တၢ်မုၢ်လၢ်နီၢ်နီၢ်လၢ ပှၤသံတ့ၢ်လၢနအဲၣ်ဘၣ်တဖၣ်အဂီၢ်

၁-၃. ဒုၣ်ဒါမနုၤ လူၤဖီၣ်ပဝဲသ့ၣ် ခဲလၢာ်လဲၣ်, တၢ်ဆိကမိၣ်ကွၢ် လံာ်စီဆှံအတၢ်သိၣ်လိန့ၣ် ဘၣ်မနုၤအဃိ ဟ့ၣ်ပှၤတၢ်သူၣ်မုာ်သးမုာ် ဖဲအကြၢးလဲၣ်.

ဆိကမိၣ်ကွၢ်လၢ နဘၣ်ဃ့ၢ်ကွံာ်လၢ ဒုၣ်ဒါအအၢအသီတဂၤ အဃိတက့ၢ်. အဝဲအဂံၢ်အဘါဆူၣ်န့ၣ်နၤဒီး ချ့န့ၣ်နၤတက့ၢ်လီၤ. နထံၣ်ဘၣ်လၢ အဝဲမၤသံ နဘူးနတံၢ်တနီၤအဃိ နသ့ၣ်ညါပာ်လၢ အဝဲမ့ၢ်ပှၤလၢ တၢ်သးကညီၤတအိၣ်ဘၣ် န့ၣ်လီၤ. နဂုာ်ကျဲးစၢး ဃ့ၢ်ပူၤဖျဲးနသး သနာ်က့ အဝဲဘူးထီၣ်ဒီးနၤ ကယီကယီလံ. ဖျါလၢတၢ်မုၢ်လၢ် တအိၣ်လၢၤဘၣ်. ဘၣ်ဆၣ် ပှၤကမၤစၢၤနၤတဂၤ ဟဲပၢၢ်ထီၣ်ဝဲ သတုၢ်ကလာ်လီၤ. အဝဲမ့ၢ်ပှၤလၢ အစိကမီၤဒိၣ်န့ၣ် နဒုၣ်နဒါအစးအါမးန့ၣ်လီၤ, ဒီးအဝဲ အၢၣ်လီၤစ့ၢ်ကီးဝဲလၢ ကမၤစၢၤနၤလီၤ. နသးကခူၣ်လီၤ ဆံးဒိၣ်လဲၣ်.

^၂ ဒ်န့ၣ်အသိးလီၤ, နဘၣ်တၢ်လူၤဖီၣ်နၤလၢ ဒုၣ်ဒါဒ်သိးအံၤလီၤ. ပဝဲသ့ၣ် ခဲလၢာ်ပတူၢ်ဘၣ်လီၤ. ဒ်ပမၤလိဝံၤတ့ၢ်လၢ တၢ်နီၤဖးလၢညါအသိး လံာ်စီဆှံကိးဝဲ တၢ်သံလၢ ဒုၣ်ဒါန့ၣ်လီၤ. ပဃ့ၢ်ပူၤဖျဲးကွံာ် မ့တမ့ၢ် ဒုးဆၢက့ၤ ဒုၣ်ဒါအံၤ တသ့နီတဂၤဘၣ်. လၢပကျါ ပှၤအါဂၤ ထံၣ်ဘၣ်လၢ ဒုၣ်ဒါအံၤ စိာ်ကွံာ်ပှၤလၢ ပအဲၣ်ဘၣ်အီၤတဖၣ် အသးသမူန့ၣ်လီၤ. ဘၣ်ဆၣ်ယဟိဝၤ အစိကမီၤဒိၣ်န့ၣ် တၢ်သံအံၤ အစးအါမးန့ၣ်လီၤ. ကစၢ်မ့ၢ် အုၣ်ခီၣ်ကစၢ်လၢ ပှဲၤဒီးတၢ်အဲၣ်, ဒီးပာ်ဖျါတ့ၢ်လံဝဲလၢ အဝဲမၤနၢၤ ဒုၣ်ဒါအံၤသ့န့ၣ်လီၤ. အါန့ၢ်အန့ၣ် အဝဲအၢၣ်လီၤဝဲလၢ ကမၤဟးဂီၤကွံာ် ဒုၣ်ဒါ, တၢ်သံအံၤလီၤစိၤန့ၣ်လီၤ. ​လံာ်စီဆှံပာ်ဖျါဝဲဒ်အံၤလီၤ– “ဒုၣ်ဒါလၢအကဘၣ်တၢ်ဟးဂီၤ လၢခံကတၢၢ်န့ၣ်, မ့ၢ်တၢ်သံလီၤ.” (၁ ကရံၣ်သူး ၁၅:၂၆) မ့ၢ်တၢ်သးခုကစီၣ်လီၤ.

^၃ ပကဆိကမိၣ်ကွၢ် စှၤဘီလၢ ဒုၣ်ဒါတၢ်သံ ဒုးပှၤအခါ ဘၣ်ဒိပှၤဒ်လဲၣ်အဂ့ၢ်န့ၣ်တက့ၢ်. ပမ့ၢ်ဆိကမိၣ်ကွၢ် တၢ်အံၤန့ၣ် ကမၤစၢၤဒ်သိး ပကနၢ်ပၢၢ် တၢ်လၢကဒုးသးခုပှၤ အဂီၢ်လီၤ. ယဟိဝၤ အၢၣ်လီၤအီလီၤဝဲလၢ ပှၤသံတဖၣ် ကဂဲၤဆၢထၢၣ်သမူထီၣ်က့ၤလီၤ. (ယၡါယၤ ၂၆:၁၉) အဝဲသ့ၣ် ကဒိးန့ၢ်က့ၤ သးသမူလီၤ. တၢ်အံၤမ့ၢ် တၢ်မုၢ်လၢ်လၢ တၢ်ဂဲၤဆၢထၢၣ် သမူထီၣ်က့ၤန့ၣ်လီၤ.

ဖဲပှၤလၢ ပအဲၣ်ဘၣ်အီၤတဂၤ သံအခါ

၄. (က) ယ့ၣ်ၡူးအတၢ်တူၢ်ဘၣ်လၢ ပှၤလၢအဲၣ်ဘၣ်ဝဲတဂၤအတၢ်သံန့ၣ် ဘၣ်မနုၤအဃိ မ့ၢ်တၢ်သိၣ်လိပှၤလၢ ယဟိဝၤအတၢ်တူၢ်ဘၣ်လဲၣ်. (ခ) ယ့ၣ်ၡူးအိၣ်ဒီး တၢ်ရ့လိာ်သးလီၤဆီ မနုၤလဲၣ်.

^၄ မ့ၢ်နပျဲလီၤမၣ်ဘၣ် ပှၤလၢနအဲၣ်ဘၣ် တဂၤလၢတၢ်သံဧါ. တၢ်တူၢ်ဘၣ် တၢ်ကိၢ်တၢ်ဂီၤ, တၢ်သူၣ်အုးသးအုး ဒီးတၢ်မုၢ်လၢ်လၢာ်ကွံာ်န့ၣ် လီၤဂာ်ဒ် ပတူၢ်တပှဲၤဘၣ်န့ၣ်လီၤ. ဖဲတၢ်ဆၢကတီၢ်ဒ်န့ၣ်အခါန့ၣ် ပလိၣ်ဘၣ် ယွၤအကလုၢ်ကထါဒ်သိး ကမၤမုာ်ထီၣ်က့ၤပှၤန့ၣ်လီၤ. (၂ ကရံၣ်သူး ၁:၃, ၄) လံာ်စီဆှံ မၤစၢၤပှၤလၢ ပကနၢ်ပၢၢ် ​ယဟိဝၤဒီး ယ့ၣ်ၡူးတူၢ်ဘၣ်တၢ်လၢ ဘၣ်ဃးဒီးတၢ်သံန့ၣ်လီၤ. ယ့ၣ်ၡူး, လၢအပာ်ဖျါထီၣ်က့ၤ အပၢ်အလုၢ်လၢ်သကဲးပဝး အလၢအပှဲၤန့ၣ်, သ့ၣ်ညါဝဲ တၢ်ကိၢ်တၢ်ဂီၤလၢ ပှၤတဂၤဂၤ ဘၣ်လီၤမၣ်ကွံာ်လၢ တၢ်သံန့ၣ်လီၤ. (ယိၤဟၣ် ၁၄:၉) ဖဲယ့ၣ်ၡူးလဲၤတုၤလၢ ဝ့ၢ်ယရူၤၡလ့ၣ် ကိးဘျီဒဲးန့ၣ် လဲၤအိၣ်သကိးဝဲ လါစရူးဒီး အဒီပုၢ်ဝဲၢ်မုၣ်လၢအမ့ၢ် မၤရံဒီး မၢ်သၤ, လၢအအိၣ်ဖဲ ဝ့ၢ်ဘ့ၤသနံ, လၢအဘူးဒီး ယရူၤၡလ့ၣ်န့ၣ်လီၤ. အဝဲသ့ၣ်အိၣ်ဒီး တၢ်ရ့လိာ်သး ဘူးဘူးတံၢ်တံၢ်လီၤ. လံာ်စီဆှံ စံးဝဲဒ်အံၤလီၤ– ‘ဒီးယ့ၣ်ၡူးအဲၣ် မၢ်သၤဒီးအဒီပုၢ်ဝဲၢ်မုၢ်, ဒီးလါစရူးလီၤ.’ (ယိၤဟၣ် ၁၁:၅) ဘၣ်ဆၣ် ဒ်ပမၤလိဝံၤတ့ၢ်လၢ တၢ်နီၤဖးလၢ မဲာ်ညါအသိး လါစရူးသံဝဲဒၣ်န့ၣ်လီၤ.

၅, ၆. (က) ယ့ၣ်ၡူးအိၣ်ဒီး လါစရူးအဟံၣ်ဖိဃီဖိဒီး အတံၤသကိး လၢအသူၣ်အုးသးအုးတဖၣ်အခါ ​ကစၢ်မၤဝဲဒ်လဲၣ်. (ခ) ယ့ၣ်ၡူးအတၢ်သူၣ်အုးသးအုးန့ၣ် ဘၣ်မနုၤအဃိ မ့ၢ်တၢ်ဟ့ၣ်ဂံၢ်ဟ့ၣ်ဘါ လၢပဂီၢ်လဲၣ်.

^၅ ယ့ၣ်ၡူးအတံၤသကိး သံကွံာ်အဃိ အဝဲတူၢ်ဘၣ်ဝဲဒ်လဲၣ်. တၢ်ကွဲးနီၣ်န့ၣ် ပာ်ဖျါန့ၣ်ပှၤလၢ ယ့ၣ်ၡူးဟဲဝဲဆူ လါစရူး အဘူးအတံၢ် ဒီးအတံၤသကိးတဖၣ်လၢ အသူၣ်အုးသးအုးလၢ တၢ်သံအံၤအဃိလီၤ. ဖဲယ့ၣ်ၡူးထံၣ် အဝဲသ့ၣ်အခါ အသးဘၣ်ဒိဒိၣ်မးလီၤ. ကစၢ် “ကအုကစွါထီၣ်လၢ အသးကံၢ်ပူၤ, ဒီးအသူၣ်ကိၢ်အသးဂီၤ” န့ၣ်လီၤ. တၢ်န့ၣ်အလီၢ်ခံ တၢ်ကွဲးနီၣ် စံးဝဲဒ်အံၤလီၤ– “ဒီးယ့ၣ်ၡူးအမဲာ်ထံလီၤဝဲလီၤ.” (ယိၤယၣ် ၁၁:၃၃, ၃၅) ယ့ၣ်ၡူး အတၢ်သူၣ်အုးသးအုးအံၤန့ၣ် အခီပညီမ့ၢ်လၢ တၢ်မုၢ်လၢ်တအိၣ်ဘၣ်ဧါ. တမ့ၢ်ဘၣ်. နီၢ်နီၢ်န့ၣ် ယ့ၣ်ၡူးသ့ၣ်ညါဝဲလၢ တယံာ်ဘၣ်ဒီး တၢ်လီၤလး ကဟဲကဲထီၣ်တခါန့ၣ်လီၤ. (ယိၤဟၣ် ၁၁:၃, ၄) ဘၣ်ဆၣ် လၢတၢ်သံအဃိ ကစၢ်အသူၣ်အုးသးအုးလီၤ.

^၆ ပမ့ၢ်စံးတမံၤန့ၣ်, ယ့ၣ်ၡူးအတၢ်သူၣ်အုးသးအုးအံၤ မ့ၢ်တၢ်ဟ့ၣ်ဂံၢ်ဟ့ၣ်ဘါလၢ ပဂီၢ်လီၤ. တၢ်အံၤသိၣ်လိပှၤလၢ ယ့ၣ်ၡူးဒီးအပၢ် ယဟိဝၤန့ၣ် သးဟ့ဝဲတၢ်သံလီၤ. ​ဘၣ်ဆၣ် ယဟိဝၤကစၢ်ယွၤ ကမၤနၢၤကွံာ်ဝဲ ဒုၣ်ဒါအံၤန့ၣ်လီၤ! ပကကွၢ်သကိး ​ကစၢ်ယွၤမၢ ယ့ၣ်ၡူးမၤမနုၤလဲၣ်န့ၣ်တက့ၢ်.

“လါစရူး, ဟဲက့ၤထီၣ်တက့ၢ်”

၇, ၈. ပမ့ၢ်ကွၢ်လၢ ပှၤကညီအတၢ်ထံၣ်န့ၣ် လါစရူးအတၢ်ဂ့ၢ်အံၤ ဘၣ်မနုၤအဃိ လီၤဂာ်ဒ် တၢ်မုၢ်လၢ် တအိၣ်လၢၤဘၣ်န့ၣ်လဲၣ်, ဘၣ်ဆၣ် ယ့ၣ်ၡူးမၤဝဲ တၢ်မနုၤလဲၣ်.

^၇ ပှၤဘျၢလီၤ လါစရူးလၢ လ့ကအိပူၤဝံၤလံန့ၣ်လီၤ, ဒီးယ့ၣ်ၡူးမၢ ပှၤသုးကွံာ်လၢၢ်လၢ အကျၢၢ်ဘၢဃာ် လ့အခိၣ်ထိးလီၤ. မ့ၢ်လၢ လါစရူးအစိၣ် အိၣ်လံလွံၢ်သီလံဒီး ကအုၣ်ကျၣ်လံအဃိ မၢ်သၤ တြီအီၤလီၤ. (ယိၤဟၣ် ၁၁:၃၉) ပမ့ၢ်ကွၢ်လၢ ပှၤကညီအတၢ်ထံၣ်န့ၣ် တၢ်မုၢ်လၢ်မနုၤ ကအိၣ်လဲၣ်.

^၈ ပှၤတလ့ၣ်ကွံာ် လၢၢ်ဝံၤအလီၢ်ခံ, ယ့ၣ်ၡူးကိးပသူထီၣ်ဝဲလၢ အကလုၢ်ဖးဒိၣ်လၢ, “လါစရူး, ဟဲက့ၤထီၣ်တက့ၢ်”. တၢ်မၤအသးဒ်လဲၣ်. “ဒီးပှၤလၢအသံတ့ၢ်တဂၤန့ၣ်, ဟဲက့ၤထီၣ်” ဝဲဒၣ်လီၤ. (ယိၤဟၣ် ၁၁:၄၃, ၄၄) နဆိကမိၣ်ကွၢ် ပှၤအိၣ်ဖဲန့ၣ်တဖၣ် အတၢ်သူၣ်ခုသးခု ကသ့ဧါ. လါစရူးမ့မ့ၢ် အပုၢ်မ့ၢ်ဂ့ၤ, အဘူးအတံၢ်မ့ၢ်ဂ့ၤ, အတံၤသကိးမ့ၢ်ဂ့ၤ, မ့တမ့ၢ် ပှၤလၢအဃၢၤမ့ၢ်ဂ့ၤ, အဝဲသ့ၣ် သ့ၣ်ညါပာ်ဝဲလၢ လါစရူးသံလံန့ၣ်လီၤ. ဘၣ်ဆၣ် ခဲအံၤ ပှၤလၢအဲၣ်ဘၣ်ဝဲအံၤန့ၣ် အိၣ်က့ၤကဒီး ဒီးအဝဲသ့ၣ်လီၤ. တၢ်အံၤလီၤဂာ်လၢ ကဲထီၣ်အသးဒ်အံၤတသ့ဘၣ်လီၤ. လၢတၢ်န့ၣ်အဃိ, လီၤတံၢ်လၢ ပှၤအါဂၤ ကလဲၤဖိးဟု လါစရူးလၢ တၢ်သူၣ်ခုသးခုအပူၤန့ၣ်လီၤ. မ့ၢ်မး တၢ်မၤနၢၤ တၢ်သံလီၤ.

၉, ၁၀. (က) တၢ်အစိကမီၤ အဂ့ၢ်ခီၣ်ထံးလၢ တၢ်မၤမူထီၣ်က့ၤ လါစရူးန့ၣ် ယ့ၣ်ၡူးပာ်ဖျါဝဲဒ်လဲၣ်. (ခ) ပမ့ၢ်ဖး တၢ်ဂဲၤဆၢထၢၣ် သမူထီၣ်က့ၤ အတၢ်ကွဲးနီၣ်လၢ လံာ်စီဆှံပူၤဒီး ပကဒိးန့ၢ်ဘၣ် တၢ်အဘျုးအဖှိၣ်တနီၤန့ၣ် မ့ၢ်မနုၤလဲၣ်.

^၉ ယ့ၣ်ၡူးတတဲဝဲဒၣ်လၢ အဝဲမၤတၢ်လီၤလးအံၤလၢ အဝဲအစိကမီၤဘၣ်. ဖဲအဝဲတချုးကိးထီၣ် လါစရူးအခါ အတၢ်ဃ့ဘါထုကဖၣ်န့ၣ် ဖျါလီၤတံၢ်လၢ ပှၤအကါဒိၣ်ကတၢၢ်လၢ အဒုးဂဲၤဆၢထၢၣ် သမူထီၣ်က့ၤတၢ်န့ၣ် မ့ၢ်ယဟိဝၤန့ၣ်လီၤ. (ယိၤဟၣ် ၁၁:၄၁, ၄၂) ယဟိဝၤသု အစိကမီၤလၢ ကျဲဒ်အံၤန့ၣ် တမ့ၢ်ထဲတၢ်အံၤတဘျီဘၣ်. ကစၢ်ယွၤအကလုၢ်ကထါ တၢ်ကွဲးနီၣ်အပူၤ တၢ်လီၤလး ဒ်သိးအံၤခွံမံၤအကျါ လါစရူးအတၢ်ဂဲၤဆၢထၢၣ် သမူထီၣ်က့ၤန့ၣ် မ့ၢ်ဒၣ်တမံၤန့ၣ်လီၤ.a ပမ့ၢ်ဖး ဒီးဃုသ့ၣ်ညါ တၢ်ကွဲးနီၣ်တဖၣ်အံၤန့ၣ် ကဒုးသူၣ်မံသးမုာ်ပှၤလီၤ. ပှၤဂဲၤဆၢထၢၣ် သမူထီၣ်က့ၤအကျါ ပာ်ဃုာ်ဒီး သးပှၢ်, သးစၢ်, ပိာ်မုၣ်ဒီးပိာ်ခွါ, ပှၤအံၣ်စရ့လးဖိ ဒီးတမ့ၢ်ပှၤအံၣ်စရ့လးဖိ တဖၣ်အဃိ တၢ်သ့ၣ်တဖၣ်အံၤ သိၣ်လိပှၤလၢ ကစၢ်ယွၤန့ၣ် တကွၢ်မဲာ်တၢ်ဘၣ်န့ၣ်လီၤ. တၢ်ပာ်ဖျါလၢ လံာ်စီဆှံအဆၢတဖၣ်အံၤန့ၣ် ဒုးသးခုပှၤဒိၣ်မးလီၤ! အဒိ, ယ့ၣ်ၡူးမၤမူထီၣ်က့ၤ ဖိသၣ်မုၣ်တဂၤအခါ အမိၢ်အပၢ်တဖၣ် “ကမၢကမၣ်ဒိၣ်နီၢ်မးလီၤ.” (မၢ်ကူး ၅:၄၂) မ့ၢ်လီၤ, ယဟိဝၤဟ့ၣ် အဝဲသ့ၣ် တၢ်သးခုလၢ သးပ့ၤနီၣ်ဝဲတသ့ နီတဘျီဘၣ်န့ၣ်လီၤ.

^၁၀ ယ့ၣ်ၡူး မၤမူထီၣ်က့ၤ ပှၤတဖၣ်အံၤန့ၣ် လၢခံဘၣ်သံကဒီးလီၤ. လၢတၢ်န့ၣ်အဃိ, တၢ်မၤမူထီၣ်အဝဲသ့ၣ်အံၤန့ၣ် အဲၣ်ဒိးစံးဝဲလၢ အခီပညီတအိၣ်ဘၣ်ဧါ. တမ့ၢ်ဘၣ်. လံာ်စီဆှံ အတၢ်ကွဲးနီၣ်တဖၣ်အံၤန့ၣ် ဒုးနာ်န့ၣ်ပှၤ တၢ်မ့ၢ်တၢ်တီလၢ အကါဒိၣ်တဖၣ် တကးဘၣ်အမဲာ်ညါ ဟ့ၣ်ပှၤတၢ်မုၢ်လၢ်န့ၣ်လီၤ.

တၢ်မၤလိလၢ တၢ်ဂဲၤဆၢထၢၣ်သမူထီၣ်က့ၤ အတၢ်ကွဲးနီၣ်

၁၁. လါစရူး အတၢ်သမူထီၣ်က့ၤအံၤန့ၣ် မၤစၢၤပှၤလၢ ပကနာ်န့ၣ် တၢ်မ့ၢ်တၢ်တီလၢ တၢ်ကွဲးနီၣ်အီၤဖဲ စံၣ်တဲၤတဲလီၤ ၉:၅ န့ၣ်ဒ်လဲၣ်.

^၁၁ လံာ်စီဆှံသိၣ်လိဝဲလၢ ပှၤသံန့ၣ် “တသ့ၣ်ညါဘၣ်တၢ်နီတမံၤဘၣ်.” အဝဲသ့ၣ်တအိၣ်မူ တ့ၢ်ဖဲ တၢ်လီၢ်ဖဲလဲၣ်မးဘၣ်. တၢ်သ့ၣ်ညါ စ့ၢ်ကီးတအိၣ်လၢၤဘၣ်. တၢ်မ့ၢ်တၢ်တီအံၤ ဂၢၢ်ကျၢၤထီၣ်ဖဲ လါစရူးအတၢ်ကွဲးနီၣ်န့ၣ်လီၤ. လါစရူးသမူထီၣ်က့ၤအခါ တဲဝဲမူခိၣ်အဂ့ၢ်ဒီး မၤသူၣ်ဟုးသးဂဲၤပှၤဧါ. ဒီးမၤပျံၤမၤဖုးပှၤလၢ တၢ်ဃဲၤအလီၤပျံၤလၢ ဘၣ်ဃးဒီး လရာ်မ့ၣ်အူဧါ. တတဲဝဲဒၣ်ဘၣ်. လၢလံာ်စီဆှံပူၤ လါစရူးတဲဝဲ တၢ်ကတိၤတဖၣ်အံၤ တအိၣ်ဘၣ်. အဝဲသံလွံၢ်သီ အတီၢ်ပူၤန့ၣ် “တသ့ၣ်ညါဘၣ်တၢ် နီတမံၤဘၣ်.” (စဲၣ်တဲၤတဲလီၤ ၉:၅) မ့ၢ်ဒၣ်လါစရူး မံလၢတၢ်သံန့ၣ်လီၤ.—ယိၤဟၣ် ၁၁:၁၁.

၁၂. လါစရူးအတၢ်သမူထီၣ်က့ၤန့ၣ် ဘၣ်မနုၤအဃိ ပနာ်သ့လၢ မ့ၢ်တၢ်ကဲထီၣ်အသးနီၢ်နီၢ်လဲၣ်.

^၁၂ လါစရူးအဂ့ၢ် တၢ်ကွဲးနီၣ်အံၤ သိၣ်လိပှၤလၢ တၢ်ဂဲၤဆၢထၢၣ် သမူထီၣ်က့ၤန့ၣ် တမ့ၢ်တၢ်တဲမုာ်နၢ်ဘၣ်ဒီး မ့ၢ်တၢ်မၤအသး နီၢ်နီၢ်န့ၣ်လီၤ. မ့ၢ်လၢ ယ့ၣ်ၡူးမၤမူထီၣ် ​လါစရူးလၢ ကမျၢၢ်လၢအထံၣ်တၢ်လၢ အမဲာ်ဒီး အုၣ်အသး အမဲာ်ညါန့ၣ်လီၤ. တၢ်ဘူၣ်တၢ်ဘါခိၣ်နၢ်လၢ အသးဟ့ယ့ၣ်ၡူး တဖၣ်ဒၣ်လဲာ် တဂ့ၢ်လိာ်ဝဲ တၢ်လီၤလးအံၤဘၣ်. လၢန့ၣ်အလီၢ်, အဝဲသ့ၣ် စံးဝဲဒ်အံၤလီၤ– “မ့ၢ်ပကမၤဒ်လဲၣ်. အဂ့ၢ်ဒ်အံၤ, ပှၤတဂၤ ​[ယ့ၣ်ၡူး] အံၤ မၤတၢ်လီၤလးအါမးလီၤ”. (ယိၤဟၣ် ၁၁:၄၇) ပှၤအါဂၤ လဲၤကွၢ်ဝဲ ပှၤဂဲၤဆၢထၢၣ် သမူထီၣ်က့ၤအံၤလီၤ. အဘျုးအိၣ်လၢ, အဝဲသ့ၣ်အကျါ အါဂၤန့ၣ် နာ်ဝဲယ့ၣ်ၡူးလီၤ. မ့ၢ်လၢအဝဲသ့ၣ်ထံၣ်ဘၣ်ဝဲ လါစရူးဂဲၤဆၢထၢၣ် သမူထီၣ်က့ၤအဃိလီၤ. တၢ်အံၤမ့ၢ် တၢ်အုၣ်အသးအမူလၢ ယ့ၣ်ၡူးမ့ၢ်ပှၤလၢ ယွၤပျဲလီၤန့ၣ်လီၤ. တၢ်အုၣ်အသးအံၤ အတဟီၣ်ဆူၣ်ဒိၣ်မးအဃိ ပှၤယူဒၤ အတၢ်ဘူၣ်တၢ်ဘါခိၣ်နၢ်လၢအသးကိၤတနီၤန့ၣ် ကူၣ်ထီၣ်ဖးလီၤဝဲတုၤဒၣ်လဲာ်လၢ ဒ်သိးကမၤသံယ့ၣ်ၡူးဒီး လါစရူးခံဂၤလၢာ်န့ၣ်လီၤ.—ယိၤဟၣ် ၁၁:၅၃; ၁၂:၉-၁၁.

၁၃. ယဟိဝၤ မၤမူထီၣ်က့ၤဝဲ ပှၤသံတဖၣ်သ့နီၢ်နီၢ်န့ၣ် ပကနာ်အဂီၢ် တၢ်ဂ့ၢ်အခီၣ်ထံး မနုၤအိၣ်လဲၣ်.

^၁၃ တၢ်တူၢ်လိာ် တၢ်သမူထီၣ်က့ၤဒ် တၢ်မၤအသးနီၢ်နီၢ်န့ၣ် မ့ၢ်တၢ်လၢ အခီပညီတအိၣ်ဘၣ်ဧါ. တမ့ၢ်ဘၣ်. ယ့ၣ်ၡူးသိၣ်လိဝဲလၢ မုၢ်တနံၤန့ၣ် “ကယဲၢ်ပှၤအိၣ်လၢ [တၢ်သ့ၣ်နီၣ်ထီၣ်, ဟသ] တၢ်သွၣ်ခိၣ် အပူၤခဲလၢာ်” ကသမူထီၣ်ဝဲလီၤ. (ယိၤဟၣ် ၅:၂၈) ​ယဟိဝၤမ့ၢ် သးသမူခဲလၢာ် အတၢ်ဘၣ်တ့ကစၢ်လီၤ. ကစၢ်တ့လီၤက့ၤကဒီးဝဲ သးသမူတဘျီသ့န့ၣ် ပနာ်အီၤကကီဧါ. တၢ်အံၤ သန့ၤထီၣ်အသးအါမးလၢ ယဟိဝၤ အတၢ်သ့ၣ်နီၣ်န့ၣ်မ့ၢ်လီၤ. ပှၤလၢပအဲၣ်ဘၣ်လၢ အသံတ့ၢ်တဖၣ်န့ၣ် ကစၢ်တိၢ်နီၣ်ဝဲ ဘၣ်ကစီဒီဧါ. မူဟီၣ်ကယၢအပူၤ အိၣ်ဒီးဆၣ် အကကွဲၢ်အကထိလၢ ပဂံၢ်အီၤတဘၣ်ဘၣ်န့ၣ်လီၤ, ဘၣ်ဆၣ် ကစၢ်ယွၤ ဟ့ၣ်ပာ်ဝဲ ဆၣ်တဖျၢၣ်စုာ်စုာ် အမံၤန့ၣ်လီၤ. (ယၡါယၤ ၄၀:၂၆) လၢတၢ်န့ၣ်အဃိ ယဟိဝၤယွၤ တိၢ်နီၣ် ပှၤသံတ့ၢ်လၢ ပအဲၣ်ဘၣ်တဖၣ်သ့ လီၤတံၢ်လီၤဆဲးဒီး အဝဲသ့ၣ်ကက့ၤမူထီၣ်အဂီၢ် ကစၢ်မၤဝဲသ့န့ၣ်လီၤ.

၁၄, ၁၅. ဒ်ယိၤဘးအတၢ်ကတိၤအသိး ဘၣ်ဃးဒီးတၢ်မၤမူထီၣ်က့ၤ ပှၤသံသ့ၣ်တဖၣ်န့ၣ် ယဟိဝၤအသးမၤသးဒ်လဲၣ်.

^၁၄ မ့မ့ၢ်ဒ်န့ၣ်ဒီး ဘၣ်ဃးဒီး ပှၤသံတဖၣ် သမူထီၣ်က့ၤန့ၣ် ယဟိဝၤ အသးကမၤသးဒ်လဲၣ်. လံာ်စီဆှံသိၣ်လိဝဲလၢ ကစၢ်အသးဆူၣ်လၢ အဲၣ်ဒိးမၤမူထီၣ်က့ၤ ပှၤသံတဖၣ်န့ၣ်လီၤ. ပှၤတီပှၤလိၤယိၤဘး သံကွၢ်ဝဲ ဒ်အံၤလီၤ– “ပှၤကညီမ့ၢ်သံဒီး, ကမူထီၣ်ဒံးစ့ၢ်ကီးဧါ.” မ့ၢ်ဒၣ်ယိၤဘး စံးဝဲလၢ အဝဲကခိးဝဲလၢ တၢ်သွၣ်ခိၣ်အပူၤ ပၢၢ်လၢယဟိဝၤ သ့ၣ်နီၣ်ထီၣ်အီၤဒီး မၤမူထီၣ်က့ၤအီၤ အဆၢကတီၢ်န့ၣ်လီၤ. အဝဲစံးဝဲယဟိဝၤ ဒ်အံၤလီၤ– “ကိးထီၣ်တက့ၢ်, ဒီးယကစံးဆၢနၤလီၤ. မ်နသးအိၣ်တၢ်လၢ နစုတ့အီၤတက့ၢ်.”—​ယိၤဘး ၁၄:၁၃- ၁၅.

^၁၅ ဆိကမိၣ်ကွၢ်တက့ၢ်! ယဟိဝၤအဲၣ်ဒိး နီၢ်နီၢ်လၢ ပှၤသံတ့ၢ်တဖၣ် ကသမူထီၣ်က့ၤလီၤ. ပသ့ၣ်ညါဘၣ်လၢ ယဟိဝၤအသးအိၣ်တၢ် ဒ်အံၤန့ၣ် ဒုးသူၣ်မံသးမုာ်ပှၤ တမ့ၢ်ဘၣ်ဧါ. ဘၣ်ဆၣ် ခါဆူညါ တၢ်ဂဲၤဆၢထၢၣ်သမူထီၣ်က့ၤန့ၣ် ကကဲထီၣ်ဒ်လဲၣ်. မတၤတဖၣ် ကသမူထီၣ်က့ၤလဲၣ်, ဒီးလၢတၢ်လီၢ်ဖဲလဲၣ်.

‘ကယဲၢ်ပှၤအိၣ်လၢ တၢ်သ့ၣ်နီၣ်ထီၣ် တၢ်သွၣ်ခိၣ်တဖၣ်အပူၤ’

၁၆. ပှၤသံတဖၣ် ကသမူထီၣ်က့ၤလၢ တၢ်အိၣ်မူလၢ တၢ်အိၣ်အသးဒ်လဲၣ်.

^၁၆ တၢ်သမူထီၣ်က့ၤ အတၢ်ကွဲးနီၣ်လၢ လံာ်စီဆှံပူၤန့ၣ် သိၣ်လိပှၤအါမးလၢ ဘၣ်ဃးဒီးခါဆူညါ တၢ်သမူထီၣ်က့ၤန့ၣ်လီၤ. ပှၤသမူထီၣ်က့ၤလၢ ဟီၣ်ခိၣ်ချၢတဖၣ်န့ၣ် က့ၤထံၣ်လိာ်ဘၣ်အသးဒီး ပှၤလၢအဲၣ်ဘၣ်ဝဲတဖၣ်လီၤ. ခါဆူညါတၢ်ဂဲၤဆၢထၢၣ် သမူထီၣ်က့ၤသနာ်က့ မ့ၢ်ဒ်န့ၣ်အသိးလီၤ—ဘၣ်ဆၣ် ကဂ့ၤဒိၣ်န့ၣ်တက့ၢ်လီၤ. ဒ်ပမၤလိဝံၤတ့ၢ်လၢ တၢ်နီၤဖး ၃ အပူၤအသိး ကစၢ်ယွၤအတၢ်တိာ်ပာ်မ့ၢ် ဟီၣ်ခိၣ်ဒီဘ့ၣ် ကကဲထီၣ် ပၤရဒံစူးလီၤ. လၢတၢ်န့ၣ်အဃိ ပှၤသံတ့ၢ်တဖၣ်န့ၣ် တမ့ၢ်ကဟဲက့ၤသမူထီၣ်လၢ ဟီၣ်ခိၣ်လၢအပှဲၤဒီး တၢ်ဒုးတၢ်ယၤ, ကွီၢ်မ့ၣ်, တၢ်ဆူးတၢ်ဆါအပူၤဘၣ်. ကအိၣ်မူဘၣ် လီၤထူလီၤယိာ်လၢ ဟီၣ်ခိၣ်လၢ အမုာ်အခုၣ် ဒီးပှဲၤဒီးတၢ်သူၣ်ဖှံသးညီ အဖီခိၣ်န့ၣ်လီၤ.

၁၇. တၢ်ဂဲၤဆၢထၢၣ်သမူထီၣ်က့ၤန့ၣ် ကဖးလဲၣ်ဖးထီဆံးအါလဲၣ်.

^၁၇ မတၤတဖၣ် ကသမူထီၣ်က့ၤလဲၣ်. ယ့ၣ်ၡူးစံးဝဲလၢ ‘ကယဲၢ်ပှၤအိၣ်လၢ [တၢ်သ့ၣ်နီၣ်ထီၣ်, ဟသ] တၢ်သွၣ်ခိၣ်အပူၤခဲလၢာ်န့ၣ်, ကနၢ်ဟူ [ယ့ၣ်ၡူး] အကလုၢ်သီၣ်, ဒီးကဟဲက့ၤထီၣ်ဝဲ’ လီၤ. (ယိၤဟၣ် ၅:၂၈, ၂၉) လီၢ်ဖျါ ၂၀:၁၃ သနာ်က့ ပာ်ဖျါဝဲဒ်အံၤလီၤ– “ဒီးပီၣ်လဲၣ်ဟ့ၣ်ထီၣ် ပှၤသံအိၣ်လၢအပူၤ, ဒီးတၢ်သံဒီးပျုၤပူၤ [“ဟ့ဒံစ်”, ဟသ] န့ၣ် ဟ့ၣ်ထီၣ်ပှၤသံအိၣ်လၢအပူၤ”န့ၣ်လီၤ. “တၢ်သံ”ဒီး “ဟ့ဒံစ်” န့ၣ်မ့ၢ် ပှၤဟီၣ်ခိၣ်ဖိတဖၣ် အတၢ်သွၣ်ခိၣ်လီၤ. (ကွၢ်တၢ်ပိာ်ထွဲ, လံာ်ကဘျံးပၤ ၂၁၂-၃ တက့ၢ်.) တၢ်သွၣ်ခိၣ်ခဲလၢာ် ကအိၣ်ကလီလီၤ. ကယဲၢ်ပှၤအကကွဲၢ် အကထိတဖၣ်လၢ အအိၣ်ဘှံးဖဲန့ၢ်န့ၣ် ကသမူထီၣ်က့ၤဝဲလီၤ. တၢ်မၢဖိ ပီလူးစံးဝဲဒ်အံၤလီၤ– “လၢပှၤသံအတီမ့ၢ်ဂ့ၤ, တတီမ့ၢ်ဂ့ၤ, ကဂဲၤဆၢထၢၣ်က့ၤလီၤ.” (မၤတၢ် ၂၄:၁၅) တၢ်အံၤ အဲၣ်ဒိးစံးဝဲမနုၤလဲၣ်.

၁၈. “ပှၤတီပှၤလိၤ” လၢကဂဲၤဆၢထၢၣ် သမူထီၣ်က့ၤအကျါ မတၤတဖၣ်ကပာ်ဃုာ်လဲၣ်. တၢ်မုၢ်လၢ်အံၤန့ၣ် အဘျုးအိၣ်လၢ နဖီခိၣ်ဒ်လဲၣ်.

^၁၈ “ပှၤတီပှၤလိၤ” လၢပဖးဘၣ်ဖဲ လံာ်စီဆှံအပူၤ အကျါန့ၣ် ပာ်ဃုာ်ဒီး ပှၤလၢအအိၣ်မူတ့ၢ်ဖဲ ယ့ၣ်ၡူးတချုးဟဲလၢ ဟီၣ်ခိၣ်အဆၢကတီၢ်န့ၣ်လီၤ. နကသ့ၣ်နီၣ်ထီၣ် ­နိအၤ, အၤဘြၤဟၣ်, စၤရါ, မိၤၡ့, ရူၤသး, အ့ၤစတၢ်ဒီး ပှၤအဂုၤအဂၤတဖၣ်လီၤ. ဖဲဧ့ၤဘြံၤ အဆၢဒိၣ် ၁၁ အပူၤန့ၣ် ပာ်ဖျါဝဲ ပိာ်မုၣ်ဒီး ပိၣ်ခွါတနီၤလၢ အိၣ်ဒီးတၢ်စူၢ်တၢ်နာ် အဂ့ၢ်န့ၣ်လီၤ. ယဟိဝၤ အကုၢ်အပှၤလၢ အသံကွံာ်လၢပစိၤ တဖၣ်သနာ်က့ ပာ်ဃုာ်လၢ ­“ပှၤတီပှၤလိၤ” တဖၣ်အကျါလီၤ. တၢ်မုၢ်လၢ်လၢ တၢ်ဂဲၤဆၢထၢၣ် သမူထီၣ်က့ၤအဃိ ပကထူၣ်ဖျဲးလၢ တၢ်ပျံၤတၢ်သံန့ၣ်လီၤ.—ဧ့ၤဘြံၤ ၂:၁၅.

၁၉. “ပှၤတတီတလိၤ” တဖၣ်န့ၣ် မ့ၢ်မတၤလဲၣ်, ယဟိဝၤဟ့ၣ်အဝဲသ့ၣ်လၢ တၢ်အခွဲးအယာ်မနုၤလဲၣ်.

^၁၉ ဘၣ်ဃးဒီး ပှၤတနၢ်ဟူဘၣ် ယဟိဝၤအဂ့ၢ်နီတဘျီအဃိ တဘူၣ်ထီၣ်ဘါထီၣ်, တစူၢ်ကစၢ်တဖၣ်တခီ မ့ၢ်ဒ်လဲၣ်. “ပှၤတတီတလိၤ” လၢအကကွဲၢ် အကထိတဖၣ်န့ၣ် တဘၣ်တၢ်သးပ့ၤနီၣ်အီၤဘၣ်. အဝဲသ့ၣ် သနာ်က့ ကသမူထီၣ်က့ၤဒီး ပှၤကဟ့ၣ်အဝဲသ့ၣ် လၢတၢ်ဆၢကတီၢ် ဒ်သိးကမၤလိ ယွၤနီၢ်နီၢ်အဂ့ၢ်ဒီး ကဘူၣ်ထီၣ်ဘါထီၣ်ကစၢ်န့ၣ်လီၤ. ပှၤသံတ့ၢ်တဖၣ် ကသမူထီၣ်က့ၤဖဲ အနံၣ်တကထိ အတီၢ်ပူၤဒီး ကဒိးန့ၢ်ဘၣ်တၢ်အခွဲးလၢ ကရ့လိာ်ဘၣ်အသးဒီး ပှၤတီပှၤလိၤ လၢဟီၣ်ခိၣ်တဖၣ် ဒ်သိးကဘူၣ်ထီၣ်ဘါထီၣ် ယဟိဝၤအဂီၢ်န့ၣ်လီၤ. ကမ့ၢ်တၢ်ဆၢကတီၢ်လၢ အလီၤကမၢကမၣ်န့ၣ်လီၤ. တၢ်ဆၢကတီၢ်အံၤန့ၣ် လံာ်စီဆှံပာ်ဖျါဝဲလၢ မုၢ်စံၣ်ညီၣ်အနံၤလီၤ.b

၂၀. ဂဟဲနၢ်မ့ၢ် မနုၤလဲၣ်, မတၤတဖၣ် ကလဲၤဆူတၢ်လီၢ်ဖဲန့ၣ်လဲၣ်.

^၂၀ အဲၣ်ဒိးစံးဝဲလၢ ပှၤအိၣ်မူတ့ၢ်ခဲလၢာ် ကသမူထီၣ်က့ၤန့ၣ်ဧါ. တမ့ၢ်ဘၣ်. ​လံာ်စီဆှံ သိၣ်လိဝဲလၢပှၤသံတနီၤန့ၣ် အိၣ်ဖဲ “ဂဟဲနၢ်” န့ၣ်လီၤ. (လူၤကၣ် ၁၂:၅, ဟသ) “ဂဟဲနၢ်” န့ၣ်မ့ၢ်တၢ်ပူၤလၢ ပှၤလဲၤစူးကွံာ် တၢ်တဂိာ်တသီၣ် တၢ်အလီၢ်လၢ အအိၣ်ဖဲလၢပျၢၤ ဝ့ၢ်ယရူၤၡလ့ၣ် အချၢန့ၣ်လီၤ. ပှၤသံစိၣ်ဒီး တၢ်တဂိာ်တသီၣ်တဖၣ်န့ၣ် ဘၣ်တၢ်ဒွဲၣ်အူကွံာ်အီၤ ဖဲတၢ်လီၢ်အံၤန့ၣ်လီၤ. ပှၤယူဒၤဖိတဖၣ် ဆိကမိၣ်ဝဲ ပှၤသံလၢ တကြၢးခူၣ်လီၤ, တကြၢးမူထီၣ်က့ၤအစိၣ်တဖၣ်န့ၣ် ဘၣ်တၢ်တ့ၢ်လီၤအီၤဖဲန့ၣ်လီၤ. လၢတၢ်န့ၣ်အဃိ ဂဟဲနၢ် န့ၣ်မ့ၢ်တၢ်ပနီၣ် အကြၢးအဘၣ်လၢ တၢ်ဟးဂီၤ လီၤထူလီၤယိာ်န့ၣ်လီၤ. ယ့ၣ်ၡူးကဒိးန့ၢ်ဘၣ် မူဒါလၢကစံၣ်ညီၣ် ပှၤမူဒီးပှၤသံတ့ၢ်တဖၣ် သနာ်က့ ပှၤကစံၣ်ညီၣ်တၢ် လၢခံကတၢၢ်န့ၣ် မ့ၢ်ဒၣ် ယဟိဝၤ န့ၣ်လီၤ. (မၤတၢ် ၁၀:၄၂) ပှၤလၢကစၢ် ပာ်ဝဲလၢ ပှၤအၢပှၤသီ, ဒီးပှၤလၢအသးတအိၣ်လၢ ကလဲလိာ်အသးတဖၣ်န့ၣ် တမ့ၢ်ကဒုးဂဲၤဆၢထၢၣ်သမူထီၣ်က့ၤဝဲ လ့ၤတက့ၤဘၣ်.

တၢ်သမူထီၣ်က့ၤလၢ ဘၣ်ဃးဒီးမူခိၣ်

၂၁, ၂၂. (က) တၢ်ဂဲၤဆၢထၢၣ် သမူထီၣ်က့ၤမနုၤ အိၣ်ဒံးတမံၤလဲၣ်. (ခ) ပှၤဂဲၤဆၢထၢၣ် သမူထီၣ်က့ၤဆူ နီၢ်သးအတၢ်အိၣ်မူ အဆိကတၢၢ်န့ၣ် မ့ၢ်မတၤလဲၣ်.

^၂၁ လံာ်စီဆှံပာ်ဖျါဝဲ တၢ်သမူထီၣ်က့ၤ လၢခံတမံၤန့ၣ်မ့ၢ် တၢ်သမူထီၣ်က့ၤလၢ ​မူခိၣ်အတၢ်အိၣ်မူ ဒ်နီၣ်သးအသိးအဂ့ၢ်န့ၣ်လီၤ. ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤ ဒ်အံၤန့ၣ် လံာ်စီဆှံကွဲးနီၣ်ဝဲ တၢ်အဒိအတဲာ် ထဲတမံၤဧိၤလၢအမ့ၢ် ယ့ၣ်ၡူးအတၢ်သမူထီၣ်က့ၤလီၤ.

^၂၂ ဒ်ပှၤဟီၣ်ခိၣ်ဖိ တဂၤအသိး ယ့ၣ်ၡူးသံဝံၤအလီၢ်ခံ ယဟိဝၤတဟ့ၣ်အခွဲးလၢ အဖိခွါလၢအတီဒီးအီၤအံၤန့ၣ် ကအိၣ်ယံာ်ယံာ်လၢ တၢ်သွၣ်ခိၣ်ဘၣ်. (စံးထီၣ်ပတြၢၤ ၁၆:၁၀; မၤတၢ် ၁၃:၃၄, ၃၅) ကစၢ်ယွၤမၤမူထီၣ်က့ၤ ယ့ၣ်ၡူးလီၤ, ဘၣ်ဆၣ် တမ့ၢ်ဒ်ပှၤကညီတဂၤအသိးဘၣ်. တၢ်မၢဖိ ပ့းတရူး ကတိၤဖျါထီၣ်ဝဲလၢ ခရံာ်န့ၣ် “ဒိးသံအသးလၢ တၢ်ဖံးတၢ်ညၣ်အပူၤဘၣ်ဆၣ်ဒီး, ဒိးတၢ်မၤမူထီၣ်က့ၤအီၤလၢသးန့ၣ်လီၤ.” (၁ ပ့းတရူး ၃:၁၈) နီၢ်နီၢ်န့ၣ် တၢ်အံၤမ့ၢ် တၢ်လီၤလးဖးဒိၣ် တမံၤလီၤ. ယ့ၣ်ၡူးက့ၤမူထီၣ်ဒ် ပှၤနီၢ်သးလၢ အစိကမီၤဒိၣ်တဂၤအသိးလီၤ. (၁ ကရံၣ်သူး ၁၅:၃-၆) တၢ်ဂဲၤဆၢထၢၣ် သမူထီၣ်က့ၤဒ်အံၤလၢ အပှဲၤဒီးတၢ်လၤကပီၤန့ၣ် ယ့ၣ်ၡူးဒိးန့ၢ်ဝဲ အဆိကတၢၢ်န့ၣ်လီၤ. (ယိၤဟၣ် ၃:၁၃) ဘၣ်ဆၣ်ကစၢ်တမ့ၢ် ပှၤလၢခံကတၢၢ်ဘၣ်.

၂၃, ၂၄. ယ့ၣ်ၡူးအ “သိလၢအစှၤတဖု” န့ၣ်ဘၣ်တၢ်ပာ်ဖှိၣ်အီၤလၢ မတၤတဖၣ်လဲၣ်, အနီၢ်ဂံၢ် ​ကအိၣ်ဝဲ ဆံးအါလဲၣ်.

^၂၃ ယ့ၣ်ၡူးသ့ၣ်ညါလၢ တယံာ်ဘၣ်ဒီး ကဘၣ်က့ၤထီၣ်ဆူ မူခိၣ်အဃိ စံးတ့ၢ်ဝဲ အပျဲၢ်အဘီၣ်လၢ အတီဒီးအီၤတဖၣ်လၢ “ကလဲၤကတဲာ်ကတီၤတၢ်လီၢ်” လၢအဝဲသ့ၣ်အဂီၢ်န့ၣ်လီၤ. (ယိၤဟၣ် ၁၄:၂, ခစ) ယ့ၣ်ၡူးကိးယၢၤထီၣ်ဝဲ ပှၤကလဲၤဆူ မူခိၣ်တဖၣ်လၢ “သိလၢအစှၤတဖု” န့ၣ်လီၤ. (လူၤကၣ် ၁၂:၃၂) ခရံာ်ဖိ အတီအလိၤလၢ အစှၤတဖုအံၤ အနီၢ်ဂံၢ်အိၣ်ဝဲ ဆံးအါလဲၣ်. ဖဲ လီၣ်ဖျါ ၁၄:၁ န့ၣ်တၢ်မၢဖိယိၤဟၣ် စံးဝဲဒ်အံၤလီၤ– “ဒီးယထံၣ်တၢ်, ဒီးကွၢ်ကွၢ်, သိဖိဆၢထၢၣ်လၢ ကစၢၢ်စံယိၣ်အလိၤ, ဒီးပှၤလၢအအိၣ်ဒီးအဝဲဒၣ်အမံၤဒီး အပၢ်အမံၤကွဲးအသးလၢ အမဲာ်တူၢ်ခိၣ်န့ၣ်, တကလီၤလွံၢ်ကလးလွံၢ်ကထိ အိၣ်ဒီးအီၤလီၤ.”

^၂၄ ပှၤခရံာ်ဖိ ၁၄၄,၀၀၀ ဃုာ်ဒီး ယ့ၣ်ၡူးအတၢ်မၢဖိ လၢအတီတဖၣ်န့ၣ် ကဂဲၤဆၢထၢၣ်သမူထီၣ်က့ၤဆူ မူခိၣ်န့ၣ်လီၤ. ကသမူထီၣ်က့ၤလၢ မနုၤအဆၢကတီၢ်လဲၣ်. တၢ်မၢဖိပီလူး ကွဲးဝဲလၢ ကမ့ၢ်ဖဲ ခရံာ်ဟဲလီၤက့ၤအကတီၢ်န့ၣ်လီၤ. (၁ ကရံၣ်သူး ၁၅:၂၃) ပအိၣ်မူဘၣ်လၢ တၢ်ဆၢကတီၢ်ဝဲန့ၣ် အပူၤန့ၣ် ပကမၤလိသ့ၣ်ညါဘၣ်ဖဲ တၢ်နီၤဖး ၉ အပူၤလီၤ. လၢတၢ်န့ၣ်အဃိ ဖဲပဆၢကတီၢ်ခဲအံၤန့ၣ် ပှၤအိၣ်လီၤတဲာ်တ့ၢ်လၢ ​၁၄၄,၀၀၀ အကျါ စှၤဂၤန့ၣ် မ့ၢ်သံဒီး ကသမူထီၣ်က့ၤဆူ မူခိၣ်တဘျီဃီန့ၣ်လီၤ. (၁ ကရံၣ်သူး ၁၅:၅၁-၅၅) ဘၣ်ဆၣ်, ခါဆူညါန့ၣ် ပှၤအါဂၤကဂဲၤဆၢထၢၣ် သမူထီၣ်က့ၤဒ်သိး ကအိၣ်မူဘၣ်ဖဲ ဟီၣ်ခိၣ်ပၤရၤဒံစူးအပူၤလီၤ.

၂၅. တၢ်နီၤဖးလၢခံန့ၣ် ပကဆိကမိၣ်သကိး တၢ်ဂ့ၢ်မနုၤလဲၣ်.

^၂၅ မ့ၢ်လီၤ, ယဟိဝၤ ကမၤနၢၤကွံာ် ဒုၣ်ဒါတၢ်သံ သပှၢ်တၢၢ်ဒီး ကမၤဟးမၣ်ကွံာ်ဝဲ လီၤထူလီၤယိာ်လီၤ! (ယၡါယၤ ၂၅:၈) ဘၣ်ဆၣ်, နကဆိကမိၣ်ဘၣ်လၢ ‘ပှၤဂဲၤဆၢထၢၣ်သမူထီၣ်က့ၤ ဆူမူခိၣ်တဖၣ်န့ၣ် ကမၤဝဲတၢ်မနုၤဖဲန့ၣ်လဲၣ်’ လီၤ. လၢမူခိၣ် အဝဲသ့ၣ်ကမ့ၢ် ဘီမုၢ်အတၢ်ပၢတၢ်ပြး လၢအဂ့ၤကတၢၢ် အကရၢဖိတဖၣ်န့ၣ်လီၤ. တၢ်နီၤဖးလၢခံန့ၣ် ပကမၤလိကဒီး တၢ်ပၢတၢ်ပြးအံၤအဂ့ၢ်လီၤ.