်ဒီးနၤန့ၣ်​ ဟ့ၣ်နီၤလီၤအီၤလၢ ပှၤနွံဂၤ မ့တမ့ၢ် ပှၤဃိးဂၤ အအိၣ်တက့ၢ်.+

၃ တၢ်အၢၣ်တဖၣ်​ မ့ၢ်ပှဲၤဝဲဒီးထံန့ၣ်​ အကဒုးစူၤလီၤ မူခိၣ်ထံလၢ ဟီၣ်ခိၣ်ချၢလီၤ. သ့ၣ်တထူၣ်န့ၣ်​ မ့ၢ်လီၤကူၢ်လၢ ကလံၤထံးမ့ၢ်ဂ့ၤ ကလံၤစိးမ့ၢ်ဂ့ၤ အကအိၣ်ဝဲဖဲ အလီၤကူၢ်အလီၢ်န့ၣ်လီၤ.

၄ ပှၤလၢအခိး ကလံၤန့ၣ်​ တဖှံဘၣ်တၢ်ဘၣ်. ဒီးပှၤလၢအကွၢ် တၢ်အၢၣ်န့ၣ်​ တကူးဘၣ်တၢ်ဘၣ်.+

၅ ဖိသၣ်လၢ အအိၣ်လၢ အမိၢ်ဒၢလီၢ်ပူၤတဂၤန့ၣ်+ တၢ်မူအသဟီၣ်* မၤတၢ်လၢ ဖိသၣ်အံၤအဃံပူၤ ဒ်လဲၣ်ဒ်လဲၣ်န့ၣ်​ နတသ့ၣ်ညါဘၣ်. ဒ်န့ၣ်အသိး ယွၤလၢအမ့ၢ်အတီ လၢအမၤတၢ်ခဲလၢာ်+ တဂၤန့ၣ်​ နတသ့ၣ်ညါနၢ်ပၢၢ် အတၢ်မၤဘၣ်.

၆ တၢ်ချံလၢနဖှံလီၤန့ၣ်​ အကမဲထီၣ်​ ဖဲလဲၣ်တခါလဲၣ်, လၢအံၤတခါဧါ လၢန့ၣ်တခါဧါ မ့တမ့ၢ် ခံခါလၢာ်ဧါန့ၣ်​ နတသ့ၣ်ညါဘၣ်. အဃိ ဖှံလီၤတၢ်ချံ စးထီၣ်လၢဂီၤခီ တုၤလၢ ဟါခီ ဒီးတဘၣ်ပာ်အိၣ်ဘှံး နစုတဂ့ၤ.+

၇ တၢ်ကပီၤန့ၣ်​ မုာ်ဝဲ ဒီးပှၤတဂၤ မ့ၢ်ထံၣ်ဘၣ်​ မုၢ်အတၢ်ကပီၤန့ၣ်​ ဂ့ၤဝဲလီၤ. ၈ ပှၤတဂၤ မ့ၢ်အိၣ်မူ အနံၣ်အါမးန့ၣ်​ မ်အအိၣ်ဒီး တၢ်သူၣ်ဖှံသးညီ ကိးနံၤဒဲးတက့ၢ်.+ ဘၣ်ဆၣ်​ အဝဲကဘၣ်​ နီၣ်ဘၣ်က့ၤလၢ တၢ်ကိၢ်တၢ်ဂီၤ အမုၢ်နံၤတဖၣ်​ ကအိၣ်ဒံးဒီဒူၣ်​ ဒီးတၢ်ခဲလၢာ်လၢ အကဟဲ ခါဆူညါန့ၣ်​ မ့ၢ်ဝဲ တၢ်ကလီကလီလီၤ.+

၉ ပှၤသးစၢ်သ့ၣ်ဧၢ, ဖဲနသးစၢ်ဒံး အဆၢကတီၢ် သူၣ်ဖှံသးညီ ဒီးဖဲနသးစၢ်အခါန့ၣ်​ အိၣ်ဒီးတၢ်သးခုတက့ၢ်. မၤဒ် နသးဆှၢနၤအသိး ဒီးလဲၤဖဲ နမဲာ်ချံ ဆှၢနၤန့ၣ်တက့ၢ်. ဘၣ်ဆၣ်​ နကဘၣ်​ သ့ၣ်ညါပာ်စၢၤလၢ ယွၤလၢအမ့ၢ်အတီတဂၤ ကဟံးန့ၢ်နၤအရ့* လၢတၢ်သ့ၣ်တဖၣ်န့ၣ်​ ခဲလၢာ်လီၤ.+ ၁၀ အဃိ တၢ်လၢ အကဒုးအိၣ်ထီၣ်​ တၢ်ကီတၢ်ခဲန့ၣ်​ ထုးထီၣ်ကွံာ်အီၤလၢ နသးပူၤတက့ၢ်. ဒီးတၢ်လၢ အကမၤဘၣ်ဒိ နနီၢ်ခိန့ၣ်​ ဟးဆှဲးအီၤတက့ၢ်. တၢ်သူၣ်ဘီၣ်သးစၢ် ဒီးသးစၢ်ဂံၢ်ဘါန့ၣ်​ မ့ၢ်ဝဲ တၢ်ကလီကလီလီၤ.+

၁၂ ဖဲနသးစၢ်ဒံး အဆၢကတီၢ်န့ၣ်​ သ့ၣ်နီၣ်ထီၣ်က့ၤ နတၢ်ဘၣ်တ့ကစၢ်တက့ၢ်.+ နကဘၣ်မၤဒ်န့ၣ်​ တချုးလၢ တၢ်ကိၢ်တၢ်ဂီၤအမုၢ်နံၤတဖၣ်​ ဟဲဒံးဘၣ်+ ဒီးတချုးလၢ နကတဲလၢ “ယတၢ်အိၣ်မူ တမုာ်ဘၣ်ယၤ နီတစဲးလၢၤဘၣ်” အနံၣ်တဖၣ်​ ဟဲတုၤဒံးဘၣ်န့ၣ်လီၤ. ၂ လၢခံန့ၣ်​ မုၢ်, လါ ဒီးဆၣ်တဖၣ်​ အတၢ်ကပီၤ ကခံးလီၤဝဲ+ ဒီးတၢ်စူၤဖးဒိၣ်​ မ့ၢ်ဝံၤအလီၢ်ခံ တၢ်အၢၣ်တဖၣ်​ ကဟဲက့ၤကဒါက့ၤလီၤ. ၃ ဖဲန့ၣ်အခါ ပှၤခိးဟံၣ်တဖၣ်​ ကကနိးထီၣ်ဝဲ, ပိာ်ခွါလၢအဂံၢ်ဆူၣ်တဖၣ်​ အဂံၢ်ကစၢ်လီၤဝဲ ဒီးပိာ်မုၣ်တဖၣ်​ ကပတုာ်ဂူာ်ဆၢၣ်ဂူာ် မ့ၢ်လၢအဝဲသ့ၣ်အိၣ်တ့ၢ် ထဲစှၤဂၤအဃိ ဒီးပိာ်မုၣ်တဖၣ်​ လၢအကွၢ်စိတၢ်လၢ ပဲတြီဖိန့ၣ်​ ကကွၢ်တၢ်ဖျါကဒုလီၤ.+ ၄ ဒီးပဲတြီလၢ အမဲာ်ဃၣ်အသးလၢကျဲန့ၣ်​ ကပံးအသး, ဆၢၣ်ဂူာ် အကလုၢ် ကသီၣ်ဆံးလီၤ, နကပၢၢ်ထီၣ်​ ခီဖျိလၢ ထိၣ်ဖိလံၣ်ဖိ ကိးအဃိ, ပိာ်မုၣ်ခဲလၢာ်လၢ အသးဝံၣ်တၢ်န့ၣ်​ အကလုၢ်ကလီၤစၢ်,+ ၅ တကးဒံးဘၣ်​ နကပျံၤ တၢ်လီၢ်လၢအထီၣ်ထီ ဒီးတၢ်လီၤပျံၤလီၤဖုး ကအိၣ်လၢ ကျဲပူၤလီၤ. ဒီးၡၤကးအထူၣ်အဖီ ကဖးထီၣ်,+ ဒွဲၣ်တဖၣ်​ ကတွံၢ်တြူာ်အသး, ခ့ဖၢၣ်သၣ်* ကသ့ၣ်ဖး ဒီးနကလဲၤလၢ ဟံၣ်အထူအယိာ်+ ဒီးပှၤလၢအဟီၣ်အယၢၤတဖၣ်​ ကဟးလၢကျဲပူၤလီၤ.+ ၆ ဒီးပျံၤစ့ကတဲာ်, လီခီထူ ကသဘှံး, ထံဒၢလၢ ထံကမျၢ* ကသ့ၣ်ဖး ဒီးထံပၣ်ရံးလၢ ကမါအဂီၢ် ကသဘှံးဝဲလီၤ. ၇ ဖဲန့ၣ်အခါ ပှၤဟီၣ်ခိၣ်ဖိတဂၤလၢ အဟဲလၢ ဟီၣ်ခိၣ်ကမူၣ်န့ၣ်​ ကက့ၤကဒါက့ၤလၢ ဟီၣ်ခိၣ်ကမူၣ်+ ဒီးတၢ်မူအသဟီၣ်န့ၣ်* ကက့ၤကဒါက့ၤလၢ ကစၢ်ယွၤလၢ အဟ့ၣ်လီၤအီၤတဂၤန့ၣ်​ အအိၣ်လီၤ.+

၈ ယၤ, ပှၤစံၣ်တဲၤတဲလီၤတၢ်တဂၤ* တဲလၢ+ “တၢ်ကလီကလီလီၤ. တၢ်ခဲလၢာ်န့ၣ်​ မ့ၢ်ဝဲ တၢ်ကလီကလီလီၤ.”+

၉ ယၤ, ပှၤစံၣ်တဲၤတဲလီၤတၢ်တဂၤ ကဲထီၣ်​ ပှၤကူၣ်တၢ်သ့ တကးဒံးဘၣ်​ ထီဘိန့ၣ်​ ယသိၣ်လိ ပှၤဂီၢ်မုၢ်လၢ တၢ်လၢယသ့ၣ်ညါတဖၣ်+ ဒီးယဆိကမိၣ်ထံဒီး ယဃုသ့ၣ်ညါတၢ် လီၤတံၢ်လီၤဆဲး ဒ်သိး ယကပာ်ဖှိၣ်* တၢ်ကတိၤဒိ အါခါအဂီၢ်လီၤ.+ ၁၀ ယၤ, ပှၤစံၣ်တဲၤတဲလီၤတၢ်တဂၤ ဃုတၢ်ဒ်သိး ကထံၣ်န့ၢ် တၢ်ကတိၤလၢအမုာ်+ ဒီးဒ်သိး ကကွဲးနီၣ်ဃာ် တၢ်ကတိၤ အမ့ၢ်အတီ လၢအဘၣ်လီၤတံၢ်လီၤဆဲး အဂီၢ်လီၤ.

၁၁ ပှၤကူၣ်တၢ်သ့တဖၣ်​ အတၢ်ကတိၤန့ၣ်​ လီၤဂာ်ဒီး နီၣ်ခိၣ်စူတဖၣ်+ ဒီးအဝဲသ့ၣ်​ အတၢ်ကတိၤဒိ လၢအဘၣ်​ တၢ်ပာ်ဖှိၣ်အီၤတဖၣ်န့ၣ်​ လီၤဂာ်ဒီး ထးပနဲာ်တဖၣ်လၢ အဘၣ်တၢ်ဒိတံၢ်အီၤ ဃံးဃံးလီၤ. ပှၤကွၢ်သိတဂၤ ဟ့ၣ်လီၤဝဲ တၢ်သ့ၣ်တဖၣ်န့ၣ်လီၤ. ၁၂ ဖိခွါဧၢ, မ့မ့ၢ် တၢ်လၢအဂုၤအဂၤ လၢအတမ့ၢ် တၢ်သ့ၣ်တဖၣ်အံၤဘၣ်န့ၣ်​ ပလီၢ်နသးတက့ၢ်. ပှၤကွဲးထုးထီၣ်​ လံာ်လဲၢ်အိၣ်ဝဲဒီဒူၣ်​ ဒီးအကတၢၢ် တအိၣ်နီတဘျီဘၣ်. ဒီးပှၤမ့ၢ်မၤလိ လံာ်တဖၣ်န့ၣ်​ အါတလၢန့ၣ်​ မၤလီၤဘှံးပှၤသးလီၤ.+

၁၃ တၢ်ခဲလၢာ်န့ၣ်​ ဘၣ်တၢ်တဲဖျါထီၣ်အီၤ ဝံၤလံ. အဃိ တၢ်ကတိၤလၢ အလီၢ်ခံကတၢၢ်န့ၣ်​ မ့ၢ်ဝဲ ပျံၤယွၤလၢအမ့ၢ်အတီတဂၤ+ ဒီးအိၣ်မူမၤထွဲ အတၢ်မၤလိာ်တဖၣ်+ တက့ၢ်. အဝဲန့ၣ်မ့ၢ်ဝဲ ပှၤဟီၣ်ခိၣ်ဖိ အမူဒါလီၤ.+ ၁၄ တၢ်ကိးမံၤဒဲး လၢပှၤဟီၣ်ခိၣ်ဖိမၤဝဲ ဃုာ်ဒီး တၢ်လၢပှၤမၤခူသူၣ်ဝဲ ကိးမံၤဒဲးန့ၣ်​ မ့ၢ်အဂ့ၤဧါ အအၢဧါန့ၣ်+ ယွၤလၢအမ့ၢ်အတီတဂၤ ကစံၣ်ညီၣ်ဆၢတဲာ်ဝဲလီၤ.