ဒၤနံးယ့လး

၁ ဖဲယူဒၤအစီၤပၤ ယဟိၤယါကံၣ်+ ပၢတၢ် သၢနံၣ်တနံၣ်န့ၣ်​ ဘၤဘူၤလိၣ်​ အစီၤပၤ နဘူၤကးန့စၢ် ဟဲကဝီၤဃာ် ဝ့ၢ်ယရူၤၡလ့ၣ်လီၤ.+ ၂ ဒီးယဟိဝၤယွၤ ဟ့ၣ်လီၤဝဲ ယူဒၤအစီၤပၤ ယဟိၤယါကံၣ်​ လၢစီၤနဘူၤကးန့စၢ် အစုပူၤ+ ဃုာ်ဒီး တၢ်ပီးတၢ်လီတနီၤလၢ အအိၣ်လၢ ယွၤလၢအမ့ၢ်အတီတဂၤ အဟံၣ်ပူၤလီၤ. ဒီးစီၤနဘူၤကးန့စၢ် က့ၤစိာ်ဝဲ တၢ်ပီးတၢ်လီတဖၣ်န့ၣ်ဆူ အယွၤ အဟံၣ်လၢ ပှၤဘၤဘူၤလိၣ်ဖိအကီၢ်* ပူၤလီၤ.+ ဒီးအဝဲပာ်လီၤဝဲ တၢ်ပီးတၢ်လီတဖၣ်န့ၣ်လၢ တၢ်လုၢ်ဒိၣ်ပှ့ၤဒိၣ်အလီၢ် လၢအယွၤ အဟံၣ်ပူၤလီၤ.+

၃ ဝံၤဒီးစီၤပၤ မၤလိာ် အပဒိၣ်ဖးဒိၣ်အခိၣ်​ စီၤအၤၡပနး ဒ်သိး အကဟဲကိး ပှၤအံၣ်စရ့လးဖိတနီၤ ဃုာ်ဒီး စီၤပၤအဖိအလံၤ ဒီးပဒိၣ်အဖိအလံၤတဖၣ်လီၤ.+ ၄ အဝဲသ့ၣ်​ ကဘၣ်မ့ၢ် ပှၤသးစၢ်* တဖၣ်လၢ အတၢ်လီၤတူာ်လီၤကာ် တအိၣ်နီတမံၤဘၣ်, အဒိၣ်တၢ်ဂ့ၤ, အိၣ်ဒီးတၢ်ကူၣ်သ့ ဒီးတၢ်သ့ၣ်ညါနၢ်ပၢၢ် ဒီးအဝဲသ့ၣ်​ ကဘၣ်မ့ၢ် ပှၤလၢအပဲာ်ထံနီၤဖးတၢ် သ့ဂ့ၤဂ့ၤ+ ဒီးမၤတၢ်လၢ စီၤပၤအနီပူၤ* ကဘၣ်သ့လီၤ. ဒီးစီၤအၤၡပနး ကဘၣ်သိၣ်လိ အဝဲသ့ၣ်လၢ ပှၤက့ၤစ့းဖိအကျိာ် ဒီးပှၤက့ၤစ့းဖိ အတၢ်ကွဲးလံာ်ကွဲးလဲၢ် အဂ့ၢ်လီၤ. ၅ ဒီးစီၤပၤ ဟ့ၣ်လီၤတၢ်ကလုၢ်လၢ ပှၤကဘၣ်ဟ့ၣ်လီၤ အဝဲသ့ၣ်လၢ စီၤပၤ အတၢ်အီၣ်လၢ အဝံၣ်အဘဲ ဒီးစီၤပၤ အစပံးထံ ကိးနံၤဒဲးလီၤ. ပှၤကဘၣ်သိၣ်လိမၤယုၤ အဝဲသ့ၣ်သၢနံၣ်​ ဒီးဖဲသၢနံၣ်​ ပှဲၤထီၣ်အခါ အဝဲသ့ၣ် ကဘၣ်မၤ စီၤပၤအတၢ်မၤလီၤ.

၆ လၢအဝဲသ့ၣ်​ အကျါန့ၣ်​ ပၣ်ဃုာ်ဒီး စီၤဒၤနံးယ့လး,*+ စီၤဃနၤနယၤ,* စီၤမံၡအ့လး* ဒီးစီၤဧစၤရယၤ*+ လၢအဟဲလီၤစၢၤလၢ ယူဒၤအဒူၣ်ကျါလီၤ. ၇ ပဒိၣ်ဖးဒိၣ်အခိၣ်​ ကိးန့ၢ်က့ၤ စီၤဒၤနံးယ့လး အမံၤလၢ စီၤဘ့ၤလးတၡါစၢ်,+ စီၤဃနၤနယၤ လၢစီၤၡၤဒရး, စီၤမံၡအ့လး လၢစီၤမ့ၤၡး ဒီးစီၤဧစၤရယၤ လၢစီၤဧဘ့ၤဒနကိၤလီၤ.+

၈ ဘၣ်ဆၣ်​ စီၤဒၤနံးယ့လး ဆၢတဲာ်လီၤအသး ဂၢၢ်ဂၢၢ်ကျၢၤကျၢၤလၢ အတအီၣ်​ စီၤပၤအတၢ်အီၣ်​ လၢအဝံၣ်အဘဲ ဒီးတအီစီၤပၤ အစပံးထံဘၣ်, မ့ၢ်လၢ လၢတၢ်သ့ၣ်တဖၣ်အံၤ အကျါန့ၣ်​ ပၣ်ဃုာ်ဒီး တၢ်လၢကစၢ်ယွၤ အတၢ်သိၣ်တၢ်သီ ပာ်ပနီၣ်ဝဲလၢ အတကဆှီဘၣ်​ အဃိလီၤ. အဃိ စီၤဒၤနံးယ့လး ဃ့အခွဲးလၢ ပဒိၣ်ဖးဒိၣ်အခိၣ်အအိၣ်​ ဒ်သိးအသု တဘၣ်အီၣ်ဝဲအီဝဲ တၢ်သ့ၣ်တဖၣ်အံၤ ဒီးကဲထီၣ်​ ပှၤလၢအတကဆှီဘၣ်​ တဂ့ၤအဂီၢ်လီၤ. ၉ ဒီးယွၤလၢအမ့ၢ်အတီတဂၤ မၤဝဲဒ်သိး ပဒိၣ်ဖးဒိၣ်အခိၣ်​ ကဘၣ်သူၣ်ဘၣ်သး ဒီးကသးကညီၤ စီၤဒၤနံးယ့လး အဂီၢ်လီၤ.+ ၁၀ ဘၣ်ဆၣ်​ ပဒိၣ်ဖးဒိၣ်အခိၣ်​ တဲစီၤဒၤနံးယ့လးလၢ “ယပျံၤ ယကစၢ်စီၤပၤ လၢအဟ့ၣ်လီၤသု တၢ်အီၣ်တၢ်အီ တဂၤန့ၣ်လီၤ. အဝဲ မ့ၢ်ထံၣ်ဘၣ်လၢ သုဖျါဃဲၤန့ၢ်ဒံး ပှၤသးစၢ်လၢ အတရွဲၢ်ဃီဒီးသုန့ၣ်​ စီၤပၤကမၤတဲာ် ယခိၣ်သၣ်ဃံ လၢသုဃိလီၤ.” ၁၁ ဒီးပှၤကွၢ်ထွဲတၢ်တဂၤလၢ ပဒိၣ်ဖးဒိၣ်အခိၣ်​ ပာ်ထီၣ်ဝဲလၢ ကကွၢ်ထွဲ စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤန့ၣ်​ စီၤဒၤနံးယ့လး တဲဘၣ်အီၤလၢ ၁၂ “ဝံသးစူၤ မၤကွၢ် ပဝဲနခ့နပှၤတဖၣ်မီၤ. ဟ့ၣ်ဒုးအီၣ်ဒုးအီပှၤ တၢ်ဒိးတၢ်လၣ်​ ဒီးထံ အသီတဆံ တက့ၢ်. ၁၃ ဝံၤဒီး ထိၣ်သတြီၤကွၢ်ပှၤဒီး ပှၤသးစၢ်လၢ အအီၣ်​ စီၤပၤအတၢ်အီၣ်လၢ အဝံၣ်အဘဲတဖၣ်တက့ၢ်. ဒီးတၢ်လၢနထံၣ်​ မ့ၢ်တဘၣ်နသးဘၣ်န့ၣ်​ နကမၤပှၤဒ်လဲၣ်ဒ်လဲၣ်န့ၣ်​ ကွၢ်လၢနၤလီၤ.”

၁၄ ဒီးပှၤကွၢ်ထွဲတၢ်တဂၤန့ၣ်​ တူၢ်လိာ် တၢ်လၢအဝဲသ့ၣ်​ တဲဝဲ ဒီးမၤကွၢ်အဝဲသ့ၣ်​ အသီတဆံလီၤ. ၁၅ အသီတဆံ ဝံၤအလီၢ်ခံ အဝဲသ့ၣ်​ ဖျါဂ့ၤဒိၣ်န့ၢ်ဒံး ဒီးအိၣ်ဆူၣ်အိၣ်ချ့ ဒိၣ်န့ၢ်ဒံး ပှၤသးစၢ်လၢ အအီၣ်ဝဲ စီၤပၤအတၢ်အီၣ်လၢ အဝံၣ်အဘဲ ကိးဂၤဒဲးလီၤ. ၁၆ အဃိ ပှၤကွၢ်ထွဲတၢ်တဂၤန့ၣ်​ က့ၤစိာ်ကွံာ်ဝဲ တၢ်အီၣ်လၢအဝံၣ်အဘဲ ဒီးစပံးထံ ဒီးဆဲးဟ့ၣ်ဒုးအီၣ်​ အဝဲသ့ၣ်လၢ တၢ်ဒိးတၢ်လၣ်တဖၣ်လီၤ. ၁၇ ဒီးယွၤလၢအမ့ၢ်အတီတဂၤ ဟ့ၣ်လီၤဝဲ ပှၤသးစၢ် လွံၢ်ဂၤအံၤ တၢ်ကူၣ်သ့, တၢ်သ့ၣ်ညါ ဒီးတၢ်နၢ်ပၢၢ် ဘၣ်ဃးဒီး တၢ်ကွဲးလံာ်ကွဲးလဲၢ် ကိးကလုာ်ဒဲးလီၤ. ဒီးတၢ်ဟ့ၣ်လီၤ စီၤဒၤနံးယ့လးလၢ တၢ်သ့တၢ်ဘၣ်​ လၢကနၢ်ပၢၢ်ဝဲ တၢ်ထံၣ်လၢညါခီ ဒီးတၢ်မံမီၢ် ကိးကလုာ်ဒဲး အခီပညီလီၤ.+

၁၈ ဖဲတၢ်ဆၢကတီၢ်လၢ စီၤပၤပာ်ပနီၣ်ဝဲလၢ ပှၤကဘၣ်ဟဲကိး ပှၤသးစၢ်ခဲလၢာ် ဘၣ်ဝဲအခါ+ ပဒိၣ်ဖးဒိၣ်အခိၣ်​ ဟဲကိး အဝဲသ့ၣ်လၢ စီၤနဘူၤကးန့စၢ် အအိၣ်လီၤ. ၁၉ ဖဲစီၤပၤ တဲတၢ်ဒီး ပှၤသးစၢ်ခဲလၢာ်အခါ အဝဲထံၣ်ဘၣ်ဝဲလၢ ပှၤလၢအလီၤဂာ်ဒ် စီၤဒၤနံးယ့လး, စီၤဃနၤနယၤ, စီၤမံၡအ့လး ဒီးစီၤဧစၤရယၤန့ၣ်+ တအိၣ်နီတဂၤဘၣ်. ဒီးအဝဲသ့ၣ်​ အိၣ်တ့ၢ်ဘၣ်ဖဲန့ၣ်​ လၢကမၤ စီၤပၤအတၢ်မၤ အဂီၢ်လီၤ. ၂၀ ဒီးတၢ်ဂ့ၢ်ကိးမံၤဒဲးလၢ အဘၣ်ထွဲလိာ်သးဒီး တၢ်ကူၣ်သ့ဒီး တၢ်သ့ၣ်ညါနၢ်ပၢၢ်လၢ စီၤပၤသံကွၢ် အဝဲသ့ၣ်န့ၣ်​ စီၤပၤထံၣ်ဘၣ်ဝဲလၢ အဝဲသ့ၣ်​ နၢ်ပၢၢ်ဝဲ ဂ့ၤဒိၣ်န့ၢ်ဒံး ကယဲၢ်ပှၤအူတၢ်သမူတၢ်* ဒီးပှၤလၢအဆဲးကျိးဒီးပှၤသံလၢ+ အဘီအမုၢ် ဒီဘ့ၣ်ညါအပူၤ အစးတဆံညါလီၤ. ၂၁ စီၤဒၤနံးယ့လး ဆဲးအိၣ်ဝဲဖဲန့ၣ်​ တုၤလၢ စီၤပၤကိရ့ၣ်+ ပၢတၢ် အဆိကတၢၢ် တနံၣ်လီၤ.

၂ ဖဲစီၤနဘူၤကးန့စၢ် ပၢတၢ် ခံနံၣ်တနံၣ်န့ၣ်​ အဝဲမံမီၢ် တၢ်မံမီၢ်တဖၣ်အဃိ အသးဘၣ်တံာ်တာ်ဒိၣ်မး+ ဒီးမံဝဲ တန့ၢ်လၢၤဘၣ်. ၂ အဃိ စီၤပၤ မၢပှၤကိးန့ၢ် ပှၤအူတၢ်သမူတၢ်တဖၣ်,* ပှၤလၢအဆဲးကျိးဒီးပှၤသံတဖၣ်, ပှၤအူတၢ်လိၢ်တၢ်တဖၣ်​ ဒီးပှၤက့ၤစ့းဖိတဒူၣ်* ဒ်သိး အကဟဲတဲဘၣ်အီၤ အတၢ်မံမီၢ်တဖၣ်လီၤ. ဒီးပှၤသ့ၣ်တဖၣ်န့ၣ်​ ဟဲဆၢထၢၣ်လၢ စီၤပၤအမဲာ်ညါလီၤ.+ ၃ စီၤပၤ တဲအဝဲသ့ၣ်လၢ “ယမံမီၢ်တၢ်တခါ ဒီးယမံမီၢ် တၢ်မနုၤလဲၣ်န့ၣ်​ ယအဲၣ်ဒိးသ့ၣ်ညါအဃိ ယသးဘၣ်တံာ်တာ်လီၤ.” ၄ ပှၤက့ၤစ့းဖိတဒူၣ်န့ၣ်​ တဲဆၢစီၤပၤလၢ အရၣ်မ့းအကျိာ်+ ဒီးတဲဝဲလၢ* “အိ စီၤပၤဧၢ, မ်နအိၣ်မူ လီၤထူလီၤယိာ်တက့ၢ်. တဲဘၣ်ပှၤလၢ နတၢ်မံမီၢ် ဒီးပကတဲဘၣ်နၤ အခီပညီလီၤ.”

၅ စီၤပၤတဲဆၢ ပှၤက့ၤစ့းဖိတဒူၣ်န့ၣ်လၢ “ယကတဲသု တၢ်ကတိၤ အလီၢ်ခံကတၢၢ်တထံၣ်လီၤ. သုမ့ၢ်တတဲဘၣ်ယၤ ယတၢ်မံမီၢ် ဒီးအခီပညီဘၣ်န့ၣ်​ ပှၤကဒီၣ်တဲာ်ကွံာ်သု တကူာ်တကူာ် ဒီးသုဟံၣ်တဖၣ်​ ကကဲထီၣ်​ တၢ်ဟးလီၢ်လၢ ကမျၢၢ်အဂီၢ်လီၤ. ၆ သုမ့ၢ်တဲဘၣ်ယၤ ယတၢ်မံမီၢ် ဒီးအခီပညီန့ၣ်​ ယကဟ့ၣ်လီၤသု တၢ်ဟ့ၣ်တဖၣ်​ ဒီးခိၣ်ဖးတခါ ဒီးယကဟ့ၣ်သု တၢ်လၤကပီၤဖးဒိၣ်လီၤ.+ အဃိ တဲဘၣ်ယၤ ယတၢ်မံမီၢ် ဒီးအခီပညီသၢၤ.”

၇ အဝဲသ့ၣ်​ တဲဆၢကဒီး စီၤပၤလၢ “စီၤပၤဧၢ, တဲဘၣ်ပှၤလၢ နတၢ်မံမီၢ် ဒီးပကတဲဘၣ်နၤ အခီပညီလီၤ.”

၈ စီၤပၤ တဲဆၢ အဝဲသ့ၣ်လၢ “သုနၢ်ဟူဘၣ်​ ယတၢ်ကတိၤ အလီၢ်ခံကတၢၢ်တထံၣ်အဃိ သုထုးယံာ် တၢ်ဆၢကတီၢ် ဒ်သိးသုကဆိကမိၣ်တၢ် အဂီၢ်န့ၣ်​ ယသ့ၣ်ညါ ဂ့ၤဂ့ၤလီၤ. ၉ သုမုၢ်လၢ်လၢ ယကဆီတလဲ ယတၢ်ပာ်သူၣ်ပာ်သးအဃိ သုသးလီၤပလိာ်လိာ်သုသးလၢ သုကဟးတဲကြီတၢ် ဒီးတဲလံၣ်တဲလီတၢ်လံ. သုမ့ၢ်တတဲဘၣ်ယၤ ယတၢ်မံမီၢ်ဘၣ်န့ၣ်​ တၢ်လၢအအိၣ်ခိးလီၤ သုဝဲခဲလၢာ်အခိၣ်န့ၣ်​ မ့ၢ်ဝဲ သုကဘၣ်​ တၢ်စံၣ်ညီၣ်တမံၤဃီလီၤ. အဃိ တဲဘၣ်ယၤ ယတၢ်မံမီၢ် ဒီးသုမ့ၢ်မၤဒ်န့ၣ်န့ၣ်​ ယကသ့ၣ်ညါလၢ သုတဲဘၣ်ယၤ အခီပညီသ့လီၤ.”

၁၀ ပှၤက့ၤစ့းဖိတဒူၣ်န့ၣ်​ တဲဆၢ စီၤပၤလၢ “လၢဟီၣ်ခိၣ်ချၢန့ၣ်​ ပှၤလၢအမၤဝဲဒ် စီၤပၤမၢပမၤအသိး သ့န့ၣ်​ တအိၣ်နီတဂၤဘၣ်. စီၤပၤဖးဒိၣ်မ့ၢ်ဂ့ၤ ပဒိၣ်ဖးဒိၣ်မ့ၢ်ဂ့ၤလၢ အမၢ ပှၤအူတၢ်သမူတၢ်တဖၣ်, ပှၤလၢအဆဲးကျိးဒီးပှၤသံတဖၣ်​ မ့တမ့ၢ် ပှၤက့ၤစ့းဖိတဒူၣ်​ ဒ်အံၤန့ၣ်​ တအိၣ်နီတဂၤဘၣ်. ၁၁ တၢ်လၢ စီၤပၤ သံကွၢ်ဝဲန့ၣ်​ ကီဒိၣ်မး. မ့တမ့ၢ်လၢ ယွၤတဖၣ်ဘၣ်န့ၣ်​ ပှၤလၢအစံးဆၢနၤသ့န့ၣ်​ တအိၣ်နီတဂၤဘၣ်. ဘၣ်ဆၣ်​ ဖဲအံၤန့ၣ်​ ယွၤလၢအကစံးဆၢနၤ တအိၣ်နီတဂၤဘၣ်.”

၁၂ ဖဲန့ၣ်န့ၣ်​ စီၤပၤ သးပှံၢ်ထီၣ်တၢ်ဒိၣ်မး ဒီးဟ့ၣ်လီၤ တၢ်ကလုၢ်လၢ ပှၤကမၤသံ ဘၤဘူၤလိၣ်​ အပှၤကူၣ်ဘၣ်ကူၣ်သ့တဖၣ်​ ကိးဂၤဒဲးလီၤ.+ ၁၃ ဖဲတၢ်ကလုၢ်လီၤဝဲ ဒီးပှၤဘူးကမၤသံ ပှၤကူၣ်ဘၣ်ကူၣ်သ့ တဖၣ်အခါ ပှၤဃုစီၤဒၤနံးယ့လး ဒီးအသကိးတဖၣ်​ ဒ်သိး ကမၤသံ အဝဲသ့ၣ်​ စ့ၢ်ကီးလီၤ.

၁၄ စီၤပၤအပှၤပၢၤတၢ်ဖိတဖၣ်​ အခိၣ်​ စီၤအၤရယိာ် လဲၤလၢကျဲ ဒ်သိး အကလဲၤမၤသံ ဘၤဘူၤလိၣ်​ အပှၤကူၣ်ဘၣ်ကူၣ်သ့တဖၣ်အခါ စီၤဒၤနံးယ့လး လဲၤတဲတၢ်ဒီးအီၤလၢ တၢ်ကူၣ်သ့အပူၤ ဒီးလၢတၢ်ပလီၢ်သူၣ်ပလီၢ်သး အပူၤလီၤ. ၁၅ အဝဲသံကွၢ် စီၤပၤအပဒိၣ်​ စီၤအၤရယိာ်လၢ “ဘၣ်မနုၤအဃိ စီၤပၤဟ့ၣ်လီၤ တၢ်ကလုၢ်လၢ အဆူၣ်အကိၤ ဒ်အံၤလဲၣ်.” ဒီးစီၤအၤရယိာ် တဲဘၣ်စီၤဒၤနံးယ့လး လၢတၢ်ဂ့ၢ်တၢ်ကျိၤလီၤ.+ ၁၆ အဃိ စီၤဒၤနံးယ့လး လဲၤလၢစီၤပၤအအိၣ်​ ဒီးဃ့ဝဲလၢ စီၤပၤကဟ့ၣ်အီၤ တၢ်ဆၢကတီၢ်လၢ ကတဲနၢ်ပၢၢ်အီၤ အတၢ်မံမီၢ် အခီပညီ အဂီၢ်လီၤ.

၁၇ စီၤဒၤနံးယ့လး က့ၤလၢအဟံၣ်​ ဒီးတဲဘၣ်​ အသကိး စီၤဃနၤနယၤ, စီၤမံၡအ့လး ဒီးစီၤဧစၤရယၤ လၢတၢ်ဂ့ၢ်လီၤ. ၁၈ ဒီးစီၤဒၤနံးယ့လး မၢအသကိးတဖၣ်​ ဃ့မူခိၣ်အကစၢ် လၢအကသးကညီၤအဝဲသ့ၣ်​ ဒီးကပာ်ဖျါထီၣ်န့ၢ် အဝဲသ့ၣ်​ တၢ်ခူသူၣ်တခါအံၤ ဒ်သိး အဝဲဒီးအသကိးတဖၣ်​ သုတဘၣ်တၢ်မၤသံအီၤ ဃုာ်ဒီး ဘၤဘူၤလိၣ်​ အပှၤကူၣ်ဘၣ်ကူၣ်သ့ အဂၤတဖၣ်​ တဂ့ၤအဂီၢ်လီၤ.

၁၉ ဖဲမုၢ်နၤခီန့ၣ်​ ကစၢ်ယွၤ ပာ်ဖျါထီၣ်န့ၢ် စီၤဒၤနံးယ့လးလၢ တၢ်ခူသူၣ်တခါအံၤ လၢတၢ်ထံၣ်လၢညါခီ အပူၤလီၤ.+ အဃိ စီၤဒၤနံးယ့လး စံးထီၣ်ပတြၢၤ မူခိၣ်အကစၢ်လီၤ. ၂၀ ဒီးစီၤဒၤနံးယ့လး တဲဝဲလၢ

“ထဲဒၣ်​ ကစၢ်ယွၤတဂၤန့ၣ်​ ဟ့ၣ်လီၤတၢ်ကူၣ်သ့ ဒီးတၢ်စိတၢ်ကမီၤအဃိ+

မ်အမံၤ ဘၣ်တၢ်စံးထီၣ်ပတြၢၤအီၤ လီၤထူလီၤယိာ်တက့ၢ်.

၂၁ အဝဲမ့ၢ်ပှၤလၢ အဆီတလဲ တၢ်ဆၢကတီၢ် ဒီးတၢ်မၤအသး တဖၣ်လီၤ.+

၂၂ အဝဲ လီၣ်ဖျါထီၣ်​ တၢ်လၢအဒိၣ်အယိာ် ဒီးတၢ်လၢ အအိၣ်ခူသူၣ်အသးတဖၣ်လီၤ.+

၂၃ အိ ယမိၢ်ပၢ်ဖံဖု လၢပျၢၤတဖၣ်​ အကစၢ်ယွၤဧၢ, ယစံးဘျုးနၤ ဒီးယစံးထီၣ်ပတြၢၤနၤ,

မ့ၢ်လၢ နဟ့ၣ်လီၤယၤ တၢ်ကူၣ်သ့ ဒီးတၢ်စိတၢ်ကမီၤ အဃိလီၤ.

၂၄ ဒီးစီၤဒၤနံးယ့လး လဲၤလၢ စီၤအၤရယိာ် လၢအမ့ၢ် ပှၤလၢစီၤပၤ ဃုထၢထီၣ်အီၤလၢ ကမၤသံ ဘၤဘူၤလိၣ်​ အပှၤကူၣ်ဘၣ်ကူၣ်သ့တဖၣ်အအိၣ်+ ဒီးတဲဘၣ်အီၤလၢ “တဘၣ်မၤသံ ဘၤဘူၤလိၣ်​ အပှၤကူၣ်ဘၣ်ကူၣ်သ့ နီတဂၤတဂ့ၤ. လဲၤဆှၢယၤလၢ စီၤပၤအအိၣ်​ ဒီးယကတဲဘၣ်​ စီၤပၤလၢ အတၢ်မံမီၢ် အခီပညီလီၤ.”

၂၅ အဃိ စီၤအၤရယိာ် ကရီလဲၤကိး စီၤဒၤနံးယ့လး လၢစီၤပၤအအိၣ်​ ဒီးတဲဘၣ်စီၤပၤလၢ “ယထံၣ်ဘၣ်ပှၤတဂၤလၢ ပှၤလၢအဘၣ်​ တၢ်ဟဲက့ၤဖီၣ်န့ၢ်အီၤလၢ ယူဒၤအကျါ+ ဒီးအဝဲတဲဘၣ်​ စီၤပၤ အတၢ်မံမီၢ် အခီပညီသ့လီၤ.” ၂၆ ဒီးစီၤပၤတဲဘၣ်​ စီၤဒၤနံးယ့လး လၢအမ့ၢ် စီၤဘ့ၤလးတၡါစၢ်လၢ+ “နတဲဘၣ်ယၤ ယတၢ်မံမီၢ် ဒီးအခီပညီန့ၣ်​ သ့သပှၢ်ကတၢၢ်ဧါ.”+ ၂၇ စီၤဒၤနံးယ့လး တဲဆၢ စီၤပၤလၢ “တၢ်ခူသူၣ်လၢ စီၤပၤ မၢယတဲဖျါထီၣ်န့ၣ်​ ပှၤကူၣ်ဘၣ်ကူၣ်သ့တဖၣ်, ပှၤလၢအဆဲးကျိးဒီးပှၤသံတဖၣ်, ပှၤအူတၢ်သမူတၢ်တဖၣ်​ ဒီးပှၤဒွးဆၣ်ဖိတဖၣ်​ စံးဆၢဝဲတဘၣ် နီတဂၤဘၣ်.+ ၂၈ ဘၣ်ဆၣ်​ လၢမူခိၣ်န့ၣ်​ ကစၢ်ယွၤလၢ အပာ်ဖျါထီၣ်​ တၢ်ခူသူၣ်​ အိၣ်ဝဲတဂၤ+ ဒီးအဝဲဒုးသ့ၣ်ညါ စီၤပၤနဘူၤကးန့စၢ် ဘၣ်ဃးဒီး တၢ်ကမၤအသးလၢ မုၢ်နံၤအကတၢၢ်တဖၣ်​ အတီၢ်ပူၤလီၤ. ဖဲနမံလၢ နလီၢ်မံခိၣ်အခါ နမံမီၢ်တၢ် ဒီးနထံၣ်ဘၣ်​ တၢ်ထံၣ်လၢညါခီ ဒ်အံၤလီၤ.

၂၉ “အိ စီၤပၤဧၢ, ဖဲနအိၣ်လၢ လီၢ်မံခိၣ်အခါ နမံမီၢ်တၢ်* ဘၣ်ဃးဒီး တၢ်လၢအကမၤအသးလၢ ခါဆူညါလီၤ. ဒီးပှၤလၢ အပာ်ဖျါထီၣ်​ တၢ်ခူသူၣ်တဂၤန့ၣ်​ ဒုးသ့ၣ်ညါနၤ တၢ်လၢ အကဟဲကဲထီၣ်အသး တဖၣ်လီၤ. ၃၀ တမ့ၢ်လၢ ယကူၣ်တၢ်သ့ဒိၣ်န့ၢ် ပှၤခဲလၢာ်အဃိ တၢ်ဒုးသ့ၣ်ညါယၤ လၢတၢ်ခူသူၣ်တခါအံၤဘၣ်. တၢ်ဒုးသ့ၣ်ညါယၤန့ၣ်​ မ့ၢ်ဒ်သိး ယကတဲဘၣ်​ နၤလၢ နတၢ်မံမီၢ် အခီပညီ ဒ်သိး နကသ့ၣ်ညါ နတၢ်ဆိကမိၣ်လၢအအိၣ်လၢ နသးပူၤအဂီၢ်လီၤ.+

၃၁ “အိ စီၤပၤဧၢ, ဖဲနကွၢ်တၢ်အခါ နထံၣ်ဘၣ်​ တၢ်ဂီၤဖးဒိၣ်​ တဒုလီၤ. ဒီးတၢ်ဂီၤအံၤ ဒိၣ်ဝဲဒိၣ်မး ဒီးကပြုၢ်ကပြီၤဝဲ ဒိၣ်မး ဒီးအအိၣ်ဆၢထၢၣ်လၢ နမဲာ်ညါ ဒီးအဖျါလီၤပျံၤလီၤဖုး ဒိၣ်မးလီၤ. ၃၂ တၢ်ဂီၤတဒုအံၤ အခိၣ်သၣ်ဃံန့ၣ်​ မ့ၢ်ဝဲထူစီ,+ အသးနါပှၢ် ဒီးအစုန့ၣ်​ မ့ၢ်ဝဲစ့,+ အဟၢဖၢ ဒီးအခီၣ်ကံၣ်ဒုၣ်န့ၣ်​ မ့ၢ်ဝဲ တိၢ်ဘီ,+ ၃၃ အခီၣ်န့ၣ်​ မ့ၢ်ဝဲထး+ ဒီးအခီၣ်လၣ်​ မ့ၢ်ဝဲထးတနီၤ ဒီးကပံာ်* တနီၤလီၤ.+ ၃၄ ဖဲနဆဲးကွၢ်တၢ်အခါ နထံၣ်ဘၣ်လၢ လၢၢ်တဖျၢၣ်လၢ တၢ်တကူးတဲာ်အီၤလၢ စုဘၣ်န့ၣ်​ ဟဲဘၣ်ထံးဝဲ တၢ်ဂီၤတဒုန့ၣ်အခီၣ်​ လၢအမ့ၢ် ထးဒီးကပံာ် ဒီးမၤသဘှံးအခီၣ်လီၤ.+ ၃၅ ဖဲန့ၣ်အခါ ထး, ကပံာ်, တိၢ်ဘီ, စ့ဒီးထူတဖၣ်န့ၣ်​ သဘှံးဝဲခဲလၢာ် ဒီးကဲထီၣ်ဒ် ဖ့လၢကြဲၢ်ပူၤ လၢတၢ်ကိၢ်ခါ အဆၢကတီၢ် ဒီးကလံၤအူဒံကွံာ်အီၤ လၢအယံၤအဃိ ပှၤတထံၣ်ဘၣ်အီၤ နီတစဲးလၢၤဘၣ်. မ့မ့ၢ်လၢၢ်လၢ အဟဲဘၣ်ထံး တၢ်ဂီၤန့ၣ်​ ကဲထီၣ်​ ကစၢၢ်ဖးဒိၣ်တဖျၢၣ်​ ဒီးအိၣ်ပှဲၤလၢ ဟီၣ်ခိၣ်ဒီဘ့ၣ်လီၤ.

၃၆ “အဝဲန့ၣ်မ့ၢ်ဝဲ တၢ်မံမီၢ် ဒီးခဲအံၤပကတဲဘၣ်​ စီၤပၤလၢ တၢ်မံမီၢ်အံၤ အခီပညီလီၤ. ၃၇ အိ စီၤပၤဧၢ, နၤန့ၣ်နမ့ၢ်စီၤပၤတဖၣ်​ အစီၤပၤလၢ မူခိၣ်အကစၢ် ဟ့ၣ်လီၤဝဲဘီမုၢ်,+ တၢ်စိတၢ်ကမီၤ, တၢ်ဂံၢ်တၢ်ဘါ ဒီးတၢ်လၤကပီၤလီၤ. ၃၈ ဒီးကစၢ်ယွၤ ဟ့ၣ်လီၤပှၤဟီၣ်ခိၣ်ဖိလၢ အအိၣ်လၢတၢ်လီၢ် တပူၤဂ့ၤတပူၤဂ့ၤ လၢနစုပူၤ ဃုာ်ဒီးဆၣ်ဖိကီၢ်ဖိ အဒူၣ်တဖၣ်လၢ တၢ်ပျီပူၤ ဒီးထိၣ်ဖိလံၣ်ဖိ လၢမူခိၣ်လီၤ. ဒီးအဝဲဒုးကဲထီၣ်နၤလၢ အဝဲသ့ၣ်ခဲလၢာ် အခိၣ်လီၤ.+ အဃိ နၤန့ၣ်​ နမ့ၢ်တၢ်ဂီၤအခိၣ်ထူလီၤ.+

၃၉ “ဒီးဘီမုၢ်အဂၤတခါ ကဟဲအိၣ်ထီၣ်လၢ+ နလီၢ်ခံ ဘၣ်ဆၣ်​ အကဆံးန့ၢ်ဒံး နဘီမုၢ်လီၤ. ဝံၤဒီး ဘီမုၢ်အဂၤတခါ လၢအမ့ၢ် တိၢ်ဘီန့ၣ်​ ကအိၣ်ထီၣ်ဝဲ ဒီးအမ့ၢ်ဝဲ ဘီမုၢ်သၢခါတခါ ဒီးအကပၢဝဲ ဟီၣ်ခိၣ်ဒီဘ့ၣ်လီၤ.+

၄၀ “မ့မ့ၢ် ဘီမုၢ်လွံၢ်ခါတခါန့ၣ်​ ကကိၤဝဲဒ် ထးအသိးလီၤ.+ ဒ်ထးမၤလီၤကလဲ ဒီးမၤလီၤကမူၣ်​ တၢ်အဂၤကိးမံၤဒဲးအသိး ဘီမုၢ်အံၤ ကမၤလီၤကလဲ ဒီးမၤဟးဂီၤကွံာ် ဘီမုၢ်ခဲလၢာ်လၢ အအိၣ်ဆိလၢ အမဲာ်ညါတဖၣ်န့ၣ်​ လၢာ်လၢာ်ဆ့ဆ့လီၤ.+

၄၁ “ဒ်နထံၣ်ဘၣ်လၢ အခီၣ်လၣ်​ ဒီးအခီၣ်မုၢ်ခီၣ်ဘိတဖၣ်​ မ့ၢ်ဝဲထးတနီၤ ဒီးကပံာ်တနီၤအသိးန့ၣ်​ ဘီမုၢ်အံၤ တဃူဖိးဝဲဘၣ်, ဘၣ်ဆၣ်​ ထးလၢအကိၤ ကအိၣ်လၢအပူၤ တနီၤလီၤ. ဒီးဒ်နထံၣ်အသိးန့ၣ်​ ကပံာ်လၢအပှဲာ် ကကျဲၣ်ကျီအသး ဒီးထးလီၤ. ၄၂ ဒ်အခီၣ်မုၢ်ခီၣ်ဘိတဖၣ်​ မ့ၢ်ဝဲ ထးတနီၤ ဒီးကပံာ်တနီၤအသိး ဘီမုၢ်အံၤ ကဆူၣ်ဝဲ သနာ်က့ ကစၢ်ဝဲစ့ၢ်ကီးလီၤ. ၄၃ ဒ်နထံၣ်လၢ ထးကျဲၣ်ကျီလိာ်အသးဒီး ကပံာ်လၢအပှဲာ်အသိး အဝဲသ့ၣ်* ကကျဲၣ်ကျီလိာ်အသးဒီး ပှၤအကလုာ်ကလုာ်* ဘၣ်ဆၣ်​ တဘုးတာ်လိာ်အသးဘၣ်,* ဒ်ထးဒီးကပံာ် တဘုးတာ်လိာ်အသးဘၣ်​ အသိးလီၤ.

၄၄ “ဖဲစီၤပၤတဖၣ်အံၤ ပၢတၢ်ဒံး အဆၢကတီၢ်န့ၣ်​ ကစၢ်ယွၤ လၢမူခိၣ်​ ကသူၣ်ထီၣ်​ ဘီမုၢ်*+ တဘ့ၣ်လၢ အတဟးဂီၤ နီတဘျီဘၣ်.+ ဒီးဘီမုၢ်တဘ့ၣ်အံၤ တၢ်တဟ့ၣ်လီၤအီၤလၢ ပှၤအဂၤ အစုပူၤဘၣ်.+ ဘီမုၢ်အံၤ ကမၤသဘှံး ဒီးကမၤဟးဂီၤဝဲ ဘီမုၢ်သ့ၣ်တဖၣ်အံၤခဲလၢာ်+ ဒီးထဲဒၣ်​ ဘီမုၢ်တဘ့ၣ်အံၤန့ၣ်​ ကအိၣ်ဂၢၢ်ကျၢၤဝဲ* လီၤထူလီၤယိာ်+ ၄၅ ဒ်နထံၣ်ဘၣ်လၢ လၢၢ်တဖျၢၣ်လၢ ကစၢၢ်လိၤလၢ တၢ်တကူးတဲာ်အီၤလၢ စုဘၣ်န့ၣ်​ မၤသဘှံးဝဲထး, တိၢ်ဘီ, ကပံာ်, စ့ညၣ်​ ဒီးထူအသိးလီၤ.+ ကစၢ်ယွၤလၢအဒိၣ်အထီတဂၤ ဒုးသ့ၣ်ညါစီၤပၤလၢ တၢ်ကမၤအသးလၢ ခါဆူညါလီၤ.+ တၢ်မံမီၢ်န့ၣ်​ မ့ၢ်ဝဲတီဝဲ ဒီးပှၤနာ်န့ၢ် အခီပညီ သ့ဝဲလီၤ.”

၄၆ စီၤပၤ နဘူၤကးန့စၢ် ထိၣ်လီၤပှီၤအသး ဒီးကျးလီၤအမဲာ်လၢ ဟီၣ်ခိၣ်လိၤ လၢစီၤဒၤနံးယ့လး အမဲာ်ညါ ဒီးပာ်ဖျါထီၣ်​ တၢ်ပာ်ကဲအီၤ ဒိၣ်မးလီၤ. ဒီးစီၤပၤ ဟ့ၣ်လီၤတၢ်ကလုၢ်လၢ ပှၤကဟ့ၣ်လီၤ စီၤဒၤနံးယ့လး တၢ်ဟ့ၣ်​ ဒီးဒွဲၣ်ထီၣ်တၢ်နၢမူ လၢအဂီၢ်လီၤ. ၄၇ ဒီးစီၤပၤ တဲဘၣ်​ စီၤဒၤနံးယ့လးလၢ “မ့ၢ်လၢ နပာ်ဖျါထီၣ်န့ၢ် တၢ်ခူသူၣ်တခါအံၤ သ့ဝဲအဃိ နကစၢ်ယွၤန့ၣ်​ မ့ၢ်ကစၢ်တဖၣ်​ အကစၢ်ယွၤ ဒီးအဒိၣ်န့ၢ် စီၤပၤခဲလၢာ် ဒီးအမ့ၢ်ပှၤလၢ အပာ်ဖျါထီၣ်​ တၢ်ခူသူၣ်တဖၣ်​ နီၢ်ကီၢ်လီၤ.”+ ၄၈ ဒီးစီၤပၤဟ့ၣ်အီၤလီၢ်လၤ လၢအထီ ဒီးဟ့ၣ်အီၤ တၢ်ဟ့ၣ်လၢအဂ့ၤအါမး ဒီးဒုးပၢအီၤ ဘၤဘူၤလိၣ်အကီၢ်ရ့ၣ်ဒီဘ့ၣ်+ ဒီးဒုးကဲထီၣ်အီၤ လၢဘၤဘူၤလိၣ်​ အပှၤကူၣ်ဘၣ်ကူၣ်သ့ခဲလၢာ် အပဒိၣ်အခိၣ်လီၤ. ၄၉ ဒီးဒ်စီၤဒၤနံးယ့လး ဃ့ထီၣ်ဝဲအသိး စီၤပၤပာ်ထီၣ်​ စီၤၡၤဒရး, စီၤမ့ၤၡး, စီၤဧဘ့ၤဒနကိၤ+ ဒ်သိးကပၢစၢၤတၢ်လၢ ဘၤဘူၤလိၣ်​ အကီၢ်ရ့ၣ်အပူၤလီၤ. မ့မ့ၢ် စီၤဒၤနံးယ့လးန့ၣ်​ မၤတၢ်လၢ စီၤပၤအနီ* ပူၤလီၤ.

၃ စီၤပၤနဘူၤကးန့စၢ် တ့ထီၣ်ဝဲ တၢ်ဂီၤထူလၢ အကစီၤထီၣ်ထီဝဲ အပျၢ်* ၆၀ ဒီးအဒီၣ်ဃီၤ အိၣ်ဝဲ ၆ ပျၢ်လီၤ. ဒီးအဝဲ ဆီလီၤဝဲ တၢ်ဂီၤအံၤလၢ ဒူရၤ အတၢ်ပျီပူၤ လၢအအိၣ်လၢ ဘၤဘူၤလိၣ်​ အကီၢ်ရ့ၣ်ပူၤလီၤ. ၂ ဒီးစီၤပၤနဘူၤကးန့စၢ်န့ၣ်​ ဟ့ၣ်လီၤတၢ်ကလုၢ်လၢ ပှၤကလဲၤကိးဖှိၣ်​ ကီၢ်ရ့ၣ်​ အပဒိၣ်ဖးဒိၣ်တဖၣ်, ပဒိၣ်တဖၣ်, ပဒိၣ်ဖးဒိၣ်တဖၣ်, ပှၤဟ့ၣ်ကူၣ်တၢ်တဖၣ်, ပှၤပၢၤစ့တဖၣ်, စံၣ်ညီၣ်ကွီၢ်တဖၣ်, ပလံး ဒီးပှၤခိၣ်ပှၤနၢ်လၢ ကီၢ်ရ့ၣ်တဖၣ်အပူၤ ကိးဂၤဒဲး ဒ်သိး ကဟဲပာ်ဖှိၣ်ထီၣ်အသးလၢ တၢ်ပာ်စီဆှံတၢ်ဂီၤလၢ စီၤပၤနဘူၤကးန့စၢ် ဆီလီၤဝဲအဂီၢ်လီၤ.

၃ ကီၢ်ရ့ၣ်အပဒိၣ်ဖးဒိၣ်တဖၣ်, ပဒိၣ်တဖၣ်, ပဒိၣ်ဖးဒိၣ်တဖၣ်, ပှၤဟ့ၣ်ကူၣ်တၢ်တဖၣ်, ပှၤပၢၤစ့တဖၣ်, စံၣ်ညီၣ်ကွီၢ်တဖၣ်, ပလံး ဒီးပှၤခိၣ်ပှၤနၢ်လၢ ကီၢ်ရ့ၣ်တဖၣ်အပူၤ ကိးဂၤဒဲးန့ၣ်​ ဟဲပာ်ဖှိၣ်ထီၣ်အသးလၢ တၢ်ပာ်စီဆှံတၢ်ဂီၤလၢ စီၤပၤနဘူၤကးန့စၢ် ဆီလီၤဝဲအဂီၢ်လီၤ. ဒီးအဝဲသ့ၣ်​ ဆၢထၢၣ်လၢ တၢ်ဂီၤလၢ စီၤပၤနဘူၤကးန့စၢ် ဆီလီၤဝဲတဒုန့ၣ်​ အမဲာ်ညါလီၤ. ၄ ပှၤဘိးဘၣ်သ့ၣ်ညါတၢ်ဖိတဂၤ ကိးထီၣ်ဝဲလၢ “ပှၤဂီၢ်မုၢ်, ပှၤကလုာ် ဒီးပှၤလၢအတဲကျိာ် အကလုာ်ကလုာ်သ့ၣ်ဧၢ, စီၤပၤမၤလိာ်သုလၢ ၅ ဖဲသုနၢ်ဟူ ကွဲၤ, ပံ, တနၢ်သၢနၢၣ်, တၢ်ဒ့အကလုာ်ကလုာ်လၢ အအိၣ်ဒီးအပျံၤတဖၣ်, ပံဖးဒိၣ်​ ဒီးတၢ်ဒ့တၢ်အူအဂၤတဖၣ်ခဲလၢာ် သီၣ်ထီၣ်အခါ သုကဘၣ်ထိၣ်လီၤပှီၤသုသး ဒီးဘူၣ်ထီၣ်ဘါထီၣ်​ တၢ်ဂီၤထူလၢ စီၤပၤနဘူၤကးန့စၢ် ဆီလီၤဝဲန့ၣ်လီၤ. ၆ ပှၤလၢ အတထိၣ်လီၤပှီၤအသး ဒီးဘူၣ်ထီၣ်ဘါထီၣ်​ တၢ်ဂီၤဘၣ်န့ၣ်​ ကဘၣ်တၢ်ကွံာ်လီၤအီၤလၢ ဖၣ်ကပူၤဖးဒိၣ်လၢ မ့ၣ်အူကဲၤဝဲ အပူၤ တဘျီဃီလီၤ.”+ ၇ ဖဲပှၤခဲလၢာ် နၢ်ဟူဝဲ ကွဲၤ, ပံ, တနၢ်သၢနၢၣ်, တၢ်ဒ့အကလုာ်ကလုာ်လၢ အအိၣ်ဒီးအပျံၤတဖၣ်​ ဒီးတၢ်ဒ့တၢ်အူ အဂၤတဖၣ်ခဲလၢာ် သီၣ်ထီၣ်အခါ ပှၤဂီၢ်မုၢ်, ပှၤကလုာ် ဒီးပှၤလၢအတဲကျိာ် အကလုာ်ကလုာ်န့ၣ်​ ထိၣ်လီၤပှီၤအသး ဒီးဘူၣ်ထီၣ်ဘါထီၣ်​ တၢ်ဂီၤထူ လၢစီၤပၤ နဘူၤကးန့စၢ် ဆီလီၤဝဲလီၤ.

၈ ပှၤက့ၤစ့းဖိ တနီၤန့ၣ်​ လဲၤလၢစီၤပၤအအိၣ်​ ဒီးပာ်ဒ့ၣ်ပာ်ကမၣ်* ပှၤယူဒၤဖိတဖၣ်လီၤ. ၉ အဝဲသ့ၣ်တဲ စီၤပၤနဘူၤကးန့စၢ်လၢ “အိ စီၤပၤဧၢ, မ်နမူ လီၤထူလီၤယိာ်တက့ၢ်. ၁၀ အိ စီၤပၤဧၢ, နဟ့ၣ်လီၤတၢ်ကလုၢ်လၢ ဖဲပှၤနၢ်ဟူ ကွဲၤ, ပံ, တနၢ်သၢနၢၣ်, တၢ်ဒ့အကလုာ်ကလုာ်လၢ အအိၣ်ဒီးအပျံၤတဖၣ်, ပံဖးဒိၣ်​ ဒီးတၢ်ဒ့တၢ်အူအဂၤတဖၣ်ခဲလၢာ် သီၣ်ထီၣ်အခါန့ၣ်​ ပှၤကိးဂၤဒဲး ကဘၣ်ထိၣ်လီၤပှီၤအသး ဒီးဘူၣ်ထီၣ်ဘါထီၣ်​ တၢ်ဂီၤထူလီၤ. ၁၁ ဒီးပှၤလၢ အတထိၣ်လီၤပှီၤအသး ဒီးဘူၣ်ထီၣ်ဘါထီၣ်​ တၢ်ဂီၤဘၣ်န့ၣ်​ ကဘၣ်တၢ်ကွံာ်လီၤအီၤလၢ ဖၣ်ကပူၤဖးဒိၣ်လၢ မ့ၣ်အူကဲၤဝဲ အပူၤလီၤ.+ ၁၂ အိ စီၤပၤဧၢ, ပှၤယူဒၤဖိ လၢအမ့ၢ် စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ+ လၢနပာ်ထီၣ်အီၤလၢ ကပၢစၢၤတၢ်လၢ ဘၤဘူၤလိၣ်​ အကီၢ်ရ့ၣ်​ အပူၤန့ၣ်​ တပာ်ကဲနၤ နီတစဲးဘၣ်. အဝဲသ့ၣ်​ တမၤနကစၢ်တဖၣ်​ အတၢ်ဘၣ်​ ဒီးတဘူၣ်ထီၣ်ဘါထီၣ်ဝဲ တၢ်ဂီၤထူ လၢနဆီလီၤအီၤဘၣ်.”

၁၃ ဖဲန့ၣ်န့ၣ်​ စီၤနဘူၤကးန့စၢ် သးပှံၢ်ထီၣ်တၢ်ဒိၣ်မး ဒီးဟ့ၣ်လီၤတၢ်ကလုၢ်လၢ ပှၤကဟဲကိးနုာ် စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤလီၤ. အဃိ ပှၤဟဲကိးနုာ် အဝဲသ့ၣ်လၢ စီၤပၤအမဲာ်ညါလီၤ. ၁၄ စီၤနဘူၤကးန့စၢ် တဲအဝဲသ့ၣ်လၢ “စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤဧၢ, သုတမၤ ယကစၢ်တဖၣ်+ အတၢ်ဘၣ်​ ဒီးသုတဘူၣ်ထီၣ်ဘါထီၣ်​ တၢ်ဂီၤထူ လၢယဆီလီၤအီၤဘၣ်န့ၣ်​ မ့ၢ်အမ့ၢ်အနီၢ်ကီၢ်ဧါ. ၁၅ လၢခံတဘျီ ဖဲသုနၢ်ဟူ ကွဲၤ, ပံ, တနၢ်သၢနၢၣ်, တၢ်ဒ့အကလုာ်ကလုာ်လၢ အအိၣ်ဒီးအပျံၤတဖၣ်, ပံဖးဒိၣ်​ ဒီးတၢ်ဒ့တၢ်အူအဂၤတဖၣ်ခဲလၢာ် သီၣ်ထီၣ်အခါ သုမ့ၢ် ထိၣ်လီၤပှီၤသုသး ဒီးဘူၣ်ထီၣ်ဘါထီၣ် တၢ်ဂီၤလၢ ယတ့ထီၣ်အီၤန့ၣ်​ ကဂ့ၤလီၤ. ဘၣ်ဆၣ်​ သုမ့ၢ် တဘူၣ်ထီၣ်ဘါထီၣ်အီၤဘၣ်န့ၣ်​ ပှၤကကွံာ်လီၤသုလၢ ဖၣ်ကပူၤဖးဒိၣ်လၢ မ့ၣ်အူကဲၤဝဲအပူၤ တဘျီဃီလီၤ. ယွၤလၢ အကမၤပူၤဖျဲးသုလၢ ယစုပူၤန့ၣ်​ အိၣ်တဂၤဂၤဧါ.”+

၁၆ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ တဲဆၢက့ၤ စီၤပၤလၢ “စီၤနဘူၤကးန့စၢ်ဧၢ, ဘၣ်ဃးဒီး တၢ်ဂ့ၢ်တခါအံၤန့ၣ်​ ပတလိၣ်​ တဲဆၢနၤလၢၤဘၣ်. ၁၇ အိ စီၤပၤဧၢ, ပှၤမ့ၢ်ကွံာ်လီၤပှၤလၢ ဖၣ်ကပူၤဖးဒိၣ်လၢ မ့ၣ်အူကဲၤဝဲလၢ အပူၤ သနာ်က့ ပကစၢ်လၢ ပမၤအတၢ်တဂၤန့ၣ်​ မၤပူၤဖျဲးပှၤသ့ ဒီးအမၤပူၤဖျဲးပှၤလၢ နစုပူၤသ့လီၤ.+ ၁၈ စီၤပၤဧၢ, အဝဲ မ့ၢ်တမၤပူၤဖျဲးပှၤဘၣ်​ သနာ်က့ ပအဲၣ်ဒိးဒုးသ့ၣ်ညါနၤလၢ ပတမၤ နယွၤတဖၣ်​ အတၢ်ဘၣ်​ ဒီးပတဘူၣ်ထီၣ်ဘါထီၣ်​ တၢ်ဂီၤထူ လၢနဆီလီၤအီၤန့ၣ်ဘၣ်.”+

၁၉ ဖဲန့ၣ်န့ၣ်​ စီၤနဘူၤကးန့စၢ် သးပှံၢ်ထီၣ်​ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ ဒိၣ်မး တုၤဒၣ်လဲာ် အတၢ်ပာ်မဲာ်ပာ်နါ ဆီတလဲဝဲလီၤ.* ဒီးအဝဲမၤလိာ်ဝဲလၢ ပှၤကမၤကိၢ်ထီၣ်မ့ၣ်အူလၢ ဖၣ်ကပူၤဖးဒိၣ်အပူၤ ကိၢ်န့ၢ်အလီၢ် နွံစးလီၤ. ၂၀ ဒီးအမၢ ပှၤပိာ်ခွါလၢ အဂံၢ်ဆူၣ်ဘါဆူၣ်လၢ အသုးမုၢ်အကျါတနီၤ စၢဃာ် စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ ဒီးကွံာ်လီၤ အဝဲသ့ၣ်လၢ ဖၣ်ကပူၤဖးဒိၣ်​ လၢမ့ၣ်အူကဲၤဝဲ အပူၤလီၤ.

၂၁ ဖဲပှၤစၢဃာ် ပှၤပိာ်ခွါသၢဂၤန့ၣ်အခါ အဝဲသ့ၣ်​ အတၢ်ကံးညာ်, တၢ်ကူတၢ်ကၤ, ခိၣ်ဖျီၣ်​ ဒီးအတၢ်ကူတၢ်သိးအဂၤ ခဲလၢာ် အိၣ်ဒံးလၢ အလိၤလီၤ. ဒီးပှၤကွံာ်လီၤ အဝဲသ့ၣ်လၢ ဖၣ်ကပူၤဖးဒိၣ်​ လၢမ့ၣ်အူကဲၤဝဲလၢ အပူၤလီၤ. ၂၂ မ့ၢ်လၢ စီၤပၤဟ့ၣ်လီၤတၢ်ကလုၢ်လၢ အဆူၣ်အကိၤ ဒီးလၢဖၣ်ကပူၤဖးဒိၣ်​ အပူၤန့ၣ်​ မ့ၣ်အူကိၢ်ဝဲဒိၣ်မး အဃိ ပှၤပိာ်ခွါတဖၣ်လၢ အကွံာ်လီၤဝဲ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤန့ၣ်​ သံဝဲလၢ မ့ၣ်အူလၣ်တဖၣ်​ အဃိလီၤ. ၂၃ မ့မ့ၢ် စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤန့ၣ်​ လီၤတဲာ်ဝဲ ဒ်တၢ်စၢဃာ်အဝဲသ့ၣ်​ အိၣ်ဝဲအသိးလၢ ဖၣ်ကပူၤဖးဒိၣ်​ လၢမ့ၣ်အူကဲၤဝဲ အပူၤလီၤ.

၂၄ စီၤပၤ နဘူၤကးန့စၢ် ပျံၤတၢ်ဖုးတၢ် ဒီးဆၢထၢၣ်ဝဲ တဘျီဃီ ဒီးတဲဝဲ အပဒိၣ်လၢ အပတီၢ်ထီတဖၣ်လၢ “ပစၢဃာ် ပှၤသၢဂၤ ဒီးကွံာ်လီၤ အဝဲသ့ၣ်လၢ မ့ၣ်အူပူၤ တမ့ၢ်ဧီၤ.” ဒီးအဝဲသ့ၣ်​ တဲဆၢအီၤလၢ “မ့ၢ်ဝဲ, စီၤပၤဧၢ.” ၂၅ ဒီးစီၤပၤတဲဝဲလၢ “ကွၢ်တထံၣ်, ယထံၣ်ပှၤဟးလၢ မ့ၣ်အူကျါ လွံၢ်ဂၤ ဒီးအဝဲသ့ၣ်​ တဘၣ်တၢ်စၢဃာ် အီၤဘၣ်​ ဒီးတဘၣ်ဒိဘၣ်ထံးဘၣ်. ဒီးပှၤလွံၢ်ဂၤတဂၤန့ၣ်​ လီၤဂာ်ဒ်သိးဒီး ယွၤတဖၣ်​ အဖိခွါလီၤ.”

၂၆ စီၤနဘူၤကးန့စၢ် လဲၤဘူးထီၣ်လၢ ဖၣ်ကပူၤဖးဒိၣ်​ လၢမ့ၣ်အူကဲၤဝဲ အပဲတြီ ဒီးတဲဝဲလၢ “ကစၢ်ယွၤလၢ အထီကတၢၢ်တဂၤ+ အခ့အပှၤ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤဧၢ, ဟဲက့ၤထီၣ်​ ဒီးဟဲလၢအံၤ.” ဒီးစီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤန့ၣ်​ ဟဲက့ၤထီၣ်ဝဲ လၢမ့ၣ်အူပူၤလီၤ. ၂၇ ကီၢ်ရ့ၣ်​ အပဒိၣ်ဖးဒိၣ်တဖၣ်, ပဒိၣ်တဖၣ်, ပဒိၣ်ဖးဒိၣ်တဖၣ်​ ဒီးပဒိၣ်လၢ အပတီၢ်ထီလၢ အအိၣ်ဖှိၣ်ဖဲန့ၣ်တဖၣ်+ ထံၣ်ဘၣ်ဝဲလၢ မ့ၣ်အူ တအီၣ်အဝဲသ့ၣ်​ အမိၢ်ပှၢ် နီတစဲးဘၣ်+ ဒီးအဝဲသ့ၣ်​ အခိၣ်ဆူၣ်​ တဘိဒၣ်လဲာ်န့ၣ်​ မ့ၣ်အူတအီၣ်ဝဲဘၣ်, ဒီးအဝဲသ့ၣ်​ အတၢ်ကူတၢ်ကၤတဖၣ်န့ၣ်​ တလီၤဆီထီၣ်​ နီတမံၤဘၣ်​ ဒီးအဝဲသ့ၣ်​ တနၢဃိ စ့ၢ်ကီးဘၣ်.

၂၈ ဒီးစီၤနဘူၤကးန့စၢ် တဲဝဲလၢ “မ်ပှၤစံးထီၣ်ပတြၢၤ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ+ အကစၢ်ယွၤ လၢအဆှၢလီၤ အမူခိၣ်ကလူး ဒီးမၤပူၤဖျဲး အခ့အပှၤတဖၣ်န့ၣ်တက့ၢ်. အခ့အပှၤတဖၣ်အံၤ နာ်န့ၢ်အကစၢ်ယွၤ ဒီးထီဒါ စီၤပၤအတၢ်မၤလိာ် ဘူၣ်ဝဲလီၤ. အဝဲသ့ၣ်​ ဘူၣ်ထီၣ်ဘါထီၣ်ထဲ အကစၢ်ယွၤ အဃိ လၢအဝဲသ့ၣ်​ ကမၤယွၤအဂၤအတၢ် ဒီးဘူၣ်ထီၣ်ဘါထီၣ်​ ယွၤအဂၤ အလီၢ်န့ၣ်​ အဝဲသ့ၣ်​ သးအိၣ်​ တူၢ်သံအသးလီၤ.+ ၂၉ ယွၤအဂၤလၢ အမၤပူၤဖျဲးတၢ်သ့ ဒ်အံၤန့ၣ်​ တအိၣ်နီတဂၤဘၣ်​ အဃိ ယကဟ့ၣ်လီၤ တၢ်ကလုၢ်လၢ ပှၤတဂၤဂ့ၤတဂၤဂ့ၤလၢ ပှၤဂီၢ်မုၢ်, ပှၤကလုာ် ဒီးပှၤလၢအတဲကျိာ် အကလုာ်ကလုာ်အကျါ လၢအတဲကမၣ်​ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ အကစၢ်ယွၤန့ၣ်​ အကဘၣ်​ တၢ်ဒီၣ်တဲာ်ကွံာ်အီၤ တကူာ်တကူာ် ဒီးအဟံၣ်ကကဲထီၣ်​ တၢ်ဟးလီၢ် လၢကမျၢၢ် အဂီၢ်လီၤ.”+

၃၀ ဒီးစီၤပၤ ပာ်ဒိၣ်ပာ်ထီ စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ လၢဘၤဘူၤလိၣ်​ အကီၢ်ရ့ၣ်​ အပူၤလီၤ.+

၄ “အဝဲအံၤမ့ၢ်ဝဲ တၢ်ကစီၣ်လၢ အဟဲလၢ စီၤပၤနဘူၤကးန့စၢ်အအိၣ်လၢ ကယဲၢ်ပှၤဂီၢ်မုၢ်တဖၣ်, ပှၤကလုာ်တဖၣ်​ ဒီးပှၤလၢအတဲကျိာ် အကလုာ်ကလုာ် လၢအအိၣ်လၢ ဟီၣ်ခိၣ်ဝးဝး အဂီၢ်လီၤ. မ်တၢ်ဃူတၢ်ဖိး အါအါဂီၢ်ဂီၢ် အိၣ်လၢသုကျါတက့ၢ်. ၂ ယအဲၣ်ဒိး ဒုးသ့ၣ်ညါသုလၢ တၢ်ပနီၣ်လီၤလး ဒီးတၢ်လီၤလိၢ်လီၤလးတဖၣ်လၢ ကစၢ်ယွၤလၢ အထီကတၢၢ်တဂၤ မၤန့ၢ်ယၤလီၤ. ၃ အတၢ်ပနီၣ်လီၤလးတဖၣ်န့ၣ်ဒိၣ်ဝဲ ဒီးအတၢ်မၤတဖၣ်န့ၣ်​ လီၤလိၢ်လီၤလးဝဲ ဒိၣ်မးလီၤ. အဘီအမုၢ်န့ၣ်​ အိၣ်ဝဲ လီၤထူလီၤယိာ် ဒီးအတၢ်ပၢတၢ်ပြးန့ၣ်​ အိၣ်ဝဲ အစိၤစိၤ အဃၣ်ဃၣ်လီၤ.+

၄ “ယၤ စီၤနဘူၤကးန့စၢ်န့ၣ်​ ယအိၣ်ဘၣ်​ မုာ်မုာ်ခုၣ်ခုၣ်​ လၢယဟံၣ်ပူၤ ဒီးတၢ်ခဲလၢာ် လဲၤအသး ဂ့ၤဂ့ၤဘၣ်ဘၣ်​ လၢယနီ* ပူၤလီၤ. ၅ ဘၣ်ဆၣ်​ ဘၣ်တဘျီန့ၣ်​ ယမံမီၢ် တၢ်မံမီၢ်လၢ အမၤပျံၤမၤဖုးယၤလီၤ. ဖဲယမံနီၤလၢ ယလီၢ်မံခိၣ်အခါ ယထံၣ်​ တၢ်ထံၣ်လၢညါခီတဖၣ်​ ဒီးတၢ်လၢအဟဲပၢၢ်ထီၣ်လၢ ယခိၣ်နူာ်ပူၤန့ၣ်​ မၤပျံၤမၤဖုးယၤလီၤ.+ ၆ အဃိ ယဟ့ၣ်လီၤ တၢ်ကလုၢ်လၢ ပှၤကဟဲကိး ဘၤဘူၤလိၣ်​ အပှၤကူၣ်ဘၣ်ကူၣ်သ့ခဲလၢာ် လၢယမဲာ်ညါ ဒ်သိး အဝဲသ့ၣ်​ ကတဲဘၣ်ယၤလၢ ယတၢ်မံမီၢ် အခီပညီလီၤ.+

၇ “ဖဲန့ၣ်န့ၣ်​ ပှၤအူတၢ်သမူတၢ်တဖၣ်,* ပှၤလၢအဆဲးကျိးဒီးပှၤသံတဖၣ်, ပှၤက့ၤစ့းဖိတဒူၣ်* ဒီးပှၤဒွးဆၣ်ဖိတဖၣ်+ ဟဲနုာ်ဝဲလီၤ. ဖဲယတဲဘၣ်​ အဝဲသ့ၣ်လၢ ယတၢ်မံမီၢ်အခါ အဝဲသ့ၣ်​ တဲဘၣ်ယၤ အခီပညီ တဘၣ်ဘၣ်.+ ၈ လၢခံကတၢၢ်န့ၣ်​ စီၤဒၤနံးယ့လး လၢအမံၤမ့ၢ်ဝဲ စီၤဘ့ၤလးတၡါစၢ်န့ၣ်+ ဟဲလၢယမဲာ်ညါလီၤ. တၢ်ကိးန့ၢ်အမံၤလၢ စီၤဘ့ၤလးတၡါစၢ် ဒ်ယယွၤ အမံၤအိၣ်ဝဲအသိးလီၤ.+ ဒီးယွၤစီဆှံတဖၣ်​ အစိအကမီၤ အိၣ်ဒီးအီၤ+ ဒီးယတဲဘၣ်အီၤလၢ ယတၢ်မံမီၢ်လီၤ.

၉ “‘ပှၤအူတၢ်သမူတၢ်တဖၣ်အခိၣ်+ စီၤဘ့ၤလးတၡါစၢ်ဧၢ, ယသ့ၣ်ညါလၢ ယွၤစီဆှံတဖၣ်​ အစိကမီၤအိၣ်လၢနပူၤ+ ဒီးတၢ်ခူသူၣ်လၢ နပာ်ဖျါထီၣ်​ အခီပညီ တဘၣ်ဘၣ်န့ၣ်​ တအိၣ်နီတမံၤဘၣ်.+ အဃိ တဲဘၣ်ယၤ တၢ်ထံၣ်လၢညါခီတဖၣ်​ လၢယထံၣ်ဘၣ်အီၤလၢ ယတၢ်မံမီၢ်အပူၤ အခီပညီတက့ၢ်.

၁၀ “‘ဖဲယအိၣ်လၢ ယလီၢ်မံခိၣ်အခါ ယထံၣ်ဘၣ်​ တၢ်ထံၣ်လၢညါခီတဖၣ်လီၤ. ယထံၣ်​ သ့ၣ်တထူၣ်လၢ+ ဟီၣ်ခိၣ်အခၢၣ်သး ဒီးသ့ၣ်တထူၣ်အံၤ ထီဝဲဒိၣ်မး.+ ၁၁ ဒီးသ့ၣ်တထူၣ်အံၤန့ၣ်​ ဒိၣ်ထီၣ်ဝဲ ဒီးအကျၢၤထီၣ်ဝဲ ဒီးအထီဝဲ တုၤလၢမူခိၣ်​ ဒီးပှၤကွၢ်စိအီၤ ဖျါတုၤလၢဟီၣ်ခိၣ်​ အနၢၣ်တဖၣ်​ အကတၢၢ်လီၤ. ၁၂ ဒီးအလၣ်တဖၣ်န့ၣ်​ ဃံလၤဝဲ ဒီးအသၣ်တဖၣ်​ အိၣ်ဝဲဒီဒူၣ်​ ဒီးယၢဝဲ* လၢ ပှၤဟီၣ်ခိၣ်ဖိ ဒီးဆၣ်ဖိကီၢ်ဖိခဲလၢာ် ကအီၣ်ဝဲ အဂီၢ်လီၤ. ဆၣ်ဖိကီၢ်ဖိတဖၣ်လၢ တၢ်ပျီပူၤန့ၣ်​ အိၣ်ကဒုလၢ အဖီလာ် ဒီးထိၣ်ဖိလံၣ်ဖိတဖၣ်လၢ မူခိၣ်န့ၣ်​ အိၣ်ဝဲဆိးဝဲလၢ အဒ့တဖၣ်အလိၤ ဒီးပှၤဟီၣ်ခိၣ်ဖိ ဒီးဆၣ်ဖိကီၢ်ဖိခဲလၢာ် အီၣ်ဝဲ သ့ၣ်အံၤအသၣ်လီၤ.

၁၃ “‘ဖဲယထံၣ်​ တၢ်ထံၣ်လၢညါခီတဖၣ်​ လၢယလီၢ်မံခိၣ်အခါ ယထံၣ်ဘၣ်​ ပှၤကွၢ်တၢ်ဖိ* တဂၤလၢအမ့ၢ် မူခိၣ်ကလူးစီဆှံန့ၣ်​ ဟဲလီၤလၢ မူခိၣ်လီၤ.+ ၁၄ အဝဲ ကိးပသူထီၣ်ဝဲလၢ “ကူာ်လီၤကွံာ် သ့ၣ်တထူၣ်န့ၣ်,+ ကျီတဲာ်ကွံာ် အဒ့တဖၣ်, သရုၤလီၤကွံာ် အလၣ်တဖၣ်​ ဒီးမၤလီၤပြံလီၤပြါ အသၣ်တက့ၢ်. မ်ဆၣ်ဖိကီၢ်ဖိတဖၣ်​ ဟးထီၣ်ကွံာ်လၢ အဖီလာ် ဒီးထိၣ်တဖၣ်​ ယူၤထီၣ်ကွံာ်လၢ အဒ့တဖၣ်​ အလိၤတက့ၢ်. ၁၅ မ့မ့ၢ် သ့ၣ်ခိၣ်ဆၢၣ်လၢ အဂံၢ် အိၣ်လၢဟီၣ်ခိၣ်လာ်အံၤန့ၣ်​ ကျီၤဃာ်အီၤလၢ ထးကွီၤဒီးတိၢ်ဘီကွီၤ ဒီးပာ်အီၤလၢနီၣ်ကျါ လၢတၢ်ပျီပူၤတက့ၢ်. မ်အဘၣ်စီၣ်လၢ မူခိၣ်အပစီၤထံ ဒီးမ်အအိၣ်ဝဲ တပူၤဃီဒီး ဆၣ်ဖိကီၢ်ဖိတဖၣ်​ လၢနီၣ်ဧိၤမံၤဧိၤ အကျါတက့ၢ်.+ ၁၆ ပှၤကညီအသး လၢအအိၣ်ဒီးအီၤန့ၣ်​ မ်အဆီတလဲလၢ ဆၣ်ဖိကီၢ်ဖိအသး ဒီးမ်နွံနံၣ်*+ လဲၤပူၤကွံာ်တက့ၢ်.+ ၁၇ ပှၤကွၢ်တၢ်ဖိတဖၣ်+ တဲဖျါထီၣ်​ တၢ်ဂ့ၢ်တခါန့ၣ်​ ဒီးမူခိၣ်ကလူးစီဆှံတဖၣ်​ ဘိးဘၣ်သ့ၣ်ညါဝဲ တၢ်ဆၢတဲာ်အံၤ* ဒ်သိး ပှၤလၢအမူတဖၣ်​ ကသ့ၣ်ညါလၢ တၢ်ထီကတၢၢ်တဂၤ မ့ၢ်ပှၤလၢအပၢ ပှၤဟီၣ်ခိၣ်ဖိအဘီမုၢ်+ ဒီးအဝဲ ကဟ့ၣ်လီၤ တၢ်ပၢတၢ်ပြးအံၤလၢ ပှၤလၢအအဲၣ်ဒိး ဟ့ၣ်လီၤဝဲတဂၤဂၤ ဒီးအကပာ်ထီၣ်​ ပှၤပိာ်ခွါလၢ အပတီၢ်ဖုၣ်ကတၢၢ်တဂၤ* လၢအတၢ်ပၢအံၤ အဖီခိၣ်လီၤ.”

၁၈ “‘အဝဲန့ၣ်​ မ့ၢ်ဝဲတၢ်လၢ ယၤ စီၤပၤ နဘူၤကးန့စၢ် ထံၣ်ဘၣ်ဝဲလၢ တၢ်မံမီၢ် အပူၤလီၤ. အိ စီၤဘ့ၤလးတၡါစၢ်ဧၢ, ပှၤကူၣ်ဘၣ်ကူၣ်သ့အဂၤတဖၣ်လၢ ယဘီမုၢ် အပူၤန့ၣ်​ တဲဘၣ်ယၤ တၢ်မံမီၢ်တခါအံၤ အခီပညီ တဘၣ်ဘၣ်​ အဃိ တဲဘၣ်ယၤ တၢ်မံမီၢ် အခီပညီတက့ၢ်.+ နအိၣ်ဒီး ယွၤစီဆှံတဖၣ်​ အစိအကမီၤအဃိ နမၤကသ့လီၤ.’

၁၉ “ဖဲန့ၣ်န့ၣ်​ စီၤဒၤနံးယ့လး လၢအမံၤမ့ၢ် စီၤဘ့ၤလးတၡါစၢ်န့ၣ်+ ပျံၤတၢ် ဒီးအသးလီၤကတုၤ တစိၢ်ဖိလီၤ.

“စီၤပၤတဲဝဲလၢ ‘အိ စီၤဘ့ၤလးတၡါစၢ်ဧၢ, ဘၣ်ဃးဒီး တၢ်မံမီၢ် ဒီးအခီပညီအဂ့ၢ်န့ၣ်​ တဘၣ်ပျံၤတၢ်ဖုးတၢ်တဂ့ၤ.’

“ဒီးစီၤဘ့ၤလးတၡါစၢ် တဲဆၢဝဲလၢ ‘အိ ယကစၢ်ဧၢ, ယဆၢလၢ တၢ်မံမီၢ်တခါအံၤ ကဘၣ်ဃးဒီး ပှၤလၢအသးဟ့နၤ ဒီးယဆၢလၢ တၢ်မံမီၢ်အခီပညီန့ၣ်​ ကဘၣ်ထွဲလိာ်သးဒီး နဒုၣ်နဒါတဖၣ်လီၤ.

၂၀ “‘သ့ၣ်ထူၣ်လၢ အဒိၣ်ထီၣ်ဝဲ ဒီးအကျၢၤထီၣ်ဝဲ ဒီးအထီဝဲ တုၤလၢမူခိၣ်​ ဒီးပှၤကွၢ်စိအီၤ ဖျါတုၤလၢဟီၣ်ခိၣ်​ အနၢၣ်တဖၣ်​ အကတၢၢ်+ ၂၁ ဒီးအလၣ်တဖၣ်န့ၣ်​ ဃံလၤဝဲ ဒီးအသၣ်တဖၣ်​ အိၣ်ဝဲဒီဒူၣ်​ ဒီးယၢဝဲလၢ ပှၤဟီၣ်ခိၣ်ဖိ ဒီးဆၣ်ဖိကီၢ်ဖိခဲလၢာ် ကအီၣ်ဝဲအဂီၢ် ဒီးဆၣ်ဖိကီၢ်ဖိတဖၣ်လၢ တၢ်ပျီပူၤ အိၣ်ကဒုလၢ အဖီလာ် ဒီးထိၣ်ဖိလံၣ်ဖိတဖၣ်လၢ မူခိၣ်​ အိၣ်ဝဲဆိးဝဲလၢ အဒ့တဖၣ်အလိၤန့ၣ်+ ၂၂ မ့ၢ်ဝဲနၤလီၤ. စီၤပၤဧၢ, မ့ၢ်လၢ နဒိၣ်ထီၣ်​ ဒီးဆူၣ်ထီၣ်​ ဒီးနလၤကပီၤန့ၣ်​ ဒိၣ်ထီၣ်ထီထီၣ်ဝဲ တုၤလၢမူခိၣ်+ ဒီးနတၢ်ပၢတၢ်ပြးန့ၣ်​ တုၤလၢ ဟီၣ်ခိၣ်အနၢၣ်​ အကတၢၢ် အဃိလီၤ.+

၂၃ “‘ဒီးစီၤပၤထံၣ်ဘၣ်​ ပှၤကွၢ်တၢ်ဖိလၢအမ့ၢ် မူခိၣ်ကလူး စီဆှံတဂၤ+ ဟဲလီၤလၢ မူခိၣ်​ ဒီးတဲဝဲလၢ “ကူာ်လီၤကွံာ် သ့ၣ်တထူၣ်န့ၣ်​ ဒီးမၤဟးဂီၤကွံာ်အီၤတက့ၢ်. ဘၣ်ဆၣ်​ သ့ၣ်ခိၣ်ဆၢၣ်လၢ အဂံၢ် အိၣ်လၢဟီၣ်ခိၣ်လာ်အံၤန့ၣ်​ ကျီၤဃာ်အီၤလၢ ထးကွီၤဒီးတိၢ်ဘီကွီၤ ဒီးပာ်အီၤလၢနီၣ်ကျါ လၢတၢ်ပျီပူၤတက့ၢ်. မ်အဘၣ်စီၣ်လၢ မူခိၣ်အပစီၤထံ ဒီးမ်အအိၣ်ဝဲ တပူၤဃီဒီး ဆၣ်ဖိကီၢ်ဖိတဖၣ်လၢ နီၣ်ဧိၤမံၤဧိၤအကျါ တုၤလၢ နွံနံၣ်လဲၤပူၤကွံာ်တက့ၢ်.”+ ၂၄ အိ စီၤပၤဧၢ, အဝဲအံၤမ့ၢ်ဝဲ တၢ်မံမီၢ် အခီပညီ ဒီးအမ့ၢ်ဝဲ တၢ်ထီကတၢၢ်တဂၤ အတၢ်စံၣ်ညီၣ်​ လၢအကလီၤဘၣ်​ ယကစၢ် စီၤပၤလီၤ. ၂၅ တၢ်ကနီဟးထီၣ်ကွံာ်နၤလၢ ပှၤဟီၣ်ခိၣ်ဖိအကျါ ဒီးနကအိၣ်​ တပူၤဃီဒီး ဆၣ်ဖိကီၢ်ဖိတဖၣ်လၢ အအိၣ်လၢ တၢ်ပျီပူၤလီၤ. ဒီးတၢ်ကဟ့ၣ်ဒုးအီၣ်နၤလၢ နီၣ်ဧိၤမံၤဧိၤ ဒ်ကျီၢ်ဖါအသိး ဒီးနကဘၣ်စီၣ်လၢ မူခိၣ်အပစီၤထံလီၤ.+ ဒီးတၢ်ဆၢကတီၢ် ကလဲၤပူၤကွံာ်+ နွံနံၣ်,*+ တုၤလၢ နသ့ၣ်ညါလၢ တၢ်ထီကတၢၢ်တဂၤ မ့ၢ်ပှၤလၢအပၢ ပှၤဟီၣ်ခိၣ်ဖိ အဘီမုၢ် ဒီးအဟ့ၣ်လီၤ တၢ်ပၢတၢ်ပြးလၢ ပှၤလၢအအဲၣ်ဒိး ဟ့ၣ်လီၤဝဲ တဂၤဂၤလီၤ.+

၂၆ “‘ဘၣ်ဆၣ်​ မ့ၢ်လၢ အဝဲသ့ၣ်​ မၢပှၤပာ်တ့ၢ် သ့ၣ်ခိၣ်ဆၢၣ်လၢ အအိၣ်ဒီးအဂံၢ်အဃိ+ ဖဲနသ့ၣ်ညါထီၣ်လၢ ကစၢ်ယွၤ ပၢတၢ်လၢမူခိၣ်​ ဝံၤအလီၢ်ခံ နကပၢဘၣ်ကဒါက့ၤနဘီမုၢ်လီၤ. ၂၇ အဃိ စီၤပၤဧၢ, ဝံသးစူၤ တူၢ်လိာ် ယတၢ်ဟ့ၣ်ကူၣ်တက့ၢ်. ဃၣ်ကွံာ်နသးလၢ နတၢ်ဒဲးဘး, မၤတၢ်လၢအဘၣ်, ဟးဆှဲး တၢ်တတီတလိၤ ဒီးပာ်ဖျါထီၣ်​ တၢ်သးကညီၤလၢ ပှၤဖှီၣ်ဖိယာ်ဖိ အဖီခိၣ်တက့ၢ်. နမ့ၢ်မၤဒ်န့ၣ်န့ၣ်​ ဘၣ်သ့ၣ်သ့ၣ်​ တၢ်ကဆဲးလဲၤအသးဒီးနၤ ဂ့ၤဂ့ၤဘၣ်ဘၣ်လီၤ.’”+

၂၈ တၢ်သ့ၣ်တဖၣ်န့ၣ်​ ခဲလၢာ် ဟဲဘၣ်​ စီၤပၤ နဘူၤကးန့စၢ်လီၤ.

၂၉ ဖဲအမံမီၢ်တၢ်ဝံၤ တဆံခံလါအလီၢ်ခံ ဘၣ်တဘျီ စီၤနဘူၤကးန့စၢ် ဟးလၢဘၤဘူၤလိၣ်​ အနီ* အခိၣ်ဒုး အလိၤလီၤ. ၃၀ စီၤပၤတဲဝဲလၢ “အဝဲအံၤမ့ၢ် ဝ့ၢ်ဘၤဘူၤလိၣ်​ လၢအဒိၣ်အမုၢ်လၢ ယတ့ထီၣ်လၢ ယနီၢ်ကစၢ် အဂံၢ်အဘါ ဒ်စီၤပၤ အတၢ်အိၣ်တၢ်ဆိးအလီၢ်အသိး လၢယကပာ်ဖျါထီၣ်​ ယလၤကပီၤ ဒီးယတၢ်ကဟုကညီၢ် အဂီၢ်လီၤ.”

၃၁ ဖဲစီၤပၤတဲဒံးတၢ်အခါန့ၣ်​ တၢ်ကလုၢ် ဟဲလီၤလၢမူခိၣ်တခါလၢ “အိ စီၤပၤ နဘူၤကးန့စၢ်ဧၢ, ကနၣ်လၢအံၤ ‘တၢ်ထုးထီၣ်ကွံာ် ဘီမုၢ်လၢ နအိၣ်လံ.+ ၃၂ တၢ်ကနီဟးထီၣ်ကွံာ်နၤလၢ ပှၤကျါ ဒီးနကအိၣ်​ တပူၤဃီဒီး ဆၣ်ဖိကီၢ်ဖိတဖၣ်လၢ အအိၣ်လၢ တၢ်ပျီပူၤလီၤ. ဒီးတၢ်ကဟ့ၣ်ဒုးအီၣ်နၤလၢ နီၣ်ဧိၤမံၤဧိၤ ဒ်ကျီၢ်ဖါအသိး ဒီးတၢ်ဆၢကတီၢ် ကလဲၤပူၤကွံာ် နွံနံၣ်, တုၤလၢ နသ့ၣ်ညါလၢ တၢ်ထီကတၢၢ်တဂၤ မ့ၢ်ပှၤလၢအပၢ ပှၤဟီၣ်ခိၣ်ဖိ အဘီမုၢ် ဒီးအဟ့ၣ်လီၤ တၢ်ပၢတၢ်ပြးလၢ ပှၤလၢအအဲၣ်ဒိး ဟ့ၣ်လီၤဝဲ တဂၤဂၤလီၤ.’”+

၃၃ တဘျီဃီန့ၣ်​ တၢ်ကဲထီၣ်အသးဒီး စီၤနဘူၤကးန့စၢ် ဒ်န့ၣ်လီၤ. အဝဲဘၣ်တၢ်နီဟးထီၣ်ကွံာ်အီၤ လၢပှၤဟီၣ်ခိၣ်ဖိအကျါ ဒီးအဝဲ အီၣ်ဝဲ နီၣ်ဧိၤမံၤဧိၤ ဒ်ကျီၢ်ဖါတဖၣ်အသိး ဒီးအဘၣ်စီၣ်လၢ မူခိၣ်အပစီၤထံ ဒီးအခိၣ်ဆူၣ်ထီထီၣ်​ ဒ်လံာ်ကြီကြာ် အဆူၣ်အသိး ဒီးအစုမ့ၣ်ခီၣ်မ့ၣ်တဖၣ်​ ကဲထီၣ်ဝဲ ဒ်သိးဒီး ထိၣ်အခီၣ်မ့ၣ်လီၤ.+

၃၄ “ဖဲတၢ်ဆၢကတီၢ် အဝဲန့ၣ်​ ပှဲၤထီၣ်အခါ+ ယကွၢ်ထီၣ်တၢ်လၢ မူခိၣ်​ ဒီးယသ့ၣ်ညါလီၤက့ၤယသးလီၤ. ဒီးယစံးထီၣ်ပတြၢၤ တၢ်ထီကတၢၢ်တဂၤ ဒီးယစံးထီၣ်ပတြၢၤ ဒီးမၤလၤကပီၤ ပှၤလၢအမူဝဲ လီၤထူလီၤယိာ်တဂၤ မ့ၢ်လၢ အတၢ်ပၢတၢ်ပြးန့ၣ်​ အိၣ်ဝဲလီၤထူလီၤယိာ် ဒီးအဘီအမုၢ်န့ၣ်​ အိၣ်ဝဲ အစိၤစိၤ အဃၣ်ဃၣ်​ အဃိလီၤ.+ ၃၅ ပှၤမ့ၢ်ထိၣ်သတြီၤ ကစၢ်ယွၤ ဒီးပှၤဟီၣ်ခိၣ်ဖိတဖၣ်န့ၣ်​ ပှၤဟီၣ်ခိၣ်ဖိတဖၣ်​ တမ့ၢ်တၢ်နီတမံၤဘၣ်. ဒီးအဝဲမၤဝဲ မူခိၣ်အသုးမုၢ်ဂီၢ်မုၢ် ဒီးပှၤလၢအအိၣ်လၢ ဟီၣ်ခိၣ်ချၢတဖၣ်​ ဒ်အတၢ်ဘၣ်သး အိၣ်ဝဲအသိးလီၤ. ပှၤလၢ အတြီအီၤသ့+ ဒီးပှၤလၢအကတဲအီၤလၢ ‘နဟးမၤမနုၤလဲၣ်’ န့ၣ်​ တအိၣ်နီတဂၤဘၣ်.+

၃၆ “ဖဲန့ၣ်အဆၢကတီၢ် ယသ့ၣ်ညါလီၤက့ၤယသး ဒီးယန့ၢ်ဘၣ်က့ၤ ယဘီမုၢ် အလၤကပီၤ, ယတၢ်လၤကပီၤ ဒီးယတၢ်ကဟုကညီၢ်လီၤ.+ ဒီးပဒိၣ်လၢ အပတီၢ်ထီတဖၣ်​ ဒီးပှၤဒိၣ်ပှၤပှၢ်တဖၣ်န့ၣ်​ ဟဲတၢၣ်ပီၣ်တၢၣ်ပီကဒီးတၢ်ဒီးယၤ ဒီးယပၢဘၣ်ကဒီးတၢ် လၢအသီတဘျီ ဒီးယဒိးန့ၢ်ဘၣ်​ တၢ်လၤကပီၤ အါန့ၢ်ဒံးလၢညါလီၤ.

၃၇ “ယၤ စီၤနဘူၤကးန့စၢ်န့ၣ်​ ယစံးထီၣ်ပတြၢၤ ဒီးမၤလၤကပီၤ မူခိၣ်အစီၤပၤ+ မ့ၢ်လၢ အတၢ်မၤတဖၣ်န့ၣ်​ မ့ၢ်ဝဲတီဝဲ ဒီးအကျဲတဖၣ်န့ၣ်​ တီဝဲလိၤဝဲ+ ဒီးအမၤမဲာ်ဆှး ပှၤလၢ အပာ်ထီၣ်ထီအသး သ့ဝဲအဃိလီၤ.”+

၅ စီၤပၤဘ့ၤလၡါစၢ်+ မၤဝဲ တၢ်အီၣ်အမူးဖးဒိၣ်လၢ အပှၤဒိၣ်ပှၤပှၢ် တကထိ အဂီၢ်လီၤ. ဒီးအဝဲအီဝဲ စပံးထံလၢ ပှၤတဖၣ်န့ၣ်​ အမဲာ်ညါလီၤ.+ ၂ ဖဲစီၤပၤဘ့ၤလၡါစၢ် မူၤစပံးထံအခါ အဝဲ ဟ့ၣ်လီၤတၢ်ကလုၢ်လၢ ပှၤကဟဲစိာ်နုာ် ထံခွးထူ ဒီးထံခွးစ့တဖၣ်​ လၢအပၢ်* စီၤနဘူၤကးန့စၢ် ဟဲက့ၤစိာ်ဝဲလၢ ဝ့ၢ်ယရူၤၡလ့ၣ်အတၢ်လုၢ်ဟံၣ်လီၤ.+ အဝဲမၢ ပှၤမၤဝဲဒ်န့ၣ်​ ဒ်သိး အဝဲ ဒီးအပှၤဒိၣ်ပှၤပှၢ်တဖၣ်, အသံၣ်မါတဖၣ်* ဒီးအမါလၢ အဂၤတဖၣ်​ ကအီတၢ်ဒီး ထံခွးတဖၣ်န့ၣ်​ အဂီၢ်လီၤ. ၃ ဒီးအဝဲသ့ၣ်​ ဟဲစိာ်ဝဲ ထံခွးထူတဖၣ်လၢ အဘၣ်တၢ်ဟံးန့ၢ်အီၤလၢ ကစၢ်ယွၤအဟံၣ်​ အတၢ်ဘူၣ်ထီၣ်ဘါထီၣ်အလီၢ် လၢအအိၣ်ဝဲလၢ ဝ့ၢ်ယရူၤၡလ့ၣ်အပူၤလီၤ. ဒီးစီၤပၤ ဒီးအပှၤဒိၣ်ပှၤပှၢ်တဖၣ်, စီၤပၤအသံၣ်မါတဖၣ်​ ဒီးအမါလၢအဂၤတဖၣ်​ အီတၢ်ဒီးထံခွးထူတဖၣ်န့ၣ်လီၤ. ၄ အဝဲသ့ၣ်​ အီစပံးထံ ဒီးစံးထီၣ်ပတြၢၤဝဲ ယွၤထူ, ယွၤစ့, ယွၤတိၢ်ဘီ, ယွၤထး, ယွၤသ့ၣ်​ ဒီးယွၤလၢၢ်တဖၣ်လီၤ.

၅ တဘျီဃီန့ၣ်​ ပှၤအစုတခီ အိၣ်ဖျါထီၣ်​ ဒီးကွဲးဝဲတၢ်လၢ စီၤပၤအနီ* အတၢ်ဒူၣ်ကပၤ လၢအအိၣ်ဘူးဒီး မ့ၣ်အူဒၢန့ၣ်လီၤ. ဒီးစီၤပၤထံၣ်ဘၣ်ဝဲ ပှၤစုတခီအံၤ ကွဲးတၢ်လီၤ. ၆ ဖဲန့ၣ်န့ၣ်​ စီၤပၤ အမဲာ်သၣ်လီၤဝါ ဒီးအပျံၤတၢ်ဒိၣ်မး တုၤလၢ အခီၣ်အဂံၢ်လီၤစၢ်+ ဒီးအခီၣ်လ့ၢ်ခိၣ်စ့ၢ်ကီး ကနိးဒီးဘၣ်ထံးလိာ်သးလီၤ.

၇ စီၤပၤကိးထီၣ်လၢ အကလုၢ်ဖးဒိၣ်​ ဒ်သိးကကိးဖှိၣ်ဝဲ ပှၤလၢအဆဲးကျိးဒီးပှၤသံ, ပှၤက့ၤစ့းဖိတဒူၣ်* ဒီးပှၤဒွးဆၣ်ဖိတဖၣ်လီၤ.+ ဒီးစီၤပၤတဲဘၣ်​ ဘၤဘူၤလိၣ်​ အပှၤကူၣ်ဘၣ်ကူၣ်သ့တဖၣ်လၢ “ပှၤလၢအဖးတၢ်ကွဲးအသးအံၤ ဒီးတဲဘၣ်ယၤလၢ အခီပညီမ့ၢ်ဘၣ်န့ၣ်​ ကဘၣ်တၢ်ဒုးကူဒုးသိးထီၣ်အီၤလၢ တၢ်အလွဲၢ်လုး, ဒုးလံာ်အီၤလၢဖဲထူ+ ဒီးအကကဲထီၣ်​ ပှၤအဒိၣ်ကတၢၢ်သၢဂၤတဂၤလၢ အပၢတၢ်လၢ ဘီမုၢ်အံၤအပူၤလီၤ.”+

၈ ဒီးစီၤပၤ အပှၤကူၣ်ဘၣ်ကူၣ်သ့ ခဲလၢာ်ဟဲနုာ်လီၤဝဲ ဘၣ်ဆၣ်​ အဝဲသ့ၣ်​ ဖးဝဲတၢ်ကွဲးအသးအံၤ တဘၣ်ဘၣ်​ ဒီးတဲဘၣ်စီၤပၤ အခီပညီတဘၣ်စ့ၢ်ကီးဘၣ်.+ ၉ အဃိ စီၤပၤဘ့ၤလၡါစၢ် ပျံၤတၢ်ဖုးတၢ်ဒိၣ်မး ဒီးအမဲာ်သၣ်လီၤဝါလီၤ. ဒီးအပှၤဒိၣ်ပှၤပှၢ်တဖၣ်​ အခိၣ်နူာ်ဘံဘူဝဲလီၤ.+

၁၀ ဖဲနီၢ်ပၤမုၣ်​ နၢ်ဟူဝဲ တၢ်လၢ စီၤပၤ ဒီးအပှၤဒိၣ်ပှၤပှၢ်တဖၣ်​ တဲဝဲအခါ အဝဲဟဲနုာ်လီၤဝဲလၢ တၢ်အီၣ်အဒၢးပူၤလီၤ. ဒီးအဝဲတဲဝဲလၢ “အိ စီၤပၤဧၢ, မ်နအိၣ်မူ လီၤထူလီၤယိာ်တက့ၢ်. ဘၣ်မနုၤအဃိ နမဲာ်သၣ်လီၤဝါလဲၣ်. တလိၣ်ပျံၤတၢ်ဘၣ်. ၁၁ လၢနဘီမုၢ်အပူၤန့ၣ်​ ပှၤအိၣ်ဝဲတဂၤလၢ ယွၤလၢအစီဆှံတဖၣ်​ အစိကမီၤအိၣ်ဝဲဒီးအီၤလီၤ. လၢနပၢ် အစိၤန့ၣ်​ ပှၤထံၣ်ဘၣ်လၢ ပှၤတဂၤအံၤအိၣ်ဒီး တၢ်သ့ၣ်ညါနၢ်ပၢၢ်, တၢ်သူၣ်ဆးသးဆး ဒီးတၢ်ကူၣ်သ့ ဒ်ယွၤတဖၣ်​ အတၢ်ကူၣ်သ့ အိၣ်ဝဲအသိးလီၤ.+ နပၢ် စီၤနဘူၤကးန့စၢ်န့ၣ်​ ပာ်ထီၣ်အီၤလၢ ပှၤအူတၢ်သမူတၢ်,* ပှၤလၢအဆဲးကျိးဒီးပှၤသံတဖၣ်, ပှၤက့ၤစ့းဖိတဖၣ်​ ဒီးပှၤဒွးဆၣ်ဖိတဖၣ်​ အခိၣ်လီၤ.+ စီၤပၤဧၢ, လၢညါန့ၣ်​ နပၢ်မၤဝဲဒ်န့ၣ်လီၤ. ၁၂ စီၤဒၤနံးယ့လး လၢစီၤပၤ နဘူၤကးန့စၢ် ကိးန့ၢ်အမံၤလၢ စီၤဘ့ၤလးတၡါစၢ်န့ၣ်+ အခိၣ်နူာ်ဖၠဲးမး, ဒီးအအိၣ်ဒီး တၢ်သ့ၣ်ညါ ဒီးတၢ်သူၣ်ဆးသးဆး လၢကဖးတၢ်မံမီၢ်တဖၣ်​ အခီပညီ, ကတဲဖျါထီၣ်​ တၢ်ကတိၤလီၤဘၢတဖၣ်​ ဒီးကမၤဘၣ်ဂီၢ်က့ၤ တၢ်ဂ့ၢ်ကီ လၢအဘံဘူတဖၣ်​ အဂီၢ်လီၤ.+ အဃိ မၢပှၤလဲၤကိး စီၤဒၤနံးယ့လး ဒီးအကတဲဘၣ်နၤ တၢ်ဂ့ၢ်တခါအံၤ အခီပညီလီၤ.”

၁၃ အဃိ ပှၤဟဲကိး စီၤဒၤနံးယ့လးလၢ စီၤပၤအအိၣ်လီၤ. ဒီးစီၤပၤသံကွၢ် စီၤဒၤနံးယ့လးလၢ “မ့ၢ်နကဲ စီၤဒၤနံးယ့လးလၢ ပှၤဟဲက့ၤဖီၣ်န့ၢ်အီၤလၢ ယူဒၤ+ ခီဖျိလၢ ယပၢ်လၢအမ့ၢ်တ့ၢ်စီၤပၤ ဟ့ၣ်လီၤတၢ်ကလုၢ်အဃိ န့ၣ်ဧါ.+ ၁၄ ယနၢ်ဟူဘၣ်လၢ နအိၣ်ဒီး ယွၤတဖၣ်​ အစိကမီၤ,+ တၢ်သ့ၣ်ညါနၢ်ပၢၢ်, တၢ်သူၣ်ဆးသးဆး ဒီးနကူၣ်တၢ်သ့ဒိၣ်မးလီၤ.+ ၁၅ ပှၤဟဲကိး ပှၤကူၣ်ဘၣ်ကူၣ်သ့ ဒီးပှၤလၢအဆဲးကျိးဒီးပှၤသံတဖၣ်​ လၢယမဲာ်ညါ ဒ်သိး ကဖးဝဲတၢ်ကွဲးအသးအံၤ ဒီးတဲဘၣ်ယၤလၢ အခီပညီလီၤ. ဘၣ်ဆၣ်​ အဝဲသ့ၣ်​ တဲဘၣ်ယၤ တၢ်ကစီၣ်တခါအံၤ အခီပညီတဘၣ်ဘၣ်.+ ၁၆ ဘၣ်ဆၣ်​ ယနၢ်ဟူဘၣ်လၢ နတဲဖျါထီၣ်​ တၢ်ခူသူၣ်​ အခီပညီ+ ဒီးတၢ်ဂ့ၢ်ကီ လၢအဘံဘူတဖၣ်​ ဘၣ်ဝဲလီၤ. နဖးန့ၢ်ယၤ တၢ်ကွဲးအသးအံၤ ဒီးတဲဘၣ်ယၤ အခီပညီမ့ၢ်ဘၣ်န့ၣ်​ ပှၤက ဒုးကူဒုးသိးထီၣ်နၤလၢ တၢ်အလွဲၢ်လုး, ဒုးလံာ်နၤလၢဖဲထူ ဒီးနကကဲထီၣ်​ ပှၤအဒိၣ်ကတၢၢ်သၢဂၤတဂၤလၢ အပၢတၢ်လၢ ဘီမုၢ်အံၤအပူၤလီၤ.”+

၁၇ စီၤဒၤနံးယ့လး တဲဆၢက့ၤစီၤပၤလၢ “ပာ်ဃာ် နတၢ်ဟ့ၣ်​ လၢနအိၣ်​ ဒီးဟ့ၣ်လီၤပှၤဂၤန့ၣ်. ဘၣ်ဆၣ်​ ယကဖးန့ၢ်နၤ တၢ်ကွဲးအသးအံၤ ဒီးတဲဘၣ်နၤ အခီပညီလီၤ. ၁၈ အိ စီၤပၤဧၢ, ကစၢ်ယွၤလၢ အထီကတၢၢ်တဂၤန့ၣ်​ ဟ့ၣ်လီၤနပၢ် စီၤနဘူၤကးန့စၢ်လၢ ဘီမုၢ်, တၢ်ဒိၣ်တၢ်မုၢ်, တၢ်လၤတၢ်ကပီၤ ဒီးတၢ်ကဟုကညီၢ်လီၤ.+ ၁၉ မ့ၢ်လၢ ကစၢ်ယွၤ ဟ့ၣ်လီၤအီၤ တၢ်ဒိၣ်တၢ်မုၢ်အဃိ ကယဲၢ်ပှၤဂီၢ်မုၢ်တဖၣ်, ပှၤကလုာ်တဖၣ်​ ဒီးပှၤလၢအတဲကျိာ် အကလုာ်ကလုာ်န့ၣ်​ ပျံၤတၢ်ဒီးကနိးကစုာ်လၢ အမဲာ်ညါလီၤ.+ ပှၤလၢအအဲၣ်ဒိး မၤသံဝဲန့ၣ်​ အမၤသံဝဲ ဒီးပှၤလၢအအဲၣ်ဒိး ပာ်မူဝဲန့ၣ်​ အပာ်မူဝဲလီၤ. ဒီးပှၤလၢ အအဲၣ်ဒိး ပာ်ထီၣ်ထီဝဲန့ၣ်​ အပာ်ထီၣ်ထီဝဲ ဒီးပှၤလၢအအဲၣ်ဒိး ဆီၣ်လီၤဝဲန့ၣ်​ အဆီၣ်လီၤဝဲလီၤ.+ ၂၀ ဘၣ်ဆၣ်​ ဖဲအဝဲ ပာ်ထီၣ်ထီအသး ဒီးအခိၣ်ကိၤထီၣ်အခါ အဝဲမၤတၢ်လၢ တၢ်ပာ်ထီၣ်ထီသးအပူၤအဃိ+ အဘၣ်တၢ် ပာ်လီၤကွံာ်အီၤလၢ အဘီအမုၢ် အလီၢ်ပစိာ် ဒီးတၢ်ထုးထီၣ်ကွံာ် အလၤကပီၤလီၤ. ၂၁ ဒီးအဘၣ်တၢ်နီဟးထီၣ်ကွံာ်အီၤ လၢပှၤကျါ ဒီးအသးကဲထီၣ်ဒ် ဆၣ်ဖိကီၢ်ဖိအသး ဒီးအအိၣ်ဝဲတပူၤဃီဒီး ကသ့ၣ်ယီၤမံၤတဖၣ်လီၤ. ဒီးအဝဲအီၣ်ဝဲ နီၣ်ဧိၤမံၤဧိၤ ဒ်ကျီၢ်ဖါတဖၣ်အသိး ဒီးဘၣ်စီၣ်လၢ မူခိၣ်အပစီၤထံ, တုၤလၢ အသ့ၣ်ညါဝဲလၢ ကစၢ်ယွၤလၢ အထီကတၢၢ်တဂၤ မ့ၢ်ပှၤလၢအပၢ ပှၤဟီၣ်ခိၣ်ဖိအဘီမုၢ် ဒီးအဟ့ၣ်လီၤ တၢ်ပၢတၢ်ပြးလၢ ပှၤလၢအအဲၣ်ဒိး ဟ့ၣ်လီၤဝဲ တဂၤဂၤလီၤ.+

၂၂ “ဘၣ်ဆၣ်​ မ့မ့ၢ်နၤ စီၤပၤဘ့ၤလၡါစၢ် လၢအမ့ၢ် စီၤနဘူၤကးန့စၢ် အဖိခွါန့ၣ်* နသ့ၣ်ညါ တၢ်ဂ့ၢ်တဖၣ်န့ၣ်ခဲလၢာ် ဘၣ်ဆၣ်​ နတဆီၣ်လီၤနသးဘၣ်. ၂၃ နပာ်ထီၣ်ထီနသး လၢမူခိၣ်ကစၢ် အဖီခိၣ်+ ဒီးနမၢ ပှၤဟဲစိာ်န့ၢ်နၤ အဟံၣ်​ အထံခွးတဖၣ်လီၤ.+ ဒီးနၤ ဒီးနပှၤဒိၣ်ပှၤပှၢ်တဖၣ်, နသံၣ်မါတဖၣ်​ ဒီးနမါလၢအဂၤတဖၣ်​ အီစပံးထံဒီးထံခွးတဖၣ်န့ၣ်​ ဒီးစံးထီၣ်ပတြၢၤ ယွၤထူ, ယွၤစ့, ယွၤတိၢ်ဘီ, ယွၤထး, ယွၤသ့ၣ်​ ဒီးယွၤလၢၢ်တဖၣ်​ လၢအမ့ၢ် ယွၤလၢအတထံၣ်တၢ်, အတနၢ်ဟူတၢ် ဒီးအတသ့ၣ်ညါတၢ် နီတမံၤဘၣ်န့ၣ်လီၤ.+ ဘၣ်ဆၣ်​ နတမၤလၤကပီၤ ကစၢ်ယွၤလၢ နသးသမူ+ အိၣ်လၢအစုပူၤ တဂၤန့ၣ်ဘၣ်. ၂၄ အဃိအဝဲ ဆှၢလီၤ စုတခီန့ၣ်​ ဒီးမၢအကွဲးတၢ်လီၤ.+ ၂၅ ဒီးတၢ်လၢအကွဲးဝဲန့ၣ်​ မ့ၢ်ဝဲ မန့ၤ, မန့ၤ, တက့လး ဒီးပၢ်စံၣ်လီၤ.

၂၆ “တၢ်ကတိၤလၢအမ့ၢ် မန့ၤန့ၣ်​ အခီပညီမ့ၢ်ဝဲ ကစၢ်ယွၤဂံၢ်နဘီမုၢ် အမုၢ်နံၤမုၢ်သီတဖၣ်​ ဒီးမၤကတၢၢ်ကွံာ် နဘီမုၢ်လံ.+

၂၇ “တက့လးန့ၣ်​ မ့ၢ်ဝဲ တၢ်စီၤနၤလၢ စီၤပီၢ်အပူၤလံ ဒီးနတယၢၢ်ဖှံတလၢလီၤ.

၂၈ “ပရ့ၣ်န့ၣ်​ အခီပညီ မ့ၢ်ဝဲ နဘီမုၢ်န့ၣ်​ ဘၣ်တၢ်မၤလီၤဖးအီၤ ဒီးဘၣ်တၢ်ဟ့ၣ်လီၤအီၤလၢ မၤဒဲ ဒီးဖၢၡၢၣ်​ အစုပူၤလံ.”+

၂၉ ဒီးစီၤပၤဘ့ၤလၡါစၢ် ဟ့ၣ်လီၤတၢ်ကလုၢ်လၢ ပှၤကဒုးကူဒုးသိးထီၣ်​ စီၤဒၤနံးယ့လးလၢ တၢ်အလွဲၢ်လုး, ဒုးလံာ်ထီၣ်အီၤလၢဖဲထူ ဒီးပှၤဘိးဘၣ်သ့ၣ်ညါဝဲလၢ အဝဲကကဲထီၣ်​ ပှၤအဒိၣ်ကတၢၢ် သၢဂၤတဂၤလၢ အပၢတၢ်လၢ ဘီမုၢ်အပူၤလီၤ.+

၃၀ ဖဲတၢ်တနၤန့ၣ်​ ပှၤက့ၤစ့းဖိအစီၤပၤ ဘ့ၤလၡါစၢ် ဘၣ်တၢ်မၤသံအီၤလီၤ.+ ၃၁ ဒီးပှၤမၤဒဲဖိ စီၤဒၤရယါဝ့ၣ်+ မၤန့ၢ်ဝဲ ဘီမုၢ် ဒီးအသးနံၣ်ကအိၣ်ဝဲ ၆၂ နံၣ်လီၤ.

၆ စီၤဒၤရယါဝ့ၣ်​ ပာ်လီၤအသးလၢ အကပာ်ထီၣ်​ ကီၢ်ရ့ၣ်အပဒိၣ်ဖးဒိၣ်​ အဂၤ ၁၂၀ လၢအဘီမုၢ် ဒီဘ့ၣ်ညါ အပူၤလီၤ.+ ၂ ဒီးစီၤပၤပာ်ထီၣ်​ ပှၤခိၣ်ပှၤနၢ်ဖးဒိၣ်​ သၢဂၤလၢ ကီၢ်ရ့ၣ်​ အပဒိၣ်ဖးဒိၣ်တဖၣ်​ အဖီခိၣ်​ ဒီးစီၤဒၤနံးယ့လးန့ၣ်+ ပၣ်ဃုာ်လၢ ပှၤသၢဂၤအံၤ အကျါလီၤ. ဒီးဒ်သိး စီၤပၤအတၢ် သုတၡူ နီတမံၤတဂ့ၤအဂီၢ် ကီၢ်ရ့ၣ်အပဒိၣ်ဖးဒိၣ်တဖၣ်န့ၣ်+ ကဘၣ်လဲၤတီၣ်ဖျါထီၣ်​ တၢ်ဂ့ၢ်ခဲလၢာ်လၢ ပှၤခိၣ်ပှၤနၢ်ဖးဒိၣ်​ သၢဂၤန့ၣ်​ အအိၣ်လီၤ. ၃ စီၤဒၤနံးယ့လး အခိၣ်နူာ်ဖၠဲးမးအဃိ အဝဲအိၣ်ဒီး တၢ်သ့တၢ်ဘၣ်အါန့ၢ်ဒံး+ ပှၤခိၣ်ပှၤနၢ်ဖးဒိၣ်​ အဂၤခံဂၤန့ၣ်​ ဒီးကီၢ်ရ့ၣ်​ အပဒိၣ်ဖးဒိၣ်တဖၣ်လီၤ. အဃိ စီၤပၤ အဲၣ်ဒိးပာ်ထီၣ်အီၤလၢ ဘီမုၢ်ဒီဘ့ၣ်​ အဖီခိၣ်လီၤ.

၄ ဖဲန့ၣ်အဆၢကတီၢ် ပှၤခိၣ်ပှၤနၢ်ဖးဒိၣ်ခံဂၤန့ၣ်​ ဒီးကီၢ်ရ့ၣ်​ အပဒိၣ်ဖးဒိၣ်တဖၣ်​ ဃုတၢ်ဂ့ၢ်လၢ ကပာ်ဒ့ၣ်ပာ်ကမၣ်​ စီၤဒၤနံးယ့လး လၢအဘၣ်ဃးဒီး အတၢ်ဖံးတၢ်မၤ လၢဘီမုၢ်အပူၤလီၤ. ဘၣ်ဆၣ်​ မ့ၢ်လၢ စီၤဒၤနံးယ့လး မ့ၢ်ပှၤလၢ ပှၤနာ်န့ၢ်အီၤသ့ ဒီးအမၤလၢပှဲၤအမူဒါဂ့ၤဂ့ၤထီဘိ ဒီးအတမၤ တၢ်တတီတလိၤဘၣ်အဃိ အဝဲသ့ၣ်​ တထံၣ်န့ၢ် တၢ်ပာ်ဒ့ၣ်ပာ်ကမၣ်အလီၢ် ဒီးအတၢ်မၤလၢ အတတီတလိၤ နီတမံၤဘၣ်. ၅ အဃိ အဝဲသ့ၣ်​ တဲဝဲလၢ “မ့တမ့ၢ် တၢ်ဂ့ၢ်လၢ ဘၣ်ဃးဒီး အကစၢ်ယွၤ အတၢ်သိၣ်တၢ်သီဘၣ်န့ၣ်​ ပဃုတၢ်ဂ့ၢ်လၢ ပကပာ်ဒ့ၣ်ပာ်ကမၣ်​ စီၤဒၤနံးယ့လး တဘၣ်ဘၣ်.”+

၆ ဒီးပှၤခိၣ်ပှၤနၢ်ဖးဒိၣ်ခံဂၤအံၤ ဒီးကီၢ်ရ့ၣ်​ အပဒိၣ်ဖးဒိၣ်တဖၣ်​ လဲၤဝဲလၢ စီၤပၤအအိၣ်​ တပူၤဃီ ဒီးတဲဝဲလၢ “အိ စီၤပၤ ဒၤရယါဝ့ၣ်ဧၢ, မ်နအိၣ်မူဘၣ်​ လီၤထူလီၤယိာ် တက့ၢ်. ၇ ဘီမုၢ်အပှၤခိၣ်ပှၤနၢ်ဖးဒိၣ်တဖၣ်, ပဒိၣ်တဖၣ်, ကီၢ်ရ့ၣ်​ အပဒိၣ်ဖးဒိၣ်တဖၣ်, ဘီမုၢ်အပဒိၣ်လၢ အပတီၢ်ထီ ဒီးပဒိၣ်ဖးဒိၣ်တဖၣ်​ တၢၣ်ပီၣ်သကိးတၢ်ဝံၤလံ ဒီးပသးလီၤပလိာ်လိာ်သးလၢ စီၤပၤ ကထုးထီၣ်​ တၢ်ကလုၢ်တမံၤ ဒီးကဖီၣ်ဃံး တၢ်သိၣ်တၢ်သီ တခါအံၤလီၤ. ပအဲၣ်ဒိးလၢ တၢ်သိၣ်တၢ်သီ ကတဲဝဲလၢ လၢအသီ ၃၀ အတီၢ်ပူၤန့ၣ်​ ပှၤကဘၣ်ဃ့ထီၣ်တၢ်ထဲလၢ နအိၣ်လီၤ. ပှၤတဂၤဂ့ၤတဂၤဂ့ၤလၢ အဃ့ထီၣ်တၢ်လၢ ယွၤတဂၤဂၤ မ့တမ့ၢ် ပှၤအဂၤတဂၤဂၤအအိၣ်န့ၣ်​ ကဘၣ်တၢ်ကွံာ်လီၤအီၤလၢခ့ယုၢ် အကပိၤပူၤလီၤ.+ ၈ အိ စီၤပၤဧၢ, ထုးထီၣ်​ တၢ်ကလုၢ်အံၤ ဒီးဆဲးလီၤနမံၤတက့ၢ်.+ နမ့ၢ်မၤဒ်န့ၣ်န့ၣ်​ ဒ်မၤဒဲ ဒီးဖၢၡၢၣ်​ အတၢ်သိၣ်တၢ်သီ လၢအဆီတလဲအသး တသ့ဘၣ်​ အိၣ်ဝဲအသိး ပှၤဆီတလဲ တၢ်သိၣ်တၢ်သီတခါန့ၣ်​ တသ့လၢၤဘၣ်.”+

၉ အဃိ စီၤပၤ ဒၤရယါဝ့ၣ်​ ဆဲးလီၤအမံၤလၢ တၢ်ကလုၢ် ဒီးတၢ်သိၣ်တၢ်သီအံၤအဂီၢ်လီၤ.

၁၀ ဖဲစီၤဒၤနံးယ့လး သ့ၣ်ညါဝဲလၢ စီၤပၤဆဲးလီၤအမံၤလၢ တၢ်သိၣ်တၢ်သီအံၤအဂီၢ် အခါ အဝဲက့ၤလၢအဟံၣ်​ လၢအအိၣ်ဒီး ဒၢးလၢဟံၣ်ခိၣ်ဒုး ဒီးဒၢးတဖျၢၣ်အံၤ အပဲတြီဖိတဖၣ်န့ၣ်​ အိးထီၣ်အသးလၢ ဝ့ၢ်ယရူၤၡလ့ၣ်​ တကပၤလီၤ.+ ဒီးအဝဲ ချံးလီၤအခီၣ်, ဃ့ဘါထုကဖၣ်​ ဒီးစံးထီၣ်ပတြၢၤ ကစၢ်ယွၤ တနံၤသၢဘျီ ဒ်အမၤညီနုၢ်ဝဲ လၢညါအသိးလီၤ. ၁၁ ဖဲန့ၣ်အခါ ပှၤပိာ်ခွါတဖၣ်န့ၣ်​ သဖှိလဲၤနုာ်လီၤလၢ စီၤဒၤနံးယ့လး အဟံၣ်ပူၤ သတူၢ်ကလာ် ဒီးထံၣ်ဘၣ်ဝဲလၢ စီၤဒၤနံးယ့လး ဃ့ဘါထုကဖၣ်​ ဒီးဃ့ကညးတၢ်လၢ အကစၢ်ယွၤ အအိၣ်လီၤ.

၁၂ အဃိ အဝဲသ့ၣ်​ လဲၤလၢစီၤပၤအအိၣ်​ ဒီးတဲသ့ၣ်နီၣ်အီၤလၢ စီၤပၤအတၢ်သိၣ်တၢ်သီ ဒီးတဲဝဲလၢ “အိ စီၤပၤဧၢ, တၢ်သိၣ်တၢ်သီ အိၣ်ဝဲလၢ လၢအသီ ၃၀ အတီၢ်ပူၤ ပှၤကဘၣ်ဃ့ထီၣ်တၢ်ထဲလၢ နအိၣ်လီၤ. ပှၤတဂၤဂ့ၤတဂၤဂ့ၤလၢ အဃ့ထီၣ်တၢ်လၢ ယွၤတဂၤဂၤ မ့တမ့ၢ် ပှၤအဂၤတဂၤဂၤအအိၣ်န့ၣ်​ ကဘၣ်တၢ်ကွံာ်လီၤအီၤလၢခ့ယုၢ် အကပိၤပူၤလီၤ. ဒီးနဆဲးလီၤနမံၤလၢ တၢ်သိၣ်တၢ်သီတခါအံၤအဂီၢ် တမ့ၢ်ဧီၤ.” စီၤပၤ တဲဆၢဝဲလၢ “တၢ်ဂ့ၢ်တခါန့ၣ်​ ဘၣ်တၢ်ပာ်ဂၢၢ်ပာ်ကျၢၤအီၤဂ့ၤဂ့ၤ ဒ်မၤဒဲ ဒီးဖၢၡၢၣ်​ အတၢ်သိၣ်တၢ်သီ လၢအဆီတလဲအသး တသ့ဘၣ်​ အိၣ်ဝဲအသိးလံ.”+ ၁၃ တဘျီဃီန့ၣ်​ အဝဲသ့ၣ်​ တဲဆၢစီၤပၤလၢ “အိ စီၤပၤဧၢ, စီၤဒၤနံးယ့လး လၢပှၤဟဲက့ၤဖီၣ်န့ၢ်အီၤ လၢယူဒၤန့ၣ်+ တပာ်ကဲနၤဘၣ်​ ဒီးနဆဲးလီၤနမံၤလၢ တၢ်သိၣ်တၢ်သီအဂီၢ် သနာ်က့ အတကနၣ်ဃုာ်ဝဲ နီတစဲးဘၣ်. အဝဲဃ့ဘါထုကဖၣ်တၢ် တနံၤသၢဘျီလီၤ.”+ ၁၄ ဖဲစီၤပၤနၢ်ဟူဝဲ ဒ်န့ၣ်အခါ အသူၣ်ကိၢ်သးဂီၤတၢ်ဒိၣ်မး ဒီးအဃုကျဲလၢ ကမၤပူၤဖျဲး စီၤဒၤနံးယ့လးအဂီၢ်လီၤ. ဒ်သိး အကမၤပူၤဖျဲး စီၤဒၤနံးယ့လးအဂီၢ် အဝဲ ဂုာ်ကျဲးစၢးဝဲ သပှၢ်ကတၢၢ် တုၤလီၤလၢ မုၢ်လီၤနုာ်လီၤ. ၁၅ ဒီးအဝဲသ့ၣ်​ လဲၤနုာ်လီၤလၢ စီၤပၤအအိၣ်​ တပူၤဃီ ဒီးတဲဝဲ စီၤပၤလၢ “အိ စီၤပၤဧၢ, သ့ၣ်နီၣ်ထီၣ်လၢ ဒ်မၤဒဲ ဒီးဖၢၡၢၣ်​ အတၢ်သိၣ်တၢ်သီ အိၣ်ဝဲအသိး တၢ်ကလုၢ် မ့တမ့ၢ် တၢ်သိၣ်တၢ်သီလၢ စီၤပၤ ထုးထီၣ်ဝဲန့ၣ်​ ပှၤဆီတလဲအီၤ တသ့ဘၣ်.”+

၁၆ အဃိ စီၤပၤဟ့ၣ်လီၤတၢ်ကလုၢ် ဒီးပှၤဟဲကိး စီၤဒၤနံးယ့လး ဒီးကွံာ်လီၤအီၤလၢ ခ့ယုၢ် အကပိၤပူၤလီၤ.+ ဒီးစီၤပၤ တဲဘၣ်​ စီၤဒၤနံးယ့လးလၢ “နကစၢ်ယွၤလၢ နမၤအတၢ် ထီဘိန့ၣ်​ ကမၤပူၤဖျဲးနၤလီၤ.” ၁၇ ဒီးပှၤဟဲစိာ် လၢၢ်တဖျၢၣ်​ ဒီးပှၤပာ်လီၤအီၤလၢ ခ့ယုၢ်ကပိၤ အခိၣ်ထိးလီၤ. ဒီးစီၤပၤ စဲပနီၣ်ဝဲလၢၢ်လၢ အပသံး ဒီးအပှၤဒိၣ်ပှၤပှၢ်တဖၣ်​ အပသံး ဒ်သိး ပှၤဆီတလဲ တၢ်ဆၢတဲာ်လၢ ဘၣ်ဃးဒီး စီၤဒၤနံးယ့လး သုတသ့တဂ့ၤ အဂီၢ်လီၤ.

၁၈ ဒီးစီၤပၤ က့ၤလၢ အနီ* ပူၤလီၤ. ဒီးအဒုၣ်တၢ်အီၣ်ဒီနၤ ဒီးအတပျဲ ပှၤမၤမုာ်မၤဖှံအသး* နီတမံၤဘၣ်​ ဒီးအမံတန့ၢ်ဘၣ်. ၁၉ ဖဲမုၢ်ဝါထီၣ်​ သီသီအခါ စီၤပၤဂဲၤဆၢထၢၣ်​ ဒီးလဲၤလၢ ခ့ယုၢ်ကပိၤ ချ့ချ့လီၤ. ၂၀ ဖဲအလဲၤဘူးထီၣ်လၢ ခ့ယုၢ်ကပိၤအခါ အကိးစိဝဲ စီၤဒၤနံးယ့လး လၢတၢ်သးအုး အပူၤလီၤ. ဒီးစီၤပၤ သံကွၢ် စီၤဒၤနံးယ့လးလၢ “ယွၤလၢအမူဝဲတဂၤအခ့အပှၤ စီၤဒၤနံးယ့လးဧၢ, မ့ၢ်နကစၢ်ယွၤလၢ နမၤအတၢ် ထီဘိတဂၤန့ၣ်​ မၤပူၤဖျဲးနၤလၢ ခ့ယုၢ်တဖၣ်​ အကိာ်ပူၤန့ၢ်ဧါ.” ၂၁ တဘျီဃီန့ၣ်​ စီၤဒၤနံးယ့လး တဲဆၢစီၤပၤလၢ “အိ စီၤပၤဧၢ, မ်နအိၣ်မူ လီၤထူလီၤယိာ်တက့ၢ်. ၂၂ ယကစၢ်ယွၤ ဆှၢလီၤ အမူခိၣ်ကလူးတဂၤ ဒီးကးပံး ခ့ယုၢ်တဖၣ်​ အကိာ်ပူၤ+ ဒီးခ့ယုၢ်တဖၣ်န့ၣ်​ တမၤဘၣ်ဒိယၤဘၣ်,+ မ့ၢ်လၢ ယကစၢ်ယွၤ ထံၣ်ဝဲလၢ ယတၢ်ကမၣ်​ တအိၣ်ဘၣ်​ ဒီးစီၤပၤဧၢ, ယတမၤကမၣ်နၤ နီတမံၤစ့ၢ်ကီးဘၣ်.”

၂၃ စီၤပၤ သးခုဝဲဒိၣ်မး ဒီးအဟ့ၣ်လီၤတၢ်ကလုၢ်လၢ ပှၤကထုးထီၣ်​ စီၤဒၤနံးယ့လးလၢ ခ့ယုၢ်ကပိၤပူၤလီၤ. ဖဲပှၤထုးထီၣ်​ စီၤဒၤနံးယ့လးလၢ ခ့ယုၢ်ကပိၤအခါ ပှၤထံၣ်ဘၣ်ဝဲလၢ အတဘၣ်ဒိဘၣ်ထံး နီတမံၤဘၣ်, မ့ၢ်လၢအနာ်န့ၢ် အကစၢ်ယွၤအဃိလီၤ.+

၂၄ ဒီးစီၤပၤ ဟ့ၣ်လီၤတၢ်ကလုၢ်အဃိ ပှၤဟဲကိးပှၤလၢ အပာ်ဒ့ၣ်ပာ်ကမၣ်​ စီၤဒၤနံးယ့လး ဒီးကွံာ်လီၤ အဝဲသ့ၣ်​ လၢခ့ယုၢ်ကပိၤအပူၤ ဃုာ်ဒီးအဝဲသ့ၣ်​ အဖိအမါတဖၣ်လီၤ. ဖဲအဝဲသ့ၣ်​ လီၤတဲာ်တချုးတုၤလၢ တၢ်ပူၤအခံဒးဒံးဘၣ်န့ၣ်​ ခ့ယုၢ်တဖၣ်​ အ့ၣ်အဝဲသ့ၣ်​ ဒီးမၤကၢ် အဝဲသ့ၣ်​ အဃံအကွဲ ခဲလၢာ်လီၤ.+

၂၅ ဒီးစီၤပၤ ဒၤရယါဝ့ၣ်​ ကွဲးလံာ်လၢ ကယဲၢ်ပှၤဂီၢ်မုၢ်တဖၣ်, ပှၤကလုာ်တဖၣ်​ ဒီးပှၤလၢအတဲ ကျိာ်အကလုာ်ကလုာ်တဖၣ်​ လၢအအိၣ်လၢ ဟီၣ်ခိၣ်ဝးဝးအအိၣ်+ ဒီးကွဲးဝဲလၢ “မ်တၢ်ဃူတၢ်ဖိး အါအါဂီၢ်ဂီၢ် အိၣ်လၢသုကျါတက့ၢ်. ၂၆ ယဟ့ၣ်လီၤ တၢ်ကလုၢ်လၢ ပှၤလၢအအိၣ်လၢ တၢ်လီၢ်ခဲလၢာ် လၢယဘီမုၢ်အပူၤန့ၣ်​ ကဘၣ်ပျံၤ ဒီးပာ်ကဲ စီၤဒၤနံးယ့လး အကစၢ်ယွၤလီၤ.+ အဝဲမ့ၢ် ယွၤလၢအမူဝဲ ဒီးအအိၣ်ဝဲ လီၤထူလီၤယိာ်လီၤ. ဒီးအဘီမုၢ်န့ၣ်​ တဟးဂီၤ နီတဘျီဘၣ်​ ဒီးအတၢ်ပၢတၢ်ပြးန့ၣ်​ အိၣ်ဝဲလီၤထူလီၤယိာ်လီၤ.+ ၂၇ မ့ၢ်လၢအမၤပူၤဖျဲး စီၤဒၤနံးယ့လးလၢ ခ့ယုၢ်အကိာ်ပူၤ အဃိ အဝဲ မ့ၢ်ပှၤလၢ အမၤပူၤဖျဲးတၢ်,+ အုၣ်က့ၤခီၣ်က့ၤတၢ်, မၤတၢ်ပနီၣ်လီၤလး ဒီးတၢ်လီၤလိၢ်လီၤလး လၢမူခိၣ်​ ဒီးလၢဟီၣ်ခိၣ်ချၢလီၤ.”+

၂၈ အဃိ စီၤဒၤနံးယ့လး အိၣ်ဘၣ်မုာ်မုာ်ခုၣ်ခုၣ်လၢ စီၤဒၤရယါဝ့ၣ်+ အဘီမုၢ် ဒီးပှၤဖၢၡၢၣ်ဖိ စီၤကိရ့ၣ်​ အဘီမုၢ်ပူၤလီၤ.+

၇ ဖဲဘၤဘူၤလိၣ်​ အစီၤပၤ ဘ့ၤလၡါစၢ်+ ပၢတၢ်အဆိကတၢၢ် တနံၣ်န့ၣ်​ စီၤဒၤနံးယ့လး မံမီၢ်တၢ် ဒီးထံၣ်တၢ်ထံၣ်လၢညါခီတဖၣ်​ ဖဲအမံနီၤလၢ အလီၢ်မံခိၣ်​ အခါလီၤ.+ ဒီးအဝဲ ကွဲးလီၤဝဲ အတၢ်မံမီၢ်+ ဒီးကွဲးနီၣ်ဃာ်ဝဲ တၢ်ဂ့ၢ်တၢ်ကျိၤတဖၣ်န့ၣ်​ ခဲလၢာ်ခဲဆ့လီၤ. ၂ စီၤဒၤနံးယ့လး တဲဝဲလၢ

“ဖဲမုၢ်နၤ လၢယတၢ်ထံၣ်လၢညါခီတဖၣ်​ အပူၤန့ၣ်​ ယထံၣ်ဘၣ်လၢ မူခိၣ်အကလံၤ လွံၢ်ကျိၤန့ၣ်​ မၤဟူးဝးထီၣ်​ ပီၣ်လဲၣ်ဖးဒိၣ်လီၤ.+ ၃ ဒီးဆၣ်ဖိကီၢ်ဖိအအၢ ဖးဒိၣ်လွံၢ်ဒု+ ဟဲထီၣ်လၢ ပီၣ်လဲၣ်ပူၤ ဒီးတဒုဒီးတဒုန့ၣ်​ လီၤဆီလိာ်အသးလီၤ.

၄ “ဆၣ်ဖိကီၢ်ဖိအအၢ အဆိကတၢၢ်တဒုန့ၣ်​ လီၤဂာ်ဒ်သိးဒီး ခ့ယုၢ်+ ဒီးအအိၣ်ဒီး လံာ်ကြီကြာ် အဒံးဆ့တဖၣ်လီၤ.+ ဖဲယကွၢ်ဒံးတၢ်အခါန့ၣ်​ အဒံးဆ့တဖၣ်​ ဘၣ်တၢ်ထဲးထီၣ်ကွံာ်အီၤလီၤ. ဒီးအဘၣ်​ တၢ်စိာ်ထီၣ်အီၤ လၢဟီၣ်ခိၣ်လိၤ ဒီးဒုးဆၢထၢၣ်အီၤလၢအခီၣ်ခံခီ ဒ်ပှၤကညီအသိး ဒီးအဘၣ်တၢ်ဟ့ၣ်လီၤအီၤ လၢပှၤကညီ အသးလီၤ.

၅ “ဆၣ်ဖိကီၢ်ဖိအအၢ ခံဒုတဒုန့ၣ်​ လီၤဂာ်ဒ်သိးဒီး တၤသူလီၤ.+ အဝဲဆၢထၢၣ်​ ထုးထီၣ်ဃာ် အခီၣ်တခီ ဒီးအ့ၣ်တံၢ်ဃာ် တၢ်ဂုာ်ဃံသၢဘိ လၢအမဲ ဒီးတၢ်တဲအီၤလၢ ‘ဆၢထၢၣ်, အီၣ်တၢ်ညၣ်မ့ၢ်အါသၢၤ.’+

၆ “ဝံၤဒီး ဖဲယကွၢ်ဒံးတၢ်အခါ ယထံၣ်ဘၣ်​ ဆၣ်ဖိကီၢ်ဖိအအၢ အဂၤတဒုလၢ အလီၤဂာ်ဒီး ခ့စံၣ်ပိၣ်လီၤ.+ လၢအချၢဃံန့ၣ်​ အိၣ်ဒီးအဒံးဆ့လွံၢ်ဘ့ၣ်​ လၢအလီၤဂာ်ဒီး ထိၣ်အဒံးဆ့လီၤ. ဒီးဆၣ်ဖိကီၢ်ဖိအအၢ တဒုအံၤန့ၣ်​ အခိၣ်သၣ်ဃံ အိၣ်လွံၢ်ဖျၢၣ်+ ဒီးတၢ်ဟ့ၣ်လီၤအီၤ တၢ်စိတၢ်ကမီၤ လၢအကပၢတၢ်အဂီၢ်လီၤ.

၇ “တၢ်န့ၣ်ဝံၤအလီၢ်ခံ ဖဲမုၢ်နၤခီ အဆၢကတီၢ်န့ၣ်​ ယဆဲးကွၢ်တၢ်လၢ တၢ်ထံၣ်လၢညါခီတဖၣ်အပူၤ ဒီးယထံၣ်​ ဆၣ်ဖိကီၢ်ဖိအအၢ လွံၢ်ဒုတဒုလၢ အလီၤပျံၤလီၤဖုး ဒီးအဂံၢ်ဆူၣ်ဘါဆူၣ်​ ဒိၣ်မး ဒီးအအိၣ်ဒီး အမဲထးဖးဒိၣ်တဖၣ်လီၤ. အအီၣ်တၢ် ဒီးမၤသဘှံးတၢ် ဒီးတၢ်လၢအအိၣ်တ့ၢ်တဖၣ်န့ၣ်​ အယီၢ်သဘှံးဝဲလၢ အခီၣ်လီၤ.+ ဆၣ်ဖိကီၢ်ဖိအအၢ တဒုအံၤန့ၣ်​ အလီၤဆီဒိၣ်န့ၢ်ဒံး ဆၣ်ဖိကီၢ်ဖိအအၢ လၢအမဲာ်ညါတဖၣ်​ ခဲလၢာ်လီၤ. ဒီးဆၣ်ဖိကီၢ်ဖိ အအၢတဒုအံၤ အနၢၤအိၣ်ဝဲအဘိ တဆံလီၤ. ၈ ဖဲယကွၢ်ထံ အနၢၤတဖၣ်အခါ တၢ်အနၢၤဖိအဂၤတဘိ+ ဟဲထီၣ်ဝဲလၢ အနၢၤတဖၣ်အကျါ ဒီးနၢၤသၢဘိ လၢအပၣ်ဃုာ်လၢ နၢၤလၢ အခီၣ်ထံးတဖၣ်​ အကျါန့ၣ်​ ဘၣ်တၢ်ထဲးထီၣ်ကွံာ်အီၤလၢ နၢၤဖိတဖၣ်န့ၣ်​ အမဲာ်ညါလီၤ. ဒီးတၢ်အနၢၤဖိတဘိအံၤ အိၣ်ဒီးအမဲာ်ချံလၢ အလီၤဂာ်ဒ်သိးဒီး ပှၤကညီအမဲာ်ချံ ဒီးအိၣ်ဒီးအကိာ်ပူၤလၢ အတဲတၢ်လၢ တၢ်ပာ်ကဖၢလၢသး အပူၤလီၤ.+

၉ “ဒီးဖဲယကွၢ်ဒံးတၢ်အခါ ယထံၣ်ဘၣ်​ တၢ်ဆီလီၤ လီၢ်ပစိာ်တဖၣ်​ ဒီးပှၤအိၣ်လၢပျၢၤ လံၤလံၤတဂၤ+ ဆ့ၣ်နီၤဝဲလီၤ.+ အတၢ်ကူတၢ်ကၤတဖၣ်​ ဝါဝဲဒ်သိးဒီး မူခိၣ်ဖီ+ ဒီးအခိၣ်ဆူၣ်​ လီၤဂာ်ဒ်သိးဒီး သိဆူၣ်လၢ အဝါလီၤ. အလီၢ်ပစိာ်န့ၣ်​ ကဲဝဲ မ့ၣ်အူလၣ်တဖၣ်​ ဒီးအလီၢ်ပစိာ် အပၣ်တဖၣ်န့ၣ်​ ကဲဝဲမ့ၣ်အူအီၣ်တၢ်လီၤ.+ ၁၀ မ့ၣ်အူအထံကျိဖိ ဟးထီၣ်ဝဲလၢ အအိၣ်လီၤ.+ ပှၤတကကွဲၢ် မၤအတၢ် ဒီးပှၤအကကွဲၢ် တကယၤ ဆၢထၢၣ်လၢ အမဲာ်ညါလီၤ.+ စံၣ်ညီၣ်ကွီၢ်အရူ+ အတၢ်စံၣ်ညီၣ်​ တၢ်ရဲၣ်တၢ်ကျဲၤန့ၣ်​ စးထီၣ်ဝဲ ဒီးလံာ်တဖၣ်​ ဘၣ်တၢ်အိးထီၣ်အီၤလီၤ.

၁၁ “ဖဲန့ၣ်အခါ ယဆဲးကွၢ်တၢ် မ့ၢ်လၢ တၢ်အနၢၤတဘိန့ၣ်​ တဲတၢ်လၢ တၢ်ပာ်ကဖၢလၢသးအပူၤ အဃိလီၤ.+ ယကွၢ်တၢ်တုၤလၢ ဆၣ်ဖိကီၢ်ဖိ အအၢတဒုအံၤ ဘၣ်တၢ်မၤသံအီၤ ဒီးအဟးဂီၤကွံာ်ဝဲလီၤ. ဝံၤဒီး တၢ်တၢၤလီၤ အစိၣ်လၢ မ့ၣ်အူအပူၤလီၤ. ၁၂ မ့မ့ၢ် ဆၣ်ဖိကီၢ်ဖိအအၢလၢ အဂၤတဖၣ်န့ၣ်+ တၢ်ထုးထီၣ်ကွံာ် အတၢ်ပၢတၢ်ပြး ဒီးတၢ်ပျဲမူအဝဲသ့ၣ်​ လၢတၢ်ဆၢကတီၢ် တကတီၢ် ဒီးတုၤလၢ တၢ်ဆၢကတီၢ်လၢ အဘၣ်တၢ်ပာ်ပနီၣ်ဝဲလီၤ.

၁၃ “ဖဲမုၢ်နၤခီ အဆၢကတီၢ်န့ၣ်​ ယဆဲးကွၢ်တၢ်လၢ တၢ်ထံၣ်လၢညါခီတဖၣ်အပူၤ ဒီးယထံၣ်ဘၣ်ပှၤတဂၤ လၢအလီၤဂာ်ဒီး ပှၤကညီဖိခွါန့ၣ်+ ဟဲဝဲဒီး မူခိၣ်အတၢ်အၢၣ်တဖၣ်လီၤ. ဒီးအဝဲန့ၢ်ဘၣ်​ အခွဲးလၢ အကလဲၤနုာ်လီၤလၢ ပှၤအိၣ်လၢပျၢၤ လံၤလံၤတဂၤအအိၣ်+ ဒီးအဝဲသ့ၣ်​ လဲၤဆှၢအီၤလၢ အမဲာ်ညါ ဘူးဘူးလီၤ. ၁၄ ဒီးတၢ်ဟ့ၣ်လီၤအီၤ တၢ်ပၢတၢ်ပြး,+ တၢ်လၤတၢ်ကပီၤ+ ဒီးဘီမုၢ်တဘီမုၢ် ဒ်သိး ပှၤဂီၢ်မုၢ်, ပှၤကလုာ် ဒီးပှၤလၢအတဲကျိာ် အကလုာ်ကလုာ်န့ၣ်​ ကမၤအတၢ်အဂီၢ်လီၤ.+ အတၢ်ပၢတၢ်ပြးန့ၣ်​ ကအိၣ်ဝဲလီၤထူလီၤယိာ် ဒီးအဘီမုၢ်န့ၣ်​ တဟးဂီၤနီတဘျီဘၣ်.+

၁၅ “မ့မ့ၢ်ယၤ စီၤဒၤနံးယ့လးန့ၣ်​ ယထံၣ်တၢ်ထံၣ်လၢညါခီတဖၣ်​ လၢအမၤပျံၤယၤ အဃိ ယသူၣ်ကိၢ်သးဂီၤတၢ်လီၤ.+ ၁၆ ယလဲၤဘူးထီၣ်လၢ ပှၤလၢအဆၢထၢၣ်​ ဖဲန့ၣ်တဖၣ်အကျါတဂၤအအိၣ်​ ဒ်သိး ယကသံကွၢ်အီၤ တၢ်ဂ့ၢ်တခါအံၤ အခီပညီနီၢ်ကီၢ် အဂီၢ်လီၤ. အဃိ အဝဲတဲဆၢယၤ ဒီးတဲဘၣ်ယၤလၢ တၢ်ဂ့ၢ်တဖၣ်အံၤ အခီပညီလီၤ.

၁၇ “‘ဆၣ်ဖိကီၢ်ဖိအအၢ ဖးဒိၣ်လွံၢ်ဒုန့ၣ်+ မ့ၢ်ဝဲ စီၤပၤလွံၢ်ဂၤလၢ အကအိၣ်ထီၣ်လၢ ဟီၣ်ခိၣ်ချၢလီၤ.+ ၁၈ ဘၣ်ဆၣ်​ ယွၤလၢအထီကတၢၢ်တဂၤ+ အပှၤစီဆှံတဖၣ်န့ၣ်​ ကဒိးန့ၢ်ဘၣ်ဘီမုၢ်+ ဒီးဘီမုၢ်ကကဲထီၣ်​ အဝဲသ့ၣ်အတၢ်+ အစိၤစိၤအဃၣ်ဃၣ်​ လီၤထူလီၤယိာ်လီၤ.’

၁၉ “ဒီးယအဲၣ်ဒိးသ့ၣ်ညါအါထီၣ်​ ဆၣ်ဖိကီၢ်ဖိအအၢ လွံၢ်ဒုတဒုလၢ အလီၤဆီန့ၢ်ဒံး ဆၣ်ဖိကီၢ်ဖိအအၢလၢ အဂၤတဖၣ်​ အဂ့ၢ်လီၤ. တၢ်တဒုအံၤန့ၣ်​ လီၤပျံၤလီၤဖုးဒိၣ်မး ဒီးအအိၣ်ဒီး အမဲထး ဒီးအခီၣ်မ့ၣ်တိၢ်ဘီ ဒီးအအီၣ်တၢ် ဒီးမၤသဘှံးတၢ် ဒီးတၢ်လၢ အအိၣ်တ့ၢ်တဖၣ်န့ၣ်​ အယီၢ်သဘှံးဝဲလၢ အခီၣ်လီၤ.+ ၂၀ ဒီးယအဲၣ်ဒိးသ့ၣ်ညါအါထီၣ်​ နၢၤအဘိတဆံ+ လၢအခိၣ်သၣ်ဃံအလိၤ ဒီးနၢၤအဂၤတဘိလၢ အဟဲထီၣ်​ ဒီးမၤလီၤတဲာ် နၢၤသၢဘိန့ၣ်​ အဂ့ၢ်လီၤ.+ နၢၤတဘိအံၤန့ၣ်​ အိၣ်ဒီးအမဲာ်ချံ ဒီးအကိာ်ပူၤလၢ အတဲတၢ်လၢ တၢ်ပာ်ကဖၢလၢသးအပူၤ ဒီးအဖျါဒိၣ်န့ၢ်ဒံး နၢၤအဂၤတဖၣ်လီၤ.

၂၁ “ယဆဲးကွၢ်တၢ် ဒီးယထံၣ်ဘၣ်လၢ နၢၤတဘိန့ၣ်​ ဒုးတၢ်ဒီး ပှၤစီဆှံတဖၣ်​ ဒီးမၤနၢၤ အဝဲသ့ၣ် + ၂၂ တုၤလၢ ပှၤအိၣ်လၢပျၢၤ လံၤလံၤတဂၤ+ ဟဲဝဲဒီး စံၣ်ညီၣ်န့ၢ်တၢ်လၢ ယွၤလၢအထီကတၢၢ်တဂၤ+ အပှၤစီဆှံတဖၣ်အဂီၢ်လီၤ. ဒီးတၢ်ဆၢကတီၢ်လၢ အဘၣ်တၢ်ပာ်ပနီၣ်အီၤလၢ ပှၤစီဆှံတဖၣ်​ ကန့ၢ်ဘၣ်​ ဘီမုၢ်အဂီၢ်န့ၣ်​ ဘၣ်ဝဲလီၤ.+

၂၃ “အဝဲတဲဝဲလၢ ‘ဆၣ်ဖိကီၢ်ဖိအအၢ လွံၢ်ဒုတဒုန့ၣ်​ မ့ၢ်ဝဲဘီမုၢ် လွံၢ်ဘ့ၣ်တဘ့ၣ်​ လၢအကဟဲအိၣ်ထီၣ်​ လၢဟီၣ်ခိၣ်ချၢလီၤ. ဒီးအကလီၤဆီန့ၢ်ဒံး ကယဲၢ်ဘီမုၢ်အဂၤတဖၣ်​ ဒီးအကအီၣ်ကွံာ် ဟီၣ်ခိၣ်ခဲလၢာ် ဒီးကယီၢ်တံၢ်ဝဲ ဒီးမၤသဘှံးဝဲလီၤ.+ ၂၄ မ့မ့ၢ် တၢ်အနၢၤ အဘိတဆံန့ၣ်​ မ့ၢ်ဝဲ စီၤပၤအဂၤတဆံလၢ အကဟဲအိၣ်ထီၣ်လၢ ဘီမုၢ်ဝဲန့ၣ်​ အလီၢ်လီၤ. ဘၣ်ဆၣ်​ စီၤပၤအဂၤတဂၤ ကဟဲအိၣ်ထီၣ်​ လၢအဝဲသ့ၣ်​ အလီၢ်ခံ ဒီးအဝဲ ကလီၤဆီန့ၢ်ဒံး စီၤပၤလၢ အမဲာ်ညါတဖၣ်​ ဒီးအဝဲ ကမၤနၢၤဝဲ စီၤပၤသၢဂၤလီၤ.+ ၂၅ အဝဲ ကတဲတၢ်ကတိၤလၢ အထီဒါ တၢ်ထီကတၢၢ်တဂၤ+ ဒီးအကမၤနးမၤဖှီၣ်ဝဲ ယွၤလၢအထီကတၢၢ်တဂၤ အပှၤစီဆှံတဖၣ်​ ထီဘိလီၤ. အဝဲ ကပာ်လီၤအသးလၢ ကဆီတလဲ တၢ်ဆၢကတီၢ် ဒီးတၢ်သိၣ်တၢ်သီလီၤ. ဒီးပှၤစီဆှံတဖၣ်န့ၣ်​ ကဘၣ်တၢ်ဟ့ၣ်လီၤအီၤ လၢအစုပူၤ လၢသၢနံၣ်တဝာ်* အတီၢ်ပူၤလီၤ.+ ၂၆ ဘၣ်ဆၣ်​ စံၣ်ညီၣ်ကွီၢ်အရူ အတၢ်စံၣ်ညီၣ်​ တၢ်ရဲၣ်တၢ်ကျဲၤန့ၣ်​ စးထီၣ်အသး ဒီးပှၤတဖၣ်အံၤ ထုးထီၣ်ကွံာ် စီၤပၤတဂၤန့ၣ်​ အတၢ်ပၢတၢ်ပြး ဒ်သိး ကမၤသံ ဒီးမၤဟးဂီၤကွံာ် စီၤပၤတဂၤန့ၣ်​ လၢာ်လၢာ်ဆ့ဆ့ အဂီၢ်လီၤ.+

၂၇ “‘ဘီမုၢ်, တၢ်ပၢတၢ်ပြး ဒီးဘီမုၢ်တဖၣ်​ အတၢ်ကဟုကညီၢ်လၢ မူခိၣ်ခဲလၢာ် အဖီလာ်န့ၣ်​ ဘၣ်တၢ်ဟ့ၣ်လီၤအီၤလၢ ယွၤလၢအထီကတၢၢ်တဂၤ+ အပှၤစီဆှံတဖၣ်​ အအိၣ်လီၤ. ဒီးအဝဲသ့ၣ်​ အဘီအမုၢ်န့ၣ်​ အိၣ်ဝဲ လီၤထူလီၤယိာ်+ ဒီးတၢ်ပၢတၢ်ပြး ခဲလၢာ်န့ၣ်​ ကမၤအဝဲသ့ၣ်အတၢ် ဒီးကဒိကနၣ်​ အဝဲသ့ၣ်​ အကလုၢ်လီၤ.’

၂၈ “တၢ်ဂ့ၢ်တခါအံၤ မ့ၢ်ဝဲ ပှဲၤအံၤလီၤ. မ့မ့ၢ်ယၤ စီၤဒၤနံးယ့လးန့ၣ်​ ယတၢ်ဆိကမိၣ်တဖၣ်​ မၤပျံၤမၤဖုးယၤဒိၣ်မးအဃိ ယမဲာ်သၣ်လီၤဝါဝဲ ဘၣ်ဆၣ်​ ယပာ်ဃာ် တၢ်ဂ့ၢ်တခါအံၤ လၢယသးပူၤလီၤ.”

၈ ဖဲစီၤပၤ ဘ့ၤလၡါစၢ်+ ပၢတၢ်သၢနံၣ်တနံၣ်န့ၣ်​ ယၤ, စီၤဒၤနံးယ့လးန့ၣ်​ ယထံၣ်ဘၣ်​ တၢ်ထံၣ်လၢညါခီတခါ လၢအလီၤဆီလိာ်အသးဒီး ယထံၣ်တ့ၢ်လၢ အပူၤကွံာ် တခါန့ၣ်လီၤ.+ ၂ ယထံၣ်တၢ်ထံၣ်လၢညါခီ ဒီးဖဲယကွၢ်တၢ်အခါ ယအိၣ်လၢ နီ* ၡူၡၣ်+ လၢအအိၣ်လၢ ဧ့ၤလၣ်​ အကီၢ်ရ့ၣ်ပူၤလီၤ.+ ယကွၢ်တၢ်ထံၣ်လၢညါခီ ဒီးယအိၣ်ဘူးဒီး ထံကျိ* အူလဲၤလီၤ. ၃ ဖဲယကွၢ်စိဃီၤတၢ်အခါ ယထံၣ်ဘၣ်​ သိဖါတဒု+ ဆၢထၢၣ်လၢ ထံကျိအမဲာ်ညါ ဒီးအနၢၤ အိၣ်ခံဘိလီၤ.+ အနၢၤခံဘိန့ၣ်ထီဝဲ ဒီးတဘိန့ၣ်​ ထီန့ၢ် အဝဲတဘိလီၤ. ဒီးအနၢၤလၢ အထီတဘိန့ၣ်​ ဟဲထီၣ်လၢခံလီၤ.+ ၄ ဒီးယထံၣ်​ သိဖါတဒုန့ၣ်​ ဘျၢၣ်တၢ်ဆူ မုၢ်နုာ်တခီ, ဆူကလံၤစိးတခီ ဒီးဆူကလံၤထံးတခီလီၤ. ဒီးဆၣ်ဖိကီၢ်ဖိ အအၢလၢအဂၤတဖၣ်​ တြီဆၢအီၤတန့ၢ် နီတဒုဘၣ်. ဒီးပှၤမၤပူၤဖျဲးတၢ်လၢ အစုပူၤ တန့ၢ်နီတမံၤဘၣ်.+ သိဖါတဒုအံၤ မၤတၢ်ဖဲအသး ဒီးပာ်ဒိၣ်ပာ်ထီ အသးလီၤ.

၅ ဖဲယဆဲးကွၢ်တၢ်အခါ ယထံၣ်​ မဲာ်တဲးလဲးဖါတဒု+ ဟဲလၢမုၢ်နုာ်တခီ ဒီးအခီဂာ်ဝဲ ဟီၣ်ခိၣ်ဒီဘ့ၣ်ညါ ဘၣ်ဆၣ်​ အခီၣ်တတုၤလီၤလၢ ဟီၣ်ခိၣ်လိၤဘၣ်. မဲာ်တဲးလဲးတဒုအံၤန့ၣ်​ အိၣ်ဝဲဒီး အနၢၤဖးဒိၣ်​ တဘိလၢ အမဲာ်ချံ အဘၢၣ်စၢၤလီၤ.+ ၆ ဒီးအလဲၤဝဲလၢ သိဖါလၢ အနၢၤအိၣ်ခံဘိ လၢယထံၣ်လၢ အဆၢထၢၣ်လၢ ထံကျိအမဲာ်ညါ အအိၣ်လီၤ. ဒီးအလဲၤဃ့ၢ်ဝဲလၢ သိဖါအအိၣ်​ လၢတၢ်သးထီၣ်အပူၤလီၤ.

၇ ယထံၣ်ဘၣ်လၢ ဖဲမဲာ်တဲးလဲးတဒုန့ၣ်​ လဲၤဘူးထီၣ်ဒီး သိဖါအခါ အသးဒိၣ်ထီၣ်အီၤ ဒိၣ်မးလီၤ. ဒီးဘျၢၣ်ဝဲ သိဖါ ဒီးမၤကၢ်ကွံာ်ဝဲ အနၢၤခံဘိန့ၣ်​ ဒီးသိဖါ အဂံၢ်အဘါ လၢကတြီဆၢအီၤ အဂီၢ်န့ၣ်​ တအိၣ်ဘၣ်. အမၤလီၤဃံၢ်သိဖါလၢ ဟီၣ်ခိၣ်လိၤ ဒီးယီၢ်တံၢ်ဝဲ ဒီးပှၤလၢအမၤပူၤဖျဲး သိဖါလၢ အစုပူၤန့ၣ်​ တအိၣ်နီတဂၤဘၣ်.

၈ မဲာ်တဲးလဲးဖါတဒုန့ၣ်​ ပာ်ဒိၣ်ပာ်ထီအသးဒိၣ်မး ဘၣ်ဆၣ်​ ဖဲအဂံၢ်အဘါ ဆူၣ်ထီၣ်အခါ အနၢၤဖးဒိၣ်တဘိန့ၣ်​ ကၢ်ကွံာ်ဝဲလီၤ. ဒီးလၢနၢၤတဘိန့ၣ်​ အလီၢ်န့ၣ်​ နၢၤဖးဒိၣ်လွံၢ်ဘိ ဟဲထီၣ်ဝဲလီၤ. ဒီးနၢၤတဖၣ်အံၤ ဃၣ်ဃီၤအသးလၢ မူခိၣ်အကလံၤ လွံၢ်ကျိၤအအိၣ်လီၤ.+

၉ ဒီးတၢ်အနၢၤလၢအဆံးတဘိ ဟဲထီၣ်ဝဲလၢ နၢၤလွံၢ်ဘိအံၤအကျါတဘိ အအိၣ်လီၤ. တၢ်အနၢၤလၢအဆံးတဘိအံၤ ဒိၣ်ထီၣ်ဝဲဒိၣ်မး ဒီးအဂံၢ်အဘါ ဆူၣ်ထီၣ်လၢ ကလံၤထံးတခီ ဒီးလၢမုၢ်ထီၣ်တခီ ဒီးလၢကီၢ်ဃံလၤ တခီလီၤ.+ ၁၀ အဒိၣ်ထီၣ်ထီထီၣ်ဝဲဒိၣ်မး တုၤဒၣ်လဲာ် အတုၤလၢ မူခိၣ်အသုးမုၢ်ဂီၢ်မုၢ်အအိၣ်​ ဒီးအမၤလီၤတဲာ် သုးမုၢ်သံၣ်ဘိတနီၤ ဒီးဆၣ်တနီၤ လၢဟီၣ်ခိၣ်ချၢ ဒီးယီၢ်တံၢ် အဝဲသ့ၣ်လီၤ. ၁၁ နၢၤတဘိအံၤ ပာ်ဒိၣ်ပာ်ထီအသး တုၤဒၣ်လဲာ် အထီဒါ သုးမုၢ်အခိၣ်လီၤ. ဒီးတၢ်လုၢ်လၢ အဘၣ်တၢ်လုၢ်ထီၣ်အီၤ ထီဘိန့ၣ်​ ဘၣ်တၢ်ထုးထီၣ်ကွံာ်အီၤ လၢသုးမုၢ်အခိၣ်အအိၣ်​ ဒီးသုးမုၢ်အခိၣ်​ အတၢ်စီဆှံအလီၢ် လၢအသူၣ်လီၤဝဲန့ၣ်​ ဘၣ်တၢ်မၤလီၤပှီၢ်အီၤလီၤ.+ ၁၂ ဒီးခီဖျိလၢ တၢ်ကမၣ်အဃိ သုးမုၢ်တဖု ဘၣ်တၢ်ဟ့ၣ်လီၤအီၤလၢ တၢ်အနၢၤတဘိန့ၣ်အအိၣ်​ ဒီးတၢ်လုၢ်လၢ အဘၣ်​ တၢ်လုၢ်ထီၣ်အီၤ ထီဘိန့ၣ်​ ပတုာ်ဝဲလီၤ. ဒီးတၢ်အနၢၤတဘိအံၤန့ၣ်​ ကွံာ်လီၤ တၢ်မ့ၢ်တၢ်တီလၢ ဟီၣ်ခိၣ်အလိၤ ဒီးအမၤတၢ် ကဲထီၣ်လိၣ်ထီၣ်လီၤ.

၁၃ ဒီးယနၢ်ဟူ ပှၤစီဆှံတဂၤတဲတၢ်လီၤ. ဒီးပှၤစီဆှံအဂၤတဂၤ တဲအီၤလၢ “တၢ်ထံၣ်လၢညါခီ လၢဘၣ်ဃးဒီး တၢ်လုၢ်လၢ အဘၣ်တၢ်လုၢ်ထီၣ်အီၤ ထီဘိ, တၢ်ကမၣ်လၢ အဒုးအိၣ်ထီၣ်​ တၢ်မၤဟးဂီၤတၢ်+ ဒီးတၢ်ယီၢ်တံၢ် တၢ်စီဆှံအလီၢ် ဒီးတၢ်ယီၢ်တံၢ် သုးမုၢ်န့ၣ်​ ကယံာ်ဝဲ ထဲလဲၣ်.” ၁၄ အဃိ အဝဲတဲယၤလၢ “ကယံာ်ဝဲ အသီ* ၂,၃၀၀ လီၤ. ဒီးတၢ်စီဆှံအလီၢ်န့ၣ်​ ကဘၣ်တၢ်မၤဂ့ၤထီၣ်က့ၤအီၤ ဒ်တၢ်လၢအကြၢးဝဲဘၣ်ဝဲအသိး သပှၢ်ကတၢၢ်လီၤ.”

၁၅ ယၤ စီၤဒၤနံးယ့လးန့ၣ်​ ဖဲယကွၢ် တၢ်ထံၣ်လၢညါခီ ဒီးဂုာ်ကျဲးစၢး နၢ်ပၢၢ်အီၤအခါ ယထံၣ်ဘၣ်​ ပှၤလၢအလီၤဂာ်ဒီး ပှၤကညီတဂၤ ဆၢထၢၣ်​ လၢယမဲာ်ညါ သတူၢ်ကလာ်လီၤ. ၁၆ ဒီးယနၢ်ဟူ ပှၤကညီတဂၤ အကလုၢ်သီၣ်ထီၣ်လၢ ထံကျိအူလဲၤအခၢၣ်သး+ ဒီးအဝဲကိးထီၣ်ဝဲလၢ “ကၤဘြံၤအ့လးဧၢ,+ တဲနၢ်ပၢၢ် ပှၤတဂၤန့ၣ်လၢ တၢ်လၢအထံၣ်ဘၣ်ဝဲတဖၣ်​ အခီပညီတက့ၢ်.”+ ၁၇ အဃိ အဝဲဟဲဘူးထီၣ်လၢ ယဆၢထၢၣ်အလီၢ် ဘၣ်ဆၣ်​ ဖဲအဟဲအခါ ယပျံၤတၢ်ဒိၣ်မးအဃိ ယထိၣ်လီၤပှီၤယသးလီၤ. အဝဲတဲယၤလၢ “အိ ပှၤကညီဖိခွါဧၢ, သ့ၣ်ညါလၢ တၢ်ထံၣ်လၢညါခီအံၤန့ၣ်​ ကလၢထီၣ်ပှဲၤထီၣ်လၢ တၢ်အကတၢၢ် အဆၢကတီၢ်န့ၣ်တက့ၢ်.”+ ၁၈ ဘၣ်ဆၣ်​ ဖဲအဝဲတဲတၢ်ဒီးယၤအခါ ယမံယနၢ်လီၤဖးယိာ် ဒီးယမဲာ်ကျးလီၤအသးလၢ ဟီၣ်ခိၣ်လိၤလီၤ. အဃိ အဝဲထိးဘၣ်ယၤ ဒီးဒုးဆၢထၢၣ်ယၤ ဖဲယဆၢထၢၣ်တ့ၢ် အလီၢ်လီၤ.+ ၁၉ ဒီးအဝဲတဲယၤလၢ “ယကဒုးသ့ၣ်ညါနၤ တၢ်လၢကမၤအသး ဖဲတၢ်သးဒိၣ်ထီၣ်​ အဆၢကတီၢ် ဘူးထီၣ်ကကတၢၢ်တတီၤ, မ့ၢ်လၢ အကမၤအသးဖဲ တၢ်အကတၢၢ် အဆၢကတီၢ် လၢဘၣ်တၢ်ပာ်ပနီၣ်အီၤအဃိလီၤ.+

၂၀ “သိဖါလၢအနၢၤအိၣ်ခံဘိ လၢနထံၣ်ဘၣ်အီၤန့ၣ်​ အဲၣ်ဒိးတဲဝဲ မၤဒဲ ဒီးဖၢၡၢၣ်အစီၤပၤတဖၣ်လီၤ.+ ၂၁ မဲာ်တဲးလဲးဖါတဒု လၢအဆူၣ်တီၣ်ဝဲန့ၣ်​ အဲၣ်ဒိးတဲဝဲ ကြံးအစီၤပၤ+ ဒီးနၢၤဖးဒိၣ်တဘိလၢ အအိၣ်လၢ အမဲာ်ချံ အဘၢၣ်စၢၤန့ၣ်​ အဲၣ်ဒိးတဲဝဲ စီၤပၤအဆိကတၢၢ်တဂၤလီၤ.+ ၂၂ နၢၤလွံၢ်ဘိ လၢအဟဲထီၣ်လၢ နၢၤလၢအကၢ်ကွံာ်တဘိ အလီၢ်န့ၣ်+ အဲၣ်ဒိးတဲဝဲ ဘီမုၢ်လွံၢ်ဘ့ၣ်​ လၢအကဟဲအိၣ်ထီၣ်လၢ စီၤပၤတဂၤန့ၣ်​ အပှၤကလုာ်ကျါ ဘၣ်ဆၣ်​ အဂံၢ်တဆူၣ်​ ထဲသိးဒီးအီၤဘၣ်.

၂၃ “ဖဲအဝဲသ့ၣ်​ အဘီမုၢ် ဘူးထီၣ်ကကတၢၢ် ဒီးပှၤမၤတၢ်ကမၣ်ဖိတဖၣ်​ အတၢ်ကမၣ်​ တုၤထီၣ်ထီၣ်ဘးအခါ စီၤပၤလၢ အဖျါလီၤပျံၤလီၤဖုးလၢ အကူၣ်ထီၣ်တၢ် ဘၣ်ဂ့ၤဂ့ၤတဂၤန့ၣ်* ကဆၢထၢၣ်ဝဲလီၤ. ၂၄ ဒီးစီၤပၤတဂၤန့ၣ်​ အစိအကမီၤ ကဒိၣ်ထီၣ်ဝဲဒိၣ်မး ဘၣ်ဆၣ်​ တမ့ၢ်လၢ အနီၢ်ကစၢ် အဂံၢ်ဘါ အဃိဘၣ်. ဒီးအကမၤဟးဂီၤတၢ် ဒိၣ်ဒိၣ်မုၢ်မုၢ် ဒီးတၢ်လၢ အမၤဝဲန့ၣ်​ ကကဲထီၣ်လိၣ်ထီၣ်လီၤ. ဒီးအကမၤဟးဂီၤ ပှၤလၢအဂံၢ်ဆူၣ်ဘါဆူၣ်တဖၣ်​ ဒီးပှၤစီဆှံတဖၣ်​ စ့ၢ်ကီးလီၤ.+ ၂၅ မ့ၢ်လၢအခိၣ်နူာ်လဲၣ်မးအဃိ အဝဲ ကသူဝဲ တၢ်လီတၢ်ဝ့ၤ ဒ်သိး အမၤတၢ်ကကဲထီၣ်လိၣ်ထီၣ်​ အဂီၢ်လီၤ. အဝဲ ကပာ်ဒိၣ်ပာ်ထီအသး ဒီးဖဲတၢ်ဘံၣ်တၢ်ဘၢ အိၣ်ဝဲအခါ အဝဲကမၤဟးဂီၤ ပှၤအါဂၤလီၤ. ဒီးအဝဲကဆၢထၢၣ်ထီဒါ ပဒိၣ်တဖၣ်အပဒိၣ်​ ဘၣ်ဆၣ်​ အကဘၣ်တၢ်မၤဟးဂီၤအီၤ သနာ်က့ တမ့ၢ်လၢ ပှၤကညီအစုအဃိဘၣ်.

၂၆ “တၢ်ထံၣ်လၢညါခီ လၢအတဲဝဲ ဘၣ်ဃးဒီး မုၢ်နံၤမုၢ်သီတဖၣ်န့ၣ်* မ့ၢ်ဝဲတီဝဲလီၤ. ဘၣ်ဆၣ်​ နကဘၣ်ပာ် တၢ်ထံၣ်လၢညါခီအံၤ ဒ်တၢ်ခူသူၣ်အသိး မ့ၢ်လၢ အတဲဝဲဘၣ်ဃးဒီး တၢ်ဆၢကတီၢ်လၢ ခါဆူညါအဃိလီၤ.”+

၂၇ မ့မ့ၢ်ယၤ စီၤဒၤနံးယ့လးန့ၣ်​ ယလီၤဘှံးလီၤတီၤ ဒီးယအိၣ်တဆူၣ်ဘၣ်​ တဘျုးသီလီၤ.+ လၢခံ ယဆၢထၢၣ်​ ဒီးယမၤစီၤပၤ အတၢ်မၤလီၤ.+ ဘၣ်ဆၣ်​ ယသးလီၤကတုၤ ခီဖျိလၢ တၢ်လၢယထံၣ်ဘၣ်တ့ၢ်အီၤအဃိလီၤ. ဒီးပှၤတနၢ်ပၢၢ် တၢ်ထံၣ်လၢညါခီတခါအံၤ နီတဂၤဘၣ်.+

၉ အဝဲအံၤမ့ၢ်ဝဲ စီၤဒၤရယါဝ့ၣ်+ ပၢတၢ်အဆိကတၢၢ် တနံၣ်လီၤ. စီၤဒၤရယါဝ့ၣ်​ လၢအမ့ၢ် စီၤအဃၤၡဝ့ရိၣ်အဖိခွါန့ၣ်​ မ့ၢ်ဝဲ ပှၤမၤဒဲဖိ အစၢၤအသွဲၣ်တဂၤ လၢအကဲထီၣ်စီၤပၤလၢ ပှၤက့ၤစ့းဖိ အဘီမုၢ်အဖီခိၣ်လီၤ.+ ၂ ဖဲအဝဲပၢတၢ် အဆိကတၢၢ်တနံၣ်န့ၣ်​ ခီဖျိလၢ လံာ်တဖၣ်* အဃိ ယၤ စီၤဒၤနံးယ့လးန့ၣ်​ ယနၢ်ပၢၢ်ထီၣ်တၢ် ဘၣ်ဃးဒီး ဝ့ၢ်ယရူၤၡလ့ၣ်​ ကဘၣ်အိၣ်သယုၢ် ပှဲၤနံၣ်လဲၣ်န့ၣ်လီၤ. ဒ်ယဟိဝၤယွၤ အတၢ်ကတိၤလၢ အတဲဘၣ်ဝဲ ဝံယံးရမံယၤအသိး ဝ့ၢ်ယရူၤၡလ့ၣ်န့ၣ်+ ကဘၣ်အိၣ်သယုၢ်ဝဲ အနံၣ်​ ၇၀ လီၤ.+ ၃ အဃိ ယဃုတၢ်မၤစၢၤ* လၢယဟိဝၤ လၢအမ့ၢ် ယွၤလၢအမ့ၢ်အတီတဂၤအအိၣ်လီၤ. ယဃ့ထုကဖၣ်လၢအအိၣ်, ယဒုၣ်တၢ်အီၣ်,+ ကူထီၣ်ကၤထီၣ်​ ထၢၣ်တၢ်ကံးညာ်* ဒီးဖှံလီၤ ဖၣ်ဆါလၢယလိၤလီၤ. ၄ ယဃ့ထုကဖၣ်လၢ ယကစၢ် ယဟိဝၤယွၤအအိၣ်​ ဒီးယအၢၣ်လီၤပတၢ်ကမၣ်​ ဒီးယတဲလၢ

“ယဟိဝၤ လၢအမ့ၢ် ကစၢ်ယွၤလၢ အမ့ၢ်အတီဧၢ, နမ့ၢ် ပှၤလၢအဒိၣ်အမုၢ် ဒီးအလီၤယူးယီၣ်ပာ်ကဲ ဒီးနမၤလၢပှဲၤ နတၢ်အၢၣ်လီၤအီလီၤ ဒီးနပာ်ဖျါထီၣ်​ တၢ်အဲၣ်လၢအတီ+ လၢပှၤလၢအအဲၣ်နၤ ဒီးအမၤထွဲ နတၢ်မၤလိာ်တဖၣ်​ အဖီခိၣ်လီၤ.+ ၅ ပမၤတ့ၢ်တၢ်ဒဲးဘး ဒီးပမၤကမၣ်တၢ် ဒီးပမၤဘၣ်တၢ် အၢအၢသီသီ ဒီးပထီဒါတၢ်လီၤ.+ ဒီးပလဲၤကပာ် နတၢ်မၤလိာ်တဖၣ်​ ဒီးနတၢ်စံၣ်ညီၣ်​ ဆၢတဲာ်တဖၣ်လီၤ. ၆ လၢညါန့ၣ်​ နခ့နပှၤ ဝံတဖၣ်​ တဲတၢ်ဒီး ပစီၤပၤတဖၣ်, ပပဒိၣ်တဖၣ်, ပမိၢ်ပၢ်ဖံဖု လၢပျၢၤတဖၣ်​ ဒီးပှၤလၢအအိၣ်လၢကီၢ်ပူၤတဖၣ်​ ခီဖျိလၢ နမံၤ ဘၣ်ဆၣ်​ ပတဒိကနၣ်​ အဝဲသ့ၣ်​ အကလုၢ်ဘၣ်.+ ၇ အိ ယဟိဝၤယွၤဧၢ, နမ့ၢ် ပှၤလၢအတီအလိၤ ဘၣ်ဆၣ်​ မ့မ့ၢ် ပဝဲဒၣ်န့ၣ်​ ပကြၢးဒီး တၢ်မဲာ်ဆှးထီဘိ ဒ်လၢမုၢ်မဆါတနံၤအံၤ အသိးလီၤ. ပဝဲပှၤအံၣ်စရ့လးဖိခဲလၢာ် ဃုာ်ဒီး ပှၤလၢယူဒၤအဒူၣ်အကျါ, ပှၤလၢအအိၣ်လၢ ဝ့ၢ်ယရူၤၡလ့ၣ်, ဒီးပှၤလၢအအိၣ်ဘူးမ့ၢ်ဂ့ၤ ပှၤလၢအအိၣ်ယံၤမ့ၢ်ဂ့ၤ လၢအအိၣ်လၢ ကီၢ်ခဲလၢာ်လၢ နမၤလီၤပြံလီၤပြါ အဝဲသ့ၣ်​ ခီဖျိလၢ အဝဲသ့ၣ်​ တတီဒီးနၤဘၣ်​ အဃိန့ၣ်​ ကြၢးဝဲဒီး တၢ်မဲာ်ဆှးလီၤ.+

၈ “အိ ယဟိဝၤယွၤဧၢ, ပဝဲသ့ၣ်တဖၣ်, ပစီၤပၤတဖၣ်, ပပဒိၣ်တဖၣ်​ ဒီးပမိၢ်ပၢ်ဖံဖု လၢပျၢၤတဖၣ်န့ၣ်​ မ့ၢ်လၢပမၤကမၣ်ဘၣ်နၤအဃိ ပကြၢးဒီးတၢ်မဲာ်ဆှးလီၤ. ၉ ပကစၢ် ယဟိဝၤယွၤဧၢ, ပထီဒါနၤ+ ဘၣ်ဆၣ်​ နအိၣ်ဒီးတၢ်သးကညီၤ ဒီးနပျၢ်ကွံာ် တၢ်ကမၣ်ညီလီၤ.+ ၁၀ ပတမၤထွဲ ပကစၢ် ယဟိဝၤယွၤ အတၢ်သိၣ်တၢ်သီ လၢအဟ့ၣ်လီၤပှၤ ခီဖျိလၢ အခ့အပှၤဝံတဖၣ်ဘၣ်အဃိ ပတဒိကနၣ်​ အကလုၢ်ဘၣ်.+ ၁၁ ဒီးပှၤအံၣ်စရ့လးဖိခဲလၢာ် မၤကမၣ်​ နတၢ်သိၣ်တၢ်သီ ဒီးဃၣ်ကွံာ်အသး ဒီးတဒိကနၣ်​ နကလုၢ်ဘၣ်. မ့ၢ်လၢပမၤဒ်န့ၣ်​ ဒီးပမၤကမၣ်နၤ အဃိ ဒ်တၢ်အၢၣ်လီၤအီလီၤ အိၣ်ဝဲအသိး နဒုးလီၤဘၣ်ပှၤလၢ တၢ်ဆိၣ်အၢလၢ အဘၣ်တၢ်ကွဲးလီၤအီၤလၢ ယွၤလၢအမ့ၢ်အတီတဂၤ အခ့အပှၤ စီၤမိၤၡ့ အတၢ်သိၣ်တၢ်သီ အပူၤလီၤ.+ ၁၂ နမၤလၢပှဲၤ နတၢ်ကတိၤလၢ နတဲပဝဲသ့ၣ်တဖၣ်+ ဒီးပှၤလၢအပၢပှၤတဖၣ်​ ခီဖျိ နဒုးလီၤဘၣ်​ တၢ်နးတၢ်ဖှီၣ်ဖးဒိၣ်​ လၢပဝဲသ့ၣ်တဖၣ်​ အလိၤလီၤ. တၢ်တကဲထီၣ်တ့ၢ်အသးလၢ ဟီၣ်ခိၣ်ချၢ ဒ်တၢ်ကဲထီၣ်အသးဒီး ဝ့ၢ်ယရူၤၡလ့ၣ်အသိး နီတဘျီဘၣ်.+ ၁၃ ဒ်တၢ်ကွဲးအသးလၢ စီၤမိၤၡ့ အတၢ်သိၣ်တၢ်သီအပူၤ အိၣ်ဝဲအသိး တၢ်နးတၢ်ဖှီၣ်တဖၣ်အံၤခဲလၢာ် ဟဲလီၤဘၣ်ပှၤလီၤ.+ ဘၣ်ဆၣ်​ ပတဃ့ကညး ပကစၢ်ယဟိဝၤယွၤ လၢပကန့ၢ်ဘၣ်​ အတၢ်သးကညီၤအဂီၢ်ဘၣ်. ပတပီၢ်ယၢ်လီၤပသးလၢ ပတၢ်ကမၣ်ဘၣ်+ ဒီးပတသးစၢၢ်ဆၢ နတၢ်မ့ၢ်တၢ်တီဘၣ်.

၁၄ “ယဟိဝၤယွၤဧၢ, နတီဝဲလိၤဝဲလၢ တၢ်လၢနမၤတ့ၢ် ခဲလၢာ်အပူၤ ဘၣ်ဆၣ်​ ပတဒိကနၣ်​ နကလုၢ်ဘၣ်.+ အဃိ ယဟိဝၤယွၤဧၢ, နခိးကွၢ်တၢ်ထံထံ ဒီးဒုးလီၤဘၣ်​ တၢ်နးတၢ်ဖှီၣ်​ လၢပလိၤလီၤ.

၁၅ “အိ ပကစၢ် ယဟိဝၤယွၤဧၢ, နမ့ၢ်ပှၤတဂၤလၢ အထုးထီၣ်​ နပှၤဂီၢ်မုၢ်လၢ ကီၢ်အဲၤကူပတူးအပူၤ ခီဖျိလၢ စုလၢအပှဲၤဒီး တၢ်စိတၢ်ကမီၤ+ ဒီးနမၤဒိၣ်ထီၣ်နမံၤ တုၤလီၤလၢ မုၢ်မဆါတနံၤအံၤလီၤ.+ ဘၣ်ဆၣ်​ ပမၤတၢ်ဒဲးဘး ဒီးပမၤတၢ် အၢအၢသီသီလီၤ. ၁၆ အိ ယဟိဝၤယွၤဧၢ, ဒ်နမ့ၢ်ပှၤလၢ အမၤတၢ် တီတီလိၤလိၤ ထီဘိအသိး+ ဝံသးစူၤ ထုးထီၣ်ကွံာ် နတၢ်သးဒိၣ်​ ဒီးတၢ်သူၣ်ဒိၣ်သးဖျိး လၢနကစၢၢ်စီဆှံ လၢအမ့ၢ် ဝ့ၢ်ယရူၤၡလ့ၣ်​ အအိၣ်တက့ၢ်. ခီဖျိလၢ ပတၢ်ဒဲးဘး ဒီးပမိၢ်ပၢ်ဖံဖု လၢပျၢၤတဖၣ်​ အတၢ်ကမၣ်တဖၣ်အဃိ ပှၤလၢအအိၣ်​ ဝးတရံးပှၤတဖၣ်န့ၣ်​ ဒုၣ်ဒွဲၣ်စံးအၢ ဝ့ၢ်ယရူၤၡလ့ၣ်​ ဒီးနပှၤဂီၢ်မုၢ်လီၤ.+ ၁၇ အိ ပကစၢ် ယဟိဝၤယွၤဧၢ, ဒိကနၣ်​ နခ့နပှၤ ယၤအံၤ အတၢ်ထုကဖၣ်​ ဒီးအတၢ်ဃ့ကညး ဒီးနတၢ်စီဆှံအလီၢ်လၢ အအိၣ်သယုၢ်န့ၣ်+ မၤဂ့ၤအီၤလၢနလၤကပီၤအဂီၢ်တက့ၢ်.+ ၁၈ အိ ယကစၢ်ယွၤဧၢ, ဒိးနနၢ် ဒီးဒိကနၣ်တက့ၢ်. အိးထီၣ်နမဲာ်ချံ ဒီးကွၢ်လီၤပဝ့ၢ် လၢအအိၣ်သယုၢ်တဖျၢၣ်အံၤ လၢအဘၣ်ထွဲလိာ်သးဒီး နမံၤန့ၣ်တက့ၢ်. ပဃ့ကညးနၤန့ၣ်​ မ့ၢ်လၢနအိၣ်ဒီး တၢ်သးကညီၤဒိၣ်မးအဃိ ဒီးတမ့ၢ်လၢ ပမၤတၢ်တီတၢ်လိၤအဃိဘၣ်.+ ၁၉ အိ ယဟိဝၤယွၤဧၢ, ဒိကနၣ်ပှၤတက့ၢ်. အိ ယဟိဝၤယွၤဧၢ, ပျၢ်ပတၢ်ကမၣ်တက့ၢ်.+ အိ ယဟိဝၤယွၤဧၢ, သူၣ်အိၣ်သးအိၣ်ပှၤတက့ၢ်. အိ ယကစၢ်ယွၤဧၢ, မ့ၢ်လၢ နဝ့ၢ် ဒီးနပှၤဂီၢ်မုၢ်တဖၣ်န့ၣ်​ ဘၣ်ထွဲလိာ်အသးဒီးနမံၤအဃိ တဘၣ်မၤယံာ်မၤနီၢ်နသးလၢ နကမၤတၢ် လၢနလၤကပီၤအဂီၢ်တဂ့ၤ.”+

၂၀ ဖဲယတဲတၢ် ဒီးဃ့ဘါထုကဖၣ်​ ဒီးအၢၣ်လီၤ ယတၢ်ဒဲးဘး ဒီးယပှၤကလုာ်အံၣ်စရ့လး အတၢ်ဒဲးဘး ဒီးယဃ့ကညး ယဟိဝၤယွၤလၢ အကမၤဂ့ၤတၢ်လၢ အကစၢၢ်စီဆှံအဂီၢ်အခါ+ ၂၁ ကၤဘြံၤအ့လး+ လၢယထံၣ်တ့ၢ်အီၤ လၢတၢ်ထံၣ်လၢညါခီ အပူၤန့ၣ်+ ဟဲလၢယအိၣ်​ ဖဲယတဲဒံးတၢ်လၢ တၢ်ထုကဖၣ်အပူၤ အခါလီၤ. ဖဲန့ၣ်အဆၢကတီၢ် ယလီၤဘှံးလီၤတီၤဒိၣ်မး ဒီးကဘၣ်ဖဲ ဟါခီတၢ်လုၢ်အဆၢကတီၢ်လီၤ. ၂၂ အဝဲမၤစၢၤယၤ ဒ်သိး ယကနၢ်ပၢၢ် တၢ်လၢ အကဟဲကဲထီၣ်အသး ဒီးတဲယၤလၢ

“အိ စီၤဒၤနံးယ့လးဧၢ, ယဟဲဒ်သိး ယကဟ့ၣ်လီၤနၤ တၢ်သူၣ်ဆးသးဆး ဒီးတၢ်သ့ၣ်ညါနၢ်ပၢၢ်လီၤ. ၂၃ မ့ၢ်လၢ နမ့ၢ်ပှၤလၢ အလုၢ်ဒိၣ်ပှ့ၤဒိၣ်ဒိၣ်မးတဂၤ+ အဃိ ဖဲနစးထီၣ်​ ဃ့ကညးတၢ်အခါ ကစၢ်ယွၤ ဟ့ၣ်လီၤတၢ်ကလုၢ် ဒီးယဟဲဒ်သိး ယကတဲဘၣ်နၤ အဂီၢ်လီၤ. အဃိ တၢ်ဂ့ၢ်လၢ ယကတဲနၤန့ၣ်​ ကနၣ်အီၤထံထံ ဒီးဂုာ်ကျဲးစၢး နၢ်ပၢၢ် တၢ်ထံၣ်လၢညါခီတက့ၢ်.

၂၄ “တၢ်ပာ်ပနီၣ်န့ၢ် တၢ်ဆၢကတီၢ် အနွံ ၇၀* လၢနပှၤကလုာ် ဒီးနဝ့ၢ်စီဆှံ+ အဂီၢ်လီၤ. ဒီးတၢ်ကမၤလီၤမၢ်ကွံာ် တၢ်မၤကမၣ်တၢ်, တၢ်ကမၤကတၢၢ်ကွံာ် တၢ်ဒဲးဘး,+ တၢ်ကပျၢ်ကွံာ် တၢ်ကမၣ်,+ တၢ်ကဒုးအိၣ်ထီၣ်​ တၢ်တီတၢ်လိၤ အထူအယိာ်,+ တၢ်ကပာ်ဂၢၢ်ပာ်ကျၢၤ တၢ်ထံၣ်လၢညါခီ ဒီးဝံအတၢ်စံးပာ်+ ဒီးတၢ်ကပာ်စီဆှံ တၢ်လီၢ်စီဆှံကတၢၢ်လီၤ.* ၂၅ နကဘၣ်သ့ၣ်ညါ ဒီးနၢ်ပၢၢ်တၢ်ဂ့ၢ်တခါအံၤလီၤ. စးထီၣ်လၢ တၢ်ဟ့ၣ်လီၤ တၢ်ကလုၢ်လၢ ပှၤကသူၣ်ထီၣ်ကဒါက့ၤ ဝ့ၢ်ယရူၤၡလ့ၣ်+ ဒ်အလီၢ်လီၢ် တုၤလီၤလၢ ပှၤအခိၣ်+ လၢအမ့ၢ် မ့းၡံအၤ*+ ဟဲဝဲန့ၣ်​ တၢ်ဆၢကတီၢ် ကအိၣ်ဝဲ ၇ နွံ ဒီး ၆၂ နွံလီၤ.+ ဝ့ၢ်ယရူၤၡလ့ၣ်​ ကဘၣ်တၢ်သူၣ်ထီၣ်ကဒါက့ၤအီၤ ဒ်အအိၣ်လၢညါအသိး ဃုာ်ဒီးတၢ်ဆါတၢ်ပှ့ၤအလီၢ် ဒီးတၢ်အကျိၤလၢ အအိၣ်ဝးတရံးအီၤ ဘၣ်ဆၣ်​ ကမ့ၢ်ဝဲ တၢ်ကိၢ်တၢ်ဂီၤ အဆၢကတီၢ်လီၤ.

၂၆ “ဖဲတၢ်ဆၢကတီၢ် ၆၂ နွံဝံၤအလီၢ်ခံ မ့းၡံအၤ ကဘၣ်တၢ်မၤသံအီၤ+ ဒီးတၢ်တအိၣ်တ့ၢ် လၢအဂီၢ် နီတမံၤလၢၤဘၣ်.+

“ဒီးပှၤခိၣ်ပှၤနၢ်လၢ အကဟဲတဂၤ အသုးမုၢ်န့ၣ်​ ကမၤဟးဂီၤ ဝ့ၢ်တဖျၢၣ်န့ၣ်​ ဒီးတၢ်စီဆှံအလီၢ်လီၤ.+ ဒီးအတၢ်ကတၢၢ်န့ၣ်* ကဟဲဝဲဒ် ထံလုၢ်ဘၢတၢ်အသိးလီၤ. ဒီးတၢ်ဒုးကအိၣ်ဝဲ တုၤလၢ တၢ်အကတၢၢ် ဒီးဒ်ကစၢ်ယွၤ အတၢ်ဆၢတဲာ် အိၣ်ဝဲအသိး တၢ်မၤဟးဂီၤတၢ် ကအိၣ်ဝဲလီၤ.+

၂၇ “ဒီးတၢ်အၢၣ်လီၤအီလီၤန့ၣ်​ အဝဲ ကပာ်ဂၢၢ်ပာ်ကျၢၤဝဲ လၢပှၤအါဂၤအဂီၢ် တနွံဒံးလီၤ. ဒီးဖဲနွံတဝာ်န့ၣ်​ အကမၤကတၢၢ်ကွံာ် တၢ်လုၢ်ထီၣ်​ ဆၣ်ဖိကီၢ်ဖိ ဒီးတၢ်လုၢ်တၢ်ပာ်လီၤ.+

“ပှၤလၢ အကမၤဟးဂီၤတၢ်တဂၤန့ၣ်​ ကဟဲဒိးဝဲ တၢ်လၢအလီၤသးဘၣ်အၢတဖၣ်န့ၣ်​ အဒံးဆ့လီၤ.+ ဒီးတၢ်လၢ ကစၢ်ယွၤ ဆၢတဲာ်ပာ်စၢၤဝဲန့ၣ်​ ကမၤအသးဒီး ဝ့ၢ်လၢအအိၣ်သယုၢ်တဖျၢၣ်​ တုၤလၢ အဟးဂီၤကွံာ်ဝဲလီၤ.”

၁၀ ဖဲဖၢၡၢၣ်အစီၤပၤကိရ့ၣ်+ ပၢတၢ် သၢနံၣ်တနံၣ်န့ၣ်​ စီၤဒၤနံးယ့လး လၢပှၤကိးစ့ၢ်ကီးအီၤလၢ စီၤဘ့ၤလးတၡါစၢ်န့ၣ်+ ဒိးန့ၢ်ဘၣ်ဝဲ တၢ်ကစီၣ်တခါ လၢကစၢ်ယွၤ အအိၣ်လီၤ. ဒီးတၢ်ကစီၣ်​ အဝဲန့ၣ်​ မ့ၢ်ဝဲတီဝဲ ဒီးအဘၣ်ဃးဒီး တၢ်ထီဒုၣ်ထီဒါလိာ်အသး ဖးဒိၣ်တခါ အဂ့ၢ်လီၤ. ဒီးစီၤဒၤနံးယ့လး နၢ်ပၢၢ်ဝဲ တၢ်ကစီၣ်တခါန့ၣ်​ ဒီးဒိးန့ၢ်ဘၣ်​ တၢ်သ့ၣ်ညါနၢ်ပၢၢ် ဘၣ်ဃးဒီး တၢ်လၢအထံၣ်ဝဲတဖၣ်လီၤ.

၂ ဖဲမုၢ်နံၤတဖၣ်န့ၣ်​ အတီၢ်ပူၤ ယၤ စီၤဒၤနံးယ့လးအံၤ ယသးအုး+ သၢနွံညါ. ၃ ယတအီၣ်​ တၢ်အီၣ်လၢအဝံၣ်ဘၣ်​ ဒီးယတအီၣ်တၢ်ညၣ်​ ဒီးအီစပံးထံဘၣ်. ဒီးယတဖှူယသးလၢ သိနီတမံၤဘၣ်​ သၢနွံလီၤ. ၄ ဖဲလါအဆိကတၢၢ်တလါ ၂၄ သီတသီန့ၣ်​ ယအိၣ်လၢ ထံကျိဖးဒိၣ်​ ထဲကြံး*+ အကၢၢ်နံၤ ၅ ဒီးယကွၢ်ထံတၢ်ဒီး ယထံၣ်ဘၣ်​ ပှၤတဂၤ ကူကၤဝဲ တၢ်ကူတၢ်ကၤလၢအညၣ်ဂ့ၤ+ ဒီးလၢအယီၢ်ဒ့န့ၣ်​ အိၣ်ဒီးယီၢ်တကိး* လၢပှၤတ့အီၤလၢ အူဖစးအထူလီၤ. ၆ ဒီးအမိၢ်ပှၢ်န့ၣ်​ လီၤဂာ်ဒ်သိးဒီး တၢ်မျၢ်ဘီလါ,+ အမဲာ်သၣ်န့ၣ်​ ဖျါလီၤဂာ်ဒ်သိးဒီး လီဝၢ်ဒံး, အမဲာ်ချံန့ၣ်​ လီၤဂာ်ဒ်သိးဒီး ဆှိ* လၢအကဲၤထီၣ်​ ဒီးအစုအခီၣ်န့ၣ်​ ဖျါမၤသးဒ်သိးဒီး တိၢ်ဘီလၢ တၢ်ထူးဘျ့ထီၣ်အီၤ+ ဒီးအကလုၢ်န့ၣ်​ သီၣ်လီၤဂာ်ဒ် ပှၤဂီၢ်မုၢ် အကလုၢ်သီၣ်ဝဲ အသိးလီၤ. ၇ ထဲဒၣ်​ ယၤ စီၤဒၤနံးယ့လးန့ၣ်​ ထံၣ်ဘၣ်တၢ်ထံၣ်လၢညါခီအံၤ ဒီးပှၤပိာ်ခွါ လၢအအိၣ်ဒီးယၤန့ၣ်​ တထံၣ်ဝဲဘၣ်.+ ဘၣ်ဆၣ်​ တၢ်ပျံၤတၢ်ဖုးဖးဒိၣ်​ လီၤဘၣ်​ အဝဲသ့ၣ်​ ဒီးအဝဲသ့ၣ်​ ဃ့ၢ်အိၣ်ခူသူၣ်လီၤ.

၈ ဒီးယအိၣ်တ့ၢ်က့ၤ ထဲတဂၤလီၤ. ဖဲယထံၣ်​ တၢ်ထံၣ်လၢညါခီ လၢအလီၤဘီလီၤမုၢ် တခါအံၤအခါ ယဂံၢ်ယဘါတအိၣ်​ နီတစဲးလၢၤဘၣ်​ ဒီးယမဲာ်သၣ်​ လီၤဝါသပှၢ်တၢၢ် ဒီးယဂံၢ်ယဘါ လၢာ်ကွံာ်ဝဲ ခဲလၢာ်လီၤ.+ ၉ ဒီးယနၢ်ဟူ အတဲတၢ်သီၣ်​ ဒီးဖဲယနၢ်ဟူ အတဲတၢ်အခါ ယမံဘၣ်ယသးဖးယိာ် ဒီးယမဲာ်ကျးလီၤအသးလၢ ဟီၣ်ခိၣ်လိၤလီၤ.+ ၁၀ ဘၣ်ဆၣ်​ ပှၤတဂၤ ဟဲထိးဘၣ်ယၤလၢ အစု+ ဒီးမၤဟူးယၤ ဒ်သိးယကပၢၢ်ထီၣ်​ ဒီးယကဆၢထၢၣ်​ လွံၢ်ခီခီၣ်လီၤ. ၁၁ ဒီးအဝဲတဲယၤလၢ

“အိ စီၤဒၤနံးယ့လးဧၢ, နမ့ၢ်ပှၤလၢ အလုၢ်ဒိၣ်ပှ့ၤဒိၣ်ဒိၣ်မးတဂၤလီၤ.+ သးစၢၢ်ဆၢ တၢ်ကတိၤလၢ ယကတဲဘၣ်နၤတဖၣ်တက့ၢ်. မ့ၢ်လၢတၢ်ဆှၢလီၤယၤ လၢနအိၣ်အဃိ ဆၢထၢၣ်လၢနလီၢ်တက့ၢ်.”

ဖဲအဝဲတဲယၤ ဒ်န့ၣ်အခါ ယဆၢထၢၣ်​ ဒီးယကနိးကစုာ်လီၤ.

၁၂ ဒီးအဝဲတဲယၤလၢ “အိ စီၤဒၤနံးယ့လးဧၢ, တဘၣ်ပျံၤတၢ်တဂ့ၤ.+ စးထီၣ်လၢမုၢ်နံၤ လၢနပာ်လီၤနသးလၢ နကနၢ်ပၢၢ်တၢ်ဂ့ၢ်တဖၣ်အံၤ ဒီးနဆီၣ်လီၤနသးလၢ နကစၢ်ယွၤအမဲာ်ညါန့ၣ်​ ကစၢ်ယွၤနၢ်ဟူ နတၢ်ကတိၤတဖၣ်လီၤ. ဒီးယဟဲလၢနအိၣ်လၢ နတၢ်ကတိၤတဖၣ်အဃိလီၤ.+ ၁၃ ဘၣ်ဆၣ်​ ဖၢၡၢၣ်အဘီမုၢ်အခိၣ်န့ၣ်+ ဆၢထၢၣ်ထီဒါယၤ ယံာ်ဝဲ ၂၁ သီညါ. သနာ်က့ ဖဲန့ၣ်အခါ ပှၤခိၣ်ပှၤနၢ်လၢ အပတီၢ်ထီ ကတၢၢ်တဖၣ်အကျါတဂၤ လၢအမ့ၢ် မံၤက့လးန့ၣ်+ ဟဲမၤစၢၤယၤလီၤ. ဒီးယဘၣ်အိၣ်တ့ၢ်ဖဲန့ၣ်​ လၢဖၢၡၢၣ်အစီၤပၤတဖၣ်န့ၣ်​ အကပၤ တတီၤဖိလီၤ. ၁၄ မ့ၢ်လၢ တၢ်ထံၣ်လၢညါခီတခါန့ၣ်​ ဘၣ်ဃးဒီး တၢ်လၢအကဟဲကဲထီၣ်အသးလၢ ခါဆူညါ အဃိ ယဟဲဒ်သိး ယကတဲနၢ်ပၢၢ်နၤလၢ မုၢ်နံၤအကတၢၢ်တဖၣ်​ အတီၢ်ပူၤ+ တၢ်ကမၤအသးဒီး နပှၤကလုာ် ဒ်လဲၣ်အဂ့ၢ်န့ၣ်လီၤ.”+

၁၅ ဖဲအဝဲတဲယၤ တၢ်ကတိၤတဖၣ်န့ၣ်အခါ ယကွၢ်လီၤဟီၣ်ခိၣ်​ ဒီးယတဲတၢ်တဘၣ်​ နီတမံၤလၢၤဘၣ်. ၁၆ ဒီးပှၤလၢ အလီၤဂာ်ဒီး ပှၤကညီတဂၤန့ၣ်​ ထိးဘၣ်ယထးခိၣ်+ ဒီးယအိးထီၣ်​ ယကိာ်ပူၤ ဒီးယတဲ ပှၤလၢအဆၢထၢၣ်လၢ ယမဲာ်ညါတဂၤန့ၣ်လၢ “ယကစၢ်ဧၢ, ခီဖျိလၢ တၢ်ထံၣ်လၢညါခီအဃိ ယကနိးကစုာ် ဒီးယဂံၢ်ယဘါ တအိၣ်လၢၤဘၣ်.+ ၁၇ အဃိ နခ့နပှၤ ယၤအံၤန့ၣ်​ တဲတၢ်ဒီး နၤကသ့ဒ်လဲၣ်.+ ခဲအံၤန့ၣ်​ ယဂံၢ်ယဘါ တအိၣ်ဘၣ်​ ဒီးယကသါမး တပှဲၤလၢၤဘၣ်.”+

၁၈ ဒီးပှၤလၢ အလီၤဂာ်ဒီး ပှၤကညီတဂၤန့ၣ်​ ထိးဘၣ်ကဒီးယၤ ဒီးမၤဆူၣ်ထီၣ်​ ယဂံၢ်ယဘါလီၤ.+ ၁၉ ဒီးအဝဲတဲဝဲလၢ “အိ ပှၤလၢအလုၢ်ဒိၣ်ပှ့ၤဒိၣ်​ ဒိၣ်မးတဂၤဧၢ,+ တဘၣ်ပျံၤတၢ်တဂ့ၤ.+ တၢ်ခဲလၢာ် ကလဲၤအသးဒီးနၤ ဂ့ၤဂ့ၤလီၤ.+ ပာ်ဆူၣ်နသးနီၤ, ပာ်ဆူၣ်ထီၣ်နသး.” ဖဲအတဲတၢ်ဒီးယၤအခါ ယဂံၢ်ယဘါဆူၣ်ထီၣ်​ ဒီးယတဲလၢ “ယကစၢ်ဧၢ, မ့ၢ်လၢနမၤဆူၣ်ထီၣ်​ ယဂံၢ်ယဘါလံအဃိ တဲတၢ်ဟီ.”

၂၀ ဒီးအဝဲတဲဝဲလၢ “ဘၣ်မနုၤအဃိ ယဟဲလၢ နအိၣ်လဲၣ်န့ၣ်​ မ့ၢ်နသ့ၣ်ညါဧါ. ခဲအံၤ ယကက့ၤဒုးတၢ်ဒီး ဖၢၡၢၣ်အခိၣ်လီၤ.+ ဖဲယဟးထီၣ်အခါန့ၣ်​ ကြံးအခိၣ်တဂၤ ကဟဲဝဲလီၤ. ၂၁ ယကတဲဘၣ်နၤ တၢ်လၢ အဘၣ်တၢ်ကွဲးလီၤအီၤလၢ တၢ်မ့ၢ်တၢ်တီ အလံာ်ပူၤလီၤ. မ့တမ့ၢ်လၢ နပှၤခိၣ်ပှၤနၢ်+ မံၤက့လးဘၣ်န့ၣ်+ ပှၤအဂၤလၢ အဆီၣ်ထွဲယၤ ဘၣ်ဃးဒီး တၢ်ဂ့ၢ်တဖၣ်အံၤန့ၣ်​ တအိၣ်နီတဂၤဘၣ်.

၁၁ “ဖဲပှၤမၤဒဲဖိ စီၤဒၤရယါဝ့ၣ်+ ပၢတၢ် အဆိကတၢၢ်တနံၣ်န့ၣ်​ ယဟဲဒ်သိး ယကဆီၣ်ထွဲမၤစၢၤ ဒီးဟ့ၣ်ဂံၢ်ဟ့ၣ်ဘါ မံၤက့လး အဂီၢ်လီၤ. ၂ တၢ်လၢယကတဲနၤ ခဲအံၤန့ၣ်​ မ့ၢ်ဝဲတီဝဲလီၤ.

“စီၤပၤအဂၤသၢဂၤ ကဟဲအိၣ်ထီၣ်* လၢဖၢၡၢၣ်​ အဘီမုၢ်အပူၤ ဒီးစီၤပၤ လွံၢ်ဂၤတဂၤန့ၣ်​ ကပာ်ဖှိၣ်ထီၣ်တၢ်ထူးတၢ်တီၤ အါန့ၢ်ဒံး ပှၤအဂၤခဲလၢာ်လီၤ. ဖဲအဂံၢ်ဆူၣ်ထီၣ်​ ခီဖျိလၢ အတၢ်ထူးတၢ်တီၤတဖၣ်အခါ အဝဲ ကထိၣ်ဟူးထိၣ်ဂဲၤထီၣ်​ ပှၤကိးဂၤဒဲး ဒ်သိး ကထီဒါဝဲ ကြံးအဘီမုၢ် အဂီၢ်လီၤ.+

၃ “ဒီးစီၤပၤလၢ အဂံၢ်ဆူၣ်ဘါဆူၣ်တဂၤ ကဂဲၤဆၢထၢၣ်​ ဒီးကပၢဘၣ်ဝဲ တၢ်လီၢ်ဖးလဲၢ်+ ဒီးကမၤဝဲဖဲအသးလီၤ. ၄ ဘၣ်ဆၣ်​ ဖဲအဝဲ ဆၢထၢၣ်အခါ အဘီမုၢ်န့ၣ်​ ကလီၤပှီၢ်ကွံာ် ဒီးကလီၤဖးကွံာ်ဝဲလၢ မူခိၣ်အကလံၤကျိၤလွံၢ်ကျိၤ အအိၣ်လီၤ.+ ဒီးဘီမုၢ်န့ၣ်​ တၢ်တဟ့ၣ်လီၤအီၤလၢ အစၢၤအသွဲၣ်တဖၣ်​ အအိၣ်ဘၣ်. ဒီးဘီမုၢ်အံၤ တဒိၣ်စိထဲသိးဒီး ဖဲအဝဲပၢတၢ်အခါဘၣ်. တၢ်ကထဲးထီၣ်ကွံာ် ဘီမုၢ်လၢအအိၣ်​ ဒီးဘီမုၢ်အံၤ ကကဲထီၣ်​ ပှၤဂၤအတၢ်လီၤ.

၅ “ဒီးကလံၤထံးအစီၤပၤ လၢအမ့ၢ် အဝဲအသုးခိၣ်တဂၤန့ၣ်​ အဂံၢ်အဘါ ကဆူၣ်ထီၣ်ဝဲ ဘၣ်ဆၣ်​ ပှၤအဂၤတဂၤ* ကဒိၣ်စိ လၢအဖီခိၣ်​ ဒီးကပၢဘၣ်​ တၢ်လီၢ်ဖးလဲၢ် ဒီးအစိကမီၤ ကဒိၣ်န့ၢ်ဒံးအီၤလီၤ.*

၆ “ဖဲတဘျုးနံၣ်ဝံၤအလီၢ်ခံ အဝဲသ့ၣ်* ကဖီၣ်လိာ်သးစုလီၤ. ဒီးကလံၤထံးအစီၤပၤ အဖိမုၣ်န့ၣ်​ ကလဲၤဝဲလၢ ကလံၤစိး အစီၤပၤအအိၣ်​ ဒ်သိး ကဒုးအိၣ်ထီၣ်​ တၢ်အၢၣ်လီၤအီလီၤတခါ အဂီၢ်လီၤ. ဘၣ်ဆၣ်​ စီၤပၤ အဖိမုၣ်အံၤန့ၣ်​ အစုအစိကမီၤ ကလီၤမၢ် ဒီးစီၤပၤန့ၣ်​ အစိကမီၤ ကလီၤမၢ်ဝဲလီၤ. ဒီးစီၤပၤ အဖိမုၣ်အံၤ ဃုာ်ဒီး ပှၤလၢအလဲၤဆှၢအီၤတဖၣ်​ ဒီးအပၢ် ဒီးပှၤလၢ အမၤဆူၣ်ထီၣ်​ စီၤပၤအဖိမုၣ်အံၤ အဂံၢ်အဘါလၢ ဆၢကတီၢ်ဖဲန့ၣ်န့ၣ်​ ကဘၣ်တၢ်ဟ့ၣ်လီၤကွံာ် အဝဲသ့ၣ်​ လၢပှၤဂၤအစုပူၤလီၤ. ၇ ဒီးပှၤလၢ စီၤပၤအဖိမုၣ်​ တဂၤအံၤ အဟံၣ်ဖိဃီဖိအကျါ တဂၤန့ၣ်​ ကထီၣ်က့ၤ လၢအပၢ်အလီၢ်န့ၣ်လီၤ. ဒီးအဝဲ ကလဲၤသဂၢၢ် သုးမုၢ် ဒီးကလဲၤဒုးဝဲ ကလံၤစိးအစီၤပၤ အဝ့ၢ်ဒူၣ်လၢအကျၢၤ ဒီးကဒုး အဝဲသ့ၣ်​ ဒီးကမၤနၢၤဝဲလီၤ. ၈ ဒီးအဝဲ ကက့ၤကဒါက့ၤလၢ ကီၢ်အဲၤကူပတူး ဒီးကက့ၤစိာ်ဃုာ်ဒီး အဝဲသ့ၣ်အယွၤတဖၣ်, အတၢ်ဂီၤတၢ်ဖှီၣ်ထးတဖၣ်, အတၢ်ဖိတၢ်လံၤလၢ အဘၣ်တၢ်တ့အီၤလၢ ထူဒီးစ့ ဒီးကက့ၤဖီၣ်​ ပှၤကညီ စ့ၢ်ကီးလီၤ. ဒီးအကအိၣ်ယံၤဝဲဒီး ကလံၤစိးအစီၤပၤလၢ တဘျုးနံၣ်​ အတီၢ်ပူၤလီၤ. ၉ ဒီးကလံၤစိး အစီၤပၤ ကနုာ်လီၤဒုး ကလံၤထံး အစီၤပၤအဘီမုၢ် ဘၣ်ဆၣ်​ ကဂုၤက့ၤလၢ အလီၢ်ခံ ဒီးကက့ၤကဒါက့ၤ လၢအနီၢ်ကစၢ် အထံကီၢ်လီၤ.

၁၀ “မ့မ့ၢ် အ* ဖိခွါတဖၣ်န့ၣ်​ ကကတဲာ်ကတီၤထီၣ်အသးလၢ တၢ်ဒုးအဂီၢ် ဒီးပာ်ဖှိၣ်ထီၣ်​ သုးမုၢ်ဖးဒိၣ်​ တဒူၣ်လီၤ. လၢအဖိခွါတဖၣ်အံၤ အကျါတဂၤန့ၣ်* ကလဲၤဆူညါ သပှၢ်တၢၢ် ဒီးကလဲၤတၢ်လၢ ကီၢ်ပူၤချ့ချ့, လီၤဂာ်ဒ် ထံလုၢ်ဘၢတၢ်အသိးလီၤ. ဘၣ်ဆၣ်​ အဝဲကက့ၤကဒါက့ၤ ဒီးဒုးတၢ်တုၤလီၤလၢ အတုၤလၢ အနီၢ်ကစၢ် အတၢ်အိၣ်သဒၢ အလီၢ်လီၤ.

၁၁ “ဒီးကလံၤထံးအစီၤပၤ ကသးဒိၣ်ထီၣ်တၢ် ဒီးကလဲၤဒုးဝဲ ကလံၤစိးအစီၤပၤလီၤ. အဝဲ* ကပာ်ဖှိၣ်ထီၣ်​ ပှၤဂီၢ်မုၢ်ဖးဒိၣ်တဖု ဘၣ်ဆၣ်​ ပှၤဂီၢ်မုၢ်အံၤ ကဘၣ်တၢ်ဟ့ၣ်လီၤအီၤလၢ စီၤပၤတဂၤန့ၣ်* အစုပူၤလီၤ. ၁၂ ဒီးပှၤဂီၢ်မုၢ်န့ၣ်​ ကဘၣ်တၢ်ထုးကွံာ်အီၤလီၤ. စီၤပၤတဂၤန့ၣ်​ ကပာ်ဒိၣ်ပာ်ထီအသး ဒီးအကမၤဟးဂီၤ ပှၤအကလးတဖၣ်လီၤ. ဘၣ်ဆၣ်​ အဝဲ တသူအတၢ်စိတၢ်ကမီၤ ခဲလၢာ်ဘၣ်.

၁၃ “ဒီးကလံၤစိး အစီၤပၤ ကဟဲက့ၤကဒါက့ၤ ဒီးကပာ်ဖှိၣ်ထီၣ်​ ပှၤဂီၢ်မုၢ်ဖးဒိၣ်တဖု အါန့ၢ်ဒံး လၢညါတဘျီလီၤ. ဒီးဖဲတၢ်ဆၢကတီၢ် လဲၤပူၤကွံာ် တဘျုးနံၣ်​ ဝံၤအလီၢ်ခံ အဝဲ ကဟဲဒီးအသုးမုၢ်ဖးဒိၣ်တဖု ဒီးကဟဲစိာ်ဃုာ်ဒီး တၢ်လၢအဝဲသ့ၣ်​ လိၣ်ဘၣ်ဝဲတဖၣ်​ အါအါဂီၢ်ဂီၢ်လီၤ. ၁၄ ဖဲန့ၣ်အဆၢကတီၢ် ပှၤအါဂၤ ကဆၢထၢၣ်ထီဒါ ကလံၤထံးအစီၤပၤလီၤ.

“ပှၤလၢအမၤဆူၣ်မၤစိးတၢ်တဖၣ်* လၢနပှၤကလုာ် အကျါန့ၣ်​ ကပိာ်ထီၣ်ပှၤခံ ဒ်သိး ကမၤလၢထီၣ်ပှဲၤထီၣ်​ တၢ်ထံၣ်လၢညါခီတခါ ဘၣ်ဆၣ်​ အဝဲသ့ၣ်​ ကၡူ* ဝဲလီၤ.

၁၅ “ဒီးကလံၤစိးအစီၤပၤ ကဟဲပာ်ပူၣ်ထီၣ်ဟီၣ်ခိၣ်​ ဒ်သိး ကဒုးဝ့ၢ်လၢ အအိၣ်ဒီး အဒူၣ်လၢ အကျၢၤတဖျၢၣ်အဂီၢ် ဒီးကမၤန့ၢ်အီၤလီၤ. ဒီးကလံၤထံး အသုးမုၢ်တဖၣ်​ ဒီးအပှၤဃုထၢဖိတဖၣ်​ ဆၢထၢၣ်တြီဆၢတၢ် တန့ၢ်ဘၣ်. ဒီးအဝဲသ့ၣ်​ အစိကမီၤလၢ ကတြီဆၢတၢ် အဂီၢ်န့ၣ်​ တအိၣ်ဘၣ်. ၁၆ ဒီးပှၤတဂၤအံၤ* လၢအဟဲဒုး ကလံၤထံးအစီၤပၤန့ၣ်​ ကမၤဖဲအသး ဒီးပှၤတြီဆၢအီၤ တန့ၢ်နီတဂၤဘၣ်. အဝဲ ကလဲၤဆၢထၢၣ်လၢ ကီၢ်ဃံလၤ+ ဒီးအကအိၣ်ဒီး တၢ်စိတၢ်ကမီၤလၢ ကမၤသံတၢ် အဂီၢ်လီၤ. ၁၇ အဝဲ ကပာ်လီၤအသးလၢ အကဟဲဒီး အဘီမုၢ် အစိအကမီၤ ခဲလၢာ်ခဲဆ့လီၤ. ဘၣ်ဆၣ်​ အကမၤတၢ်အၢၣ်လီၤအီလီၤဒီး စီၤပၤတဂၤန့ၣ်​ ဒီးအမၤတၢ် ကကဲထီၣ်လိၣ်ထီၣ်လီၤ. ဒီးတၢ်ကဟ့ၣ်လီၤအီၤ အခွဲးလၢ အကမၤဟးဂီၤ ဖိမုၣ်တဂၤန့ၣ်လီၤ. ဒီးဖိမုၣ်တဂၤန့ၣ်​ မၤတၢ်တကဲထီၣ်လိၣ်ထီၣ်ဘၣ်​ ဒီးတတီဒီး စီၤပၤလၢၤဘၣ်. ၁၈ ဒီးအဝဲ* ကဃၣ်အခိၣ်လၢ တၢ်လီၢ်လၢ ပီၣ်လဲၣ်ကၢၢ်နံၤတကပၤ ဒီးကမၤန့ၢ်ဝဲ တၢ်လီၢ်အါတီၤလီၤ. ဒီးသုးခိၣ်တဂၤလၢ စီၤပၤဒုၣ်ဒွဲၣ်စံးအၢဝဲန့ၣ်​ ကမၤကတၢၢ်ကွံာ် တၢ်ဒုၣ်ဒွဲၣ်စံးအၢလၢ အတူၢ်ဘၣ်ဝဲအဃိ စီၤပၤ အတၢ်ဒုၣ်ဒွဲၣ်စံးအၢန့ၣ်​ ကကတၢၢ်ဝဲလီၤ. ဒီးသုးခိၣ်တဂၤအံၤ ကဒုးလီၤဘၣ်က့ၤ တၢ်ဒုၣ်ဒွဲၣ်စံးအၢလၢ ပှၤတဂၤန့ၣ်* အလိၤလီၤ. ၁၉ ဒီးအဝဲ* ကဃၣ်ကဒါက့ၤအခိၣ်ဆူ တၢ်အိၣ်သဒၢအလီၢ်တဖၣ်လၢ အနီၢ်ကစၢ်အထံကီၢ်ပူၤလီၤ. ဒီးအခီၣ်ကဘၣ်တိၢ် ဒီးကလီၤဃံၢ် ဒီးကလီၤမၢ်ကွံာ်ဝဲလီၤ.

၂၀ “ဒီးပှၤလၢအကထီၣ်အလီၢ်န့ၣ်​ ကဆှၢလီၤဝဲ ပှၤထၢတၢ်ခိတၢ်သွဲဖိတဂၤ* လၢဘီမုၢ်လၢ အလီၤကဟုကညီၢ်တဘ့ၣ်အပူၤလီၤ. ဒီးလၢစှၤနံၤစှၤသီ အတီၢ်ပူၤန့ၣ်​ အဝဲ* ကသံဝဲ ဘၣ်ဆၣ်​ တမ့ၢ်လၢ တၢ်မၤဆူၣ်မၤစိး ဒီးတၢ်ဒုးတၢ်ယၤအဃိဘၣ်.

၂၁ “ဒီးပှၤလၢ အလီၤသးဟ့တဂၤ* ကထီၣ်က့ၤအလီၢ် ဒီးအဝဲသ့ၣ်တဖၣ်န့ၣ်​ တဟ့ၣ်လီၤအီၤလၢ ဘီမုၢ်အလၤကပီၤဘၣ်. ဘၣ်ဆၣ်​ အဝဲ ကဟဲနုာ်လီၤဝဲ ဖဲတၢ်ဘံၣ်တၢ်ဘၢ အဆၢကတီၢ်* ဒီးကဟံးန့ၢ် ဘီမုၢ်အံၤ ခီဖျိလၢ တၢ်လီတၢ်ဝ့ၤလီၤ. ၂၂ သုးမုၢ်တဖၣ်လၢ အလီၤဂာ်ဒ် ထံလုၢ်ဘၢတၢ်အသိးန့ၣ်​ ကလီၤထွံလၢအဃိ ဒီးအဝဲသ့ၣ်​ ကဘၣ်တၢ်မၤလီၤကရဲအီၤလီၤ. ဒီးတၢ်အၢၣ်လီၤအီလီၤ+ အခိၣ်တဂၤ+ ကဘၣ်တၢ်မၤလီၤကရဲအီၤ စ့ၢ်ကီးလီၤ. ၂၃ ဒီးခီဖျိလၢ ပှၤအဂၤတဖၣ်​ ဖီၣ်လိာ်သးစုဒီး ပှၤလၢ အလီၤသးဟ့တဂၤန့ၣ်​ အဃိ အဝဲကလံၣ်တၢ်လီတၢ် ဒီးကလဲၤထီၣ်လဲၤထီလီၤ. ဒီးအဂံၢ်ကဆူၣ်ထီၣ်​ ခီဖျိလၢ ပှၤစှၤတဖု အဃိလီၤ. ၂၄ ဖဲတၢ်ဘံၣ်တၢ်ဘၢ အဆၢကတီၢ်န့ၣ်* အဝဲ ကလဲၤနုာ်လီၤလၢ ကီၢ်ရ့ၣ်အဟီၣ်ကဝီၤလၢ အဂ့ၤကတၢၢ်တဖၣ်အပူၤ ဒီးကမၤတၢ်လၢ အမိၢ်ပၢ်ဖံဖု လၢပျၢၤတဖၣ်​ တမၤဝဲ နီတဘျီဘၣ်လီၤ. တၢ်လၢတၢ်ဂုာ်န့ၢ်အီၤတဖၣ်, တၢ်စုလီၢ်ခီၣ်ခိၣ်​ ဒီးတၢ်ဖိတၢ်လံၤတဖၣ်န့ၣ်​ အဝဲ ကဟ့ၣ်နီၤလီၤ ပှၤဂၤတဖၣ်လီၤ. ဒီးအဝဲ ကကူၣ်ထီၣ်လၢ ကထီဒါ ဝ့ၢ်တဖၣ်လၢ အအိၣ်ဒီးအဒူၣ်လၢအကျၢၤ ဘၣ်ဆၣ်​ အကမၤဝဲဒ်န့ၣ်​ ထဲဒၣ်​ တတီၤဖိလီၤ.

၂၅ “ဒီးအဝဲကပာ်ဖှိၣ်ထီၣ်​ အစိကမီၤ ဒီးကပာ်ဒူအသး ဒီးကဟဲဝဲဒီး သုးမုၢ်ဖးဒိၣ်တဒူၣ်​ ဒ်သိး ကဒုးကလံၤထံးအစီၤပၤ အဂီၢ်လီၤ. ဒီးကလံၤထံးအစီၤပၤ ကကိးဖှိၣ်​ သုးမုၢ်တဒူၣ်​ လၢအဂံၢ်ဆူၣ်ဘါဆူၣ်ဖးဒိၣ်​ ဒီးအနီၣ်ဂံၢ် အိၣ်ဝဲအါအါဂီၢ်ဂီၢ် ဒ်သိး ကကတဲာ်ကတီၤထီၣ်အသးလၢ တၢ်ဒုးအဂီၢ်လီၤ. ဒီးမ့ၢ်လၢ ပှၤကကူၣ်အၢအီၤ* အဃိ အဝဲ* ကလီၤဃံၢ်ဝဲလီၤ. ၂၆ ဒီးပှၤလၢအအီၣ်​ အတၢ်ဝံၣ်တၢ်ဆၢတဖၣ်န့ၣ်​ ကမၤလီၤဃံၢ်အီၤလီၤ.

“မ့မ့ၢ် အသုးမုၢ်န့ၣ်​ ကဘၣ်​ တၢ်ခွဲပျီကွံာ်အီၤ ဒီးအဝဲသ့ၣ်အါဂၤန့ၣ်​ ကသံဝဲလီၤ.

၂၇ “မ့မ့ၢ် စီၤပၤခံဂၤန့ၣ်​ အဝဲသ့ၣ်​ ကအဲၣ်ဒိးမၤတၢ်လၢ အတဂ့ၤဘၣ်​ ဒီးအဝဲသ့ၣ်​ ကဆ့ၣ်နီၤလၢ စီၢ်နီၤခိၣ်တဖျၢၣ်ဃီအဃၢၤ ဒီးကတဲလံၣ်တဲလီလိာ်အသး တဂၤဒီးတဂၤလီၤ. ဘၣ်ဆၣ်​ တၢ်တကဲထီၣ်လိၣ်ထီၣ်​ နီတမံၤဘၣ်, မ့ၢ်လၢ တၢ်အကတၢၢ်န့ၣ်​ ကဟဲတုၤလၢ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ အဃိလီၤ.+

၂၈ “ဒီးအဝဲ* ကက့ၤလၢ အတၢ်လီၢ်တၢ်ကျဲ ဒီးကက့ၤစိာ်ဃုာ်ဒီး တၢ်ဖိတၢ်လံၤအါမး ဒီးအဝဲ ကပာ်လီၤအသးလၢ ကထီဒါ တၢ်အၢၣ်လီၤအီလီၤစီဆှံလီၤ. ဒီးအမၤတၢ် ကကဲထီၣ်လိၣ်ထီၣ်​ ဒီးကက့ၤကဒါက့ၤလၢ အတၢ်လီၢ်တၢ်ကျဲလီၤ.

၂၉ “ဖဲတၢ်ဆၢကတီၢ်လၢ တၢ်ပာ်ပနီၣ်အီၤဘၣ်ဝဲအခါ အဝဲကလဲၤထီဒါကဒီး ကီၢ်လၢကလံၤထံးတခီလီၤ. ဘၣ်ဆၣ်​ တဘျီအံၤန့ၣ်​ တၢ်တကဲထီၣ်အသး ဒ်သိးလၢညါဘၣ်, ၃၀ မ့ၢ်လၢ ကဘီတဖၣ်လၢ အအိၣ်ဟဲလၢ ကံတံၣ်န့ၣ်+ ကဟဲဒုးအီၤ ဒီးဖဲန့ၣ်အခါ အဝဲကဘၣ်​ ဆီၣ်လီၤအသးအဃိလီၤ.

“အဝဲကက့ၤကဒါက့ၤ ဒီးကပျၢ်လီၤအတၢ်သးဒိၣ်လၢ တၢ်အၢၣ်လီၤအီလီၤစီဆှံ+ အဖီခိၣ်​ ဒီးအမၤတၢ် ကကဲထီၣ်လိၣ်ထီၣ်လီၤ. ဒီးအဝဲကက့ၤကဒါက့ၤ ဒီးကဘၣ်သူၣ်ဘၣ်သး ပှၤလၢအပာ်တ့ၢ် တၢ်အၢၣ်လီၤအီလီၤစီဆှံလီၤ. ၃၁ ဒီးအသုးမုၢ်တဖၣ်​ ကဆၢထၢၣ်​ ဒီးအဝဲသ့ၣ်​ ကမၤဘၣ်အၢ တၢ်စီဆှံအလီၢ်+ လၢအမ့ၢ် တၢ်အိၣ်သဒၢအလီၢ် ဒီးတၢ်လုၢ်လၢ အဘၣ်တၢ်လုၢ်ထီၣ်အီၤ ထီဘိန့ၣ်​ အဝဲသ့ၣ်​ ကမၤပတုာ်ကွံာ်ဝဲလီၤ.+

“ဒီးတၢ်ကပာ်ထီၣ်​ တၢ်လၢအလီၤသးဘၣ်အၢလၢ အမၤဟးဂီၤတၢ်လီၤ.+

၃၂ “ဒီးပှၤလၢ အမၤတၢ် အၢအၢသီသီ ဒီးတတူၢ်လိာ် တၢ်အၢၣ်လီၤအီလီၤဘၣ်န့ၣ်​ ကလံၤစိးအစီၤပၤအံၤ ကသူတၢ်ကတိၤတဖၣ်လၢ အအိၣ်ဒီး တၢ်လီတၢ်ဝ့ၤ ဒ်သိး ကဆှၢကမၣ်​ အဝဲသ့ၣ်လၢ ကထီဒါက့ၤတၢ် အဂီၢ်လီၤ. ဘၣ်ဆၣ်​ ပှၤလၢ အသ့ၣ်ညါ ကစၢ်ယွၤန့ၣ်​ ကအိၣ်ဂၢၢ်ကျၢၤဝဲ ဒီးမၤတၢ် ကကဲထီၣ်လိၣ်ထီၣ်လီၤ. ၃၃ ဒီးပှၤလၢအအိၣ်ဒီး တၢ်သ့ၣ်ညါနၢ်ပၢၢ်+ လၢပှၤဟီၣ်ခိၣ်ဖိအကျါန့ၣ်​ ကဟ့ၣ်လီၤပှၤအါဂၤ လၢတၢ်သ့ၣ်ညါနၢ်ပၢၢ်လီၤ. ဒီးအဝဲသ့ၣ်​ ကလီၤဃံၢ် တတီၤဖိ ခီဖျိလၢနး, မ့ၣ်အူလၣ်, တၢ်ဖီၣ်န့ၢ်အဝဲသ့ၣ်​ ဒီးတၢ်ဂုာ်န့ၢ် အဝဲသ့ၣ်​ အတၢ်အဃိလီၤ. ၃၄ ဖဲအဝဲသ့ၣ်​ လီၤဃံၢ်အခါ အဝဲသ့ၣ်​ ကဒိးန့ၢ်ဘၣ်​ တၢ်မၤစၢၤ တစဲးဖိလီၤ. ဒီးပှၤအါဂၤ ကဟဲပၣ်ဃုာ်လၢ အဝဲသ့ၣ်အကျါ ခီဖျိလၢ အတဲတၢ်သ့တဲတၢ်ဘၣ်* အဃိလီၤ. ၃၅ ဒီးပှၤလၢ အအိၣ်ဒီး တၢ်သ့ၣ်ညါနၢ်ပၢၢ်တဖၣ်အကျါ တနီၤန့ၣ်​ ကလီၤဃံၢ်ဝဲ ဒ်သိး တၢ်ကပှံၢ်စီတၢ်* ဒီးဒ်သိး တၢ်ကမၤကဆှီထီၣ်တၢ် ဒီးတၢ်ကမၤစီဆှံထီၣ်တၢ် အဂီၢ်လီၤ.+ တၢ်ကမၤအသးဒ်န့ၣ်​ တုၤလီၤလၢ တၢ်အကတၢၢ် အဆၢကတီၢ် မ့ၢ်လၢတၢ်ဆၢကတီၢ် ဘၣ်တၢ်ပာ်ပနီၣ်အီၤ အဃိလီၤ.

၃၆ “စီၤပၤတဂၤန့ၣ်* ကမၤတၢ်ဖဲအသး ဒီးအဝဲ ကပာ်ထီၣ်ထီအသး ဒီးပာ်ဒိၣ်အသးလၢ ယွၤခဲလၢာ် အဖီခိၣ်​ ဒီးကတဲအၢတဲသီ ယွၤတဖၣ်အယွၤလီၤ.+ အဝဲမၤတၢ် ကကဲထီၣ်လိၣ်ထီၣ်​ တုၤလၢ တၢ်သးဒိၣ်ထီၣ်​ အဆၢကတီၢ် ကတၢၢ်ဝဲအခါ, မ့ၢ်လၢ တၢ်လၢကစၢ်ယွၤ ဆၢတဲာ်ဝဲန့ၣ်​ ကဘၣ်မၤအသးအဃိလီၤ. ၃၇ ဒီးစီၤပၤတဂၤန့ၣ်​ တကနၣ်ဃုာ် အမိၢ်ပၢ်ဖံဖု လၢပျၢၤတဖၣ်​ အကစၢ်ယွၤဘၣ်​ ဒီးတကနၣ်ဃုာ် ပိာ်မုၣ်တဖၣ်​ အတၢ်ဘၣ်သးဘၣ်​ ဒီးတကနၣ်ဃုာ်စ့ၢ်ကီး ယွၤအဂၤတဖၣ်​ နီတဂၤဘၣ်. ဒီးအဝဲ ကပာ်ဒိၣ်ပာ်ထီအသးလၢ ပှၤခဲလၢာ်အဖီခိၣ်လီၤ. ၃၈ စီၤပၤအံၤ ကမၤလၤကပီၤ တၢ်အိၣ်သဒၢအလီၢ်တဖၣ်​ အယွၤလီၤ. အဝဲကမၤလၤကပီၤ ယွၤလၢအပၢ်တဖၣ်​ တသ့ၣ်ညါဝဲဘၣ်တဂၤအံၤ လၢထူ, စ့, လၢၢ်လၢအလုၢ်ဒိၣ်ပှ့ၤဒိၣ်တဖၣ်​ ဒီးတၢ်လုၢ်ဒိၣ်ပှ့ၤဒိၣ်တဖၣ်လီၤ. ၃၉ အဝဲကသန့ၤအသးလၢ ယွၤအသီတဂၤအံၤ* ဒီးကဒုး* တၢ်အိၣ်သဒၢအလီၢ်လၢ အကျၢၤဒိၣ်ကတၢၢ်တဖၣ်လီၤ. အဝဲကဟ့ၣ်လီၤဝဲ ပှၤလၢအပာ်ကဲအီၤတဖၣ်လၢ တၢ်လၤကပီၤဖးဒိၣ်​ ဒီးကဒုးပၢ အဝဲသ့ၣ်လၢ ပှၤအါဂၤအဖီခိၣ်လီၤ. ဒီးပှၤလၢ အဟ့ၣ်အီၤ တၢ်အပှ့ၤန့ၣ်​ အဝဲ ကနီၤလီၤန့ၢ် အဝဲသ့ၣ်​ လၢဟီၣ်ခိၣ်​ အတၢ်လီၢ်တၢ်ကျဲတဖၣ်လီၤ.

၄၀ “ဖဲတၢ်အကတၢၢ် အဆၢကတီၢ်န့ၣ်​ ကလံၤထံးအစီၤပၤ ကဘျၢၣ်လိာ်သးဒီး ကလံၤစိးအစီၤပၤလီၤ. ဒီးကလံၤစိးအစီၤပၤ ကဟဲသဖှိထီဒါအီၤ ဒ်ကလံၤမုၢ်အသိး ဃုာ်ဒီး လ့ၣ်ကဟၣ်သုးတဖၣ်, ပှၤဒိးကသ့ၣ်​ ဒီးကဘီအါမးလီၤ. ဒီးအဝဲ* ကလဲၤနုာ်လီၤလၢ ကီၢ်အဂၤတဖၣ်​ ဒီးကလဲၤတၢ်လၢ အပူၤချ့ချ့ ဒ်ထံလုၢ်ဘၢတၢ်အသိးလီၤ. ၄၁ အဝဲကနုာ်လီၤစ့ၢ်ကီးလၢ ကီၢ်ဃံလၤအပူၤ+ ဒီးကီၢ်အါဘ့ၣ်​ ကဘၣ်တၢ်မၤနၢၤအီၤလီၤ. ဘၣ်ဆၣ်​ တၢ်လၢအကပူၤဖျဲး လၢအစုပူၤန့ၣ်​ မ့ၢ်ဝဲ ကီၢ်အဒိၣ်, ကီၢ်မိၤအး ဒီးပှၤဧၣ်မိၣ်ဖိလၢ အရ့ဒိၣ်ကတၢၢ် တကရူၢ်လီၤ. ၄၂ ဒီးအဝဲကဆဲးသူ အတၢ်စိကမီၤလၢ ကထီဒါကီၢ်တဖၣ်အဂီၢ် ဒီးကီၢ်အဲၤကူပတူးစ့ၢ်ကီး တပူၤဖျဲးဘၣ်. ၄၃ ဒီးအဝဲကပၢဝဲ တၢ်ထူးတၢ်တီၤ လၢအအိၣ်ခူသူၣ်တဖၣ်​ လၢအမ့ၢ် ထူဒီးစ့ညၣ်​ ဒီးကီၢ်အဲၤကူပတူး အတၢ်လုၢ်ဒိၣ်ပှ့ၤဒိၣ်​ အဂၤတဖၣ်​ ခဲလၢာ်လီၤ. ဒီးပှၤလံၤဘူဖိ ဒီးပှၤအဲၤသံအီးပးဖိတဖၣ်​ ကပိာ်အခံလီၤ.

၄၄ “ဘၣ်ဆၣ်​ တၢ်ကစီၣ်တဖၣ်လၢ အဟဲလၢမုၢ်ထီၣ်​ ဒီးလၢကလံၤစိးန့ၣ်​ ကမၤတံာ်တာ်အီၤ ဒီးအဝဲကလဲၤတၢ်လၢ တၢ်သူၣ်ဒိၣ်သးဖျိးဖးဒိၣ်အပူၤ ဒ်သိး ကမၤဟးဂီၤ ဒီးမၤသံကွံာ် ပှၤအါဂၤအဂီၢ်လီၤ. ၄၅ ဒီးအဝဲကသူၣ်လီၤ စီၤလိၣ်စီၤပၤ အဒဲတဖၣ်လၢ ပီၣ်လဲၣ်ဖးဒိၣ်​ ဒီးကီၢ်ဃံလၤ အကစၢၢ်စီဆှံ အဘၢၣ်စၢၤ+ ဒီးအကလဲၤဝဲ တုၤလၢ အဘၣ်တၢ်မၤဟးဂီၤအီၤ ဒီးပှၤမၤစၢၤအီၤ တအိၣ်နီတဂၤဘၣ်.

၁၂ “ဖဲန့ၣ်အဆၢကတီၢ် ပှၤခိၣ်ပှၤနၢ်ဖးဒိၣ်တဂၤ+ လၢအမ့ၢ် မံၤက့လး*+ လၢအဆၢထၢၣ်ပာ်စၢၤ လၢနပှၤကလုာ်အဂီၢ်န့ၣ်​ ကဆၢထၢၣ်ဝဲလီၤ. ဒီးတၢ်ကိၢ်တၢ်ဂီၤ အဆၢကတီၢ် ကဟဲအိၣ်ထီၣ်လီၤ. စးထီၣ်လၢ ပှၤတကလုာ်ကဲထီၣ်ဝဲ တုၤလီၤလၢ ဆၢကတီၢ်ဖဲန့ၣ်န့ၣ်​ အတဟဲကဲထီၣ်တ့ၢ်အသး ဒ်န့ၣ်​ နီတဘျီဒံးဘၣ်. ဒီးဖဲန့ၣ်အဆၢကတီၢ် နပှၤကလုာ်လၢအမ့ၢ် ကယဲၢ်ပှၤလၢအမံၤ အိၣ်ကွဲးအသးလၢ လံာ်ပူၤန့ၣ်+ ကပူၤဖျဲးလီၤ.+ ၂ ဒီးပှၤအါဂၤလၢ အမံလၢ ဟီၣ်ခိၣ်လာ်န့ၣ်​ ကပၢၢ်ထီၣ်​ ဒီးတနီၤန့ၣ်​ ကဒိးန့ၢ်ဘၣ်​ တၢ်မူအထူအယိာ် ဒီးအဂၤတနီၤန့ၣ်​ ကဘၣ်တၢ်ဒုၣ်ဒွဲၣ်အီၤ ဒီးကဒိးန့ၢ်ဘၣ်​ တၢ်မဲာ်ဆှး လီၤထူလီၤယိာ်လီၤ.

၃ “ပှၤလၢ အအိၣ်ဒီး တၢ်သ့ၣ်ညါနၢ်ပၢၢ်တဖၣ်န့ၣ်​ ကကပြုၢ်ကပြီၤထီၣ်​ ဒ်မူကပိာ်လိၤအသိး ဒီးပှၤလၢ အမၤစၢၤ ပှၤအါဂၤ ဒ်သိး အကကဲထီၣ်​ ပှၤတီပှၤလိၤအဂီၢ်န့ၣ်​ ကကပီၤထီၣ်ဒ် ဆၣ်တဖၣ်အသိး အစိၤစိၤအဃၣ်ဃၣ်​ လီၤထူလီၤယိာ်လီၤ.

၄ “စီၤဒၤနံးယ့လးဧၢ, မ့မ့ၢ်နၤန့ၣ်​ ပာ်တၢ်ကတိၤသ့ၣ်တဖၣ်အံၤ ဒ်တၢ်ခူသူၣ်အသိး ဒီးကးတံာ်ဃာ်လံာ် တုၤလၢ တၢ်အကတၢၢ် အဆၢကတီၢ်န့ၣ်တက့ၢ်.+ ပှၤအါဂၤ ကဃုသ့ၣ်ညါတၢ် ထံထံဆးဆး ဒီးတၢ်သ့ၣ်ညါတၢ်မ့ၢ်တၢ်တီန့ၣ်​ ကအါထီၣ်* ဝဲလီၤ.”+

၅ ဒီးယၤ စီၤဒၤနံးယ့လးန့ၣ်​ ယထံၣ်ဘၣ်​ ပှၤအဂၤ ခံဂၤဆၢထၢၣ်ဖဲန့ၣ်, တဂၤန့ၣ်​ ဆၢထၢၣ်လၢ ထံကျိဖိအကပၤ လၢအံၤတခီ ဒီးအဝဲတဂၤန့ၣ်​ ဆၢထၢၣ်လၢ ထံကျိဖိ အဝၢ်ဘးခီလီၤ.+ ၆ ဒီးတဂၤန့ၣ်​ သံကွၢ်ဝဲ ပှၤလၢအကူကၤဝဲ တၢ်ကူတၢ်ကၤလၢ အညၣ်ဂ့ၤ+ ဒီးအအိၣ်လၢ ထံကျိဖိ အထံဖီခိၣ်တဂၤန့ၣ်လၢ “တၢ်လၢ အလီၤကမၢကမၣ်တဖၣ်အံၤ အကတၢၢ်န့ၣ်​ ကဟဲတုၤ ဆံးယံာ်လဲၣ်.” ၇ ဒီးယနၢ်ဟူ ပှၤလၢအကူကၤဝဲ တၢ်ကူတၢ်ကၤလၢ အညၣ်ဂ့ၤတဂၤ အကလုၢ်လီၤ. အဝဲအိၣ်ဝဲလၢ ထံကျိဖိ အထံဖီခိၣ်​ ဒီးအယူာ်ထီၣ်​ အစုစ့ၣ်​ ဒီးအစုထွဲဆူမူခိၣ်​ ဒီးအအၢၣ်လီၤတၢ်လၢ ကစၢ်ယွၤလၢအမူဝဲ လီၤထူလီၤယိာ်တဂၤ+ အမံၤပူၤ ဒီးတဲဝဲလၢ “တၢ်ဆၢကတီၢ် ကယံာ်ဝဲ သၢနံၣ်တဝာ်လီၤ.* တၢ်သ့ၣ်တဖၣ်အံၤခဲလၢာ် ကလၢထီၣ်ပှဲၤထီၣ်​ ဖဲတၢ်မၤသဘှံး ပှၤစီဆှံ အစိကမီၤ ဝံၤဝဲအခါန့ၣ်လီၤ.”+

၈ မ့မ့ၢ်ယၤန့ၣ်​ ယနၢ်ဟူတၢ် ဘၣ်ဆၣ်​ ယတနၢ်ပၢၢ်ဘၣ်.+ အဃိ ယတဲလၢ “ယကစၢ်ဧၢ, တၢ်သ့ၣ်တဖၣ်အံၤခဲလၢာ် အကတၢၢ်န့ၣ်​ ကမၤအသးဒ်လဲၣ်.”

၉ ဒီးအဝဲတဲဝဲလၢ “တၢ်ကတိၤသ့ၣ်တဖၣ်အံၤ ကဘၣ်တၢ်ပာ်အီၤ ဒ်တၢ်ခူသူၣ်အသိး ဒီးကးတံာ်ဃာ်အီၤ တုၤလၢ တၢ်အကတၢၢ် အဆၢကတီၢ်အဃိ စီၤဒၤနံးယ့လးဧၢ, လဲၤဆူညါဟီ.+ ၁၀ ပှၤအါဂၤ ကမၤကဆှီထီၣ်အသး, ကမၤစီဆှံထီၣ်အသး ဒီးကဘၣ်​ တၢ်ပှံၢ်စီအီၤလီၤ.+ ဒီးပှၤအၢပှၤသီန့ၣ်​ ကမၤတၢ် အၢအၢသီသီ ဒီးပှၤအၢပှၤသီ တနၢ်ပၢၢ်ထီၣ်တၢ် နီတဂၤဘၣ်. ဘၣ်ဆၣ်​ မ့မ့ၢ်ပှၤလၢ အအိၣ်ဒီးတၢ်သ့ၣ်ညါနၢ်ပၢၢ်န့ၣ်​ ကနၢ်ပၢၢ်ထီၣ်တၢ်လီၤ.+

၁၁ “စးထီၣ်လၢ တၢ်လုၢ်လၢ အဘၣ်တၢ်လုၢ်ထီၣ်အီၤထီဘိ+ ဘၣ်တၢ်မၤပတုာ်အီၤ ဒီးတုၤလၢ တၢ်ပာ်ထီၣ်​ တၢ်လၢအလီၤသးဘၣ်အၢ လၢအမၤဟးဂီၤတၢ်န့ၣ်+ ကယံာ်ဝဲ အသီ ၁,၂၉၀ လီၤ.

၁၂ “ပှၤလၢအအိၣ်ခိးတၢ်လၢ တၢ်သးစူၤအပူၤ တုၤလၢ ၁,၃၃၅ သီပှဲၤထီၣ်ဝဲန့ၣ်​ ကသးခုဝဲလီၤ.

၁၃ “ဘၣ်ဆၣ်​ မ့မ့ၢ်နၤန့ၣ်​ အိၣ်ဂၢၢ်ဆိးကျၢၤ တုၤလၢ အကတၢၢ်တက့ၢ်. နကသံ* ဘၣ်ဆၣ်​ ဖဲမုၢ်နံၤတဖၣ်​ အကတၢၢ်န့ၣ်​ နကဂဲၤဆၢထၢၣ်​ ဒ်သိး နကန့ၢ်ဘၣ်​ တၢ်န့ၢ်သါ* အဂီၢ်လီၤ.”+