တၢ်မၤလိ ၆
ပှၤသံတဖၣ်အဂီၢ် တၢ်မုၢ်လၢ်အိၣ်ဒ်လဲၣ်
၁. တၢ်သးခုကစီၣ် ဘၣ်ဃးဒီးပှၤသံန့ၣ် မ့ၢ်မနုၤလဲၣ်.
ဖဲယ့ၣ်ၡူးလဲၤတုၤလၢ ဘ့ၤသနံလၢ အဘူးဒီးဝ့ၢ်ယရူၤၡလ့ၣ်အခါ အတံၤသကိးစီၤလါစရူး သံအိၣ်လံလွံၢ်သီလံလီၤ. ယ့ၣ်ၡူးလဲၤဝဲဆူ တၢ်သွၣ်ခိၣ်ဃုာ်ဒီး စီၤလါစရူး အဒီပုၢ်ဝဲၢ်မုၣ်လၢအမ့ၢ် နီၢ်မၢ်သၤဒီးနီၢ်မၤရံန့ၣ်လီၤ. တယံာ်ဘၣ်ဒီးပှၤဂီၢ်မုၢ်တဖၣ် ဟဲပာ်ဖှိၣ်ထီၣ်အသးလီၤ. ဖဲယ့ၣ်ၡူးမၤမူထီၣ်က့ၤ စီၤလါစရူးအခါ နီၢ်မၢ်သၤဒီးနီၢ်မၤရံ ကသးခုထဲလဲၣ်န့ၣ် နထံၣ်မှံကွၢ်ကသ့ဧါ.—ဖး ယိၤဟၣ် ၁၁:၂၁-၂၄, ၃၈-၄၄ တက့ၢ်.
နီၢ်မၢ်သၤသ့ၣ်ညါပာ်စၢၤဝဲ တၢ်သးခုကစီၣ် ဘၣ်ဃးဒီးပှၤသံလီၤ. အဝဲသ့ၣ်ညါဝဲလၢ ယဟိဝၤယွၤကမၤမူထီၣ်က့ၤပှၤသံ ဒ်သိးကအိၣ်မူဘၣ်ကဒါက့ၤလၢ ဟီၣ်ခိၣ်အဂီၢ်န့ၣ်လီၤ.—ဖး ယိၤဘး ၁၄:၁၄, ၁၅ တက့ၢ်.
၂. ဖဲပသံအခါ တၢ်ကမၤအသးဒီးပှၤဒ်လဲၣ်.
ယွၤစံးဘၣ် စီၤအၤဒၣ်- “နမ့ၢ်ဟီၣ်ခိၣ်ကမူၣ်, ဒီးနကက့ၤက့ၤဆူဟီၣ်ခိၣ်ကမူၣ်လီၤ.”— ၁ မိၤၡ့ ၃:၁၉.
ပှၤဟီၣ်ခိၣ်ဖိတဖၣ် ဘၣ်တၢ်တ့လီၤအီၤလၢ ဟီၣ်ခိၣ်ကမူၣ်လီၤ. (၁ မိၤၡ့ ၂:၇; ၃:၁၉) လၢပနီၢ်ခိအပူၤ ကလၤလၢအသံတသ့ဘၣ်န့ၣ် တအိၣ်ဝဲဘၣ်. ဖဲပသံအခါ တၢ်အိၣ်လၢပပူၤတမူဝဲနီတမံၤလၢၤဘၣ်. ပမ့ၢ်သံန့ၣ် ပခိၣ်နူာ်စ့ၢ်ကီးသံကွံာ်ဝဲ ဒီးပတၢ်ဆိကမိၣ်တအိၣ်လၢၤဘၣ်လီၤ. ဘၣ်ဃးဒီးအတၢ်လဲၤခီဖျိ ဖဲအဝဲသံဝဲအခါန့ၣ် စီၤလါစရူးတတဲဝဲနီတမံၤဘၣ်. မ့ၢ်လၢပှၤသံတသ့ၣ်ညါ တၢ်နီတမံၤဘၣ်အဃိလီၤ.—ဖး စံးထီၣ်ပတြၢၤ ၁၄၆:၄; စံၣ်တဲၤတဲလီၤတၢ် ၉:၅, ၆, ၁၀ တက့ၢ်.
ဖဲပှၤသံဝံၤအလီၢ်ခံန့ၣ် မ့ၢ်ကစၢ်ယွၤ ကမၤနးမၤဖှီၣ်အဝဲသ့ၣ်လၢ မ့ၣ်အူန့ၣ်ဧါ. လံာ်စီဆှံပာ်ဖျါထီၣ်ဝဲလၢ ပှၤသံတဖၣ် တသ့ၣ်ညါတၢ်နီတမံၤဘၣ်အဃိ ဖျါတြၢၤကလာ်လၢ လရာ်မ့ၣ်အူန့ၣ် မ့ၢ်တၢ်သိၣ်လိကမၣ်လၢ အဒုၣ်ဒွဲၣ်စံးအၢယွၤလီၤ. တၢ်မၤနးမၤဖှီၣ် ပှၤကညီလၢမ့ၣ်အူန့ၣ် မ့ၢ်တၢ်လၢအလီၤသးဘၣ်အၢလၢကစၢ်ယွၤအမဲာ်ညါလီၤ.—ဖး ယံးရမံယၤ ၇:၃၁ တက့ၢ်.
ကွၢ်တၢ်ဂီၤမူလၢအမ့ၢ် ဖဲပှၤသံအခါ တၢ်ကမၤအသးဒီးအဝဲသ့ၣ်ဒ်လဲၣ်
၃. ပှၤသံတဖၣ် ကတိၤတၢ်ဒီးပှၤသ့ဧါ.
ပှၤသံတဖၣ် ကတိၤတၢ်မ့ၢ်ဂ့ၤ နၢ်ဟူတၢ်မ့ၢ်ဂ့ၤတသ့ဝဲဘၣ်. (စံးထီၣ်ပတြၢၤ ၁၁၅:၁၇) ဘၣ်ဆၣ် မူခိၣ်ကလူးတနီၤန့ၣ် အၢသီဝဲလီၤ. အဝဲသ့ၣ်ပာ်မၤအသးဒ် ပှၤလၢအသံတ့ၢ်အသိးဒီးကတိၤတၢ်ဒီးပှၤဂၤသ့လီၤ. (၂ ပ့းတရူး ၂:၄) ယဟိဝၤယွၤတြီပှၤဒ်သိး ပသုတဃုကျဲလၢပကကတိၤတၢ်ဒီး ပှၤသံတဂ့ၤလီၤ.—ဖး ၅ မိၤၡ့ ၁၈:၁၀, ၁၁ တက့ၢ်.
၄. မတၤတဖၣ် ကဂဲၤဆၢထၢၣ်သမူထီၣ်က့ၤလဲၣ်.
ပှၤသံတ့ၢ်လၢအကကွဲၢ်တဖၣ်န့ၣ် ကဂဲၤဆၢထၢၣ်သမူထီၣ်က့ၤလၢ ဟီၣ်ခိၣ်ချၢလီၤ. ပှၤတနီၤနီၤလၢအတသ့ၣ်ညါယွၤဒီး မၤတၢ်အၢတၢ်သီဒၣ်လဲာ် ကဂဲၤဆၢထၢၣ်သမူထီၣ်က့ၤဝဲလီၤ.—ဖး မၤတၢ် ၂၄:၁၅ တက့ၢ်.
ပှၤလၢအဂဲၤဆၢထၢၣ် သမူထီၣ်က့ၤတဖၣ်န့ၣ် ကဒိးန့ၢ်ဘၣ်ဝဲတၢ်ခွဲး တၢ်ယာ်လၢကမၤလိဘၣ် တၢ်မ့ၢ်တၢ်တီ ဘၣ်ဃးဒီးယွၤလီၤ. ဒီးဖဲန့ၣ်အဆၢကတီၢ် အဝဲသ့ၣ်ကဘၣ်ပာ်ဖျါထီၣ် ဝဲတၢ်နာ်ယ့ၣ်ၡူးခီဖျိ ဒိကနၣ်ဝဲအကလုၢ်န့ၣ်လီၤ. (လီၣ်ဖျါ ၂၀:၁၁-၁၃) ပှၤလၢအဂဲၤဆၢထၢၣ်သမူထီၣ် က့ၤတဖၣ် မ့ၢ်အိၣ်မူဝဲဒ်တၢ်ဘၣ်ယွၤအသးန့ၣ် ကဒိးန့ၢ်ဘၣ်ဝဲ တၢ်မူအထူအယိာ်လၢ ဟီၣ်ခိၣ်ချၢလီၤ.—ဖး ယိၤဟၣ် ၅:၂၈, ၂၉ တက့ၢ်.
၅. တၢ်ဂဲၤဆၢထၢၣ်သမူထီၣ်က့ၤန့ၣ် ပာ်ဖျါထီၣ်န့ၢ်ပှၤလၢ ယဟိဝၤယွၤအဂ့ၢ်ဒ်လဲၣ်.
ကစၢ်ယွၤဒုးအိၣ်ထီၣ်ဝဲ တၢ်မုၢ်လၢ်လၢပှၤသံအဂီၢ်ခီဖျိ ဆှၢလီၤဝဲအဖီခွါလၢ ကတူၢ်သံအသးလၢ ပဂီၢ်န့ၣ်လီၤ. လၢတၢ်န့ၣ်အဃိ တၢ်ဂဲၤဆၢထၢၣ်သမူထီၣ်က့ၤန့ၣ် ပာ်ဖျါထီၣ်န့ၢ်ပှၤလၢယဟိဝၤယွၤအတၢ်အဲၣ်ဒီး အတၢ်သးကညီၤအဒိၣ်အမုၢ်လီၤ. ဖဲပှၤသံတဖၣ် သမူထီၣ်က့ၤအခါ လီၤဆီဒၣ်တၢ်နအဲၣ်ဒိးထံၣ် မတၤတဂၤလဲၣ်.—ဖး ယိၤဟၣ် ၃:၁၆; ရိမ့ၤ ၆:၂၃ တက့ၢ်.