ယ့ၣ်ၡူးအိၣ်လၢ တၤသၣ်လီၢ်အခါ

ယ့ၣ်ၡူးဒီးအတၢ်မၢဖိတဖၣ် ဟးထီၣ်ဝဲသ့ၣ်လၢဒၢးလၢတၢ်ဖီခိၣ်ဝံၤအလီၢ်ခံ လဲၤသကိးဝဲသ့ၣ်ဆူက့ၤသစ့းမနၤ တၢ်သၣ်အလီၢ်န့ၣ်လီၤ. အဝဲသ့ၣ်ဟဲတ့ၢ်ဝဲဖဲအံၤ ခဲအံၤခဲအံၤလီၤ. မ့မ့ၢ်ခဲအံၤ ယ့ၣ်ၡူးမၤလိာ်တၢ်မၢဖိတဖၣ်လၢ ကဆိးသီဘါထုကဖၣ်တၢ်န့ၣ်လီၤ. အဝဲဒၣ်လဲၤယံၤစီၤစုၤတစဲးဒီး ကျးလီၤအမဲာ်လၢဟီၣ်ခိၣ်ဝံၤ ဃ့ဘါထုကဖၣ်ဝဲန့ၣ်လီၤ.

ဝံၤဒီး ဟဲက့ၤဝဲဆူ အတၢ်မၢဖိတဖၣ်အအိၣ်လီၤ. သုဆိကမိၣ် အဝဲသ့ၣ်ကမၤမနုၤလဲၣ်. အဝဲသ့ၣ်မံဘၣ်အသးလီၤ. ယ့ၣ်ၡူးမၤလိာ်အဝဲသ့ၣ်သၢဘျီညါ လၢအသုတမံတဂ့ၤန့ၣ်လီၤ. ဘၣ်ဆၣ်သနာ်က့ ယ့ၣ်ၡူးဟဲက့ၤဆူအဝဲသ့ၣ်အအိၣ် တဘျီဂ့ၤတဘျီဂ့ၤ ထံၣ်ဝဲဒၣ်လၢအမံဘၣ်အသးတကူၢ်သ့ၣ်လီၤ. ဖဲယ့ၣ်ၡူးဟဲက့ၤဆူအဝဲသ့ၣ်အအိၣ် လၢခံကတၢၢ်တဘျီအခါ ယ့ၣ်ၡူးစံးဘၣ်အဝဲသ့ၣ်လၢ ‘တၢ်ဆၢကတီၢ်ဒ်အံၤအခါန့ၣ် သုမံကသ့ဒ်လဲၣ်. အဆၢကတီၢ်လၢ ပှၤကဟ့ၣ်လီၤယၤဆူ ဒုၣ်ဒါအစုပူၤန့ၣ် ဟဲတုၤလံ’ န့ၣ်လီၤ.

ဖဲအကတီၢ်န့ၣ် နၢ်ဟူဘၣ်ပှၤဂီၢ်မုၢ်အကလုၢ်န့ၣ်လီၤ. ကွၢ်တဘီ, ပှၤတဖၣ်ဟဲဒီးနး ဒီးနီၢ်တီၢ်တဖၣ်လီၤ. ဒ်ကန့ၢ်တၢ်ကပီၤအဂီၢ် ဟဲစိာ်ဝဲသ့ၣ်ဆှိဒီးမ့ၣ်အူဒၢန့ၣ်လီၤ. ဖဲဟဲတုၤဘူးထီၣ်အခါ ပှၤဂီၢ်မုၢ်အကျါပှၤတဂၤ ဟးထီၣ်ဝဲဒီး ဟဲဆူယ့ၣ်ၡူးအအိၣ်လီၤ. ဝံၤဒီး ဒ်ပထံၣ်ဘၣ်လၢတၢ်ဂီၤအံၤအပူၤအသိး နၢမူဝဲယ့ၣ်ၡူးန့ၣ်လီၤ. အဝဲဒၣ်မ့ၢ်ယူဒၤအံၣ်စကၤရံၤအိာ်န့ၣ်လီၤ. ဘၣ်မနုၤအဃိ အဝဲနၢမူယ့ၣ်ၡူးလဲၣ်.

ယ့ၣ်ၡူးသံကွၢ်အီၤ ‘ယူဒၤဧၢ, နဟ့ၣ်လီၤကွံာ်ယၤလၢ တၢ်နၢမူတဘီန့ၣ်ဧါ.’ မ့ၢ်မးလီၤ, အတၢ်နၢမူမ့ၢ် တၢ်ဟ့ၣ်လီၤတၢ်ပနီၣ်န့ၣ်လီၤ. ဒ်န့ၣ်အဃိ ပှၤလၢအဟဲဒီးအီၤသ့ၣ်တဖၣ် သ့ၣ်ညါဝဲလၢ မတၤမ့ၢ်ယ့ၣ်ၡူးလၢ အဝဲသ့ၣ်သးလီဝဲလဲၣ် န့ၣ်လီၤ. ဒီးယ့ၣ်ၡူးအဒုၣ်အဒါသ့ၣ်တဖၣ်န့ၣ် သုးအသးဆူညါဒီး ဖီၣ်ယ့ၣ်ၡူးန့ၣ်လီၤ. ဘၣ်ဆၣ် ပ့းတရူးတခီ တပျဲယ့ၣ်ၡူးကဘၣ်တၢ်ဖီၣ်အီၤညီညီဘၣ်. ထုးထီၣ်နးလၢအဟဲစိာ်ဝဲဒီး ကျီဝဲပှၤလၢအကပၤန့ၣ်လီၤ. တဘၣ်အခိၣ်ဘၣ်ဒီး ဘၣ်တလံာ်ဝဲဝံၤ အနၢ်တဲာ်တခီန့ၣ်လီၤ. ဘၣ်ဆၣ် ယ့ၣ်ၡူးဖီၣ်ဝဲပှၤန့ၣ်အနၢ်ဒီး မၤဂ့ၤထီၣ်က့ၤဝဲလီၤ.

ဒီးယ့ၣ်ၡူးစံးဘၣ်ပ့းတရူး, ‘ဒၢနုာ်က့ၤနနးလၢအတြိာ်ပူၤတက့ၢ်. နဆိကမိၣ်လၢ ယမ့ၢ်ဃ့ယပၢ် ဒ်သိးမူခိၣ်ကလူး လၢအကထိတဖၣ် ကဟဲမၤစၢၤယၤန့ၣ် တန့ၢ်ဝဲဘၣ်ဧါ’ မ့ၢ်ဃ့ဝဲန့ၣ်ကန့ၢ်လီၤ. ဘၣ်ဆၣ်သနာ်က့, ယ့ၣ်ၡူးတဃ့ဝဲ ဒ်သိးကစၢ်ယွၤ ကပျၢ်လီၤမူခိၣ်ကလူးန့ၣ်ဘၣ်. သ့ၣ်ညါဝဲလၢ ဒုၣ်ဒါတဖၣ်ကဖီၣ်အီၤအကတီၢ် တုၤလံအဃိန့ၣ်လီၤ. လၢတၢ်န့ၣ်အဃိ ပျဲပှၤဖီၣ်အီၤန့ၣ်လီၤ. ခဲအံၤပကကွၢ်သကိး တၢ်ကမၤအသးဒီးယ့ၣ်ၡူးဒ်လဲၣ်န့ၣ်တက့ၢ်.