တၢ်မၤလိ ၈
တၢ်အိၣ်ဖှိၣ် “အိၣ်ဘၣ် မုာ်မုာ်ခုၣ်ခုၣ်”
စီၤစီလူးလၢ အကဲပှၤလၢ အမၤအၢမၤနးတၢ်ဆူၣ်ဆူၣ်တဂၤကဲထီၣ်က့ၤ ပှၤလၢအစံၣ်တဲၤတဲလီၤတၢ်လၢ တၢ်သးဆူၣ်အပူၤ
တၢ်ဂ့ၢ်ဒိးသန့ၤထီၣ်သးလၢ မၤတၢ် ၉:၁-၄၃
၁, ၂. လၢဝ့ၢ်ဒၤမ့ၤစ့းန့ၣ် စီၤစီလူး ပာ်လီၤသးလၢ အကမၤမနုၤလဲၣ်.
ပှၤပိာ်ခွါလၢ အပာ်လီၤအသးလၢ ကမၤတၢ် အၢအၢသီသီတဖုန့ၣ် လဲၤဘူးထီၣ်လၢ ဝ့ၢ်ဒၤမ့ၤစ့းလံ. အဝဲသ့ၣ် ပာ်လီၤအသးလၢ ကမၢဆူၣ်ဝဲ ယ့ၣ်ၡူးအပျဲၢ်အဘီၣ်တဖၣ်လၢ ကဟးထီၣ်လၢအဟံၣ်, ကစၢဃာ်အဝဲသ့ၣ်, ကမၤမဲာ်ဆှးအဝဲသ့ၣ် ဒီးကက့ၤကိးအဝဲသ့ၣ်လၢ ပှၤယူဒၤဖိအကွီၢ်ဘျီၣ် လၢအဒိၣ်ကတၢၢ်လၢ အအိၣ်လၢ ဝ့ၢ်ယရူၤၡလ့ၣ်အပူၤ.
၂ ပှၤပိာ်ခွါတဖုအခိၣ်န့ၣ် အကဲဝဲ စီၤစီလူး. လၢအပူၤကွံာ်န့ၣ် စီၤစီလူး ပၣ်ဃုာ်လၢ ပှၤမၤသံစီၤစတ့းဖၣ်အကျါ.a ဖဲပှၤယူဒၤဖိတနီၤ ကွံာ်သံဝဲ ခရံာ်အပျဲၢ်အဘီၣ် စီၤစတ့းဖၣ်လၢလၢၢ်အခါ စီၤစီလူး အိၣ်ခိးကွၢ်ဝဲ ဒီးအဘၣ်သူၣ်ဘၣ်သးဝဲ. (မၤတၢ် ၇:၅၇–၈:၁) ဒီးလၢခံန့ၣ် စီၤစီလူး စးထီၣ်မၤအၢမၤနးဝဲ ခရံာ်ဖိတဖၣ်လၢ အအိၣ်လၢ ဝ့ၢ်ယရူၤၡလ့ၣ်. တကးဒံးဘၣ် အဝဲတီခိၣ်ရိၤမဲဝဲလၢ ပှၤကလူၤဃု ခရံာ်ဖိလၢ ဝ့ၢ်အဂၤ ဒီးမၤအၢမၤနးအဝဲသ့ၣ်. ဒီးတၢ်ဘူၣ်တၢ်ဘါလၢ ပှၤကိးဝဲလၢ “တၢ်မ့ၢ်တၢ်တီအကျဲ” န့ၣ် စီၤစီလူး ဆိမိၣ်ဝဲလၢ အကဲတၢ်ဘူၣ်တၢ်ဘါ လၢအလီၤဘၣ်ယိၣ်အဃိ အဝဲအဲၣ်ဒိး မၤဟးဂီၤကွံာ်ဝဲ တၢ်ဘူၣ်တၢ်ဘါတခါအံၤ.—မၤတၢ် ၉:၁, ၂; ကွၢ်တၢ်လွံၢ်နၢၣ်လၢအမ့ၢ် “စီၤစီလူး အိၣ်ဒီးတၢ်စိတၢ်ကမီၤလၢ ဝ့ၢ်ဒၤမ့ၤစ့းအပူၤ.”
၃, ၄. (က) တၢ်ကဲထီၣ်သးဒီး စီၤစီလူးဒ်လဲၣ်. (ခ) ပကတဲသကိး တၢ်သံကွၢ် မနုၤတဖၣ်လဲၣ်.
၃ ဖဲအဝဲသ့ၣ် လဲၤလၢကျဲအခါ တၢ်ကပီၤဖးဒိၣ်လီၤဘၣ် စီၤစီလူး. အဃိ စီၤစီလူး တထံၣ်တၢ်လၢၤဘၣ် ဒီးလီၤဃံၢ်ဝဲလၢဟီၣ်ခိၣ်လိၤ. ဒီးပှၤလၢအလဲၤဒီး စီၤစီလူးစ့ၢ်ကီး ထံၣ်ဝဲတၢ်ကပီၤအဃိ အဝဲသ့ၣ် ဖုးဘၣ်အသး ဒီးတဲတၢ်တထီၣ်လၢၤဘၣ်. စီၤစီလူး နၢ်ဟူတၢ်ကလုၢ်သီၣ်လၢ မူခိၣ်လၢအတဲဝဲလၢ “စီၤစီလူးဧၢ, စီၤစီလူးဧၢ, နမၤအၢမၤနးယၤ ဘၣ်လဲၣ်.” ဒီးစီၤစီလူး သံကွၢ်ဝဲလၢ “ကစၢ်ဧၢ, နမ့ၢ် မတဂၤလဲၣ်.” ဒီးတၢ်ကလုၢ်န့ၣ် တဲက့ၤအီၤလၢ “ယမ့ၢ် ယ့ၣ်ၡူးလၢ နမၤအၢမၤနးအီၤ.” (မၤတၢ် ၉:၃-၅; ၂၂:၉) ဖဲစီၤစီလူး နၢ်ဟူဝဲ တၢ်ကလုၢ်အံၤအခါ အဝဲဖုးဘၣ်အသးဖးဒိၣ်ညါ.
၄ ယ့ၣ်ၡူးအတၢ်ကတိၤလၢ အတဲဘၣ် စီၤစီလူးန့ၣ် ပန့ၢ်ဘၣ် တၢ်မၤလိဒ်လဲၣ်. ဖဲစီၤစီလူး ကဲထီၣ်ခရံာ်ဖိ အဆၢကတီၢ် တၢ်ကဲထီၣ်သးဒ်လဲၣ်. ပမ့ၢ်တဲသကိး တၢ်ဂ့ၢ်အံၤန့ၣ် ပကန့ၢ်ဘၣ်အဘျုးဒ်လဲၣ်. ဖဲစီၤစီလူး ကဲထီၣ်ခရံာ်ဖိ ဝံၤအလီၢ်ခံ ခရံာ်ဖိတဖၣ် တထံၣ်ဘၣ်ဒီး တၢ်မၤအၢမၤနးလၢၤဘၣ်အဃိ အဝဲသ့ၣ် မၤဝဲမနုၤလဲၣ် ဒီးပန့ၢ်ဘၣ် တၢ်မၤလိဒ်လဲၣ်.
“နမၤအၢမၤနးယၤ ဘၣ်လဲၣ်” (မၤတၢ် ၉:၁-၅)
၅, ၆. တၢ်ကတိၤလၢ ယ့ၣ်ၡူးတဲဝဲ စီၤစီလူးန့ၣ် ပန့ၢ်ဘၣ်တၢ်မၤလိမနုၤလဲၣ်.
၅ ဖဲစီၤစီလူး လဲၤလၢ ဝ့ၢ်ဒၤမ့ၤစ့းအခါ လၢကျဲန့ၣ် ယ့ၣ်ၡူးတတဲအီၤလၢ “နမၤအၢမၤနး ယပျဲၢ်ယဘီၣ် ဘၣ်လဲၣ်” န့ၣ်ဘၣ်. ယ့ၣ်ၡူးတဲအီၤလၢ “နမၤအၢမၤနးယၤ ဘၣ်လဲၣ်.” (မၤတၢ် ၉:၄) အဃိ ပသ့ၣ်ညါဘၣ်လၢ ပှၤမ့ၢ်မၤအၢမၤနး ယ့ၣ်ၡူးအပျဲၢ်အဘီၣ်န့ၣ် ယ့ၣ်ၡူးတူၢ်ဘၣ်ဝဲ ဒ်သိးဒီး ပှၤမၤအၢမၤနးအီၤ.—မး ၂၅:၃၄-၄၀, ၄၅.
၆ ခီဖျိလၢ နနာ်ယ့ၣ်ၡူးအဃိ ပှၤမ့ၢ်မၤအၢမၤနးနၤန့ၣ် နနာ်သ့သပှၢ်တၢၢ်လၢ ယဟိဝၤယွၤ ဒီးယ့ၣ်ၡူးထံၣ်ဝဲ နတၢ်အိၣ်သး. (မး ၁၀:၂၂, ၂၈-၃၁) ဘၣ်ဆၣ် ဘၣ်သ့ၣ်သ့ၣ် ယဟိဝၤယွၤ တမၤလီၤမၢ်ကွံာ် တၢ်မၤကွၢ်လၢ နထံၣ်ဘၣ်တဖၣ် တဘျီဃီဘၣ်. အဒိ ဖဲစီၤစီလူး ကွၢ်ဝဲ ပှၤမၤသံစီၤစတ့းဖၣ် ဒီးလၢခံအဝဲက့ၤမူၤဝဲ ယ့ၣ်ၡူးအပျဲၢ်အဘီၣ်လၢ ဝ့ၢ်ယရူၤၡလ့ၣ်အခါန့ၣ် ယ့ၣ်ၡူးထံၣ်ဝဲ တၢ်အိၣ်သးတဖၣ်အံၤ ခဲလၢာ်. (မၤတၢ် ၈:၃) ဘၣ်ဆၣ် ဖဲန့ၣ်အဆၢကတီၢ် ယ့ၣ်ၡူးတမၤပတုာ်ဝဲ တၢ်မၤအၢမၤနးတဖၣ်အံၤဒံးဘၣ်. သနာ်က့ ယဟိဝၤယွၤ သူဝဲယ့ၣ်ၡူး ဒ်သိးကမၤစၢၤဝဲ စီၤစတ့းဖၣ် ဒီးခရံာ်အပျဲၢ်အဘီၣ်အဂၤတဖၣ် ဒ်သိးအဝဲသ့ၣ် ဆဲးအိၣ်ဒီးတၢ်သးတီကန့ၢ်အဂီၢ်.
၇. ဒ်သိးနလဲၤခီဖျိ တၢ်မၤကွၢ်ကန့ၢ်အဂီၢ် နကဘၣ်မၤမနုၤလဲၣ်.
၇ နမ့ၢ်မၤထွဲဒ် တၢ်ဂ့ၢ်လွံၢ်ထံၣ်အံၤန့ၣ် နလဲၤခီဖျိ တၢ်မၤအၢမၤနးကန့ၢ်. (၁) တၢ်မ့ၢ်ကဲထီၣ်သးဒ်လဲၣ်ဂ့ၤဒ်လဲၣ်ဂ့ၤ ပာ်လီၤနသးလၢ နကဆဲးတီဒီး ယဟိဝၤယွၤ. (၂) ဃ့ယဟိဝၤယွၤ အတၢ်မၤစၢၤ. (ဖံလံး ၄:၆, ၇) (၃) တဘၣ်ဟ့ၣ်ကၣ်တၢ်လၢ နနီၢ်ကစၢ်တဂ့ၤ ပျဲလၢ ယဟိဝၤယွၤ ကဟ့ၣ်ကၣ်တၢ်. (ရိ ၁၂:၁၇-၂၁ ) (၄) ယဟိဝၤယွၤ မ့ၢ်တမၤလီၤမၢ်ကွံာ် တၢ်မၤကွၢ်တဖၣ်ဘၣ်နာ်က့ နာ်လၢအဝဲကမၤစၢၤနၤ ဒ်သိးနကအိၣ်ဒီး တၢ်တူၢ်န့ၢ်ခီၣ်ကဲ တုၤလၢအကတၢၢ်.—ဖံလံး ၄:၁၂, ၁၃.
“ဒီပုၢ်ဝဲၢ် စီၤစီလူး . . . ကစၢ် . . . မၢလီၤယၤ” (မၤတၢ် ၉:၆-၁၇)
၈, ၉. ဖဲစီၤအနၤနံ န့ၢ်ဘၣ်မူဒါအခါ အဝဲကတူၢ်ဘၣ်ဝဲဒ်လဲၣ်.
၈ စီၤစီလူး သံကွၢ်ယ့ၣ်ၡူးလၢ “ကစၢ်ဧၢ, နမ့ၢ် မတဂၤလဲၣ်” ယ့ၣ်ၡူး က့ၤစံးဆၢအီၤဝံၤအလီၢ်ခံ ယ့ၣ်ၡူးဆဲးတဲအီၤလၢ “ဂဲၤဆၢထၢၣ် ဒီးလဲၤနုာ်လီၤလၢ ဝ့ၢ်ပူၤတက့ၢ်. နကဘၣ်မၤ တၢ်မနုၤလဲၣ်န့ၣ် ပှၤတဂၤဂၤ ကတဲဘၣ်နၤ.” (မၤတၢ် ၉:၆) စီၤစီလူး တထံၣ်တၢ်လၢၤဘၣ်အဃိ ပှၤလၢအလဲၤတၢ်ဒီးအီၤန့ၣ် လဲၤမူၤအီၤလၢ ဝ့ၢ်ဒၤမ့ၤစ့းအပူၤ. စီၤစီလူး ဒုၣ်တၢ်အီၣ် ဒီးဃ့ထုကဖၣ်တၢ်ဖဲန့ၣ် သၢသီညါ. ဖဲစီၤစီလူး မၤဝဲဒ်န့ၣ်အခါ ယ့ၣ်ၡူးတဲဘၣ် စီၤအနၤနံလၢ စီၤစီလူးအဂ့ၢ်. စီၤအနၤနံန့ၣ် အကဲဝဲ ယ့ၣ်ၡူးအပျဲၢ်အဘီၣ်တဂၤလၢ အအိၣ်လၢ ဝ့ၢ်ဒၤမ့ၤစ့းအပူၤ. ဒီးစီၤအနၤနံန့ၣ် “ပှၤယူဒၤဖိ ဖဲန့ၣ်ခဲလၢာ် ပတြၢၤအီၤ.”—မၤတၢ် ၂၂:၁၂.
၉ ယ့ၣ်ၡူးမၢ စီၤအနၤနံ တဲတၢ်ဒီး စီၤစီလူး. အဃိ နဆိမိၣ် စီၤအနၤနံ ကတူၢ်ဘၣ်ဝဲဒ်လဲၣ်. တၢ်အိၣ်ဖှိၣ်အခိၣ် လၢအမ့ၢ် ယ့ၣ်ၡူး လၢအဂဲၤဆၢထၢၣ်သမူထီၣ်က့ၤန့ၣ် ဟ့ၣ်အီၤမူဒါ လီၤလီၤဆီဆီတခါ. အဃိ အဝဲကသးခု ဘၣ်ဆၣ် တကတီၢ်ဃီန့ၣ် အကဘၣ်ယိၣ်တၢ်ဒိၣ်မး. အဃိ အဝဲတဲဝဲလၢ “ကစၢ်ဧၢ, ယနၢ်ဟူ ပှၤတဂၤအံၤအဂ့ၢ်လၢ ပှၤအါဂၤအအိၣ်လီၤ. အဝဲမၤဆါ နပှၤစီဆှံတဖၣ်လၢ ဝ့ၢ်ယရူၤၡလ့ၣ်အပူၤ ဒီးပှၤလုၢ်တၢ်ဒိၣ်အခိၣ်တဖၣ် ဟ့ၣ်စ့ၢ်ကီးအီၤ တၢ်စိတၢ်ကမီၤလၢ ကဖီၣ်ဝဲ ပှၤခဲလၢာ်လၢ အကိးထီၣ် နမံၤ.”—မၤတၢ် ၉:၁၃, ၁၄.
၁၀. ဘၣ်ဃးဒီး ယ့ၣ်ၡူးတဲတၢ်ဒီး စီၤအနၤနံန့ၣ် ပန့ၢ်ဘၣ် တၢ်မၤလိဒ်လဲၣ်.
၁၀ စီၤအနၤနံ တဲဖျါထီၣ် အတၢ်ဘၣ်ယိၣ်န့ၣ် ယ့ၣ်ၡူး တပာ်ဒ့ၣ်ပာ်ကမၣ်အီၤဘၣ်, တကးဒံးဘၣ် ယ့ၣ်ၡူး ဟ့ၣ်အီၤ တၢ်ဟံးစုနဲၣ်ကျဲ လီၤတံၢ်လီၤဆဲး. ဒီးယ့ၣ်ၡူးပာ်ဖျါထီၣ်လၢ အနၢ်ပၢၢ်စၢၤအီၤ ခီဖျိ တဲပၠးအီၤလၢ ဘၣ်မနုၤအဃိ ယ့ၣ်ၡူးဘၣ်ဟ့ၣ်လီၤအီၤ မူဒါတခါအံၤလဲၣ်. ယ့ၣ်ၡူးတဲအီၤလၢ စီၤစီလူးန့ၣ် “မ့ၢ်ပှၤလၢ ယဃုထၢထီၣ်အီၤ ဒ်သိး ကလဲၤစံၣ်တဲၤတဲလီၤယမံၤ လၢပှၤကလုာ်တဖၣ်, စီၤပၤတဖၣ်, ဒီးပှၤအံၣ်စရ့လးဖိတဖၣ် အအိၣ်လီၤ. ဒီးအဝဲကတူၢ်ဘၣ် တၢ်နးတၢ်ဖှီၣ်လၢ ယမံၤအဃိ ထဲလဲၣ်န့ၣ် ယကဒုးနဲၣ်အီၤ ပျီပျီ.” (မၤတၢ် ၉:၁၅, ၁၆) စီၤအနၤနံ ကနၣ်ဝဲ ယ့ၣ်ၡူးအကလုၢ်တဘျီဃီ. ဒီးအဝဲလဲၤအိၣ်သကိး စီၤစီလူး ဒီးတဲစီၤစီလူးလၢ “ဒီပုၢ်ဝဲၢ် စီၤစီလူးဧၢ, ဖဲနဟဲလၢကျဲအခါ ကစၢ်ယ့ၣ်ၡူးလၢ အလီၣ်ဖျါထီၣ်အသးလၢ နမဲာ်ညါတဂၤန့ၣ် မၢလီၤယၤဒ်သိး နမဲာ် ကထံၣ်ထီၣ်က့ၤတၢ် ဒီးဒ်သိး နကလၢထီၣ်ပှဲၤထီၣ်ဒီး သးစီဆှံအဂီၢ်.”—မၤတၢ် ၉:၁၇.
၁၁, ၁၂. ဖဲပဖး ယ့ၣ်ၡူး ဒီးစီၤအနၤနံ ဒီးစီၤစီလူးအဂ့ၢ်န့ၣ် ပသ့ၣ်ညါဘၣ်တၢ်မနုၤလဲၣ်.
၁၁ ဘၣ်ဃးဒီး တၢ်မၤအသးတခါအံၤန့ၣ် ပသ့ၣ်ညါဘၣ် ယ့ၣ်ၡူး, စီၤအနၤနံ ဒီးစီၤစီလူးအဂ့ၢ်တနီၤ. အဒိ ပသ့ၣ်ညါဘၣ်လၢ ယ့ၣ်ၡူး ဟံးစုနဲၣ်ကျဲဝဲ တၢ်စံၣ်တဲၤတဲလီၤတၢ်မၤ ဒ်အအၢၣ်လီၤပာ်စၢၤဝဲအသိး. (မး ၂၈:၂၀) မုၢ်မဆါတနံၤအံၤ ယ့ၣ်ၡူး တဟဲတဲတၢ်ဒီးပှၤ လၢအနီၢ်ကစၢ်ဘၣ်နာ်က့ အဝဲဟံးစုနဲၣ်ကျဲဝဲ တၢ်စံၣ်တဲၤတဲလီၤတၢ်မၤ ခီဖျိ ကုၢ်လၢအတီ ဒီးအကူၣ်တၢ်သ့ လၢအပာ်ထီၣ်ဝဲလၢ အပှၤဟံၣ်ဖိအဖီခိၣ်. (မး ၂၄:၄၅-၄၇) အဃိ ပှၤပၢဆှၢတၢ်ကမံးတံာ် ဟံးစုနဲၣ်ကျဲဝဲ ပှၤစံၣ်တဲၤတဲလီၤတၢ်ဖိတဖၣ် ဒီးပှၤလဲၤလၢညါတဖၣ် ဒ်သိးအဝဲသ့ၣ် ကဃုထံၣ်န့ၢ် ပှၤလၢအအဲၣ်ဒိးသ့ၣ်ညါအါထီၣ် ဘၣ်ဃးဒီး ယ့ၣ်ၡူးခရံာ်အဂ့ၢ်. ဒ်ပမၤလိဘၣ်လၢ တၢ်မၤလိလၢ အပူၤကွံာ်တခါအသိး ပှၤလၢအဃ့ထုကဖၣ် ဒ်သိးကဒိးန့ၢ်ဘၣ် ကစၢ်ယွၤ အတၢ်ဟံးစုနဲၣ်ကျဲအဂီၢ်န့ၣ် ဖဲအဝဲသ့ၣ် ဃ့ထုကဖၣ်ဝံၤတယံာ်ဘၣ်အခါ အဝဲသ့ၣ် ထံၣ်လိာ်ဘၣ်သးဒီး ယဟိဝၤပှၤအုၣ်အသးတဖၣ်.—မၤတၢ် ၉:၁၁.
၁၂ စီၤအနၤနံ ကနၣ် ယ့ၣ်ၡူး အကလုၢ် ဒီးတူၢ်လိာ်ဝဲ မူဒါအဃိ အန့ၢ်ဘၣ်တၢ်ဆိၣ်ဂ့ၤ. ဒီးစီၤအနၤနံ တပျံၤတၢ်လၢၤဘၣ်အဃိ အဝဲဒိးန့ၢ်ဘၣ် တၢ်ခွဲးတၢ်ယာ်လၢ ကမၤစၢၤ စီၤစီလူး ဒ်သိးစီၤစီလူး ကန့ၢ်ဘၣ် သးစီဆှံအဂီၢ်.b နၤမီၤ မ့ၢ်ကီလၢနဂီၢ်သနာ်က့ မ့ၢ်နကနၣ် ယ့ၣ်ၡူး အတၢ်မၤလိာ်လၢ ကဘၣ်စံၣ်တဲၤတဲလီၤတၢ် လီၤတံၢ်လီၤဆဲးန့ၣ်ဧါ. ပဝဲတနီၤန့ၣ် ပကလဲၤစံၣ်တဲၤတဲလီၤတၢ်လၢ တဟံၣ်ဘၣ်တဟံၣ် ဒီးကတဲတၢ်ဒီး ပှၤလၢပတသ့ၣ်ညါအီၤဘၣ်န့ၣ် တညီလၢပဂီၢ်ဘၣ်. ဒီးမ့မ့ၢ်ပှၤအဂၤတနီၤန့ၣ် ကဘၣ်လဲၤ စံၣ်တဲၤတဲလီၤတၢ်လၢ တၢ်ဆါတၢ်ပှ့ၤအလီၢ်, လၢကျဲ, လၢလီတဲစိ မ့တမ့ၢ် ကဘၣ်ကွဲးလံာ်ပရၢန့ၣ် တညီလၢအဝဲသ့ၣ်အဂီၢ်ဘၣ်. ဘၣ်ဆၣ် ဒ်စီၤအနၤနံအသိး ပမ့ၢ်နာ်လၢ ယ့ၣ်ၡူးဟံးစုနဲၣ်ကျဲ တၢ်စံၣ်တဲၤတဲလီၤတၢ်မၤ, ပမ့ၢ်အဲၣ်ပှၤဂၤ ဒီးထံၣ်ပှၤဂၤဒ် အဝဲသ့ၣ်ကကဲထီၣ် ပဒီပုၢ်ဝဲၢ်န့ၣ် ပတပျံၤတၢ် ဒီးပတဘၣ်ယိၣ်လၢ ကစံၣ်တဲၤတဲလီၤအဝဲသ့ၣ်လၢၤဘၣ်.—မး ၉:၃၆.
“စးထီၣ်ဖဲန့ၣ်န့ၣ် အဝဲ . . . စံၣ်တဲၤတဲလီၤတၢ်လၢ ယ့ၣ်ၡူး” အဂ့ၢ် (မၤတၢ် ၉:၁၈-၃၀)
၁၃, ၁၄. နမ့မ့ၢ်ပှၤမၤလိလံာ်စီဆှံဖိလၢ တဒိးဘျၢဘၣ်ထံဒံးဘၣ်န့ၣ် နမၤလိန့ၢ်တၢ်လၢ စီၤစီလူး အအိၣ်သ့ဒ်လဲၣ်.
၁၃ စီၤစီလူး မၤထွဲဝဲ တၢ်လၢအနၢ်ဟူဘၣ်ဝဲအဘျီဃီ. ဖဲစီၤစီလူး အမဲာ်ထံၣ်ထီၣ်တၢ်ဝံၤအလီၢ်ခံ အဝဲဒိးဘျၢထံ ဒီးစးထီၣ်ရ့လိာ်သးဒီး ခရံာ်အပျဲၢ်အဘီၣ်လၢ ဝ့ၢ်ဒၤမ့ၤစ့းအပူၤ. တကးဒံးဘၣ် “စးထီၣ်ဖဲန့ၣ်န့ၣ် အဝဲလဲၤလၢ ဘူၣ်ဘျီၣ်တဖၣ် ဒီးစံၣ်တဲၤတဲလီၤတၢ်လၢ ယ့ၣ်ၡူးန့ၣ် မ့ၢ်ဝဲကစၢ်ယွၤ အဖိခွါ.”—မၤတၢ် ၉:၂၀.
၁၄ နမ့ၢ်မၤလိလံာ်စီဆှံ ဒီးနမ့ၢ်တဒိးဘျၢဘၣ်ထံဒံးဘၣ်န့ၣ် နကမၤဒ် စီၤစီလူးအသိးဧါ. စီၤစီလူးန့ၣ် အဝဲဆီတလဲသးလၢ အဆိအချ့ ဒီးမၤထွဲဝဲ တၢ်လၢအမၤလိဘၣ်ဝဲတဖၣ်. မ့ၢ်လၢစီၤစီလူး ထံၣ်ဘၣ်ဝဲ ယ့ၣ်ၡူးခရံာ် မၤဝဲတၢ်လီၤလးတခါအဃိ ထိၣ်ဟူးထိၣ်ဂဲၤထီၣ်အီၤလၢ အကဒိးဘျၢထံ. ပှၤအါဂၤန့ၣ် ထံၣ်ဘၣ်ဝဲ ယ့ၣ်ၡူးမၤ တၢ်လီၤလး သနာ်က့ အဝဲသ့ၣ် တသးအိၣ်ဆီတလဲသးဘၣ်. အဒိ ပှၤဖၤရံၤၡဲတနီၤန့ၣ် အထံၣ်ဘၣ်ဝဲ ယ့ၣ်ၡူးမၤဘျါဝဲ ပှၤပိာ်ခွါလၢ အစုတဂ့ၤဘၣ်တဂၤ ဒီးမ့မ့ၢ် ပှၤယူဒၤဖိတနီၤန့ၣ် အသ့ၣ်ညါဝဲလၢ ယ့ၣ်ၡူးမၤဂဲၤဆၢထၢၣ်သမူထီၣ်က့ၤ စီၤလါစရူး. ဘၣ်ဆၣ် အဝဲသ့ၣ်တသးအိၣ် ဆီတလဲသးဘၣ် ဒီးအဝဲသ့ၣ် တနီၤန့ၣ် ထီဒါဝဲယ့ၣ်ၡူးဒံး. (မၢ် ၃:၁-၆; ယိၤဟၣ် ၁၂:၉, ၁၀) ပှၤအဂၤတဖၣ်န့ၣ် တကဲထီၣ် ခရံာ်ဖိသနာ်က့ ဘၣ်မနုၤအဃိ စီၤစီလူး ကဲထီၣ် ခရံာ်ဖိလဲၣ်. မ့ၢ်လၢ စီၤစီလူး ပျံၤကစၢ်ယွၤ ဒိၣ်န့ၢ်ဒံး ပှၤကညီ ဒီးအပာ်လုၢ်ပာ်ပှ့ၤ တၢ်လၢ ယ့ၣ်ၡူးခရံာ် မၤန့ၢ်အီၤအဃိ အကဲထီၣ်ခရံာ်ဖိ. (ဖံလံး ၃:၈) နၤစ့ၢ်ကီး နမ့ၢ်အိၣ်ဒီး တၢ်ပာ်သူၣ်ပာ်သး ဒ်စီၤစီလူးအသိးန့ၣ် နတပျဲလၢ တၢ်တမံၤဂ့ၤတမံၤဂ့ၤ ကမၤတံာ်တာ်နၤလၢ နကဟးစံၣ်တဲၤတဲလီၤတၢ် ဒီးနကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်ဘၣ်.
၁၅, ၁၆. လၢဘူၣ်ဘျီၣ်ပူၤန့ၣ် စီၤစီလူး မၤမနုၤလဲၣ်. ဒီးပှၤယူဒၤဖိလၢ ဝ့ၢ်ဒၤမ့ၤစ့းန့ၣ် ဒိကနၣ်အီၤဧါ.
၁၅ ထံၣ်တမှံကွၢ်လၢ ဖဲစီၤစီလူး စံၣ်တဲၤတဲလီၤ ယ့ၣ်ၡူးအဂ့ၢ်လၢ ဘူၣ်ဘျီၣ်ပူၤအခါ ပှၤဂီၢ်မုၢ်တဖၣ် ကတူၢ်ဘၣ်ဝဲဒ်လဲၣ်. အဝဲသ့ၣ်တနီၤန့ၣ် ကကမၢကမၣ် ဒီးကဖုးဘၣ်အသး ဒီးတနီၤန့ၣ် ကသးပှံၢ်ထီၣ် စီၤစီလူးဒိၣ်မး. ဒီးအဝဲသ့ၣ် တဲဝဲလၢ “ပှၤတဂၤအံၤ မ့ၢ်ပှၤလၢ အမၤနးမၤဖှီၣ် ပှၤလၢအကိးထီၣ် ယ့ၣ်ၡူးအမံၤလၢ ဝ့ၢ်ယရူၤၡလ့ၣ်အပူၤတဖၣ်နးမး တမ့ၢ်ဧီၤ.” (မၤတၢ် ၉:၂၁) ဖဲစီၤစီလူး တဲပၠးအဝဲသ့ၣ်လၢ ဘၣ်မနုၤအဃိ အဆီတလဲ အတၢ်ထံၣ်လၢ ယ့ၣ်ၡူးအဖီခိၣ်လဲၣ်အခါ အပာ်ဖျါထီၣ်န့ၢ်စ့ၢ်ကီး အဝဲသ့ၣ် လီၤတံၢ်လီၤဆဲးလၢ “ယ့ၣ်ၡူးမ့ၢ်ခရံာ်.” (မၤတၢ် ၉:၂၂) စီၤစီလူး တဲဘၣ်ပှၤဂၤလီၤတံၢ်လီၤဆဲး သနာ်က့ ပှၤတနာ်အီၤ ကိးဂၤဒဲးဘၣ်. ပှၤတနီၤန့ၣ် အဝဲသ့ၣ် ပာ်တ့ၢ်အမိၢ်လုၢ်ပၢ်လၢ်တကဲဘၣ် ဒီးတနီၤန့ၣ် အဝဲသ့ၣ်ပာ်ဒိၣ်အသးအဃိ အဝဲသ့ၣ်တဆီတလဲသးဘၣ်. သနာ်က့ စီၤစီလူး တဟ့ၣ်အၡူဘၣ် ဒီးအဝဲဆဲး စံၣ်တဲၤတဲလီၤတၢ်.
၁၆ တၢ်ဆၢကတီၢ် လဲၤပူၤကွံာ်သၢနံၣ်လံ သနာ်က့ ပှၤယူဒၤဖိလၢ ဝ့ၢ်ဒၤမ့ၤစ့းန့ၣ် ထီဒါစီၤစီလူးဒံး. ဒီးလၢခံအဝဲသ့ၣ် ကူၣ်ထီၣ်လၢ ကမၤသံ စီၤစီလူး. (မၤတၢ် ၉:၂၃; ၂ ကရံၣ် ၁၁:၃၂, ၃၃; ကလၤ ၁:၁၃-၁၈) ဖဲစီၤစီလူး သ့ၣ်ညါဝဲလၢ ပှၤဃုမၤသံအီၤအခါ အဝဲဟးထီၣ်ခူသူၣ်လၢဝ့ၢ်ပူၤ ခီဖျိ ပှၤစဲၤလီၤအီၤလၢ ဝ့ၢ်ဒူၣ်အပဲတြီဖိ. စီၤလူၤကၣ် ပာ်ဖျါထီၣ်ဝဲလၢ ပှၤလၢအမၤစၢၤ စီၤစီလူး ဒ်သိး အကဟးထီၣ်လၢ ဝ့ၢ်ပူၤလၢ မုၢ်နၤခီန့ၣ် အကဲဝဲ “အ (စီၤစီလူး) ပျဲၢ်အဘီၣ်တဖၣ်.” (မၤတၢ် ၉:၂၅) အဃိ ဖျါလၢ ပှၤတနီၤလၢ ဝ့ၢ်ဒၤမ့ၤစ့းန့ၣ် နၢ်ဟူဘၣ်ဝဲတၢ်လၢ စီၤစီလူး စံၣ်တဲၤတဲလီၤဝဲ ဒီးအဝဲသ့ၣ်ဆီတလဲသး ဒီးကဲထီၣ်ဝဲ ယ့ၣ်ၡူးအပျဲၢ်အဘီၣ်.
၁၇. (က) ပှၤတူၢ်လိာ် လံာ်စီဆှံတၢ်သိၣ်တၢ်သီ ကိးဂၤဒဲးဧါ. (ခ) ပဘၣ်ဆဲးမၤမနုၤလဲၣ် ဒီးဘၣ်မနုၤအဃိလဲၣ်.
၁၇ ဖဲနစးထီၣ်တဲပၠး နဟံၣ်ဖိဃီဖိ, နသကိး ဒီးပှၤဂၤတဖၣ် ဘၣ်ဃးဒီး လံာ်စီဆှံ တၢ်မ့ၢ်တၢ်တီလၢ နမၤလိဘၣ်တဖၣ်အခါ ဘၣ်သ့ၣ်သ့ၣ် နကမုၢ်လၢ်လၢ အဝဲသ့ၣ် ကတူၢ်လိာ် တၢ်မ့ၢ်တၢ်တီလၢ နတဲပၠးအဝဲသ့ၣ်တဖၣ်. ပှၤတနီၤန့ၣ် ကတူၢ်လိာ်ဝဲ တၢ်မ့ၢ်တၢ်တီ ဘၣ်ဆၣ် ပှၤအါတက့ၢ်န့ၣ် တတူၢ်လိာ်ဝဲဘၣ်. ဘၣ်သ့ၣ်သ့ၣ် နဟံၣ်ဖိဃီဖိစ့ၢ်ကီး ကရ့နၤဒ် ဒုၣ်ဒါအသိး. (မး ၁၀:၃၂-၃၈) ဘၣ်ဆၣ် နမ့ၢ်မၤဂ့ၤထီၣ် နတၢ်သ့တၢ်ဘၣ်လၢ နကၡဲပၠးပှၤဂၤလၢ လံာ်စီဆှံတၢ်မ့ၢ်တၢ်တီ ဒီးဆဲးပာ်ဖျါထီၣ် ခရံာ်ဖိ အတၢ်ဂ့ၤတၢ်ဝါန့ၣ် လၢခံပှၤလၢအထီဒါနၤတဖၣ် ဆီတလဲ အတၢ်ပာ်သူၣ်ပာ်သးသ့.—မၤတၢ် ၁၇:၂; ၁ ပ့း ၂:၁၂; ၃:၁, ၂, ၇.
၁၈, ၁၉. (က) စီၤဘၢ်နါဘၤ မၤစၢၤစီၤစီလူးအဃိ ကဲဘျုးဒ်လဲၣ်. (ခ) ပကွၢ်လိ စီၤဘၢ်နါဘၤ ဒီးစီၤစီလူး ကသ့ဒ်လဲၣ်.
၁၈ ဖဲစီၤစီလူး လဲၤနုာ်လၢ ဝ့ၢ်ယရူၤၡလ့ၣ်အခါ ခရံာ်အပျဲၢ်အဘီၣ်တဖၣ် တနာ်ဝဲလၢ စီၤစီလူး ကဲထီၣ်ခရံာ်အပျဲၢ်အဘီၣ်ဘၣ်န့ၣ် ပနၢ်ပၢၢ်အဝဲသ့ၣ်သ့. ပှၤတနာ်အီၣ် စီၤစီလူးဘၣ်ဆၣ် စီၤဘၢ်နါဘၤ တဲဝဲလၢ စီၤစီလူးန့ၣ် အကဲဝဲ ခရံာ်အပျဲၢ်အဘီၣ်တဂၤအဃိ တၢ်မၢဖိတဖၣ် တူၢ်လိာ် စီၤစီလူး ဒီးစီၤစီလူး အိၣ်ဒီးအဝဲသ့ၣ် ဖဲန့ၣ်တတီၤဖိ. (မၤတၢ် ၉:၂၆-၂၈) စီၤစီလူးန့ၣ် မ့ၢ်ပှၤတဂၤလၢ အအိၣ်ဒီးတၢ်ကူၣ်သ့ ဒီးအတမဲာ်ဆှးလၢ ကစံၣ်တဲၤတဲလီၤတၢ်ဘၣ်. (ရိ ၁:၁၆) စီၤစီလူး စံၣ်တဲၤတဲလီၤတၢ်ဒူဒူလၢ ဝ့ၢ်ယရူၤၡလ့ၣ်အပူၤ. လၢညါဝ့ၢ်အံၤမ့ၢ်ဝဲ လၢတၢ်လီၢ်လၢ အဝဲမၤအၢမၤနး ခရံာ်အပျဲၢ်အဘီၣ်တဖၣ်. ဒီးပှၤယူဒၤဖိလၢ ဝ့ၢ်ယရူၤၡလ့ၣ်အပူၤတဖၣ်န့ၣ် အဆိမိၣ်ဝဲလၢ စီၤစီလူး ကတီခိၣ်ရိၤမဲတၢ်လၢ ကမၤလီၤမၢ်ကွံာ် ခရံာ်ဖိအတၢ်ဘူၣ်တၢ်ဘါ. ဘၣ်ဆၣ် ဖဲအဝဲသ့ၣ်သ့ၣ်ညါဝဲလၢ စီၤစီလူး ကဲထီၣ်ခရံာ်ဖိတဂၤအခါ အဝဲသ့ၣ်သးထီၣ်တၢ်ဒိၣ်မး ဒီးအဲၣ်ဒိးမၤသံဝဲ စီၤစီလူး. လံာ်စီဆှံတဲဝဲလၢ “ဖဲဒီပုၢ်ဝဲၢ်တဖၣ် နၢ်ဟူဝဲ တၢ်ဂ့ၢ်အံၤအခါ အဝဲသ့ၣ်လဲၤကိးလီၤအီၤလၢ ဝ့ၢ်ကဲၤစါရံၤ ဒီးဆှၢကွံာ်အီၤလၢ ဝ့ၢ်တၢ်စူး.” (မၤတၢ် ၉:၃၀) စီၤစီလူး ဒိကနၣ် ယ့ၣ်ၡူးအတၢ်ဟံးစုနဲၣ်ကျဲ လၢအဟဲခီဖျိ တၢ်အိၣ်ဖှိၣ် အဃိ ကဲဘျုးလၢ အနီၢ်ကစၢ် ဒီးတၢ်အိၣ်ဖှိၣ်အဂီၢ်.
၁၉ စီၤဘၢ်နါဘၤ စးထီၣ်လဲၤမၤစၢၤဝဲ စီၤစီလူး. စီၤဘၢ်နါဘၤ ပာ်ဖျါထီၣ် တၢ်သူၣ်ဂ့ၤသးဝါ ဒ်အံၤအဃိ မၤစၢၤဝဲ အဝဲသ့ၣ်ခံဂၤ ဒ်သိးကကဲထီၣ် သကိးလၢအဂ့ၤ. ဒ်စီၤဘၢ်နါဘၤအသိး မ့ၢ်နသးအိၣ်မၤစၢၤပှၤအသီလၢ တၢ်အိၣ်ဖှိၣ်အပူၤ ခီဖျိ လဲၤစံၣ်တဲၤတဲလီၤတၢ်ဒီးအဝဲသ့ၣ် ဒီးမၤစၢၤအဝဲသ့ၣ် ဒ်သိး ကလဲၤထီၣ်လဲၤထီလၢ နီၢ်သးတခီဧါ. နမ့ၢ်မၤစၢၤအဝဲသ့ၣ်န့ၣ် နကန့ၢ်ဘၣ် တၢ်ဆိၣ်ဂ့ၤအါမး. နမ့ၢ်ကဲ ပှၤလၢ အကဲထီၣ် ပှၤစံၣ်တဲၤတဲလီၤတၢ်ဖိအသီန့ၣ် တူၢ်လိာ်ပှၤဂၤအတၢ်မၤစၢၤ ဒ်စီၤစီလူးအသိးတက့ၢ်. နမ့ၢ်ဟးစံၣ်တဲၤတဲလီၤတၢ်ဒီး ပှၤစံၣ်တဲၤတဲလီၤတၢ်ဖိလၢ အတၢ်လဲၤခီဖျိအိၣ်အါန့ၣ် နစံၣ်တဲၤတဲလီၤတၢ် ကသ့အါထီၣ် ဒီးနကန့ၢ်ဘၣ်စ့ၢ်ကီး သကိးလၢအဂ့ၤ.
“ပှၤအါဂၤ ကဲထီၣ် ပှၤစူၢ်က့ၤနာ်က့ၤ ကစၢ်” (မၤတၢ် ၉:၃၁-၄၃)
၂၀, ၂၁. ဖဲတၢ်ဆၢကတီၢ်လၢ ‘အမုာ်အခုၣ်’ အတီၢ်ပူၤန့ၣ် ကစၢ်ယွၤအခ့အပှၤလၢညါ ဒီးခဲအံၤတဖၣ် ဟံန့ၢ်ဝဲ တၢ်ခွဲးတၢ်ယာ်ဒ်လဲၣ်.
၂၀ စီၤစီလူး ကဲထီၣ်ခရံာ်ဖိ ဒီးဟးထီၣ်လၢ ဝ့ၢ်ယရူၤၡလ့ၣ်ပူၤ ဝံၤအလီၢ်ခံ “တၢ်အိၣ်ဖှိၣ်ဖိခဲလၢာ်လၢ ယူဒၤအဟီၣ်ကဝီၤ, ကၤလံၤလါ ဒီးၡၤမရံအပူၤန့ၣ် အိၣ်ဘၣ် မုာ်မုာ်ခုၣ်ခုၣ်.” (မၤတၢ် ၉:၃၁) ဖဲတၢ်မုာ်တၢ်ခုၣ်အိၣ်ဒံး အဆၢကတီၢ် ခရံာ်အပျဲၢ်အဘီၣ်တဖၣ် မၤဝဲမနုၤလဲၣ်. (၂ တံၤ ၄:၂) လံာ်စီဆှံတဲဝဲလၢ အဝဲသ့ၣ် “အဂံၢ်ဆူၣ်ထီၣ်ဝဲ.” တၢ်မၢဖိပီလူး ဒီးဒီပုၢ်ဝဲၢ်လၢ အဘၣ်မူဘၣ်ဒါအဂၤတဖၣ် မၤစၢၤဝဲ ခရံာ်အပျဲၢ်အဘီၣ်တဖၣ် ဒ်သိး အတၢ်နာ်ကဆူၣ်ထီၣ် ဒီးအဝဲသ့ၣ် “ပာ်ဖျါထီၣ် တၢ်ပျံၤယဟိဝၤယွၤ ဒီးဒိးန့ၢ်ဘၣ် တၢ်ဂံၢ်တၢ်ဘါလၢ သးစီဆှံအအိၣ်.” အဒိ စီၤပ့းတရူးန့ၣ် ဟ့ၣ်ဂံၢ်ဟ့ၣ်ဘါဝဲ ခရံာ်အပျဲၢ်အဘီၣ်တဖၣ်လၢ အအိၣ်လၢ ဝ့ၢ်လူးဒၤ ဒီးၡၤရိၣ် အတၢ်ပၢၤခိၣ်. အဝဲကျဲးစၢးဝဲ သပှၢ်တၢၢ်အဃိ ပှၤလၢအအိၣ်လၢ တၢ်လီၢ်ဖဲန့ၣ် အါဂၤ “ကဲထီၣ် ပှၤလၢအစူၢ်က့ၤနာ်က့ၤ ကစၢ်.” (မၤတၢ် ၉:၃၂-၃၅) ယ့ၣ်ၡူးအပျဲၢ်အဘီၣ်တဖၣ်အံၤ တမၤတၢ်ထဲလၢ အနီၢ်ကစၢ်အဘျုးအဂီၢ်ဘၣ်. အဝဲသ့ၣ် မၤစၢၤလိာ်သး တဂၤဒီးတဂၤ ဒီးစံၣ်တဲၤတဲလီၤဝဲ တၢ်သးခုကစီၣ်. အဃိ တၢ်အိၣ်ဖှိၣ်ဖိတဖၣ် “အနီၣ်ဂံၢ်ဒံးယံာ်ဒံးအါထီၣ်ဝဲ.”
၂၁ ဖဲ ၁၉၉၀ နံၣ်တခွ့ၣ်တခွီၣ်န့ၣ် အကဲဝဲ တၢ်ဆၢကတီၢ်လၢ ‘အမုာ်အခုၣ်’ လၢယဟိဝၤပှၤအုၣ်အသးတဖၣ်အဂီၢ်. ထံကီၢ်လၢ အထီဒါဝဲ ယဟိဝၤပှၤအုၣ်အသး တနီၤန့ၣ် အတၢ်စိတၢ်ကမီၤ တအိၣ်လၢၤဘၣ် အဃိ ပစံၣ်တဲၤတဲလီၤတၢ်လၢ တၢ်သဘျ့အပူၤ. အဃိ ယဟိဝၤပှၤအုၣ်အသးတဖၣ် ဟံန့ၢ်တၢ်ခွဲးတၢ်ယာ်လၢ ကစံၣ်တဲၤတဲလီၤတၢ်အဃိ တၢ်ဒိၣ်ထီၣ်ထီထီၣ် အိၣ်ဝဲဒီဒူၣ်.
၂၂. ဖဲတၢ်အိၣ်သးဂ့ၤဒံးအခါ ပသူတၢ်ဆၢကတီၢ်လၢ အဂ့ၤကတၢၢ် ကသ့ဒ်လဲၣ်.
၂၂ ဖဲတၢ်အိၣ်သးဂ့ၤဒံးအခါ မ့ၢ်ပသူပတၢ်ဆၢကတီၢ် လၢအဂ့ၤကတၢၢ်လံဧါ. ပမ့ၢ်အိၣ်ဘၣ်လၢ ထံကီၢ်လၢ ပှၤတတြီဃာ် တၢ်စံၣ်တဲၤတဲလီၤတၢ်မၤဘၣ် ဒီးပဘူၣ်ထီၣ်ဘါထီၣ်ဘၣ် ယဟိဝၤယွၤ လၢတၢ်သဘျ့အပူၤန့ၣ် မုၣ်ကီၤလံၢ် ကကျဲးစၢး လ့ပစီပှၤ ဒ်သိး ပကဃုတၢ်ထူးတၢ်တီၤအါအါ ဒီးမၤ ယဟိဝၤယွၤ အတၢ်မၤ တချုးလၢၤတဂ့ၤအဂီၢ်. (မး ၁၃:၂၂) အဃိ ပကဘၣ်ပလီၢ်သး. ဒီးပကဘၣ်သ့ၣ်နီၣ်ထီၣ်လၢ ပတၢ်အိၣ်သးန့ၣ် ဆီတလဲသးသ့ချ့မး အဃိ ဖဲတၢ်အိၣ်သးဂ့ၤဒံးအခါ ပကသူပတၢ်ဆၢကတီၢ်လၢ တၢ်ကူၣ်သ့ ဒီးပကဟံန့ၢ် တၢ်ခွဲးတၢ်ယာ်လၢ ပကစံၣ်တဲၤတဲလီၤတၢ် ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ.
၂၃, ၂၄. (က) တၢ်ကဲထီၣ်သးဒီး နီၢ်တဘံၤသါန့ၣ် ပန့ၢ်ဘၣ်တၢ်မၤလိဒ်လဲၣ်. (ခ) ပပာ်လီၤပသးလၢ ပကမၤမနုၤလဲၣ်.
၂၃ ပကတဲသကိး ခရံာ်အပျဲၢ်အဘီၣ် နီၢ်တဘံၤသါ လၢအမ့ၢ် နီၢ်ဒီၢ်ကါ အဂ့ၢ်. နီၢ်တဘံၤသါန့ၣ် အအိၣ်လၢ ဝ့ၢ်ယၤဖိၤ လၢအဘူးဒီးဝ့ၢ်လူးဒၤ. ပဒီပုၢ်ဝဲၢ်မုၣ်လၢ အအိၣ်ဒီး တၢ်သးတီတဂၤအံၤ သူဝဲ အတၢ်ဆၢကတီၢ်လၢက “မၤဂ့ၤတၢ်” ဒီး “ဟ့ၣ်မၤစၢၤ ပှၤဖှီၣ်ဖိယာ်ဖိတဖၣ်.” ဘၣ်ဆၣ် အဝဲဆိးက့ထီၣ် သတူၢ်ကလာ်ဒီးသံဝဲ.c နီၢ်တဘံၤသါ သးအိၣ်မၤစၢၤပှၤဂၤအဃိ ဖဲအသံအခါ ခရံာ်အပျဲၢ်အဘီၣ်လၢ ဝ့ၢ်ယၤဖိၤအပူၤတဖၣ် လီၤဆီဒၣ်တၢ် မုၣ်ကမဲတဖၣ်န့ၣ် သးအုးဒိၣ်မး. ဖဲပှၤကကတဲာ်ကတီၤ နီၢ်တဘံၤသါ လၢကလဲၤခူၣ်လီၤအီၤအခါ စီၤပ့းတရူး ဟဲတုၤဝဲလၢအဟံၣ်. ဒီးစီၤပ့းတရူးမၤဝဲ တၢ်လီၤလးတခါလၢ ယ့ၣ်ၡူးခရံာ်အတၢ်မၢဖိတဖၣ် တမၤဘၣ်ဝဲနီတဘျီဒံးဘၣ်. စီၤပ့းတရူး ဃ့ထုကဖၣ်တၢ် ဒီးမၤသမူထီၣ်က့ၤ နီၢ်တဘံၤသါ. ထံၣ်တမှံကွၢ်ဖဲ စီၤပ့းတရူး ကိးဃီၤဝဲ မုၣ်ကမဲတဖၣ် ဒီးခရံာ်အပျဲၢ်အဘီၣ်တဖၣ်လၢဒၢးပူၤ ဒီးဒုးနဲၣ်အဝဲသ့ၣ်လၢ နီၢ်တဘံၤသါ မူထီၣ်က့ၤအခါ အဝဲသ့ၣ် ကသးခုဒိၣ်မး. တၢ်အိၣ်သးတခါအံၤ ကမၤစၢၤအဝဲသ့ၣ် ဒ်သိးအဝဲသ့ၣ် လဲၤခီဖျိတၢ်မၤကွၢ် လၢခါဆူညါ ကန့ၢ်အဂီၢ်. ဒီးတၢ်လီၤလးတခါအံၤ “ဟူထီၣ်ဝဲလၢ ဝ့ၢ်ယၤဖိၤအပူၤဝးဝး ဒီးပှၤအါဂၤ ကဲထီၣ် ပှၤစူၢ်က့ၤနာ်က့ၤ ကစၢ်.”—မၤတၢ် ၉:၃၆-၄၂.
နကွၢ်လိ နီၢ်တဘံၤသါ ကသ့ဒ်လဲၣ်
၂၄ တၢ်ကဲထီၣ်သးဒီး နီၢ်တဘံၤသါန့ၣ် ပန့ၢ်ဘၣ် တၢ်မၤလိလၢအရ့ဒိၣ်ခံခါ. (၁) ပသံလၢ သတူၢ်ကလာ်အတီၢ်ပူၤသ့. ပဃိ ဖဲတၢ်ဆၢကတီၢ် အိၣ်ဒီးပှၤအခါ ပကကျဲးစၢး မၤဂ့ၤထီၣ် ပတၢ်ရ့လိာ်သးဒီး ကစၢ်ယွၤ. (စံၣ် ၇:၁) (၂) တၢ်မုၢ်လၢ် ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤန့ၣ် အကဟဲကဲထီၣ်သးနီၢ်ကီၢ်. ယဟိဝၤယွၤ ထံၣ်ဝဲနီၢ်တဘံၤသါ အတၢ်ဂ့ၤတၢ်ဝါ တဘျုးမံၤညါအဃိ အဆိၣ်ဂ့ၤအီၤ. ဒ်န့ၣ်အသိး ပမ့ၢ်မၤတၢ်ဆူၣ်ဆူၣ်လၢ ယဟိဝၤယွၤအဂီၢ်န့ၣ် တချုးလၢ အၢ်မက့းဒိၣ် ဟဲတုၤဒံးဘၣ်အခါ ပမ့ၢ်သံသနာ်က့ လၢခံန့ၣ် ယဟိဝၤယွၤ ကမၤသမူထီၣ်က့ၤပှၤ. (ဧ့ၤ ၆:၁၀) အခဲအံၤ ပမ့ၢ်ထံၣ်ဘၣ်ဒီး “တၢ်ဆၢကတီၢ်ကီမ့ၢ်ဂ့ၤ, ညီမ့ၢ်ဂ့ၤ” မ်ပဆဲး စံၣ်တဲၤတဲလီၤ ယ့ၣ်ၡူးအဂ့ၢ် လီၤတံၢ်လီၤဆဲးတက့ၢ်.—၂ တံၤ ၄:၂.
a ကွၢ်တၢ်လွံၢ်နၢၣ်လၢအမ့ၢ် “ပှၤဖၤရံၤၡဲ စီၤစီလူး.”
b ညီနုၢ်န့ၣ် ထဲဒၣ်တၢ်မၢဖိတဖၣ် အိၣ်ဒီး တၢ်ခွဲးတၢ်ယာ်လၢ ကဟ့ၣ်လီၤပှၤဂၤလၢ သးစီဆှံ. ဘၣ်ဆၣ် တၢ်တဘျီအံၤန့ၣ် လီၤဆီဝဲတစဲး, ယ့ၣ်ၡူးဟ့ၣ်ဝဲ စီၤအနၤနံ တၢ်စိတၢ်ကမီၤ ဒ်သိး အကဟ့ၣ်လီၤဝဲ စီၤစီလူး လၢသးစီဆှံ. စီၤစီလူး ကဲထီၣ်ခရံာ်ဖိဝံၤအလီၢ်ခံဖးယံာ်မၣ် အဝဲထံၣ်လိာ်အသးဒီး တၢ်မၢဖိတဆံခံဂၤ. ဘၣ်ဆၣ် တချုးလၢ အထံၣ်လိာ်သးဒီး တၢ်မၢဖိဒံးဘၣ်နာ်က့ ယ့ၣ်ၡူးဟ့ၣ်အီၤ သးစီဆှံ ဒ်သိး အစံၣ်တဲၤတဲလီၤတၢ်ကသ့အဂီၢ်.
c ကွၢ်တၢ်လွံၢ်နၢၣ်လၢအမ့ၢ် “နီၢ်တဘံၤသါ—‘အဝဲမၤဂ့ၤတၢ် အိၣ်ဒီဒူၣ်.’”