ပထုးန့ၢ်ပှၤလၢ ပသိၣ်လိအီၤတဂၤအသးကသ့ဒ်လဲၣ်

၁. ဖဲယ့ၣ်ၡူးသိၣ်လိဝဲ ပှၤဒိကနၣ်တၢ်ဖိတဖၣ်အခါ အဝဲသ့ၣ်အသး မၤအသးဒ်လဲၣ်.

^၁ ယ့ၣ်ၡူးထုးန့ၢ် ပှၤဒိကနၣ်တၢ်ဖိအသးလီၤ. ဘၣ်တဘျီ, ဖဲယ့ၣ်ၡူးတဲနၢ်ပၢၢ်ဝဲ အပျဲၢ်အဘီၣ် ဘၣ်ဃးဒီး လံာ်စီဆှံအဆၢတဖၣ်အခါ အပျဲၢ်အဘီၣ်အသး “ဂဲၤဆူၣ်ထီၣ်” န့ၣ်လီၤ. (လူၤကၣ် ၂၄:၃၂) တၢ်ဒိကနၣ်ကစၢ်ယွၤ အကလုၢ်န့ၣ် ကဘၣ်မ့ၢ်တၢ်လၢအဟဲထီၣ်လၢ ပသးပူၤနီၢ်နီၢ်န့ၣ်လီၤ. ဒ်သိး ပှၤလၢပသိၣ်လိအီၤလံာ်စီဆှံတဖၣ် အသးကအိၣ်ဆီတလဲ အတၢ်အိၣ်မူအဂီၢ် ပထိၣ်ဟူးထိၣ်ဂဲၤထီၣ်အဝဲသ့ၣ်အသးကသ့ဒ်လဲၣ်.—ရိ. ၆:၁၇.

၂. တၢ်ကူၣ်သ့ ဒီးတၢ်သ့ၣ်ညါနၢ်ပၢၢ်ပှၤဂၤ အတၢ်အိၣ်သးန့ၣ် မၤစၢၤပှၤလၢ ပကထုးန့ၢ်ပှၤဂၤအသးဒ်လဲၣ်.

^၂ အိၣ်ဒီးတၢ်ကူၣ်သ့ ဒီးသ့ၣ်ညါနၢ်ပၢၢ်ပှၤဂၤ အတၢ်အိၣ်သးတက့ၢ်– ပှၤအါဂၤန့ၣ် ပမ့ၢ်တဲအီၤထဲ တၢ်ဂ့ၢ်လၢအဘၣ် ဒီးတၢ်ဂ့ၢ်လၢအကမၣ်န့ၣ် တထိၣ်ဂဲၤထီၣ်အီၤ လၢကမၤထွဲဝဲအဂီၢ်ဘၣ်. တကးဒံးဘၣ် ပမ့ၢ်သူလံာ်စီဆှံအဆၢတဖၣ်လၢ ကထီဒါအဝဲသ့ၣ်အတၢ်စူၢ်တၢ်နာ်န့ၣ် တမ့ၢ်လၢအဝဲသ့ၣ်ကတူၢ်လိာ်ပှၤလၢၤဘၣ်. ဒ်သိးပကထိၣ်ဟူးထိၣ်ဂဲၤထီၣ် ပှၤတဂၤအသးအဂီၢ် အဆိကတၢၢ် ပကဘၣ်ဃုသ့ၣ်ညါနၢ်ပၢၢ်လၢ ဘၣ်မနုၤအဃိ အဝဲနာ်ဝဲဒ်အံၤလဲၣ် ဒီးမၤဝဲဒ်အံၤန့ၣ်လဲၣ်. အိၣ်ဒီးတၢ်ကူၣ်သ့, ဒီးသူတၢ်သံကွၢ်တဖၣ် ဒ်သိးအဝဲကပာ်ဖျါထီၣ် တၢ်အိၣ်လၢအသးပူၤနီၢ်နီၢ်န့ၣ်တက့ၢ်. (ကတိၤ. ၂၀:၅) ပမ့ၢ်မၤဒ်အံၤမး လၢခံ ပဃုထၢတၢ်ဂ့ၢ်တၢ်ကျိၤလၢ လံာ်စီဆှံပူၤလၢ အကထုးန့ၢ်အဝဲသ့ၣ်အသး ကသ့ဝဲလီၤ. တကးဒံးဘၣ် ပကဘၣ်ပာ်ဖျါထီၣ် ပတၢ်သးအိၣ်အီၤ ဒီးတၢ်ဝံသးစူၤစ့ၢ်ကီးလီၤ. (ကတိၤ. ၂၅:၁၅) သ့ၣ်နီၣ်ထီၣ်လၢ ပှၤတဂၤစုာ်စုာ် အတၢ်ဒိၣ်ထီၣ်ထီထီၣ်လၢ နီၢ်သးတခီန့ၣ်လီၤဆီလိာ်အသးတက့ၢ်. လၢတၢ်န့ၣ်အဃိ ဟ့ၣ်တၢ်ဆၢကတီၢ်လၢ ယဟိဝၤယွၤအသးစီဆှံ ကလုၢ်ဘၢအဝဲသ့ၣ်အတၢ်ဆိကမိၣ် ဒီးအလုၢ်လၢ်သကဲာ်ပဝးတက့ၢ်.—မၢ်ကူး ၄:၂၆-၂၉.

၃. ဒ်သိး ပှၤလၢပသိၣ်လိအီၤတဂၤ ကမၤဒိၣ်ထီၣ်အတၢ်ဂ့ၤတၢ်ဝါတဖၣ်အဂီၢ် ပမၤစၢၤအီၤကသ့ဒ်လဲၣ်.

^၃ မၤစၢၤအဝဲသ့ၣ်လၢ ကမၤဒိၣ်ထီၣ်တၢ်ဂ့ၤတၢ်ဝါတဖၣ်တက့ၢ်– လံာ်စီဆှံအဆၢလၢ အပာ်ဖျါထီၣ်ဝဲ ယဟိဝၤယွၤ အတၢ်ဂ့ၤတၢ်ဝါတဖၣ် ဒီးအတၢ်အဲၣ်တၢ်ကွံန့ၣ် မၤစၢၤပှၤလၢပသိၣ်လိအီၤတဖၣ် ဒ်သိးအဝဲသ့ၣ် ကမၤဒိၣ်ထီၣ်တၢ်ဂ့ၤတၢ်ဝါတဖၣ်သ့ဝဲလီၤ. အဃိပသူလံာ်စီဆှံအဆၢ ဒ်သိးဒီးစံးထီၣ်ပတြၢၤ ၁၃၉:၁-၄ မ့တမ့ၢ် လူၤကၣ် ၁၂:၆-၇ လၢအပာ်ဖျါထီၣ်ဝဲ ကစၢ်ယွၤအသးအိၣ် ပှၤတဂၤစုာ်စုာ်အဂ့ၢ်သ့န့ၣ်လီၤ. ဖဲပှၤတဂၤစုာ်စုာ် မ့ၢ်နၢ်ပၢၢ်အါထီၣ် ယဟိဝၤယွၤအတၢ်သးကညီၤန့ၣ် အဝဲသ့ၣ်အတၢ်အဲၣ်ယွၤ ဒီးအတၢ်ယူးယီၣ်ယွၤစ့ၢ်ကီး ကအါထီၣ်ဝဲလီၤ. (ရိ. ၅:၆-၈; ၁ ယိၤ. ၄:၁၉) တကးဒံးဘၣ် ဖဲအဝဲသ့ၣ် သ့ၣ်ညါဘၣ်ဝဲလၢ အသကဲာ်ပဝးန့ၣ် မ့ၢ်တၢ်လၢ အတဘၣ်ယဟိဝၤယွၤအသးအဆၢကတီၢ် ကထိၣ်ဟူးထိၣ်ဂဲၤထီၣ်အဝဲသ့ၣ်လၢ ကဆီတလဲအတၢ်အိၣ်မူ ဒ်သိးကမၤတၢ်လၢအဘၣ်ယွၤအသး ဒီးကမၤလၤကပီၤယွၤအဂီၢ်န့ၣ်လီၤ.—စံး. ၇၈:၄၀, ၄၁; ကတိၤ. ၂၃:၁၅.

၄. ဖဲပသိၣ်လိပှၤတဂၤစုာ်စုာ်လၢ ပတၢ်သးခုကစီၣ်တၢ်မၤအပူၤအခါ ပပာ်ဖျါထီၣ်တၢ်ယူးယီၣ်ပာ်ကဲ ပှၤဂၤအတၢ်ဃုထၢကသ့ဒ်လဲၣ်.

^၄ ယဟိဝၤယွၤ တမၢဆူၣ်ပှၤလၢ ပကဒိကနၣ်အတၢ်မၤလိာ်အဂီၢ်ဘၣ်. ဘၣ်ဆၣ် အဝဲပာ်ဖျါထီၣ်ဝဲ အတၢ်ဟံးစုနဲၣ်ကျဲလၢ အပှဲၤဒီးတၢ်ကူၣ်သ့လၢ ပှၤတဂၤစုာ်စုာ်ကလူၤပိာ်ထွဲဝဲအဂီၢ်လီၤ. (ၡါ. ၄၈:၁၇, ၁၈) ဖဲပသိၣ်ပှၤတဂၤဂၤအခါ ပမ့ၢ်အဲၣ်ဒိးကွၢ်လိမၤဒိးယဟိဝၤယွၤန့ၣ် ပကမၤစၢၤအဝဲသ့ၣ်လၢ ကဆၢတဲာ်တၢ်လၢအနီၢ်ကစၢ်ဒၣ်ဝဲန့ၣ်လီၤ. ပှၤတဂၤစုာ်စုာ် အသးမ့ၢ်အိၣ်နီၢ်နီၢ်လၢ ကဆီတလဲအတၢ်အိၣ်မူန့ၣ် ကကဲဘျုးဒ်သိးအဝဲသ့ၣ်ကအိၣ်လၢယွၤအတၢ်အဲၣ် ထီဘိန့ၣ်လီၤ. (ရိ. ၁၂:၁) ဒီးကမၤစၢၤစ့ၢ်ကီး အဝဲသ့ၣ်လၢကဘူးထီၣ်ဒီး ကစၢ်လၢအ “မၤကွၢ်ပှၤအသး” လၢအမ့ၢ် ယဟိဝၤယွၤန့ၣ်လီၤ.—ကတိၤ. ၁၇:၃.