“ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ” တၢ်ဂ့ၢ်ဘျးစဲ

ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ

လါယနူၤအါရံၤ ၁-၇

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ယိၤဘး ၃၂-၃၃

မၤမုာ်ထီၣ် ပှၤလၢအသူၣ်ကိၢ်သးဂီၤ

it-1 ၇၁၀

စီၤအလံဟူၤ

စီၤအလံဟူၤန့ၣ် အတကွၢ်ဒိၣ်ဆံးအါစှၤတၢ်ဘၣ် ဒီးအတမၤအိၣ်မဲာ်လၢပှၤအိၣ်နီတဂၤဘၣ်. အဝဲသ့ၣ်ညါဝဲလၢ သ့တၢ်လၢာ်ကစၢ် တ့အီၤလၢဟီၣ်ခိၣ် ဒ်စီၤယိၤဘးအသိး. ဒီးစီၤအလံဟူၤန့ၣ် အတတဲပျံၤတဲဖုး စီၤယိၤဘးဘၣ်. အဝဲတဲတၢ်ဒီး စီၤယိၤဘးဒ်အသကိးနီၢ်ကီၢ်တဂၤအသိး ဒီးဖဲစီၤအလံဟူၤ တဲတၢ်ဒီး စီၤယိၤဘးအခါ အကိးဝဲစီၤယိၤဘးအမံၤ. မ့မ့ၢ် စီၤအလံဖးစး, စီၤဘံးလဒး စီၤစိဖၢ်န့ၣ် တမၤဝဲဒ်န့ၣ်ဘၣ်.—ဘး ၃၂:၂၁, ၂၂; ၃၃:၁, ၆.

တၢး၁၄ ၆/၁၅ ၂၅ ¶၈-၁၀

နထံၣ် ပှၤဟီၣ်ခိၣ်ဖိတဖၣ် အတၢ်ဂံၢ်စၢ်ဘါစၢ် ဒ်ယဟိဝၤယွၤထံၣ်ဝဲအသိးဧါ

^၈ ပမ့ၢ်သ့ၣ်နီၣ်ထီၣ်လၢ ပဒီပုၢ်ဝဲၢ်မုၣ်ခွါတနီၤန့ၣ် အတၢ်အိၣ်ဆူၣ်အိၣ်ချ့တဂ့ၤဘၣ်, အဝဲသ့ၣ် အဟံၣ်ဖိဃီဖိလီၤမုၢ်လီၤဖး မ့တမ့ၢ် အိၣ်ဒီးတၢ်သးလီၤစၢ်တၢ်ဆါန့ၣ် ပနၢ်ပၢၢ်စၢၤအဝဲသ့ၣ် ကသ့ဒိၣ်ထီၣ်. ဒီးပဝဲစ့ၢ်ကီး ပထံၣ်ဘၣ်ဒီး တၢ်အိၣ်သးဒ်န့ၣ်သ့. ပှၤအံၣ်စရ့လးဖိလၢ အဘၣ်အိၣ်ဖှီၣ်အိၣ်ယာ်လၢ ကီၢ်အဲၤကူပတူးအပူၤတဖၣ်န့ၣ် တချုးလၢ အဝဲသ့ၣ် လဲၤနုာ်လီၤလၢ ကီၢ်တၢ်စံးပာ်ဒံးဘၣ်အခါ ယဟိဝၤယွၤ ဟ့ၣ်ပလီၢ်အဝဲသ့ၣ်လၢ အဝဲသ့ၣ်တဘၣ် ‘မၤကိၤအသး’ လၢအဒီပုၢ်ဝဲၢ်လၢ အဘၣ်ကီဘၣ်ခဲတဖၣ်အဖီခိၣ်ဘၣ်. ယဟိဝၤယွၤမုၢ်လၢ်ဝဲလၢ အဝဲသ့ၣ်ကသးအိၣ်မၤစၢၤ ပှၤဖှီၣ်ဖိယာ်ဖိတဖၣ်.—၅ မိၤ ၁၅:၇, ၁၁; ၃ မိၤ ၂၅:၃၅-၃၈.

^၉ ဖဲပဒီပုၢ်ဝဲၢ်တဖၣ် ထံၣ်ဘၣ်ဒီးတၢ်အိၣ်သးလၢ အကီအခဲအခါ ပတကြၢး စံၣ်ညီၣ်အဝဲသ့ၣ် မ့တမ့ၢ် ထံၣ်အဝဲသ့ၣ်လၢ အတဂ့ၤတကပၤဘၣ်. ပကြၢး ဟ့ၣ်ဂံၢ်ဟ့ၣ်ဘါအဝဲသ့ၣ်လၢ နီၢ်သးတခီ. (ဘး ၃၃:၆, ၇; မး ၇:၁) အဒိ ဖဲပှၤတဂၤ အစဲးကဲး ဘၣ်တဲး ဒီးပှၤဟဲဆှၢအီၤလၢ တၢ်ဆါဟံၣ်အခါ မ့ၢ်ကသံၣ်သရၣ်တဖၣ် ကဂုာ်ကျဲးစၢး သံကွၢ်သံဒိးဝဲလၢ အကဲမတဂၤအတၢ်ကမၣ်လဲၣ်န့ၣ်ဧါ. တမ့ၢ်လၢ အကမၤဝဲဒ်န့ၣ်ဘၣ်, ကသံၣ်သရၣ်တဖၣ် ကကူစါယါဘျါအီၤ တဘျီဃီ. ဒ်န့ၣ်အသိး ဖဲပဒီပုၢ်ဝဲၢ်တဖၣ် အသးလီၤစၢ် ခီဖျိလၢ အတၢ်ကီတၢ်ခဲအဃိအခါ ပကြၢးမၤစၢၤအဝဲသ့ၣ်လၢ နီၢ်သးတခီ.—ဖး ၁ သ့းစၤလနံ ၅:၁၄.

^၁၀ ပဒီပုၢ်ဝဲၢ်တနီၤ မ့ၢ်ဖျါလၢ အနီၢ်သးလီၤစၢ်သနာ်က့ ပမ့ၢ်ဆိကမိၣ်ထံ အဝဲသ့ၣ်အတၢ်အိၣ်သးန့ၣ် ကမၤစၢၤပှၤဒ်သိး ပကထံၣ်အဝဲသ့ၣ်လၢ အဂ့ၤတကပၤ. အဒိ ပကဆိကမိၣ်ကွၢ် ဒီပုၢ်ဝဲၢ်မုၣ်တဖၣ်လၢအထံၣ်ဘၣ်ဒီး အဟံၣ်ဖိဃီဖိ အတၢ်ထီဒုၣ်ထီဒါလၢ အနံၣ်အါမးအတီၢ်ပူၤ. အဝဲသ့ၣ်တနီၤန့ၣ် ကဖျါလၢ အသးအဂံၢ်ဘါလီၤစၢ်သနာ်က့ နီၢ်ကီၢ်န့ၣ် အဝဲသ့ၣ် အိၣ်ဒီးတၢ်နာ်လၢအဂၢၢ်ကျၢၤ ဒီးအသးဆူၣ်ဒိၣ်မး. ဒီးတနီၤန့ၣ် အကဲဝဲမိလၢ အဘၣ်ကွၢ်လုၢ်ဒိၣ်ထီၣ်ဖိထဲ အနီၢ်ကစၢ်တဂၤ သနာ်က့ အဝဲသ့ၣ်ဟဲထီၣ်တၢ်အိၣ်ဖှိၣ်ထီဘိ အဃိ အဝဲသ့ၣ်ပာ်ဖျါထီၣ်ဝဲ တၢ်နာ်လၢအဂၢၢ်ကျၢၤ. ဒီးပမ့ၢ်ဆိကမိၣ်ကွၢ်ပှၤသးစၢ်တနီၤန့ၣ် အထံၣ်ဘၣ်ဒီး တၢ်ဆီၣ်သနံးအါမးသနာ်က့ အဝဲသ့ၣ်ဆၢထၢၣ်ဂၢၢ်ကျၢၤလၢ တၢ်မ့ၢ်တၢ်တီတကပၤ. အဃိ ပဒီပုၢ်ဝဲၢ်တဖၣ်န့ၣ် မ့ၢ်ဖျါလၢ အဂံၢ်စၢ်ဘါစၢ်သနာ်က့ ပမ့ၢ်ဆိကမိၣ်ထံအဝဲသ့ၣ် အတၢ်အိၣ်သးန့ၣ် ကမၤစၢၤပှၤဒ်သိး ပကထံၣ်အဝဲသ့ၣ် ဒ်ပှၤလၢအ ‘ထူးတီၤလၢ တၢ်နာ်’ အသိး.—ယၤ ၂:၅.

တၢး၂၀.၀၃ ၂၃ ¶၁၇-၁၈

ပကြၢးတဲတၢ် လၢဆၢကတီၢ်ဖဲလဲၣ်

^၁၇ ပှၤပိာ်ခွါ လွံၢ်ဂၤတဂၤ လၢအလဲၤအိၣ်သကိးဝဲ စီၤယိၤဘးန့ၣ် မ့ၢ်ဝဲစီၤအလံဟူၤလီၤ. စီၤအလံဟူၤန့ၣ် ဒီဘူးဒီတံၢ်ဒီး စီၤအၤဘြၤဟၣ်လီၤ. လၢတၢ်အဲၣ်တၢ်ကွံအပူၤ စီၤအလံဟူၤဟ့ၣ်ကူၣ် စီၤယိၤဘးလိၤလိၤ ဒီးအတၢ်ဟ့ၣ်ကူၣ်န့ၣ် ကဲထီၣ်တၢ်မၤစၢၤလၢ စီၤယိၤဘး ကဘှီဘၣ်ထီၣ် အတၢ်ဆိကမိၣ်အဃိ ဖျါလၢဖဲစီၤယိၤဘး ဒီးပှၤပိာ်ခွါသၢဂၤ တဲသကိးတၢ်အခါ စီၤအလံဟူၤ ဒိကနၣ်ဝဲဂ့ၤဂ့ၤလီၤ. (ယိၤဘး ၃၃:၁, ၆, ၁၇) စီၤအလံဟူၤ အဲၣ်ဒိးမၤလၤကပီၤ ယဟိဝၤယွၤအဃိ အဝဲတပတြၢၤလီၤအသး မ့တမ့ၢ် ပှၤတဂၤဂၤဘၣ်. (ယိၤဘး ၃၂:၂၁, ၂၂; ၃၇:၂၃, ၂၄) ပမ့ၢ်ကွၢ် စီၤအလံဟူၤ အဒိအတဲာ်န့ၣ် ပသ့ၣ်ညါဘၣ်လၢ တဘျီတခီၣ် ပကဘၣ်အိၣ်ဘှီၣ် ဒီးဒိကနၣ်တၢ်လီၤ. (ယၤကိာ် ၁:၁၉) ဒီးပမၤလိန့ၢ်ဘၣ်တၢ်လၢ ဖဲပဟ့ၣ်ကူၣ်ပှၤဂၤအခါ တၢ်လၢပကြၢးသးစၢၢ်ဆၢအီၤ အဒိၣ်ကတၢၢ်န့ၣ် ကဘၣ်မ့ၢ်ဝဲ ပကမၤလၤကပီၤ ယဟိဝၤယွၤ ဒီးတမ့ၢ်ပနီၢ်ကစၢ်ဘၣ်.

^၁၈ ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်သ့တၢ်ဘၣ်လၢ ပကတဲတၢ်အဂီၢ် ခီဖျိပမၤထွဲ လံာ်စီဆှံ အတၢ်ဟ့ၣ်ကူၣ်လၢ ဘၣ်ဃးဒီး ပကြၢးတဲတၢ်လၢ ဆၢကတီၢ်ဖဲလဲၣ် ဒီးပကြၢးတဲအီၤ ဒ်လဲၣ်န့ၣ်လီၤ. စီၤပၤၡလိၤမိၤလၢ အမ့ၢ်ပှၤလၢ အကူၣ်တၢ်သ့တဂၤန့ၣ် တဲဝဲလၢ “တၢ်ကတိၤလၢ ပှၤကတိၤလၢ အကတီၢ်ဒၣ်ဝဲန့ၣ် မၤသးဒ် သၣ်သွံထူ [မ့တမ့ၢ် ဖီသၣ်ထူ] အိၣ်ဝဲလၢ တၢ်ဂီၤစ့အပူၤအသိးန့ၣ်လီၤ.” (ကတိၤဒိ ၂၅:၁၁) ဖဲပှၤဂၤတဲတၢ်အခါ ပမ့ၢ်ဒိကနၣ်န့ၢ်အီၤ လီၤတံၢ်လီၤဆဲး ဒီးတချုးလၢပတဲတၢ်အခါ ပမ့ၢ်ဆိကမိၣ်ထံအီၤန့ၣ် ပတၢ်ကတိၤတဖၣ် ကလီၤဂာ်ဒ်ဖီသၣ်ထူအသိး ဒီးပတၢ်ကတိၤတဖၣ်န့ၣ် ကအိၣ်ဒီးအလုၢ်အပှ့ၤ ဒီးကမၤမုာ်ပှၤသးလီၤ. ဖဲန့ၣ်န့ၣ် ပတဲတၢ် မ့ၢ်အါမ့ၢ်ဂ့ၤ စှၤမ့ၢ်ဂ့ၤ ပတၢ်ကတိၤတဖၣ် ကကဲထီၣ် တၢ်ဂံၢ်တၢ်ဘါ လၢပှၤဂၤအဂီၢ် ဒီးယဟိဝၤယွၤ ကဘၣ်သူၣ်ဘၣ်သးပှၤလီၤ. (ကတိၤဒိ ၂၃:၁၅; အ့းဖ့းစူး ၄:၂၉) ဒီးပမ့ၢ်တဲတၢ်ဒ်န့ၣ်န့ၣ် မ့ၢ်ကျဲအဂ့ၤကတၢၢ်တဘိလၢ ပပာ်ဖျါထီၣ်လၢ ပစံးဘျုးယဟိဝၤယွၤ ခီဖျိလၢ အတၢ်ဟ့ၣ်အံၤအဃိလီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၃ ၁/၁၅ ၁၉ ¶၁၀

ဆဲးသုးဘူးပသးလၢ ယဟိဝၤယွၤအအိၣ်

^၁၀ ပကွၢ်ထွဲလီၤပနီၢ်ကစၢ်အတၢ်ဃံတၢ်လၤန့ၣ် မ့ၢ်တၢ်လၢ အကြၢးဝဲဘၣ်ဝဲ. ဘၣ်ဆၣ် ပတလိၣ်ဂုာ်ကျဲးစၢးအါတလၢ ဒ်သိးပကဖျါလီၤစၢ်အဂီၢ်ဘၣ်. ပမ့ၢ်ဖျါပှၢ်ထီၣ်န့ၣ် မ့ၢ်ဝဲတၢ်ပနီၣ်တခါလၢ ပကဲထီၣ်ပှၤဒိၣ်တုာ်ခိၣ်ပှဲၤ, အိၣ်ဒီးအလၤကပီၤ ဒီးတၢ်သူၣ်ဂ့ၤသးဝါ. အဒိ လံာ်စီဆှံ တဲဝဲလၢ “ပှၤတဂၤလၢ အလဲၤတၢ်လၢ တၢ်တီတၢ်လိၤအကျဲန့ၣ် အခိၣ်ဆူၣ်ဝါ မ့ၢ်ဝဲ အခိၣ်သလုးလၢ အဃံလၤလီၤ.” (ကတိၤဒိ ၁၆:၃၁) ယဟိဝၤယွၤ ထံၣ်ပှၤဒ်န့ၣ်အဃိ ပကြၢးဂုာ်ကျဲးစၢး ဒ်သိးပကအိၣ်ဒီး တၢ်ထံၣ်လၢ ပနီၢ်ကစၢ်အဖီခိၣ် ဒ်ယဟိဝၤယွၤအသိး. (ဖး ၁ ပ့းတရူး ၃:၃, ၄.) အဃိ ပမ့ၢ်လဲၤဘှီသးမ့ၢ်ဂ့ၤ သူကသံၣ်လၢ ကဒိၣ်တၢ်ဂ့ၤဒိၣ်ထီၣ်အဂီၢ်န့ၣ် တၢ်လီၤဘၣ်ယိၣ်လၢ ပသးသမူအဂီၢ်အိၣ်ဝဲသ့အဃိ ပမ့ၢ်မၤဒ်န့ၣ်န့ၣ် အကြၢးဝဲဘၣ်ဝဲဧါ. တၢ်ဃံတၢ်လၤနီၢ်ကီၢ်န့ၣ် မ့ၢ်ဝဲ “တၢ်သးခုလၢ အဟဲလၢ ယဟိဝၤယွၤအအိၣ်.” (ဃ့ ၈:၁၀) လၢဟီၣ်ခိၣ်သီ ခဲကိာ်မၣ် ပတၢ်အိၣ်ဆူၣ်အိၣ်ချ့ကဂ့ၤ ဒီးပညါကက့ၤဘီၣ်လီၤကဒါက့ၤ. (ဘး ၃၃:၂၅; ၡါ ၃၃:၂၄) တချုးလၢ ဟီၣ်ခိၣ်သီတုၤဒံးဘၣ်အခါ ပမ့ၢ်ပာ်ဖျါထီၣ်လၢ ပအိၣ်ဒီးတၢ်ကူၣ်သ့ ဒီးတၢ်နာ်န့ၣ် ကမၤစၢၤပှၤဒ်သိးဒီး ပကဆဲးအိၣ်ဘူးဒီး ယဟိဝၤယွၤ ဒီးပကဆဲးအိၣ်ဒီးတၢ်သးခု လၢဆၢကတီၢ်ခဲအံၤ.—၁ တံၤ ၄:၈.

လါယနူၤအါရံၤ ၈-၁၄

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ယိၤဘး ၃၄-၃၅

ဖဲပထံၣ်ဘၣ်ထဲ တၢ်တတီတလိၤလၢ ပတၢ်အိၣ်မူပူၤအခါ

wp၁၉.၁ ၈ ¶၂

ယွၤမ့ၢ် ကစၢ်ဒ်လဲၣ်တဂၤလဲၣ်

ကစၢ်ယွၤန့ၣ် မၤတၢ်လၢအဘၣ်ထီဘိလီၤ. လံာ်စီဆှံတဲဝဲလၢ “မ်တၢ်တတီတလိၤ အိၣ်ယံၤဒီးယွၤတက့ၢ်, ဒီးမ်တၢ်အၢတၢ်သီအိၣ်ယံၤဒီး တၢ်သ့တၢ်လၢာ်တက့ၢ်.” (ယိၤဘး ၃၄:၁၀) ဒ်ပှၤကွဲးထါစံးထီၣ်ပတြၢၤ တဲဝဲလၢယဟိဝၤယွၤ “ကစံၣ်ညီၣ်တီပှၤဂီၢ်မုၢ်” အသိး ကစၢ်ယွၤအတၢ်စံၣ်ညီၣ်တဖၣ်န့ၣ် တီဝဲလိၤဝဲလီၤ. (စံးထီၣ်ပတြၢၤ ၆၇:၄) မ့ၢ်လၢ “ယွၤကွၢ်ပှၤအသး” အဃိပှၤပာ်မၤအသးလၢ အမဲာ်ညါတန့ၢ်ဘၣ်. အဝဲသ့ၣ်ညါတၢ်မ့ၢ်တၢ်တီ ဒီးကစံၣ်ညီၣ်တၢ်လၢအဘၣ်ထီဘိလီၤ. (၁ ၡမူၤအ့လး ၁၆:၇) တကးဒံးဘၣ် ကစၢ်ယွၤသ့ၣ်ညါဝဲ ပှၤမၤတၢ်တတီတလိၤ ဒီးပှၤအီၣ်ကျိၣ်အီၣ်စ့တဖၣ် လၢဟီၣ်ခိၣ်ချၢလီၤ. ဒီးအဝဲအၢၣ်လီၤဝဲလၢ တယံာ်လၢၤဘၣ်န့ၣ် “ပှၤတတီတလိၤ . . . ကဘၣ်တၢ်ဒီၣ်တဲာ်ကွံာ်လၢကီၢ်ပူၤ” န့ၣ်လီၤ.—ကတိၤဒိ ၂:၂၂

တၢး၁၇.၀၄ ၁၁ ¶၅

ကစၢ်ယွၤအဘီမုၢ် မ့ၢ်ဟဲန့ၣ် တၢ်မနုၤကလီၤမၢ်ကွံာ်ဝဲလဲၣ်

^၅ ယဟိဝၤယွၤ ကမၤဝဲဒ်လဲၣ်. မုၢ်မဆါတနံၤအံၤ ယဟိဝၤယွၤ ဟ့ၣ်ဝဲပှၤအၢပှၤသီတဖၣ် တၢ်ခွဲးတၢ်ယာ်လၢ ကပီၢ်ယၢ်လီၤက့ၤအသးအဂီၢ်လီၤ. (ယၡါယၤ ၅၅:၇) တယံာ်လၢၤဘၣ် ကစၢ်ယွၤကမၤဟးဂီၤကွံာ် ပှၤအၢပှၤသီတဖၣ်အံၤသနာ်က့ အခဲအံၤ အဝဲတစံၣ်ညီၣ် ပှၤအၢပှၤသီတဖၣ်အံၤဒံးဘၣ်. ဘၣ်ဆၣ် အဝဲသ့ၣ်မ့ၢ်ဆဲးဆီၣ်ထွဲမၤစၢၤ မုၣ်ကီၤလံၢ် အတၢ်ရဲၣ်တၢ်ကျဲၤဒီး မ့ၢ်တပီၢ်ယၢ်လီၤက့ၤအသးဘၣ်န့ၣ် ဖဲတၢ်နးတၢ်ဖှီၣ်ဖးဒိၣ် စးထီၣ်ဝဲအခါ တၢ်ကကဲထီၣ်အသးဒီးအဝဲသ့ၣ်ဒ်လဲၣ်. ယဟိဝၤယွၤ အၢၣ်လီၤဝဲလၢ ကမၤဟးဂီၤကွံာ်ဝဲ ပှၤအၢပှၤသီခဲလၢာ်လၢ ဟီၣ်ခိၣ်ချၢလီၤ. (ဖး စံးထီၣ်ပတြၢၤ ၃၇:၁၀ တက့ၢ်.) မုၢ်မဆါတနံၤအံၤ ပှၤအါဂၤမၤခူသူၣ် တၢ်အၢတၢ်သီသနာ်က့ တဘျီတခီၣ် အဝဲသ့ၣ်တဘၣ် တၢ်စံၣ်ညီၣ်ဘၣ်. (ယိၤဘး ၂၁:၇, ၉) ဘၣ်ဆၣ် လံာ်စီဆှံ ဟ့ၣ်ပလီၢ်ပှၤလၢ– “ယွၤအမဲာ်အိၣ်ဝဲလၢ ပှၤကညီအကျဲအဖီခိၣ်, ဒီးကယဲၢ်အလဲၤတၢ်န့ၣ်ထံၣ်ဝဲလီၤ. တၢ်ခံးမ့ၢ်ဂ့ၤ, တၢ်သံအကဒုမ့ၢ်ဂ့ၤ, ဖဲပှၤမၤတၢ်အၢ ကပာ်ခူသူၣ်အသးန့ၣ်တအိၣ်ဘၣ်.” (ယိၤဘး ၃၄:၂၁, ၂၂) လၢတၢ်န့ၣ်အဃိ ပှၤပာ်ခူသူၣ်တၢ်လၢ ယွၤအမဲာ်ညါတသ့ နီတမံၤဘၣ်. တၢ်လၢပှၤအၢပှၤသီ မၤဝဲတဖၣ်န့ၣ် ယဟိဝၤယွၤထံၣ်ဝဲခဲလၢာ်လီၤ. အၢ်မက့းဒိၣ်မ့ၢ်ဝံၤန့ၣ် ပမ့ၢ်ဟးဃုအဝဲသ့ၣ်ဒၣ်လဲာ် ပတထံၣ်အီၤလၢၤဘၣ်. အဝဲသ့ၣ်ကလီၤမၢ်ကွံာ်ဝဲ လီၤထူလီၤယိာ်လီၤ.—စံးထီၣ်ပတြၢၤ ၃၇:၁၂-၁၅.

တၢး၂၁.၀၅ ၇ ¶၁၉-၂၀

မ့ၢ်နကပျဲ တၢ်တမံၤမံၤလၢ ကမၤပတုာ် နၤလၢ နကပိာ်ထီၣ်ယ့ၣ်ၡူးအခံဧါ

^၁၉ ပတၢ်အိၣ်သးလီၤဂာ်ဒီး ယ့ၣ်ၡူးအစိၤဒ်လဲၣ်. မုၢ်မဆါတနံၤအံၤ ပှၤအါဂၤ တတူၢ်လိာ်ပတၢ်ကစီၣ်ဘၣ် မ့ၢ်လၢပတမၤဘၣ်ထွဲလိာ်ပသးဒီး ထံဂ့ၢ်ကီၢ်ဂ့ၢ်ဘၣ် ဒီးပအိၣ်လၢ တၢ်အိၣ်ဘၢၣ်စၢၤအဃိလီၤ. အဝဲသ့ၣ်မုၢ်လၢ်ဝဲလၢ ပကဟ့ၣ်တၢ်ဖးလီၤ. ဘၣ်ဆၣ် ပမ့ၢ်ဃုထၢပှၤဟီၣ်ခိၣ်ဖိလၢ ကပၢပှၤအဂီၢ်န့ၣ် ပသ့ၣ်ညါလၢ မ့ၢ်ဒၣ်ပပာ်တ့ၢ်ကွံာ်ယဟိဝၤယွၤလီၤ. (၁ ၡမူၤအ့လး ၈:၄-၇) ဘၣ်သ့ၣ်သ့ၣ် ပှၤတနီၤနီၤ ကဆိကမိၣ်ဝဲလၢ ပကြၢးသူၣ်ထီၣ်ကၠိ, တၢ်ဆါဟံၣ်ဒီး တၢ်အဂုၤအဂၤတဖၣ် ဒ်သိးကမၤစၢၤပလီၢ်ကဝီၤအဂီၢ်န့ၣ်လီၤ. လၢပကဂုာ်ကျဲးစၢး မၤဘၣ်ဂီၢ်ထီၣ်က့ၤ ဟီၣ်ခိၣ်အတၢ်ကီတၢ်ခဲတဖၣ်အဂီၢ် ပသးဆူၣ်လၢ တၢ်စံၣ်တဲၤတဲလီၤတၢ်မၤအဃိ အဝဲသ့ၣ်တတူၢ်လိာ်ပတၢ်ကစီၣ်ဘၣ်.

^၂၀ ဒ်သိးပတၢ်နာ် သုတလီၤစှၤတဂ့ၤအဂီၢ် ပကဘၣ်မၤတၢ်မနုၤလဲၣ်. (ဖး မးသဲ ၇:၂၁-၂၃ တက့ၢ်.) ပကဘၣ်သးစၢၢ်ဆၢ ဘီမုၢ်တၢ်သးခုကစီၣ်အတၢ်မၤ ခီဖျိလၢယ့ၣ်ၡူးမၢပမၤအဃိလီၤ. (မးသဲ ၂၈:၁၉, ၂၀) ပတၢ်ဖံးတၢ်မၤ တဘၣ်အါလၢ ပကမၤဘၣ်ဂီၢ်ထီၣ်က့ၤ ဟီၣ်ခိၣ်အတၢ်ကီတၢ်ခဲတဖၣ်အဂီၢ်ဘၣ်. ပအဲၣ်ပှၤလၢပဃၢၤဒီး ပသးအိၣ်အဝဲသ့ၣ်အတၢ်ကီတၢ်ခဲတဖၣ်အဃိ ပသ့ၣ်ညါလၢကျဲအဂ့ၤကတၢၢ်န့ၣ် မ့ၢ်ဝဲပကမၤစၢၤအဝဲသ့ၣ်လၢ ကသ့ၣ်ညါထီၣ် ဘၣ်ဃးဒီးယွၤအဘီအမုၢ် ဒီးမၤစၢၤအဝဲသ့ၣ်လၢ ကအိၣ်ဒီးတၢ်ရ့လိာ်သးဒီးယဟိဝၤယွၤ လၢအဂ့ၤလီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၇.၀၄ ၂၈ ¶၃

နတၢ်သးအိၣ်ဟ့ၣ်တၢ်န့ၣ် မ်အကဲထီၣ် တၢ်စံးထီၣ်ပတြၢၤ ယဟိဝၤယွၤတက့ၢ်

^၃ ဖဲပှၤသၢဂၤအံၤကတိၤတၢ် ဒီးစီၤယိၤဘးအခါ ပှၤသးစၢ်လၢအမ့ၢ် စီၤအလံဟူၤ တဂၤန့ၣ် ဒိကနၣ်ဝဲလီၤ. ဖဲအဝဲသ့ၣ် ကတိၤတၢ်ဝံၤအခါ စီၤအလံဟူၤ သံကွၢ်စီၤယိၤဘး ဘၣ်ဃးဒီးယဟိဝၤယွၤ အဂ့ၢ်ဒ်အံၤလီၤ. “နမ့ၢ်တီမ့ၢ်လိၤဒီး, နဟ့ၣ်အီၤလၢ မနုၤတမံၤလဲၣ်. ဒီးယွၤဒိးန့ၢ်လၢ နစုပူၤလၢ မနုၤတမံၤလဲၣ်.” (ယိၤဘး ၃၅:၇) မ့ၢ်စီၤအလံဟူၤစ့ၢ်ကီး အဲၣ်ဒိးစံးဝဲလၢ ပတၢ်ထဲးဂံၢ်ထဲးဘါလၢ ကမၤယွၤအတၢ်မၤန့ၣ် အဘျုးတအိၣ်ဘၣ်န့ၣ်ဧါ. တမ့ၢ်ဒ်န့ၣ်ဘၣ်. ပသ့ၣ်ညါသ့ဒ်လဲၣ်. မ့ၢ်လၢယဟိဝၤယွၤ တသိၣ်ဃီၣ်စီၤအလံဟူၤဘၣ် အဃိန့ၣ်လီၤ. စီၤအလံဟူၤ အဲၣ်ဒိးစံးဝဲလၢ ယဟိဝၤယွၤတလိၣ်ဘၣ် ပတၢ်ဘူၣ်ထီၣ်ဘါထီၣ်ဘၣ်. ယဟိဝၤယွၤန့ၣ် တၢ်အိၣ်ဒီးအီၤခဲလၢာ်လီၤ. တၢ်လၢပမၤတဖၣ်န့ၣ် တမၤထီထီၣ်အလီၢ်အလၤ, တဒုးထူးထီၣ်တီၤထီၣ်အီၤ ဒီးတမၤဆူၣ်ထီၣ်အဂံၢ်အဘါစ့ၢ်ကီးဘၣ်. လၢတၢ်န့ၣ်အလီၢ် တၢ်ဂ့ၤတၢ်ဝါလၢ အိၣ်ဒီးပှၤတဖၣ်န့ၣ် ဟဲလၢယွၤအအိၣ်လီၤ. ဒီးပသူပတၢ်သ့တၢ်ဘၣ်တဖၣ်အံၤ ဒ်လဲၣ်ဒ်လဲၣ်န့ၣ် ယဟိဝၤယွၤ ပာ်သူၣ်ပာ်သးဝဲလီၤ.

လါယနူၤအါရံၤ ၁၅-၂၁

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ယိၤဘး ၃၆-၃၇

ကစၢ်ယွၤအတၢ်အၢၣ်လီၤလၢ အဘၣ်ဃးဒီးတၢ်မူအထူအယိာ်န့ၣ် ပနာ်န့ၢ်အီၤသ့

တၢး၁၅ ၁၀/၁ ၂၉ ¶၁-၂

မ့ၢ်ပဃုထံၣ်န့ၢ်ယွၤ ကသ့ဧါ

ကစၢ်ယွၤ အိၣ်ပာ်စၢၤ အစိၤစိၤအဃၣ်ဃၣ်– လံာ်စီဆှံသိၣ်လိဝဲလၢ ကစၢ်ယွၤအိၣ်ဝဲ “အစိၤစိၤအဃၣ်ဃၣ်လီၤ.” (စံးထီၣ်ပတြၢၤ ၉၀:၂) ပမ့ၢ်စံးကဒီးတမံၤန့ၣ် ကစၢ်ယွၤအခီၣ်ထံးတအိၣ်ဒီး အကတၢၢ်တအိၣ်ဘၣ်. ပှၤဟီၣ်ခိၣ်ဖိန့ၣ် “ဃုကွၢ်အနံၣ်အလါ အတၢ်ဂံၢ်တသ့ဘၣ်.”—ယိၤဘး ၃၆:၂၆.

နဒိးန့ၢ်ဘၣ် အဘျုးအဖှိၣ်ဒ်လဲၣ်– ကစၢ်ယွၤအၢၣ်လီၤဝဲလၢ နမ့ၢ်သ့ၣ်ညါအီၤန့ၣ် ကဟ့ၣ်နၤတၢ်မူအထူအယိာ်လီၤ. (ယိၤဟၣ် ၁၇:၃) ကစၢ်ယွၤမ့ၢ်တအိၣ်ဒီး တၢ်မူလီၤထူလီၤယိာ်န့ၣ် နနာ်န့ၢ်အတၢ်အၢၣ်လီၤအီလီၤကသ့ဧါ. ထဲ “စီၤပၤအထူအယိာ်” တဂၤဧိၤ မၤလၢပှဲၤထီၣ် အတၢ်အၢၣ်လီၤအီလီၤအံၤသ့ဝဲလီၤ.—၁ တံၤမသ့း ၁:၁၇.

တၢး၂၀.၀၅ ၂၂ ¶၆

ပာ်လုၢ်ပာ်ပှ့ၤ တၢ်ဟ့ၣ်လၢ ယွၤဟ့ၣ်နၤတဖၣ်

^၆ မ့ၢ်လၢ ဟီၣ်ခိၣ်န့ၣ် အိၣ်ဝဲတယံၤတဘူး ဒီးမုၢ်အဃိ ထံတဖၣ် တလီၤသံးကွံာ် မ့တမ့ၢ် တကဲထီၣ် ထံခုၣ်ကိၣ်လိၣ်ခဲလၢာ်ဘၣ်. ဟီၣ်ခိၣ် မ့ၢ်အိၣ်ဘူးအါထီၣ် ဒီးမုၢ်တစဲးန့ၣ် ထံတဖၣ် ကကလာ်ထီၣ်, ကကိၢ်သွး ဒီးတၢ်သးသမူတဖၣ် အိၣ်ဝဲတသ့ဘၣ်. ဒီးဟီၣ်ခိၣ်မ့ၢ်အိၣ်ယံၤထီၣ်ဒီး မုၢ်တစဲးန့ၣ် ထံတဖၣ် ကကဲထီၣ် ထံခုၣ်ကိၣ်လိၣ် ဒီးဟီၣ်ခိၣ်ဒီဖျၢၣ် ကပှဲၤဒီး ထံခုၣ်ကိၣ်လိၣ် ဒီးမူခိၣ်ဖီတဖၣ်လီၤ. မ့ၢ်လၢယဟိဝၤယွၤ ပာ်လီၤဝဲဟီၣ်ခိၣ်အလီၢ် ဘၣ်ဘၣ်အဃိ ထံအတၢ်လဲၤတရံး မၤတၢ်ဂ့ၤဂ့ၤဘၣ်ဘၣ် ဒီးကဲဘျုးလၢ တၢ်သးသမူအဂီၢ်လီၤ. မုၢ်န့ၣ်မၤကိၢ်ထီၣ်ဝဲ ထံလၢပီၣ်လဲၣ်ပူၤ ဒီးလၢဟီၣ်ခိၣ်အမဲာ်ဖံးခိၣ်အဃိ ထံသဝံထီၣ် ဒီးကဲထီၣ်ဝဲတၢ်အၢၣ်လီၤ. တနံၣ်ဘၣ်တနံၣ်န့ၣ် မုၢ်မၤသဝံထီၣ်ဝဲထံန့ၣ် ကအိၣ်အါန့ၢ်ဒံး ထံလၢနိၣ်ပူၤ ခဲလၢာ်လီၤ. ထံတဖၣ်အံၤ သဝံထီၣ် ဒီးတချုးလၢ အစူၤလီၤကဒါက့ၤဒ်ထံ မ့တမ့ၢ် မူခိၣ်ဖီအသိးဒံးဘၣ်န့ၣ် အအိၣ်ဝဲလၢ တၢ်ဖးဖီ အသီတဆံဃၣ်ဃၣ်လီၤ. လၢခံန့ၣ် ထံတဖၣ်ယွၤလီၤက့ၤဝဲလၢ ထံကျိဒီးပီၣ်လဲၣ်ပူၤလီၤ. ဒီးထံလဲၤတရံး လၢကျဲဒ်န့ၣ်ထီဘိလီၤ. မ့ၢ်လၢ ယဟိဝၤယွၤ တ့လီၤဝဲ ထံအတၢ်လဲၤတရံးဒ်အံၤအဃိ လၢဟီၣ်ခိၣ်န့ၣ် ထံအိၣ်ဝဲထီဘိလီၤ. အဃိ ထံအတၢ်လဲၤတရံးတခါအံၤ ပာ်ဖျါထီၣ်ဝဲလၢ ယဟိဝၤယွၤ အိၣ်ဒီးတၢ်ကူၣ်သ့ ဒီးတၢ်စိတၢ်ကမီၤလီၤ.—ယိၤဘး ၃၆:၂၇, ၂၈; စံၣ်တဲၤတဲလီၤတၢ် ၁:၇.

တၢး၂၂.၁၀ ၂၈ ¶၁၆

ဆဲးမၤဂၢၢ်ကျၢၤထီၣ် နတၢ်မုၢ်လၢ်ထီဘိ

^၁၆ ပတၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်န့ၣ် အကဲဝဲ ကစၢ်ယွၤအတၢ်ဟ့ၣ် ဒီးပပာ်လုၢ်ပာ်ပှ့ၤ တၢ်ဟ့ၣ်တခါအံၤ သပှၢ်တၢၢ်. ပခီးကွၢ်လၢ် တၢ်မုၢ်လၢ်တခါအံၤ ဒီးပနာ်သပှၢ်တၢၢ်လၢ အကဟဲလၢပှဲၤထီၣ်ဝဲ. ပတၢ်မုၢ်လၢ်တခါအံၤ အလီၤဂာ်ဒ်သိးဒီး နီၣ်သက့ၤ. အဃိ ပမ့ၢ်ထံၣ်ဘၣ်ဒီး တၢ်ကီတၢ်ခဲတမံၤမံၤန့ၣ် ပတၢ်မုၢ်လၢ်အံၤ ကမၤစၢၤပှၤ ဒ်သိးဒီး ပကပာ်ပသး မုာ်မုာ်ခုၣ်ခုၣ်, ပလဲၤခီဖျိ တၢ်မၤအၢမၤနးကန့ၢ် ဒီးပမ့ၢ်ဘၣ်သံသနာ်က့ ပသံဘူၣ်. တကးဒံးဘၣ် ပတၢ်မုၢ်လၢ်တခါအံၤ အလီၤဂာ်ဒ်သိးဒီး ခိၣ်ဖျီၣ်ထး စ့ၢ်ကီး, မ့ၢ်လၢ ပတၢ်မုၢ်လၢ်တခါအံၤ အမၤစၢၤပှၤဒ်သိး ပကအိၣ်ဒီး တၢ်ဆိကမိၣ်လၢအဂ့ၤ ဒီးပကမၤတၢ်လၢအဘၣ်. ပတၢ်မုၢ်လၢ်လၢ အအိၣ်လၢ လံာ်စီဆှံပူၤန့ၣ် မၤစၢၤပှၤလၢ ပကသ့ၣ်ညါ ယဟိဝၤယွၤအဂ့ၢ်ဂ့ၤထီၣ် ဒီးပသ့ၣ်ညါဘၣ်လၢ ယဟိဝၤယွၤန့ၣ် အအဲၣ်ပှၤ သပှၢ်တၢၢ်. အဃိ ပမ့ၢ်ဆဲးမၤဂၢၢ်ကျၢၤထီၣ် ပတၢ်မုၢ်လၢ်ထီဘိန့ၣ် ကကဲဘျုးလၢပဂီၢ် ဖးအါညါ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1 ၄၉၂

တၢ်ဆဲးကျိး

လၢပျၢၤ လၢတၢ်လီၢ်လၢ လံာ်စီဆှံပူၤတဖၣ်န့ၣ် ပှၤဆှၢတၢ်ကစီၣ် မ့တမ့ၢ် တၢ်ဂ့ၢ်တၢ်ကျိၤတမံၤမံၤလၢ ပှၤတဂၤဘၣ်တဂၤအအိၣ် လၢကျဲအါဘိ. တဘျီတခီၣ် လီၢ်ကဝီၤတၢ်ကစီၣ် မ့တမ့ၢ် ထံဂၤကီၢ်ဂၤ တၢ်ကစီၣ်စ့ၢ်ကီး ပှၤဒိးန့ၢ်ဘၣ်ဝဲ ခီဖျိလၢ ပှၤဟဲတဲဘၣ် အဝဲသ့ၣ်. (၂ မူၤ ၃:၁၇, ၁၉; ဘး ၃၇:၂၀) ပှၤလဲၤတၢ်က့ၤတၢ်ဖိတဖၣ်န့ၣ် ဖဲအဝဲသ့ၣ်လဲၤတၢ်ဒီး အိၣ်ပတုာ်လၢ ဝ့ၢ်တဖၣ် မ့တမ့ၢ် တၢ်လီၢ်တတီၤဘၣ်တီၤ ဒ်သိးကန့ၢ်ဘၣ် တၢ်အီၣ်တၢ်အီ မ့တမ့ၢ် တၢ်အဂၤတမံၤမံၤအခါ အဝဲသ့ၣ် တဲဝဲတၢ်ကစီၣ်လၢ အဟဲစိာ်ဝဲလၢ တၢ်လီၢ်ဖးယံၤ. ကီၢ်ပာ်လဲးစတဲန့ၣ် အအိၣ်လၢ တၢ်လီၢ်လၢ အဘၣ်ကျဲလၢ ပှၤကလဲၤလၢ ကီၢ်အ့ၡၢၣ်, အၤဖြံၤကၤ ဒီးယူရပၤ အဃိ ပှၤလဲၤတၢ်က့ၤတၢ်ဖိတဖၣ် လၢအဟဲလၢ တၢ်လီၢ်ဖးယံၤန့ၣ် ဟဲခီဂာ်ဘၣ်ဝဲ တၢ်လီၢ်ဖဲန့ၣ်. အဃိ ပှၤပာ်လဲးစတဲဖိတဖၣ်န့ၣ် ဒိးန့ၢ်ဘၣ်ဝဲ ထံဂၤကီၢ်ဂၤ အတၢ်ကစီၣ်သ့ဝဲ ညီညီဖိ. ထံလီၢ်ကီၢ်ပူၤ ဒီးထံဂၤကီၢ်ဂၤ အတၢ်ကစီၣ်န့ၣ် ညီနုၢ်ပှၤဒိးန့ၢ်ဘၣ်အီၤလၢ ဝ့ၢ်အတၢ်ဆါတၢ်ပှ့ၤအလီၢ်.

လါယနူၤအါရံၤ ၂၂-၂၈

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ယိၤဘး ၃၈-၃၉

နဟံးန့ၢ်တၢ်ဆၢကတီၢ်လၢ ကကွၢ်ဒီးဆိကမိၣ်ထံ တၢ်ဘၣ်တ့တဖၣ်အဂ့ၢ်ဧါ

တၢး၂၁.၀၈ ၁၀ ¶၇

မ့ၢ်နကအိၣ်ခိး ယဟိဝၤယွၤလၢ တၢ်ဝံသးစူၤအပူၤဧါ

^၇ ဖဲယဟိဝၤယွၤတ့လီၤ ဟီၣ်ခိၣ်အခါ လံာ်စီဆှံပာ်ဖျါထီၣ်ဝဲလၢ ကစၢ်ယွၤ ပာ်လီၤ “နီၢ်ထိၣ်တၢ်,” ဘျၢလီၤ “တၢ်အခီၣ်ထံး” ဒီးပာ်လီၤအီၤလၢတၢ်နီ “တမံၤအဖီခိၣ်” လီၤ. (ယိၤဘး ၃၈:၅, ၆) ယဟိဝၤယွၤ ဟံးန့ၢ်တၢ်ဆၢကတီၢ်လၢ ကကွၢ်က့ၤအစုတၢ်မၤတဖၣ်လီၤ. (၁ မိၤၡ့ ၁:၁၀, ၁၂) ဖဲမူခိၣ်ကလူးတဖၣ်ထံၣ်ဘၣ်ဝဲ ယဟိဝၤယွၤတ့လီၤတၢ်ဝံၤအခါ ထံၣ်တမှံကွၢ် မူခိၣ်ကလူးတဖၣ် ကသူၣ်ပိၢ်သးဝးထဲလဲၣ်. လံာ်စီဆှံပာ်ဖျါထီၣ်ဝဲလၢ အဝဲသ့ၣ် “ကိးထီၣ်လၢတၢ်သူၣ်ဖှံသးညီ” အပူၤလီၤ. (ယိၤဘး ၃၈:၇) ပမၤလိန့ၢ်ဘၣ်တၢ်မနုၤလဲၣ်. ယဟိဝၤယွၤတ့လီၤတၢ်န့ၣ် တံာ်တာ်ဝဲ အနံၣ်လၢအကထိတဖၣ်ညါ ဘၣ်ဆၣ် ဖဲအတ့လီၤတၢ်ဝံၤ ဒီးကွၢ်က့ၤဝဲအခါ အထံၣ်ဝဲလၢ “အဂ့ၤမးလီၤ.”—၁ မိၤၡ့ ၁:၃၁.

တၢး၂၀.၀၈ ၁၄ ¶၂

တၢ်ဂဲၤဆၢထၢၣ်သမူထီၣ်က့ၤ ပာ်ဖျါထီၣ်ဝဲ ယဟိဝၤယွၤအတၢ်အဲၣ်, တၢ်ကူၣ်သ့ ဒီးတၢ်ဝံသးစူၤ

^၂ ယဟိဝၤယွၤတ့လီၤဝဲ အဖိခွါယ့ၣ်ၡူးအဆိကတၢၢ်လီၤ. ဝံၤဒီး ယဟိဝၤယွၤသူဝဲ အဖိခွါဝဲၢ်ကိလၢ ကတ့လီၤတၢ်ခဲလၢာ် ဖဲန့ၣ်အကျါ ပၣ်ဃုာ်ဒီး မူခိၣ်ကလူးတဖၣ်လီၤ. (ကလီးစဲ ၁:၁၆) ယ့ၣ်ၡူးဒိးန့ၢ်ဘၣ် တၢ်ခွဲးတၢ်ယာ်လၢ အမၤသကိးဘၣ်တၢ်ဒီးအပၢ်အဃိ အသးခုဒိၣ်မးလီၤ. (ကတိၤဒိ ၈:၃၀) တကးဒံးဘၣ် ဖဲယဟိဝၤယွၤ တ့လီၤဝဲမူခိၣ် ဒီးဟီၣ်ခိၣ်အခါ အဖိခွါယ့ၣ်ၡူးမၤစၢၤအီၤလီၤ. ဖဲန့ၣ်အခါ မူခိၣ်ကလူးတဖၣ် ထံၣ်ဘၣ်ဝဲအဃိ အဝဲသ့ၣ်သးခုဝဲ ဒိၣ်မးလီၤ. မူခိၣ်ကလူးတဖၣ်အံၤ ပာ်ဖျါထီၣ်ဝဲ တၢ်သးခုဒ်လဲၣ်. ဖဲကစၢ်ယွၤတ့လီၤ ကယဲၢ်တၢ်ဘၣ်တ့ခဲလၢာ် ဒီးပှၤဟီၣ်ခိၣ်ဖိအခါ မူခိၣ်ကလူးခဲလၢာ် “ကိးထီၣ်တၢ်လၢ အသူၣ်ဖှံအသးညီ” အပူၤလီၤ. (ယိၤဘး ၃၈:၇; ကတိၤဒိ ၈:၃၁) ယဟိဝၤယွၤ အတၢ်ဘၣ်တ့ တခါစုာ်စုာ်န့ၣ် ပာ်ဖျါထီၣ်ဝဲ အတၢ်အဲၣ်တၢ်ကွံ ဒီးအတၢ်ကူၣ်သ့လီၤ.—စံးထီၣ်ပတြၢၤ ၁၀၄:၂၄; ရိမ့ၤ ၁:၂၀.

တၢး၂၃.၀၃ ၁၇ ¶၈

ကွၢ်ဒီးဆိမိၣ်ထံ တၢ်ဘၣ်တ့ ဒီးမၤလိအါထီၣ် ယဟိဝၤယွၤအဂ့ၢ်

^၈ ပနာ်န့ၢ် ယဟိဝၤယွၤ သ့နီၢ်ကီၢ်. ယဟိဝၤယွၤ မၤစၢၤစီၤယိၤဘး ဒ်သိး အတၢ်နာ်န့ၢ်အီၤ ကအါထီၣ်. (ယိၤဘး ၃၂:၂; ၄၀:၆-၈) ဖဲယဟိဝၤယွၤ တဲတၢ်ဒီး စီၤယိၤဘးအခါ အတဲ ဘၣ်ဃးဒီး အတၢ်ဘၣ်တ့အဂ့ၢ်ဒီဒူၣ် ဒ်သိးဒီး ဆၣ်, တၢ်အၢၣ် ဒီးလီဝၢ်ဒံး. ဒီးယဟိဝၤယွၤ တဲဘၣ်ဃးဒီး ဆၣ်ဖိကီၢ်ဖိအဂ့ၢ် ဒ်သိးဒီး ကျီၢ်ဖါမံၤ ဒီးကသ့ၣ်. (ယိၤဘး ၃၈:၃၂-၃၅; ၃၉:၉, ၁၉, ၂၀) ယဟိဝၤယွၤ အတၢ်ဘၣ်တ့တဖၣ်အံၤ ပာ်ဖျါထီၣ်ဝဲ အတၢ်စိတၢ်ကမီၤ, အတၢ်အဲၣ် ဒီးအတၢ်ကူၣ်သ့အဂ့ၢ်. ခီဖျိလၢ ယဟိဝၤယွၤ တဲဘၣ်စီၤယိၤဘးလၢ အတၢ်ဘၣ်တ့အဂ့ၢ်အဃိ စီၤယိၤဘး နာ်န့ၢ်အီၤအါန့ၢ်ဒံးလၢညါ. (ယိၤဘး ၄၂:၁-၆) ပဝဲစ့ၢ်ကီး ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့အဂ့ၢ်န့ၣ် ပကသ့ၣ်ညါဘၣ်လၢ ယဟိဝၤယွၤန့ၣ် အတၢ်စိတၢ်ကမီၤ အိၣ်အါမး ဒီးအကူၣ်တၢ်သ့ဒိၣ်ကတၢၢ်. တကးဒံးဘၣ် ပတၢ်ကီတၢ်ခဲတဖၣ်န့ၣ် အမၤလီၤမၢ်ကွံာ်ဝဲသ့ ဒီးအကမၤဝဲနီၢ်ကီၢ်. ပသ့ၣ်ညါဘၣ်ဒ်အံၤအဃိ မၤစၢၤပှၤလၢ ပကနာ်န့ၢ်အါထီၣ် ယဟိဝၤယွၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2 ၂၂၂

ပှၤလၢအဟ့ၣ်လီၤ တၢ်သိၣ်တၢ်သီ

ယဟိဝၤယွၤမ့ၢ် ပှၤလၢအဟ့ၣ်လီၤ တၢ်သိၣ်တၢ်သီ. ယဟိဝၤယွၤမ့ၢ်ဝဲ ပှၤလၢအဟ့ၣ်လီၤတၢ်သိၣ်တၢ်သီလၢ မူခိၣ်ဒီးဟီၣ်ခိၣ်. ဒီးကစၢ်ယွၤ ဒုးအိၣ်ထီၣ် န့ဆၢၣ်အတၢ်သိၣ်တၢ်သီတဖၣ်လၢ မုၢ်လါဆၣ် ဒီးဆၣ်ဖိကီၢ်ဖိတဖၣ်အဂီၢ်. (ဘး ၃၈:၄-၃၈ စံး ၁၀၄:၅-၁၉; ဘး ၃၉:၁-၃၀) တကးဒံးဘၣ် ပှၤဟီၣ်ခိၣ်ဖိန့ၣ် ကစၢ်ယွၤတ့လီၤအီၤအဃိ အဝဲသ့ၣ် ဘၣ်ဒိကနၣ်ဝဲ န့ဆၢၣ်အတၢ်သိၣ်တၢ်သီတဖၣ်. ဒီးပှၤဟီၣ်ခိၣ်ဖိန့ၣ် အကဲဝဲ တၢ်ဘၣ်တ့လၢ အအိၣ်ဒီးတၢ်သ့ၣ်ညါ, အပဲာ်ထံနီၤဖးတၢ်သ့ အဃိ ကဘၣ်မၤထွဲဝဲ ယဟိဝၤယွၤ အတၢ်သိၣ်တၢ်သီလၢ အဘၣ်ဃးဒီး တၢ်သကဲာ်ပဝးစ့ၢ်ကီး. (ရိ ၁၂:၁; ၁ ကရံၣ် ၂:၁၄-၁၆) ဒီးမူခိၣ်ကလူးလၢ အကဲပှၤနီၢ်သးဖိတဖၣ်နာ်က့ အဝဲသ့ၣ် ဘၣ်ဒိကနၣ်ဝဲ ယဟိဝၤယွၤ အတၢ်သိၣ်တၢ်သီ.—စံး ၁၀၃:၂၀; ၂ ပ့း ၂:၄, ၁၁.

န့ဆၢၣ်အတၢ်သိၣ်တၢ်သီလၢ ယဟိဝၤယွၤ ပာ်လီၤဝဲတဖၣ်န့ၣ် ပှၤဆီတလဲဝဲ တသ့နီတဂၤဘၣ်. (ယံး ၃၃:၂၀, ၂၁) ယဟိဝၤယွၤ အတၢ်ဘျၢတဖၣ်န့ၣ် အအိၣ်ဂၢၢ်ကျၢၤဝဲ ဒီးပှၤနာ်အီၣ်အီၤသ့ ထီဘိအဃိ ပှၤစဲအ့ၣ်ဖိတဖၣ် ဃုသ့ၣ်ညါဝဲသ့ တကးဒံးဘၣ် အဝဲသ့ၣ်ဒွးဝဲ လါ, ဆၣ်တဖၣ် အတၢ်လဲၤတရံးသ့ဝဲ လီၤတံၢ်လီၤဆဲး. ပှၤမ့ၢ်တဒိကနၣ် န့ဆၢၣ်အတၢ်သိၣ်တၢ်သီတဖၣ်ဘၣ်န့ၣ် ပှၤထံၣ်ဘၣ်ဒီး တၢ်ကီတၢ်ခဲ. ဒ်န့ၣ်အသိး ပှၤမ့ၢ်တဒိကနၣ် ကစၢ်ယွၤ အတၢ်သိၣ်တၢ်သီ လၢဘၣ်ဃးဒီး တၢ်သကဲာ်ပဝးန့ၣ် ပှၤကထံၣ်ဘၣ် တၢ်ကီတၢ်ခဲ. ဒီးပှၤမ့ၢ်တထံၣ်ဘၣ် တၢ်ကီတၢ်ခဲ တဘျီဃီဘၣ်သနာ်က့ လံာ်စီဆှံတဲဝဲလၢ “ကစၢ်ယွၤန့ၣ် ပှၤလံၣ်န့ၢ်လီန့ၢ်အီၤ တန့ၢ်ဘၣ်. ပှၤတဂၤ ကကူးဘၣ်က့ၤတၢ်လၢ အဖှံဝဲလီၤ.”—ကလၤ ၆:၇; ၁ တံၤ ၅:၂၄.

လါယနူၤအါရံၤ ၂၉–လါဖ့ၤဘြူၤအါရံၤ ၄

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| ယိၤဘး ၄၀-၄၂

ပမၤလိန့ၢ်ဘၣ် တၢ်မနုၤလၢ စီၤယိၤဘး အအိၣ်လဲၣ်

တၢး၁၀ ၁၀/၁၅ ၄ ¶၄-၆

“မ့ၢ်မတဂၤသ့ၣ်ညါ ယဟိဝၤယွၤ အသး” လဲၣ်

^၄ ဖဲပဆိကမိၣ်ထံ တၢ်လၢယဟိဝၤယွၤမၤဝဲတဖၣ်အခါ ပတဘၣ်စံၣ်ညီၣ်ယဟိဝၤယွၤဒ် ပတၢ်ထံၣ်အိၣ်ဝဲအသိးဘၣ်. ဘၣ်ဃးဒီးပှၤလၢအမၤဝဲဒ်န့ၣ်န့ၣ် ဖဲစံးထီၣ်ပတြၢၤ ၅၀:၂၁ န့ၣ် ယဟိဝၤယွၤတဲအဝဲသ့ၣ်လၢ “သုဆိကမိၣ်လၢ ယတၢ်ထံၣ်ကဒ်သိးဒီးသုလီၤ.” လၢအပူၤကွံာ် ၁၇၅ နံၣ်န့ၣ် ပှၤကူၣ်ဘၣ်ကူၣ်သ့လၢ လံာ်စီဆှံတကပၤတဲဝဲလၢ “ပှၤဟီၣ်ခိၣ်ဖိတဖၣ်န့ၣ် အဝဲသ့ၣ် စံၣ်ညီၣ်ကစၢ်ယွၤဒ် အဝဲသ့ၣ်အတၢ်ထံၣ်အိၣ်ဝဲအသိးဒီး အဝဲသ့ၣ်မုၢ်လၢ်ဝဲလၢ ကစၢ်ယွၤကမၤထွဲဝဲ တၢ်သိၣ်တၢ်သီလၢ အဝဲသ့ၣ်မၤထွဲဝဲတဖၣ်.”

^၅ ပကဘၣ်ပလီၢ်ပသး ဒ်သိးပတစံၣ်ညီၣ်ယဟိဝၤယွၤဒ် ပတၢ်ထံၣ် ဒီးပတၢ်ဘၣ်သးအိၣ်ဝဲအသိးဘၣ်. ဘၣ်မနုၤအဃိ ပတမၤဒ်န့ၣ်ဘၣ်လဲၣ်. မ့ၢ်လၢပတလၢတပှဲၤ ဒီးတၢ်လၢယဟိဝၤယွၤမၤဝဲတဖၣ်န့ၣ် ပနၢ်ပၢၢ်အီၤတသ့ခဲလၢာ်ဘၣ်အဃိ ဘၣ်သ့ၣ်သ့ၣ် ပကထံၣ်လၢ အမၤတၢ်န့ၣ် တဘၣ်အါအါဘၣ်. ပှၤအံၣ်စရ့လးဖိတဖၣ် အိၣ်ဒီးတၢ်ထံၣ်ဒ်န့ၣ်အဃိ တဘျီတခီၣ်န့ၣ် အဝဲသ့ၣ် ထံၣ်ကမၣ် ယဟိဝၤယွၤ. အဃိ ယဟိဝၤယွၤတဲအဝဲသ့ၣ်လၢ “သုကတဲလၢ ‘ယဟိဝၤယွၤ တမၤတၢ် တီတီလိၤလိၤဘၣ်.’ အိ ပှၤအံၣ်စရ့လးဖိသ့ၣ်ဧၢ, ဝံသးစူၤ ကနၣ်လၢအံၤ. ယတၢ်မၤန့ၣ် တတီတလိၤဧီၤ. ပှၤမၤတၢ် တတီတလိၤန့ၣ် လၢသုဟီ တမ့ၢ်ဧီၤ.”—ဃ့း ၁၈:၂၅.

^၆ ပမ့ၢ်တူၢ်လိာ်လၢ ပနၢ်ပၢၢ်တၢ်တသ့ခဲလၢာ်ဘၣ် ဒီးတဘျီတခီၣ် ပတၢ်ထံၣ်န့ၣ် တပျာ်ဝဲဖးဒိၣ်န့ၣ် ကမၤစၢၤပှၤဒ်သိး ပတစံၣ်ညီၣ် ယဟိဝၤယွၤ ဒ်ပတၢ်ထံၣ်အိၣ်ဝဲအသိးဘၣ်. ဖဲစီၤယိၤဘး ထံၣ်ဘၣ်တၢ်ကီတၢ်ခဲဝံၤအလီၢ်ခံ အနၢ်ပၢၢ်ထီၣ်ဝဲတၢ်ဂ့ၢ်တဖၣ်အံၤ. ဖဲအထံၣ်ဘၣ် တၢ်ကီတၢ်ခဲအခါ အသးဟးဂီၤ ဒီးအသးစၢၢ်ဆၢလီၤထဲ အနီၢ်ကစၢ်တၢ်ကီတၢ်ခဲ ဒီးအတသ့ၣ်နီၣ်တၢ်ဂ့ၢ်လၢ အရ့ဒိၣ်လၢၤဘၣ်. အဃိ ယဟိဝၤယွၤ မၤစၢၤအီၤဒ်သိး အကအိၣ်ဒီးတၢ်ထံၣ်လၢအလဲၢ်ခီဖျိ သံကွၢ်အီၤတၢ်သံကွၢ်အဖျၢၣ် ၇၀ ဘျဲၣ်. ဖဲန့ၣ်န့ၣ် စီၤယိၤဘး စံးဆၢ ယဟိဝၤယွၤတဘၣ်ဘၣ်အဃိ အဝဲနၢ်ပၢၢ်ထီၣ်ဝဲလၢ အတသ့ၣ်ညါတၢ်ဂ့ၢ်ခဲလၢာ်ဘၣ်. အဃိ အဝဲပာ်ဖျါထီၣ် တၢ်ဆီၣ်လီၤသး ဒီးဆီတလဲအတၢ်ထံၣ်.—ဖး ယိၤဘး ၄၂:၁-၆.

တၢး၁၇.၀၆ ၂၄ ¶၁၂

သးစၢၢ်ဆၢ တၢ်ဂ့ၢ်လၢအရ့ဒိၣ်တက့ၢ်

^၁၂ စီၤယိၤဘး တူၢ်ဘၣ်တၢ်နးနးကလဲာ်ဘၣ်ဆၣ် ယဟိဝၤယွၤ တဲအီၤဒ်အံၤန့ၣ် မ့ၢ်လၢယဟိဝၤယွၤ တအိၣ်ဒီးတၢ်အဲၣ်တၢ်ကွံအဃိဧါ. တမ့ၢ်ဒ်န့ၣ်ဘၣ်. စီၤယိၤဘးစ့ၢ်ကီး တဆိကမိၣ်ဝဲဒ်န့ၣ်ဘၣ်. စီၤယိၤဘး နၢ်ပၢၢ်ဒီးတူၢ်လိာ်ဝဲ ယဟိဝၤယွၤ အတၢ်သိၣ်ဃီၣ်လီၤ. အဝဲစံးဝဲလၢ– “ယသးဘၣ်အၢလီၤယသး, ဒီးပီၢ်ယၢ်လီၤက့ၤယသးလၢ ဟီၣ်ခိၣ်အကမူၣ်ဒီး ဖၣ်ဆါအကျါလီၤ.” (ယိၤဘး ၄၂:၁-၆) ပှၤသးစၢ်လၢအမံၤမ့ၢ် စီၤအလံဟူၤစ့ၢ်ကီး မၤစၢၤစီၤယိၤဘး ဒ်သိးကဆီတလဲ အတၢ်ထံၣ်လီၤ. (ယိၤဘး ၃၂:၅-၁၀) စီၤယိၤဘးဒိကနၣ်ဝဲ ယဟိဝၤယွၤ အတၢ်ဟ့ၣ်ကူၣ်လၢအအိၣ်ဒီး တၢ်အဲၣ်တၢ်ကွံ ဒီးဆီတလဲဝဲအတၢ်ထံၣ်လီၤ. ယဟိဝၤယွၤ ထံၣ်ဝဲလၢ စီၤယိၤဘး ဆီတလဲအသးအဃိ အဝဲဒုးသ့ၣ်ညါ ပှၤအဂၤတဖၣ်လၢ အဝဲပာ်လုၢ်ပာ်ပှ့ၤဝဲ စီၤယိၤဘးအတၢ်သးတီန့ၣ်လီၤ.—ယိၤဘး ၄၂:၇, ၈.

တၢး၂၂.၀၆ ၂၅ ¶၁၇-၁၈

မုၢ်လၢ်တၢ်လၢ ယဟိဝၤယွၤ

^၁၇ ဒ်စီၤယိၤဘးအသိး ယဟိဝၤယွၤ အပှၤဂီၢ်မုၢ် လၢအထံၣ်ဘၣ်ဒီး တၢ်မၤကွၢ် ဘၣ်ဆၣ် ဆဲးအိၣ်ဒီးတၢ်သးဒူ ဒီးတဟ့ၣ်အၡူဘၣ်န့ၣ် အိၣ်ဝဲအါမး. ဖဲတၢ်မၢဖိပီလူး ကွဲးဝဲလံာ်ဧ့ၤဘြံၤအခါ အပာ်ဖျါထီၣ်ဝဲလၢ အဝဲသ့ၣ်မ့ၢ် “ပှၤအုၣ်အသးအါအါဂီၢ်ဂီၢ်.” (ဧ့ၤဘြံၤ ၁၂:၁) အဝဲသ့ၣ်န့ၣ် ထံၣ်ဘၣ်ဒီး တၢ်မၤကွၢ်အါမး ဘၣ်ဆၣ် အဝဲသ့ၣ် ဆဲးတီဒီးယဟိဝၤယွၤ လၢအတၢ်အိၣ်မူဒီတစိၤ. (ဧ့ၤဘြံၤ ၁၁:၃၆-၄၀) အဝဲသ့ၣ် တၢ်တူၢ်န့ၢ်ခီၣ်ကဲ ဒီးအတၢ်ဂုာ်ကျဲးစၢးန့ၣ် တကဲထီၣ် တၢ်ကလီကလီဘၣ်. ဖဲအဝဲသ့ၣ်အိၣ်မူ အဆၢကတီၢ် အဝဲသ့ၣ်တထံၣ်ဘၣ် ကစၢ်ယွၤ အတၢ်အၢၣ်လီၤအီလီၤတဖၣ် ဟဲလၢထီၣ်ပှဲၤထီၣ်ဝဲ ခဲလၢာ်ဘၣ်. ဘၣ်ဆၣ် အဝဲသ့ၣ်ဆဲးမုၢ်လၢ်တၢ် လၢယဟိဝၤယွၤ. မ့ၢ်လၢအဝဲသ့ၣ် သ့ၣ်ညါဝဲလၢ ကစၢ်ယွၤ ဘၣ်သူၣ်ဘၣ်သး အဝဲသ့ၣ်အဃိ အဝဲသ့ၣ်နာ်ဝဲလၢ အကထံၣ်ဘၣ် ကစၢ်ယွၤတၢ်အၢၣ်လီၤအီလီၤ ဟဲလၢထီၣ်ပှဲၤထီၣ် သပှၢ်ကတၢၢ်. (ဧ့ၤဘြံၤ ၁၁:၄, ၅) အဝဲသ့ၣ် အဒိအတဲာ်န့ၣ် မၤဆူၣ်ထီၣ်ပသးလၢ ပကဆဲးမုၢ်လၢ်တၢ်လၢ ယဟိဝၤယွၤအအိၣ်.

^၁၈ ဆၢကတီၢ်ခဲအံၤ ဟီၣ်ခိၣ်အတၢ်အိၣ်သးန့ၣ် နးထီၣ်မၣ်နးထီၣ်. (၂ တံၤမသ့း ၃:၁၃) မုၣ်ကီၤလံၢ်န့ၣ် ဆဲးမၤကွၢ်ကစၢ်ယွၤ အပှၤဂီၢ်မုၢ်ထီဘိ. ဒီးတၢ်ကီတၢ်ခဲလၢ ပကထံၣ်ဘၣ်အီၤလၢ ခါဆူညါန့ၣ် အိၣ်ဝဲအဃိ ပကဘၣ်ပာ်လီၤပသးလၢ ပကဆဲးမၤ ယဟိဝၤယွၤအတၢ်မၤလၢ တၢ်သူၣ်ဆူၣ်သးဆူၣ် ဒီး “မုၢ်လၢ်တၢ်လၢ ယွၤလၢအမူဝဲတဂၤန့ၣ် အအိၣ်.” (၁ တံၤမသ့း ၄:၁၀) ပမ့ၢ်ကွၢ် စီၤယိၤဘးအဂ့ၢ်န့ၣ် ပသ့ၣ်ညါဘၣ်လၢ “ယဟိဝၤယွၤန့ၣ် ပှဲၤဝဲဒီးတၢ်အဲၣ် တၢ်ကဟုကယာ် ဒီးတၢ်သးကညီၤ.” (ယၤကိာ် ၅:၁၁) ပဝဲစ့ၢ်ကီး ပကဘၣ်တီဒီး ယဟိဝၤယွၤ ထီဘိ ဒီးနာ်သပှၢ်တၢၢ်လၢ အကဆိၣ်ဂ့ၤ “ပှၤလၢအဃုအီၤလၢ တၢ်သူၣ်ဆူၣ်သးဆူၣ် အပူၤ.”—ဖး ဧ့ၤဘြံၤ ၁၁:၆.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2 ၈၀၈

တၢ်ဒုၣ်ဒွဲၣ်စံးအၢ

စီၤယိၤဘးန့ၣ် ပှၤတဲဆါအီၤနးမး သနာ်က့ အဝဲဆဲးအိၣ်ဒီးတၢ်သးတီ. ဘၣ်ဆၣ် ဘၣ်တဘျီအတၢ်ထံၣ်န့ၣ် ကမၣ်ဝဲ ဒီးအမၤကမၣ်ဘၣ်တၢ် ဒီးကစၢ်ယွၤ ဘှီဘၣ်ထီၣ်က့ၤအီၤ. ဘၣ်ဃးဒီး စီၤယိၤဘးန့ၣ် စီၤအလံဟူၤ တဲဝဲလၢ “ပှၤလၢအလီၤဂာ်ဒီး စီၤယိၤဘးန့ၣ် အိၣ်တဂၤဂၤဧါ. အဝဲဘၣ်သးအီ တၢ်တဲဆါတဖၣ် ဒ်အအီထံ အသိးလီၤ.” (ဘး ၃၄:၇) စီၤယိၤဘး အသးစၢၢ်ဆၢဝဲ အနီၢ်ကစၢ်တၢ်တီတၢ်လိၤ ဒိၣ်န့ၢ်ဒံး ကစၢ်ယွၤအတၢ်တီတၢ်လိၤအဃိ လၢအကဘၣ်ပာ်ဖျါထီၣ်လၢ ကစၢ်ယွၤမ့ၢ်ပှၤတီပှၤလိၤအလီၢ် အဝဲဂုာ်ကျဲးစၢး ပာ်ဖျါထီၣ်ဝဲလၢ အနီၢ်ကစၢ် တၢ်တီတၢ်လိၤ. (ဘး ၃၅:၂; ၃၆:၂၄) ဖဲစီၤယိၤဘးအ “သကိး” သၢဂၤ ဒုၣ်ဒွဲၣ်စံးအၢအီၤအခါ အထံၣ်ဝဲဒ် ပှၤဒုၣ်ဒွဲၣ်စံးအၢအီၤ ဒီးအဝဲတထံၣ်ဝဲလၢ ပှၤဒုၣ်ဒွဲၣ်စံးအၢ ယဟိဝၤယွၤဘၣ်. အဃိ အလီၤဂာ်ဒ်သိးဒီး အဝဲတူၢ်လိာ်ဝဲ တၢ်ဒုၣ်ဒွဲၣ်စံးအၢ ဒ်ပှၤလၢအဘၣ်သးအီထံတဂၤ အီလီၤထံအသိး. လၢခံန့ၣ် ကစၢ်ယွၤတဲဘၣ် စီၤယိၤဘးလၢ ပှၤလၢအဒုၣ်ဒွဲၣ်စံးအၢ စီၤယိၤဘးတဖၣ်န့ၣ် အလီၤဂာ်ဒ်သိးဒီး အတဲကစၢ်ယွၤအဂ့ၢ်လၢ တတီတလိၤဘၣ်. (ဘး ၄၂:၇) ဒ်န့ၣ်အသိး ဖဲပှၤအံၣ်စရ့လးဖိတဖၣ် ဃ့ဝဲ ဝံၡမူၤအ့လးလၢ စီၤပၤအခါ ကစၢ်ယွၤတဲဘၣ် ဝံၡမူၤအ့လးလၢ “နီၢ်ကီၢ်န့ၣ် တမ့ၢ်လၢ အဝဲသ့ၣ် စူးကွံာ်ညိကွံာ် နၤဘၣ်. ယမ့ၢ်ပှၤတဂၤလၢ အဝဲသ့ၣ် စူးကွံာ်ညိကွံာ် ဒ်အစီၤပၤ အသိးလီၤ.” (၁ မူၤ ၈:၇) ဒီးဘၣ်တဘျီန့ၣ် ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “ပှၤကလုာ်ခဲလၢာ် ကသးဟ့သု [တမ့ၢ်လၢ သုနီၢ်ကစၢ်အဃိဘၣ်] လၢယမံၤအဃိလီၤ.” (မး ၂၄:၉) ပမ့ၢ်သ့ၣ်နီၣ်ထီၣ် တၢ်ဂ့ၢ်တဖၣ်အံၤန့ၣ် ကမၤစၢၤပှၤဒ်သိး ပလဲၤခီဖျိ တၢ်ဒုၣ်ဒွဲၣ်စံးအၢကန့ၢ် ဒီးပကဒိးန့ၢ်ဘၣ်တၢ်ဆိၣ်ဂ့ၤအဂီၢ်.—လူၤ ၆:၂၂, ၂၃.

လါဖ့ၤဘြူၤအါရံၤ ၅-၁၁

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၁-၄

ဃုထၢယွၤအဘီအမုၢ် အတၢ်ပၢ

တၢး၂၁.၀၉ ၁၅ ¶၈

“ယကဒုးကနိး ပှၤကိးကလုာ်ဒဲး”

^၈ ဘၣ်ဃးဒီး တၢ်ကစီၣ်အံၤ ပှၤအါဂၤထံၣ်ဝဲဒ်လဲၣ်. ပှၤအါတက့ၢ် တတူၢ်လိာ်ဝဲဘၣ်. (ဖး စံးထီၣ်ပတြၢၤ ၂:၁-၃ တက့ၢ်.) ပှၤကလုာ်တဖၣ် သးဒိၣ်ထီၣ်တၢ် ခီဖျိလၢ အဝဲသ့ၣ်တတူၢ်လိာ် ပှၤလၢယဟိဝၤယွၤ ပာ်ထီၣ်ဝဲအဃိလီၤ. ဘီမုၢ်တၢ်ကစီၣ်လၢ ပစံၣ်တဲၤတဲလီၤအီၤန့ၣ် အဝဲသ့ၣ်တထံၣ်ဝဲဒ် “တၢ်သးခုကစီၣ်” အသိးဘၣ်. ပဒိၣ်ပပှၢ်တနီၤ တဟ့ၣ်အခွဲးလၢ ပကစံၣ်တဲၤတဲလီၤတၢ် နီတစဲးဘၣ်. ပဒိၣ်ပပှၢ်အါတက့ၢ်န့ၣ် တဲဝဲလၢ အဘူၣ်ထီၣ်ဘါထီၣ်ကစၢ်ယွၤ ဘၣ်ဆၣ် အဝဲသ့ၣ်တအဲၣ်ဒိး ပာ်တ့ၢ်ကွံာ် အစိကမီၤဒီး အလီၢ်အလၤဘၣ်. ဒ်ပဒိၣ်ပပှၢ်တဖၣ် ထီဒါယ့ၣ်ၡူးအသိး မုၢ်မဆါတနံၤအံၤ ပဒိၣ်ပပှၢ်တဖၣ် ထီဒါဝဲ ယဟိဝၤယွၤအခ့အပှၤလၢ အသးတီတဖၣ်လီၤ.—မၤတၢ် ၄:၂၅-၂၈.

တၢး၁၆.၀၄ ၂၄ ¶၁၁

ပၢၤဃာ် နတၢ်အိၣ်ဘၢၣ်စၢၤလၢ ဟီၣ်ခိၣ်အံၤတက့ၢ်

^၁၁ တၢ်အဲၣ်ကျိၣ်အဲၣ်စ့. ကျိၣ်စ့ ဒီးတၢ်ထူးတၢ်တီၤတဖၣ် မ့ၢ်ကဲထီၣ်တၢ်အရ့ဒိၣ်ကတၢၢ်လၢပဂီၢ်န့ၣ် ပကပၢၤဃာ် တၢ်အိၣ်ဘၢၣ်စၢၤအဂီၢ် ကကီဝဲန့ၣ်လီၤ. ဖဲ ၁၉၇၀ အလီၢ်ခံ ယဟိဝၤပှၤအုၣ်အသးအါဂၤလၢ အိၣ်လၢကီၢ်မၤလၣ်ဝံၣ်အပူၤန့ၣ် ဘၣ်ပာ်တ့ၢ်ကွံာ်ဝဲ အတၢ်ဖိတၢ်လံၤခဲလၢာ် မ့ၢ်လၢအဝဲသ့ၣ်တဆီၣ်ထွဲဝဲ ထံဂ့ၢ်ကီၢ်ဂ့ၢ်အဃိလီၤ. ဘၣ်ဆၣ်လီၤသးအုးဒိၣ်မးလၢ ဒီပုၢ်ဝဲၢ်တနီၤနီၤန့ၣ် ပာ်တ့ၢ်ကွံာ်အဟံၣ်အဃီ ဒီးအတၢ်ထူးတၢ်တီၤ တကဲဘၣ်န့ၣ်လီၤ. ဒီပုၢ်ဝဲၢ်မုၣ်ရူၣ် စံးဝဲ သါသ့ၣ်နီၣ်ထီၣ်က့ၤလၢ “ဒီပုၢ်ဝဲၢ်တနီၤနီၤန့ၣ် ဃ့ၢ်ထီၣ်ကွံာ်ဒီးပှၤဆူ ပှၤဘၣ်ကီဘၣ်ခဲအဒဲကဝီၤန့ၣ်လီၤ. ဘၣ်ဆၣ် လၢခံအဝဲသ့ၣ် အိၣ်ဝဲတကဲလၢၤဘၣ်အဃိ က့ၤကဒါက့ၤလၢအဟံၣ်အဃီဒီး နုာ်လီၤဆီၣ်ထွဲဝဲ ပှၤမၤထံဂ့ၢ်ကီၢ်ဂ့ၢ်တဖၣ်န့ၣ်လီၤ.” ဘၣ်ဆၣ် ယွၤအပှၤဂီၢ်မုၢ် အါဒၣ်တက့ၢ်န့ၣ် တမ့ၢ်ဒ်န့ၢ်ဘၣ်. အဝဲသ့ၣ်အစ့မ့ၢ်အိၣ်စှၤ မ့တမ့ၢ် အဟံၣ်အဃီအတၢ်ထူးတၢ်တီၤတဖၣ် ဘၣ်တၢ်ဟံးန့ၢ်အီၤခဲလၢာ် သနာ်က့ အဝဲသ့ၣ် အသးတီဒီးယွၤန့ၣ်လီၤ.—ဧ့ၤဘြံၤ ၁၀:၃၄.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1 ၄၂၅

ဖ့

ဖ့န့ၣ်အကဲဝဲ ဘုဘ့ၣ် ဒ်သိးဒီး ဘုမုယီၤ ဒီးဘုကၠူၣ်အဘ့ၣ်. လံာ်စီဆှံသူဝဲ ဖ့ဒ်တၢ်အဒိအသိး သနာ်က့ အဒုးသ့ၣ်ညါပှၤလၢ လၢပျၢၤပှၤမၤအီၣ်ဘုအဂ့ၢ်. ဖဲပှၤမၤဘုဝံၤအလီၢ်ခံ ဘုဘ့ၣ်တဖၣ်န့ၣ် ပှၤအီၣ်ဝဲတသ့လၢၤဘၣ်အဃိ အတကဲဘျုးလၢၤဘၣ်. အဃိ ပှၤထိၣ်သတြီၤအီၤဒီး တၢ်လၢအဖှံ, တၢ်လၢအတကဲဘျုးဘၣ်, တၢ်လၢပှၤတလီကီအီၤဘၣ်, တၢ်လၢပှၤဘၣ်ခွဲဖးအီၤဒီး တၢ်လၢအဂ့ၤ ဒီးတၢ်လၢပှၤကဘၣ်တၢၤကွံာ်အီၤန့ၣ် မ့ၢ်တၢ်လၢအကြၢးဝဲဘၣ်ဝဲ.

အဆိကတၢၢ်န့ၣ် ဖဲပှၤတီၢ်လီၤဆှူဘုအခါ ဘုအသိၣ်တဖၣ်န့ၣ် လီၤဆှူကွံာ်ဝဲ ဒီးဖဲပှၤဝံၢ်ဘုအခါ ဘုသိၣ်တဖၣ်န့ၣ် ဒံကွံာ်လၢ ကလံၤကျါ ဒ်ဖၣ်ဆါအသိး. ပှၤမၤဘုတခါအံၤန့ၣ် တဘျီတခီၣ် ပှၤသူဝဲဒ်သိး ကပာ်ဖျါထီၣ်ဝဲလၢ ယဟိဝၤယွၤ ကမၤဟးဂီၤကွံာ်ဝဲ ပှၤလၢအစူးကွံာ်ညိကွံာ်တၢ်နာ် လၢအပှၤဂီၢ်မုၢ်အကျါ ဒီးကမၤဟးဂီၤကွံာ်ဝဲ ပှၤအၢပှၤသီ ဒီးပှၤကလုာ်လၢ အထီဒါတၢ်တဖၣ်ဒ်လဲၣ်. (ဘး ၂၁:၁၈; စံး ၁:၄; ၃၅:၅; ၡါ ၁၇:၁၃; ၂၉:၅; ၄၁:၁၅; ဟိၤ ၁၃:၃) ယွၤအဘီအမုၢ် ကမၤလီၤကလဲကွံာ်ဒုၣ်ဒါတဖၣ်အဃိ ဒုၣ်ဒါတဖၣ် ကဒံကွံာ်ဝဲညီညီဖိ ဒ်ဘုသိၣ်တဖၣ်အသိး.—ဒၤ ၂:၃၅.

ညီနုၢ်န့ၣ် ပှၤပာ်ဖှိၣ်ဝဲ ဘုဘ့ၣ်တဖၣ် ဒီးပှၤဒွဲၣ်အူက့ၤအီၤ ဒ်သိးအသုတဟဲက့ၤ ဒံလီၤကဒါလၢ ဘုပူၣ်အကျါတဂ့ၤအဂီၢ်. ဒ်န့ၣ်အသိး စီၤယိၤဟၣ် တဲဆိပာ်စၢၤဝဲလၢ တၢ်ဘူၣ်တၢ်ဘါလၢ အကမၣ်တဖၣ် ကဘၣ်တၢ်ဒွဲၣ်အူကွံာ် ဒီးမၤဟးဂီၤကွံာ်အီၤ. အဝဲတဲဝဲလၢ ပှၤမၤဘု လၢအမ့ၢ်ယ့ၣ်ၡူးန့ၣ် ကပာ်ဖှိၣ်အဘု ဒီး “မ့မ့ၢ်ဘုဘ့ၣ်န့ၣ် အဝဲကဒွဲၣ်အူကွံာ်ဝဲလၢ မ့ၣ်အူလၢ အလီၤပံာ်တသ့ဘၣ်အပူၤလီၤ.”—မး ၃:၇-၁၂; လူၤ ၃:၁၇.

လါဖ့ၤဘြူၤအါရံၤ ၁၂-၁၈

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၅-၇

ပှၤဂၤမ့ၢ်မၤဝဲ ဒ်လဲၣ်ဂ့ၤဒ်လဲၣ်ဂ့ၤ ဆဲးတီဒီယဟိဝၤယွၤ

တၢး၂၁.၀၃ ၁၅ ¶၇-၈

တၢ်ဖးလံာ်စီဆှံန့ၣ် မၤစၢၤနၤလၢ နလဲၤခီဖျိ တၢ်ကီတၢ်ခဲတဖၣ်သ့ဒ်လဲၣ်

^၇ မ့ၢ်နတံၤသကိး မ့တမ့ၢ် နဟံၣ်ဖိဃီဖိ ထီဒါနၤအိၣ်တဂၤဂၤဧါ. မ့ၢ်အိၣ်န့ၣ် ဖဲစီၤဒၤဝံး အဖိခွါ စီၤအးဘၡါလိၣ် ထီဒါက့ၤအီၤ ဒီးဂုာ်န့ၢ်ဝဲ စီၤပၤအလီၢ်အခါ စီၤဒၤဝံး မၤဝဲဒ်လဲၣ်. ဘၣ်ဃးဒီး တၢ်ဂ့ၢ်အံၤ နမ့ၢ်မၤလိအီၤန့ၣ် ကကဲဘျုးလၢနဂီၢ်လီၤ.—၂ ၡမူၤအ့လး ၁၅:၅-၁၄, ၃၁; ၁၈:၆-၁၄.

^၈ (၁) ဃ့ထုကဖၣ်တက့ၢ်. တချုးလၢနမၤလိလံာ်စီဆှံဒံးဘၣ် နမ့ၢ်ဃ့ဘါထုကဖၣ်န့ၣ် အဘျုးကအိၣ်ဝဲလၢနဂီၢ်လီၤ. ဒ်စီၤဒၤဝံးအသိး ခီဖျိလၢ ပှၤရ့ဒီးနၤတတီတလိၤဘၣ်အဃိ နတၢ်တူၢ်ဘၣ်အိၣ်ဒ်လဲၣ်န့ၣ် တဲပၠးဘၣ်ယဟိဝၤယွၤတက့ၢ်. (စံးထီၣ်ပတြၢၤ ၆:၆-၉) တဲဘၣ်ယဟိဝၤယွၤတၢ်ဂ့ၢ်တဖၣ်ပျီပျီ ဝံၤဒီးဃ့အတၢ်မၤစၢၤ ဒ်သိးဒီးနကထံၣ်န့ၢ် လံာ်စီဆှံအတၢ်ဟံးစုနဲၣ်ကျဲလၢ ကမၤစၢၤနၤအဂီၢ်န့ၣ်တက့ၢ် ဝံၤဒီးနကသ့ၣ်ညါလၢ နကဘၣ်မၤတၢ်မနုၤလဲၣ်န့ၣ်လီၤ.

တၢး၂၀.၀၇ ၈-၉ ¶၃-၄

နာ်လၢနအိၣ်ဒီး တၢ်မ့ၢ်တၢ်တီနီၢ်နီၢ်

^၃ ပတၢ်နာ်န့ၣ် တဘၣ်ဒိးသန့ၤထီၣ်အသး ထဲလၢခရံာ်ဖိကဒဲကဒဲ တၢ်အဲၣ်အဖီခိၣ်ဘၣ်. ဘၣ်မနုၤအဃိလဲၣ်. မ့ၢ်လၢပတၢ်နာ် မ့ၢ်ဒိးသန့ၤထီၣ်သးထဲလၢ ခရံာ်ဖိကဒဲကဒဲ တၢ်အဲၣ်အဖီခိၣ်န့ၣ် ပတၢ်နာ်ဟးဂီၤဝဲသ့လီၤ. အဒိ ဖဲပဒီပုၢ်ဝဲၢ်မုၣ်ဒီပုၢ်ဝဲၢ်ခွါ မ့တမ့ၢ် တၢ်အိၣ်ဖှိၣ်သးပှၢ် ဒီးပှၤလဲၤလၢညါ မ့ၢ်မၤဘၣ်တၢ်ကမၣ်ဖးဒိၣ်အခါ မ့ၢ်ပကပတုာ်မၤ ယဟိဝၤယွၤအတၢ်မၤဧါ. တကးဒံးဘၣ် ဖဲပဒီပုၢ်ဝဲၢ်မုၣ်ခွါ မၤဘၣ်ဒိပသး မ့တမ့ၢ် ပှၤလၢအညိကွံာ်တၢ်နာ်တဂၤ မ့ၢ်တဲပှၤလၢ ပနာ်တၢ်န့ၣ်ကမၣ်လံအခါ မ့ၢ်ပကပတုာ်မၤ ယဟိဝၤယွၤအတၢ်မၤစ့ၢ်ကီးဧါ. ပမ့ၢ်အဲၣ်ဒိးလၢ ပတၢ်နာ်ဂၢၢ်ကျၢၤန့ၣ် ပကဘၣ်မၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤလၢပနီၢ်ကစၢ်လီၤ. ပမၤလိန့ၢ် တၢ်မနုၤလဲၣ်. ပတၢ်ရ့လိာ်သးဒီး ယဟိဝၤယွၤ မ့ၢ်ဒိးသန့ၤထီၣ်အသးလၢ ပှၤဂၤအဖီခိၣ်န့ၣ် ပတၢ်နာ်တဂၢၢ်ကျၢၤဝဲဘၣ်. နၤတၢ်အဲၣ် ယဟိဝၤယွၤဒီး အခ့အပှၤတဖၣ်န့ၣ် ကမၤစၢၤနၤဒ်သိး နတၢ်နာ်ကအါထီၣ်အဂီၢ်လီၤ. ဘၣ်ဆၣ် တၢ်လၢအရ့ဒိၣ်ကတၢၢ်န့ၣ် နဘၣ်ဂုာ်ကျဲးစၢး ဃုသ့ၣ်ညါဒီး မၤလိလံာ်စီဆှံတၢ်မ့ၢ်တၢ်တီ ဘၣ်ဃးဒီးယဟိဝၤယွၤအဂ့ၢ် ဒ်သိးနကသ့ၣ်ညါလၢအမ့ၢ် တၢ်မ့ၢ်တၢ်တီနီၢ်နီၢ်လီၤ. တကးဒံးဘၣ် နကဘၣ်နာ် သပှၢ်ကတၢၢ်လၢ လံာ်စီဆှံသိၣ်လိပှၤ တၢ်မ့ၢ်တၢ်တီနီၢ်နီၢ်န့ၣ်လီၤ.—ရိမ့ၤ ၁၂:၂.

^၄ ယ့ၣ်ၡူးတဲဝဲလၢ ပှၤတနီၤကတူၢ်လိာ် တၢ်မ့ၢ်တၢ်တီလၢတၢ် “သးခု” အပူၤလီၤ. ဘၣ်ဆၣ် ဖဲအဝဲသ့ၣ်ထံၣ်ဘၣ် တၢ်ကီတၢ်ခဲအခါ အတၢ်နာ်ကလီၤစှၤဝဲလီၤ. (ဖး မးသဲ ၁၃:၃-၆, ၂၀, ၂၁ တက့ၢ်.) ဘၣ်သ့ၣ်သ့ၣ် အဝဲသ့ၣ်ကဆိကမိၣ်ဘၣ်ဝဲလၢ အမ့ၢ်ပိာ်ယ့ၣ်ၡူးအခံန့ၣ် တထံၣ်ဘၣ် တၢ်မၤကွၢ်ဒီး တၢ်ကီတၢ်ခဲတဖၣ်ဘၣ်. (မးသဲ ၁၆:၂၄) ဒီးအဝဲသ့ၣ် ကဆိကမိၣ်ဘၣ်ဝဲလၢ ယဟိဝၤယွၤကမၤလီၤမၢ်န့ၢ် တၢ်ကီတၢ်ခဲတဖၣ် လၢအဝဲသ့ၣ်အဂီၢ်လီၤ. ဘၣ်ဆၣ် ပအိၣ်မူဘၣ်လၢ ဟီၣ်ခိၣ်လၢအပှဲၤဝဲ တၢ်အၢတၢ်သီတဘ့ၣ်အံၤ အဃိ ပကထံၣ်ဘၣ် တၢ်ကီတၢ်ခဲတဖၣ်လီၤ. တကးဒံးဘၣ် တၢ်အိၣ်သးတဖၣ်စ့ၢ်ကီး ဆီတလဲအဃိ တဘျီတခီၣ် ပတၢ်သးခုလီၤမၢ်ကွံာ်ဝဲလီၤ.—စံးထီၣ်ပတြၢၤ ၆:၆; စံၣ်တဲၤတဲလီၤတၢ် ၉:၁၁.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1 ၉၉၅

တၢ်သွၣ်ခိၣ်

ဖဲ ရိမ့ၤ ၃:၁၃ န့ၣ် စီၤပီလူးတဲဝဲ တၢ်ကတိၤလၢ စံးထီၣ်ပတြၢၤ ၅:၉ အပူၤ ဒီးထိၣ်သတြီၤဝဲ ပှၤအၢပှၤသီတဖၣ် ဒီးပှၤလၢအတဲလံၣ်တဲလီတၢ်တဖၣ် အကိာ်ယူၢ်ဘိဒ် “တၢ်သွၣ်ခိၣ်လၢ အအိၣ်အိးထီၣ်အသး.” တၢ်သွၣ်ခိၣ်လၢ အအိၣ်အိးထီၣ်အသးန့ၣ် အိၣ်ပှဲၤဝဲဒီး ပှၤသံဒီးတၢ်အုၣ်တၢ်ကျၣ်တဖၣ်. ဒ်န့ၣ်အသိး ပှၤအၢပှၤသီတဖၣ်အံၤန့ၣ် အိးထီၣ်အကိာ်ယူၢ်ဘိလၢ ကတဲတၢ်ကတိၤလၢ အမၤသံတၢ် ဒီးအမၤဟးဂီၤတၢ်.—ထိၣ်သတြီၤ မး ၁၅:၁၈-၂၀.

ijwfq ၆၄

ဘၣ်မနုၤအဃိ ယဟိဝၤပှၤအုၣ်အသးတဖၣ် တပၣ်ဃုာ်လၢ မူးပွဲလၢအဘၣ်ဃးဒီး ထံဂ့ၢ်ကီၢ်ဂ့ၢ်ဘၣ်လဲၣ်

ယဟိဝၤပှၤအုၣ်အသးတဖၣ်န့ၣ် ပာ်ကဲဝဲ ပဒိၣ်ပပှၢ်တဖၣ် ဒီးထံကီၢ်အတၢ်ပနီၣ်တဖၣ်. ဒီးပှၤမ့ၢ်ဃုထၢလၢ ကမၤတၢ်အၢၣ်လီၤလၢ ထံကီၢ်အဖီခိၣ်, ယူးယီၣ်နီၣ်တယၢ် ဒီးသးဝံၣ်ထံကီၢ် အတၢ်သးဝံၣ်နာ်က့ အဝဲသ့ၣ် ပာ်ကဲပှၤတၢ်ထံၣ်.

ဘၣ်ဆၣ် မူးပွဲလၢဘၣ်ဃးဒီး ထံဂ့ၢ်ကီၢ်ဂ့ၢ်တဖၣ်န့ၣ် အထီဒါလိာ်အသးဒီး လံာ်စီဆှံအတၢ်သိၣ်တၢ်သီအဃိ ပဝဲယဟိဝၤပှၤအုၣ်အသးတဖၣ်န့ၣ် ပတပၣ်ဃုာ်လၢ မူးပွဲတဖၣ်အံၤဘၣ်. ဒ်ပပာ်ကဲ ပှၤတၢ်ထံၣ်အသိး ပအဲၣ်ဒိးလၢ ပှၤပာ်ကဲ ပတၢ်စူၢ်တၢ်နာ်စ့ၢ်ကီး.

လၢတၢ်မၤလိအံၤအပူၤ ပကသ့ၣ်ညါဘၣ်

ဘၣ်ဃးဒီး ထံဂ့ၢ်ကီၢ်ဂ့ၢ်မူးပွဲတဖၣ်န့ၣ် လံာ်စီဆှံ အတၢ်ဟံးစုနဲၣ်ကျဲ အိၣ်ဒ်လဲၣ်

ပဒိၣ်အတၢ်သိၣ်တၢ်သီ မ့ၢ်အိၣ်လၢ ပကဘၣ်ပၣ်ဃုာ်လၢ မူးပွဲတဖၣ်အံၤဟီမီၤ

ယဟိဝၤပှၤအုၣ်အသးတဖၣ်န့ၣ် အအဲၣ်ဒိး ဒုးအိၣ်ထီၣ်ဝဲ တၢ်သိၣ်တၢ်သီလၢ ဘၣ်ဃးဒီး ပှၤတဝၢဖိ မ့တမ့ၢ် ထံဂ့ၢ်ကီၢ်ဂ့ၢ် တမံၤမံၤဧါ.

ပတၢ်ဃုထၢန့ၣ် ဒိးသန့ၤထီၣ်အသးလၢ လံာ်စီဆှံ အတၢ်သိၣ်လိခံထံၣ်အံၤ အဖီခိၣ်

ပှၤလၢအကြၢးဒိးန့ၢ်ဘၣ် ပတၢ်ဘူၣ်ထီၣ်ဘါထီၣ်န့ၣ် အိၣ်ထဲကစၢ်ယွၤတဂၤလီၤ. လံာ်စီဆှံ တဲဝဲလၢ “နကဘၣ် ဘူၣ်ထီၣ်ဘါထီၣ် နကစၢ်ယဟိဝၤယွၤ ဒီးနကဘၣ်မၤထဲ အတၢ်လီၤ.” (လူၤကၣ် ၄:၈) ညီနုၢ် ပှၤမ့ၢ်မၤတၢ်အၢၣ်လီၤလၢ ထံကီၢ်အဖီခိၣ် ဒီးထံကီၢ်အတၢ်သးဝံၣ်န့ၣ် အပၣ်ဃုာ်ဒီး တၢ်ကတိၤလၢ ပှၤအၢၣ်လီၤလၢ ပှၤကဟ့ၣ်လီၤအသးလၢ ထံကီၢ်အဂီၢ် ဒိၣ်န့ၢ်ဒံး တၢ်အဂၤခဲလၢာ်. အဃိ ယဟိဝၤပှၤအုၣ်အသးတဖၣ်န့ၣ် အသးလၢအသ့ၣ်ညါဒၣ်တၢ် တဟ့ၣ်အခွဲးလၢ အကပၣ်ဃုာ်လၢ မူးပွဲလၢ အဘၣ်ဃးဒီး ထံဂ့ၢ်ကီၢ်ဂ့ၢ်ဘၣ်.

ယဟိဝၤပှၤအုၣ်အသးတဖၣ် ထံၣ်ဝဲလၢ ပှၤယူးယီၣ်နီၣ်တယၢ်န့ၣ် အလီၤဂာ်ဒ်သိး ပှၤဘါတၢ်ဂီၤတၢ်ဖှီၣ် ဒီးလံာ်စီဆှံန့ၣ် တြီဝဲ ပှၤဘါတၢ်ဂီၤတၢ်ဖှီၣ်. (၁ ကရံၣ်သူး ၁၀:၁၄) ပှၤကူၣ်ဘၣ်ကူၣ်သ့တနီၤ တဲဝဲလၢ နီၣ်တယၢ်န့ၣ် အကဲဝဲ တၢ်ဘူၣ်တၢ်ဘါ အတၢ်ပနီၣ်. ခါထၢၤ ကၠ့ၤ ဟ့ၣ် ဟါယၢၤ လၢအကွဲး တၢ်စံၣ်စိၤတဲစိၤန့ၣ် တဲဝဲလၢ “လၢပစိၤခဲအံၤန့ၣ် ပှၤတနီၤပာ်ဒိၣ်ဝဲ နီၣ်တယၢ် ဒီးအထံၣ်ဝဲ နီၣ်တယၢ်ဒ် တၢ်တမံၤလၢ ပှၤဘူၣ်ထီၣ်ဘါထီၣ်အီၤ.” ဘၣ်ဃးဒီး ခရံာ်ဖိလၢညါတဖၣ်န့ၣ် ဒဲနံးယၢၤ ဖံၤ မဲနံး သ့ၣ်ညါဘၣ်ဝဲလၢ “ခရံာ်ဖိတဖၣ် တလုၢ်ထီၣ်တၢ်လၢ [ရိမ့ၤ] အစီၤပၤ အဂီၢ်ဘၣ် ဒ်သိးဒီး ခရံာ်ဖိလၢပစိၤခဲအံၤတဖၣ် တယူးယီၣ် နီၣ်တယၢ်ဘၣ်အသိးလီၤ.”

ယဟိဝၤပှၤအုၣ်အသးတဖၣ်န့ၣ် တယူးယီၣ် နီၣ်တယၢ်ဘၣ်သနာ်က့ အဝဲသ့ၣ် တမၤဟးဂီၤကွံာ်ဝဲ ဒီးဒွဲၣ်အူကွံာ်ဝဲဘၣ်. ဒီးအတမၤဝဲဒ်သိး အတပာ်ကဲ ထံကီၢ်အတၢ်ပနီၣ် တမံၤဂ့ၤတမံၤဂ့ၤန့ၣ်ဘၣ်.

လၢကစၢ်ယွၤအမဲာ်ညါန့ၣ် ပှၤခဲလၢာ်န့ၣ် ဒ်သိးသိး. (မၤတၢ် ၁၀:၃၄, ၃၅) လံာ်စီဆှံ တဲဝဲလၢ ကစၢ်ယွၤ “ဒုးအိၣ်ထီၣ် ပှၤဟီၣ်ခိၣ်ဖိ ကိးကလုာ်ဒဲးလၢ အအိၣ်ဝဲဆိးဝဲလၢ ဟီၣ်ခိၣ်ချၢ ခီဖျိလၢ ပိာ်ခွါတဂၤလီၤ.” (မၤတၢ် ၁၇:၂၆) အဃိ ယဟိဝၤပှၤအုၣ်အသးတဖၣ် နာ်ဝဲလၢ ပှၤမ့ၢ်ပာ်ဒိၣ် ကလုာ်ဒူၣ်တဒူၣ်ဒူၣ် မ့တမ့ၢ် ထံကီၢ်တဘ့ၣ်ဘ့ၣ် ဒိၣ်န့ၢ်ဒံး ပှၤအဂၤန့ၣ် ကမၣ်ဝဲ. ဒီးပှၤအိၣ်လၢ တၢ်လီၢ်ဖဲလဲၣ်ဂ့ၤဖဲလဲၣ်ဂ့ၤ ပပာ်ကဲပှၤကိးဂၤဒဲး.—၁ ပ့းတရူး ၂:၁၇.

ပဒိၣ်အတၢ်သိၣ်တၢ်သီ မ့ၢ်အိၣ်လၢ ပကဘၣ်ပၣ်ဃုာ်လၢ မူးပွဲတဖၣ်အံၤဟီမီၤ

ယဟိဝၤပှၤအုၣ်အသးတဖၣ်န့ၣ် တထီဒါပဒိၣ်ဘၣ်. အဝဲသ့ၣ် နာ်ဝဲလၢ ပဒိၣ်ပပှၢ်အတၢ်ပၢန့ၣ် မ့ၢ်ဝဲ “ကစၢ်ယွၤ အတၢ်ရဲၣ်တၢ်ကျဲၤ” တခါ ဒီးကစၢ်ယွၤဟ့ၣ်အခွဲးလၢ အကအိၣ်ဝဲ. (ရိမ့ၤ ၁၃:၁-၇) ဒီးအဝဲသ့ၣ် နာ်ဝဲလၢ ခရံာ်ဖိတဖၣ်န့ၣ် ကြၢးဒိကနၣ် ပဒိၣ်ပပှၢ် အတၢ်သိၣ်တၢ်သီ.—လူၤကၣ် ၂၀:၂၅.

ကစၢ်ယွၤ အတၢ်သိၣ်တၢ်သီ ဒီးပဒိၣ်အတၢ်သိၣ်တၢ်သီ မ့ၢ်ထီဒါလိာ်အသးဟီမီၤ. အဝဲသ့ၣ် မၤဝဲဒ်လဲၣ်. တဘျီတခီၣ် လၢတၢ်အိၣ်သးတနီၤန့ၣ် အဝဲသ့ၣ် ဃ့ဝဲပဒိၣ်လၢ အကဆီတလဲန့ၢ် အဝဲသ့ၣ် တၢ်သိၣ်တၢ်သီ. ဒီးပှၤဆီတလဲဝဲ တၢ်သိၣ်တၢ်သီ မ့ၢ်တသ့ဘၣ်န့ၣ် အဝဲသ့ၣ် ဃုထၢဝဲလၢ “ကဒိကနၣ် ပှၤကညီအလီၢ်” က “ဒိကနၣ် ကစၢ်ယွၤ အကလုၢ်လီၤ.”—မၤတၢ် ၅:၂၉.

မ့ၢ်ဘၣ်ဃးဒီး ပှၤတဝၢဖိ မ့တမ့ၢ် ထံဂ့ၢ်ကီၢ်ဂ့ၢ်န့ၣ် ယဟိဝၤပှၤအုၣ်အသးတဖၣ် တအိၣ်ဃူဒီး ပှၤနီတဖုဘၣ်. ပတမၤတၢ်အၢၣ်လီၤ လၢထံကီၢ်အဖီခိၣ်ဘၣ်, ပတယူးယီၣ် နီၣ်တယၢ်ဘၣ် ဒီးပတသးဝံၣ် ထံကီၢ်အတၢ်သးဝံၣ်ဘၣ်န့ၣ် တမ့ၢ်လၢ ပမၤထံဂ့ၢ်ကီၢ်ဂ့ၢ်အဃိဘၣ်. မ့ၢ်လၢပအဲၣ်ဒိးမၤထွဲ လံာ်စီဆှံ အတၢ်ဟံးစုနဲၣ်ကျဲအဃိ ပတပၣ်ဃုာ်လၢ မူးပွဲလၢ အဘၣ်ဃးဒီး ထံဂ့ၢ်ကီၢ်ဂ့ၢ်ဘၣ်.

လါဖ့ၤဘြူၤအါရံၤ ၁၉-၂၅

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ|စံးထီၣ်ပတြၢၤ ၈-၁၀

“အိ ယဟိဝၤယွၤဧၢ, ယကစံးထီၣ်ပတြၢၤနၤ”

တၢး၂၁.၀၈ ၃ ¶၆

ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ နကဲထီၣ်ဘၣ် ယဟိဝၤယွၤ အဟံၣ်ဖိဃီဖိ

^၆ ယဟိဝၤယွၤတ့လီၤန့ၢ်ပှၤ ဟီၣ်ခိၣ်ဃံလၤ တဖျၢၣ်လၢပဂီၢ်လီၤ. တချုးလၢ ကစၢ်ယွၤတ့လီၤ ပှၤဟီၣ်ခိၣ်ဖိအဆိကတၢၢ်တဂၤ ဒံးဘၣ်န့ၣ် အဝဲကတဲာ်ကတီၤ ပာ်စၢၤဟီၣ်ခိၣ်လီၤ. (ယိၤဘး ၃၈:၄-၆; ယံးရမံယၤ ၁၀:၁၂) မ့ၢ်လၢကစၢ်ယွၤ အသးဂ့ၤဒီးသးအိၣ်ဟ့ၣ်တၢ်ညီအဃိ အဝဲတ့လီၤတၢ်ဒီဒူၣ် လၢကမၤသးခုပှၤအဂီၢ်လီၤ. (စံးထီၣ်ပတြၢၤ ၁၀၄:၁၄, ၁၅, ၂၄) ဖဲကစၢ်ယွၤတ့လီၤတၢ်ဝံၤအလီၢ်ခံ အကွၢ်အတၢ်ဘၣ်တ့တဖၣ် ဒီးအ “ထံၣ်ဝဲလၢအဂ့ၤလီၤ.” (၁ မိၤၡ့ ၁:၁၀, ၁၂, ၃၁) ယဟိဝၤယွၤ ပာ်လုၢ်ပာ်ပှ့ၤပှၤဟီၣ်ခိၣ်ဖိ ခီဖျိ “ဒုးပၢအီၤလၢ” ကယဲၢ် အတၢ်ဘၣ်တ့လၢ ဟီၣ်ခိၣ်အံၤလီၤ. (စံးထီၣ်ပတြၢၤ ၈:၆) ကစၢ်ယွၤအတၢ်တိာ်ပာ် အိၣ်ဝဲလၢ ပှၤဟီၣ်ခိၣ်ဖိအလၢအပှဲၤတဖၣ် ကကွၢ်ထွဲ အတၢ်ဘၣ်တ့ လၢအဃံအလၤ လီၤထူလီၤယိာ်လီၤ. နသ့ၣ်ညါဘၣ်ဒ်အံၤအဃိ နတအဲၣ်ဒိး စံးဘျုးစံးဖှိၣ် ယဟိဝၤယွၤဧါ.

တၢး၂၀.၀၅ ၂၃ ¶၁၀

ပာ်လုၢ်ပာ်ပှ့ၤ တၢ်ဟ့ၣ်လၢ ယွၤဟ့ၣ်နၤတဖၣ်

^၁၀ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် ပတဲတၢ်သ့န့ၣ် ပပာ်ဖျါထီၣ်အီၤသ့ခီဖျိ ပတဲနၢ်ပၢၢ် ပှၤလၢအနာ်ဝဲ တၢ်သိၣ်လိလၢအမ့ၢ် သးသမူအတၢ်လဲလိာ်အသး တဆီဘၣ်တဆီ ဒီးဘၣ်မနုၤအဃိ ပနာ်လၢ ကစၢ်ယွၤတ့လီၤ တၢ်ခဲလၢာ်လဲၣ်န့ၣ်လီၤ. (စံးထီၣ်ပတြၢၤ ၉:၁; ၁ ပ့းတရူး ၃:၁၅) ပှၤလၢအဆီၣ်ထွဲဝဲ တၢ်သိၣ်လိလၢအမ့ၢ် သးသမူအတၢ်လဲလိာ်သး တဆီဘၣ်တဆီန့ၣ် တဲဝဲလၢ တၢ်သးသမူ ဒီးဟီၣ်ခိၣ်န့ၣ် ဟဲကဲထီၣ်အသး လၢအကစၢ်ဒၣ်ဝဲလီၤ. ပသူလံာ်စီဆှံ ဒီးတၢ်ဂ့ၢ်တနီၤလၢ တၢ်မၤလိအံၤအပူၤ ဒီးပတဲနၢ်ပၢၢ်ပှၤဂၤလၢ ကစၢ်ယွၤအဂ့ၢ်သ့လီၤ. တကးဒံးဘၣ် ဘၣ်မနုၤအဃိ ပနာ်လၢ ယဟိဝၤယွၤ မ့ၢ်တၢ်ဘၣ်တ့ကစၢ်လၢ အတ့လီၤမူခိၣ် ဒီးဟီၣ်ခိၣ်လဲၣ်န့ၣ် ပတဲနၢ်ပၢၢ် ပှၤလၢအသးအိၣ် သ့ၣ်ညါဝဲတဖၣ်သ့လီၤ.—စံးထီၣ်ပတြၢၤ ၁၀၂:၂၅; ယၡါယၤ ၄၀:၂၅, ၂၆.

တၢး၂၂.၀၄ ၇ ¶၁၃

ကဲထီၣ်ပှၤဒိဂ့ၤတဲာ်ဘၣ် လၢတၢ်စံးတၢ်ကတိၤ

^၁၃ သးဝံၣ်တၢ်လၢ သးဒီဖျၢၣ်. ဖဲပသးဝံၣ် ဘီမုၢ်တၢ်သးဝံၣ်အခါ ပတၢ်တိာ်ပာ်န့ၣ် ဒ်သိးပကမၤလၤကပီၤ ယဟိဝၤယွၤအဂီၢ်. ဒီပုၢ်ဝဲၢ်မုၣ်စါရၤ ဆိကမိၣ်လီၤအသးလၢ အသးဝံၣ်တၢ် အကလုၢ်တမုာ်ဘၣ်. ဘၣ်ဆၣ်အသးဝံၣ် စံးထီၣ်ပတြၢၤ ယဟိဝၤယွၤ. တၢ်မနုၤမၤစၢၤအီၤလၢ အကသးဝံၣ်တၢ်အဂီၢ်လဲၣ်. ဖဲအအိၣ်ကတဲာ်ကတီၤအသးလၢ တၢ်အိၣ်ဖှိၣ်အဂီၢ်အခါ အကွၢ်ဃုာ်ဒီး တၢ်သးဝံၣ်တဖၣ်စ့ၢ်ကီး. အကၠီးလိအသးလၢ တၢ်သးဝံၣ် ဒီးတၢ်သးဝံၣ်အဖျၢၣ်တဖၣ်န့ၣ် ဘၣ်ဃးလိာ်အသးဒီး တၢ်ဂ့ၢ်လၢပှၤကတဲသကိးအီၤလၢ တၢ်အိၣ်ဖှိၣ်အပူၤ ဒ်လဲၣ်န့ၣ် အဆိကမိၣ်ထံဝဲ. ဒီပုၢ်ဝဲၢ်မုၣ် စါရၤ တဲဝဲလၢ “ယမၤဒ်န့ၣ်အဃိ ယသးစၢၢ်ဆၢလၢ တၢ်သးဝံၣ်အလံာ်မဲာ်ဖျၢၣ်ဒီး ယတသးစၢၢ်ဆၢ လၢယကလုၢ်မုာ်ဧါ တမုာ်ဧါန့ၣ်ဘၣ်.”

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1 ၈၃၂

စုနၢ

တဘျီတခီၣ် လံာ်စီဆှံတဲဝဲ တၢ်အဒိလၢ ကစၢ်ယွၤမၤအတၢ်မၤလၢအ “စုနၢ.” အဒိ အတဲဝဲလၢ ကစၢ်ယွၤကွဲး တၢ်မၤလိာ်အထံၣ်တဆံလၢ လၢၢ်ဘ့ၣ်ဘၣ်လိၤ (၂ မိၤ ၃၁:၁၈; ၅ မိၤ ၉:၁၀), မၤတၢ်လီၤလး (၂ မိၤၡ့ ၈:၁၈, ၁၉), ဒီးတ့လီၤမူခိၣ်လၢအစုနၢ. (စံးထီၣ်ပတြၢၤ ၈:၃) ကစၢ်ယွၤအ “စုနၢ” တ့လီၤတၢ်န့ၣ် အဲၣ်ဒိးတဲဝဲ ကစၢ်ယွၤအသးစီဆှံ လၢပဖးဘၣ်အဂ့ၢ်လၢ လံာ် ၁ မိၤၡ့အပူၤ. လံာ် ၁ မိၤၡ့ ပာ်ဖျါထီၣ်ဝဲလၢ ဖဲကစၢ်ယွၤတ့လီၤတၢ်အခါ အသးစီဆှံဟူးဝးဝဲလၢ ထံဖံးခိၣ်. (၁ မိၤ ၁:၂) ဒ်သိး ပကနၢ်ပၢၢ်လီၤတံၢ်ဒိၣ်ထီၣ် တၢ်အဒိလၢ အဘၣ်ဃးဒီး ကစၢ်ယွၤအ “စုနၢ” န့ၣ် လံာ်စီဆှံလၢ ကြံးကျိာ်တကတြူၢ် မၤစၢၤပှၤသ့. လံာ်မးသဲ ပာ်ဖျါထီၣ်ဝဲလၢ ယ့ၣ်ၡူးနီဟးထီၣ်ကွံာ် တၢ်ဝံတၢ်နါလၢ ကစၢ်ယွၤ အသးစီဆှံ. ဘၣ်ဆၣ် လံာ်လူၤကၣ် ပာ်ဖျါထီၣ်ဝဲလၢ ယ့ၣ်ၡူးနီဟးထီၣ်ကွံာ် တၢ်ဝံတၢ်နါလၢ “ကစၢ်ယွၤအစုနၢ.”—မး ၁၂:၂၈; လူၤ ၁၁:၂၀.

လါဖ့ၤဘြူၤအါရံၤ၂၆–လါမၢ်ၡး ၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၁၁-၁၅

ထံၣ်တမှံကွၢ်လၢ နအိၣ်ဘၣ်လၢ ဟီၣ်ခိၣ်သီအပူၤ မုာ်မုာ်ခုၣ်ခုၣ်

တၢး၀၆ ၅/၁၅ ၁၈ ¶၃

လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤအဂီၢ်

၁၁:၃—တၢ်အခီၣ်ထံးခီၣ်ဘိလၢ အလီၤပှီၢ်ကွံာ်န့ၣ် အကဲမနုၤလဲၣ်. တၢ်အခီၣ်ထံးခီၣ်ဘိတဖၣ်အံၤန့ၣ် အဲၣ်ဒိးတဲဝဲ တၢ်သိၣ်တၢ်သီ, တၢ်မၤလိာ် ဒီးတၢ်တီတၢ်လိၤလၢ ပှၤဟီၣ်ခိၣ်ဖိတဖၣ် ဘၣ်သန့ၤအသးလၢအီၤ. ပှၤမ့ၢ်တမၤထွဲဝဲ တၢ်သိၣ်တၢ်သီဘၣ်န့ၣ် တၢ်တတီတလိၤစ့ၢ်ကီးအိၣ်ထီၣ်ဝဲ. အဃိ တၢ်မ့ၢ်ကဲထီၣ်အသးဒ်အံၤန့ၣ် ပှၤတီပှၤလိၤတဖၣ် ဘၣ်သန့ၤအသးလၢ ကစၢ်ယွၤအအိၣ် လၢလၢပှဲၤပှဲၤ.—စံးထီၣ်ပတြၢၤ ၁၁:၄-၇.

wp၁၆.၄ ၁၁

လၢဟီၣ်ခိၣ်အံၤ တၢ်အၢတၢ်သီတဖၣ် လီၤမၢ်ကွံာ်ကန့ၢ်ဒံးဧါ

လံာ်စီဆှံတဲဝဲလၢ တယံာ်လၢၤဘၣ် ကစၢ်ယွၤကမၤလီၤမၢ်ကွံာ် တၢ်အၢတၢ်သီလၢ ဟီၣ်ခိၣ်ချၢ. ဒီးပှၤအၢပှၤသီတဖၣ်န့ၣ် ကထံၣ်ဘၣ်ဝဲ “တၢ်စံၣ်ညီၣ်အမုၢ်နံၤ ဖဲတၢ်ကမၤဟးဂီၤကွံာ် ပှၤလၢအတယူးတယီၣ်ယွၤဘၣ်.” (၂ ပ့းတရူး ၃:၅-၇) အဃိ ပှၤအၢပှၤသီတဖၣ် မၤကီမၤခဲပှၤဂၤတသ့လၢၤဘၣ်. ဘၣ်မနုၤအဃိ ပနာ်သ့လၢ ကစၢ်ယွၤ အဲၣ်ဒိးမၤလီၤမၢ်ကွံာ်ဝဲ တၢ်အၢတၢ်သီတဖၣ်လဲၣ်.

လံာ်စီဆှံတဲဝဲလၢ “ပှၤတဂၤဂ့ၤ တဂၤဂ့ၤလၢ အအဲၣ်တၢ်မၤဆူၣ်မၤစိးန့ၣ် [ကစၢ်ယွၤ] သးဟ့ဝဲလီၤ.” (စံးထီၣ်ပတြၢၤ ၁၁:၅). တၢ်ဘၣ်တ့ကစၢ်န့ၣ် အအဲၣ်တၢ်ဃူတၢ်ဖိး ဒီးတၢ်တီတၢ်လိၤ. (စံးထီၣ်ပတြၢၤ ၃၃:၅; ၃၇:၂၈) အဃိ အဝဲတဟ့ၣ်အခွဲးလၢ ပှၤအၢပှၤသီတဖၣ် ကအိၣ်ဝဲထီဘိဘၣ်.

တၢး၁၇.၀၈ ၇ ¶၁၅

နအိၣ်ခိးတၢ်လၢ တၢ်သးစူၤအပူၤကကဲဧါ

^၁၅ ဘၣ်မနုၤအဃိ စီၤဒၤဝံးအိၣ်ခိးတၢ်လၢ တၢ်သးစူၤအပူၤကဲဝဲလဲၣ်. အတၢ်စံးဆၢန့ၣ် အိၣ်ဖဲစံးထီၣ်ပတြၢၤအဆၢဒိၣ် တဆၢဃီဒီး တၢ်သံကွၢ်လၢအသံကွၢ်ဝဲ ယဟိဝၤယွၤ လွံၢ်ဘျီလၢကယံာ်ဒံး “ဆံးယံာ်လဲၣ်” န့ၣ်လီၤ. အဝဲစံးဝဲလၢ– “ယသန့ၤယသးလၢ နဘျုးနဖှိၣ်, ယကသူၣ်ဖှံသးညီလၢ နတၢ်အုၣ်က့ၤခီၣ်က့ၤအပူၤလီၤ. ယကသးဝံၣ်ထီၣ်ယွၤလီၤ. အဂ့ၢ်ဒ်အံၤ, မၤဂ့ၤလံယၤလံ.” (စံးထီၣ်ပတြၢၤ ၁၃:၅, ၆) စီၤဒၤဝံးသ့ၣ်ညါဝဲလၢ ယဟိဝၤယွၤအဲၣ်အီၤဒီး တပာ်တ့ၢ်ကွံာ်အီၤနီတဘျီဘၣ်. အဝဲဆိကမိၣ်ထီၣ်က့ၤဝဲ တၢ်လၢယဟိဝၤယွၤမၤစၢၤတ့ၢ်အီၤတဖၣ် ဒီးအဝဲခိးကွၢ်လၢ်ဝဲ တၢ်ဆၢကတီၢ်လၢ ယဟိဝၤယွၤကမၤဘၣ်ဂီၢ်က့ၤ အတၢ်ဂ့ၢ်ကီသ့ၣ်တဖၣ်န့ၣ်လီၤ. စီၤဒၤဝံးသ့ၣ်ညါဝဲလၢ ယဟိဝၤယွၤအတၢ်ဆိၣ်ဂ့ၤန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်အဃိ အဝဲအိၣ်ခိးတၢ်လၢ တၢ်သးစူၤအပူၤကဲဝဲလီၤ.

kr 236 ¶16

ယွၤအဘီအမုၢ်န့ၣ် ကမၤလၢပှဲၤ ကစၢ်ယွၤအတၢ်ဘၣ်သး လၢဟီၣ်ခိၣ်ချၢ

^၁၆ တၢ်ဘံၣ်တၢ်ဘၢ. ဝံယၡါယၤ အတၢ်ကတိၤဖဲ ယၡါယၤ ၁၁:၆-၉ န့ၣ် ကဟဲလၢထီၣ်ပှဲၤထီၣ်ဝဲ. အဃိ ဖဲန့ၣ်အဆၢကီၢ် ပှၤပိာ်မုၣ်ပိာ်ခွါ ဒီးဖိဒံဖိသၣ်တဖၣ်န့ၣ် ဖဲအဝဲသ့ၣ် လဲၤလၢတၢ်လီၢ်တပူၤဂ့ၤတပူၤဂ့ၤ ကအိၣ်ဒီးတၢ်ဘံၣ်တၢ်ဘၢ. ဒီးဆၣ်ဖိကီၢ်ဖိ ဒီးပှၤကညီလၢ ကမၤပျံၤမၤဖုးအဝဲသ့ၣ်န့ၣ် တအိၣ်နီတဂၤလၢၤဘၣ်. ထံၣ်တမှံကွၢ်လၢ ဖဲန့ၣ်အဆၢကတီၢ် နကတူၢ်ဘၣ်လၢ ဟီၣ်ခိၣ်ဒီဘ့ၣ်န့ၣ် အကဲဝဲနတၢ်လီၢ်. ဒီးနဟးပီၢ်ထံလၢ ထံကျိ, လၢထံကမါ, လၢပီၣ်လဲၣ်ပူၤ, ဟးထီၣ်ကစၢၢ်ကလိ ဒီးဟးဝ့ၤဝီၤလၢနီၣ်တဖၣ်အကျါ လၢတၢ်ဘံၣ်တၢ်ဘၢအပူၤ. ဒီးဖဲမုၢ်ဟါလီၤ အဆၢကတီၢ်နာ်က့ နတလိၣ်ဘၣ်ယိၣ်တၢ်နီတမံၤလၢၤဘၣ်. ယဃ့းစက့လး ၃၄:၂၅ န့ၣ် ကဟဲလၢထီၣ်ပှဲၤထီၣ်ဝဲ. အဃိ ကစၢ်ယွၤ အပှၤဂီၢ်မုၢ်တဖၣ် “ကအိၣ်ဘၣ် ဘံၣ်ဘံၣ်ဘၢဘၢလၢ ပှၢ်မုၢ်ကနၢအပူၤ ဒီးကမံဘၣ်မုာ်မုာ်လၢ ပှၢ်လၢ်ကျါလီၤ.”

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၃ ၉/၁၅ ၁၉ ¶၁၂

မ့ၢ်နလဲလိာ်နသး လံဧါ

^၁၂ ပအိၣ်ဘၣ်လၢ ပှၤလၢအတၢ်ပာ်သူၣ်ပာ်သး အိၣ်ဝဲဒ် ပှၤလၢစီၤပီလူး ပာ်ဖျါထီၣ်ဝဲအသိးတဖၣ်အကျါ. အဝဲသ့ၣ် ဆိကမိၣ်ဝဲလၢ ပှၤလၢအမၤထွဲ တၢ်သိၣ်တၢ်သီ ဒီးတၢ်ဟံးစုနဲၣ်ကျဲန့ၣ် အလီၤဂာ်ဒ် ပှၤလၢအလူၤစိၤအခံတချုးဘၣ်. ဒီးပှၤတကြၢး ဟ့ၣ်ဂံၢ်ဟ့ၣ်ဘါလိာ်သးလၢ ကမၤဝဲဒ်န့ၣ်ဘၣ်. သရၣ်သရၣ်မုၣ် ဒီးမိပါအါဂၤန့ၣ် အဟ့ၣ်ဂံၢ်ဟ့ၣ်ဘါဝဲလၢ ပှၤကအိၣ်ဒီးတၢ်ထံၣ်လၢအလဲၢ် မ့တမ့ၢ် ပှၤကမၤဖဲအသး ဒီးအဝဲသ့ၣ် ဆိကမိၣ်ဝဲလၢ တၢ်အဘၣ်ဒီးတၢ်ကမၣ်န့ၣ် ပှၤနီၤဖးအီၤ လီၤတံၢ်လီၤဆဲးတသ့ဘၣ်. တကးဒံးဘၣ် ပှၤအါဂၤလၢ အအဲၣ်တၢ်ဘူၣ်တၢ်ဘါစ့ၢ်ကီး အဝဲသ့ၣ်ဆိကမိၣ်ဝဲလၢ အအိၣ်ဒီးတၢ်သဘျ့လၢ ကမၤဖဲအသး ဒီးအတလိၣ် ဒိကနၣ်ဒီးမၤထွဲ ကစၢ်ယွၤ အတၢ်သိၣ်တၢ်သီဘၣ်. (စံး ၁၄:၁) ခရံာ်ဖိတဖၣ် မ့ၢ်အိၣ်ဒီး တၢ်ပာ်သူၣ်ပာ်သးဒ်အံၤန့ၣ် တၢ်လီၤဘၣ်ယိၣ်အိၣ်လၢ အဝဲသ့ၣ်အဂီၢ်. အဝဲသ့ၣ် မ့ၢ်အိၣ်ဒီး တၢ်ပာ်သူၣ်ပာ်သးဒ်အံၤန့ၣ် အဝဲသ့ၣ်ကသးဒ့ဒီထီၣ်လၢ ကစၢ်ယွၤအတၢ်ကရၢကရိ အတၢ်ရဲၣ်တၢ်ကျဲၤတဖၣ်အဖီခိၣ်. တကးဒံးဘၣ် ဘၣ်သ့ၣ်သ့ၣ် အတအဲၣ်ဒိးမၤထွဲ တၢ်အိၣ်ဖှိၣ် အတၢ်ဟံးစုနဲၣ်ကျဲလၢၤဘၣ်. ဒီးတၢ်ဟံးစုနဲၣ်ကျဲတဖၣ် မ့ၢ်တလီၤပလိာ်ဒီး အဝဲသ့ၣ်အတၢ်ထံၣ်န့ၣ် အဝဲသ့ၣ် ကအဲၣ်ဒိး ကဒူးကဒ့ၣ်တၢ်. မ့တမ့ၢ် အဝဲသ့ၣ် တအဲၣ်ဒိးမၤထွဲဝဲ လံာ်စီဆှံအတၢ်ဟ့ၣ်ကူၣ်လၢ အဘၣ်ဃးဒီး တၢ်မၤမုာ်မၤဖှံသး, တၢ်သူအ့ၤထၢၤနဲၣ် ဒီးတၢ်လူၤတၢ်ကူၣ်ဘၣ်ကူၣ်သ့လၢ အပတီၢ်ထီလၢၤဘၣ်.