ယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ်

ပှၤအဲၣ်ယဟိဝၤသ့ၣ်သုဧၢ

ယ့ၣ်ၡူးစံးတ့ၢ်ဝဲ “ဒီးသုကသ့ၣ်ညါတၢ်မ့ၢ်တၢ်တီ, ဒီးတၢ်မ့ၢ်တၢ်တီန့ၣ်​ ကမၤထူၣ်ဖျဲးသုလီၤ.” (ယိၤဟၣ်​ ၈:၃၂) မ့ၢ်မးတၢ်ကတိၤလၢ အန့ၢ်ဂံၢ်န့ၢ်ဘါဒိၣ်မးလီၤ. မ့ၢ်လီၤ, တၢ်တတီတလိၤ အိၣ်အါအါဂီၢ်ဂီၢ်လၢ “မုၢ်နံၤအခံကတၢၢ်” အပူၤဒၣ်လဲာ်, ပသ့ၣ်ညါဘၣ်​ တၢ်မ့ၢ်တၢ်တီသ့လီၤ. (၂ တံၤမသ့း ၃:၁) နနၢ်ဟူဘၣ်​ တၢ်မ့ၢ်တၢ်တီ အဆိကတၢၢ်လၢ ပှၤတဲနၢ်ပၢၢ်နၤလၢ လံာ်စီဆှံပူၤ အဆၢကတီၢ်န့ၣ်​ နသ့ၣ်နီၣ်ထီၣ်ဒံးဧါ. ဖဲန့ၣ်အဆၢကတီၢ်န့ၣ်​ နသးကဟူးဂဲၤသပှၢ်တၢၢ်လီၤ.

ဘၣ်ဆၣ်, ပကအိၣ်ဒီး တၢ်သ့ၣ်ညါနၢ်ပၢၢ်လီၤတံၢ် တၢ်မ့ၢ်တၢ်တီဒီး တၢ်တဲဘၣ်ပှၤဂၤလၢ တၢ်ဂ့ၢ်အံၤ ထီဘိန့ၣ်​ အကါဒိၣ်အသိး ပနီၢ်ကစၢ်ဒၣ်ဝဲ ပကဘၣ်အိၣ်မူဒ် တၢ်မ့ၢ်တၢ်တီအသိးလီၤ. ပကမၤဒ်သိးအံၤအဂီၢ်, လိၣ်လၢပကဘၣ်ဟံးဃာ်ပၢၤဃာ်ပသးလၢ ယွၤအတၢ်အဲၣ်အပူၤလီၤ. တၢ်အံၤပာ်ဃုာ်ဒီးတၢ်မနုၤလဲၣ်. ယ့ၣ်ၡူးအတၢ်ကတိၤလၢ တချုးသံအနၤန့ၣ်​ စံးဆၢဝဲ တၢ်သံကွၢ်အံၤလီၤ. ကစၢ်စံးဘၣ်ဝဲ အတၢ်မၢဖိလၢ အတီဒီးအီၤတဖၣ်လၢ “သုမ့ၢ်တိၢ်န့ၢ် ယတၢ်မၤလိာ်တဖၣ်ဒီး, သုကအိၣ်ကဆိးလၢ ယတၢ်အဲၣ်အပူၤ, ဒ်ယတိၢ်န့ၢ်ယပၢ်အတၢ်မၤလိာ်တဖၣ်, ဒီးယအိၣ်ယဆိးလၢ အတၢ်အဲၣ်အပူၤအသိးန့ၣ်လီၤ.”—ယိၤဟၣ်​ ၁၅:၁၀.

ပာ်သူၣ်ပာ်သးလၢ ယ့ၣ်ၡူးအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤ ခီဖျိ စူၢ်ဝဲအပၢ်အတၢ်မၤလိာ်တဖၣ်လီၤ. တၢ်အံၤဘၣ်ထွဲ စ့ၢ်ကီးဒီးပှၤလၢ မုၢ်မဆါတနံၤအံၤလီၤ. ပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤအဂီၢ်, လိၣ်လၢပကဘၣ်​ မၤထွဲတၢ်မ့ၢ်တၢ်တီလၢ ပတၢ်အိၣ်မူကိးနံၤဒဲးအပူၤလီၤ. တၢ်န့ၣ်အဟါန့ၣ်, ယ့ၣ်ၡူးစံးဝဲလၢ “တၢ်န့ၣ်တဖၣ်​ သုမ့ၢ်သ့ၣ်ညါဒီး သုမ့ၢ်မၤအီၤဒီး, သုဘၣ်ဆိၣ်ဂ့ၤသုဝဲလီၤ.”—ယိၤဟၣ် ၁၃:၁၇.

တၢ်အံၤမ့ၢ် ပတၢ်မုၢ်လၢ်နီၢ်နီၢ်လၢ လံာ်အံၤကမၤစၢၤသုလၢ သုကမၤထွဲကဒီး တၢ်မ့ၢ်တၢ်တီလၢ သုတၢ်အိၣ်မူပူၤ ဒီးသုကဟံးဃာ်ပၢၤဃာ်သုသးလၢ “ယွၤအတၢ်အဲၣ်တၢ်ကွံအပူၤ, . . . တုၤလၢတၢ်မူအထူအယိာ်တက့ၢ်” လီၤ.—ယူဒၤ ၂၁.