အိၣ်မူဒ် ခရံာ်ဖိအသိး
“ကွံာ်တ့ၢ်ကွံာ် ပှၤတခီဘီမုၢ်ဖိအကစၢ်တဖၣ်”
တၢ်မၤလိာ်လၢ အိၣ်ဒီးကစၢ်အဂုၤအဂၤတဖၣ်လၢ ယမဲာ်ညါတဂ့ၤ တချုးအိၣ်ထီၣ်ဒံးဘၣ်န့ၣ် စီၤယၤကိာ်သ့ၣ်ညါဝဲလၢ ကဘၣ်ဘူၣ်ထီၣ်ဘါထီၣ်ထဲဒၣ် ယဟိဝၤယွၤတဂၤဧိၤလီၤ. (၂ မိၤ. ၂၀:၃-၅) အဃိ ဖဲယဟိဝၤယွၤ တဲအီၤလၢကဘၣ်လဲၤအိၣ်လၢ ဘ့ၤသ့လး ဝံၤအလီၢ်ခံ အဝဲမၢပှၤကိးဂၤဒဲးစူးကွံာ် တၢ်ဂီၤတၢ်ဖှီၣ်တဖၣ်လီၤ. စီၤယၤကိာ်န့ၣ် တၢၢ်ကွံာ်ဝဲ တၢ်ဂီၤတၢ်ဖှီၣ် ဃုာ်ဒီးနၢ်ဒံးလၢ အလီၤဂာ်ဒီးလုၣ်အူ လၢအိၣ်လၢပှၤအနၢ်လိၤတဖၣ်န့ၣ်လီၤ. (၁ မိၤ. ၃၅:၁-၄) ပနာ်သ့သပှၢ်တၢၢ်လၢ ယဟိဝၤယွၤ ဘၣ်သူၣ်ဘၣ်သးဝဲ တၢ်လၢစီၤယၤကိာ်မၤဝဲတဖၣ်လီၤ.
ဆၢကတီၢ်ခဲအံၤစ့ၢ်ကီး ပဘူၣ်ထီၣ်ဘါထီၣ်ထဲ ယဟိဝၤယွၤတဂၤဧိၤကသ့ဒ်လဲၣ်. တၢ်လၢအရ့ဒိၣ်ကတၢၢ်န့ၣ် ပကဘၣ်ဟးဆှဲး ကယဲၢ်တၢ်လၢ အဘၣ်ထွဲလိာ်အသးဒီး တၢ်ဂီၤတၢ်ဖှီၣ် ဒီးတၢ်ဝံတၢ်နါတဖၣ်လီၤ. တၢ်န့ၣ်ကပၣ်ဃုာ်ဒီး ပကဘၣ်မၤဟးဂီၤကွံာ် တၢ်လၢအဘၣ်ထွဲဒီး တၢ်ဝံတၢ်နါ အတၢ်ဖံးတၢ်မၤတဖၣ် ဒီးပကဘၣ်ပလီၢ်ပသး ဖဲပမၤတၢ်မၤမုာ်မၤဖှံသးအခါစ့ၢ်ကီးလီၤ. အဒိ သံကွၢ်လီၤနသးလၢ ‘ဖဲယမၤတၢ်မၤမုာ်မၤဖှံသးအခါ ယကွၢ်တၢ်ဂီၤမူ မ့တမ့ၢ် ယဖးလံာ်လၢ အပာ်ဖျါထီၣ်ဝဲ တၢ်နါလၢဟးဆူးအီၣ်ပှၤသွံၣ်, တဲပြဲၢ် မ့တမ့ၢ် တၢ်ဝံတၢ်နါ အတၢ်ဖံးတၢ်မၤတဖၣ်န့ၣ်ဧါ. ယတၢ်မၤမုာ်မၤဖှံသးအကျါန့ၣ် ပၣ်ဃုာ်ဒီး တၢ်မၤကဒါမဲာ် ဒီးတၢ်အူတၢ်သမူလၢ အဖျါလၢအတမၤဘၣ်ဒိ ပှၤတဖၣ်ဧါ.’ ပကြၢးအိၣ်ယံၤဒီး ကယဲၢ်တၢ်လၢ ယဟိဝၤယွၤသးဟ့ဝဲကိးမံၤဒဲးလီၤ.—စံး. ၉၇:၁၀.
ကွၢ်တၢ်ဂီၤမူလၢ အခိၣ်တီမ့ၢ်ဝဲ “ထီဒါမုၣ်ကီၤလံၢ်တက့ၢ်” ဒီးစံးဆၢတၢ်သံကွၢ်လၢ လာ်တဖၣ်အံၤ–
ပှၤမၤလိလံာ်စီဆှံဖိလၢ အမံၤမ့ၢ်ဖလံစၤန့ၣ် အိၣ်ဒီးတၢ်ကီတၢ်ခဲမနုၤလဲၣ်.
ဖဲနၤ မ့တမ့ၢ် ပှၤတဂၤဂၤ မ့ၢ်အိၣ်ဒီး တၢ်ကီတၢ်ခဲလၢ ဘၣ်ဃးဒီးတၢ်ဝံတၢ်နါ အတၢ်ဖံးတၢ် မၤအခါ နမ့ၢ်ဃ့တၢ်မၤစၢၤလၢ တၢ်အိၣ်ဖှိၣ်သးပှၢ်အအိၣ်န့ၣ် ဘၣ်မနုၤအဃိ မ့ၢ်နအိၣ်ဒီးတၢ် ကူၣ်သ့လဲၣ်.
ပာ်သုသးလၢယွၤအဖီလာ်တက့ၢ်. ထီဒါမုၣ်ကီၤလံၢ်တက့ၢ်.—ယၤ. ၄:၇, ၈
ပမ့ၢ်အဲၣ်ဒိးလၢ ယဟိဝၤယွၤ ကဒီသဒၢပှၤန့ၣ် ပကဘၣ်မၤဂီၤကွံာ် တၢ်မနုၤတဖၣ်လဲၣ်.
ဖလံစၤ မၤဝဲတဲာ်တဲာ်ဖျုဖျုဒ်လဲၣ်.
လၢနလီၢ်ကဝီၤအပူၤန့ၣ် နဟးဆှဲး တၢ်ဝံတၢ်နါအတၢ်ဖံးတၢ်မၤတဖၣ် ကသ့ဒ်လဲၣ်.