ပှၤပၢဆှၢတၢ်ကမံးတံာ် အလံာ်ပရၢ

ဆူပှၤလၢအအဲၣ်ယဟိဝၤယွၤ ဒီးအကလုၢ်ကထါ လံာ်စီဆှံ–

ယ့ၣ်ၡူးတဲဝဲလၢ “သုကသ့ၣ်ညါ တၢ်မ့ၢ်တၢ်တီ, ဒီးတၢ်မ့ၢ်တၢ်တီန့ၣ်​ ကမၤထူၣ်ဖျဲး သုလီၤ.” (ယိၤဟၣ်​ ၈:၃၂) ဖဲနနၢ်ပၢၢ်ထီၣ်​ တၢ်မ့ၢ်တၢ်တီလၢ လံာ်စီဆှံအပူၤ သီသီ အခါ မ့ၢ်နတူၢ်ဘၣ်ဒ်လဲၣ်န့ၣ်​ ဆိကမိၣ်ကွၢ်တက့ၢ်. ဟီၣ်ခိၣ်တဘ့ၣ်အံၤ ပှဲၤဝဲဒီးတၢ်လံၣ်တၢ်လီအဃိ ဖဲနနၢ်ပၢၢ်ထီၣ်​ တၢ်မ့ၢ်တၢ်တီအခါ နကသးခုသပှၢ်ကတၢၢ်လီၤ.—၂ တံၤမသ့း ၃:၁.

ယဟိဝၤယွၤအဲၣ်ဒိးလၢ ပကသ့ၣ်ညါ တၢ်မ့ၢ်တၢ်တီလီၤ. ဒီးမ့ၢ်လၢ ပအဲၣ်ပှၤဂၤအဃိ ပအဲၣ်ဒိးတဲဘၣ်အဝဲသ့ၣ်​ တၢ်မ့ၢ်တၢ်တီလီၤ. ဘၣ်ဆၣ်​ ပမ့ၢ်အဲၣ်ဒိးမၤ တၢ်ဘၣ်ယွၤအသးန့ၣ်​ ပကဘၣ်မၤ အါန့ၢ်အန့ၣ်ဒံး. ပမ့ၢ်ပာ်လုၢ်ပာ်ပှ့ၤ ယဟိဝၤယွၤအတၢ်ဟံးစုနဲၣ်ကျဲန့ၣ်​ ပကဂုာ်ကျဲးစၢးလၢ အဂ့ၤကတၢၢ်ဒီး ပကအိၣ်မူဒ် ခရံာ်ဖိတဂၤ အသိးလီၤ. ဒ်သိးပကပာ်ဖျါထီၣ်​ ပတၢ်အဲၣ်ယွၤအဂီၢ် ပကဘၣ်မၤဒ်လဲၣ်န့ၣ်​ ယ့ၣ်ၡူးတဲနၢ်ပၢၢ်ပှၤလီၤ. အဝဲတဲဝဲလၢ “သုမ့ၢ်တိၢ်န့ၢ်ယတၢ်မၤလိာ်တဖၣ်ဒီး, သုကအိၣ်ကဆိးလၢ ယတၢ်အဲၣ်အပူၤ, ဒ်ယတိၢ်န့ၢ်ယပၢ်အတၢ်မၤလိာ်တဖၣ်, ဒီးယအိၣ်ယဆိးလၢ အတၢ်အဲၣ်အပူၤအသိးန့ၣ်လီၤ.”—ယိၤဟၣ်​ ၁၅:၁၀.

ယ့ၣ်ၡူးအဲၣ်အပၢ်နီၢ်ကီၢ်အဃိ အဝဲမၤတၢ်လၢ အပၢ်မၢအမၤဝဲ ကိးမံၤဒဲးလီၤ. ပမ့ၢ်ကွၢ်လိမၤဒိး ယ့ၣ်ၡူးလၢ ပတၢ်အိၣ်မူအပူၤန့ၣ်​ ယဟိဝၤယွၤကအဲၣ်ပှၤဒီး ပကသးခုနီၢ်ကီၢ်လီၤ. ဒ်ယ့ၣ်ၡူးတဲဝဲအသိး “တၢ်န့ၣ်တဖၣ်​ သုမ့ၢ်သ့ၣ်ညါဒီးသုမ့ၢ်မၤအီၤဒီး, သုဘၣ်ဆိၣ်ဂ့ၤသုဝဲလီၤ.”—ယိၤဟၣ်​ ၁၃:၁၇.

ပမုၢ်လၢ်လၢ လံာ်တဘ့ၣ်အံၤ ကမၤစၢၤနၤဒ်သိး နကအိၣ်မူမၤထွဲ လံာ်စီဆှံတၢ်မ့ၢ်တၢ်တီဒီး ကဲထီၣ်ဘၣ်​ ယွၤအတံၤသကိးအဂီၢ်လီၤ. ပဃ့ထုကဖၣ်လၢ နတၢ်အဲၣ်ယွၤကဒိၣ်ထီၣ်​ ဒီးနကအိၣ်ဂၢၢ်ဆိးကျၢၤလၢ “ယွၤအတၢ်အဲၣ်​ တၢ်ကွံအပူၤ . . . တုၤလၢတၢ်မူအထူအယိာ်” န့ၣ်လီၤ.—ယူဒၤ ၂၁.