တၢ်မၤလိ ၃၄
ဖဲနမူဒါ ဆီတလဲအခါ နဆဲးအိၣ်ဒီး တၢ်သးခု ကသ့ဒ်လဲၣ်
“ယွၤတမ့ၢ်ဘၣ်ပှၤတတီတလိၤဘၣ် လၢအကသးပ့ၤနီၣ်သုတၢ်မၤ, ဒီးသုတၢ်အဲၣ်တၢ်ကွံ လၢသုအဲၣ်အမံၤ” အဃိန့ၣ်ဘၣ်.—ဧ့ၤဘြံၤ ၆:၁၀.
တၢ်သးဝံၣ် ၃၈ ကစၢ်ကမၤဆူၣ်ထီၣ် နဂံၢ်ဘါ
တၢ်မၤလိအံၤ အတၢ်တိာ်ပာ်a
၁-၃. ဘၣ်မနုၤအဃိ ပှၤလၢအမၤကစၢ်ယွၤအတၢ်မၤ လၢဆၢကတီၢ်လၢပှဲၤတနီၤ ဘၣ်ပာ်တ့ၢ်ကွံာ် အမူဒါလဲၣ်.
ရီဘၢၤ ဒီးမဲၤရံၤ ကၠိ တဲဝဲလၢ “ဖဲပမၤ မံးၡ့ၣ်နရ့ၣ် ၂၁ နံၣ်ဝံၤအလီၢ်ခံ ပမိၢ်ပပၢ် လွံၢ်ဂၤလၢာ် အတၢ်အိၣ်ဆူၣ်အိၣ်ချ့ တဂ့ၤလၢၤဘၣ်. ပကွၢ်ထွဲဘၣ် အဝဲသ့ၣ်အဃိ ပသးခု ဘၣ်ဆၣ်ပသးအုးလၢ ပဘၣ်ပာ်တ့ၢ်ကွံာ် တၢ်လီၢ်လၢ ပအိၣ်မုာ်န့ၣ်လီၤ.”
၂ ဝ့လံၤယၢၤ(မ်) ဒီးထၢရံၤ တဲဝဲလၢ “ဖဲပသ့ၣ်ညါလၢ ခီဖျိလၢ ပတၢ်အိၣ်ဆူၣ်အိၣ်ချ့တဂ့ၤဘၣ်အဃိ ပမၤကဒါက့ၤ ပမူဒါတန့ၢ်လၢၤဘၣ်အခါ ပဟီၣ်လီၤ. ပအဲၣ်ဒိးမၤ ကစၢ်ယွၤအတၢ်မၤ လၢထံဂၤကီၢ်ဂၤထီဘိ ဘၣ်ဆၣ် ခဲအံၤန့ၣ် ပမၤအီၤတသ့လၢၤဘၣ်.”
၃ အလံ(ခ်)စံၤ တဲဝဲလၢ “ပသ့ၣ်ညါပာ်စၢၤလၢ ပှၤလၢအမၤအၢမၤနးပှၤတဖၣ်န့ၣ် အဲၣ်ဒိးပံးဝဲ ဝဲၤတြၢ်လၢ ယလဲၤမၤတၢ်အလီၢ်န့ၣ်လီၤ. ဘၣ်ဆၣ် ဖဲပှၤပံးကွံာ် ဘ့ၤသ့လး ဒီးပဘၣ်ဟးထီၣ်ဖဲန့ၣ်အခါ ပသးတမုာ်ဘၣ်.”
၄. လၢတၢ်မၤလိအံၤအပူၤ ပကတဲသကိး ဘၣ်ဃးဒီး တၢ်သံကွၢ်မနုၤတဖၣ်လဲၣ်.
၄ ပှၤမၤကစၢ်ယွၤအတၢ်မၤ လၢဆၢကတီၢ်လၢပှဲၤ ဃုာ်ဒီးပှၤလၢအမၤတၢ်လၢ ဘ့ၤသ့လးအါဂၤန့ၣ် ဒိးန့ၢ်ဘၣ် မူဒါလၢအသီလီၤ.b အဝဲသ့ၣ် ဘၣ်ပာ်တ့ၢ်ကွံာ် အမူဒါလၢ အဘၣ်သူၣ်ဘၣ်သးဝဲဒိၣ်မးအဃိ တညီလၢ အဝဲသ့ၣ်အဂီၢ်ဘၣ်. တၢ်မနုၤကမၤစၢၤ အဝဲသ့ၣ် ဒ်သိးလဲၤခီဖျိဝဲ တၢ်ဆီတလဲတဖၣ် ကန့ၢ်အဂီၢ်လဲၣ်. နမၤစၢၤ အဝဲသ့ၣ် ကသ့ဒ်လဲၣ်. တၢ်သံကွၢ်တဖၣ်အံၤ အတၢ်စံးဆၢန့ၣ် ကမၤစၢၤပှၤ ဖဲပထံၣ်ဘၣ် ဒီးတၢ်ဆီတလဲလၢ ပတၢ်အိၣ်မူပူၤအခါန့ၣ်လီၤ.
နတၢ်ဆီတလဲ မ့ၢ်အိၣ်ထီၣ်န့ၣ် နလဲၤခီဖျိအီၤ ကသ့ဒ်လဲၣ်
ဖဲပှၤလၢအမၤ ကစၢ်ယွၤအတၢ်မၤ လၢဆၢကတီၢ်လၢပှဲၤတဖၣ် ဘၣ်ပာ်တ့ၢ်ကွံာ် အမူဒါအခါ ဘၣ်မနုၤအဃိ ကကီလၢ အဝဲသ့ၣ်အဂီၢ်လဲၣ် (ကွၢ်လံာ်အဆၢ ၅)e
၅. ဖဲပမူဒါဆီတလဲအခါ ပထံၣ်ဘၣ်ဒီး တၢ်ကီတၢ်ခဲမနုၤတဖၣ်သ့လဲၣ်.
၅ ပမ့ၢ်မၤဘၣ် ကစၢ်ယွၤအတၢ်မၤလၢ တၢ်စံၣ်တဲၤတဲလီၤတၢ်မၤအပူၤမ့ၢ်ဂ့ၤ, လၢဘ့ၤသ့လးမ့ၢ်ဂ့ၤ ပတၢ်အဲၣ်လၢ ပှၤကညီအဖီခိၣ် ဒီးပတၢ်ဘၣ်သူၣ်ဘၣ်သးတၢ်လီၢ်လၢ ပလီၤဘၣ်မူဒါအလီၢ်န့ၣ် ဒိၣ်ထီၣ်ဝဲသ့လီၤ. လၢတၢ်န့ၣ်အဃိ ဖဲပဘၣ်ပာ်တ့ၢ်ကွံာ် ပမူဒါအခါ ပသးတမုာ်ဘၣ်. ဒီးပသးသယုၢ်ဘၣ် ပဒီပုၢ်ဝဲၢ်မုၢ်ခွါတဖၣ်, ပဘၣ်ယိၣ်တၢ်လၢ အဝဲသ့ၣ်အဂီၢ် လီၤဆီဒၣ်တၢ် ဖဲပဘၣ်ပာ်တ့ၢ်ကွံာ် အဝဲသ့ၣ် ခီဖျိလၢ တၢ်မၤအၢမၤနးအဃိ အခါန့ၣ်လီၤ. (မးသဲ ၁၀:၂၃; ၂ ကရံၣ်သူး ၁၁:၂၈, ၂၉) တကးဒံးဘၣ် ပမ့ၢ်ဘၣ်လဲၤလၢ တၢ်လီၢ်အဂၤန့ၣ် ပကဘၣ်မၤလိ တၢ်ဆဲးတၢ်လၤအသီအဃိ တညီလၢပဂီၢ်ဘၣ်. ပမ့ၢ်ဘၣ်က့ၤဆူ ပဟံၣ်ဒၣ်လဲာ် ပထံၣ်ဘၣ်ဒီး တၢ်ကီတၢ်ခဲဒ်အံၤသ့လီၤ. ရီဘၢၤ ဒီးမဲၤရံၤ ကၠိ တဲဝဲလၢ “မ့ၢ်လၢပလဲၤမၤ ကစၢ်ယွၤအတၢ်မၤလၢ တၢ်လီၢ်အဂၤ ဖးယံာ်အဃိ ဖဲပက့ၤလၢ ပထံပကီၢ်အခါ ပတူၢ်ဘၣ်လၢ ပကဲပှၤထံဂၤကီၢ်ဂၤဖိလီၤ. ပတညီနုၢ်ဒီး ပတၢ်ဆဲးတၢ်လၤလၢၤဘၣ် ဒီးပစံၣ်တဲၤတဲလီၤတၢ် လၢပနီၢ်ကစၢ်အကျိာ်မး တအါယးလၢၤဘၣ်.” ပှၤလၢအမူဒါ ဆီတလဲတနီၤန့ၣ် လၢတၢ်တမုၢ်လၢ်အပူၤ ဘၣ်သ့ၣ်သ့ၣ် အဝဲသ့ၣ် ကထံၣ်ဘၣ်ဒီး ကျိၣ်စ့အတၢ်ကီတၢ်ခဲ စ့ၢ်ကီးလီၤ. ဘၣ်သ့ၣ်သ့ၣ် အဝဲသ့ၣ် ကအိၣ်ဒီးတၢ်သးဒ့ဒီ, မၤတၢ်တဘၣ် နီတမံၤလၢၤဘၣ် ဒီးအသးအဂံၢ်အဘါ ကလီၤစၢ်ဝဲလီၤ. မ့မ့ၢ်ဒ်န့ၣ်န့ၣ် အဝဲသ့ၣ် မၤတၢ်မနုၤသ့လဲၣ်.
ပကဘၣ်သုးဘူးပသးဆူ ယဟိဝၤယွၤအအိၣ် ဒီးနာ်န့ၢ်အီၤန့ၣ် မ့ၢ်တၢ်လၢအရ့ဒိၣ် (ကွၢ်လံာ်အဆၢ ၆-၇)f
၆. ပအိၣ်ဘူးဒီး ယဟိဝၤယွၤ ကသ့ဒ်လဲၣ်.
၆ အိၣ်ဘူးဒီးယဟိဝၤယွၤ. (ယၤကိာ် ၄:၈) ပအိၣ်ဘူးဒီးကစၢ်ယွၤ သ့ခီဖျိ ပနာ်လၢအဝဲမ့ၢ် “ပှၤလၢအနၢ်ဟူ တၢ်ဘါထုကဖၣ်” န့ၣ်လီၤ. (စံးထီၣ်ပတြၢၤ ၆၅:၂) စံးထီၣ်ပတြၢၤ ၆၂:၈ တဲဝဲလၢ “လူလီၤသုသးလၢ အမဲာ်ညါတက့ၢ်.” ယဟိဝၤယွၤ မၤတၢ်သ့ “အါန့ၢ်ဒိၣ်န့ၢ် ကယဲၢ်ပဃ့တၢ်ဒီး ဆိကမိၣ်တၢ်သ့” ဒံးလီၤ. (အ့းဖ့းစူး ၃:၂၀) တမ့ၢ်ထဲ ယဟိဝၤယွၤ ကဟ့ၣ်ပှၤ တၢ်လၢပဃ့အီၤတဖၣ်န့ၣ်ဘၣ်. အဝဲကမၤဘၣ်ဂီၢ်က့ၤ ပတၢ်ကီတၢ်ခဲလၢ ကျဲလၢပတဆိကမိၣ်ဘၣ်အီၤ နီတဘျီဘၣ်န့ၣ်လီၤ.
၇. (က) ဒ်သိး ပကအိၣ်ဘူးဒီး ယဟိဝၤယွၤထီဘိအဂီၢ် ပကဘၣ်မၤဒ်လဲၣ်. (ခ) ဒ် ဧ့ၤဘြံၤ ၆:၁၀-၁၂ ပာ်ဖျါထီၣ်ဝဲအသိး ပမ့ၢ်ဆဲးမၤ ယဟိဝၤယွၤ အတၢ်မၤလၢ တၢ်သးတီအပူၤန့ၣ် ပကဒိးန့ၢ်ဘၣ်အဘျုး ဒ်လဲၣ်.
၇ ဒ်သိးနကအိၣ်ဘူးဒီး ယဟိဝၤယွၤအဂီၢ် ဖးလံာ်စီဆှံ ကိးနံၤဒဲး ဒီးဆိကမိၣ်ထံအီၤ လီၤတံၢ်လီၤဆဲးတက့ၢ်. ပှၤလၢအမၤတ့ၢ် မံးၡ့ၣ်နရ့ၣ် လၢညါတဂၤ တဲဝဲလၢ “ဆဲးမၤဟံၣ်ဖိဃီဖိ တၢ်မၤလိလံာ်စီဆှံ ဒီးကတဲာ်ကတီၤနသး လၢတၢ်အိၣ်ဖှိၣ်အဂီၢ် ဒ်နမၤတ့ၢ်အီၤ လၢညါအသိးန့ၣ်တက့ၢ်.” လၢနတၢ်အိၣ်ဖှိၣ်အသီန့ၣ် တသ့ဖဲအသ့ ဆဲးပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ လၢလၢပှဲၤပှဲၤတက့ၢ်. ပှၤလၢအဆဲးမၤ ကစၢ်ယွၤအတၢ်မၤ လၢတၢ်သးတီအပူၤတဖၣ် မၤကစၢ်ယွၤအတၢ်မၤ မ့ၢ်တန့ၢ် ဒ်လၢညါအသိးဒၣ်လဲာ် ယဟိဝၤယွၤ တသးပ့ၤနီၣ် အဝဲသ့ၣ်ဘၣ်.—ဖး ဧ့ၤဘြံၤ ၆:၁၀-၁၂ တက့ၢ်.
၈. တၢ်ကတိၤဖဲ ၁ ယိၤဟၣ် ၂:၁၅-၁၇ အပူၤတဖၣ် မၤစၢၤနၤ ဒ်သိး နကအိၣ်မူ ယိယိဖိအဂီၢ် ဒ်လဲၣ်.
၈ အိၣ်မူယိယိဖိ. တဘၣ်ပျဲလၢ တၢ်ကိၢ်တၢ်ဂီၤလၢ အဘၣ်ဃးဒီး မုၣ်ကီၤလံၢ်အဟီၣ်ခိၣ် “ခဲဘၢ” နၤ မ့တမ့ၢ် မၤပတုာ်နၤလၢ နကမၤကစၢ်ယွၤ အတၢ်ဖံးတၢ်မၤန့ၣ်တဂ့ၤ. (မးသဲ ၁၃:၂၂) တဘၣ်ဒိကနၣ် ပှၤလၢအတဘူၣ်ထီၣ်ဘါထီၣ် ယဟိဝၤယွၤ, နတံၤသကိးတဖၣ် မ့တမ့ၢ် နဘူးနတံၢ်တဖၣ် လၢအဂုာ်ကျဲးစၢးမၤစၢၤနၤ ခီဖျိအမၢ နဃုကျိၣ်ဃုစ့အါအါ ဒ်သိးနကအိၣ်မူဘၣ် ဘီၣ်ဘီၣ်ညီညီအဂီၢ်န့ၣ်တဂ့ၤ. (ဖး ၁ ယိၤဟၣ် ၂:၁၅-၁၇ တက့ၢ်.) နာ်န့ၢ်ယဟိဝၤယွၤ လၢအအၢၣ်လီၤပှၤလၢ အကမၤစၢၤပှၤ ဖဲပလိၣ်ဘၣ် “တၢ်မၤစၢၤအဆၢအကတီၢ်” န့ၣ်တက့ၢ်. အဝဲကမၤစၢၤပှၤ ဒ်သိးပတၢ်နာ် ကဂၢၢ်ကျၢၤ, ပကပာ်ပသး မုာ်မုာ်ခုၣ်ခုၣ် ဒီးကဟ့ၣ်ပှၤ ကျိၣ်စ့ဒီး တၢ်စုလီၢ်ခီၣ်ခိၣ် လၢပလိၣ်ဘၣ်အီၤတဖၣ်န့ၣ်လီၤ.—ဧ့ၤဘြံၤ ၄:၁၆; ၁၃:၅, ၆.
၉. ဒ် ကတိၤဒိ ၂၂:၃, ၇ တဲဝဲအသိး ဘၣ်မနုၤအဃိ အရ့ဒိၣ်လၢ ပတဘၣ် ဟးမၤထီၣ်နါစိၤ ပကမၢ်ဘၣ်လဲၣ်, ဒ်သိးပဆၢတဲာ်တၢ်လၢ တၢ်ကူၣ်သ့အပူၤ ကသ့အဂီၢ် ပကဘၣ်မၤ တၢ်မနုၤလဲၣ်.
၉ မ့ၢ်သ့န့ၣ် တဘၣ်မၤထီၣ် နကမၢ်တဂ့ၤ. (ဖး ကတိၤဒိ ၂၂:၃, ၇ တက့ၢ်.) ဖဲနဘၣ်သုးလီၢ်သုးကျဲအခါ ဘၣ်သ့ၣ်သ့ၣ် နတၢ်လၢာ်ဘူၣ်လၢာ်စ့ၤ ကအါဝဲအဃိ နကမၢ်ကထီၣ်လီၤ. မ့မ့ၢ်ဒ်န့ၣ်န့ၣ် ဒ်သိးနကမၢ် သုတထီၣ်အါအါတဂ့ၤအဂီၢ် တဘၣ်ဃ့လိၢ်စ့ လၢနကပှ့ၤ တၢ်လၢနတလိၣ်ဘၣ်အီၤ အနီၢ်ကီၢ်တဖၣ်န့ၣ်တဂ့ၤ. တဘျီတခီၣ် ခီဖျိလၢ နအိၣ်ဒီးတၢ်သူၣ်ကိၢ်သးဂီၤအဃိ ကကီလၢနကဆၢတဲာ်တၢ် ဘၣ်ဃးဒီး နကဃ့လိၢ်စ့ ထဲလဲၣ်န့ၣ်လီၤ. အဒိ ဖဲနဘၣ်ကွၢ်ထွဲ နဟံၣ်ဖိဃီဖိလၢ အအိၣ်တဆူၣ်ဘၣ် တဂၤဂၤအခါ ကကီလၢ နကဆၢတဲာ်တၢ်ဒ်န့ၣ်အဂီၢ်လီၤ. မ့မ့ၢ်ဒ်န့ၣ်န့ၣ် သ့ၣ်နီၣ်ထီၣ်လၢ “တၢ်ထုကဖၣ်” ဒီး “တၢ်ဃ့ကညး” ကမၤစၢၤနၤ ဒ်သိးနဆၢတဲာ်တၢ် လၢတၢ်ကူၣ်သ့အပူၤ ကသ့အဂီၢ်လီၤ. ယဟိဝၤယွၤစံးဆၢ နတၢ်ထုကဖၣ်သ့ ခီဖျိအကမၤစၢၤနၤဒ်သိး နပာ်နသးမုာ်မုာ်ခုၣ်ခုၣ် ကသ့အဂီၢ်လီၤ. ဒီးဖဲန့ၣ်န့ၣ် နဆၢတဲာ်တၢ်လၢ အဂ့ၤကတၢၢ်ကသ့ဝဲလီၤ.—ဖံလံးပံၤ ၄:၆, ၇; ၁ ပ့းတရူး ၅:၇.
၁၀. ပမၤအါထီၣ် ပတံၤသကိး ကသ့ဒ်လဲၣ်.
၁၀ ပၢၤဃာ် နတၢ်ရ့လိာ်သးဒီး နဟံၣ်ဖိဃီဖိ ဒီးနတံၤသကိးတဖၣ်. ဘၣ်ဃးဒီး နတၢ်တူၢ်ဘၣ် ဒီးနတၢ်ကီတၢ်ခဲတဖၣ်န့ၣ် တဲဘၣ်နသကိးလၢ အဘူးဒီးနၤ လီၤဆီဒၣ်တၢ် ပှၤလၢအဘၣ်လဲၤခီဖျိတ့ၢ်တၢ် ဒ်သိးဒီးနၤန့ၣ်တက့ၢ်. နမ့ၢ်မၤဒ်န့ၣ်န့ၣ် နတၢ်တူၢ်ဘၣ် ကိညၢ်ထီၣ်ဝဲသ့လီၤ. (စံၣ်တဲၤတဲလီၤတၢ် ၄:၉, ၁၀) နအိၣ်ဒီးတံၤသကိးလၢ အအိၣ်လၢတၢ်လီၢ်လၢ နမူဒါလီၤဘၣ်တ့ၢ်အလီၢ် ဘၣ်ဆၣ် ဖဲနန့ၢ်ဘၣ် မူဒါလၢအသီအခါ နကဘၣ်ဃု နတံၤသကိးလၢအသီတဖၣ်လီၤ. ဒီးသ့ၣ်နီၣ်ထီၣ်လၢ ဒ်သိးနကန့ၢ်ဘၣ် တံၤသကိးအဂီၢ် နကဘၣ်ကဲထီၣ် ပှၤဂၤအသကိးစ့ၢ်ကီးလီၤ. နမၤအါထီၣ် နသကိး ကသ့ဒ်လဲၣ်. တဲဘၣ်ပှၤဂၤလၢ နတၢ်လဲၤခီဖျိလၢအဂ့ၤ လၢယဟိဝၤယွၤ အတၢ်မၤအပူၤန့ၣ်တက့ၢ်. နမ့ၢ်မၤဒ်န့ၣ်န့ၣ် အဝဲသ့ၣ် ကသးခု ဃုာ်ဒီးနၤလီၤ. ဘၣ်မနုၤအဃိ နဘၣ်သူၣ်ဘၣ်သး တၢ်မၤကစၢ်ယွၤ အတၢ်မၤလၢ ဆၢကတီၢ်လၢပှဲၤလဲၣ်န့ၣ် ဘၣ်သ့ၣ်သ့ၣ် ဒီပုၢ်ဝဲၢ်လၢ တၢ်အိၣ်ဖှိၣ်အပူၤတနီၤ တနၢ်ပၢၢ်ဝဲဘၣ်. ဘၣ်ဆၣ် ဒီပုၢ်ဝဲၢ်အဂၤတနီၤ ကအဲၣ်ဒိးသ့ၣ်ညါအါထီၣ် တၢ်ဂ့ၢ်အံၤ ဒီးကကဲထီၣ် နတံၤသကိးလၢအဂ့ၤလီၤ. ဒီးတဘၣ်တဲ ထဲနဂ့ၢ် မ့တမ့ၢ် တၢ်ကဲထီၣ်လိၣ်ထီၣ် လၢနမၤတ့ၢ်အီၤ လၢယဟိဝၤယွၤ အတၢ်မၤအပူၤ ဒီးနတၢ်တူၢ်ဘၣ်လၢ အတဂ့ၤတဖၣ်အဂ့ၢ် အါတလၢတဂ့ၤ.
၁၁. ဒ်သိးနသးသမူတံၤသကိး ကအိၣ်ဒီးတၢ်သးခုအဂီၢ် နကြၢးဟးဆှဲး တၢ်မနုၤလဲၣ်.
၁၁ ခီဖျိလၢ နသးသမူတံၤသကိး အတၢ်အိၣ်ဆူၣ်အိၣ်ချ့ တဂ့ၤဘၣ်အဃိ နမ့ၢ်ဘၣ်ပာ်တ့ၢ်ကွံာ် နမူဒါန့ၣ် တဘၣ်ပာ်ထီၣ်တၢ်ကမၣ် လၢအလိၤတဂ့ၤ. မ့တမ့ၢ် ခီဖျိလၢ နတၢ်အိၣ်ဆူၣ်အိၣ်ချ့ တဂ့ၤဘၣ်အဃိ နမ့ၢ်ဘၣ်ပာ်တ့ၢ်ကွံာ်မူဒါန့ၣ် တဘၣ်ပာ်ထီၣ်တၢ်ကမၣ်လၢနလိၤ ဒီးတဘၣ်ဆိကမိၣ်လၢ နမၤသးအုးဘၣ် နသးသမူတံၤကိးအသးန့ၣ်တဂ့ၤ. သ့ၣ်နီၣ်ထီၣ်လၢ သုမ့ၢ် “တသွံၣ်ဃီတညၣ်ဃီ” ဒီးသုအၢၣ်လီၤသုသး လၢယဟိဝၤယွၤအမဲာ်ညါ လၢတၢ်အိၣ်သးမ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ သုကကွၢ်ထွဲလိာ်သုသး တဂၤဒီးတဂၤန့ၣ်တက့ၢ်. (မးသဲ ၁၉:၅, ၆) လၢတၢ်တမုၢ်လၢ်အပူၤ နမ့ၢ်ဒၢထီၣ်ဒီး နမ့ၢ်ဘၣ်ပာ်တ့ၢ်ကွံာ် နမူဒါန့ၣ် လၢခံဒုးသ့ၣ်ညါနဖိလၢ အဝဲမ့ၢ်ပှၤလၢ အရ့ဒိၣ်န့ၢ်ဒံး နမူဒါလၢ နဒိးန့ၢ်ဘၣ်အီၤန့ၣ်တက့ၢ်. ဒီးထီဘိန့ၣ် တဲဘၣ်အီၤလၢ နထံၣ်အီၤဒ် “တၢ်န့ၢ်သါ” လၢကစၢ်ယွၤ ဟ့ၣ်နၤန့ၣ်တက့ၢ်. (စံးထီၣ်ပတြၢၤ ၁၂၇:၃-၅) တကးဒံးဘၣ် တဲဘၣ်အီၤ နတၢ်လဲၤခီဖျိလၢအဂ့ၤတဖၣ် လၢနဒိးန့ၢ်ဘၣ်အီၤ ဖဲနမၤနမူဒါအခါန့ၣ်တက့ၢ်. နမ့ၢ်မၤဒ်န့ၣ်န့ၣ် ကမၤစၢၤနဖိ ဒ်သိးအကအဲၣ်ဒိးမၤ ယဟိဝၤယွၤအတၢ်မၤ လၢဆၢကတီၢ်လၢပှဲၤ ဒ်နမၤတ့ၢ်အီၤအသိးလီၤ.
ပှၤအဂၤသ့ၣ်တဖၣ် မၤစၢၤနၤကသ့ဒ်လဲၣ်
၁၂. (က) ဒ်သိး ပှၤလၢအမၤကစၢ်ယွၤအတၢ်မၤ လၢဆၢကတီၢ်လၢပှဲၤတဖၣ် ကဆဲးမၤအမူဒါအဂီၢ် ပမၤစၢၤအဝဲသ့ၣ် ကသ့ဒ်လဲၣ်. (ခ) ဒ်သိး အဝဲသ့ၣ် အဆီတလဲအသး ဒ်တၢ်အိၣ်သးအိၣ်ဝဲအသိး ကညီအဂီၢ် ပမၤစၢၤအဝဲသ့ၣ် ကသ့ဒ်လဲၣ်.
၁၂ တၢ်အိၣ်ဖှိၣ်တဖၣ် ဒီးဒီပုၢ်ဝဲၢ်မုၣ်ခွါ တဂၤစုာ်စုာ်န့ၣ် မၤစၢၤဝဲ ပှၤလၢအမၤတၢ်လၢ ဆၢကတီၢ်အလၢအပှဲၤတဖၣ် ဒ်သိးအဝဲသ့ၣ်ဆဲးမၤ အမူဒါတဖၣ် ကန့ၢ်အဂီၢ်လီၤ. အဝဲသ့ၣ်မၤစၢၤဝဲခီဖျိ ဟ့ၣ်ဂံၢ်ဟ့ၣ်ဘါအီၤ, ဟ့ၣ်အီၤတၢ်လၢအလိၣ်ဘၣ် မ့တမ့ၢ် မၤစၢၤအဟံၣ်ဖိဃီဖိလၢ အအိၣ်တ့ၢ်လၢ တၢ်လီၢ်အယံၤတဖၣ်လီၤ. (ကလၤတံ ၆:၂) ပှၤလၢအမၤ ကစၢ်ယွၤအတၢ်မၤလၢ ဆၢကတီၢ်လၢပှဲၤတဂၤ မ့ၢ်ဒိးန့ၢ်ဘၣ်မူဒါအသီ ဒီးပှၤမ့ၢ်ဆှၢအီၤ လၢနတၢ်အိၣ်ဖှိၣ်အပူၤန့ၣ် တဘၣ်ဆိကမိၣ်လၢ အဝဲမၤတၢ်လၢအတဂ့ၤ မ့တမ့ၢ် အကမၣ်တမံၤမံၤအဃိ ပှၤဆီတလဲန့ၢ်အမူဒါန့ၣ်တဂ့ၤ.c လၢတၢ်န့ၣ်အလီၢ် မၤစၢၤအီၤဒ်သိး အဆီတလဲအသး ဒ်တၢ်အိၣ်သး အိၣ်ဝဲအသိး ကညီအဂီၢ်န့ၣ်တက့ၢ်. ဒီးခီဖျိလၢ အတၢ်အိၣ်ဆူၣ်အိၣ်ချ့ တဂ့ၤဘၣ်အဃိ အမၤတၢ်မ့ၢ်တကဲ ထဲသိးဒီးလၢညါသနာ်က့ တူၢ်လိာ်မုာ်အီၤ ဒီးစံးပတြၢၤအီၤ ခီဖျိတၢ်လၢ အမၤတ့ၢ်ဝဲတဖၣ်န့ၣ်တက့ၢ်. ရ့လိာ်နသးဒီး အီၤတက့ၢ်. ဟံးန့ၢ်တၢ်မၤလိလၢ အဝဲသ့ၣ် အတၢ်လဲၤခီဖျိ, အတၢ်သ့ၣ်ညါ ဒီးတၢ်လၢအဝဲသ့ၣ် မၤလိနၤတဖၣ်န့ၣ်တက့ၢ်.
၁၃. ပမၤစၢၤ ပှၤလၢအဒိးန့ၢ်ဘၣ် မူဒါလၢအသီတဖၣ် ကသ့ဒ်လဲၣ်.
၁၃ လၢအခီၣ်ထံးန့ၣ် ပှၤလၢအဒိးန့ၢ်ဘၣ် မူဒါလၢအသီတဂၤ ကလိၣ်ဘၣ်နတၢ်မၤစၢၤ ဒ်သိးကဃုဟံၣ်, ကဟးထီၣ်ဟးလီၤ, ကဃုတၢ်မၤ ဒီးတၢ်လိၣ်တၢ်လဲးလၢ အဂၤတဖၣ်န့ၣ်လီၤ. ဘၣ်သ့ၣ်သ့ၣ် အဝဲသ့ၣ် ကလိၣ်ဘၣ်စ့ၢ်ကီး တၢ်ဂ့ၢ်တၢ်ကျိၤလၢ အဘၣ်ဃးဒီး တၢ်ဟ့ၣ်တၢ်ခိတၢ်သွဲ ဒီးတၢ်အုၣ်ကီၤ (insurance) လီၤ. တၢ်လၢအဝဲသ့ၣ် လိၣ်ဘၣ်ဝဲ အဒိၣ်ကတၢၢ်န့ၣ် တမ့ၢ်တၢ်သးကညီၤဘၣ်, အဝဲသ့ၣ် အဲၣ်ဒိးလၢ ပှၤကနၢ်ပၢၢ်စၢၤ အဝဲသ့ၣ်လီၤ. ဘၣ်သ့ၣ်သ့ၣ် အဝဲသ့ၣ် မ့တမ့ၢ် အဟံၣ်ဖိဃီဖိတဂၤဂၤ အတၢ်အိၣ်ဆူၣ်အိၣ်ချ့ တဂ့ၤဘၣ်. ဘၣ်သ့ၣ်သ့ၣ် အဝဲသ့ၣ် ကသူၣ်အုးသးအုးခီဖျိ ပှၤလၢအအဲၣ်ဘၣ်ဝဲတဂၤ သံသဒၣ်ကွံာ်အီၤအဃိလီၤ.d ဒီးအဝဲသ့ၣ် မ့ၢ်တတဲဝဲသနာ်က့ ဘၣ်သ့ၣ်သ့ၣ် အဝဲသ့ၣ် ကသးအုးခီဖျိ အသ့ၣ်နီၣ်ဘၣ် အတံၤသကိးလီၢ်လံၤ လၢအဘၣ်ပာ်တ့ၢ်ဝဲ တဖၣ်န့ၣ်လီၤ. ညီနုၢ်န့ၣ် အဝဲသ့ၣ် အိၣ်ဒီးတၢ်တူၢ်ဘၣ် အါမံၤအဃိ ဒ်သိးအဝဲသ့ၣ် လဲၤခီဖျိဝဲ အတၢ်တူၢ်ဘၣ်တဖၣ်အံၤ ကန့ၢ်အဂီၢ် ကလိၣ်ဘၣ် တၢ်ဆၢကတီၢ်လီၤ.
၁၄. ပှၤစံၣ်တဲၤတဲလီၤတၢ်ဖိတဖၣ် မၤစၢၤဒီပုၢ်ဝဲၢ်မုၣ်လၢ အဒိးန့ၢ်ဘၣ်မူဒါအသီတဂၤ ဒ်လဲၣ်.
၁၄ နမ့ၢ်ဟးစံၣ်တဲၤတဲလီၤတၢ်ဒီး အဝဲသ့ၣ် ဒီးဟ့ၣ်ဂံၢ်ဟ့ၣ်ဘါ အဝဲသ့ၣ် ခီဖျိလၢ နတၢ်ဒိဂ့ၤတဲာ်ဘၣ်န့ၣ် ကမၤစၢၤအဝဲသ့ၣ် ဒ်သိးကအိၣ်ဒီးတၢ်သးခု လၢအမူဒါအသီအပူၤန့ၣ်လီၤ. ဒီပုၢ်ဝဲၢ်မုၣ်လၢ အမၤကစၢ်ယွၤအတၢ်မၤ လၢထံဂၤကီၢ်ဂၤ လၢအနံၣ်အါမးတဂၤန့ၣ် တဲဝဲလၢ “ယမူဒါ လၢညါတခါန့ၣ် ယမၤတၢ်မၤလိလံာ်စီဆှံဒီးပှၤဂၤ ကိးနံၤဒဲးလီၤ. မ့မ့ၢ် ယမူဒါလၢအသီတခါအံၤဒု လၢတၢ်စံၣ်တဲၤတဲလီၤတၢ်မၤအပူၤ နကအိးထီၣ်ဖး လံာ်စီဆှံ မ့တမ့ၢ် ပၠးပှၤတၢ်ဂီၤမူအဂီၢ်မးန့ၣ် တညီဘၣ်. ဒီပုၢ်ဝဲၢ်လၢ တၢ်လီၢ်ဖဲန့ၣ်တဖၣ်န့ၣ် ဖဲအဝဲသ့ၣ်လဲၤလၢ အတၢ်က့ၤကဒါက့ၤ ဒီးအပှၤမၤလိလံာ်စီဆှံဖိတဖၣ် အအိၣ်အခါ အဝဲသ့ၣ်လဲၤကိးယၤလီၤ. ယထံၣ်ဘၣ် ဒီပုၢ်ဝဲၢ်မုၣ်ခွါတဖၣ် လၢအအိၣ်ဒီး တၢ်သူၣ်ဆူၣ်သးဆူၣ် ဒီးတၢ်သူၣ်ဒူသးဒူတဖၣ်အံၤအဃိ အမၤစၢၤယၤ ဒ်သိးယကအိၣ်ဒီး တၢ်ထံၣ်လၢအဂ့ၤ လၢတၢ်စံၣ်တဲၤတဲလီၤတၢ် လီၢ်ကဝီၤအံၤ အဖီခိၣ်လီၤ. လၢတၢ်လီၢ်အသီအံၤန့ၣ် ယစးထီၣ်တဲတၢ်ဒီးပှၤဂၤ သ့အါထီၣ်လီၤ. တၢ်သ့ၣ်တဖၣ်အံၤ မၤစၢၤယၤဒ်သိး ယကသးခု ကဒီးတဘျီလီၤ.”
ဆဲးမၤတၢ်လၢ အဂ့ၤကတၢၢ်
ဃုကျဲလၢ နကမၤအါထီၣ် တၢ်စံၣ်တဲၤတဲလီၤတၢ်မၤ လၢနတၢ်စံၣ်တဲၤတဲလီၤတၢ် လီၢ်ကဝီၤအပူၤ (ကွၢ်လံာ်အဆၢ ၁၅-၁၆)g
၁၅. နမူဒါလၢအသီန့ၣ် နမၤအီၤ ဂ့ၤဂ့ၤကသ့ဒ်လဲၣ်.
၁၅ နမူဒါလၢအသီန့ၣ် နမၤအီၤဂ့ၤဂ့ၤ သ့ဝဲလီၤ. ပှၤမ့ၢ်ဆီတလဲ နမူဒါန့ၣ် တဘၣ်ဆိကမိၣ်လၢ နတမၤနမူဒါလၢညါတခါ ဂ့ၤဂ့ၤဘၣ် မ့တမ့ၢ် တဘၣ်ဆိကမိၣ်လၢ ခဲအံၤ နလုၢ်နပှ့ၤ တအိၣ်အါအါလၢၤဘၣ်န့ၣ်တဂ့ၤ. ဆိကမိၣ်ထံ တၢ်လၢယဟိဝၤယွၤ မၤစၢၤနၤတဖၣ် ဒီးဆဲးစံၣ်တဲၤတဲလီၤတၢ်တက့ၢ်. ကွၢ်လိမၤဒိး ခရံာ်ဖိလၢ တၢ်မၢဖိအစိၤ လၢအအိၣ်ဒီး တၢ်သးတီတဖၣ်န့ၣ်တက့ၢ်. အဝဲသ့ၣ် မ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤ အဝဲသ့ၣ် “စံၣ်တဲၤတဲလီၤ တၢ်အကလုၢ်အကထါ သကုၤဆးဒးလီၤ.” (မၤတၢ် ၈:၁, ၄) နမ့ၢ်ဆဲးစံၣ်တဲၤတဲလီၤတၢ်န့ၣ် နကဒိးန့ၢ်ဘၣ် တၢ်လဲၤခီဖျိ လၢအဂ့ၤတဖၣ်လီၤ. အဒိ ပှၤလဲၤလၢညါတဖၣ် လၢအဘၣ်တၢ်နီဟးထီၣ်အီၤလၢ ထံကီၢ်လၢအဝဲသ့ၣ် လဲၤစံၣ်တဲၤတဲလီၤတၢ်န့ၣ် လဲၤသုးဝဲဆူ ထံကီၢ်လၢ အဘူးဒီးအီၤတဘ့ၣ် ဒီးထံကီၢ်ဝဲန့ၣ်န့ၣ် ပှၤလိၣ်ဘၣ် ပှၤစံၣ်တဲၤတဲလီၤတၢ်ဖိလၢ အကတိၤအဝဲသ့ၣ်အကျိာ်လီၤ. ဒီးစှၤလါအတီၢ်ပူၤန့ၣ် အဝဲသ့ၣ်ဒုးအိၣ်ထီၣ်ဝဲ ကရူၢ်တဖၣ် ဒီးကရူၢ်တဖၣ်အံၤ ဒိၣ်ထီၣ်ထီထီၣ်ဝဲ ချ့မးလီၤ.
၁၆. နအိၣ်ဒီးတၢ်သးခု လၢနမူဒါအသီအပူၤ ကသ့ဒ်လဲၣ်.
၁၆ “ယွၤအတၢ်သူၣ်ခုသးခုန့ၣ် မ့ၢ်သုဂံၢ်သုဘါလီၤ.” (နဃ့မယၤ ၈:၁၀) ပမ့ၢ်ပာ်လုၢ်ပာ်ပှ့ၤ ပမူဒါထဲလဲၣ်ဂ့ၤထဲလဲၣ်ဂ့ၤ ပတၢ်သးခုန့ၣ် ကဘၣ်ဟဲခီဖျိလၢ ပတၢ်ရ့လိာ်သးဒီး ယဟိဝၤယွၤအဃိ ဒီးတဘၣ်မ့ၢ်လၢ ပမူဒါအဃိဘၣ်. နမ့ၢ်အဲၣ်ဒိး အိၣ်ဒီးတၢ်သးခုန့ၣ် အိၣ်ဘူးဒီးယဟိဝၤယွၤ, ဃ့အတၢ်ဟ့ၣ်ကူၣ်, အတၢ်ဟံးစုနဲၣ်ကျဲ ဒီးအတၢ်မၤစၢၤတဖၣ်န့ၣ်တက့ၢ်. သ့ၣ်နီၣ်ထီၣ်လၢ ဖဲနမၤနမူဒါ လၢအပူၤကွံာ်အခါ မ့ၢ်လၢနမၤစၢၤ ပှၤဂၤလၢ နသးဒီဖျၢၣ်အဃိ နဘၣ်သူၣ်ဘၣ်သး နမူဒါအဝဲန့ၣ်လီၤ. အဃိ ဖဲနဒိးန့ၢ်ဘၣ် မူဒါလၢအသီအခါစ့ၢ်ကီး နမ့ၢ်မၤအီၤလၢ နသးဒီဖျၢၣ်န့ၣ် ယဟိဝၤယွၤ ကမၤစၢၤနၤ ဒ်သိးနကဘၣ်သူၣ်ဘၣ်သး နမူဒါအံၤအဂီၢ်လီၤ.—စံၣ်တဲၤတဲလီၤတၢ် ၇:၁၀.
၁၇. ဖဲပမၤပမူဒါအခါ ပကဘၣ်သ့ၣ်နီၣ်ထီၣ် တၢ်မနုၤလဲၣ်.
၁၇ ပကဘၣ်သ့ၣ်နီၣ်ထီၣ်လၢ ပကဘၣ်မၤ ကစၢ်ယွၤအတၢ်မၤ လီၤထူလီၤယိာ်, ဘၣ်ဆၣ် မ့မ့ၢ်မူဒါခဲအံၤန့ၣ် ကအိၣ်ဒၣ် တစိၢ်တလီၢ်လီၤ. ဘၣ်သ့ၣ်သ့ၣ် လၢဟီၣ်ခိၣ်သီန့ၣ် ပမူဒါ ကဆီတလဲဝဲလီၤ. အလံ(ခ်)စံၤ တဲဝဲလၢ တၢ်ဆီတလဲလၢ အထံၣ်ဘၣ်ဝဲခဲအံၤန့ၣ် မၤစၢၤအီၤဒ်သိး အကအိၣ်ကတဲာ်ကတီၤအသးလၢ တၢ်ဆီတလဲလၢ အကထံၣ်ဘၣ်ဝဲလၢ ခါဆူညါအဂီၢ်လီၤ. အဝဲတဲဝဲလၢ “ထီဘိန့ၣ် ယသ့ၣ်ညါလၢ ယဟိဝၤယွၤ ဒီးဟီၣ်ခိၣ်သီန့ၣ် မ့ၢ်တၢ်နီၢ်ကီၢ်, ဘၣ်ဆၣ် ယတူၢ်ဘၣ်လၢ တၢ်သ့ၣ်တဖၣ်အံၤန့ၣ် အိၣ်ယံၤဒီးယၤ. ခဲအံၤဒု ယတူၢ်ဘၣ်လၢ ယအိၣ်ဘူးဒီးယဟိဝၤယွၤ ဒီးဟီၣ်ခိၣ်သီစ့ၢ်ကီး ဟဲကတုၤလီၤ.” (မၤတၢ် ၂:၂၅) ပမ့ၢ်န့ၢ်ဘၣ်မူဒါ ဒ်လဲၣ်ဂ့ၤဒ်လဲၣ်ဂ့ၤ မ်ပကဆဲးအိၣ်ဘူးဒီး ယဟိဝၤယွၤတက့ၢ်. ပမ့ၢ်မၤဘၣ် ကစၢ်ယွၤအတၢ်မၤ လၢတၢ်လီၢ်ဖဲလဲၣ်ဂ့ၤဖဲလဲၣ်ဂ့ၤ တသ့ဖဲအသ့ ပမ့ၢ်မၤအီၤ လၢအဂ့ၤကတၢၢ်န့ၣ် အဝဲကမၤစၢၤပှၤ ဒ်သိးပကအိၣ်ဒီး တၢ်သးခုအဂီၢ် ဒီးအတပာ်တ့ၢ်ပှၤ နီတဘျီဘၣ်.—ယၡါယၤ ၄၁:၁၃.
တၢ်သးဝံၣ် ၉၀ ဟ့ၣ်ဂံၢ်ဟ့ၣ်ဘါလိာ်သး
a တဘျီတခီၣ် ဒီပုၢ်ဝဲၢ်မုၣ်ခွါတဖၣ် ဘၣ်ပာ်တ့ၢ်ကွံာ် ကစၢ်ယွၤအတၢ်မၤလၢ ဆၢကတီၢ်လၢပှဲၤ မ့တမ့ၢ် အဝဲသ့ၣ် ဒိးန့ၢ်ဘၣ် မူဒါလၢအသီလီၤ. တၢ်မၤလိတခါအံၤ ကပာ်ဖျါထီၣ်ဝဲ ဘၣ်ဃးဒီး အဝဲသ့ၣ် ထံၣ်ဘၣ်ဒီး တၢ်ကီတၢ်ခဲမနုၤတဖၣ်လဲၣ် ဒီးဒ်သိးကညီလၢ အဝဲသ့ၣ် ကဆီတလဲအသးဒ် အတၢ်အိၣ်သးအိၣ်ဝဲအသိးအဂီၢ် တၢ်မနုၤကမၤစၢၤ အဝဲသ့ၣ်လဲၣ် ဒီးပှၤအဂၤလၢ တၢ်အိၣ်ဖှိၣ်အပူၤတဖၣ် ဟ့ၣ်ဂံၢ်အဟ့ၣ်ဘါအဝဲသ့ၣ် ကသ့ဒ်လဲၣ်န့ၣ်လီၤ. တကးဒံးဘၣ် ကပာ်ဖျါထီၣ်ဝဲ လံာ်စီဆှံ အတၢ်ဟံးစုနဲၣ်ကျဲလၢ ကမၤစၢၤပှၤ ဖဲပထံၣ်ဘၣ် တၢ်ဆီတလဲတဖၣ်အခါန့ၣ်လီၤ.
b ပဒီပုၢ်ဝဲၢ်ခွါလၢ အအိၣ်ဒီးမူဒါအါဂၤန့ၣ် ခီဖျိလၢ အသးပှၢ်ထီၣ်အဃိ အဝဲသ့ၣ် ဘၣ်ဟ့ၣ်လီၤက့ၤ အမူဒါလၢ ဒီပုၢ်ဝဲၢ်ခွါ လၢအသးစၢ်တဖၣ် အအိၣ်လီၤ. ကွၢ် “Older Christians—Jehovah Treasures Your Loyalty,” လၢ The Watchtower of September 2018 ဒီး “ပတၢ်အိၣ်သးဆီတလဲသနာ်က့ ပပာ်ပသးမုာ်မုာ်ခုၣ်ခုၣ်ကသ့ဒ်လဲၣ်” လၢ ၂၀၁၈, လါအီးကထိဘၢၣ်, တၢးထီခိးတၢ် အပူၤတက့ၢ်.
c ဒီပုၢ်ဝဲၢ်တဂၤအံၤ အတၢ်အိၣ်ဖှိၣ်သးပှၢ်တဖၣ် ကြၢးကွဲးလံာ်ဆူ တၢ်အိၣ်ဖှိၣ်တဖျၢၣ်လၢ ဒီပုၢ်ဝဲၢ်တဂၤအံၤ ဘၣ်လဲၤဝဲအအိၣ် လၢအဆိအချ့ ဒ်သိးဒီပုၢ်ဝဲတဂၤအံၤ ဆဲးမၤဝဲ ပှၤလဲၤလၢညါ, တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ် လၢအဆိအချ့ ကန့ၢ်အဂီၢ်လီၤ.
e တၢ်တဲဖျါထီၣ်တၢ်ဂီၤ အခီပညီ– ပှၤဒီမါဝၤခံဂၤ ဘၣ်ပာ်တ့ၢ်ကွံာ် အမံးၡ့ၣ်နရ့ၣ်အမူဒါ လၢထံဂၤကီၢ်ဂၤ ဒီးဖဲအဝဲသ့ၣ် ကဟးဖးဒီးတၢ်အိၣ်ဖှိၣ်အခါ အဝဲသ့ၣ် အမဲာ်ထံမဲာ်နိလီၤဝဲလီၤ.
f တၢ်တဲဖျါထီၣ်တၢ်ဂီၤ အခီပညီ– ဖဲအဝဲသ့ၣ် ဟဲက့ၤလၢ အထံအကီၢ်အခါ ဒ်သိးအဝဲသ့ၣ် လဲၤခီဖျိ အတၢ်ကီတၢ်ခဲတဖၣ် ကန့ၢ်အဂီၢ် အဝဲသ့ၣ် ဃ့တၢ်မၤစၢၤလၢ ယဟိဝၤယွၤအအိၣ် ဆူၣ်ဆူၣ်လီၤ.
g တၢ်တဲဖျါထီၣ်တၢ်ဂီၤ အခီပညီ– ခီဖျိလၢ ယဟိဝၤယွၤ အတၢ်မၤစၢၤအဃိ ပှၤဒီမါဝၤခံဂၤအံၤ မၤကဒါက့ၤ ကစၢ်ယွၤအတၢ်မၤ လၢဆၢကတီၢ်လၢပှဲၤလီၤ. အဝဲသ့ၣ် သူဝဲကျိာ်လၢ အမၤလိဘၣ်ဝဲ ဖဲအကဲ မံးၡ့ၣ်နရ့ၣ်အဆၢကတီၢ် ဒီးစံၣ်တဲၤတဲလီၤ တၢ်သးခုကစီၣ်ဆူ ပှၤထံဂၤကီၢ်ဂၤဖိလၢ အဟဲသုးလီၢ်သုးကျဲလၢ အဝဲသ့ၣ်အလီၢ်ကဝီၤ.