နီၢ်ရၤဃး နာ်ဝဲယဟိဝၤယွၤ

ပကဆိကမိၣ်ကွၢ်သကိးလၢ ပအိၣ်လၢဝ့ၢ်ယရံၤဃိအပူၤမီၣ်. ဝ့ၢ်အံၤန့ၣ်အိၣ်လၢ ကီၢ်ကနၤဧၣ်အပူၤလီၤ. ပှၤအိၣ်ဖဲန့ၣ်တဖၣ်န့ၣ် တနာ်ယဟိဝၤယွၤဘၣ်. ပိာ်မုၣ်တဂၤလၢအမံၤမ့ၢ် နီၢ်ရၤဃးန့ၣ် အိၣ်ဝဲဖဲန့ၣ်စ့ၢ်ကီးလီၤ.

ဖဲနီၢ်ရၤဃးမ့ၢ် ပိာ်မုၣ်သးစၢ်ဖိအခါ, အဝဲနၢ်ဟူဘၣ်ဝဲ စီၤမိၤၡ့မၤသ့ၣ်ဖးပီၣ်လဲၣ်ဂီၤ ဒီးဒုးဟးထီၣ်ကွံာ်ဝဲ ပှၤအံၣ်စရ့လးဖိလၢ ကီၢ်အဲၤကူပတူးအဂ့ၢ်လီၤ. အဝဲကနၢ်ဟူဘၣ်စ့ၢ်ကီးဝဲလၢ ယဟိဝၤယွၤမၤစၢၤ အဝဲသ့ၣ်လၢကမၤနၢၤ အဒုၣ်အဒါတဖၣ်အဂ့ၢ်လီၤ. ခဲအံၤအဝဲနၢ်ဟူဘၣ်ဝဲလၢ ပှၤအံၣ်စရ့လးဖိတဖၣ် ဟဲအိၣ်ဘူးဒီးဝ့ၢ်ယရံၤဃိလံ.

ဘၣ်တဟါန့ၣ်, ပှၤအံၣ်စရ့လးဖိခံဂၤ လဲၤနုာ်ကွၢ်ခူသူၣ်ဝဲ ဝ့ၢ်ယရံၤဃိလီၤ. အဝဲသ့ၣ်တဖၣ်န့ၣ် ပှၤကိးအီၤလၢပှၤကွၢ်ဟုၣ်တၢ်လီၤ. အဝဲသ့ၣ်လဲၤဝဲဆူ နီၢ်ရၤဃးအဟံၣ် ဒီးအဝဲကိးနုာ်ပှၤခံဂၤအံၤဆူ အဟံၣ်ပူၤလီၤ. ဖဲနၤအဝဲန့ၣ်, ယရံၤဃိအစီၤပၤသ့ၣ်ညါဘၣ်ဝဲလၢ ပှၤကွၢ်ဟုၣ်တၢ်တဖၣ်အိၣ်လၢအဝ့ၢ်ပူၤ ဒီးလဲၤအိၣ်ဝဲလၢနီၢ်ရၤဃးအဟံၣ်လီၤ. လၢတၢ်န့ၣ်အဃိ စီၤပၤမၢလီၤပှၤလၢ ကလဲၤဖီၣ်အဝဲသ့ၣ်န့ၣ်လီၤ. နီၢ်ရၤဃးပာ်ခူသူၣ်ဝဲ ပှၤကွၢ်ဟုၣ်တၢ်ခံဂၤ လၢအဟံၣ်ခိၣ် ဒီးတဲဘၣ်ဝဲစီၤပၤအပျဲၢ်တဖၣ်လၢ ‘ပှၤကွၢ်ဟုၣ်တၢ်တဖၣ်န့ၣ် ဟဲဖဲအံၤလီၤ, ဘၣ်ဆၣ်အဝဲသ့ၣ် ဟးထီၣ်ကွံာ်လၢဝ့ၢ်ပူၤလံ. ဒီးသုမ့ၢ်လူၤထွဲအခံခဲအံၤဒီး သုဖီၣ်အီၤကန့ၢ်လီၤ.’ ဘၣ်မနုၤအဃိ နီၢ်ရၤဃး ပာ်ခူသူၣ် ပှၤကွၢ်ဟုၣ်တၢ်လဲၣ်, နဆိကမိၣ်ဒ်လဲၣ်.— မ့ၢ်လၢအဝဲနာ်ဝဲယဟိဝၤယွၤ ဒီးသ့ၣ်ညါဝဲလၢကစၢ်ကဟ့ၣ်လီၤ ကီၢ်ကနၤဧၣ်အံၤလၢ ပှၤအံၣ်စရ့လးဖိလီၤ.

တချုးပှၤကွၢ်ဟုၣ်တၢ်တဖၣ် ဟးထီၣ်လၢနီၢ်ရၤဃးအဟံၣ်န့ၣ်, အဝဲသ့ၣ်တဲပာ်အီၤလၢ ဖဲတၢ်မၤဟးဂီၤ ဝ့ၢ်ယရံၤဃိအခါ အဝဲဒီးအဟံၣ်ဖိဃီဖိတဖၣ်ကပူၤဖျဲးလီၤ. နဆိကမိၣ်လၢအဝဲသ့ၣ်ကမၢ နီၢ်ရၤဃးမၤတၢ်မနုၤလဲၣ်.— အဝဲသ့ၣ်စံးဝဲ ‘ဟံးန့ၢ်ပျံၤဂီၤဂီၤတဘိအံၤ, ဒီးစၢလီၤစဲၤအီၤလၢနပဲတြီဖိတက့ၢ်. နမ့ၢ်မၤဒ်န့ၣ်ဒီး, ပှၤအိၣ်လၢနဟံၣ်ပူၤကိးဂၤဒဲး ကပူၤဖျဲးလီၤ.’ နီၢ်ရၤဃးမၤဝဲဒ်ပှၤကွၢ်ဟုၣ်တၢ်တဖၣ် တဲအီၤအသိးလီၤ. လၢခံတၢ်ကဟဲကဲထီၣ် အသးဒ်လဲၣ်.—

ပူၤကွံာ်စှၤသီဝံၤအလီၢ်ခံ, ပှၤအံၣ်စရ့လးဖိတဖၣ် လဲၤတရံးဝ့ၢ်ဘှ့ၣ်ဘှ့ၣ်ဘှီၣ်ဘှီၣ်လီၤ. အဝဲသ့ၣ်လဲၤတရံးဝ့ၢ် တနံၤတဘျီလၢဃုသီအတီၢ်ပူၤလီၤ. ဘၣ်ဆၣ်နွံသီတသီန့ၣ် အဝဲသ့ၣ်လဲၤတရံးဝဲဝ့ၢ်နွံဘျီလီၤ. ဝံၤဒီးအဝဲသ့ၣ်ခဲလၢာ် ကိးပသူထီၣ်ဖးဒိၣ်လီၤ. ထဲန့ၣ်ဒီး, ယဟိဝၤယွၤမၤလီၤပှီၢ်ဝ့ၢ်ခိၣ်ဒူ ပြူၤကလာ်လီၤ. ဘၣ်ဆၣ်ဟံၣ်လၢအိၣ်ဒီး ပျံၤဂီၤဂီၤတဘိလၢစဲၤလီၤအသးလၢ ပဲတြီဖိန့ၣ်တလီၤပှီၢ်ဘၣ်. လၢတၢ်ဂီၤပူၤန့ၣ် နထံၣ်ဧါ.— နီၢ်ရၤဃးဒီး အဟံၣ်ဖိဃီဖိပူၤဖျဲးဝဲလီၤ.

နမၤလိန့ၢ်တၢ်မနုၤလၢ နီၢ်ရၤဃးအအိၣ်လဲၣ်.— မ့ၢ်လၢနီၢ်ရၤဃးနၢ်ဟူဘၣ်ဝဲ တၢ်လၢအဂ့ၤလၢဘၣ်ဃးဒီး ယဟိဝၤယွၤအဃိနာ်ဝဲကစၢ်လီၤ. နၤစ့ၢ်ကီးနမၤလိဘၣ်တၢ်လၢအဂ့ၤ အါမးလၢဘၣ်ဃးယဟိဝၤယွၤလီၤ. ဒ်နီၢ်ရၤဃးအသိး နနာ်ယဟိဝၤယွၤစ့ၢ်ကီးဧါ.— နကနာ်ကစီဒီသၢၣ်.