တၢ်သံကွၢ် ၆
ဘၣ်ဃးဒီး မ့းၡံအၤန့ၣ် လံာ်စီဆှံ တဲဆိပာ်စၢၤဝဲဒ်လဲၣ်
ဝံအတၢ်စံးပာ်
“အိ ဘ့ၤသလ့ဃ့ၣ် အ့ဖရးသးဧၢ, . . . ပှၤတဂၤလၢ အကပၢအံၣ်စရ့လး လၢယဂီၢ်န့ၣ် ကဟဲထီၣ်လၢ နပူၤလီၤ.”
တၢ်လၢထီၣ်ပှဲၤထီၣ်
“ဖဲစီၤပၤဟ့ၤရိာ် ပၢတၢ်အခါ ယ့ၣ်ၡူးအိၣ်ဖျဲၣ်ထီၣ်လၢ ဘ့ၤသလ့ဃ့ၣ်လၢ ယူဒၤအဟီၣ်ကဝီၤ အပူၤလီၤ. ပှၤမၤကူးတဖၣ် လၢအအိၣ်လၢ မုၢ်ထီၣ်တခီန့ၣ် ဟဲဝဲလၢ ဝ့ၢ်ယရူၤၡလ့ၣ်.”
ဝံအတၢ်စံးပာ်
“အဝဲသ့ၣ် နီၤဖးလိာ်အသးလၢ ယတၢ်ကူတၢ်သိးတဖၣ် ဒီးအဝဲသ့ၣ် ဖးတၢ်လၢ ယတၢ်ကူတၢ်သိး အဂီၢ်လီၤ.”
တၢ်လၢထီၣ်ပှဲၤထီၣ်
“ဖဲပှၤသုးဖိတဖၣ် ပျၤထီယ့ၣ်ၡူးလၢ သ့ၣ်တၢၣ်အလိၤ ဝံၤအလီၢ်ခံ အဝဲသ့ၣ်ဟံးန့ၢ် ယ့ၣ်ၡူးအကူအသိး ဒီးနီၤဖးဝဲလွံၢ်ပူ . . . အဆ့ကၤလၢ အဖီလာ်တဘ့ၣ်အံၤ ဘၣ်တၢ်ထါအီၤ စးထီၣ်လၢ အခိၣ်တုၤလီၤလၢ အခီၣ်ထံး ဒီးအတိၤတအိၣ်ဘၣ်. အဃိ အဝဲသ့ၣ် တဲလိာ်သး တဂၤဒီးတဂၤလၢ ‘မၤညာ်အီၤတဂ့ၤ. ပကဖးတၢ်ဒ်သိး ပကဆၢတဲာ်လၢ မတဂၤ ကန့ၢ်ဘၣ်ဝဲ ဆ့ကၤတဘ့ၣ်အံၤလဲၣ်.’”
ဝံအတၢ်စံးပာ်
“အဃံတဖၣ်န့ၣ် ကစၢ်ယွၤ ဒီသဒၢဝဲ ဒီးအဃံတဘိမး တကၢ်ဘၣ်.”
တၢ်လၢထီၣ်ပှဲၤထီၣ်
“ဖဲအဝဲသ့ၣ် ဟဲတုၤလၢ ယ့ၣ်ၡူးအအိၣ်အခါ အဝဲသ့ၣ် ထံၣ်ဝဲလၢ အသံလံအဃိ အဝဲသ့ၣ် တမၤကၢ် အခီၣ်လၢၤဘၣ်.”
ဝံအတၢ်စံးပာ်
“အဘၣ်တၢ်ဆဲးဖျိအီၤ လၢပတၢ်ကမၣ်အဂီၢ်.”
တၢ်လၢထီၣ်ပှဲၤထီၣ်
“ပှၤသုးဖိတဂၤ ဆဲးဝဲ ယ့ၣ်ၡူးအကပၤ လၢဘီ ဒီးတၢ်သွံၣ်ဒီးထံ ဟဲလီၤဝဲ တဘျီဃီလီၤ.”
ဝံအတၢ်စံးပာ်
“အဝဲသ့ၣ်ဟ့ၣ်လီၤ ယပှ့ၤလၢ စ့ညၣ်အဘ့ၣ် ၃၀ လီၤ.”
တၢ်လၢထီၣ်ပှဲၤထီၣ်
“ပှၤလၢ အဘၣ်တၢ်ကိးအီၤလၢ စီၤယူဒၤအံၣ်စကၤရံၤအိာ် လၢအပၣ်ဃုာ်လၢ ပှၤတဆံခံဂၤအကျါန့ၣ် လဲၤဝဲလၢ ပှၤလုၢ်တၢ်ဒိၣ်အခိၣ်တဖၣ် အအိၣ် ဒီးတဲဝဲလၢ ‘ယမ့ၢ်ဟ့ၣ်လီၤကွံာ်အီၤလၢ သုစုပူၤန့ၣ် သုကဟ့ၣ်ယၤ တၢ်မနုၤလဲၣ်.’ အဝဲသ့ၣ် အၢၣ်လီၤအီၤလၢ ကဟ့ၣ်အီၤ စ့ညၣ်အဘ့ၣ် ၃၀ လီၤ.”