ပှၤပၢဆှၢတၢ်ကမံးတံာ် အလံာ်ပရၢ

ဆူဒီပုၢ်ဝဲၢ်တဖၣ်–

ပတၢ်အဲၣ်ကစၢ်ယွၤ ဒီးပှၤအဂၤန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကမၤထွဲဒ် ယ့ၣ်ၡူးတဲဝဲလၢ “လဲၤဒုးကဲထီၣ် ကယဲၢ်ပှၤကလုာ်တဖၣ် လၢယပျဲၢ်ယဘီၣ် . . . ဒီးဒိးဘျၢ အဝဲသ့ၣ်” လၢထံ. (မး ၂၈:၁၉, ၂၀; မၢ်ကူး ၁၂:၂၈-၃၁) တၢ်အဲၣ်လၢတကွၢ်လီၤထဲ နီၢ်ကစၢ်အဂီၢ်ဘၣ်န့ၣ် အသဟီၣ်ဆူၣ်ဒိၣ်မး. အဒိ, ပမ့ၢ်ပာ်ဖျါထီၣ်တၢ်အဲၣ်ဒ်အံၤ လၢပှၤဂၤအဖီခိၣ်န့ၣ် ကထိၣ်ဟူးထိၣ်ဂဲၤထီၣ် အဝဲသ့ၣ်လၢ အက “ဂုာ်ကျဲးစၢး ဒ်သိးကန့ၢ်ဘၣ် တၢ်မူအထူအယိာ်အဂီၢ်.”—မၤတၢ် ၁၃:၄၈.

လၢအပူၤကွံာ်န့ၣ် ပတဲပၠးဟံၣ်ကစၢ်လၢ တၢ်အဒိလၢ ပကတဲသကိးတၢ်ဒီး ဟံၣ်ကစၢ်အဂီၢ် ဒီးပနီၤလီၤမဲးကစံ. မ့မ့ၢ်ခဲအံၤန့ၣ် ပမၤဂ့ၤထီၣ် တၢ်သ့တၢ်ဘၣ်လၢ ပကတဲသကိးတၢ်ဒီးပှၤဂၤအဂီၢ်. ပပာ်ဖျါထီၣ်တၢ်အဲၣ် လၢပှၤဂၤအဖီခိၣ် သ့ခီဖျိ ပတဲသကိးတၢ်ဂ့ၢ်လၢ အဝဲသ့ၣ် သးအိၣ်ဝဲတဖၣ်. ပမၤဒ်န့ၣ်သ့ခီဖျိ ပဆီတလဲသး ဒ်တၢ်အိၣ်သးအိၣ်ဝဲအသိး, ဆိမိၣ်န့ၢ်တၢ်လၢပှၤဂၤအဂီၢ် ဒီးသူၣ်အိၣ်သးအိၣ် အဝဲသ့ၣ်. လံာ်တဘ့ၣ်အံၤ ကမၤစၢၤပှၤဒ်လဲၣ်.

လံာ်တဘ့ၣ်အံၤ တၢ်မၤလိအိၣ်ဝဲ ၁၂ ခါ. ဒီးလံာ်အံၤ ကမၤစၢၤပှၤလၢ ပကမၤအါထီၣ် တၢ်ဂ့ၤတၢ်ဝါတဖၣ် ဒ်သိးပပာ်ဖျါထီၣ် တၢ်အဲၣ်လၢပှၤဂၤဖီခိၣ် ဒီးဒုးကဲထီၣ်ပှၤဂၤလၢ ခရံာ်အပျဲၢ်အဘီၣ် ကသ့အဂီၢ်. တၢ်မၤလိတခါစုာ်စုာ်န့ၣ် ဒိးသန့ၤထီၣ်အသးလၢ လံာ်စီဆှံအပူၤ ဒီးဖဲန့ၣ် ပကထံၣ်ဘၣ် ယ့ၣ်ၡူး မ့တမ့ၢ် ပှၤတဂၤဂၤလၢ တၢ်မၢဖိအစိၤ ပာ်ဖျါထီၣ်ဝဲ တၢ်ဂ့ၤတၢ်ဝါတမံၤမံၤလၢ တၢ်စံၣ်တဲၤတဲလီၤတၢ်မၤအပူၤ. အခဲအံၤ ပတၢ်တိာ်ပာ်န့ၣ် တမ့ၢ်လၢ ပကတိၢ်ရူးသံတၢ်လၢ ပကတဲတဖၣ်ဘၣ်. လၢတၢ်န့ၣ်အလီၢ် ပဃုကျဲလၢ ပကပာ်ဖျါထီၣ် တၢ်အဲၣ်လၢပှၤဂၤအဖီခိၣ်. ပကမၤဒ်န့ၣ်အဂီၢ် ပကလိၣ်ဘၣ် ပတၢ်ဂ့ၤတၢ်ဝါတခါစုာ်စုာ် လၢပတၢ်စံၣ်တဲၤတဲလီၤတၢ်မၤအပူၤ. ဘၣ်ဆၣ် ခဲအံၤ ပကတဲသကိး တၢ်ဂ့ၤတၢ်ဝါ လီၤလီၤဆီဆီလၢ ကမၤစၢၤပှၤဒ်သိး ပကတဲသကိးတၢ်ဒီးပှၤဂၤအဂီၢ်, ပကက့ၤကဒါက့ၤလၢ ပှၤအိၣ်အဂီၢ် ဒီးလၢတၢ်မၤလိာ်လံာ်စီဆှံဒီးပှၤဂၤအဂီၢ်.

ဖဲပတဲသကိး တၢ်မၤလိတခါစုာ်စုာ်အခါ ဆိမိၣ်ထီၣ်ဘၣ်ဃးဒီး တၢ်ဂ့ၤတၢ်ဝါတခါအံၤန့ၣ် ပကသူအီၤဖဲ ပတဲသကိးတၢ်ဒီးပှၤဂၤ လၢပလီၢ်ကဝီၤပူၤ ကသ့ဒ်လဲၣ်. တကးဒံးဘၣ် ပကဘၣ်မၤဒိၣ်ထီၣ် ပတၢ်အဲၣ် ယဟိဝၤယွၤ ဒီးတၢ်အဲၣ်ပှၤဂၤ. ဒ်သိး ပဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်ကသ့အဂီၢ် ပမ့ၢ်အိၣ်ဒီးတၢ်အဲၣ်ဒ်အံၤန့ၣ် အဂ့ၤဒိၣ်န့ၢ် ပအိၣ်ဒီးတၢ်သ့တၢ်ဘၣ်လၢအဂၤဒံး.

ပမၤသကိးဘၣ်တၢ်ဒီးသုအဃိ ပသးခုဒိၣ်မး. (ဖါ ၃:၉) မ့ၢ်လၢသုအဲၣ်ပှၤဂၤ ဒီးဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်အဃိ မ်ယဟိဝၤယွၤ ဆိၣ်ဂ့ၤသု ထူးထူးတီၤတီၤတက့ၢ်.