တၢ်ကတိၤအိးထီၣ်
လံာ်လၢအမ့ၢ်လံာ်စီဆှံအဆၢတဖၣ်လၢ ခရံာ်ဖိအတၢ်အိၣ်မူအဂီၢ် န့ၣ်အကမၤစၢၤနၤဒ်သိး နကဃုထံၣ်န့ၢ် လံာ်စီဆှံအဆၢ ဒီးတၢ်ဂ့ၢ်တၢ်ကျိၤလၢ အကမၤစၢၤနၤ ဖဲနဘၣ်သဂၢၢ်ဒီး တၢ်ကီတၢ်ခဲတဖၣ်အခါ. တကးဒံးဘၣ် အကမၤစၢၤစ့ၢ်ကီးနၤလၢ နကဃုထံၣ်န့ၢ် လံာ်စီဆှံ အတၢ်ဂ့ၢ်တၢ်ကျိၤလၢ နကဟ့ၣ်ဂံၢ်ဟ့ၣ်ဘါပှၤဂၤ ဒီးမၤစၢၤအဝဲသ့ၣ် ဒ်သိး ဖဲအဝဲသ့ၣ် ဆၢတဲာ်တၢ်အခါ ကကဲထီၣ် တၢ်လၤကပီၤလၢ ယဟိဝၤယွၤအဂီၢ်. အဃိ ဃုထၢတၢ်ဂ့ၢ်ခိၣ်တီလၢ နလိၣ်ဘၣ်အီၤ ဒီးတၢ်ဂ့ၢ်ခိၣ်တီတခါစုာ်စုာ် အဖီလာ်န့ၣ် အိၣ်ဝဲဒီး တၢ်သံကွၢ်တဖၣ် ဒီးလံာ်စီဆှံအဆၢ အတၢ်ဂ့ၢ်တၢ်ကျိၤ လၢအကဲဘျုး. (ကွၢ် တၢ်လွံၢ်နၢၣ် လၢအမ့ၢ် “ပဘၣ်သူလံာ်တဘ့ၣ်အံၤဒ်လဲၣ်”) ဒီးလၢလံာ်တဘ့ၣ်အံၤအပူၤန့ၣ် အိၣ်ဝဲဒီး တၢ်သိၣ်က့ၤသီက့ၤ, တၢ်ဟံးစုနဲၣ်ကျဲ ဒီးတၢ်မၤမုာ်ထီၣ်က့ၤ ခီဖျိ ကစၢ်ယွၤအကလုၢ်ကထါ. တကးဒံးဘၣ် နကထံၣ်ဘၣ် လံာ်စီဆှံ အတၢ်ဟံးစုနဲၣ်ကျဲတဖၣ် ဒ်သိး နမၤစၢၤပှၤဂၤ ဒီးဟ့ၣ်ဂံၢ်ဟ့ၣ်ဘါပှၤဂၤ ကသ့အဂီၢ်.
လံာ်တဘ့ၣ်အံၤ တပာ်ဖျါထီၣ်ဝဲ လံာ်စီဆှံအဆၢခဲလၢာ်ဘၣ် သနာ်က့ လံာ်စီဆှံအဆၢလၢ ဘၣ်တၢ်ပာ်ဖျါထီၣ်အီၤန့ၣ် အကကဲဘျုးဝဲလၢနဂီၢ် ဒီးနမ့ၢ်အဲၣ်ဒိးဃုသ့ၣ်ညါအါထီၣ် တၢ်ဂ့ၢ်တခါခါန့ၣ် နဃုကွၢ်အါထီၣ်အီၤလၢ တၢ်ပီးတၢ်လီအဂၤတခါခါ အပူၤသ့. (ကတိၤ ၂:၁-၆) ဒီးသူ လံာ်နဲၣ်ကျဲလၢ ယဟိဝၤပှၤအုၣ်အသးတဖၣ် ကဃုသ့ၣ်ညါတၢ် မ့တမ့ၢ် တၢးထီခိးတၢ် လံာ်ရဲၣ်လီၤလၢ လံာ်လဲၢ်တဖၣ် ဒ်သိး နကဃုသ့ၣ်ညါအါထီၣ် လံာ်စီဆှံအခီပညီ လၢလံာ်တဘ့ၣ်အံၤအပူၤ. တၢ်ပီးတၢ်လီခံခါအံၤ ကမၤစၢၤနၤ ဒ်သိး နကသ့ၣ်ညါထီၣ်ဘၣ် တၢ်နၢ်ပၢၢ်အသီလၢ ပှၤၡဲပၠးဝဲ လံာ်စီဆှံအဆၢတဖၣ် အခီပညီ.
လံာ်လၢအမ့ၢ်လံာ်စီဆှံအဆၢတဖၣ်လၢ ခရံာ်ဖိအတၢ်အိၣ်မူအဂီၢ် တဘ့ၣ်အံၤန့ၣ် ကမၤစၢၤနၤလၢ နကသ့ၣ်ညါထီၣ် တၢ်ကူၣ်သ့ ဒီးတၢ်သ့ၣ်ညါနၢ်ပၢၢ် လၢအအိၣ်လၢ လံာ်စီဆှံအပူၤ. ဒီးဖဲနသူ လံာ်တဘ့ၣ်အံၤအခါန့ၣ် နကတူၢ်ဘၣ်သပှၢ်တၢၢ်လၢ “ကစၢ်ယွၤ အကလုၢ်ကထါန့ၣ်မူဝဲ, အိၣ်ဒီးအစိကမီၤ.”—ဧ့ၤ ၄:၁၂.