ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
လါယနူၤအါရံၤ ၆-၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၂၇-၁၃၄
မိပါတဖၣ် ဆဲးကွၢ်ထွဲသုဖိတဖၣ် ဂ့ၤဂ့ၤ
ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ နကဲထီၣ်ဘၣ် ယဟိဝၤယွၤ အဟံၣ်ဖိဃီဖိ
၉ ယဟိဝၤယွၤဟ့ၣ်လီၤပှၤဟီၣ်ခိၣ်ဖိ တၢ်ခွဲးတၢ်ယာ်လၢ ကထီၣ်ဖိထီၣ်လံၤ ဒီးသိၣ်လိအဖိလၢ ကအဲၣ်ယဟိဝၤယွၤဒီး မၤယဟိဝၤယွၤအတၢ်မၤလီၤ. နမ့မ့ၢ်မိၢ်ပၢ်န့ၣ် နပာ်လုၢ်ပာ်ပှ့ၤတၢ်ဟ့ၣ်အံၤ ကသ့ဒ်လဲၣ်. ယဟိဝၤယွၤဟ့ၣ်လီၤမူခိၣ်ကလူး တၢ်သ့တၢ်ဘၣ်ဒီဒူၣ် သနာ်က့ ယဟိဝၤယွၤ တဟ့ၣ်အဝဲသ့ၣ် တၢ်ခွဲးတၢ်ယာ်လၢ ကထီၣ်ဖိထီၣ်လံၤဘၣ်. အဃိ နမ့မ့ၢ်မိၢ်ပၢ်န့ၣ် ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ နလုၢ်ဒိၣ်ထီၣ်ဘၣ်နဖိန့ၣ်တက့ၢ်. မိၢ်ပၢ်အိၣ်ဒီးမူဒါအရ့ဒိၣ်လၢ ကဘၣ်ကွၢ်လုၢ်ဒိၣ်ထီၣ် အဖိလၢ “ယဟိဝၤယွၤ အတၢ်သိၣ်လိနဲၣ်လိ ဒီးအတၢ်ဟံးစုနဲၣ်ကျဲ အပူၤ” န့ၣ်လီၤ. (အ့းဖ့းစူး ၆:၄; ၅ မိၤၡ့ ၆:၅-၇; စံးထီၣ်ပတြၢၤ ၁၂၇:၃) ကစၢ်ယွၤအတၢ်ကရၢကရိ မၤစၢၤမိၢ်ပၢ်တဖၣ် ခီဖျိဟ့ၣ်လီၤဝဲတၢ်မၤစၢၤအါမံၤလၢ အဒိးသန့ၤထီၣ်အသးလၢ လံာ်စီဆှံဒ်သိးဒီး လံာ်လဲၢ်တဖၣ်, တၢ်ဂီၤမူ, တၢ်သးဝံၣ် ဒီးတၢ်ဂ့ၢ်တၢ်ကျိၤလၢ online အပူၤလီၤ. အဃိ ပသ့ၣ်ညါဘၣ်လၢ ပပၢ်လၢမူခိၣ်ဒီး အဖိခွါ အဲၣ်ပှၤသးစၢ်တဖၣ်ဒိၣ်မးလီၤ. (လူၤကၣ် ၁၈:၁၅-၁၇) ဖဲမိၢ်ပၢ်တဖၣ် သန့ၤအသးလၢ ယဟိဝၤယွၤ ဒီးကွၢ်လုၢ်ဒိၣ်ထီၣ်အဖိ လၢအဂ့ၤကတၢၢ်အခါ ယဟိဝၤယွၤသးခုဝဲလီၤ. မိၢ်ပၢ်သ့ၣ်တဖၣ်အံၤ မၤစၢၤစ့ၢ်ကီးအဖိလၢ ကကဲထီၣ် ယဟိဝၤယွၤ အဟံၣ်ဖိဃီဖိ လီၤထူလီၤယိာ်လီၤ.
မိၢ်ပၢ်သ့ၣ်ဧၢ သိၣ်လိသုဖိတဖၣ်လၢ ကအဲၣ်ယဟိဝၤယွၤ
၂၀ ဂုာ်ကျဲးစၢး ဃုသ့ၣ်ညါ နဖိအဂ့ၢ် ဂ့ၤဂ့ၤတက့ၢ်. စံးထီၣ်ပတြၢၤ ၁၂၇ ထိၣ်သတြီၤဝဲ ဖိသၣ်တဖၣ် လၢပျၢ်လီၤ. (ဖး စံးထီၣ်ပတြၢၤ ၁၂၇:၄ တက့ၢ်.) ပျၢ်တဖၣ်န့ၣ် ပှၤတ့ထီၣ်အီၤလၢ တၢ်ပီးတၢ်လီ သ့ဝဲအမၠိမၠိ ဒီးအဒိၣ်အဆံး အိၣ်ဝဲအမၠိမၠိလီၤ. ဒ်န့ၣ်အသိး ပှၤဖိသၣ်တဂၤဒီးတဂၤန့ၣ် လီၤဆီလိာ်အသးလီၤ. အဃိ မိၢ်ပၢ်တဖၣ် ကဘၣ်ဆၢတဲာ်ဝဲလၢ အဝဲသ့ၣ် ကသိၣ်လိ အဖိတဂၤစုာ်စုာ် ဒ်လဲၣ်န့ၣ်လီၤ. ပှၤဒီမါဝၤခံဂၤ လၢအအိၣ်လၢ ကီၢ်အံၣ်စရ့(လ်)န့ၣ် ကွၢ်လုၢ်ဒိၣ်ထီၣ်အဖိခံဂၤ လၢကမၤ ယဟိဝၤယွၤအတၢ်မၤအဂီၢ် န့ၢ်ဝဲဂ့ၤဂ့ၤလီၤ. အဝဲသ့ၣ်တဲဝဲလၢ “ပမၤလိလံာ်စီဆှံဒီး အဝဲသ့ၣ် တဂၤစုာ်စုာ် လီၤလီၤဆီဆီလီၤ.” ပကဘၣ်မၤဒ်အံၤဧါ တဘၣ်မၤဘၣ်ဧါ မ့တမ့ၢ် ပမၤအီၤသ့ဧါ တသ့ဧါန့ၣ် ဟံၣ်ခိၣ်ကဘၣ်ဆၢတဲာ်ဝဲလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
သးခုခီဖျိလၢ နမၤဘၣ်ယဟိဝၤယွၤအတၢ်မၤ
၆ တၢ်မၤလိအရ့ဒိၣ်ကတၢၢ်တခါလၢ မိၢ်ပၢ်တဖၣ် မၤလိန့ၢ်ဝဲသ့န့ၣ်အိၣ်လၢ စံးထီၣ်ပတြၢၤ ၁၃၁:၁, ၂ အပူၤလီၤ. (ဖးတက့ၢ်.) စီၤပၤဒၤဝံးတဲဝဲလၢ အ “တလဲၤဘၣ်လၢ တၢ်အဒိၣ်အပူၤ” မ့တမ့ၢ် မၤတၢ်လၢ အကီတလၢ လၢအဂီၢ်န့ၣ်ဘၣ်. ဘၣ်ဆၣ် အဝဲဆီၣ်လီၤသး ဒီးအသးမံဒီး တၢ်လၢအအိၣ်ဒီးအီၤတဖၣ်လီၤ. မိၢ်ပၢ်တဖၣ်မၤလိန့ၢ်တၢ်လၢ စီၤဒၤဝံးအအိၣ်ကသ့ဒ်လဲၣ်. ဒ်သိးမိၢ်ပၢ်တဖၣ် ကအိၣ်ဒီးတၢ်ဆီၣ်လီၤသးအဂီၢ် အဝဲသ့ၣ်တဘၣ်မုၢ်လၢ်တၢ်အါတလၢ လၢအနီၢ်ကစၢ်အဖီခိၣ် ဒီးလၢအဖိတဖၣ်အဖီခိၣ်ဘၣ်. မိပါတဖၣ် မ့ၢ်သ့ၣ်ညါဝဲလၢ အဖိတၢ်ဂံၢ်စၢ်ဘါစၢ်အိၣ်ဒ်လဲၣ် ဒီးမၤတၢ်မနုၤသ့လဲၣ်န့ၣ် အဝဲသ့ၣ်မၤစၢၤအဖိလၢ ကပာ်လီၤဖီတၢၣ်တဖၣ် လၢမၤလၢပှဲၤဝဲကန့ၢ်အဂီၢ်လီၤ. ဒီပုၢ်ဝဲၢ်မုၣ်မရံနၤ တဲဝဲလၢ “ယမိတထိၣ်သတြီၤယၤဒီး ယဒီပုၢ်ဝဲၢ်တဖၣ်ဘၣ် ဒီးတထိၣ်သတြီၤယၤဒီး ဖိသၣ်အဂၤတဖၣ်စ့ၢ်ကီးဘၣ်. အဝဲသိၣ်လိယၤလၢ ပှၤကိးဂၤဒဲးန့ၣ် အအိၣ်ဒီးတၢ်သ့တၢ်ဘၣ် တဂၤတမံၤ ဒီးပဝဲဒၣ်တဂၤစုာ်စုာ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ. မ့ၢ်လၢယမိ သိၣ်လိယၤဒ်အံၤအဃိ ယတထိၣ်သတြီၤယသးဒီး ပှၤဂၤကြီကြီဘၣ်.”
လါယနူၤအါရံၤ ၁၃-၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၃၅-၁၃၇
“ပကစၢ်ယွၤန့ၣ် ဒိၣ်န့ၢ်ဒံး ယွၤအဂၤ ခဲလၢာ်”
ခရံာ် မ့ၢ်ယွၤအစိအကမီၤ
၁၅ ခရံာ်အစိအကမီၤန့ၣ် ဟဲလၢ ယဟိဝၤယွၤ အအိၣ်အဃိ ပသ့ၣ်ညါဘၣ်လၢ သ့တၢ်လၢာ်ကစၢ်န့ၣ် ပၢၤဃာ်ဝဲန့ဆၢၣ်အသဟီၣ်တဖၣ်န့ၢ်ဝဲလီၤ. အဒိ တချုးလၢ ထံလုၢ်ဘၢတၢ်ဒံးဘၣ်န့ၣ် ယဟိဝၤယွၤစံးဝဲလၢ– “နွံသီပူၤကွံာ်ဒီး, ယကမၢတၢ်ဟဲစူၤအနံၤလွံၢ်ဆံဒီး အနၤလွံၢ်ဆံလၢ ဟီၣ်ခိၣ်ချၢ” လီၤ. (၁ မိၤၡ့ ၇:၄) ဖဲ ၂ မိၤၡ့ ၁၄:၂၁ အပူၤစ့ၢ်ကီး ပဖးဘၣ်လၢ– “ယွၤဒုးလဲၤကွံာ်ပီၣ်လဲၣ် လၢကလံၤဆူၣ် လၢမုၢ်ထီၣ်တခီ” န့ၣ်လီၤ. ဒီးပဖးဘၣ်ဖဲ ယိၤနါ ၁:၄ န့ၣ် “ယွၤမၢလီၤ ကလံၤဖးဒိၣ်ဆူပီၣ်လဲၣ်, ဒီးကလံၤမုၢ်ထီၣ်လၢ ပီၣ်လဲၣ်ပူၤ, ဒီးကဘီဘူးဒီး အကဟးဂီၤလီၤ.” ဂ့ၤဒိၣ်မးလၢ ပသ့ၣ်ညါဘၣ်လၢ ဟီၣ်ခိၣ်သီအပူၤန့ၣ် ယဟိဝၤယွၤ ကပၢၤဃာ် န့ဆၢၣ်အသဟီၣ်တဖၣ်အံၤ ထီဘိန့ၣ်လီၤ.
ဘၣ်မနုၤအဃိ ပဘၣ်ပာ်လုၢ်ပာ်ပှ့ၤ ယဟိဝၤယွၤ အတၢ်အဲၣ်လၢအတီလဲၣ်
၁၆ ပမ့ၢ်နာ်လၢ ယဟိဝၤယွၤ ကဒီသဒၢပှၤန့ၣ် ပကတူၢ်ဘၣ်လၢ ပအိၣ်ဘၣ် ဘံၣ်ဘံၣ်ဘၢဘၢလီၤ. ဘၣ်ဆၣ်တဘျီတခီၣ် ဖဲပသးဂံၢ်ဘါလီၤစၢ်အခါ ပကတူၢ်ဘၣ်လၢ ပဆၢထၢၣ်တန့ၢ်လၢၤဘၣ်. ဖဲန့ၣ်အဆၢကတီၢ် ယဟိဝၤယွၤ ကမၤစၢၤပှၤဒ်လဲၣ်. (ဖး စံးထီၣ်ပတြၢၤ ၁၃၆:၂၃, NWT) အကပာ်အစုလၢ ပဖီလာ် ဒီးကဝံၢ်ထီၣ်ပှၤကဖီလီဖိ ဒီးကမၤစၢၤပှၤဒ်သိး ပဆၢထၢၣ်က့ၤလၢပခီၣ် ကန့ၢ်အဂီၢ်. (စံးထီၣ်ပတြၢၤ ၂၈:၉; ၉၄:၁၈) ပဒိးန့ၢ်ဘၣ်အဘျုးဒ်လဲၣ်– ပသ့ၣ်ညါလၢ ပသန့ၤပသးလၢ ယဟိဝၤယွၤအအိၣ်သ့ဝဲ ထီဘိအဃိ ကဲဘျုးဝဲလၢပဂီၢ် လၢကျဲခံဘိ. တၢတခါန့ၣ် ပသ့ၣ်ညါလၢ ပမ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤ ယဟိဝၤယွၤ ကဒီသဒၢပှၤထီဘိ. ခံခါတခါန့ၣ် ပသ့ၣ်ညါလၢ ပပၢ်လၢမူခိၣ် လၢအပှဲၤဒီးတၢ်အဲၣ်တၢ်ကွံတဂၤန့ၣ် ကဟုကယာ်ပှၤဒိၣ်မး.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ပှၤလၢအသးတီဒီး ယဟိဝၤယွၤ ထီဘိန့ၣ် ကသးခုဝဲ
၁၂ ယဟိဝၤယွၤ ပာ်ဖျါထီၣ်ဝဲလၢအကဲ ယွၤလၢအထီကတၢၢ်တဂၤ ဒီးအစိကမီၤ အိၣ်အါန့ၢ်ဒံး “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်တဖၣ်.” ဘၣ်မနုၤအဃိ ပတဲဒ်န့ၣ်လဲၣ်န့ၣ် ပကကွၢ်သကီး တၢ်အဒိသၢခါ. အဒိ လၢအပူၤကွံာ်န့ၣ် ဖၤရိၤ မၢကဲကုၢ် ယဟိဝၤယွၤ အပှၤဂီၢ်မုၢ်တဖၣ် လၢကီၢ်အဲၤကူပတူးအပူၤ. ဒီးအဝဲတဘၣ်သး ပျၢ်ကွံာ်အဝဲသ့ၣ်ဘၣ်. ဘၣ်ဆၣ် ကစၢ်ယွၤ မၤထူၣ်ဖျဲးထီၣ်ကွံာ် အပှၤဂီၢ်မုၢ်ဒီး မၤလီၤအုးဝဲဖၤရိၤ လၢပီၣ်လဲၣ်ဂီၤအပူၤ. (၂ မိၤၡ့ ၁၄:၂၆-၂၈; စံးထီၣ်ပတြၢၤ ၁၃၆:၁၅) မ့မ့ၢ်လၢ ဘၤဘူၤလိၣ် အစီၤပၤဘ့ၤလၡါစၢ်န့ၣ် အကဲပှၤလၢ အပာ်ထီၣ်ထီသးတဂၤ. ဘၣ်တနၤန့ၣ် အမၤဝဲမူးပွဲဒီး ‘အပာ်ထီၣ်ထီအသး လၢမူခိၣ်ကစၢ် အဖီခိၣ်.’ ဒီးအ “စံးထီၣ်ပတြၢၤ ယွၤထူ, ယွၤစ့” ဘၣ်ဆၣ် အတစံးထီၣ်ပတြၢၤ ယဟိဝၤယွၤဘၣ်. အဃိ ယဟိဝၤယွၤ စံၣ်ညီၣ်အီၤဒီး “ဖဲတၢ်တနၤန့ၣ်” ပှၤမၤသံကွံာ် စီၤပၤဘ့ၤလၡါစၢ် ဒီးမၤဒဲ ဒီးဖၢၡၢၣ် မၤန့ၢ်ဝဲအဘီမုၢ်. (ဒၤနံးယ့လး ၅:၂၂, ၂၃, ၂၈, ၃၀, ၃၁) မ့မ့ၢ် စီၤပၤဟ့ၤရိာ် အကြံးပၤ တၢတဂၤန့ၣ် အမၢပှၤမၤသံဝဲ တၢ်မၢဖိယၤကိာ် ဒီးလၢခံန့ၣ် အပၢနုာ်ဝဲ တၢ်မၢဖိပ့းတရူး လၢဃိာ်ပူၤ ဒီးအအဲၣ်ဒီး မၤသံအီၤစ့ၢ်ကီး. ဘၣ်ဆၣ် ယဟိဝၤယွၤ တပျဲဝဲလၢ အကမၤဒ်အတိာ်ပာ်ဝဲ အသိးဘၣ်. အဃိ “ယဟိဝၤယွၤ အမူခိၣ်ကလူး တီၢ်အီၤ” ဘျီအသံဝဲန့ၣ်.—မၤတၢ် ၁၂:၁-၅, ၂၁-၂၃.
Ijwfq တၢ်ကွဲးဖုၣ် ၇
ယဟိဝၤပှၤအုၣ်အသးတဖၣ်န့ၣ် မ့ၢ်ခရံာ်ဖိဧါ
မ့ၢ်လီၤ. ပမ့ၢ်ခရံာ်ဖိလၢ တၢ်ဂ့ၢ်လၢလာ်တဖၣ်အံၤအဃိလီၤ:
• ပဂုာ်ကျဲးစၢးမၤထွဲ ယ့ၣ်ၡူးခရံာ်အတၢ်သိၣ်တၢ်သီဒီး အတၢ်ဖံးတၢ်မၤတဖၣ်လၢ အဘူးကတၢၢ်လီၤ.—၁ ပ့းတရူး ၂:၂၁.
• ပနာ်လၢယ့ၣ်ၡူးမ့ၢ်ပှၤအကါဒိၣ်လၢ တၢ်အုၣ်က့ၤခီၣ်က့ၤအဂီၢ်လီၤ, “မံၤအဂုၤအဂၤလၢပှၤကညီအကျါ, လၢမူခိၣ်အဖီလာ်, တၢ်တဟ့ၣ်ဘၣ်ဝဲလၢ ပဘၣ်တၢ်တုၤလၢတၢ်အုၣ်က့ၤခီၣ်က့ၤလၢအပူၤနီတမံၤဘၣ်.”—မၤတၢ် ၄:၁၂.
• ဖဲပှၤကဲထီၣ်ယဟိဝၤပှၤအုၣ်အသးအခါ, အဝဲသ့ၣ်ဒိးဘျၢထံလၢ ယ့ၣ်ၡူးအမံၤလီၤ.—မးသဲ ၂၈:၁၈, ၁၉.
• ပဃ့ထီၣ်တၢ်လၢယ့ၣ်ၡူးအမံၤလီၤ.—ယိၤဟၣ် ၁၅:၁၆.
• ပနာ်လၢယ့ၣ်ၡူးမ့ၢ်ခိၣ်နၢ်, မ့တမ့ၢ် ထဲဒၣ်ပှၤဘၣ်တၢ်ဃုထၢထီၣ်လၢ ကဒိးန့ၢ်တၢ်ပၢတၢ်ပြး လၢပှၤကညီခဲလၢာ်အဖီခိၣ်လီၤ—၁ ကရံၣ်သူး ၁၁:၃.
ဘၣ်ဆၣ်, တၢ်ဂ့ၢ်အိၣ်အါမံၤလၢ ပတလီၤဂာ်ဒီး တၢ်ဘူၣ်တၢ်ဘါကရၢအဂၤလၢ ကိးလီၤအသးလၢ ခရံာ်ဖိန့ၣ်ဘၣ်. အဒိ, ပနာ်လၢလံာ်စီဆှံသိၣ်လိဝဲလၢ ယ့ၣ်ၡူးမ့ၢ်ယွၤအဖိခွါလီၤ, တမ့ၢ်သၢဂၤတဂၤဃီအကူာ်အခီဘၣ်လီၤ. (မၢ်ကူး ၁၂:၂၉) ပတနာ်လၢသးန့ၣ်သံတသ့, ပတနာ်လၢ လံာ်စီဆှံသိၣ်လိဝဲလၢကစၢ်ယွၤမၤနးမၤဖှီၣ်ပှၤကညီလၢ လရာ်အပူၤလီၤထူလီၤယိာ်, မ့တမ့ၢ် ပတနာ်လၢပှၤလၢအကဲခိၣ်ကဲနၢ် တၢ်ဘူၣ်တၢ်ဘါတၢ်ဖံးတၢ်မၤတဖၣ်န့ၣ် ကြၢးအိၣ်ဒီးမံၤလၤသၣ်ကပီၤလၢ အထီန့ၢ်ဒံးပှၤအဂၤဘၣ်လီၤ.—စံၣ်တဲၤတဲလီၤ ၉:၅; ယဃ့းစက့လး ၁၈:၄; မးသဲ ၂၃:၈-၁၀.
လါယနူၤအါရံၤ ၂၀-၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၃၈-၁၃၉
တဘၣ်မဲာ်ဆှးလၢ နကဟ့ၣ်ထီၣ်တၢ်စံးဆၢ လၢတၢ်အိၣ်ဖှိၣ်ပူၤတဂ့ၤ
စံးထီၣ်ပတြၢၤ ယဟိဝၤယွၤ လၢတၢ်အိၣ်ဖှိၣ်အပူၤ
၁၀ ထဲဒၣ်နဆိမိၣ်ထီၣ်လၢ နကယူာ်ထီၣ်နစု လၢနကဟ့ၣ်တၢ်စံးဆၢအဂီၢ် တဘျီလၢ်လၢ်န့ၣ် မ့ၢ်နသးကနိးဧါ. နမ့ၢ်တူၢ်ဘၣ်ဒ်န့ၣ်န့ၣ် တမ့ၢ်ထဲနၤတဂၤဘၣ်. နီၢ်နီၢ်န့ၣ် ပဝဲအါတက့ၢ်န့ၣ် ဖဲပဟ့ၣ်တၢ်စံးဆၢအခါ ပပျံၤတၢ်လီၤ. ဒ်သိးနမၤနၢၤကွံာ် နတၢ်ပျံၤတၢ်ဖုးတဖၣ် ကသ့အဂီၢ် နကဘၣ်သ့ၣ်ညါလၢ ဘၣ်မနုၤအဃိ နပျံၤတၢ်လဲၣ်န့ၣ်လီၤ. မ့ၢ်နဘၣ်ယိၣ်လၢ နကသးပ့ၤနီၣ်ကွံာ် တၢ်လၢနအဲၣ်ဒိးတဲအီၤ မ့တမ့ၢ် နကတဲကမၣ်ဘၣ်တၢ်ဧါ. နဘၣ်ယိၣ်တၢ်လၢ နတၢ်စံးဆၢ တမုာ်ထဲသိးဒီး ပှၤဂၤအတၢ်စံးဆၢန့ၣ်ဧါ. နမ့ၢ်တူၢ်ဘၣ်ဒ်န့ၣ်န့ၣ် တမ့ၢ်တၢ်လၢအကမၣ်ဘၣ်. နတၢ်တူၢ်ဘၣ်တဖၣ်အံၤန့ၣ် ပာ်ဖျါထီၣ်ဝဲလၢ နမ့ၢ်ပှၤလၢ အအိၣ်ဒီးတၢ်ဆီၣ်လီၤသး ဒီးနထံၣ်လၢ ပှၤဂၤတဖၣ်န့ၣ် ဂ့ၤဒိၣ်န့ၢ်ဒံးနၤလီၤ. ယဟိဝၤယွၤ ဘၣ်သူၣ်ဘၣ်သးဝဲ တၢ်ဂ့ၤတၢ်ဝါအံၤလီၤ. (စံးထီၣ်ပတြၢၤ ၁၃၈:၆; ဖံလံးပံၤ ၂:၃) ဘၣ်ဆၣ် ယဟိဝၤယွၤ အဲၣ်ဒိးလၢ နကစံးထီၣ်ပတြၢၤအီၤ ဒီးနကဟ့ၣ်ဂံၢ်ဟ့ၣ်ဘါ နဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်အပူၤလီၤ. (၁ သ့းစၤလနံ ၅:၁၁) အဝဲအဲၣ်နၤ ဒီးကဟ့ၣ်နၤတၢ်ဂံၢ်တၢ်ဘါ လၢနလိၣ်ဘၣ်အီၤတဖၣ်န့ၣ်လီၤ.
ဖဲပထီၣ်တၢ်အိၣ်ဖှိၣ်အခါ ပဘၣ်ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ
၇ ပမ့ၢ်ဃုကွၢ် တၢ်ဟ့ၣ်ကူၣ်တနီၤလၢ တၢးထီခိးတၢ် လၢအပူၤကွံာ်န့ၣ် ကကဲထီၣ် တၢ်မၤစၢၤလၢပဂီၢ်. အဒိ ပကဘၣ် ကတဲာ်ကတီၤပာ်စၢၤ တၢ်မၤလိဂ့ၤဂ့ၤ. (ကတိၤဒိ ၂၁:၅) ပမ့ၢ်သ့ၣ်ညါပာ် တၢ်ဂ့ၢ်ဂ့ၤဂ့ၤန့ၣ် ပယူာ်ထီၣ်စုကဘူၣ် ဒီးဖဲပစံးဆၢတၢ်အခါ ပတသးတနီးအါအါလၢၤဘၣ်. တကးဒံးဘၣ် ပကဘၣ် စံးဆၢတၢ်ဖုၣ်ဖုၣ်ဖိ ဒီးယိယိဖိ. (ကတိၤဒိ ၁၅:၂၃; ၁၇:၂၇) ပတၢ်စံးဆၢမ့ၢ်ဖုၣ်န့ၣ် ပတဘၣ်ယိၣ်တၢ် အါအါဘၣ်. ပမ့ၢ်ဟ့ၣ်တၢ်စံးဆၢ ဖုၣ်ဖုၣ်ဖိ တကျိၤခံကျိၤန့ၣ် ပဒီပုၢ်ဝဲၢ်မုၣ်ခွါ ကနၢ်ပၢၢ်ဝဲဒိၣ်န့ၢ် ပဟ့ၣ်တၢ်စံးဆၢဖးထီဒံး. ပမ့ၢ်စံးဆၢတၢ်ဖုၣ်ဖုၣ်ဖိ လၢအဟဲထီၣ်လၢ ပသးပူၤန့ၣ် ပပာ်ဖျါထီၣ်လၢ ပကတဲာ်ကတီၤပာ်စၢၤတၢ်ဂ့ၢ် လီၤတံၢ်လီၤဆဲး ဒီးပနၢ်ပၢၢ်အီၤဂ့ၤဂ့ၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၇-E ၁၂/၁ ၁၉ ¶၁၅
ဆဲးပျၢ်လိာ်သးတၢ်ကမၣ် တဂၤဒီးတဂၤ လၢာ်လၢာ်ဆ့ဆ့
၁၅ ပှၤတဂၤမ့ၢ်မၤကမၣ်ဘၣ်နၤဖးဒိၣ် ဘၣ်ဆၣ် အမ့ၢ်တအၢၣ်လီၤအတကမၣ်ဘၣ်, မ့ၢ်တပီၢ်ယၢ်လီၤသးဘၣ် ဒီးမ့ၢ်တဃ့ပျၢ်တၢ်ကမၣ်ဘၣ်န့ၣ် နကမၤဒ်လဲၣ်. (ကတိၤဒိ ၂၈:၁၃) လံာ်စီဆှံ ပာ်ဖျါထီၣ်ဝဲပျီပျီလၢ ယဟိဝၤယွၤ အတပျၢ်ဝဲ ပှၤလၢတပီၢ်ယၢ်လီၤသး ဒီးဆဲးမၤတၢ်ကမၣ်တဖၣ် အတၢ်ကမၣ်ဘၣ်. (ဧ့ၤဘြံၤ ၆:၄-၆; ၁၀:၂၆, ၂၇) မ့မ့ၢ်ပဝဲမီၤ. ကီၤလၤဝါအလံာ် လၢအတဲနၢ်ပၢၢ်ဘၣ်ဃးဒီး လံာ်စီဆှံအဆၢန့ၣ်တဲဝဲ “ခရံာ်ဖိတဖၣ် တလိၣ်ပျၢ် ပှၤလၢအတပီၢ်ယၢ်လီၤသး လၢအမၤတၢ်ဒဲးဘး အၢအၢသီသီ လၢတၢ်သူၣ်အိၣ်သးအိၣ်အပူၤတဖၣ် အတၢ်ကမၣ်ဘၣ်. ပှၤဒ်န့ၣ်တဖၣ်န့ၣ် ကဲထီၣ်ကစၢ်ယွၤအဒုၣ်အဒါ.” (Volume 1, page 862) ခရံာ်ဖိတဂၤ မ့ၢ်တူၢ်ဘၣ် တၢ်တတီတလိၤ ဒီးပှၤမၤအီၤအၢအၢသီသီ ဒီးအလီၤသးဘၣ်အၢန့ၣ် ပှၤတလိၣ်မၢန့ၢ်ဆူၣ်အီၤလၢ အကပျၢ်ကွံာ် ပှၤလၢအမၤကမၣ်အီၤ လၢအတပီၢ်ယၢ်လီၤသးန့ၣ် အတၢ်ကမၣ်ဘၣ်.—စံးထီၣ်ပတြၢၤ ၁၃၉:၂၁, ၂၂.
ijwyp-E ၁၀၅
ဒ်သိးနတမဲာ်ဆှး အါတလၢတဂ့ၤအဂီၢ် နကဘၣ်မၤဒ်လဲၣ်
• တဘၣ်ထိၣ်သတြီၤနသးဒီး ပှၤဂၤတဂ့ၤ. နတလိၣ်ကဲ ပှၤလၢအတဲတၢ်ဆူၣ်ဘၣ်. နမ့ၢ်ကဲ ပှၤလၢအမဲာ်ဆှးနာ်က့ ပာ်လီၤဖီတၢၣ်လၢ နကမၤနၢၤတၢ်မဲာ်ဆှး. နမ့ၢ်မၤဒ်န့ၣ်န့ၣ် နကန့ၢ်ဘၣ်သကိး ဒီးတၢ်လဲၤခီဖျိလၢအဂ့ၤတဖၣ်.
“နတလိၣ်တဲတၢ်ဖးထီ ဒီးနတလိၣ် မၤသးခုပှၤဂၤအသးထီဘိဘၣ်. ဆၢဂ့ၤဆၢဝါလိာ်သးဒီး ပှၤအသီတဂၤဂၤ ဒီးသံကွၢ်တၢ်သံကွၢ်တစဲးတမွဲး.”—အၤလံၡါ.
လံာ်စီဆှံ တၢ်ဟံးစုနဲၣ်ကျဲ– “မ်ပှၤတဂၤဘၣ်တဂၤ သမံသမိးလီၤက့ၤ အနီၢ်ကစၢ် အတၢ်မၤတက့ၢ်. အမ့ၢ်မၤဒ်န့ၣ်န့ၣ် အကအိၣ်ဒီး တၢ်သးခု ဘၣ်ဃးဒီး တၢ်လၢအနီၢ်ကစၢ်မၤဝဲ ဒီးတမ့ၢ်ခီဖျိလၢ အထိၣ်သတြီၤလီၤအသး ဒီးပှၤအဂၤတဂၤအဃိဘၣ်.”—ကလၤ ၆:၄.
• ပာ်သူၣ်ပာ်သးတၢ်လၢနဃၢၤ. ကွၢ်လိပှၤလၢအရ့ဒီးပှၤဂၤသ့ ဒီးပာ်သူၣ်ပာ်သး ဖဲအဝဲသ့ၣ် တဲသကိးတၢ်ဒီးပှၤဂၤအခါ အဝဲသ့ၣ် ရ့ဒီးပှၤဂၤဒ်လဲၣ် ဒီးအဝဲသ့ၣ် ဟးဆှဲးတၢ်မနုၤလဲၣ် .ဒီးဆိကမိၣ်ထံ နအဲၣ်ဒိးကွၢ်လိ အဝဲသ့ၣ် တၢ်ဂ့ၤတၢ်ဝါ ဖဲလဲၣ်တခါလဲၣ်. ပာ်သူၣ်ပာ်သး ပှၤလၢအရ့ဒီးပှၤဂၤသ့ ဒီးဟံးန့ၢ် တၢ်မၤလိလၢ အဝဲသ့ၣ်အအိၣ်.
“ဖဲအဝဲသ့ၣ် ထံၣ်လိာ်သးဒီး ပှၤဂၤအဆိကတၢၢ်တဘျီအခါ အဝဲသ့ၣ် တဲတၢ်ဒ်လဲၣ်ဒီး အိၣ်ထီၣ်အိၣ်လီၤဒ်လဲၣ်န့ၣ် ပာ်သူၣ်ပာ်သး.”—အဲရဲၤ.
လံာ်စီဆှံ တၢ်ဟံးစုနဲၣ်ကျဲ– “ဒ်ထးကျ့အ့ၣ် ထီၣ် ထးအသိး ပှၤတဂၤ မၤစၢၤ အသကိးဒ်သိး အကဂ့ၤဒိၣ်ထီၣ် အဂီၢ်လီၤ.”—ကတိၤ ၂၇:၁၇.
• သံကွၢ် တၢ်သံကွၢ်တဖၣ်. ညီနုၢ်န့ၣ် ပှၤဂၤအဲၣ်ဒိး တဲဖျါထီၣ်အတၢ်ထံၣ်. အဃိ နမ့ၢ်သံကွၢ် တၢ်သံကွၢ်န့ၣ် မ့ၢ်ကျဲလၢ အဂ့ၤတဘိလၢ နကစးထီၣ်တဲတၢ်ဒီးပှၤဂၤ. တကးဒံးဘၣ် နမ့ၢ်မၤဒ်န့ၣ်န့ၣ် ပှၤဂၤတသးစၢၢ်ဆၢနၤ အါအါဘၣ်.
“ကတဲာ်ကတီၤ ပာ်စၢၤဆိနသး ဒ်သိးနတဘၣ်ယိၣ်တၢ် အါတလၢတဂ့ၤအဂီၢ်. တချုးလၢ နလဲၤရ့လိာ်မုာ်ဒီးပှၤဂၤအခါ ဆိကမိၣ်ထံ တၢ်ဂ့ၢ်တမံၤခံမံၤ မ့တမ့ၢ် တၢ်သံကွၢ်တနီၤလၢ နအဲၣ်ဒိး တဲသကိး. နမ့ၢ်မၤဒ်န့ၣ်န့ၣ် နတဘၣ်ယိၣ်တၢ်အါအါလၢၤဘၣ်.”—အလါနၤ.
လံာ်စီဆှံ တၢ်ဟံးစုနဲၣ်ကျဲ– “တဘၣ်ကွၢ်လီၤထဲလၢ သုနီၢ်ကစၢ် အဘျုးတဂ့ၤ. ဆိကမိၣ်န့ၢ်တၢ်လၢ ပှၤဂၤအဂီၢ် စ့ၢ်ကီးတက့ၢ်.”—ဖံလံး ၂:၄.
လါယနူၤအါရံၤ ၂၇–လါဖ့ၤဘြူၤအါရံၤ ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၄၀-၁၄၃
ဖဲနဃ့ထုကဖၣ်ဝံၤအခါ မၤတၢ်လၢ နမၤသ့တဖၣ် ဒ်နတၢ်ဃ့ထုကဖၣ် အိၣ်ဝဲအသိး
“ကနၣ်ပှၤကူၣ်တၢ်သ့ အတၢ်ကတိၤ”
၁၃ တၢ်ဟ့ၣ်ကူၣ်န့ၣ် ပကဘၣ်ထံၣ်အီၤဒ် အမ့ၢ်ကစၢ်ယွၤအတၢ်အဲၣ်. ယဟိဝၤယွၤ ဘၣ်သးဝဲလၢ ပကန့ၢ်ဘၣ် တၢ်လၢအဂ့ၤကတၢၢ် လၢပဂီၢ်. (ကတိၤဒိ ၄:၂၀-၂၂) အဃိ ဖဲအဟ့ၣ်ကူၣ်ပှၤ ခီဖျိလၢ အကလုၢ်ကထါ, လံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံ မ့တမ့ၢ် ပဒီပုၢ်ဝဲၢ်ခွါတဖၣ်အခါ မ့ၢ်ဒၣ်အပာ်ဖျါထီၣ်တၢ်အဲၣ် လၢပဖီခိၣ်လီၤ. ဧ့ၤဘြံၤ ၁၂:၉, ၁၀ တဲဝဲလၢ “ကစၢ်ယွၤန့ၣ် အဝဲသိၣ်က့ၤသီက့ၤပှၤ လၢပကန့ၢ်ဘျုးအဂီၢ်” လီၤ.
၁၄ သးစၢၢ်ဆၢလၢ တၢ်ဂ့ၢ်တၢ်ကျိၤ, တဘၣ်သးစၢၢ်ဆၢ လၢကျဲလၢပှၤဟဲတဲနၤ ဒ်လဲၣ်ဒ်လဲၣ်တဂ့ၤ. တဘျီတခီၣ် ပကတူၢ်ဘၣ်လၢ ပှၤဟဲဟ့ၣ်ကူၣ်ပှၤ အကျိၤအကျဲန့ၣ် တဘၣ်ဘၣ်. ပှၤလၢအဟ့ၣ်ကူၣ်တၢ်တဂၤန့ၣ် ကြၢးဂုာ်ကျဲးစၢး အဂ့ၤကတၢၢ် ဒ်သိးပှၤတူၢ်လိာ် အတၢ်ဟ့ၣ်ကူၣ် ကညီအဂီၢ်. (ကလၤတံ ၆:၁) ဒီးဖဲပှၤဟ့ၣ်ကူၣ်ပှၤအခါ ပမ့ၢ်တူၢ်ဘၣ်လၢ ပှၤကြၢးဟ့ၣ်ကူၣ်ပှၤလၢ ကျဲအဂၤတဘိသနာ်က့ ပကဘၣ်သးစၢၢ်ဆၢ တၢ်ဂ့ၢ်တၢ်ကျိၤ လၢအတဲပှၤလီၤ. ပသံကွၢ်လီၤပသး ဒ်အံၤသ့. ‘ယမ့ၢ်တဘၣ်သူၣ်ဘၣ်သး ကျဲလၢအဟဲဟ့ၣ်ကူၣ်ယၤ သနာ်က့ တၢ်လၢအတဲဝဲန့ၣ် မ့ၢ်အဘၣ် အိၣ်တမံၤမံၤဧါ. မ့ၢ်ယကွၢ်ကပာ် ပှၤလၢအဟ့ၣ်ကူၣ်ယၤတဂၤ အတၢ်ဂံၢ်စၢ်ဘါစၢ် ဒီးယဟံးန့ၢ်တၢ်မၤလိလၢအအိၣ် ကသ့ဧါ.’ ဖဲပှၤဟ့ၣ်ကူၣ်ပှၤ တဘျီဂ့ၤတဘျီဂ့ၤအခါ ပမ့ၢ်ဂုာ်ကျဲးစၢးဟံးန့ၢ် တၢ်မၤလိန့ၣ် မ့ၢ်ဒၣ်ကျဲလၢ ပအိၣ်ဒီး တၢ်ကူၣ်သ့လီၤ.—ကတိၤဒိ ၁၅:၃၁.
တၢး၁၀-E ၃/၁၅ ၃၂ ¶၄
ဖဲနထံၣ်ဘၣ် တၢ်ကီတၢ်ခဲအခါ ဆဲးအိၣ်ဒီး ‘တၢ်သးကဆှီ’
တၢ်ထီဒုၣ်ထီဒါ, ကျိၣ်စ့တၢ်ဂ့ၢ်ကီ ဒီးတၢ်ထီဒုၣ်ထီဒါန့ၣ် မၤဟးဂီၤ ကစၢ်ယွၤ အခ့အပှၤတဖၣ်အသးသ့. တဘျီတခီၣ် အဝဲသ့ၣ် ကတူၢ်ဘၣ်ဝဲ နးဒိၣ်မး. စီၤပၤဒၤဝံးဒၣ်လဲာ် ဘၣ်လဲၤခီဖျိ တၢ်အိၣ်သးဒ်န့ၣ် အဝဲတဲဝဲလၢ “ယသးဂံၢ်ဘါလီၤစၢ် ဒီးယဂံၢ်ယဘါ တအိၣ်နီတစဲးလၢၤဘၣ်.” (စံး ၁၄၃:၄) တၢ်မနုၤ မၤစၢၤ စီၤဒၤဝံး ဒ်သိးအလဲၤခီဖျိတၢ် ကန့ၢ်အဂီၢ်လဲၣ်. စီၤဒၤဝံးန့ၣ် အဆိကမိၣ်ထီၣ် တၢ်လၢယဟိဝၤယွၤ မၤန့ၢ်အီၤ ဒီးမၤန့ၢ်အခ့အပှၤတဖၣ်. ဒီးအဝဲဆိကမိၣ်ထံ တၢ်လၢယဟိဝၤယွၤ မၤဝဲလၢအမံၤအဂီၢ်. တကးဒံးဘၣ်န့ၣ် အဝဲဆဲးဆိကမိၣ်ထံ တၢ်လၢကစၢ်ယွၤမၤဝဲတဖၣ်. (စံး ၁၄၃:၅) ဒ်န့ၣ်အသိး ပကဘၣ်ဆိကမိၣ်ထံ ဘၣ်ဃးဒီး ပတၢ်ဘၣ်တ့ကစၢ်, တၢ်လၢအမၤန့ၢ်ပှၤ ဒီးတၢ်လၢအကမၤန့ၢ်ပှၤ လၢခါဆူညါ. ပမ့ၢ်မၤဒ်န့ၣ်န့ၣ် ကမၤစၢၤပှၤဒ်သိး ပလဲၤခီဖျိ တၢ်ကီတၢ်ခဲကန့ၢ်အဂီၢ်.
တၢး၁၅-E ၃/၁၅ ၃၂ ¶၂
နကဘၣ်ဖျီသးဒီး ‘ပှၤလၢ ကစၢ်အပူၤ’ န့ၣ် အရ့ဒိၣ်ဒံးဧါ
တဘျီတခီၣ် နကတူၢ်ဘၣ် ဒ်သိးဒီး ပှၤကွဲးထါစံးထီၣ်ပတြၢၤ စီၤဒၤဝံးလၢ အတဲဝဲလၢ “အိ ယဟိဝၤယွၤဧၢ, ယဂံၢ်ယဘါလၢာ်လံ စံးဆၢယၤ မ့ၢ်ချ့ဟီ. တဘၣ်ဃၣ်ကွံာ် နမဲာ်လၢယအိၣ်တဂ့ၤ, ယကလီၤဂာ်ဘၣ်ဖုးဒီး ပှၤလၢအလဲၤလီၤလၢ တၢ်ပူၤလီၤ.” (စံး ၁၄၃:၅-၇, ၁၀) တဘျီတခီၣ်န့ၣ် နကဘၣ်အိၣ်ခိး ယဟိဝၤယွၤ ဒ်သိးနကသ့ၣ်ညါ အတၢ်ဘၣ်သး လၢနဂီၢ်အိၣ်ဒ်လဲၣ်. နမ့ၢ်ဖးလံာ်စီဆှံ ဒီးဆိကမိၣ်ထံ တၢ်လၢနဖးတဖၣ်န့ၣ် နကသ့ၣ်ညါ အတၢ်ဘၣ်သးလၢနဂီၢ်. ဒီးနကသ့ၣ်ညါ အတၢ်သိၣ်တၢ်သီ ဒီးအဝဲမၤစၢၤတ့ၢ် အခ့အပှၤလၢညါဒ်လဲၣ်. နမ့ၢ်ဒိကနၣ်အီၤန့ၣ် နကသ့ၣ်ညါဘၣ်လၢ တၢ်ဒိကနၣ်အီၤန့ၣ် မ့ၢ်ကျဲလၢ အကူၣ်သ့တဘိ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2-E ၁၁၅၁
တၢ်အစုၣ်အပျၢ်
တၢ်ကတိၤဒိ. တၢ်လံၣ်တၢ်လီ ဒီးတၢ်တဲဟးဂီၤပှၤဂၤန့ၣ် မၤဘၣ်ဒိ ပှၤမံၤဂ့ၤသၣ်ဂ့ၤသ့ဝဲအဃိ ဘၣ်တၢ်ထိၣ်သတြီၤအီၤဒ် ဂုၢ်အစုၣ်အပျၢ်လၢ အမၤသံတၢ်. (စံး ၅၈:၃, ၄) တၢ်လၢဂုၢ်န့ၣ် အစုၣ်အိၣ်လၢ အကိာ်ပူၤ ဒီးအခၣ်ဃံအလီၢ်ခံ. အဃိ ပှၤလၢအဟးတဲဟးဂီၤတၢ်တဖၣ် “အထးခိၣ်န့ၣ်” လံာ်စီဆှံတဲဝဲလၢ “မၤအသးဒ်ဂုၢ်အၢ အစုၣ်အပျၢ် အသိး” (မ့ၢ်စ့ၢ်ကီး, တၢ်အစုၣ်အပျၢ် အိၣ်လၢအဝဲသ့ၣ် အပျ့ၤအလီၢ်ခံ.) (စံး ၁၄၀:၃; ရိ ၃:၁၃) ပှၤလၢအတဲဟးဂီၤပှၤမံၤ, တဲအီၣ်ပှၤဂ့ၢ် ဒီးသိၣ်လိကမၣ်တၢ် မ့တမ့ၢ် တဲဟးဂီၤပှၤဂၤလၢ ကျဲအဂၤ အပျ့ၤန့ၣ် လီၤဂာ်ဒ်သိးဒီး “အပှဲၤဝဲဒီးတၢ်စုၣ်တၢ်ပျၢ်လၢ အမၤသံတၢ်.”—ယၤ ၃:၈.
ဘၣ်မနုၤအဃိ ယဟိဝၤပှၤအုၣ်အသးတဖၣ် တတူၢ်လိာ်တၢ်သွီသွံၣ်လဲၣ်
တၢ်နၢ်ပၢၢ်ကမၣ်တဖၣ်
• ပှၤဂၤအတၢ်ဃဲၤ– ယဟိဝၤပှၤအုၣ်အသးတဖၣ် တနာ်ကသံၣ်ဖီၣ် မ့တမ့ၢ် တၢ်ကူစါယါဘျါလၢဘၣ်ဃး ကသံၣ်ကသီဘၣ်.
တၢ်မ့ၢ်တၢ်တီ– ပဃုတၢ်ကူစါယါဘျါအဂ့ၤကတၢၢ် လၢပဂီၢ်ဒီး ပဟံၣ်ဖိဃီဖိအဂီၢ်လီၤ. ဖဲပအိၣ်တဆူၣ်တချ့အခါ, ပလဲၤဆူကသံၣ်သရၣ်လၢ အစဲၣ်နီၤလၢ ကသံၣ်ကသီဒီး ကူးကွဲးယါဘျါတၢ်လၢတပာ်ဃုာ်ဒီးတၢ်သွံၣ် အအိၣ်န့ၣ်လီၤ. ပစံးဘျုးဘၣ် တၢ်လဲၤထီၣ်လဲၤထီတ့ၢ်လံလၢ ကသံၣ်ကသီတပၤန့ၣ်လီၤ. နီၢ်နီၢ်, တၢ်ကူစါယါဘျါလၢ တပာ်ဃုာ်ဒီးတၢ်သွံၣ် အတၢ်ဂုၤထီၣ်ပသီထီၣ်လၢ ကဲထီၣ်တၢ်မၤစၢၤလၢ ပှၤဆါလၢအမ့ၢ်ပှၤအုၣ်အသးတဖၣ်အဂီၢ်န့ၣ် ခဲအံၤဘၣ်တၢ်သူအီၤဒ်သိး အဘျုးကအိၣ်လၢ ပှၤအဂုၤအဂၤအဂီၢ်လီၤ. လၢထံကီၢ်အါမးအပူၤ ပှၤဆါတနီၤဃုထၢဝဲလၢ ကဟးဆှဲးတၢ်သွီသွံၣ်သ့လီၤ. လၢတၢ်န့ၣ်အဃိ, အဝဲသ့ၣ်ဟးဆှဲးဝဲတၢ်ဆါဒ်သိး တၢ်ဆူးတၢ်ဆါဘၣ်ထွဲဒီးတၢ်သွံၣ်, ဂံၢ်တြီဆၢတၢ်ဆါ မၤတၢ်တဘၣ်ဘျီးဘၣ်ဒါ, ဒီးတၢ်သွီကမၣ်တၢ်သွံၣ်တဖၣ်သ့န့ၣ်လီၤ.
• ပှၤဂၤအတၢ်ဃဲၤ– ယဟိဝၤပှၤအုၣ်အသးတဖၣ် နာ်ဝဲလၢ တၢ်နာ်န့ၣ်မၤဘျါ ပှၤဆါတဂၤန့ၣ်လီၤ.
တၢ်မ့ၢ်တၢ်တီ– ပတမၤ တၢ်ကူစါယါဘျါလၢတၢ်နာ်ဘၣ်.
• ပှၤဂၤအတၢ်ဃဲၤ– တၢ်ဟးဆှဲးတၢ်သွီသွံၣ်န့ၣ် တၢ်လၢာ်ဘူၣ်လၢာ်စ့ၤ အါဒိၣ်မးလီၤ.
တၢ်မ့ၢ်တၢ်တီ– တၢ်ကူစါယါဘျါလၢ တပာ်ဃုာ်ဒီးတၢ်သွီသွံၣ်န့ၣ် တၢ်လၢာ်ဘူၣ်လၢာ်စ့ၤစှၤဝဲလီၤ.
• ပှၤဂၤအတၢ်ဃဲၤ– ယဟိဝၤပှၤအုၣ်အသးတဖၣ်, လၢအပၣ်ဃုာ်ဒီးဖိသၣ်တဖၣ်န့ၣ် ဘၣ်သံကိးနံၣ်ဒဲးလၢ တသွီတၢ်သွံၣ်အဃိလီၤ.
တၢ်မ့ၢ်တၢ်တီ– တၢ်အုၣ်အသးတအိၣ်လ့ၤတက့ၤလၢ တၢ်ကတိၤအံၤအဂီၢ်ဘၣ်. ကသံၣ်သရၣ် ကူးကွဲးတၢ်တဖၣ် ညီနုၢ်မၤဝဲ တၢ်ကူးကွဲးယါဘျါဒ်သိးဒီး တၢ်ကွဲးသးဖျၢၣ်, တၢ်ကွဲးဃံ ဒီးတၢ်ကွဲးထုးထီၣ်ပာ်က့ၤ က့ၢ်ဂီၤဒွဲတဖၣ်အခါ တသွီဝဲတၢ်သွံၣ်ဘၣ်. ပှၤဆါလၢပာ်ဃုာ်ဒီးဖိသၣ် လၢတတူၢ်လိာ် တၢ်သွီတၢ်သွံၣ်တဖၣ်န့ၣ် အိၣ်မုာ်ထီၣ်က့ၤဒ် ပှၤသွီတၢ်သွံၣ်တဖၣ်အသိး, မ့တမ့ၢ် အိၣ်မုာ်ထီၣ်ချ့န့ၢ်ဒံး ပှၤလၢအတူၢ်လိာ် တၢ်သွံၣ်တဖၣ်န့ၣ်လီၤ. ဒ်လဲၣ်ဂ့ၤဒ်လဲၣ်ဂ့ၤ, ပှၤဆါတဂၤကသံလၢ ဂ့ၢ်လိာ်တၢ်သွံၣ်အဃိ မ့တမ့ၢ် ကမူလၢတူၢ်လိာ်တၢ်သွံၣ်အဃိ န့ၣ်ပှၤတဲတသ့နီတဂၤဘၣ်.
ဘၣ်မနုၤအဃိ ယဟိဝၤပှၤအုၣ်အသးတဖၣ် တတူၢ်လိာ်ဝဲ တၢ်သွီသွံၣ်လဲၣ်
တၢ်အံၤမ့ၢ်တၢ်ဘူၣ်တၢ်ဘါ အတၢ်ဂ့ၢ်တမံၤလီၤ. လံာ်စီဆှံ အသီဒီးအလီၢ်လံၤ ခံကတြူၢ်လၢာ်န့ၣ် မၤလိာ်ပှၤလၢ ပကဘၣ်ဟးဆှဲးတၢ်သွံၣ်န့ၣ် ဖျါတြၢၢ်ကလာ်လီၤ. (၁ မိၤၡ့ ၉:၄; ၃ မိၤၡ့ ၁၇:၁၀; ၅ မိၤၡ့ ၁၂:၂၃; မၤတၢ် ၁၅:၂၈, ၂၉) ကစၢ်ယွၤထံၣ်စ့ၢ်ကီး တၢ်သွံၣ်ဒ် တၢ်လၢအခၢၣ်စး သးသမူလီၤ. (၃ မိၤၡ့ ၁၇:၁၄) လၢတၢ်န့ၣ်အဃိ ပဟးဆှဲးတၢ်သွံၣ်န့ၣ် မ့ၢ်ထဲဒၣ်တၢ်စူၢ် ယွၤအကလုၢ် တကးဘၣ် မ့ၢ်စ့ၢ်ကီး တၢ်ပာ်ကဲကစၢ်ဒ် ပှၤလၢအဟ့ၣ်သးသမူအသိးန့ၣ်လီၤ.
တၢ်လဲလိာ် တၢ်ထံၣ်တဖၣ်
တဘျီခါ, တၢ်ကူစါယါဘျါလၢ တၢ်ဟးဆှဲးတၢ်သွီသွံၣ်, လၢတၢ်ကိးစ့ၢ်ကီးလၢ ကသံၣ်ဖီၣ်လၢ တပာ်ဃုာ်ဒီးတၢ်သွံၣ်, န့ၣ်လၢတၢ်ကရၢကရိဘၣ်ဃး ကသံၣ်ကသီအပူၤ ညီနုၢ်ဘၣ်တၢ်ထံၣ်အီၤ ဒ်တၢ်လၢတလၢကွံာ်, တၢ်မၤသံလီၤက့ၤသးဒၣ်လဲာ်လီၤ. ဘၣ်ဆၣ် တၢ်ထံၣ်အံၤ လဲလိာ်အသး တယံာ်ဒံးဘၣ်လီၤ. အဒိ, ဖဲ ၂၀၀၄ န့ၣ်, ကၠၢနၢၣ်လၢဘၣ်ဃး ကသံၣ်ကသီတဘ့ၣ်အပူၤ ကွဲးဝဲတၢ်ကွဲးဖှိၣ်ရၤလီၤတခါအပူၤ ပာ်ဖျါဝဲလၢ “တၢ်မၤအကျိၤအကျဲအါမး ဂုၤထီၣ်ပသီထီၣ်လၢ တၢ်ကသူအီၤလၢ ပှၤဆါလၢမ့မ့ၢ် ယဟိဝၤပှၤအုၣ်အသးတဖၣ်အဂီၢ်န့ၣ် ကကဲထီၣ်တၢ်မၤညီနုၢ် လၢအပတီၢ်ထီလၢ နံၣ်လၢအကဟဲတဖၣ်န့ၣ်လီၤ.” ဖဲ ၂၀၁၀ အပူၤ တၢ်ကွဲးဖှိၣ်ရၤလီၤတခါလၢ ကၠၢနၢၣ် Heart, Lung and Circulation အပူၤစံးဝဲလၢ “‘တၢ်ကွဲးယါဘျါလၢ တပာ်ဃုာ်ဒီးတၢ်သွံၣ်’ န့ၣ်တကြၢးမ့ၢ်ထဲဒၣ် ယဟိဝၤပှၤအုၣ်အသးတဖၣ် အဂီၢ်ဘၣ်. ကသံၣ်သရၣ်လၢ အကူးကွဲးတၢ်တဖၣ်န့ၣ် ကြၢးသူဝဲတၢ်အံၤလၢ တၢ်ကွဲးယါဘျါ ကိးနံၤဒဲးအပူၤန့ၣ်လီၤ.”
ခဲအံၤ ဟီၣ်ခိၣ်ဒီဘ့ၣ် ကသံၣ်သရၣ်လၢ အကထိတဖၣ်န့ၣ် သူဝဲတၢ်မၤအကျိၤအကျဲလၢ တၢ်သွံၣ်ဟးထီၣ်စှၤဒီး မၤဝဲတၢ်ကူးကွဲးယါဘျါ အဒိၣ်အမုၢ်လၢ တၢ်သွံၣ်တပာ်ဃုာ်န့ၣ်လီၤ. တၢ်ဃုထၢတၢ်အဂၤလၢ တၢ်သွီသွံၣ်အလီၢ်ဒ်သိးအံၤန့ၣ် တၢ်သူအီၤဒၣ်လဲာ်လၢ ထံကီၢ်လၢ ဂုၤထီၣ်ပသီထီၣ်အပူၤ ဒီးပှၤဆါအါမးလၢတမ့ၢ် ယဟိဝၤပှၤအုၣ်အသးတဖၣ်န့ၣ် ဃ့ဝဲတၢ်ကူစါယါဘျါဒ်သိးအံၤလီၤ.
လါဖ့ၤဘြူၤအါရံၤ ၃-၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၄၄-၁၄၆
“ပှၤလၢ အကစၢ်ယွၤမ့ၢ် ယဟိဝၤယွၤန့ၣ် ကသးခုဝဲ”
တၢး၁၈.၀၄-E ၃၂ ¶၃-၄
ပှၤဖးလံာ်ဖိတဖၣ် အတၢ်သံကွၢ်
၁. ဆိကမိၣ်ထံ စံးထီၣ်ပတြၢၤအဆၢဖိလၢ အလီၢ်ခံတဖၣ်. တၢ်ကတိၤလၢအမ့ၢ် “နမ့ၢ်မၤဒ်န့ၣ်န့ၣ်” လၢအအိၣ်ဖဲ အဆၢဖိ ၁၂ အပူၤန့ၣ် အပာ်ဖျါထီၣ်ဝဲလၢ တၢ်ဆိၣ်ဂ့ၤလၢ ပထံၣ်ဘၣ်အီၤဖဲ အဆၢဖိ ၁၂ တုၤလၢ ၁၄ န့ၣ် အကဲဝဲလၢ ပှၤတီပှၤလိၤတဖၣ်အဂီၢ်. ပှၤတီပှၤလိၤတဖၣ်အံၤ အဃ့ဝဲလၢ အကန့ၢ်ဘၣ် ‘တၢ်ပူၤဖျဲး ဒီးတၢ်အုၣ်က့ၤခီၣ်က့ၤ’ လၢပှၤအၢပှၤသီတဖၣ်အစုပူၤ. (အဆၢဖိ ၁၁) ဒီးလၢအဆၢဖိ ၁၅ အပူၤ တၢ်ကတိၤလၢအမ့ၢ် “သးခု” န့ၣ် ပထံၣ်ဘၣ်အီၤ ၂ ဘျီ. တၢ်ကတိၤတဖၣ်အံၤစ့ၢ်ကီး အဘၣ်ဃးဒီး ပှၤတီပှၤလိၤလၢ ပတဲသကိးအဂ့ၢ်ဖဲမကိာ်န့ၣ်လီၤ. အဝဲသ့ၣ် “အကစၢ်ယွၤမ့ၢ် ယဟိဝၤယွၤ.”
၂. တၢ်နၢ်ပၢၢ်တခါအံၤန့ၣ် အလီၤပလိာ်လိာ်သးဒီး လံာ်စီဆှံဆၢအဂၤလၢ အပာ်ဖျါထီၣ်ဝဲ ကစၢ်ယွၤကဆိၣ်ဂ့ၤ ပှၤလၢအတီဒီးအီၤတဖၣ်. ထါစံးထီၣ်ပတြၢၤတခါအံၤ ပာ်ဖျါထီၣ်ဝဲလၢ စီၤဒၤဝံး မုၢ်လၢ်ဝဲလၢ ကစၢ်ယွၤ ကမၤပူၤဖျဲး ပှၤအံၣ်စရ့လးဖိတဖၣ်လၢ အဒုၣ်အဒါအစုပူၤ ဒီးအကဆိၣ်ဂ့ၤအဝဲသ့ၣ် ဒီးအဝဲသ့ၣ် ကဒိးန့ၢ်ဘၣ်ဝဲ တၢ်သးခု ဒီးအိၣ်ဘၣ် ဘီၣ်ဘီၣ်ညီညီ. (၃ မိၤ ၂၆:၉, ၁၀; ၅ မိၤ ၇: ၁၃; စံး ၁၂၈: ၁-၆) အဒိ ဖဲ ၅ မိၤၡ့ ၂၈:၄ န့ၣ်တဲဝဲလၢ “သုကဘၣ်ဆိၣ်ဂ့ၤ ခီဖျိ သုကဒိးန့ၢ်ဘၣ် သုဖိတဖၣ်, သုဟီၣ်ခိၣ်အတၤသၣ် ဒီးသုကျီၢ်ဖိ ဒီးသိဖိ အါအါဂီၢ်ဂီၢ်လီၤ.” ဒ်ကစၢ်ယွၤ အၢၣ်လီၤဝဲအသိး ဖဲစီၤဒၤဝံး အဖိခွါ စီၤၡလိၤမိၤ ပၢတၢ်အခါ ပှၤအံၣ်စရ့လးဖိတဖၣ် အိၣ်ဘၣ် မုာ်မုာ်ခုၣ်ခုၣ် ဒီးဘီၣ်ဘီၣ်ညီညီ. ဒီးစီၤၡလိၤမိၤအတၢ်ပၢန့ၣ် အပာ်ဖျါထီၣ်ဝဲလၢ မ့းၡံအၤ အတၢ်ပၢ ကမၤအသးဒ်လဲၣ် စ့ၢ်ကီး.—၁ စီၤ ၄: ၂၀, ၂၁; စံး ၇၂: ၁-၂၀.
တၢ်နၢ်ပၢၢ်လၢ အဘၣ်ဃးဒီး စံးထီၣ်ပတြၢၤ ၁၄၄ အံၤန့ၣ် အမၤစၢၤပှၤ ဒ်သိး ပကနၢ်ပၢၢ်အါထီၣ် တၢ်မုၢ်လၢ်လၢ ယဟိဝၤယွၤ အခ့အပှၤတဖၣ်အဂီၢ် လၢအအိၣ်လၢ စံးထီၣ်ပတြၢၤ ဒီတဘ့ၣ်အပူၤ. လံာ်စံးထီၣ်ပတြၢၤ ပာ်ဖျါထီၣ်ဝဲ ကစၢ်ယွၤ ကမၤဟးဂီၤကွံာ် ပှၤအၢပှၤသီတဖၣ် ဝံၤအလီၢ်ခံ အကဒုးအိၣ်ထီၣ် တၢ်မုာ်တၢ်ခုၣ် လီၤထူလီၤယိာ် ဒီးပှၤတီပှၤလိၤတဖၣ် ကအိၣ်ဘၣ် ဘီၣ်ဘီၣ်ညီညီ.—စံး ၃၇: ၁၀, ၁၁.
ဆဲးမၤဂၢၢ်ကျၢၤထီၣ် နတၢ်မုၢ်လၢ်ထီဘိ
၁၆ ပတၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်န့ၣ် အကဲဝဲ ကစၢ်ယွၤအတၢ်ဟ့ၣ် ဒီးပပာ်လုၢ်ပာ်ပှ့ၤ တၢ်ဟ့ၣ်တခါအံၤ သပှၢ်တၢၢ်. ပခီးကွၢ်လၢ် တၢ်မုၢ်လၢ်တခါအံၤ ဒီးပနာ်သပှၢ်တၢၢ်လၢ အကဟဲလၢပှဲၤထီၣ်ဝဲ. ပတၢ်မုၢ်လၢ်တခါအံၤ အလီၤဂာ်ဒ်သိးဒီး နီၣ်သက့ၤ. အဃိ ပမ့ၢ်ထံၣ်ဘၣ်ဒီး တၢ်ကီတၢ်ခဲတမံၤမံၤန့ၣ် ပတၢ်မုၢ်လၢ်အံၤ ကမၤစၢၤပှၤ ဒ်သိးဒီး ပကပာ်ပသး မုာ်မုာ်ခုၣ်ခုၣ်, ပလဲၤခီဖျိ တၢ်မၤအၢမၤနးကန့ၢ် ဒီးပမ့ၢ်ဘၣ်သံသနာ်က့ ပသံဘူၣ်. တကးဒံးဘၣ် ပတၢ်မုၢ်လၢ်တခါအံၤ အလီၤဂာ်ဒ်သိးဒီး ခိၣ်ဖျီၣ်ထး စ့ၢ်ကီး, မ့ၢ်လၢ ပတၢ်မုၢ်လၢ်တခါအံၤ အမၤစၢၤပှၤဒ်သိး ပကအိၣ်ဒီး တၢ်ဆိကမိၣ်လၢအဂ့ၤ ဒီးပကမၤတၢ်လၢအဘၣ်. ပတၢ်မုၢ်လၢ်လၢ အအိၣ်လၢ လံာ်စီဆှံပူၤန့ၣ် မၤစၢၤပှၤလၢ ပကသ့ၣ်ညါ ယဟိဝၤယွၤအဂ့ၢ်ဂ့ၤထီၣ် ဒီးပသ့ၣ်ညါဘၣ်လၢ ယဟိဝၤယွၤန့ၣ် အအဲၣ်ပှၤ သပှၢ်တၢၢ်. အဃိ ပမ့ၢ်ဆဲးမၤဂၢၢ်ကျၢၤထီၣ် ပတၢ်မုၢ်လၢ်ထီဘိန့ၣ် ကကဲဘျုးလၢပဂီၢ် ဖးအါညါ.
၁၇ တၢ်မၢဖိပီလူး ကွဲးလံာ်ပရၢလၢ ဒီပုၢ်ဝဲၢ်လၢ အအိၣ်လၢ ဝ့ၢ်ရိမ့ၤ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ “မ်သုတၢ်မုၢ်လၢ်န့ၣ် မၤသးခုသုသးတက့ၢ်.” (ရိမ့ၤ ၁၂:၁၂) စီၤပီလူးသ့ၣ်ညါဝဲလၢ အမ့ၢ်ဆဲးအိၣ်ဒီး တၢ်သးတီထီဘိန့ၣ် အကအိၣ်မူဘၣ် လီၤထူလီၤယိာ်လၢ မူခိၣ်အဃိ အတၢ်မုၢ်လၢ်တခါအံၤန့ၣ် မၤသးခုအသး. ပဝဲစ့ၢ်ကီး ပသ့ၣ်ညါလၢ ယဟိဝၤယွၤကမၤလၢပှဲၤ အတၢ်အၢၣ်လီၤအဃိ ပတၢ်မုၢ်လၢ်န့ၣ် အမၤသးခုပသး. ပှၤကွဲးထါ စံးထီၣ်ပတြၢၤတဂၤစ့ၢ်ကီး တဲဝဲလၢ “ပှၤလၢအမုၢ်လၢ်တၢ်လၢ ယဟိဝၤယွၤ အအိၣ်န့ၣ် ကသးခုဝဲ” မ့ၢ်လၢ ယဟိဝၤယွၤန့ၣ် “အမ့ၢ်ပှၤလၢ အသးတီ ထီဘိ.”—စံးထီၣ်ပတြၢၤ ၁၄၆:၅, ၆.
တၢ်အဲၣ်လၢ အဟ့ၣ်ပှၤတၢ်သးခုနီၢ်နီၢ်န့ၣ် မ့ၢ်တၢ်အဲၣ်ဒ်လဲၣ်တကလုာ်လဲၣ်
၁၉ ပအိၣ်လၢ မုၣ်ကီၤလံၢ်အတၢ်ပၢတၢ်ပြး အဖီလာ်အဃိ ပှၤဟီၣ်ခိၣ်ဖိတဖၣ် ဘၣ်ကီဘၣ်ခဲဝဲ အိၣ်လၢအနံၣ်လၢအကထိတဖၣ်လံ. ပအိၣ်မူဘၣ်လၢ မုၢ်မဆါတနံၤအံၤန့ၣ် မ့ၢ်ဝဲမုၢ်နံၤခံကတၢၢ် အဆၢကတီၢ်အဃိ ဟီၣ်ခိၣ်ဒီဘ့ၣ်ပှဲၤဝဲဒီး ပှၤလၢအအဲၣ်လီၤဒၣ်ထဲအသး, ပှၤအဲၣ်ကျိၣ်အဲၣ်စ့ ဒီးပှၤအဲၣ်တၢ်မုာ်တၢ်ပၠီၣ်တဖၣ်လီၤ. အဝဲသ့ၣ် ကွၢ်တၢ်ထဲ အနီၢ်ကစၢ်အဂီၢ် ဒီးအဝဲသ့ၣ်ထံၣ်ဝဲလၢ အနီၢ်ကစၢ်တၢ်ဘၣ်သးန့ၣ် မ့ၢ်တၢ်အရ့ဒိၣ်ကတၢၢ်လီၤ. ဘၣ်ဆၣ် ပှၤဒ်န့ၣ်တဖၣ်န့ၣ် တဒိးန့ၢ်ဘၣ်တၢ်သးခုနီၢ်နီၢ်ဘၣ်. မ့မ့ၢ်ပှၤလၢအအဲၣ်ကစၢ်ယွၤန့ၣ် လံာ်စီဆှံတဲဝဲလၢ– “ပှၤလၢစီၤယၤကိာ်အကစၢ် မ့ၢ်အတၢ်မၤစၢၤအီၤ, ပှၤလၢအသန့ၤအသးလၢ ယွၤအကစၢ်န့ၣ် ဘၣ်ဆိၣ်ဂ့ၤဝဲလီၤ.”—စံးထီၣ်ပတြၢၤ ၁၄၆:၅.
၂၀ ယဟိဝၤယွၤန့ၣ် အခ့အပှၤတဖၣ် အဲၣ်အီၤဒိၣ်မးလီၤ. တနံၣ်ဘၣ်တနံၣ် ပှၤလၢအသ့ၣ်ညါ ယဟိဝၤယွၤ ဒီးအဲၣ်အီၤန့ၣ် အါထီၣ်ဝဲရူၢ်ရူၢ်လီၤ. လၢတၢ်န့ၣ်အဃိ ပသ့ၣ်ညါလၢ ယွၤအဘီမုၢ်ပၢတၢ်လံ ဒီးတယံာ်လၢၤဘၣ်န့ၣ် ပှၤဟီၣ်ခိၣ်ဖိတဖၣ် ကဒိးန့ၢ်ဘၣ် တၢ်ဆိၣ်ဂ့ၤ ဒိၣ်ဒိၣ်မုၢ်မုၢ်လၢ ပဆိကမိၣ်အီၤတသ့ဘၣ် နီတဘျီတဖၣ်န့ၣ်လီၤ. ပမ့ၢ်မၤအတၢ်ဘၣ်သး ဒီးပမ့ၢ်မၤသးခုအသးန့ၣ် ပကဒိးန့ၢ်ဘၣ်တၢ်သူၣ်ခုသးခုနီၢ်နီၢ်လီၤ. ပှၤလၢအအဲၣ်ယဟိဝၤယွၤန့ၣ် ကအိၣ်ဒီးတၢ်သူၣ်ခုသးခု ထီဘိလီၤ. တၢ်မၤလိလၢခံတခါအပူၤန့ၣ် ပကတဲသကိးဘၣ်ဃး တၢ်ပာ်သူၣ်ပာ်သးတနီၤလၢ ကဒုးအိၣ်ထီၣ် တၢ်အဲၣ်လီၤဒၣ်ထဲသး ဒီးတၢ်ပာ်သူၣ်ပာ်သးဒ်အံၤတဖၣ်န့ၣ် လီၤဆီလိာ်အသးဒီး ယဟိဝၤယွၤအခ့အပှၤတဖၣ် အတၢ်ပာ်သးဒ်လဲၣ်န့ၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
နမ့ၢ်ဟ့ၣ်တၢ်န့ၣ် နကသးခုနီၢ်ကီၢ်
၆ ယဟိဝၤယွၤ အဲၣ်ပှၤအဃိ အဟ့ၣ်ပှၤ တၢ်လၢပလိၣ်ဘၣ်တဖၣ်. ဆိကမိၣ်ကွၢ် ယ့ၣ်ၡူး အတၢ်ကတိၤဖဲ မးသဲ ၆:၂၅, ၂၆. (ဖး.) ယ့ၣ်ၡူး သူဝဲ တၢ်ဘၣ်တ့တဖၣ် ဒ်သိး ကဟ့ၣ်တၢ်အဒိအဂီၢ်. အဒိ အတဲဖျါထီၣ် ဘၣ်ဃး ထိၣ်အဂ့ၢ် ဒီးအတဲဝဲလၢ ထိၣ်တဖၣ်န့ၣ် “တဖှံတၢ်ချံ ဒီးတကူးတၢ် ဒီးတပာ်ဖှိၣ်တၢ်လၢ ဘုဖီပူၤဘၣ်.” ဒီးအဆဲးတဲဝဲလၢ “သုပၢ်အိၣ်လၢ မူခိၣ်န့ၣ် ဒုးအီၣ်ဒုးအီ အဝဲသ့ၣ်.” ဝံၤဘျီ ယ့ၣ်ၡူးတဲဝဲလၢ “သုဝဲသ့ၣ်အံၤ သုလုၢ်ဒိၣ်ပှ့ၤဒိၣ်န့ၢ်ဒံး ထိၣ်တဖၣ်အံၤ တမ့ၢ်ဧီၤ.” ယ့ၣ်ၡူး တဲဝဲဒ်အံၤန့ၣ် အအဲၣ်ဒိး သိၣ်လိပှၤ မနုၤလဲၣ်. အသိၣ်လိပှၤလၢ ယဟိဝၤယွၤ ပာ်လုၢ်ပာ်ပှ့ၤ အခ့အပှၤလၢ အတီဒီးအီၤ ဒိၣ်န့ၢ်ဒံး ဆၣ်ဖိကီၢ်ဖိ စၢၢ်တလၢၢ်ဒံး. ဆၣ်ဖိကီၢ်ဖိမး ယဟိဝၤယွၤ မ့ၢ်ကွၢ်ထွဲ အဝဲသ့ၣ်န့ၣ် ပနာ်သ့ သပှၢ်တၢၢ်လၢ အကဟ့ၣ်ပှၤ တၢ်လၢပလိၣ်ဘၣ်တဖၣ်. ယဟိဝၤယွၤန့ၣ် အလီၤဂာ်ဒီး ပါလၢအအိၣ်ဒီး တၢ်အဲၣ်တၢ်ကွံအဃိ အကမၤလၢပှဲၤ အဖိအလံၤတဖၣ် အတၢ်လိၣ်ဘၣ်.—စံး ၁၄၅:၁၆; မး ၆:၃၂.
လါဖ့ၤဘြူၤအါရံၤ ၁၀-၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၄၇-၁၅၀
တၢ်ဂ့ၢ်အိၣ်ဝဲအါမံၤ လၢပကစံးထီၣ်ပတြၢၤ ယဟိဝၤယွၤအဂီၢ်
ဘၣ်မနုၤအဃိ “ပဘၣ်စံးထီၣ်ပတြၢၤယွၤ” လဲၣ်
၅ ယဟိဝၤယွၤမၤမုာ်ထီၣ်က့ၤ ပှၤအံၣ်စရ့လးဖိ ဒီတကလုာ်အသးတကးဒံးဘၣ် မၤမုာ်ထီၣ်စ့ၢ်ကီး ပှၤအံၣ်စရ့လးဖိ တဂၤစုာ်စုာ်အသးလီၤ. မုၢ်မဆါတနံၤအံၤ အဝဲမၤဝဲဒ်န့ၣ်စ့ၢ်ကီးလီၤ. ပှၤကွဲးစံးထီၣ်ပတြၢၤ စံးဝဲလၢယွၤ “မၤဘျါက့ၤပှၤအသူၣ်ကၢ်အသးလီၤ, ဒီးဘိၣ်ထီၣ်အပူၤလီၢ်တဖၣ်လီၤ.” (စံးထီၣ်ပတြၢၤ ၁၄၇:၃) ဖဲပဆူးပဆါအခါ မ့တမ့ၢ် ပသးလီၤစၢ်အခါ ပနာ်သ့သပှၢ်ကတၢၢ်လၢ ယဟိဝၤယွၤ ကကဟုကယာ်ပှၤလီၤ. ယဟိဝၤယွၤ သူၣ်အိၣ်သးအိၣ်ပှၤအဃိ ကမၤမုာ်ထီၣ်က့ၤပှၤဒီး ကမၤလီၤမၢ်ကွံာ် ပတၢ်သူၣ်အုးသးအုးတဖၣ်န့ၣ်လီၤ. (စံးထီၣ်ပတြၢၤ ၃၄:၁၈; ယၡါယၤ ၅၇:၁၅) အဝဲဟ့ၣ်ပှၤတၢ်ကူၣ်သ့ ဒီးတၢ်ဂံၢ်တၢ်ဘါ ဒ်သိးပတူၢ်တၢ်ကီတၢ်ခဲလၢ အဟဲဘၣ်ပှၤတခါဂ့ၤတခါဂ့ၤ ကန့ၢ်အဂီၢ်လီၤ.—ယၤကိာ် ၁:၅.
၆ ဒီးအဂၤတခါန့ၣ် ပှၤကွဲးစံးထီၣ်ပတြၢၤ ကွၢ်ထီၣ်တၢ်လၢ မူခိၣ်ဒီး စံးဝဲလၢ ယဟိဝၤယွၤ “ဂံၢ်” ဆၣ်ဧိၤဖီဧိၤတဖၣ် ဒီး “ကိးဝဲအမံၤခဲလၢာ်လီၤ.” (စံးထီၣ်ပတြၢၤ ၁၄၇:၄) ပှၤကွဲးစံးထီၣ်ပတြၢၤ ထံၣ်ဝဲဆၣ်တဖၣ် ဘၣ်ဆၣ် ဆၣ်အိၣ်ပှဲၤဖျၢၣ်လဲၣ်န့ၣ် အဝဲတသ့ၣ်ညါဝဲဘၣ်. မုၢ်မဆါတနံၤအံၤစ့ၢ်ကီး ပှၤစဲအ့ၣ်ဖိသ့ၣ်တဖၣ် သ့ၣ်ညါဝဲလၢ ကလဲးစံၣ် (galaxy) အပူၤန့ၣ် ဆၣ်အိၣ်ဝဲအကကွဲၢ်လၢ အကထိတဖၣ်လီၤ. ဒီးလၢမူခိၣ်န့ၣ် ကလဲးစံၣ် အိၣ်ဝဲအကကွဲၢ်လၢအကထိတဖၣ်အကထိလီၤ. ဆၣ်အိၣ်ပှဲၤဖျၢၣ်လဲၣ်န့ၣ် ပှၤဟီၣ်ခိၣ်ဖိတဖၣ် တသ့ၣ်ညါဝဲဘၣ် ဘၣ်ဆၣ် တၢ်ဘၣ်တ့ကစၢ်သ့ၣ်ညါဝဲလီၤ. တကးဒံးဘၣ် အဝဲယုၢ်န့ၢ်ဝဲ ဆၣ်တဖျၢၣ်စုာ်စုာ်အမံၤလီၤ. (၁ ကရံၣ်သူး ၁၅:၄၁) ယွၤလၢအသ့ၣ်ညါ ဆၣ်တဖျၢၣ်စုာ်စုာ်အဂ့ၢ်တဂၤန့ၣ် အဝဲသ့ၣ်ညါနၤစ့ၢ်ကီးလီၤ. တကးဒံးဘၣ် နအိၣ်လၢတၢ်လီၢ်ဖဲလဲၣ်, နတူၢ်ဘၣ်တၢ်ဒ်လဲၣ် ဒီးနလိၣ်ဘၣ်တၢ်မနုၤလဲၣ်န့ၣ် အဝဲသ့ၣ်ညါဝဲလီၤတံၢ်လီၤဆဲးလီၤ.
ဘၣ်မနုၤအဃိ “ပဘၣ်စံးထီၣ်ပတြၢၤယွၤ” လဲၣ်
၇ နထံၣ်ဘၣ်တၢ်ကီတၢ်ခဲဒ်လဲၣ်န့ၣ် ယဟိဝၤယွၤသ့ၣ်ညါဝဲ ဒီးအဝဲအိၣ်ဒီးတၢ်စိတၢ်ကမီၤလၢ ကမၤစၢၤနၤလီၤ. (ဖး စံးထီၣ်ပတြၢၤ ၁၄၇:၅ တက့ၢ်.) ဘၣ်သ့ၣ်သ့ၣ် နကတူၢ်ဘၣ်လၢ နတၢ်ကီတၢ်ခဲန့ၣ် နးတလၢတုၤဒၣ်လဲာ် နတူၢ်တပှဲၤလၢၤဘၣ်. ကစၢ်ယွၤနၢ်ပၢၢ် ပတၢ်ဂံၢ်စၢ်ဘါစၢ် ဒီး “သ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်အကမူၣ်လီၤ.” (စံးထီၣ်ပတြၢၤ ၁၀၃:၁၄) ပတလၢတပှဲၤဘၣ်အဃိ ပကမၤဘၣ် တၢ်ကမၣ်တဘျီဝံၤတဘျီ ဒီးပသးကဟးဂီၤဝဲလီၤ. တဘျီတခီၣ် ခီဖျိလၢ ပတဲကမၣ်ဘၣ်တၢ်, ပအိၣ်ဒီးတၢ်သူၣ်လီသးကွံလၢ အတကြၢးတဘၣ် ဒီးပသူၣ်က့ၣ်သးကါတၢ်အဃိ ပကသူၣ်အုးသးအုးန့ၣ်လီၤ. မ့မ့ၢ်ယဟိဝၤယွၤန့ၣ် အတၢ်ဂံၢ်စၢ်ဘါစၢ် တအိၣ်နီတမံၤဘၣ်. ဘၣ်ဆၣ် ပတူၢ်ဘၣ်တၢ်ဒ်လဲၣ်န့ၣ် အဝဲသ့ၣ်ညါဝဲ လၢလၢပှဲၤပှဲၤလီၤ.—ယၡါယၤ ၄၀:၂၈.
ဘၣ်မနုၤအဃိ “ပဘၣ်စံးထီၣ်ပတြၢၤယွၤ” လဲၣ်
၁၈ ပှၤကွဲးစံးထီၣ်ပတြၢၤတဂၤ သ့ၣ်ညါဝဲလၢ ယဟိဝၤယွၤ ဃုထၢပှၤအံၣ်စရ့လးဖိတဖၣ် ဒ်သိးကကဲထီၣ်အပှၤဂီၢ်မုၢ်အဂီၢ်လီၤ. အဝဲသ့ၣ် မ့ၢ်ကလုာ်ဒူၣ်ထဲတဒူၣ်လၢ ဒိးန့ၢ်ဘၣ်ဝဲ ကစၢ်ယွၤ “အကလုၢ်ကထါ, ဒီးအတၢ်မၤလိာ်” လီၤ. (ဖး စံးထီၣ်ပတြၢၤ ၁၄၇:၁၉, ၂၀ တက့ၢ်.) မုၢ်မဆါတနံၤအံၤ ပဘၣ်တၢ်သ့ၣ်ညါပှၤလၢ ပမ့ၢ်ယဟိဝၤပှၤအုၣ်အသးအဃိ မ့ၢ်တၢ်ခွဲးတၢ်ယာ်လီၤဆီလီၤ. ပသးခုဒိၣ်မးလၢ ပသ့ၣ်ညါဘၣ် ယဟိဝၤယွၤအဂ့ၢ်, ပဒိးန့ၢ်ဘၣ်အတၢ်ဟံးစုနဲၣ်ကျဲလၢ လံာ်စီဆှံအပူၤဒီး ပရ့လိာ်သးဒီးအီၤ ဘူးဘူးတံၢ်တံၢ်သ့အဃိလီၤ. ဒ်ပှၤကွဲးစံးထီၣ်ပတြၢၤ ၁၄၇ အသိး တၢ်ဂ့ၢ်လၢပကဘၣ် “စံးထီၣ်ပတြၢၤယွၤ” န့ၣ်အိၣ်ဝဲအါမးလီၤ. ဒီးပကဘၣ်ဟ့ၣ်ဂံၢ်ဟ့ၣ်ဘါ ပှၤဂၤလၢကမၤဝဲ ဒ်န့ၣ်စ့ၢ်ကီးလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ကွၢ်ဒီးဆိမိၣ်ထံ တၢ်ဘၣ်တ့ ဒီးမၤလိအါထီၣ် ယဟိဝၤယွၤအဂ့ၢ်
ယဟိဝၤယွၤ ပာ်ပနီၣ် တၢ်ဆၢကတီၢ်လၢ အကမၤတၢ်အဂီၢ်. ကစၢ်ယွၤ တဲဘၣ် ပှၤအံၣ်စရ့လးဖိလၢ “ထိၣ်ထီကိာ်တဖၣ်ဒၣ်လဲာ် သ့ၣ်ညါ တၢ်ဆၢကတီၢ်လၢ အကဘၣ် သုးလီၢ်သုးကျဲ.” (ယံးရမံယၤ ၈:၇) အဃိ ကိးနံၣ်ဒဲး ဖဲလါဖ့ၤဘြူၤအါရံၤ ဘူးကလၢာ် တုၤလၢ လါမ့ၤလီၤတဝာ်န့ၣ် ပှၤအံၣ်စရ့လးဖိ ထံၣ်ဘၣ်ဝဲ ထိၣ်ထီကိာ်တဖၣ် က့ၤယူၤလၢ ကလံၤစိးတခီ. ပမၤလိဘၣ်လၢ ဒ်သိးယဟိဝၤယွၤ ပာ်ပနီၣ် တၢ်ဆၢကတီၢ်လၢ ထိၣ်ထီကိာ်အဂီၢ်န့ၣ် ယဟိဝၤယွၤ ပာ်ပနီၣ် တၢ်ဆၢကတီၢ်လၢ အကစံၣ်ညီၣ်တၢ် အဂီၢ်စ့ၢ်ကီး. ပဝဲစ့ၢ်ကီး ပမ့ၢ်ကွၢ်ဒီးဆိမိၣ်ထံ တၢ်ဆၢကတီၢ်လၢ ထိၣ်တဖၣ် သုးလီၢ်သုးကျဲန့ၣ် ကမၤစၢၤပှၤဒ်သိး ပကနီၣ်ဘၣ်က့ၤလၢ ယဟိဝၤယွၤ ဃုထၢပာ် “တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ” လၢအကမၤဟးဂီၤ တၢ်အၢတၢ်သီလၢ ဟီၣ်ခိၣ်ချၢန့ၣ်ဝံၤလံ.—ဃဘးကူာ် ၂:၃.
ဒိကနၣ် ယဟိဝၤယွၤအကလုၢ်
၇ ဖး မးသဲ ၁၇:၁-၅ တက့ၢ်. ယဟိဝၤယွၤ ကတိၤတၢ်လၢမူခိၣ် ခံဘျီတဘျီ ဖဲယ့ၣ်ၡူး “အက့ၢ်အဂီၤလဲလိာ်အသး” အခါလီၤ. ယ့ၣ်ၡူးကိးထီၣ် စီၤပ့းတရူး, စီၤယၤကိာ် ဒီးစီၤယိၤဟၣ် လၢကလဲၤပိာ်အခံဆူ ကစၢၢ်ဒီခိၣ်လီၤ. ဖဲန့ၣ်အဆၢကတီၢ် အဝဲသ့ၣ် ထံၣ်ဘၣ်ဝဲ တၢ်ထံၣ်လၢညါခီ လၢအလီၤကမၢကမၣ်တခါလီၤ. ဖဲန့ၣ်န့ၣ် ယ့ၣ်ၡူးအမဲာ် ဒီးအကူအကၤတဖၣ် ကပီၤထီၣ်ဝဲလီၤ. ဒီးပှၤခံဂၤလၢအလီၤဂာ်ဒ်သိး စီၤအ့ၤလံယၤ ဒီးစီၤမိၤၡ့န့ၣ် ကတိၤတၢ်ဒီးယ့ၣ်ၡူး ဒီးတဲသကိးဝဲဘၣ်ဃးဒီး ယ့ၣ်ၡူးကဘၣ်သံ ဒီးကဂဲၤဆၢထၢၣ်သမူထီၣ်က့ၤအဂ့ၢ်လီၤ. တၢ်မၢဖိသၢဂၤ “အမဲာ်ဖံးဃၢဒီးမံခ့ဝဲ” ဘၣ်ဆၣ် ဖဲအဝဲသ့ၣ် နီၣ်ထီၣ်အသးအခါ ထံၣ်ဘၣ်ဝဲ တၢ်ထံၣ်လၢညါခီအံၤလီၤ. (လူၤကၣ် ၉:၂၉-၃၂) ဒီးတၢ်အၢၣ်လၢ အကပြုၢ်ကပြီၤလုၢ်ဘၢအဝဲသ့ၣ် ဒီးအဝဲသ့ၣ်နၢ်ဟူဘၣ်ဝဲ ကစၢ်ယွၤအကလုၢ်လီၤ. ဖဲန့ၣ်န့ၣ် ယဟိဝၤယွၤ တဲဝဲတၢ်ကတိၤ ဒ်အတဲဝဲ ဖဲယ့ၣ်ၡူးဒိးဘျၢထံအခါန့ၣ်လီၤ. အဝဲပာ်ဖျါထီၣ်ဝဲလၢ အဘၣ်သူၣ်ဘၣ်သး ဒီးအအဲၣ်အဖိခွါ ခီဖျိတဲဝဲလၢ “အဝဲတဂၤအံၤ မ့ၢ်ယဖိခွါလၢ ယအဲၣ်, ဒီးဘၣ်ယသးလၢအီၤလီၤ.” ဘၣ်ဆၣ် တၢ်တဘျီအံၤန့ၣ် အဝဲတဲအါထီၣ်ဝဲလၢ “ဒိကနၣ်အကလုၢ်တက့ၢ်.”
၈ တၢ်ထံၣ်လၢညါခီအံၤ ပာ်ဖျါထီၣ်ဝဲလၢ ခါဆူညါန့ၣ် ယ့ၣ်ၡူးကဒိးန့ၢ်ဘၣ် တၢ်လၤကပီၤဒီး တၢ်စိတၢ်ကမီၤဒ်စီၤပၤတဂၤအသိး လၢယွၤအဘီအမုၢ်အပူၤလီၤ. ယ့ၣ်ၡူးကဘၣ် တၢ်မၤအၢမၤနးအီၤဒီး မၤသံအီၤအဃိ တၢ်ထံၣ်လၢညါခီအံၤ ကဟ့ၣ်ဆူၣ်ထီၣ် အဂံၢ်အဘါ ဒီးမၤမုာ်ထီၣ်အသး အနီၢ်ကီၢ်လီၤ. ဒီးတၢ်ထံၣ်လၢညါခီအံၤ ကမၤဆူၣ်ထီၣ်စ့ၢ်ကီး ယ့ၣ်ၡူးအပျဲၢ်အဘီၣ်တဖၣ် အတၢ်နာ်လီၤ. ဒီးကမၤစၢၤစ့ၢ်ကီး အဝဲသ့ၣ်လၢ ကအိၣ်ကတဲာ်ကတီၤအသးလၢ တၢ်မၤကွၢ်တဖၣ်အဂီၢ် ဒီးတၢ်မၤဖးဒိၣ်လၢ ကဘၣ်မၤဝဲတဖၣ်အဂီၢ်လီၤ. ကအိၣ်အနံၣ် ၃၀ ဝံၤအလီၢ်ခံ တၢ်မၢဖိပ့းတရူး တဲဖျါထီၣ်က့ၤဝဲ တၢ်ထံၣ်လၢညါခီအံၤအဂ့ၢ်လီၤ. အဃိဖျါလၢ အဝဲသ့ၣ်နီၣ်ထီၣ်က့ၤဝဲ တၢ်ထံၣ်လၢညါခီအံၤ ဂ့ၤဂ့ၤလီၤ.—၂ ပ့းတရူး ၁:၁၆-၁၈.
၉ “ဒိကနၣ်အကလုၢ်တက့ၢ်.” ယဟိဝၤယွၤ တဲဝဲၡဲၡဲဖိလၢ အဝဲအဲၣ်ဒိးလၢ ပကဒိကနၣ် အဖိခွါအကလုၢ် ဒီးမၤထွဲအီၤလီၤ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဝဲတဲဝဲတၢ်မနုၤလဲၣ်. အဝဲတဲဝဲ တၢ်ဂ့ၢ်အါမံၤလၢ အရ့ဒိၣ်လၢ ပကဘၣ်မၤထွဲအီၤန့ၣ်လီၤ. အဒိ အဝဲသိၣ်လိဝဲ အပျဲၢ်အဘီၣ်တဖၣ်လၢ ကဘၣ်စံၣ်တဲၤတဲလီၤတၢ်ဒ်လဲၣ် ဒီးဟ့ၣ်သဆၣ်ထီၣ် အဝဲသ့ၣ်လၢ ကအိၣ်ခိးဆိးသီအဂီၢ်လီၤ. (မးသဲ ၂၄:၄၂; ၂၈:၁၉, ၂၀) ဒီးအဝဲဟ့ၣ်ဂံၢ်ဟ့ၣ်ဘါ အပျဲၢ်အဘီၣ်တဖၣ်လၢ ကဂုာ်ကျဲးစၢးဆူၣ်ဆူၣ် ဒီးအသုတဟ့ၣ်အၡူတဂ့ၤအဂီၢ်လီၤ. (လူၤကၣ် ၁၃:၂၄) တကးဒံးဘၣ် အဝဲဟ့ၣ်ဂံၢ်ဟ့ၣ်ဘါစ့ၢ်ကီးဝဲလၢ အဝဲသ့ၣ် ကအဲၣ်လိာ်ကွံလိာ်အသး တဂၤဒီးတဂၤ, ကအိၣ်ဃူဃူဖိးဖိးထီဘိ ဒီးကဒိကနၣ် အတၢ်မၤလိာ်တဖၣ်အဂီၢ်လီၤ. (ယိၤဟၣ် ၁၅:၁၀, ၁၂, ၁၃) ယ့ၣ်ၡူး အတၢ်ဟ့ၣ်ကူၣ်တဖၣ်အံၤန့ၣ် ကဲဘျုးဝဲဒိၣ်မးလီၤ. ဒီးလၢပစိၤခဲအံၤစ့ၢ်ကီး တၢ်ဟ့ၣ်ကူၣ်တဖၣ်အံၤန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ.
၁၀ ယ့ၣ်ၡူးတဲဝဲလၢ “ပှၤလၢအဘၣ်ဃးဒီးတၢ်မ့ၢ်တၢ်တီန့ၣ်, ဒိကနၣ်ယကလုၢ်ယကထါလီၤ.” (ယိၤဟၣ် ၁၈:၃၇) ပမ့ၢ် ‘ဝံသးစူၤလိာ်ပသး, ဒီးပှၤအတၢ်ကမၣ်မ့ၢ်အိၣ်ဒီး, ပျၢ်လိာ်ပသး’ န့ၣ် မ့ၢ်ဒၣ်ပပာ်ဖျါထီၣ် လၢပဒိကနၣ် ယ့ၣ်ၡူးအကလုၢ်လီၤ. (ကလီးစဲ ၃:၁၃; လူၤကၣ် ၁၇:၃, ၄) တကးဒံးဘၣ် ပပာ်ဖျါထီၣ်လၢ ပဒိကနၣ်ယ့ၣ်ၡူး အကလုၢ် ခီဖျိပစံၣ်တဲၤတဲလီၤတၢ် လၢတၢ်သူၣ်ဆူၣ်သးဆူၣ်အပူၤဖဲ “တၢ်ဆၢကတီၢ်အကီမ့ၢ်ဂ့ၤ, အညီမ့ၢ်ဂ့ၤ” န့ၣ်လီၤ.—၂ တံၤမသ့း ၄:၂, NWT.
၁၁ ယ့ၣ်ၡူးတဲဝဲလၢ “ယသိတဖၣ် ဒိကနၣ်ယကလုၢ်” လီၤ. (ယိၤဟၣ် ၁၀:၂၇) ပှၤလၢအပိာ် ယ့ၣ်ၡူးအခံတဖၣ်န့ၣ် တမ့ၢ်ထဲ အဝဲသ့ၣ်ဒိကနၣ်ဝဲ ယ့ၣ်ၡူး အတၢ်ကတိၤတခါဧိၤဘၣ် အဝဲသ့ၣ်မၤထွဲဝဲစ့ၢ်ကီးလီၤ. အဝဲသ့ၣ် တသးစၢၢ်ဆၢတၢ် “လၢအအံၤတဃၣ် အတၢ်ဘၣ်ယိၣ်ဘၣ်ဘီ” ဘၣ်လီၤ. (လူၤကၣ် ၂၁:၃၄) မ့ၢ်ကီလၢအဝဲသ့ၣ် အဂီၢ်ဒၣ်လဲာ် တၢ်ဒိကနၣ် ယ့ၣ်ၡူးအတၢ်မၤလိာ်န့ၣ် မ့ၢ်တၢ်အရ့ဒိၣ်ဒိၣ်မး လၢအဝဲသ့ၣ်အဂီၢ်လီၤ. ပဒီပုၢ်ဝဲၢ်အါဂၤ ထံၣ်ဘၣ်ဒီး တၢ်မၤကွၢ်အါမး ဃုာ်ဒီးတၢ်ထီဒုၣ်ထီဒါ, တၢ်ဖှီၣ်တၢ်ယာ် ဒီးန့ဆၢၣ် အတၢ်ဘၣ်ဒိဘၣ်ထံးတဖၣ်လီၤ. အဝဲသ့ၣ် မ့ၢ်ထံၣ်ဘၣ်ဒီး တၢ်ကီတၢ်ခဲဒ်လဲၣ်ဂ့ၤဒ်လဲၣ်ဂ့ၤ အဝဲသ့ၣ်ဆဲးတီဒီးယဟိဝၤယွၤလီၤ. ယ့ၣ်ၡူးတဲဝဲလၢ “ပှၤလၢအအိၣ်ဒီး ယတၢ်မၤလိာ်ဒီးတိၢ်န့ၢ်ဝဲန့ၣ်, အဝဲဒၣ်မ့ၢ်ပှၤလၢ အအဲၣ်ယၤလီၤ. ဒီးပှၤလၢအအဲၣ်ယၤန့ၣ်, ယပၢ်ကအဲၣ်အီၤ” လီၤ.—ယိၤဟၣ် ၁၄:၂၁.
လါဖ့ၤဘြူၤအါရံၤ ၁၇-၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ကတိၤဒိ ၁
သးစၢ်တဖၣ် သုကဒိကနၣ် မတဂၤအကလုၢ်လဲၣ်
ဒ်သိးနကန့ၢ်ခိၣ်ဖးအဂီၢ် တဘၣ်ပျဲ ပှၤမၤလီၤဃံၢ်နၤ နီတဂၤတဂ့ၤ
၁၆ ဘၣ်သ့ၣ်သ့ၣ် နကမ့ၢ်ပှၤသးစၢ်တဂၤ ဒီးနကတူၢ်ဘၣ်လၢ နမိၢ်နပၢ်တနၢ်ပၢၢ်နၤဘၣ် မ့တမ့ၢ် အတၢ်သိၣ်တၢ်သီဃံးတလၢလီၤ. လၢတၢ်န့ၣ်အဃိ နသးကဘၣ်တံာ်တာ် ဒီးဘၣ်သ့ၣ်သ့ၣ် နတအဲၣ်ဒိးဘူၣ်ထီၣ်ဘါထီၣ် ယဟိဝၤယွၤလၢၤဘၣ်. ဘၣ်ဆၣ်နမ့ၢ်ပာ်တ့ၢ် ယဟိဝၤယွၤန့ၣ် နကသ့ၣ်ညါဘၣ်လၢ လၢဟီၣ်ခိၣ်ချၢအံၤ ပှၤလၢကအဲၣ်နၤထဲသိးဒီး နမိၢ်နပၢ် ဒီးနတံၤသကိးလၢ အဘူၣ်ထီၣ်ဘါထီၣ် ယဟိဝၤယွၤန့ၣ် တအိၣ်နီတဂၤဘၣ်.
၁၇ ဆိကမိၣ်ကွၢ်ဒ်အံၤတက့ၢ်– နမိၢ်နပၢ် မ့ၢ်တသိၣ်နၤနီတဘျီဘၣ်န့ၣ် မ့ၢ်အဝဲသ့ၣ် အဲၣ်နၤဧါတအဲၣ်နၤဧါန့ၣ် နကသ့ၣ်ညါဒ်လဲၣ်. (ဧ့ၤဘြံၤ ၁၂:၈) အဝဲသ့ၣ် တမ့ၢ်ပှၤလၢပှၤပှဲၤဘၣ်အဃိ အတၢ်သိၣ်ဃီၣ်န့ၣ် မၤဘၣ်ဒိနသးသ့လီၤ. ဘၣ်ဆၣ် တဘၣ်ကွၢ်ထဲအဝဲသ့ၣ် အတၢ်လီၤတူာ်လီၤကာ်န့ၣ်တဂ့ၤ. လၢတၢ်န့ၣ်အလီၢ် ဂုာ်ကျဲးစၢးနၢ်ပၢၢ်စၢၤနမိၢ်နပၢ်လၢ ဘၣ်မနုၤအဃိ အဝဲသ့ၣ်သိၣ်နၤဒ်အံၤလဲၣ်. ပၢၤနသးဒီး တဘၣ်သးဒိၣ်ထီၣ်တၢ်ချ့ချ့တဂ့ၤ. လံာ်စီဆှံစံးဝဲလၢ– “ပှၤလၢအကတိၤတၢ်စှၤထံၣ်န့ၣ် အိၣ်ဒီးတၢ်သ့ၣ်ညါလီၤ. ဒီးပှၤလၢအသးသ့န့ၣ် မ့ၢ်ပှၤအကူၣ်အဆးလီၤ.” (ကတိၤဒိ ၁၇:၂၇) ပာ်လီၤဖီတၢၣ်လၢ နကဂုာ်ကျဲးစၢး ကဲထီၣ်ပှၤလၢအဒိၣ်တုၤခိၣ်ပှဲၤ လၢတူၢ်လိာ်တၢ်ဟ့ၣ်ကူၣ် ဒီးပှၤမ့ၢ်သိၣ်နၤလၢ ကျဲဒ်လဲၣ်ဂ့ၤဒ်လဲၣ်ဂ့ၤ ဂုာ်ကျဲးစၢး ဟံးန့ၢ်တၢ်မၤလိတက့ၢ်. (ကတိၤဒိ ၁:၈) ထီဘိန့ၣ်သ့ၣ်နီၣ်ထီၣ်လၢ နအိၣ်ဒီးမိၢ်ပၢ်လၢ အအဲၣ်ယဟိဝၤယွၤန့ၣ် မ့ၢ်ဝဲတၢ်ဟ့ၣ်လၢအလုၢ်ဒိၣ်ပှ့ၤဒိၣ် တခါန့ၣ်တက့ၢ်. အဝဲသ့ၣ်အဲၣ်ဒိးမၤစၢၤနၤလၢ နကအိၣ်မူဘၣ်လီၤထူလီၤယိာ်လီၤ.
တၢး၀၅-E ၂/၁၅ ၁၉-၂၀ ¶၁၁-၁၂
ဆဲးအိၣ်မူဒ်ခရံာ်ဖိအသိး
၁၁ ဂုာ်ကျဲးစၢးမၤ ကစၢ်ယွၤအတၢ်ဘၣ်သး တဘၣ်မၤ တၢ်ဘၣ်ပှၤကညီ အသးတဂ့ၤ. ပမ့ၢ်မတဂၤလဲၣ်န့ၣ် ပှၤသ့ၣ်ညါ ခီဖျိ တၢ်ကရၢကရိလၢ ပအိၣ်လၢအပူၤ. ပှၤကိးဂၤဒဲးန့ၣ် အလိၣ်ဘၣ် အတံၤသကိး. ဒီးပမ့ၢ်တူၢ်ဘၣ်လၢ ပှၤဘၣ်သးပှၤန့ၣ် ပသးမုာ်ဝဲ. စးထီၣ်လၢ ပဒိၣ်ထီၣ်သီ တုၤလၢပသးပှၢ်ထီၣ်န့ၣ် ပထံၣ်ဘၣ်ဒီး ပသကိးတဖၣ် အတၢ်ဆီၣ်သနံး. ဒီးပအဲၣ်ဒိး မၤသးခုပှၤဂၤအသး ဒီးကွၢ်လိပှၤဂၤ. ဘၣ်ဆၣ် တံၤသကိးတဖၣ်န့ၣ် တမ့ၢ်လၢအဝဲသ့ၣ် သူၣ်အိၣ်သးအိၣ်ပှၤ နီၢ်ကီၢ်ကိးဂၤဒဲးဘၣ်. တဘျီတခီၣ် အဝဲသ့ၣ် လိၣ်ဘၣ်သကိး ဒ်သိးအဝဲသ့ၣ် ကမၤတၢ်လၢတဂ့ၤဘၣ်တဖၣ်အဃိ အရ့လိာ်သးဒီးပှၤ. (ကတိၤဒိ ၁:၁၁-၁၉) ဖဲခရံာ်ဖိတဂၤ မၤတၢ်လၢအတဂ့ၤဘၣ် ဒ်အသကိးမၤဝဲအခါ အဝဲဂုာ်ကျဲးစၢး ပာ်ခူသူၣ်အသး ဒ်သိး ပှၤတသ့ၣ်ညါလၢ အမ့ၢ် ခရံာ်ဖိတဂ့ၤအဂီၢ်. (စံး ၂၆:၄) စီၤပီလူး ဟ့ၣ်ပလီၢ်ဝဲ ခရံာ်ဖိတဖၣ်လၢ “တဘၣ်ကွၢ်လိမၤဒိး ပှၤတၢ်ချၢ လၢၤတဂ့ၤ”. (ရိ ၁၂:၂) ယဟိဝၤယွၤ ဟ့ၣ်ပှၤတၢ်ဂံၢ်တၢ်ဘါ လၢပလိၣ်ဘၣ် ဒ်သိး ပတြီဆၢ တၢ်ဆီၣ်သနံးသ့ၣ်တဖၣ် ကသ့အဂီၢ်.—ဧ့ၤဘြံၤ ၁၃:၆.
၁၂ ဖဲနတူၢ်ဘၣ်လၢ တၢ်ဆီၣ်သနံးကမၤဟးဂီၤ ခရံာ်ဖိ အသကဲာ်ပဝးအခါ နကဘၣ်သ့ၣ်နီၣ်ထီၣ်လၢ နတၢ်သးတီဒီး ကစၢ်ယွၤန့ၣ် အရ့ဒိၣ်န့ၢ်ဒံး ပှၤဂၤအတၢ်ထံၣ် မ့တမ့ၢ် တၢ်လၢ ပှၤအါဂၤ ဘၣ်သူၣ်ဘၣ်သးဝဲ. ၂ မိၤၡ့ ၂၃:၂ န့ၣ် ဟ့ၣ်ကူၣ်ပှၤဒ်အံၤ “နတဘၣ် မၤပိာ် ပှၤဂီၢ်မုၢ်အခံ လၢတၢ်မၤလၢ အအၢအသီတဂ့ၤ.” ဖဲပှၤအံၣ်စရ့လးဖိအါဂၤ သးဒ့ဒီ ဘၣ်ဃးဒီး ယဟိဝၤယွၤ အတၢ်အၢၣ်လီၤအီလီၤအခါ စီၤကၤလ့းန့ၣ် အတအိၣ်ဒီး တၢ်ထံၣ်ဒ် အဝဲသ့ၣ်အသိးဘၣ်. အဝဲနာ်ဝဲလၢ ကစၢ်ယွၤ အတၢ်အၢၣ်လီၤအီလီၤန့ၣ် ကလၢထီၣ်ပှဲၤထီၣ်နီၢ်ကီၢ်. ဒီးလၢခံကစၢ်ယွၤ ဆိၣ်ဂ့ၤအီၤ ခီဖျိလၢ အနာ်ဝဲ ဒ်န့ၣ်အဃိ. (၄ မိၤၡ့ ၁၃:၃၀; ယိၤၡူ ၁၄:၆-၁၁) မ့ၢ်နအဲၣ်ဒိး တြီဆၢ ပှၤအါဂၤ အတၢ်ထံၣ် ဒ်သိးဒီး နကဒီသဒၢ နတၢ်ရ့လိာ်သးဒီး ယဟိဝၤယွၤ အဂီၢ်ဧါ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ်
၇ ပှၤတၢတဖုန့ၣ် အကဲဝဲ ပှၤလၢ “အတၢ်လဲၤခီဖျိစှၤ.” ပှၤလၢ အတၢ်လဲၤခီဖျိအိၣ်စှၤန့ၣ် အကဲပှၤလၢ အနာ်တၢ်ညီ ဒီးပှၤလံၣ်အီၣ်အီၤညီ. (ကတိၤဒိ ၁၄:၁၅) ဖဲပဟးစံၣ်တဲၤတဲလီၤတၢ်အခါန့ၣ် အါတက့ၢ် ပတိလိာ်သးဒီး ပှၤလၢ အတၢ်လဲၤခီဖျိအိၣ်စှၤ. အဒိ တၢ်ဘူၣ်တၢ်ဘါခိၣ်နၢ် ဒီးထံကီၢ်ခိၣ်နၢ်တဖၣ်န့ၣ် လံၣ်န့ၢ်ဝဲ ပှၤလၢအကကွဲၢ်တဖၣ်ညါ. လၢခံ အဝဲသ့ၣ်တနီၤန့ၣ် သ့ၣ်ညါက့ၤဝဲလၢ ခိၣ်နၢ်တဖၣ်အံၤ လံၣ်န့ၢ်အဝဲသ့ၣ်အဃိ အဝဲသ့ၣ်ဖုးဘၣ်အသး. မ့မ့ၢ်ပှၤလၢ အတၢ်လဲၤခီဖျိစှၤ ဖဲကတိၤဒိ ၁:၂၂ ပာ်ဖျါထီၣ်ဝဲဟီန့ၣ် အဝဲသ့ၣ် အတၢ်လဲၤခီဖျိစှၤ သနာ်က့ အဘၣ်သးအိၣ်ဝဲ ကၠဲန့ၣ်ထီဘိ ဒီးတဘၣ်သး ဆီတလဲအသးဘၣ်. (ယံးရမံယၤ ၅:၃၁) ပှၤလၢ အတၢ်လဲၤခီဖျိစှၤန့ၣ် အဲၣ်ဒီးမၤတၢ်ထဲအသး ဒီးတဘၣ်သးဃုသ့ၣ်ညါ လံာ်စီဆှံ အတၢ်ဟံးစုနဲၣ်ကျဲ ဒီးမၤထွဲဝဲဘၣ်. အဒိ ပိာ်မုၣ်တဂၤ လၢအအိၣ်လၢ ခွံဘဲး ခဲနဒၤန့ၣ် တဲဘၣ်ဝဲ ဒီပုၢ်ဝဲၢ်တဂၤလၢ “ပတၢ်ဘူၣ်တၢ်ဘါ ခိၣ်နၢ်တဖၣ် မ့ၢ်လံၣ်အီၣ်ပှၤဒု ကဲဝဲအဝဲသ့ၣ် အတၢ်ကမၣ်လီၤ, တကဲပတၢ်ကမၣ်ဘၣ်.” ပထံၣ်ဘၣ်လၢ ပှၤအါဂၤန့ၣ် အိၣ်ဒီးတၢ်ထံၣ် ဒ်သိးဒီး ပိာ်မုာ်တဂၤအံၤ. ဘၣ်ဆၣ် ပမ့ၢ်အဲၣ်ဒီးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပတဘၣ်အိၣ်ဒီး တၢ်ထံၣ်ကၠဲအံၤဘၣ်.—ကတိၤဒိ ၁:၃၂; ၂၇:၁၂.
လါဖ့ၤဘြူၤအါရံၤ ၂၄–လါမၢ်ၡး ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ ကတိၤဒိ ၂
မၤနီၢ်ကစၢ် တၢ်မၤလိလံာ်စီဆှံ မူာ်မူာ်နီၢ်နီၢ်
“ဆဲးလဲၤတၢ်လၢ တၢ်မ့ၢ်တၢ်တီ အပူၤ”
၁၆ ပဝဲတနီၤန့ၣ် ပဖးလံာ်ဒီးပမၤလိတၢ် တမုာ်အါအါဘၣ်. ဘၣ်ဆၣ် ယဟိဝၤယွၤ ဟ့ၣ်ဂံၢ်ဟ့ၣ်ဘါပှၤလၢ ပက “ဆဲးဃု” သ့ၣ်ညါ တၢ်မ့ၢ်တၢ်တီလၢ အဒိၣ်အယိာ်သ့ၣ်တဖၣ်. (ဖး ကတိၤဒိ ၂:၄-၆.) အဃိ ပမ့ၢ်ဂုာ်ကျဲးစၢး မၤအီၤဒ်န့ၣ်န့ၣ် ပကန့ၢ်ဘၣ်အဘျုးအါမး. ဒီပုၢ်ဝဲၢ်ခွါခိရ့ၤန့ၣ် ဖဲအဖးလံာ်စီဆှံအခါ အဝဲဆိကမိၣ်ထံဝဲ လံာ်စီဆှံအဆၢဖိ တဆၢဝံၤမၣ်တဆၢ. ဖဲအမၤနီၢ်ကစၢ်တၢ်ဖးလံာ်စီဆှံအခါ အမၤဝဲဒ်လဲၣ်န့ၣ် အတဲဝဲလၢ “ဖဲယဖးလံာ်စီဆှံအခါန့ၣ် ယဖးတၢ်ဂ့ၢ်အဘျဲၣ်ခဲလၢာ်, ယဖးလံာ်စီဆှံအဆၢလၢ အဘၣ်ထွဲလိာ်သးတဖၣ် ဒီးယဃုသ့ၣ်ညါအါထီၣ် တၢ်ဂ့ၢ်လၢအဂၤသ့ၣ်တဖၣ်. ယမၤအီၤဒ်န့ၣ်အဃိ ယသ့ၣ်ညါအါထီၣ်တၢ်ဂ့ၢ်အါမး.” ပမ့ၢ်ဂုာ်ကျဲးစၢး ဟံန့ၢ်တၢ်ဆၢကတီၢ်လၢ ပကဖးလံာ်စီဆှံဒီး ပမ့ၢ်မၤအီၤဒ် ဒီပုၢ်ဝဲၢ်ခိရ့ၤမၤဝဲအသိးမ့ၢ်ဂ့ၤ, ပမ့ၢ်မၤအီၤလၢ ကျဲလၢအဂၤမ့ၢ်ဂ့ၤန့ၣ် မ့ၢ်ဝဲပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်မ့ၢ်တၢ်တီ.—စံးထီၣ်ပတြၢၤ ၁:၁-၃.
တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ်
၃ ပမ့ၢ်သူ ပတၢ်သ့ၣ်ညါလၢ ပကဆၢတဲာ် တၢ်လၢအဘၣ်န့ၣ် ပကဲပှၤလၢ အအိၣ်ဒီးတၢ်ကူၣ်သ့. ဘၣ်ဆၣ် ပမ့ၢ်ဘၣ်သးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပကဘၣ်မၤ အါန့ၢ်အန့ၣ်ဒံး. လံာ်စီဆှံတဲဝဲလၢ “တၢ်ပျံၤ ယဟိဝၤယွၤန့ၣ် မ့ၢ်ဝဲ တၢ်ကူၣ်သ့ အဂံၢ်ခီၣ်ထံးလီၤ. တၢ်သ့ၣ်ညါ ဘၣ်ဃးဒီး တၢ်စီဆှံ ဒိၣ်ကတၢၢ်တဂၤန့ၣ် ဒုးအိၣ်ထီၣ် တၢ်သ့ၣ်ညါနၢ်ပၢၢ်.” (ကတိၤဒိ ၉:၁၀) အဃိ ပမ့ၢ်ဘၣ်ဆၢတဲာ်တၢ်ဂ့ၢ်လၢ အရ့ဒိၣ်တမံၤမံၤန့ၣ် ပကဘၣ်ဃု “တၢ်သ့ၣ်ညါ ဘၣ်ဃးဒီး တၢ်စီဆှံ ဒိၣ်ကတၢၢ်တဂၤ” အတၢ်ထံၣ် ဘၣ်ဃးဒီး တၢ်ဂ့ၢ်တဖၣ် လၢပကဆၢတဲာ်. ပဃုသ့ၣ်ညါ ယဟိဝၤယွၤ အတၢ်ထံၣ်သ့ခီဖျိ ပဖးလံာ်စီဆှံ ဒီးဖးပတၢ်ကရၢကရိ လံာ်လဲၢ်တဖၣ်. ပမ့ၢ်မၤဒ်န့ၣ်မၣ် ပကကဲပှၤလၢ အအိၣ်ဒီးတၢ်ကူၣ်သ့နီၢ်ကီၢ်.—ကတိၤဒိ ၂:၅-၇.
၄ ယဟိဝၤယွၤန့ၣ် အကဲပှၤထဲတဂၤလၢ အဟ့ၣ်လီၤပှၤ တၢ်ကူၣ်သ့နီၢ်ကီၢ်သ့. (ရိမ့ၤ ၁၆:၂၇) ပတဲလၢ တၢ်ကူၣ်သ့ ဟဲလၢယဟိဝၤယွၤ အအိၣ်န့ၣ် ခီဖျိလၢ တၢ်ဂ့ၢ်လၢလာ် သၢထံၣ်အံၤ. တၢ, ယဟိဝၤယွၤန့ၣ် အကဲတၢ်ဘၣ်တ့ကစၢ်အဃိ အသ့ၣ်ညါဝဲ အတၢ်ဘၣ်တ့တဖၣ် အဂ့ၢ်ခဲလၢာ်. (စံးထီၣ်ပတြၢၤ ၁၀၄:၂၄) ခံ, တၢ်လၢယဟိဝၤယွၤ မၤဝဲတဖၣ်န့ၣ် ပာ်ဖျါထီၣ်ဝဲလၢ အအိၣ်ဒီးတၢ်ကူၣ်သ့အါမး. (ရိမ့ၤ ၁၁:၃၃) သၢ, ပမ့ၢ်မၤထွဲ ယဟိဝၤယွၤ အတၢ်ဟ့ၣ်ကူၣ်န့ၣ် ကကဲဘျုးလၢ ပဂီၢ်ထီဘိ. (ကတိၤဒိ ၂:၁၀-၁၂) အဃိ ပမ့ၢ်ဘၣ်သးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပကဘၣ်တူၢ်လိာ် တၢ်မ့ၢ်တၢ်တီ သၢထံၣ်အံၤကၠ့ၤ.
သးစၢ်သ့ၣ်ဧၢ မၤဂၢၢ်ထီၣ်ကျၢၤထီၣ် သုတၢ်စူၢ်တၢ်နာ်တက့ၢ်
၂ မုၢ်မဆါတနံၤညါအံၤပှၤအါဂၤ တနာ်ဝဲလၢ ယွၤတ့လီၤပှၤဟီၣ်ခိၣ်ဖိဘၣ်. နမ့မ့ၢ်ပှၤသးစၢ်တဂၤလၢ အဘူၣ်ထီၣ်ဘါထီၣ်ယဟိဝၤယွၤ မ့တမ့ၢ် နမ့မ့ၢ်သးစၢ်လၢ အမၤလိယွၤအဂ့ၢ်တဂၤန့ၣ် ဘၣ်သ့ၣ်သ့ၣ် နကဆိကမိၣ်ဘၣ်လၢ တၢ်ဘၣ်တ့ကစၢ်အိၣ်ဝဲန့ၣ် တၢ်အုၣ်အသးအိၣ်ဒ်လဲၣ်. လၢတၢ်န့ၣ်အဃိ လံာ်စီဆှံကမၤစၢၤပဝဲဒၣ်သ့ၣ်တဖၣ် ဒ်သိးပကဆိကမိၣ်ထံ တၢ်လၢပနၢ်ဟူဘၣ်, ပဖးဘၣ်ဒီးပကဃုထံၣ်န့ၢ် ကသ့အဂီၢ်လီၤ. လံာ်စီဆှံတဲဝဲလၢ– “တၢ်ဒုးပလီၢ်နသး ကအံးက့ၤကွၢ်က့ၤနၤ, ဒီးတၢ်သူၣ်ဆးသးဆးကပၢၤနၤ” လီၤ. လၢကျဲဒ်လဲၣ်. ကမၤစၢၤနၤဒ်သိး နကဂ့ၢ်လိာ်ကွံာ် တၢ်ဟ့ၣ်ကူၣ်လၢ အကမၣ်ဒီး ကမၤစၢၤနၤဒ်သိးနတၢ်စူၢ်တၢ်နာ် ယဟိဝၤယွၤကဂၢၢ်ထီၣ်ကျၢၤထီၣ်အဂီၢ်လီၤ.—ဖး ကတိၤဒိ ၂:၁၀–၁၂ တက့ၢ်.
၃ ဒ်သိးပတၢ်စူၢ်တၢ်နာ် ယဟိဝၤယွၤကဂၢၢ်ကျၢၤအဂီၢ် ပကဘၣ်သ့ၣ်ညါအဂ့ၢ် လီၤတံၢ်လီၤဆဲးလီၤ. (၁ တံၤမသ့း ၂:၄) လၢတၢ်န့ၣ်အဃိ ဖဲနဖးလံာ်စီဆှံဒီး လံာ်လဲၢ်လၢ တၢ်အိၣ်ဖှိၣ်ထုးထီၣ်ဝဲတဖၣ်အခါ နကဘၣ်ဟံးန့ၢ်တၢ်ဆၢကတီၢ်ဒီး ဆိကမိၣ်ထံတၢ်လၢ နဖးတဖၣ်န့ၣ်လီၤ. ဒီးဃုသ့ၣ်ညါအါထီၣ်တၢ်လၢ နဖးတဖၣ်န့ၣ်တက့ၢ်. (မးသဲ ၁၃:၂၃) နမ့ၢ်မၤဒ်န့ၣ်န့ၣ် နကဃုထံၣ်န့ၢ် တၢ်အုၣ်အသးအိၣ်ဝဲအါမးလၢ ယဟိဝၤယွၤန့ၣ် မ့ၢ်ပတၢ်ဘၣ်တ့ကစၢ်ဒီး လံာ်စီဆှံန့ၣ် မ့ၢ်ဝဲအကလုၢ်ကထါလီၤ. (ဧ့ၤဘြံၤ ၁၁:၁) ပမၤအီၤကသ့ဒ်လဲၣ်န့ၣ် မ်ပတဲသကိးတက့ၢ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
“ဆဲးလဲၤတၢ်လၢ တၢ်မ့ၢ်တၢ်တီ အပူၤ”
၁၆ ပဝဲတနီၤန့ၣ် ပဖးလံာ်ဒီးပမၤလိတၢ် တမုာ်အါအါဘၣ်. ဘၣ်ဆၣ် ယဟိဝၤယွၤ ဟ့ၣ်ဂံၢ်ဟ့ၣ်ဘါပှၤလၢ ပက “ဆဲးဃု” သ့ၣ်ညါ တၢ်မ့ၢ်တၢ်တီလၢ အဒိၣ်အယိာ်သ့ၣ်တဖၣ်. (ဖး ကတိၤဒိ ၂:၄-၆.) အဃိ ပမ့ၢ်ဂုာ်ကျဲးစၢး မၤအီၤဒ်န့ၣ်န့ၣ် ပကန့ၢ်ဘၣ်အဘျုးအါမး. ဒီပုၢ်ဝဲၢ်ခွါခိရ့ၤန့ၣ် ဖဲအဖးလံာ်စီဆှံအခါ အဝဲဆိကမိၣ်ထံဝဲ လံာ်စီဆှံအဆၢဖိ တဆၢဝံၤမၣ်တဆၢ. ဖဲအမၤနီၢ်ကစၢ်တၢ်ဖးလံာ်စီဆှံအခါ အမၤဝဲဒ်လဲၣ်န့ၣ် အတဲဝဲလၢ “ဖဲယဖးလံာ်စီဆှံအခါန့ၣ် ယဖးတၢ်ဂ့ၢ်အဘျဲၣ်ခဲလၢာ်, ယဖးလံာ်စီဆှံအဆၢလၢ အဘၣ်ထွဲလိာ်သးတဖၣ် ဒီးယဃုသ့ၣ်ညါအါထီၣ် တၢ်ဂ့ၢ်လၢအဂၤသ့ၣ်တဖၣ်. ယမၤအီၤဒ်န့ၣ်အဃိ ယသ့ၣ်ညါအါထီၣ်တၢ်ဂ့ၢ်အါမး.” ပမ့ၢ်ဂုာ်ကျဲးစၢး ဟံန့ၢ်တၢ်ဆၢကတီၢ်လၢ ပကဖးလံာ်စီဆှံဒီး ပမ့ၢ်မၤအီၤဒ် ဒီပုၢ်ဝဲၢ်ခိရ့ၤမၤဝဲအသိးမ့ၢ်ဂ့ၤ, ပမ့ၢ်မၤအီၤလၢ ကျဲလၢအဂၤမ့ၢ်ဂ့ၤန့ၣ် မ့ၢ်ဝဲပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်မ့ၢ်တၢ်တီ.—စံးထီၣ်ပတြၢၤ ၁:၁-၃.