တၢ်မၤလိ ၁၀၂
စီၤယိၤဟၣ် အတၢ်ထံၣ်လၢညါခီ
ဖဲတၢ်မၢဖိယိၤဟၣ် အိၣ်လၢဃိာ်ပူၤ လၢကီးပးမူးအခါ ယ့ၣ်ၡူးပာ်ဖျါထီၣ်န့ၢ်အီၤ တၢ်ထံၣ်လၢညါခီ ၁၆ ခါ. ဒီးတၢ်ထံၣ်လၢညါခီတဖၣ်အံၤ ပာ်ဖျါထီၣ်ဝဲ ယဟိဝၤယွၤအမံၤ ကဘၣ်တၢ်ပာ်စီဆှံအီၤ, ကစၢ်ယွၤအဘီမုၢ်ကဟဲ ဒီးကစၢ်ယွၤ အတၢ်တိာ်ပာ် ကဟဲလၢပှဲၤထီၣ်လၢ ဟီၣ်ခိၣ်ချၢ ဒ်လၢမူခိၣ်အသိး.
လၢတၢ်ထံၣ်လၢညါခီ အကျါတခါန့ၣ် စီၤယိၤဟၣ်ထံၣ်ဝဲ ယဟိဝၤယွၤအိၣ်လၢ လီၢ်ပစိာ်အဖီခိၣ် လၢမူခိၣ် ပှဲၤဒီးအလၤကပီၤ. ပှၤသူၣ်က့သးပှၢ် ၂၄ ဂၤ လၢအကၤဆ့ဝါ ဒီးကုာ်ထီၣ်ဝဲ ခိၣ်သလုးထူန့ၣ် အိၣ်ဝးတရံး ကစၢ်ယွၤ အလီၢ်ပစိာ်. လီဝၢ်ဒံး ဒီးလီသီၣ် ဟဲထီၣ်ဝဲလၢ အလီၢ်ပစိာ်. ပှၤသူၣ်က့သးပှၢ် ၂၄ ဂၤအံၤ တီၤလီၤကဒွံကျိာ် ဒီးဘူၣ်ထီၣ်ဘါထီၣ်ဝဲ ယဟိဝၤယွၤ. ဒီးတၢ်ထံၣ်လၢညါခီ လၢအဂၤတခါန့ၣ် စီၤယိၤဟၣ်ထံၣ်ဝဲ ပှၤဂီၢ်မုၢ်ဖးဒိၣ် လၢအဘူၣ်ထီၣ်ဘါထီၣ် ယဟိဝၤယွၤ. ဒီးအဝဲသ့ၣ် ဟဲလၢ ပှၤကိးကလုာ်ဒဲး, ကလုာ်ဒူၣ်ကိးဒူၣ်ဒဲး, ပှၤကိးဒူၣ်ဒဲး ဒီးပှၤတဲတၢ်အကျိာ် ကိးကျိာ်ဒဲးအကျါ. တကးဒံးဘၣ် သိဖိလၢအမ့ၢ် ယ့ၣ်ၡူးန့ၣ် အံးထွဲကွၢ်ထွဲ အဝဲသ့ၣ် ဒီးဆှၢအဝဲသ့ၣ်ဆူ ထံမူအထံထီၣ်ပၢၢ်တဖၣ်. လၢတၢ်ထံၣ်လၢညါခီ အဂၤတခါဒီးန့ၣ် ယ့ၣ်ၡူး စးထီၣ်ပၢတၢ်ဒ်စီၤပၤ လၢမူခိၣ် ဃုာ်ဒီး ပှၤသူၣ်က့သးပှၢ် ၂၄ ဂၤ. ဒီးလၢအဂၤတခါဒီးန့ၣ် စီၤယိၤဟၣ်ထံၣ်ဝဲ ယ့ၣ်ၡူးဒုးတၢ်ဒီး ပယိၤဖးဒိၣ် လၢအမ့ၢ် မုၣ်ကီၤလံၢ် ဒီးအတၢ်ဝံတၢ်နါတဖၣ် ဒီးယ့ၣ်ၡူး တ့ၢ်လီၤကွံာ် အဝဲသ့ၣ်ခဲလၢာ်လၢ ဟီၣ်ခိၣ်ချၢ.
လၢခံ စီၤယိၤဟၣ် ထံၣ်ဘၣ်ဝဲ သိဖိဒီးပှၤ ၁၄၄,၀၀၀ အိၣ်ဆၢထၢၣ်လၢ ကစၢၢ်စံယိၣ်အလိၤ. စီၤယိၤဟၣ် ထံၣ်စ့ၢ်ကီးဝဲ မူခိၣ်ကလူးတဂၤလၢ အတဲဘၣ် ပှၤဟီၣ်ခိၣ်ဖိတဖၣ်လၢ ပျံၤယွၤ ဒီးမၤလၤကပီၤအီၤတက့ၢ်.
လၢတၢ်ထံၣ်လၢညါခီ အဂၤတခါန့ၣ် စီၤယိၤဟၣ် ထံၣ်ဘၣ်ဝဲလၢ တၢ်ဒုးအၢ်မက့းဒိၣ် ကဲထီၣ်ဝဲ. လၢတၢ်ဒုးအံၤန့ၣ် ယ့ၣ်ၡူးဒီးအသုးဖိတဖၣ် မၤကတၢၢ်ကွံာ်ဝဲ မုၣ်ကီၤလံၢ် အတၢ်ရဲၣ်တၢ်ကျဲၤ လၢအအၢအသီ. တၢ်ထံၣ်လၢညါခီ လၢအလီၢ်ခံကတၢၢ်တခါန့ၣ် စီၤယိၤဟၣ် ထံၣ်ဘၣ်ဝဲ တၢ်လၢတၢ်ပှဲၤ လၢမူခိၣ် ဒီးလၢဟီၣ်ခိၣ်ချၢ. မုၣ်ကီၤလံၢ် ဒီးအချံအသၣ်န့ၣ် ဘၣ်တၢ်မၤဟးဂီၤကွံာ်အီၤ ခဲလၢာ်ခဲဆ့. ကယဲၢ်ပှၤအိၣ်လၢမူခိၣ် ဒီးလၢဟီၣ်ခိၣ်ချၢန့ၣ် ပာ်စီဆှံ ယဟိဝၤယွၤအမံၤ ဒီးဘူၣ်ထီၣ်ဘါထီၣ်ထဲအီၤ.
“ယကဒုးအိၣ်ထီၣ် တၢ်ထီဒုၣ်ထီဒါ လၢနၤ ဒီးပိာ်မုၣ် အဘၢၣ်စၢၤ ဒီးနချံနသၣ် ဒီးပိာ်မုၣ်အချံအသၣ် အဘၢၣ်စၢၤလီၤ. အဝဲ ကမၤသဘှံးနခိၣ် ဒီးနကမၤဘၣ်ဒိ အခီၣ်နၢၣ်ခံ.”—၁ မိၤၡ့ ၃:၁၅