တၢ်မၤလိ ၅
စီၤနိအၤတ့ထီၣ်ကဘီ
ကယီကယီန့ၣ် ပှၤဟီၣ်ခိၣ်ဖိအါထီၣ်ဝဲလၢ ဟီၣ်ခိၣ်ချၢ ဒီးအဝဲသ့ၣ်အါတက့ၢ်န့ၣ် မၤတၢ်အၢတၢ်သီ. မူခိၣ်ကလူးတနီၤန့ၣ် စးထီၣ်မၤဝဲ တၢ်အၢတၢ်သီစ့ၢ်ကီး. မူခိၣ်ကလူးတဖၣ်အံၤ ပာ်တ့ၢ်ကွံာ် အတၢ်အိၣ်တၢ်ဆိးအလီၢ် လၢမူခိၣ် ဒီးဟဲလီၤဆူဟီၣ်ခိၣ်ချၢ. ဘၣ်မနုၤအဃိ အဝဲသ့ၣ်ဟဲလီၤလၢ ဟီၣ်ခိၣ်ချၢလဲၣ်. အဝဲသ့ၣ်မၤကဲထီၣ်အသးဒ် ပှၤဟီၣ်ခိၣ်ဖိအက့ၢ်အဂီၤအသိး ဒီးဟံးန့ၢ်အမါလၢ ပှၤဟီၣ်ခိၣ်ဖိ.
မူခိၣ်ကလူးတဖၣ်အမါန့ၣ် အိၣ်ဖျဲၣ်ထီၣ်ဝဲအဖိတဖၣ်. ဖဲအဝဲသ့ၣ် အဖိခွါတဖၣ်ဒိၣ်ထီၣ်အခါ အဂံၢ်ဆူၣ်ဘါဆူၣ် ဒီးမၤနၢၤအီၣ်ပှၤဂၤ. ဒီးအဝဲသ့ၣ်မၤဘၣ်ဒိဘၣ်ထံး ပှၤဂၤစ့ၢ်ကီး. ယဟိဝၤယွၤ ဟ့ၣ်အခွဲးလၢ တၢ်အၢတၢ်သီတဖၣ် ကအိၣ်လၢ ဟီၣ်ခိၣ်ချၢ တသ့လၢၤဘၣ်. အဃိ ကစၢ်ယွၤ ဆၢတဲာ်လီၤအသးလၢ ကမၤဟးဂီၤကွံာ် ပှၤအၢပှၤသီတဖၣ်လၢထံ.
ဘၣ်ဆၣ် လၢပှၤအၢပှၤသီအကျါန့ၣ် ပှၤဂ့ၤအိၣ်ဝဲတဂၤ. အမံၤမ့ၢ်စီၤနိအၤ ဒီးအဝဲမ့ၢ်ပှၤတဂၤလၢ အဲၣ်ယဟိဝၤယွၤ. အဝဲအိၣ်ဒီးအမါ ဒီးအဖိခွါသၢဂၤ. အဖိခွါသၢဂၤအံၤ အမံၤမ့ၢ်ဝဲ စီၤၡ့ၣ်, စီၤဃၣ် ဒီးစီၤယ့ဖ့းသး. ဒီးအဖိခွါ ကိးဂၤဒဲးန့ၣ် အိၣ်ဒီးအမါ. ယဟိဝၤယွၤမၢ စီၤနိအၤတ့ထီၣ် ကဘီဖးဒိၣ်တဘ့ၣ်လၢ အလီၤဂာ်ဒီး တလါဖးဒိၣ်တဖျၢၣ်. ဖဲထံလုၢ်ဘၢတၢ်အခါ ကဘီဖးဒိၣ်အံၤ ကထီၣ်ဖီလၢထံဖီခိၣ် ဒ်သိး စီၤနိအၤဒီး အဟံၣ်ဖိဃီဖိ ကပူၤဖျဲးဝဲအဂီၢ်လီၤ. ဒီးယဟိဝၤယွၤ တဲဘၣ်စ့ၢ်ကီး စီၤနိအၤလၢ ကကိးနုာ်လီၤဝဲ ဆၣ်ဖိကီၢ်ဖိတဖၣ်လၢ ကဘီအပူၤ ဒ်သိး ကပူၤဖျဲးဝဲအဂီၢ်.
တဘျီဃီန့ၣ် စီၤနိအၤစးထီၣ်တ့ထီၣ်ဝဲ ကဘီဖးဒိၣ်တဘ့ၣ်. စီၤနိအၤ ဒီးအဟံၣ်ဖိဃီဖိန့ၣ် တ့ထီၣ်ကဘီ ယံာ်ဝဲအနံၣ် ၅၀ ဃၣ်ဃၣ်. အဝဲသ့ၣ် တ့ထီၣ်ကဘီဒ် ယဟိဝၤယွၤ တဲဘၣ်အဝဲသ့ၣ်အသိး. ဒီးဖဲန့ၣ်အဆၢကတီၢ် စီၤနိအၤ ဟ့ၣ်ပလီၢ်စ့ၢ်ကီးပှၤဂၤလၢ ထံကလုၢ်ဘၢဟီၣ်ခိၣ်. ဘၣ်ဆၣ် ပှၤတဒိကနၣ် အတၢ်ကစီၣ်နီတဂၤဘၣ်.
ခဲအံၤ တၢ်ဆၢကတီၢ်ဘၣ်လၢ စီၤနိအၤဒီးအဟံၣ်ဖိဃီဖိ ကနုာ်လီၤလၢ ကဘီအပူၤ. တၢ်ကမၤအသးဒ်လဲၣ်န့ၣ် ပကမၤလိအါထီၣ်လၢ တၢ်မၤလိလၢခံတခါအပူၤ.
“ဒ်တၢ်မၤအသးလၢ စီၤနိအၤ အမုၢ်နံၤတဖၣ်အသိးန့ၣ် ဖဲပှၤကညီဖိခွါအံၤ ဟဲက့ၤအိၣ်ဒီးသု အဆၢကတီၢ် တၢ်ကမၤအသးဒ်န့ၣ် အသိးစ့ၢ်ကီးလီၤ.”—မးသဲ ၂၄:၃၇