ပမ့ၢ်သံန့ၣ် တၢ်ကမၤအသးဒီးပှၤဒ်လဲၣ်

ပှၤလၢနအဲၣ်အီၤ လၢအသံသဒၣ်ကွံာ်နၤန့ၣ် အိၣ်တဂၤဂၤဧါ. ဖဲန့ၣ်အခါ နသးကဘၣ်ဒိ ဒီးနကဆိကမိၣ်ဘၣ်လၢ ‘ပမ့ၢ်သံန့ၣ် တၢ်ကမၤအသးဒီးပှၤဒ်လဲၣ်. ပှၤလၢပအဲၣ် လၢအသံသဒၣ်ကွံာ်ပှၤန့ၣ် ပကထံၣ်ဘၣ်က့ၤအဝဲသ့ၣ်အဂီၢ် တၢ်မုၢ်လၢ်အိၣ်ဧါ.’ လၢတၢ်မၤလိတခါအံၤ ဒီးတၢ်မၤလိလၢခံတခါန့ၣ် ပကတဲသကိး လံာ်စီဆှံအတၢ်စံးဆၢ လၢအမၤမုာ်ထီၣ်က့ၤပသး.

၁. ပမ့ၢ်သံန့ၣ် တၢ်ကမၤအသးဒီးပှၤဒ်လဲၣ်.

တၢ်သံန့ၣ် ယ့ၣ်ၡူးထိၣ်သတြီၤဝဲ ဒ်သိးဒီးတၢ်မံ. ဖဲပှၤတဂၤမံဘၣ်အသးအခါ တၢ်ကဲထီၣ်အသးလၢ အခိၣ်အဃၢၤဒ်လဲၣ်န့ၣ် အဝဲတသ့ၣ်ညါဝဲဘၣ်. အဃိ တၢ်သံန့ၣ် အလီၤဂာ်ဒ်သိးဒီး တၢ်မံဒ်လဲၣ်. ဖဲပှၤတဂၤသံဝံၤအလီၢ်ခံ အတတူၢ်ဘၣ် တၢ်နီတမံၤလၢၤဘၣ်. လံာ်စီဆှံတဲဝဲလၢ “ပှၤသံန့ၣ် တသ့ၣ်ညါ တၢ်နီတမံၤဘၣ်.”​—ဖး စံၣ်တဲၤတဲလီၤတၢ် ၉:၅.

၂. ပသ့ၣ်ညါဘၣ် တၢ်မ့ၢ်တၢ်တီဘၣ်ဃးဒီး ပှၤသံအဂ့ၢ်အဃိ ကဲဘျုးလၢပဂီၢ်ဒ်လဲၣ်.

ပှၤအါဂၤန့ၣ် အပျံၤတၢ်သံ တကးဒံးဘၣ် အဝဲသ့ၣ် ပျံၤစ့ၢ်ကီးပှၤသံ. ဘၣ်ဆၣ် တၢ်လၢလံာ်စီဆှံတဲဝဲ ဘၣ်ဃးဒီး ပှၤသံအဂ့ၢ်န့ၣ် မၤမုာ်ထီၣ်နသး ဒီးမၤလီၤမၢ်ကွံာ် နတၢ်ပျံၤတၢ်ဖုးသ့. ယ့ၣ်ၡူး တဲဝဲလၢ “တၢ်မ့ၢ်တၢ်တီ ကမၤထူၣ်ဖျဲးထီၣ်သုလီၤ.” (ယိၤဟၣ် ၈:၃၂) တၢ်ဘူၣ်တၢ်ဘါတနီၤ သိၣ်လိဝဲလၢ ပှၤတဂၤ မ့ၢ်သံသနာ်က့ အကလၤ မ့တမ့ၢ် အသးတသံဘၣ်. ဘၣ်ဆၣ် လံာ်စီဆှံ တသိၣ်လိဝဲ ဒ်န့ၣ်ဘၣ်အဃိ ဖဲပှၤတဂၤသံအခါ အတတူၢ်ဘၣ် တၢ်နီတမံၤလၢၤဘၣ်. တကးဒံးဘၣ် ခီဖျိလၢ ပှၤသံန့ၣ် အတသ့ၣ်ညါ တၢ်နီတမံၤလၢၤဘၣ်အဃိ အဝဲသ့ၣ် မၤဘၣ်ဒိပှၤ တသ့ဘၣ်. အဃိ ပတလိၣ် ဘူၣ်ထီၣ်ဘါထီၣ်ပှၤသံ ဒီးမၤမုာ်အဝဲသ့ၣ်အသးဘၣ်. ဒီးပတလိၣ် ဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်စ့ၢ်ကီးဘၣ်.

ပှၤတနီၤတဲဝဲလၢ အဝဲသ့ၣ် တဲတၢ်ဒီးပှၤသံသ့. ဘၣ်ဆၣ် နီၢ်ကီၢ်န့ၣ် အဝဲသ့ၣ် တဲတၢ်ဒီး ပှၤသံတသ့ဘၣ်. မၢကၢာ်န့ၣ် ပသ့ၣ်ညါဘၣ်လၢ ပှၤသံန့ၣ် “တသ့ၣ်ညါ တၢ်နီတမံၤဘၣ်.” အဃိ ပှၤလၢ အဆိကမိၣ်လီၤအသးလၢ အတဲတၢ်ဒီး ပှၤလၢအအဲၣ်ဝဲ လၢအသံသဒၣ်ကွံာ်အီၤန့ၣ် နီၢ်ကီၢ်န့ၣ် အဝဲသ့ၣ် တဲတၢ်ဒီး တၢ်ဝံတၢ်နါ လၢအပာ်မၤအသး လၢအကဲဝဲ ပှၤလၢအသံတ့ၢ်တဂၤလီၤ. အဃိ ပမ့ၢ်သ့ၣ်ညါ တၢ်မ့ၢ်တၢ်တီ ဘၣ်ဃးဒီးပှၤသံန့ၣ် အကဒီသဒၢပှၤလၢ တၢ်ဝံတၢ်နါတဖၣ်. ဒီးယဟိဝၤယွၤ သ့ၣ်ညါဝဲလၢ ပမ့ၢ်တဲတၢ်ဒီး တၢ်ဝံတၢ်နါန့ၣ် အဝဲသ့ၣ်ကမၤဘၣ်ဒိပှၤ. အဃိ ယဟိဝၤယွၤ ဟ့ၣ်ပလီၢ်ပှၤလၢ ပတဘၣ် ဃုကျဲလၢ ပကတဲသကိးတၢ်ဒီး ပှၤသံဘၣ်.​—ဖး ၅ မိၤၡ့ ၁၈:​၁၀-၁၂.

၃. မၤလိတၢ်မ့ၢ်တၢ်တီ ဘၣ်ဃးဒီး ပှၤသံတဖၣ်အတၢ်အိၣ်သး

လၢဟီၣ်ခိၣ်ဒီဘ့ၣ်ညါန့ၣ် ပှၤအါဂၤအတၢ်နာ် လၢအဘၣ်ဃးဒီး ပှၤသံအတၢ်အိၣ်သးန့ၣ် တဒ်သိးလိာ်အသးဘၣ်. ဒီးအဝဲသ့ၣ် အတၢ်နာ်တဖၣ်န့ၣ် အတဘၣ်ခဲလၢာ်ဘၣ်.

• ဘၣ်ဃးဒီးပှၤသံတဖၣ် အတၢ်အိၣ်သးန့ၣ် လၢနအိၣ်တၢ်လီၢ်န့ၣ် ပှၤအါဂၤနာ်ဝဲဒ်လဲၣ်.

တၢ်ဂီၤမူ– ဖဲပှၤသံအခါ တၢ်ကမၤအသးဒီးအဝဲသ့ၣ်ဒ်လဲၣ်​—တၢ်ဂီၤမူဖုၣ်ကိာ် (၁:၁၉)

ဖး စံၣ်တဲၤတဲလီၤတၢ် ၃:၂၀ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိး ပှၤတဂၤမ့ၢ်သံန့ၣ် တၢ်ကကဲထီၣ်အသးဒီးအီၤ ဒ်လဲၣ်.

• ပှၤတဂၤမ့ၢ်သံန့ၣ် မ့ၢ်အကလၤ ဟးထီၣ်ဒီးဆဲးအိၣ်မူဒံးဝဲ လၢတၢ်လီၢ်တတီၤတီၤဧါ.

လံာ်စီဆှံပာ်ဖျါထီၣ်ဝဲ ဘၣ်ဃးဒီး စီၤလါစရူး လၢအမ့ၢ် ယ့ၣ်ၡူးအသကိးလၢ အရ့ဝဲဘူးဘူးတဂၤ အတၢ်သံအဂ့ၢ်. ဘၣ်ဃးဒီး စီၤလါစရူး အတၢ်အိၣ်သးန့ၣ် ယ့ၣ်ၡူးတဲဝဲဒ်လဲၣ်. ဖး ယိၤဟၣ် ၁၁:​၁၁-၁၄ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ယ့ၣ်ၡူး ထိၣ်သတြီၤဝဲ တၢ်သံဒီး တၢ်မနုၤလဲၣ်.

• ယ့ၣ်ၡူး ထိၣ်သတြီၤဝဲ တၢ်သံဒ်အံၤအဃိ အသိၣ်လိပှၤဘၣ်ဃးဒီး ပှၤသံအတၢ်အိၣ်သးဒ်လဲၣ်.

• တၢ်လၢလံာ်စီဆှံ သိၣ်လိဝဲ ဘၣ်ဃးဒီးပှၤသံအဂ့ၢ်န့ၣ် နဆိကမိၣ်ဒ်လဲၣ်.

၄. ပသ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီး ပှၤသံအဂ့ၢ်အဃိ ကဲဘျုးလၢပဂီၢ်

ပသ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီး ပှၤသံအဂ့ၢ်အဃိ ပတပျံၤပှၤသံလၢၤဘၣ်. ဖး စံၣ်တဲၤတဲလီၤတၢ် ၉:၁၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပှၤသံန့ၣ် အမၤဘၣ်ဒိပှၤသ့ဧါ.

ပမ့ၢ်နာ် လံာ်စီဆှံ အတၢ်မ့ၢ်တၢ်တီန့ၣ် ကမၤထူၣ်ဖျဲးထီၣ်ကွံာ်ပှၤလၢ တၢ်စူၢ်တၢ်နာ်လၢအကမၣ် လၢအမ့ၢ် ပှၤသံန့ၣ် ပကဘၣ်လုၢ်ထီၣ်တၢ်လၢအအိၣ် မ့တမ့ၢ် ပကဘၣ် ဘူၣ်ထီၣ်ဘါထီၣ်အီၤ. ဖး ယၡါယၤ ၈:၁၉ ဒီး လီၣ်ဖျါ ၄:၁၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပှၤလၢ အဘူၣ်ထီၣ်ဘါထီၣ်ပှၤသံ မ့တမ့ၢ် အဃ့တၢ်မၤစၢၤလၢ ပှၤသံအအိၣ်န့ၣ် နဆိကမိၣ် ယဟိဝၤယွၤ ထံၣ်အဝဲသ့ၣ်ဒ်လဲၣ်.

၅. ပသ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီး ပှၤသံအဂ့ၢ်အဃိ ပသးမုာ်ထီၣ်က့ၤ

ပှၤအါဂၤန့ၣ် ပှၤသိၣ်လိအဝဲသ့ၣ်လၢ အဝဲသ့ၣ်မ့ၢ်မၤတၢ်အၢန့ၣ် ဖဲအဝဲသ့ၣ်သံအခါ အဝဲသ့ၣ် ကဘၣ်က့ၤတူၢ်က့ၤတၢ်. ဘၣ်ဆၣ် ပသ့ၣ်ညါဘၣ်လၢ ဖဲပှၤသံဝံၤအလီၢ်ခံ ပှၤတတူၢ်ဘၣ်တၢ် နီတမံၤလၢၤဘၣ်. ဒီးပှၤလၢအမၤတၢ်အၢစ့ၢ်ကီး အမ့ၢ်သံန့ၣ် အတတူၢ်ဘၣ် တၢ်နီတမံၤလၢၤဘၣ်. ပသ့ၣ်ညါ တၢ်ဂ့ၢ်တဖၣ်အံၤအဃိ ပသးမုာ်ထီၣ်က့ၤ. ဖး ရိမ့ၤ ၆:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• လံာ်စီဆှံ တဲဝဲလၢ ဖဲပှၤတဂၤသံအခါ အထူၣ်ဖျဲးထီၣ်ကွံာ်လၢ တၢ်ဒဲးဘးလၢ အမၤတ့ၢ်ဝဲတဖၣ်. အဃိ ပှၤလၢအသံတ့ၢ်တဖၣ်န့ၣ် ဘၣ်တူၢ်ဒံးတၢ် ခီဖျိလၢ တၢ်ဒဲးဘးလၢ အမၤတ့ၢ်ဝဲတဖၣ်န့ၣ် အဃိဧါ.

ပသ့ၣ်ညါ ယဟိဝၤယွၤအဂ့ၢ် မ့ၢ်အါထီၣ်န့ၣ် ပကနၢ်ပၢၢ်ဘၣ်လၢ ကစၢ်ယွၤန့ၣ် အတမၤအၢမၤနး ပှၤသံတဖၣ်ဘၣ်. ဖး ၅ မိၤၡ့ ၃၂:၄ ဒီး ၁ ယိၤဟၣ် ၄:၈ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ကစၢ်ယွၤတဂၤလၢ အအိၣ်ဒီးတၢ်ဂ့ၤတၢ်ဝါ ဒ်လံာ်စီဆှံ အဆၢတဖၣ်အံၤ ပာ်ဖျါထီၣ်ဝဲအသိးန့ၣ် မ့ၢ်အကမၤအၢမၤနး ပှၤလၢအသံတ့ၢ်တဖၣ်ဧါ.

• နသ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီးတၢ်သံအဃိ နသးမုာ်ထီၣ်က့ၤဧါ. ဘၣ်မနုၤအဃိလဲၣ်.

တၢ်ဂ့ၢ်လၢအရ့ဒိၣ်

ဖဲပှၤတဂၤသံအခါ အတၢ်အိၣ်မူ ကတၢၢ်ကွံာ်ဝဲ. ပှၤသံန့ၣ် အတတူၢ်ဘၣ်တၢ်လၢၤဘၣ် ဒီးအမၤဘၣ်ဒိ ပှၤဂၤတသ့ဘၣ်.

တၢ်ကွၢ်ကဒါက့ၤ

• ပမ့ၢ်သံန့ၣ် တၢ်ကမၤအသးဒီးပှၤဒ်လဲၣ်.

• ပသ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီး ပှၤသံအဂ့ၢ်အဃိ ကဲဘျုးလၢပဂီၢ်ဒ်လဲၣ်.

• ပသ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီး တၢ်သံအဂ့ၢ်အဃိ မၤမုာ်ထီၣ်က့ၤပသးဒ်လဲၣ်.

ဃုသ့ၣ်ညါ

တၢ်ကတိၤလၢ အမ့ၢ် “တၢ်သးသမူ” န့ၣ်လံာ်စီဆှံအဲၣ်ဒိးတဲဝဲ အခီပညီဒ်လဲၣ်. ဖးကွၢ်အီၤ.

“တၢ်သးသမူန့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)

ကစၢ်ယွၤ မၤအၢမၤနး ပှၤအၢပှၤသီလၢ လရာ်ပူၤဧါ. ဃုသ့ၣ်ညါကွၢ်.

လရာ်န့ၣ် အကဲဝဲတၢ်လီၢ်နီၢ်ကီၢ်လၢ ပှၤစံၣ်ညီၣ်ပှၤသံဧါ (၃:၀၇)

ပှၤသံန့ၣ် ပဘၣ်ပျံၤအီၤဧါ.

ပှၤသံအကလၤန့ၣ် အမၤစၢၤနၤ မ့တမ့ၢ် အမၤဘၣ်ဒိနၤသ့ဧါ. ပှၤသံန့ၣ် အကလၤ အိၣ်နီၢ်ကီၢ်ဧါ (ဘရိၣ်ခၠၣ်)

ဖးကွၢ် ဘၣ်ဃးဒီး ဖဲပိာ်ခွါတဂၤ သ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီး ပှၤသံအတၢ်အိၣ်သးအခါ အသးမုာ်ထီၣ်က့ၤဒ်လဲၣ်.

“ယနၢ်ပၢၢ်ထီၣ် လံာ်စီဆှံ အတၢ်စံးဆၢဂ့ၤဂ့ၤအဃိ ယကမၢကမၣ်ညါ” (တၢးထီခိးတၢ်, လါဖ့ၤဘြူၤအါရံၤ ၁, ၂၀၁၅)