တၢ်မၤလိ ၁၀၁
စီၤပီလူးဘၣ်တၢ်ဆှၢအီၤ လၢဝ့ၢ်ရိမ့ၤ
စီၤပီလူး မၤကတၢၢ်ကွံာ် အတၢ်စံၣ်တဲၤတဲလီၤတၢ် သၢဘျီတဘျီ ဖဲဝ့ၢ်ယရူၤၡလ့ၣ်အပူၤ. ဖဲန့ၣ်န့ၣ် ပှၤဖီၣ်စီၤပီလူး ဒီးပှၤပၢနုာ်အီၤလၢ ဃိာ်ပူၤ. လၢတၢ်ထံၣ်လၢညါခီ ဖဲမုၢ်နၤအဆၢကတီၢ်န့ၣ် ယ့ၣ်ၡူး တဲဘၣ်အီၤလၢ ‘နကဘၣ်လဲၤလၢ ဝ့ၢ်ရိမ့ၤ ဒီးစံၣ်တဲၤတဲလီၤတၢ်ဖဲန့ၣ်.’ ပှၤဆှၢလီၤ စီၤပီလူး လၢကဲၤစါရံၤ ဒီးစီၤပီလူး ဘၣ်အိၣ်ဝဲလၢ ဃိာ်ပူၤခံနံၣ်. ဖဲစီၤပီလူး လဲၤထီၣ်ရူလၢ ပဒိၣ်စီၤဖ့စတူး အမဲာ်ညါအခါ အဝဲတဲဝဲလၢ ‘ယအဲၣ်ဒိးလဲၤလၢ ဝ့ၢ်ရိမ့ၤ ဒ်သိးကဲစၢ် ကစံၣ်ညီၣ်န့ၢ်တၢ်လၢယဂီၢ်.’ ပဒိၣ်စီၤဖ့စတူး တဲဝဲလၢ “နအဲၣ်ဒိး တီၣ်ထီၣ်တၢ်ဂ့ၢ်လၢ ကဲစၢ်အအိၣ် အဃိ နကဘၣ်လဲၤလၢ ကဲစၢ်အအိၣ်.” ဒီးပှၤလဲၤဆှၢစီၤပီလူး လၢကဘီ လၢဝ့ၢ်ရိမ့ၤအပူၤ. ခရံာ်ဖိခံဂၤလၢအမ့ၢ် စီၤလူၤကၣ် ဒီးစီၤအရံစတၢ်ဃူးန့ၣ် လဲၤပိာ်ဝဲ စီၤပီလူးအခံ.
ဖဲကဘီလဲၤတၢ်လၢ ပီၣ်လဲၣ်ပူၤအဆၢကတီၢ်န့ၣ် ကလံၤမုၢ်ဖးဒိၣ်လီၤဝဲ တဘျုးသီညါ. အဃိ ပှၤကိးဂၤဒဲး ဆိကမိၣ်ဝဲလၢ အဝဲသ့ၣ်ကသံ. ဘၣ်ဆၣ် စီၤပီလူး တဲဘၣ်အဝဲသ့ၣ်လၢ ‘မူခိၣ်ကလူးတဂၤ တဲဘၣ်ယၤလၢ တၢ်မံမီၢ်အပူၤလၢ “စီၤပီလူးဧၢ, တဘၣ်ပျံၤတၢ်တဂ့ၤ. ပှၤအိၣ်လၢကဘီပူၤန့ၣ် ကပူၤဖျဲးကိးဂၤဒဲး ဒီးနလဲၤကတုၤလၢ ဝ့ၢ်ရိမ့ၤအပူၤသပှၢ်တၢၢ်.” အဃိ အိၣ်ဒီးတၢ်သးဒူသၢၤ, ပတသံနီတဂၤဘၣ်.’
ကလံၤမုၢ်အူတၢ် ၁၄ သီဝံၤအလီၢ်ခံ ကဘီလဲၤတုၤဝဲလၢ တၢ်လီၢ်တတီၤ. တၢ်လီၢ်အဝဲန့ၣ် မ့ၢ်ဝဲကီးမ့းလံတ့ၤ. ဖဲကဘီလဲၤဘူးထီၣ်ဒီး ကီးအခါ ကဘီဟးဂီၤဝဲ. ဘၣ်ဆၣ် ပှၤအဂၤ ၂၇၆ ဂၤလၢကဘီပူၤန့ၣ် ပူၤဖျဲးဝဲ. ပှၤတနီၤန့ၣ် ပီၢ်ဃီၤထံဆူထံကၢၢ်နံၤ ဒီးအဂၤတနီၤန့ၣ် ဖီၣ်တံၢ်ဃာ်ဝဲကဘီ အက့အဃိ ထီၣ်ဖီဝဲလၢထံဖီခိၣ် ဒီးကယီကယီန့ၣ် အဝဲသ့ၣ်စ့ၢ်ကီး တုၤဃီၤလၢ ထံကၢၢ်နံၤအကပၤ. ပှၤအိၣ်လၢ ကီးမ့းလံတ့ၤအပူၤန့ၣ် ကွၢ်ထွဲအဝဲသ့ၣ် ဒီးမၤကဲၤထီၣ်န့ၢ် အဝဲသ့ၣ် မ့ၣ်အူ ဒ်သိးကမၤကလၢၤထီၣ် အဝဲသ့ၣ်အဂီၢ်.
သၢလါဝံၤအလီၢ်ခံ သုးဖိတဖၣ် လဲၤကိးဝဲ စီၤပီလူးလၢ ဝ့ၢ်ရိမ့ၤ လၢကဘီအဂၤတဘ့ၣ်. ဖဲစီၤပီလူး လဲၤတုၤလၢ ဝ့ၢ်ရိမ့ၤအခါ ဒီပုၢ်ဝဲၢ်တဖၣ် ဟဲထံၣ်လိာ်သးဒီးအီၤ. ခီဖျိလၢ စီၤပီလူး ထံၣ်ဘၣ်အဝဲသ့ၣ်အဃိ အဝဲစံးဘျုးစံးဖှိၣ်က့ၤ ယဟိဝၤယွၤ ဒီးအသးဆူၣ်ထီၣ်ဝဲ. စီၤပီလူး မ့ၢ်ပှၤဃိာ်ဖိသနာ်က့ ပှၤဒုးအိၣ်အီၤလၢ ဟံၣ်အဂၤတဖျၢၣ် ဒီးပှၤသုးဖိတဂၤ ဘၣ်အိၣ်ခိးကွၢ်အီၤ. စီၤပီလူး အိၣ်ဖဲန့ၣ် ယံာ်ဝဲခံနံၣ်. ဖဲန့ၣ်န့ၣ် ပှၤဟဲထံၣ်လိာ်သးဒီး စီၤပီလူး ဒီးအဝဲတဲဘၣ်ပှၤဂၤ ဘၣ်ဃးဒီး ယွၤအဘီအမုၢ် ဒီးသိၣ်လိအဝဲသ့ၣ်လၢ ယ့ၣ်ၡူးအဂ့ၢ်. စီၤပီလူး ကွဲးစ့ၢ်ကီး လံာ်ပရၢလၢ တၢ်အိၣ်ဖှိၣ်တဖၣ် လၢအိၣ်လၢ အၤစံကီၢ်ရ့ၣ် ဒီးယူဒၤအပူၤ. ယဟိဝၤယွၤ သူဝဲစီၤပီလူးလၢ ကစံၣ်တဲၤတဲလီၤဝဲ ဘီမုၢ်တၢ်သးခုကစီၣ် လၢထံကီၢ်အါဘ့ၣ်အပူၤ.
“လၢတၢ်ကိးမံၤဒဲးအပူၤန့ၣ် ပပာ်ဖျါထီၣ်လၢ ပမ့ၢ်ကစၢ်ယွၤ အခ့အပှၤတဖၣ်, ခီဖျိ ပတူၢ်တၢ်အါမံၤ ဒ်သိးဒီး တၢ်နးတၢ်ဖှီၣ်, တၢ်ဖှီၣ်တၢ်ယာ်, တၢ်ကီတၢ်ခဲတဖၣ်.”—၂ ကရံၣ်သူး ၆:၄