ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
© 2025 Watch Tower Bible and Tract Society of Pennsylvania
လါစဲးပတ့ဘၢၣ် ၁-၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၉
ဂ့ၢ်လိာ်ကွံာ် တၢ်စူၢ်တၢ်နာ်, မိၢ်လုၢ်ပၢ်လၢ် ဒီးတၢ်ဆဲးတၢ်လၤ လၢအထီဒါလိာ်သးဒီး လံာ်စီဆှံ
တၢ်သူၣ်ခုသးခု တၢ်ဂ့ၤတၢ်ဝါလၢ ပဒိးန့ၢ်ဘၣ်လၢ ယွၤအအိၣ်
ကျဲအဂၤတဘိလၢ ကမၤအါထီၣ်ပတၢ်သးခုန့ၣ် မ့ၢ်ဝဲပသးဆူၣ်လၢ ကမၤတၢ်လၢအမၤသးခု ယဟိဝၤယွၤအသးန့ၣ်လီၤ. (စံးထီၣ်ပတြၢၤ ၃၅:၂၇; ၁၁၂:၁) ဘၣ်မနုၤအဃိလဲၣ်. လံာ်စီဆှံတဲဝဲလၢ “ပျံၤယွၤဒီးတိၢ်န့ၢ်အတၢ်မၤလိာ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ်ပှၤကညီအတၢ်ခဲလၢာ်လီၤ.” (စံၣ်တဲၤတဲလီၤတၢ် ၁၂:၁၃) ယဟိဝၤယွၤ တ့လီၤပှၤဒ်သိး ပကမၤအတၢ်ဘၣ်သးလီၤ. လၢတၢ်န့ၣ်အဃိ ဖဲပမၤယဟိဝၤယွၤအတၢ်မၤအခါ ပကဒိးန့ၢ်ဘၣ် တၢ်သူၣ်ခုသးခုအဒိၣ်ကတၢၢ်န့ၣ်လီၤ.—ကွၢ်တၢ်ဂ့ၢ်အဘျဲၣ်တက့ၢ်.
ဆီၣ်ထွဲ တၢ်မ့ၢ်တၢ်တီလၢ အဘၣ်ဃးဒီးတၢ်သံ
၁၃ လုၢ်လၢ်တခါခါလၢ နမ့ၢ်တသ့ၣ်ညါလီၤတံၢ်လၢ မ့ၢ်အဘၣ်ကစၢ်ယွၤအသးဧါ တဘၣ်ဧါန့ၣ် ဃ့ထုကဖၣ်လၢ ယဟိဝၤယွၤအအိၣ် ဒီးဃ့အီၤ တၢ်ကူၣ်သ့တက့ၢ်. (ဖး ယၤကိာ် ၁:၅ တက့ၢ်.) ဒီးဃုသ့ၣ်ညါ တၢ်ဂ့ၢ်တၢ်ကျိၤတဖၣ် လၢပလံာ်လဲၢ်တဖၣ်အပူၤ ဒီးအလီၢ်မ့ၢ်အိၣ်န့ၣ် တဲသကိးတၢ်ဒီး တၢ်အိၣ်ဖှိၣ်သးပှၢ်တဖၣ် လၢနတၢ်အိၣ်ဖှိၣ်ပူၤတက့ၢ်. အဝဲသ့ၣ်တတဲနၤလၢ နကဘၣ်မၤဒ်လဲၣ်န့ၣ်ဘၣ်. လၢတၢ်န့ၣ်အလီၢ် အဝဲသ့ၣ် ကမၤစၢၤနၤဒ်သိးန ကဃုထံၣ်န့ၢ် လံာ်စီဆှံတၢ်သိၣ်တၢ်သီ ဒ်ပတဲသကိးတ့ၢ် လၢတၢ်မၤလိအံၤ အပူၤအသိးလီၤ. နမ့ၢ်မၤဒ်န့ၣ်န့ၣ် မ့ၢ်နမၤလိနသးလၢ နက ‘အိၣ်ကတဲာ်ကတီၤနသး’ မ့တမ့ၢ် အိၣ်ဒီး တၢ်သူၣ်ဆးသးဆးအဃိ ကမၤစၢၤနၤလၢ နကသ့ၣ်ညါ “နီၤဖး တၢ်ဂ့ၤ ဒီးတၢ်အၢအဆၢ” လီၤ.—ဧ့ၤဘြံၤ ၅:၁၄.
“ယကလဲၤတၢ်လၢ နတၢ်မ့ၢ်တၢ်တီအပူၤ”
၁၂ မိၢ်လုၢ်ပၢ်လၢ်ဒီး တၢ်ဆဲးတၢ်လၤလၢ တဘၣ်ကစၢ်ယွၤအသးတဖၣ်. ဖဲပဟံၣ်ဖိဃီဖိ, ပတံၤသကိးလၢ တၢ်မၤလီၢ်ဒီး တံၤသကိးလၢကၠိတဖၣ် မၤဝဲမူးပွဲလၢ တဘၣ်ကစၢ်ယွၤအသးတဖၣ်အခါ အဝဲသ့ၣ် ကအဲၣ်ဒိးလၢ ပပၣ်ဃုာ်လၢ အဝဲသ့ၣ်အကျါလီၤ. ဖဲအဝဲသ့ၣ်မၢပပၣ်ဃုာ်လၢ လုၢ်လၢ်ထူသနူ ဒီးနံၤသဘျ့ လၢတဘၣ်ကစၢ်ယွၤအသးအခါ ဒ်သိးပတြီဆၢကွံာ် တၢ်ဆီၣ်သနံးတဖၣ်အံၤကန့ၢ်အဂီၢ် တၢ်မနုၤကမၤစၢၤပှၤလဲၣ်. ဘၣ်မနုၤအဃိ ယဟိဝၤယွၤ တဘၣ်သူၣ်ဘၣ်သးဝဲ နံၤသဘျ့တဖၣ်အံၤလဲၣ်န့ၣ် ပကဘၣ်သ့ၣ်ညါ လီၤတံၢ်လီၤဆဲးလီၤ. နံၤသဘျ့တဖၣ်အံၤ ဟဲစးထီၣ်အသးဒ်လဲၣ်န့ၣ် ပဃုသ့ၣ်ညါအါထီၣ်အီၤလၢ ပလံာ်လဲၢ်တဖၣ်အပူၤသ့ဝဲလီၤ. ဖဲပဆိကမိၣ်ထံ လံာ်စီဆှံအတၢ်သိၣ်တၢ်သီ လၢဘၣ်ဃးဒီး ပတမၤလၤကပီၤ နံၤသဘျ့တဖၣ်အံၤအခါ ပတူၢ်ဘၣ်လၢ ပလဲၤကျဲလၢ “အဘၣ်ကစၢ်အသး” န့ၣ်လီၤ. (အ့းဖ့းစူး ၅:၁၀) ပမ့ၢ်နာ်န့ၢ် ယဟိဝၤယွၤဒီး အတၢ်ကတိၤတဖၣ်န့ၣ် ပတဘၣ်ယိၣ်တၢ်လၢ ပှၤဂၤကဆိကမိၣ်ပှၤဒ်လဲၣ်န့ၣ်ဘၣ်.—ကတိၤဒိ ၂၉:၂၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
“အဲၣ်တၢ် . . . လၢတၢ်မၤ, ဒီးလၢတၢ်မ့ၢ်တၢ်တီတက့ၢ်”
၁၁ စံးပတြၢၤပှၤဂၤလၢ တၢ်သူၣ်ဘျၢသးဘျၢအပူၤတက့ၢ်. ဃုတၢ်ခွဲးတၢ်ယာ်ဒ်သိး နကစံးပတြၢၤပှၤဂၤတက့ၢ်. ပဝဲခဲလၢာ် ပသ့ၣ်ညါလၢ တၢ်စံးပတြၢၤန့ၣ် “မၤထီၣ်မၤထီ” လိာ်သးတဂၤဒီးတဂၤလီၤ. (အ့းဖ့းစူး ၄:၂၉) ဘၣ်ဆၣ် ပကဘၣ်တဲတၢ်လၢ တၢ်သူၣ်ဘျၢသးဘျၢအပူၤ ဒီးတဘၣ်မ့ၢ်ထဲလၢ ပကတဲမုာ်ပှၤနၢ်ဘၣ်. တၢ်လၢမ့ၢ်တအိၣ်လၢ ပသးပူၤဘၣ်န့ၣ် ပတကြၢးတဲဘၣ်. ဒီးအလီၢ်မ့ၢ်အိၣ်လၢ ပကဘၣ်ဟ့ၣ်ကူၣ်ပှၤဂၤန့ၣ် ပတဘၣ်ဟးဆှဲးပမူဒါဘၣ်. (ကတိၤဒိ ၂၉:၅) ပပတြၢၤပှၤဂၤဘၣ်ဆၣ် ပမ့ၢ်က့ၤတဲအီၣ်အဂ့ၢ်လၢ အလီၢ်ခံန့ၣ် မ့ၢ်ဒၣ်ပပာ်မၤပသးလီၤ. စီၤပီလူးအတၢ်အဲၣ်န့ၣ် မ့ၢ်တၢ်အဲၣ်နီၢ်နီၢ်လီၤ. ဖဲအဝဲကွဲးလံာ်ပရၢလၢ ခရံာ်ဖိလၢ အအိၣ်လၢကရံၣ်သူးတၢ်အိၣ်ဖှိၣ်တဖၣ်အအိၣ်အခါ အဝဲစံးပတြၢၤဝဲ တၢ်မၤဂ့ၤလၢ အဝဲသ့ၣ်မၤဝဲန့ၣ်လီၤ. (၁ ကရံၣ်သူး ၁၁:၂) ဘၣ်ဆၣ် ဖဲခရံာ်ဖိတဖၣ်အံၤ လိၣ်ဘၣ်တၢ်ဟ့ၣ်ကူၣ်အခါ အဝဲဟ့ၣ်ကူၣ်ဝဲလၢတၢ်အဲၣ်တၢ်ကွံအပူၤ ဒီးတဲနၢ်ပၢၢ်ဝဲလီၤတံၢ်လီၤဆဲးလီၤ.—၁ ကရံၣ်သူး ၁၁:၂၀-၂၂.
လါစဲးပတ့ဘၢၣ် ၈-၁၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၃၀
“တၢ်ဖှီၣ်တၢ်ယာ်မ့ၢ်ဂ့ၤ, တၢ်ထူးတၢ်တီၤမ့ၢ်ဂ့ၤ ဟ့ၣ်လီၤယၤတဂ့ၤ”
တၢ်အဲၣ်လၢ အဟ့ၣ်ပှၤတၢ်သးခုနီၢ်နီၢ်န့ၣ် မ့ၢ်တၢ်အဲၣ်ဒ်လဲၣ်တကလုာ်လဲၣ်
၁၀ စ့န့ၣ်ဟ့ၣ်ပှၤတၢ်ဒီသဒၢတစဲးအဃိ ပဝဲခဲလၢာ်ပလိၣ်ဘၣ်စ့လီၤ. (စံၣ်တဲၤတဲလီၤတၢ် ၇:၁၂) ဘၣ်ဆၣ် ပစ့မ့ၢ်အိၣ်ထဲ ပအီၣ်လၢအီလၢအဂီၢ်န့ၣ် ပအိၣ်ဒီးတၢ်သးမံသ့ဧါ. ပအိၣ်ဒီးတၢ်သးမံသ့လီၤ. (ဖး စံၣ်တဲၤတဲလီၤတၢ် ၅:၁၂ တက့ၢ်.) စီၤကၤက့ၣ်အဖိခွါ စီၤအၤကူၢ် ကွဲးဝဲလၢ– “တၢ်ဖှီၣ်တၢ်ယာ်မ့ၢ်ဂၤ, တၢ်ထူးတၢ်တီၤမ့ၢ်ဂ့ၤ, ဟ့ၣ်လီၤယၤတဂ့ၤ, ဒုးအီၣ်ယၤလၢတၢ်အီၣ် ဖဲအကလၢလၢယဂီၢ်တက့ၢ်.” ဘၣ်မနုၤအဃိ အဝဲတအဲၣ်ဒိးကဲ ပှၤအဖှီၣ်အယာ်ဘၣ်လဲၣ်န့ၣ် ပနၢ်ပၢၢ်သ့လီၤ. မ့ၢ်လၢပှၤဟုၣ်တၢ်န့ၣ် တဘၣ်ယွၤအသးဘၣ်အဃိ အဝဲတအဲၣ်ဒိးဘၣ် တၢ်လ့ပစီလၢကဟုၣ်တၢ်အဂီၢ်ဘၣ်. ဘၣ်ဆၣ် ဘၣ်မနုၤအဃိ အဝဲတအဲၣ်ဒိးကဲဒိၣ်ဘၣ်လဲၣ်. အဝဲကွဲးဝဲလၢ– “ယကအီၣ်ကုးအီပှဲၤဘၣ်ဖုးဒီးသမၢနၤ, ဒီးစံး, ယွၤန့ၣ်မ့ၢ်မတၤတဂၤလဲၣ်.” (ကတိၤဒိ ၃၀:၈, ၉) ဘၣ်သ့ၣ်သ့ၣ် နကသ့ၣ်ညါပှၤလၢ အပာ်ဒိၣ်တၢ်ထူးတၢ်တီၤ ဒီးတပာ်ဒိၣ်ကစၢ်ယွၤဘၣ်န့ၣ်လီၤ.
၁၁ ပှၤလၢအအဲၣ်စ့န့ၣ် မၤတၢ်ဘၣ်ယွၤအသး တသ့ဘၣ်. ယ့ၣ်ၡူးတဲဝဲလၢ– “ကစၢ်ခံဂၤအတၢ်မၤန့ၣ် ပှၤမၤတသ့ဘၣ်နီတဂၤဘၣ်. အဂ့ၢ်ဒ်အံၤ, ကသးဟ့အဝဲတဂၤ ဒီးကအဲၣ်အဝဲတဂၤလီၤ. မ့တမ့ၢ်ဘၣ်ဒီး ကဘျုးအသးလၢအဝဲတဂၤ, ဒီးကမၤတရီတပါအဝဲတဂၤလီၤ. ယွၤအတၢ်မၤ, ဒီးမၤမိၣ်အတၢ်မၤန့ၣ် သုမၤတသ့ဘၣ်.” အဝဲတဲစ့ၢ်ကီးဝဲလၢ– “သုတပာ်ဖှိၣ်သုတၢ်လုၢ်ဒိၣ်ပှ့ၤဒိၣ်လၢ ဟီၣ်ခိၣ်ချၢဖဲအလီၢ်လၢတၢ်အဃၢ်, ဒီးတၢ်ထီၣ်အ့ၣ်မၤဟးဂီၤတၢ်, ဒီးဖဲတၢ်ဘျၣ်ဘၢၣ်ဖျိတၢ်, ဒီးဟုၣ်န့ၢ်တၢ်န့ၣ်တဂ့ၤ. မ့မ့ၢ်ပာ်ဖှိၣ်သုတၢ်လုၢ်ဒိၣ်ပှ့ၤဒိၣ်လၢမူခိၣ် ဖဲတၢ်အဃၢ်မ့ၢ်ဂ့ၤ, တၢ်ထီၣ်အ့ၣ်မ့ၢ်ဂ့ၤ, တမၤဟးဂီၤဘၣ်တၢ်ဘၣ်, ဒီးဖဲတၢ်ဘျၣ်တဘၢၣ်ဖျိဘၣ်, ဒီးတဟုၣ်န့ၢ်ဘၣ်တၢ်န့ၣ်တက့ၢ်.”—မးသဲ ၆:၁၉, ၂၀, ၂၄.
၁၂ ယဟိဝၤယွၤ အခ့အပှၤအါဂၤန့ၣ် ဂုာ်ကျဲးစၢးအိၣ်မူဝဲယိယိဖိလီၤ. အဝဲသ့ၣ် မၤဝဲဒ်အံၤအဃိ ဟ့ၣ်အါထီၣ်တၢ်ဆၢကတီၢ်လၢ ကမၤယဟိဝၤယွၤ အတၢ်မၤအဂီၢ်သ့ဝဲ ဒီးဒိးန့ၢ်ဘၣ်ဝဲ တၢ်သူၣ်ခုသးခုနီၢ်နီၢ်လီၤ. ကၠဲး(ခ်)န့ၣ် အိၣ်လၢကီၢ်အမဲရကၤ ဒီးအဝဲအိၣ်ဒီးဟံၣ်ဖးဒိၣ် ဒီးခီပနံာ်လီၤ. ဘၣ်ဆၣ် ဒ်သိးအဝဲမၤ ပှၤလဲၤလၢညါဒ်အမါအသိးကန့ၢ်အဂီၢ် ဆါလီၤကွံာ်ဝဲ အဟံၣ်ဒီးအခီပနံာ်လီၤ. အဝဲတဲဝဲလၢ– “ပကဘၣ်ပာ်တ့ၢ်ကွံာ် ပဟံၣ်လၢအဃံလၤ ဒီးပတၢ်လီၢ်တၢ်ကျဲန့ၣ် တညီလၢပဂီၢ်ဘၣ်.” ဘၣ်ဆၣ် လၢညါအဝဲအတၢ်မၤလီၢ်န့ၣ် တၢ်ကီတၢ်ခဲအါတလၢအဃိ ဖဲအဟဲက့ၤတုၤလၢဟံၣ်အခါ အသးအ့န့ဒိၣ်မးလီၤ. အဝဲတဲဝဲလၢ– “ယမါန့ၣ် မၤပှၤလဲၤလၢညါ ဒီးအသးခုထီဘိလီၤ. ယမါတဲဝဲလၢ ‘အတၢ်မၤခိၣ်န့ၣ်အဂ့ၤကတၢၢ်လီၤ.’ ခဲအံၤ ယၤစ့ၢ်ကီးယမၤပှၤလဲၤလၢညါအဃိ ပဝဲခံဂၤလၢာ် ပတၢ်မၤခိၣ်မ့ၢ် ယဟိဝၤယွၤလီၤ.”
“မ့ၢ်နအဲၣ်ယၤအါန့ၢ် အဝဲသ့ၣ်တဖၣ်န့ၣ်ဧါ”
၁၅ မုၢ်မဆါတနံၤအံၤ ပှၤအါဂၤ သးစၢၢ်ဆၢဝဲထဲ တၢ်ကူတၢ်ကၤ, လီတဲစိ, ခီၣ်ဖၠူထၢၣ် ဒီးတၢ်အဂုၤအဂၤလၢ အဟဲပၢၢ်ထီၣ်အသီတဖၣ်န့ၣ်လီၤ. မ့ၢ်လၢအဝဲသ့ၣ်သူၣ်လီၤသးကွံ တၢ်သ့ၣ်တဖၣ်အံၤအဃိ ကျိၣ်စ့ဒီးတၢ်သ့ၣ်တဖၣ်အံၤ ကဲထီၣ်တၢ်အရ့ဒိၣ်ကတၢၢ်လၢ အတၢ်အိၣ်မူအပူၤန့ၣ်လီၤ. ဒ်ခရံာ်ဖိတဂၤအသိး တၢ်လၢအရ့ဒိၣ်ကတၢၢ်လၢနဂီၢ်န့ၣ် မ့ၢ်မနုၤလဲၣ်. သံကွၢ်လီၤနသးလၢ– ‘မ့ၢ်ယဆိကမိၣ်ထဲ ကါလၢအပၢၢ်ထီၣ်အသီ မ့တမ့ၢ် တၢ်ဖိတၢ်လံၤလၢ အပၢၢ်ထီၣ်အသီတဖၣ်အဂ့ၢ် အါန့ၢ်ဒံးယဟ့ၣ်တၢ်ဆၢကတီၢ်လၢ ယကတဲာ်ကတီၤတၢ်လၢ တၢ်အိၣ်ဖှိၣ်အဂီၢ်ဧါ. မ့ၢ်ယတၢ်မၤအါတလၢတုၤဒၣ်လဲာ် ယတၢ်ဆၢကတီၢ်လၢ ယကဃ့ဘါထုကဖၣ် ဒီးဖးလံာ်စီဆှံအဂီၢ် တအိၣ်အါအါလၢၤဘၣ်ဧါ.’ ပမ့ၢ်တပလီၢ်ပသးန့ၣ် ပကအဲၣ်ကျိၣ်စ့ဒိၣ်န့ၢ်ဒံး ပအဲၣ်ခရံာ်န့ၣ်လီၤ. ပကြၢးဆိကမိၣ်ထီၣ်ဘၣ်ဃး ယ့ၣ်ၡူးအတၢ်ကတိၤလၢအမ့ၢ်– “ဟးဆှဲးတၢ်သးကွံ ကိးကလုာ်ဒဲးတက့ၢ်.” (လူၤကၣ် ၁၂:၁၅, ခ့ခါစှီၤကျိာ်) ဘၣ်မနုၤအဃိ ယ့ၣ်ၡူးတဲဝဲဒ်အံၤလဲၣ်.
၁၆ ယ့ၣ်ၡူးတဲဝဲလၢ “ကစၢ်ခံဂၤ အတၢ်မၤန့ၣ် ပှၤမၤတသ့ဘၣ် နီတဂၤဘၣ်” ဒီးတဲစ့ၢ်ကီးဝဲလၢ “ယွၤအတၢ်မၤ, ဒီးမၤမိၣ်အတၢ်မၤန့ၣ် သုမၤတသ့ဘၣ်.” လၢတၢ်န့ၣ်အဃိ ပကဟ့ၣ်ယဟိဝၤယွၤ တၢ်လၢအဂ့ၤကတၢၢ်ဒီး ပကပာ်ဒိၣ်တၢ်ဃုတၢ်ထူးတၢ်တီၤ တဘျီဃီတသ့ဘၣ်. ယ့ၣ်ၡူးတဲဝဲလၢပ “ကသးဟ့အဝဲတဂၤ ဒီးကအဲၣ်အဝဲတဂၤ” မ့တမ့ၢ် “ကဘျုးအသးလၢအဝဲတဂၤ, ဒီးကမၤတရီတပါ အဝဲတဂၤလီၤ.” (မးသဲ ၆:၂၄) ခီဖျိလၢပတလၢတပှဲၤဘၣ်အဃိ ပကဘၣ်ဂုာ်ကျဲးစၢးဟးဆှဲး “ပဖံးပညၣ်အသးကွံတၢ်” လၢအပၣ်ဃုာ်ဒီး တၢ်ပာ်ဒိၣ် တၢ်ဃုတၢ်ထူးတၢ်တီၤန့ၣ်လီၤ.—အ့းဖ့းစူး ၂:၃.
၁၇ ပှၤအါဂၤန့ၣ် လူၤဘၣ်အသး ဒီးအဲၣ်တၢ်မုာ်တၢ်ပၠီၣ်အဃိ အဝဲသ့ၣ်ပာ်ဒိၣ်ဝဲ တၢ်ထူးတၢ်တီၤန့ၣ်လီၤ. (ဖး ၁ ကရံၣ်သူး ၂:၁၄ တက့ၢ်.) လၢတၢ်န့ၣ်အဃိ အဝဲသ့ၣ်နီၤဖး တၢ်အဘၣ်ဒီးတၢ်အကမၣ် တညီလၢၤဘၣ်. (ဧ့ၤဘြံၤ ၅:၁၁-၁၄) ဒီးအဝဲသ့ၣ် အတၢ်သူၣ်လီသးကွံန့ၣ် ဒံးယံာ်ဒံးအါထီၣ်ဝဲလီၤ. (စံၣ်တဲၤတဲလီၤတၢ် ၅:၁၀) ပဝဲသ့ၣ်တဖၣ်စ့ၢ်ကီး ဒ်သိးပတၢ်သူၣ်လီသးကွံဒ်အံၤ သုတအိၣ်ထီၣ်တဂ့ၤအဂီၢ် ပကဘၣ်မၤဒ်လဲၣ်. ပမ့ၢ်ဖးလံာ်စီဆှံ ထီဘိန့ၣ် ကမၤစၢၤပှၤဒ်သိး ပတြီဆၢတၢ်အဲၣ်ကျိၣ်အဲၣ်စ့ ကန့ၢ်လီၤ. (၁ ပ့းတရူး ၂:၂) ယ့ၣ်ၡူးဆိကမိၣ်ထံဝဲ ယဟိဝၤယွၤအကလုၢ်ကထါအဃိ မၤနၢၤကွံာ်ဝဲ မုၣ်ကီၤလံၢ်အတၢ်လ့ပစီန့ၣ်လီၤ. မုၢ်မဆါတနံၤအံၤ ပဝဲသ့ၣ်တဖၣ်စ့ၢ်ကီး ဒ်သိးပဂ့ၢ်လိာ်ကွံာ် တၢ်အဲၣ်ကျိၣ်အဲၣ်စ့ကန့ၢ်အဂီၢ် ပကဘၣ်မၤထွဲ ယဟိဝၤယွၤ အတၢ်ဟ့ၣ်ကူၣ်လၢ ပတၢ်အိၣ်မူအပူၤန့ၣ်လီၤ. (မးသဲ ၄:၈-၁၀) ပမ့ၢ်မၤဒ်အံၤန့ၣ် မ့ၢ်ဒၣ်ပပာ်ဖျါထီၣ်လၢ ပအဲၣ်ယ့ၣ်ၡူးအါန့ၢ်ဒံး ပအဲၣ်တၢ်ထူးတၢ်တီၤလီၤ.
တၢး၁၁-E ၆/၁ ၁၀ ¶၄
သူစ့သ့သ့ဘၣ်ဘၣ် ဒ်တၢ်လၢအအိၣ်ဒီးနၤအသိး
နမ့ၢ်အဲၣ်ဒိးပှ့ၤတၢ်တမံၤမံၤန့ၣ် စူးဆိပာ်စၢၤစ့. ဖဲနကပှ့ၤတၢ်တမံၤမံၤအခါ နကြၢးစူးပာ်စၢၤစ့ဝံၤမး နကဘၣ်ပှ့ၤအီၤ. သနာ်က့ ပှၤအါဂၤ ကထံၣ်ဝဲလၢ ဆၢကတီၢ်ခဲအံၤန့ၣ် နတလိၣ်မၤဒ်န့ၣ်လၢၤဘၣ်. ဘၣ်ဆၣ် နမ့ၢ်မၤဒ်န့ၣ်န့ၣ် မ့ၢ်ဝဲကျဲလၢ အအိၣ်ဒီးတၢ်ကူၣ်သ့. မ့ၢ်လၢ နမ့ၢ်မၤဒ်န့ၣ်န့ၣ် ကမၤစၢၤနၤ ဒ်သိး နကမၢ်တထီၣ်တဂ့ၤ ဒီးနတလိၣ်ဟ့ၣ်စ့အ့ၣ် ခီဖျိ နဃ့လိၢ်စ့ဒီးပှ့ၤတၢ်အဃိန့ၣ်ဘၣ်. လံာ်စီဆှံ တဲဝဲလၢ တၢၢ်တဖၣ်န့ၣ် “ကူၣ်တၢ်သ့.” မ့ၢ်လၢ တၢၢ်တဖၣ်န့ၣ် “ဖဲပှၤကူးတၢ် အဆၢကတီၢ် . . . အဝဲသ့ၣ် ပာ်ဖှိၣ်ဝဲ အတၢ်အီၣ်တၢ်အီတဖၣ်” လၢခါဆူညါအဂီၢ်အဃိ.—ကတိၤဒိ ၆:၆-၈; ၃၀:၂၄, ၂၅.
ဆဲးကဲ ယဟိဝၤယွၤ အပှၤတမှံၤ လီၤထူလီၤယိာ်
၁၈ ဒ်သိး ပကသ့ၣ်ညါ ပတၢ်ပာ်သူၣ်ပာ်သးလၢ ကျိၣ်စ့အဖီခိၣ် အိၣ်ဒ်လဲၣ်အဂီၢ် ပကဘၣ် သမံသမိးလီၤက့ၤပသး. ပကဘၣ် သံကွၢ်လီၤပသးလၢ ‘မ့ၢ်ယဆိကမိၣ်ထဲ ကျိၣ်စ့အဂ့ၢ် ဒီးယစ့မ့ၢ်အိၣ်န့ၣ် ယကပှ့ၤ မနုၤမနုၤလဲၣ်လီၤဧါ. ဖဲယဃ့လိၢ် ပှၤစ့အခါ ယဆိကမိၣ်လၢ အတလိၣ်ဘၣ်ဝဲ ဒံးဘၣ်အဃိ ယတလိၣ်ဟ့ၣ်က့ၤအီၤ ချ့ချ့ဘၣ်ဧါ. ယစ့အိၣ်အဃိ ယဆိကမိၣ်ဒိၣ်လီၤယသးဧါ မ့တမ့ၢ် ယပံဒံဧါ. ဖဲယထံၣ်လၢ ဒီပုၢ်ဝဲၢ်မုၣ်ခွါတဖၣ် ကဲဒိၣ်အခါ ယဆိကမိၣ်လၢ အဝဲသ့ၣ် အဲၣ်စ့အါန့ၢ်ဒံး အဲၣ်ယဟိဝၤယွၤဧါ. မ့ၢ်ယရ့ထဲ ပှၤလၢအကဲဒိၣ် ဒီးမ့မ့ၢ်ပှၤဖှီၣ်ဖိန့ၣ် ယတဘၣ်သး ရ့အဝဲသ့ၣ်ဘၣ်ဧါ.’ ခီဖျိလၢ ပန့ၢ်ဘၣ် တၢ်ခွဲးတၢ်ယာ်လၢ ပကကဲထီၣ် ယဟိဝၤယွၤ အပှၤတမှံၤအဃိ အရ့ဒိၣ်ဒိၣ်မးလၢ ပကသံကွၢ်လီၤပသးလၢ တၢ်သံကွၢ်တဖၣ်အံၤ. ဒီးဒ်သိး ပဆဲးကဲဘၣ် ယဟိဝၤယွၤ အပှၤတမှံၤထီဘိ ကသ့အဂီၢ် ပကဘၣ်ဟးဆှဲး တၢ်အဲၣ်ကျိၣ်စ့. ပမ့ၢ်မၤဒ်အံၤန့ၣ် ယဟိဝၤယွၤ တပာ်တ့ၢ်ပှၤ နီတဘျီဘၣ်.—ဖး ဧ့ၤဘြံၤ ၁၃:၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၉-E ၄/၁၅ ၁၇ ¶၁၁-၁၃
တၢ်ဘၣ်တ့တဖၣ် ပာ်ဖျါထီၣ် ယဟိဝၤယွၤ အတၢ်ကူၣ်သ့
၁၁ ယုၢ်ၡဖၣ်တဖၣ်န့ၣ် မ့ၢ်ဝဲ ဆၣ်ဖိကီၢ်ဖိဆံးဆံးဖိ ဘၣ်ဆၣ် ပမၤလိန့ၢ်တၢ်လၢအအိၣ် သ့ဝဲအါမး. (ဖး ကတိၤဒိ ၃၀:၂၆.) အဝဲသ့ၣ် အမဲာ်ချံန့ၣ် ထံၣ်တၢ်ဂ့ၤမး အဃိ အသူဝဲ အမဲာ်ချံ ဒ်သိး ကဒီသဒၢလီၤအသးအဂီၢ်. အဝဲသ့ၣ်အိၣ်လၢ လၢၢ်ကျါလ့ကျါ, လၢၢ်ကဆူးလ့ကဆူး အဃိ ကဲထီၣ်တၢ်ဒီသဒၢ လၢအဂီၢ်. တကးဒံးဘၣ် အဝဲသ့ၣ် အိၣ်ဘူးလိာ်အသးအဃိ ကဲထီၣ်တၢ်ဒီသဒၢလၢအဂီၢ် ဒီးဖဲတၢ်ဂိၢ်ခါ အဆၢကတီၢ် ဒိးန့ၢ်ဘၣ် တၢ်ကလၢၤစ့ၢ်ကီး.
၁၂ ပန့ၢ်ဘၣ် တၢ်မၤလိမနုၤလၢ ယုၢ်ၡဖၣ်အအိၣ်လဲၣ်. ပထံၣ်ဘၣ်လၢ အဝဲသ့ၣ်အိၣ်လၢ တၢ်အိၣ်သဒၢအလီၢ်. အဝဲသ့ၣ် ကဒီသဒၢလီၤအသးအဂီၢ် အသူဝဲ အမဲာ်ချံလၢ ကကွၢ်စိတၢ်လၢအယံၤ ဒ်သိး ကအိၣ်ပလီၢ်အသး ဒီးအိၣ်ဝဲလၢ တၢ်ဘံၣ်တၢ်ဘၢအလီၢ်. ဒ်ယုၢ်ၡဖၣ် အသိး ပဝဲသ့ၣ်စ့ၢ်ကီး ဒ်သိးပကထံၣ် တၢ်လီၤဘၣ်ယိၣ်လၢ အဟဲလၢ မုၣ်ကီၤလံၢ်အဟီၣ်ခိၣ်အဂီၢ် ပကဘၣ်အိၣ်ပလီၢ်သး. တၢ်မၢဖိပ့းတရူး ဟ့ၣ်ပလီၢ် ခရံာ်ဖိတဖၣ်လၢ “အိၣ်ဆၢပံၢ်ကလာ် ဒီးအိၣ်ပလီၢ်သးတက့ၢ်. သုဒုၣ်သုဒါ မုၣ်ကီၤလံၢ် ဟးဝ့ၤဝီၤ ဒ်ခ့ယုၢ်လၢအကညီၤတၢ် ရုၢ်ရုၢ်အသိး ဒီးဃုပှၤတဂၤဂၤလၢ အကယူၢ်လီၤကွံာ်ဝဲလီၤ.” (၁ ပ့း ၅:၈) ဖဲယ့ၣ်ၡူး အိၣ်လၢ ဟီၣ်ခိၣ်ချၢအခါစ့ၢ်ကီး အအိၣ်ပလီၢ်အသးလၢ မုၣ်ကီၤလံၢ် အတၢ်လ့ပစီ ကိးမံၤဒဲး. (မးသဲ ၄:၁-၁၁) ယ့ၣ်ၡူးပာ်လီၤ တၢ်ဒိတၢ်တဲာ်အဂ့ၤ လၢပှၤလၢအပိာ်အခံတဖၣ်အဂီၢ်.
၁၃ ပဝဲစ့ၢ်ကီး ပအိၣ်ပလီၢ်သး သ့ဝဲခီဖျိ ပဟံးန့ၢ်တၢ်မၤစၢၤလၢ တၢ်လၢယဟိဝၤယွၤ ကတဲာ်ကတီၤန့ၢ်ပှၤ ဒ်သိးကဒီသဒၢပှၤအဂီၢ်. အဒိ ပကဘၣ် မၤလိလံာ်စီဆှံ ဒီးထီၣ်တၢ်အိၣ်ဖှိၣ်ထီဘိ. (လူၤကၣ် ၄:၄; ဧ့ၤ ၁၀:၂၄, ၂၅) တကးဒံးဘၣ် ဒ်ယုၢ်ၡဖၣ်တဖၣ် အိၣ်ဝဲဒ်သိးသိး ဘူးဘူးတံၢ်တံၢ်အသိး ပဝဲဒီပုၢ်ဝဲၢ်မုၣ်ခွါတဖၣ်စ့ၢ်ကီး ဒ်သိး ပ “ဟ့ၣ်ဂံၢ်ဟ့ၣ်ဘါလိာ်သး ယၢ်ခီယၢ်ခီ” ကသ့အဂီၢ် ပကဘၣ်အိၣ် ဘူးဘူးတံၢ်တံၢ်. (ရိ ၁:၁၂) ယဟိဝၤယွၤ ကတဲာ်ကတီၤန့ၢ်ပှၤ တၢ်ဒီသဒၢတဖၣ်လံ သနာ်က့ ဒ်သိး ပကဒိးန့ၢ်ဘၣ်အဘျုးလၢ တၢ်သ့ၣ်တဖၣ်န့ၣ်အဂီၢ် ပကဘၣ်မၤ တၢ်လၢပကြၢးမၤအီၤတဖၣ်. ပမ့ၢ်မၤ ဒ်န့ၣ်န့ၣ် ပကတူၢ်ဘၣ် ဒ်ပှၤကွဲး ထါစံးထီၣ်ပတြၢၤလၢ အတဲဝဲ “ယဟိဝၤယွၤ မ့ၢ်ယလၢၢ်, ယတၢ်အိၣ်သဒၢအလီၢ် ဒီးမ့ၢ်ပှၤလၢ အမၤပူၤဖျဲးယၤလီၤ. ယကစၢ်ယွၤ မ့ၢ်ယလၢၢ်ယလ့ လၢယကအိၣ်သဒၢ ယသးအဂီၢ်.”—စံး ၁၈:၂.
တၢ်တၤကျိၣ်တၤစ့န့ၣ် အကမၣ်ဧါ
လံာ်စီဆှံတဲဝဲ ဒ်လဲၣ်
လံာ်စီဆှံမ့ၢ်တပာ်ဖျါထီၣ် တၢ်တၤကျိၣ်တၤစ့အဂ့ၢ် လီၤတံၢ်လီၤဆဲးဘၣ်ဆၣ် လံာ်စီဆှံ အတၢ်ဟံးစုနဲၣ်ကျဲတဖၣ်န့ၣ် ဒုးသ့ၣ်ညါပှၤလၢ ကစၢ်ယွၤထံၣ်ဝဲလၢ တၢ်တၤကျိၣ်တၤစ့န့ၣ် မ့ၢ်တၢ်လၢအကမၣ်.—အ့းဖ့းစူး ၅:၁၇.
တၢ်လၢ ပှၤတၤကျိၣ်တၤစ့န့ၣ် အိၣ်ထီၣ်ခီဖျိလၢ ပှၤသူၣ်လီသးကွံတၢ်အဃိ. ဒီးတၢ်လၢ တၢ်သူၣ်လီသးကွံတၢ်န့ၣ် ကစၢ်ယွၤသးဟ့ဝဲ. (၁ ကရံၣ်သူး ၆:၉, ၁၀; အ့းဖ့းစူး ၅:၃, ၅) ပှၤလၢအတၤကျိၣ်တၤစ့န့ၣ် အလီကီဝဲ ပှၤလၢအၡူတဖၣ်အစ့. ဘၣ်ဆၣ် လံာ်စီဆှံတဲဝဲလၢ ပတဘၣ်လီကီ ပှၤဂၤအတၢ်ဘၣ်.—၂ မိၤၡ့ ၂၀:၁၇; ရိမ့ၤ ၇:၇; ၁၃:၉, ၁၀.
ပမ့ၢ်တၤကျိၣ်တၤစ့ ထဲတစဲးဖိဘၣ်ဆၣ် အကဒုးအိၣ်ထီၣ် ပတၢ်အဲၣ်ကျိၣ်အဲၣ်စ့ ဒီးအကမၤဟးဂီၤ ပတၢ်အိၣ်မူ.—၁ တံၤမသ့း ၆:၉, ၁၀.
ပှၤလၢအတၤကျိၣ်တၤစ့တဖၣ် အဝဲသ့ၣ်မ့ၢ်နၢၤန့ၣ် အဝဲသ့ၣ်နာ်ဝဲလၢ အဘူၣ်ဂ့ၤတီၢ်ဂ့ၤ. ဘၣ်ဆၣ်ကစၢ်ယွၤထံၣ်ဝဲလၢ တၢ်နာ်ဒ်အံၤန့ၣ် အကဲဝဲတၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်တကလုာ် လၢအထီဒါလိာ်သးဒီး တၢ်ဘူၣ်တၢ်ဘါအမ့ၢ်အတီ.—ယၡါယၤ ၆၅:၁၁.
လံာ်စီဆှံဟ့ၣ်ဂံၢ်ဟ့ၣ်ဘါပှၤလၢ ပကမၤတၢ်ဆူၣ်ဆူၣ် ဒီးပတဘၣ်လီကီပှၤဂၤတၢ် ခီလီလီဘၣ်. (စံၣ်တဲၤတဲလီၤတၢ် ၂:၂၄; အ့းဖ့းစူး ၄:၂၈) ပှၤလၢအမၤထွဲ လံာ်စီဆှံ အတၢ်ဟ့ၣ်ကူၣ်တဖၣ်န့ၣ်က “အီၣ်တၢ်အီၣ်လၢ အနီၢ်ကစၢ်မၤန့ၢ်ဝဲ.”—၂ သ့းစၤလနံ ၃:၁၀, ၁၂.
ပှၤလၢအတၤကျိၣ်တၤစ့န့ၣ် အဲၣ်ဒိးပြၢလိာ်သးဒီးပှၤဂၤ. ဒီးပှၤလၢအိၣ်ဒီး တၢ်ပာ်သူၣ်ပာ်သးဒ်အံၤန့ၣ် လံာ်စီဆှံပာ်ဖျါထီၣ်ဝဲလၢ ကစၢ်ယွၤ တဘၣ်သူၣ်ဘၣ်သးဝဲဘၣ်.—ကလၤတံ ၅:၂၆.
လါစဲးပတ့ဘၢၣ် ၁၅-၂၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၃၁
တၢ်မၤလိလၢ ပဒိးန့ၢ်ဘၣ်အီၤလၢ မိၢ်လၢအအိၣ်ဒီး တၢ်အဲၣ်တၢ်ကွံတဂၤ အတၢ်ဟံးစုနဲၣ်ကျဲ
တၢး၁၁-E၂/၁ ၁၉ ¶၇-၈
သိၣ်လိနဖိ ဒ်သိးကအိၣ်ဒီး လုၢ်လၢ်သကဲာ်ပဝး လၢအဂ့ၤ
သိၣ်လိနဖိလၢ ကစၢ်ယွၤအတၢ်ထံၣ် ဘၣ်ဃးဒီး တၢ်မံဃုာ်. အရ့ဒိၣ်လၢ နကဘၣ်ဟ့ၣ်ပလီၢ်နဖိ ဘၣ်ဃးဒီး တၢ်မံဃုာ်. (၁ ကရံၣ်သူး ၆:၁၈; ယၤကိာ် ၁:၁၄, ၁၅) ဘၣ်ဆၣ် နကဘၣ်သိၣ်လိစ့ၢ်ကီး အဝဲသ့ၣ်လၢ တၢ်မံဃုာ်န့ၣ် မ့ၢ်တၢ်ဟ့ၣ် အဂ့ၤတခါလၢ အဟဲလၢ ကစၢ်ယွၤအအိၣ် ဒီးအတမ့ၢ်ဝဲ မုၣ်ကီၤလံၢ် အပျံၤသကွီၤဘၣ်. (ကတိၤဒိ ၅:၁၈, ၁၉; တၢ်သးဝံၣ်တဖၣ် အတၢ်သးဝံၣ် ၁:၂) နမ့ၢ်တဲပၠးနဖိ ထဲတၢ်လီၤဘၣ်ယိၣ် ဘၣ်ဃးဒီး တၢ်မံဃုာ်အဂ့ၢ်န့ၣ် ဘၣ်သ့ၣ်သ့ၣ် အဝဲသ့ၣ် ကထံၣ်ဝဲလၢ တၢ်မံဃုာ်န့ၣ် မ့ၢ်တၢ်လၢ အတဂ့ၤဘၣ်တခါ. ပိာ်မုၣ်သးစၢ် ခိၤရံနၤ လၢအအိၣ်လၢ ကီၢ်ဖြၣ်စ့ၣ်န့ၣ် တဲဝဲလၢ “ယမိယပါန့ၣ် တဲယၤထဲ တၢ်မၤကမၣ်မုၣ်ကမၣ်ခွါန့ၣ် မ့ၢ်တၢ်လၢ အတဂ့ၤဘၣ်ဒ်လဲၣ်အဂ့ၢ်. အဃိ ဘၣ်ဃးဒီး တၢ်မံဃုာ်န့ၣ် ယထံၣ်အီၤ ဒ်တၢ်လၢ အတဂ့ၤဘၣ်တခါ.”
သိၣ်လိနဖိလၢ ကစၢ်ယွၤအတၢ်ထံၣ် ဘၣ်ဃးဒီး တၢ်မံဃုာ်. မိၢ်တဂၤလၢ အအိၣ်လၢ ကီၢ်မဲးကစံၣ်ကိၣ် လၢအမံၤမ့ၢ် နါဒံယါန့ၣ် တဲဝဲလၢ “ယတဲဘၣ် ယဖိသးစၢ်တဖၣ်လၢ တၢ်မံဃုာ်န့ၣ် တမ့ၢ်တၢ်လၢ အကမၣ်ဘၣ် အကဲဝဲ ပှၤဟီၣ်ခိၣ်ဖိ အန့ဆၢၣ်. ဒီးမ့ၢ်ဝဲ ယဟိဝၤယွၤ အတၢ်ဟ့ၣ် လၢအကမၤသးခုပှၤအဂီၢ်. ဘၣ်ဆၣ် အကြၢးဝဲဘၣ်ဝဲ ထဲလၢ ပှၤလၢအဖျီသး ဝံၤတဖၣ်အဂီၢ်. တၢ်ဟ့ၣ်တခါအံၤ နသူအီၤ အလီၢ်အကျဲ မ့ၢ်ဘၣ်မး နကဒိးန့ၢ်ဘၣ် တၢ်သးခု. နသူအီၤ အလီၢ်အကျဲ မ့ၢ်တဘၣ်ဘၣ်န့ၣ် နကဒိးန့ၢ်ဘၣ် တၢ်သးအုး.”
ijwhf-E တၢ်ကွဲးဖုၣ် ၄ ¶၁၁-၁၃
ဘၣ်ဃးဒီး သံးအဂ့ၢ်န့ၣ် တဲသကိးတၢ်ဒီးနဖိ
စးထီၣ်တဲဆိ တၢ်ဂ့ၢ်အံၤဒီး နဖိ. မး လၢအအိၣ်လၢ ဘြံးတၢၣ်န့ၣ် အတဲဝဲလၢ “တဘျီတခီၣ် ဘၣ်ဃးဒီး ပှၤအီသံးဂ့ၤဧါ တဂ့ၤဧါန့ၣ် ပှၤသးစၢ်တဖၣ် တနၢ်ပၢၢ်ဝဲ ဂ့ၤဂ့ၤဘၣ်. ယသံကွၢ် ယဖိခွါလၢ အအိၣ်ဃိးနံၣ်တဂၤလၢ အဆိကမိၣ်ဝဲလၢ ပှၤအီသံး ဂ့ၤမ့ၢ်တဂ့ၤဘၣ်လဲၣ်. ပတဲသကိးတၢ် ယိယိဖိ ဒ်ပတဲတၢ်လၢ မုၢ်ဆ့ၣ်မုၢ်ဂီၤအသိး အဃိ အဝဲတဲပၠးယၤ အတၢ်ထံၣ် ပျီပျီဘူၣ်ဝဲ.”
ဖဲတၢ်ခွဲးတၢ်ယာ်အိၣ်ထီၣ် တဘျီဘၣ်တဘျီန့ၣ် နမ့ၢ်တဲပၠးနဖိတဖၣ် ဘၣ်ဃးဒီး သံးအဂ့ၢ်န့ၣ် အဝဲသ့ၣ် တိၢ်နီၣ်ဝဲကဘၣ်. လၢအဝဲသ့ၣ် အသးနံၣ်အဖီခိၣ် တဲဘၣ်အီၤ တၢ်ဂ့ၢ်လၢ အနၢ်ပၢၢ်ဝဲသ့.
ပာ်လီၤတၢ်ဒိတၢ်တဲာ် လၢအဂ့ၤ. တၢ်လၢဖိသၣ်န့ၣ် အလီၤဂာ်ဒ်သိးဒီး ဘဲကိၣ်လိၣ် လၢအဆူးထီၣ်ထံ. အဃိ အဝဲသ့ၣ် ကကွၢ်လိဝဲ ပှၤလၢအခိၣ်အဃၢၤတဖၣ် ဒီးအတၢ်ထံၣ်ကအိၣ်ဝဲ ဒ်ပှၤလၢအခိၣ်အဃၢၤတဖၣ်. ပှၤဃုသ့ၣ်ညါတၢ်ဖိတဖၣ် တဲဝဲလၢ မိၢ်ပၢ်တဖၣ် အဒိအတဲာ်န့ၣ် ဒိၣ်စိလၢ ဖိတဖၣ်အဖီခိၣ် သ့ဝဲအါကတၢၢ်. အဃိ နမ့ၢ်အီသံး ဒ်သိး နကမၤလီၤမၢ် နတၢ်သူၣ်ကိၢ်သးဂီၤန့ၣ် နဖိတဖၣ် ကထံၣ်ဝဲသံး ဒ်တၢ်လၢ အမၤလီၤမၢ် ပှၤတၢ်သူၣ်ကိၢ်သးဂီၤ. အဃိ ဘၣ်ဃးဒီး တၢ်အီသံးန့ၣ် ပာ်လီၤတၢ်ဒိတၢ်တဲာ် လၢအဂ့ၤ လၢနဖိအဂီၢ်.
g၁၇.၆-E ၉ ¶၅
သိၣ်လိနဖိတဖၣ် လၢကအိၣ်ဒီး တၢ်ဆီၣ်လီၤသး
ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကသးအိၣ်ဟ့ၣ်တၢ်. မၤစၢၤအဝဲသ့ၣ် ဒ်သိး ကနၢ်ပၢၢ်ထီၣ်ဝဲလၢ “ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ်ဒံး.” (မၤတၢ် ၂၀:၃၅) နမၤအီၤ ကသ့ဒ်လဲၣ်. ကွဲးလီၤ ပှၤလၢအလိၣ်ဘၣ် တၢ်မၤစၢၤတဖၣ်အမံၤ. အဒိ ကွဲးလီၤ ပှၤလၢ အလိၣ်ဘၣ်လၢ ပှၤကလဲၤပှ့ၤန့ၢ်အီၤတၢ်, ပှၤကဆှၢထီၣ်ဆှၢလီၤအီၤ မ့တမ့ၢ် ပှၤလၢ အလိၣ်ဘၣ်လၢ ပှၤကဘှီဘၣ်ထီၣ်န့ၢ်အီၤ တၢ်တမံၤမံၤ. ဒီးဖဲနလဲၤမၤစၢၤ ပှၤလၢအလိၣ်ဘၣ် တၢ်မၤစၢၤ တဂၤဂၤအခါ လဲၤကိးဃုာ်ဒီးနဖိ. နမ့ၢ်မၤ ဒ်န့ၣ်န့ၣ် ဖဲနမၤစၢၤပှၤဂၤ ဒီးဒိးန့ၢ်ဘၣ် တၢ်သးခုအခါ အဝဲသ့ၣ် ကထံၣ်ဘၣ်ဝဲ. နမ့ၢ်သိၣ်လိနဖိလၢ နဒိနတဲာ် ဒ်န့ၣ်န့ၣ် မ့ၢ်ဝဲတၢ်သိၣ်လိ လၢအဂ့ၤဒိၣ်မးတခါ ဒီးကမၤစၢၤအဝဲသ့ၣ် လၢကအိၣ်ဒီး တၢ်ဆီၣ်လီၤသး.—လံာ်စီဆှံ အတၢ်ဟံးစုနဲၣ်ကျဲ–လူၤကၣ် ၆:၃၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဆဲးကဲၤကပျီၤထီၣ် ဒ်သိးဒီး “ယဟိဝၤယွၤ အမ့ၣ်အူလၣ်”
၆ နီၢ်မၤရံ အတၢ်ရ့လိာ်သးဒီး ယဟိဝၤယွၤန့ၣ်ဂ့ၤမး. အအိၣ်ဒီး တၢ်နာ်လၢအဂၢၢ်ကျၢၤ ဒီးအသ့ၣ်ညါ လံာ်စီဆှံအဆၢတဖၣ်ဂ့ၤဂ့ၤ. (လူၤကၣ် ၁:၄၆) နီၢ်မၤရံ ဟံန့ၢ်တၢ်ဆၢကတီၢ်လၢ အကဆိမိၣ်ထံဝဲ ကစၢ်ယွၤကလုၢ်ကထါ လီၤတံၢ်လီၤဆဲး ထီဘိ. (လူၤကၣ် ၂:၁၉, ၅၁) ပသ့ၣ်ညါလၢ နီၢ်မၤရံန့ၣ် အတၢ်ရ့လိာ်သးဒီး ယဟိဝၤယွၤ ဂ့ၤဒိၣ်မးအဃိ အကဲမါလၢ အဂ့ၤတဂၤ. ဆၢကတီၢ်ခဲအံၤ မါတဖၣ် ကွၢ်လိ နီၢ်မၤရံ အဒိအတဲာ်စ့ၢ်ကီး. အဒိ ဒီပုၢ်ဝဲၢ်မုၣ်အံၤမံကိၤ တဲဝဲလၢ “ဖဲယအိၣ်သဘျ့ဒံးအခါ ယမၤ နီၢ်သးအတၢ်ရဲၣ်တၢ်ကျဲၤ လၢယနီၢ်ကစၢ်. ဘၣ်ဆၣ် ယထီၣ်ပှၢ်ဝံၤအလီၢ်ခံ ယဝၤဃ့ထုကဖၣ် လၢပဂီၢ် ဒီးတီခိၣ်ရိၤမဲဝဲ ပဟံၣ်ဖိဃီဖိ တၢ်မၤလိလံာ်စီဆှံ. အဃိလၢခံ ယသ့ၣ်ညါလီၤက့ၤသးလၢ ယတမၤ နီၢ်သးအတၢ်ရဲၣ်တၢ်ကျဲၤ လၢယနီၢ်ကစၢ်လၢၤဘၣ် ဒီးယသန့ၤက့ၤယသးလၢ ယဝၤအအိၣ်ခဲလၢာ်. အဃိ ယသ့ၣ်ညါဘၣ်လၢ ယကဘၣ်မၤဂၢၢ်ကျၢၤထီၣ်က့ၤ ယတၢ်ရ့လိာ်သးဒီး ယဟိဝၤယွၤ လၢယနီၢ်ကစၢ်. ဒီးခဲအံၤန့ၣ် ဒ်သိးယကဃ့ထုကဖၣ်လၢ ယဟိဝၤယွၤအအိၣ်, ဖးလံာ်စီဆှံ ဒီးဆိမိၣ်ထံက့ၤ တၢ်ဂ့ၢ်လၢယဖးအီၤအဂီၢ် ယဟံန့ၢ်တၢ်ဆၢကတီၢ်လၢ ယကအိၣ်ထဲတဂၤ.” (ကလၤတံ ၆:၅) ပထံၣ်ဘၣ်လၢ မါတဖၣ် မ့ၢ်ဆဲးမၤဂၢၢ်ကျၢၤထီၣ် အတၢ်ရ့လိာ်သးဒီး ယဟိဝၤယွၤန့ၣ် အဝၤကပတြၢၤအီၤ ဒီးကအဲၣ်အီၤဒိၣ်ထီၣ်.—ကတိၤဒိ ၃၁:၃၀.
လါစဲးပတ့ဘၢၣ် ၂၂-၂၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၁-၂
ဆဲးသိၣ်လိနဲၣ်လိ ပှၤလၢခံတစိၤ
“ဟ့ၣ်လီၤက့ၤအဝဲန့ၣ်လၢ ပှၤအကလုၢ်တီတဖၣ်အစုပူၤ”
၃ ပအဲၣ်ယဟိဝၤယွၤအတၢ်မၤ ဒီးပပာ်လုၢ်ပာ်ပှ့ၤပမူဒါ စ့ၢ်ကီးလီၤ. ပဝဲဒၣ်အါဂၤ ပမၤပတၢ်မၤအံၤမုာ်ဒိၣ်မးအဃိ ပအဲၣ်ဒိးဆဲးမၤအီၤ ဖးယံာ်န့ၣ်လီၤ. ဘၣ်ဆၣ်လီၤသးအုးဒိၣ်မး ဖဲပသးပှၢ်ထီၣ်အခါ ပမၤတၢ်မၤဒ်သိးလၢ ပသးစၢ်အခါတန့ၢ်လၢၤဘၣ်. (စံၣ်တဲၤတဲလီၤတၢ် ၁:၄) အဃိကဲထီၣ်တၢ်မၤကွၢ်လၢ ယဟိဝၤအပှၤဂီၢ်မုၢ်တဖၣ်အဂီၢ်လီၤ. မုၢ်မဆါတနံၤအံၤ တၢ်စံၣ်တဲၤတဲလီၤတၢ်မၤန့ၣ် လဲၤထီၣ်လဲၤထီဝဲ ဒီးယဟိဝၤယွၤ အတၢ်ကရၢကရိ သူဝဲစဲးဖီကဟၣ်တဖၣ်ဒ်သိး ကရၤလီၤတၢ်သးခုကစီၣ် ဝးဝးအဂီၢ်လီၤ. ဘၣ်ဆၣ်တဘျီတခီၣ် ကဲထီၣ်တၢ်ကီတၢ်ခဲလၢ ဒီပုၢ်ဝဲၢ်လၢအသးပှၢ်သ့ၣ်တဖၣ် ကသူဝဲတၢ်ပီးတၢ်လီအံၤအဂီၢ်လီၤ. (လူၤကၣ် ၅:၃၉) ဒ်ပသ့ၣ်ညါအသိး ဖဲပှၤသးပှၢ်ထီၣ်အခါ အဝဲသ့ၣ် အဂံၢ်အဘါလီၤစၢ်ဝဲလီၤ. (ကတိၤဒိ ၂၀:၂၉) လၢတၢ်န့ၣ်အဃိ တၢ်အိၣ်ဖှိၣ်သးပှၢ်လၢ အသးပှၢ်တဖၣ် မ့ၢ်သိၣ်လိဝဲပှၤသးစၢ်တဖၣ်လၢ ကဟံးအါထီၣ်မူဒါလၢ ယဟိဝၤယွၤ အတၢ်ကရၢကရိအပူၤန့ၣ် မ့ၢ်ကျဲလၢအိၣ်ဒီးတၢ်အဲၣ်တၢ်ကွံ ဒီးကကဲဘျုးလီၤ.—ဖး စံးထီၣ်ပတြၢၤ ၇၁:၁၈ တက့ၢ်.
၄ ဒီပုၢ်ဝဲၢ်လၢအိၣ်ဒီးမူဒါတဖၣ် ကဟ့ၣ်လီၤအမူဒါလၢ ပှၤသးစၢ်တဖၣ်အအိၣ်န့ၣ် တမ့ၢ်တၢ်လၢအညီဝဲထီဘိဘၣ်. ဖဲအဝဲသ့ၣ်ဆိကမိၣ်ထီၣ်ဝဲလၢ ကဘၣ်ဟ့ၣ်လီၤဝဲအမူဒါ လၢအပာ်လုၢ်ပာ်ပှ့ၤဝဲအံၤဆူ ပှၤဂၤအအိၣ်အခါ အဝဲသ့ၣ်အသးကအုး ဒီးအသးကဘၣ်ဒိလီၤ. ဘၣ်သ့ၣ်သ့ၣ် အဝဲသ့ၣ်ကဘၣ်ယိၣ်ဝဲလၢ မ့ၢ်တဟံးစုနဲၣ်ကျဲ တၢ်ဖံးတၢ်မၤဘၣ်န့ၣ်တၢ်မၤတဖၣ် တလဲၤအသးလၢအဂ့ၢ်အဝီဘၣ်. မ့တမ့ၢ် အဝဲသ့ၣ်ကဆိကမိၣ်ဝဲလၢ အတၢ်ဆၢကတီၢ်တအိၣ်လၢ ကသိၣ်လိပှၤဂၤအဂီၢ်ဘၣ်. မ့မ့ၢ်ပှၤသးစၢ်တဖၣ်တခီ မ့ၢ်တဒိးန့ၢ်အါထီၣ်ဘၣ် မူဒါဒံးဘၣ်န့ၣ် အဝဲသ့ၣ်ကဘၣ်အိၣ်ဒီး တၢ်ဝံသးစူၤလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
သးစၢ်သ့ၣ်ဧၢ, နတၢ်ဘၣ်တ့ကစၢ် အဲၣ်ဒိးလၢ နကသးခု
၁၄ စီၤၡလိၤမိၤလၢအမ့ၢ် ပှၤလၢအကဲဒိၣ်, ပှၤလၢအစိအကမီၤဒိၣ်န့ၣ် တဲလီၤအသးလၢ “ဟဲယကမၤကွၢ်နၤလၢ တၢ်နံၤတၢ်အ့လီၤ. မၤသးဒ်န့ၣ်ဒီး, မုာ်လၤတၢ်လၢတၢ်ဂ့ၤတက့ၢ်.” အဝဲတဲဝဲဝံၤ မၤကွၢ်ဝဲဒ်န့ၣ်အသိးလီၤ. (စံၣ်တဲၤတဲလီၤတၢ် ၂:၁-၁၀) စီၤၡလိၤမိၤ တ့ထီၣ်ဝဲ ဟံၣ်လၢအလီၤဘီလီၤမုၢ်, ဖီကရၢၢ်ဒီးတၢ်ဟးကသုၣ်ကသီအလီၢ် လၢအဃံအလၤ ဒီးမၤတၢ်ခဲလၢာ်လၢ အအဲၣ်ဒိးမၤဝဲလီၤ. မ့ၢ်အဝဲတူၢ်ဘၣ် တၢ်သူၣ်ခုသးခုဒီး တၢ်သူၣ်မံသးမုာ်ဧါ. ဖဲစီၤၡလိၤမိၤ ဆိကမိၣ်ထီၣ်က့ၤဝဲ တၢ်လၢအမၤတ့ၢ်ဝဲတဖၣ်အခါ အဝဲတဲဝဲလၢ “ကယဲၢ်တၢ်ခဲလၢာ်မ့ၢ်တၢ်ကလီကလီ, . . . ဒီးတၢ်ဘျုးတၢ်ဖှိၣ်တအိၣ်ဘၣ်.” (စံၣ်တဲၤတဲလီၤတၢ် ၂:၁၁) မ့ၢ်နကဟံးန့ၢ်တၢ်မၤလိလၢ စီၤၡလိၤမိၤအအိၣ်ဧါ.
လါစဲးပတ့ဘၢၣ် ၂၉–လါအီးကထိဘၢၣ် ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၃-၄
မၤကျၢၤထီၣ် နတၢ်ဆီဟံၣ်ဆီဃီ
hf တၢ်နီၤဖး ၂ တၢ်ဂ့ၢ် ၁
တီဒီး နသးသမူတံၤသကိးတက့ၢ်
၁ ပာ်နတၢ်ဆီဟံၣ် ဆီဃီလၢညါ
လံာ်စီဆှံစံးဝဲ– “အိၣ်မူဒ်ပှၤကူၣ်တၢ်သ့ အသိးန့ၣ်တက့ၢ်.” (အ့းဖ့းစူး ၅:၁၅, ၁၆, ခ့ခါစှီၤကျိာ်) နတၢ်ဆီဟံၣ်ဆီဃီန့ၣ် မ့ၢ်တၢ်အရ့ဒိၣ်ကတၢၢ်အကျါတမံၤ လၢနတၢ်အိၣ်မူပူၤလီၤ. လၢတၢ်န့ၣ်အဃိ နမ့ၢ်ပာ်တၢ်အံၤလၢညါန့ၣ် ကြၢးဝဲဘၣ်ဝဲလီၤ.
ယဟိဝၤယွၤအဲၣ်ဒိးလၢ နသးကစၢၢ်ဆၢ နသးသမူတံၤသကိးဒီး “မူသးခု” ဒီးအီၤန့ၣ်လီၤ. (စံၣ်တဲၤတဲလီၤ ၉:၉) ကစၢ်ပာ်ဖျါဝဲတြၢၢ်ကလာ်လၢ နတကြၢးကွၢ်ကပာ် နသးသမူတံၤသကိးနီတဘျီဘၣ်. လၢတၢ်န့ၣ်အလီၢ်, နကြၢးဃုကျဲလၢကမၤသးခု နသးသမူတံၤသကိးန့ၣ်လီၤ. (၁ ကရံၣ်သူး ၁၀:၂၄) မၤနဲဒ်သိးနသးသမူတံၤသကိး ကသ့ၣ်ညါလၢနလိၣ်ဘၣ်အီၤ ဒီးနပာ်လုၢ်ပာ်ပှ့ၤအီၤန့ၣ်တက့ၢ်.
တၢ်လၢနမၤသ့–
ထီဘိန့ၣ်နကဘၣ်ဟ့ၣ် တၢ်ဆၢကတီၢ်လၢ နသးသမူတံၤသကိးအဂီၢ်, ဒီးဖဲသုကတိၤတၢ်အခါ ပာ်ဖျါထီၣ်နတၢ်သးအိၣ်အီၤ လၢလၢပှဲၤပှဲၤန့ၣ်တက့ၢ်
မၤဖဲနသးတဂ့ၤ, ဆိကမိၣ်တၢ်လၢ နသးသမူတံၤသကိးအဂီၢ်တက့ၢ်.
ဆဲးကဲၤကပျီၤထီၣ် ဒ်သိးဒီး “ယဟိဝၤယွၤ အမ့ၣ်အူလၣ်”
၁၂ နကွၢ်လိ စီၤအကူလၤ ဒီးနီၢ်ပြံစကံးလၤ ကသ့ဒ်လဲၣ်. ဆိမိၣ်ကွၢ် တၢ်လၢနၤဒီးနသးသမူတံၤသကိး ကဘၣ်မၤန့ၣ် အိၣ်ဒီဒူၣ်. တၢ်မၤတနီၤန့ၣ် နမၤသကီးဒီး နသးသမူတံၤသကိးသ့ အဃိ တဘၣ်မၤထဲ နနီၢ်ကစၢ်တဂၤတဂ့ၤ. အဒိ စီၤအကူလၤ ဒီးနီၢ်ပြံစကံးလၤန့ၣ် အဝဲသ့ၣ် ဟးစံၣ်တဲၤတဲလီၤတၢ် တပူၤဃီ. အဃိ နရဲၣ်ကျဲၤပာ်စၢၤလၢ နကဟးစံၣ်တဲၤတဲလီၤတၢ် တပူၤဃီဒီး နသးသမူတံၤသကိးသ့. စီၤအကူလၤ ဒီးနီၢ်ပြံစကံးလၤန့ၣ် အဝဲသ့ၣ်မၤသကီးတၢ် တပူၤဃီ. ဘၣ်သ့ၣ်သ့ၣ် နၤဒီးနသးသမူတံၤသကိး တၢ်ဖံးတၢ်မၤ တဒ်သိးဘၣ် သနာ်က့ နမၤသကီး ဟံၣ်ဃီတၢ်ဖံးတၢ်မၤ တပူၤဃီသ့. (စံၣ်တဲၤတဲလီၤတၢ် ၄:၉) နၤဒီးနသးသမူတံၤသကိး မ့ၢ်မၤစၢၤလိာ်သးန့ၣ် လီၤဂာ်ဒ်သိးဒီး သုမၤသကီးတၢ် တပူၤဃီ. တကးဒံးဘၣ် သုအိၣ်ဒီး တၢ်ဆၢကတီၢ်လၢ သုကတဲသကီးတၢ်. အဒိ ဒီပုၢ်ဝဲၢ်ခွါရီဘၢၤ ဒီးအမါလ့ဒၤန့ၣ် အဝဲသ့ၣ်ထီၣ်ပှၢ်န့ၢ် အနံၣ် ၅၀ ဘျဲၣ်လံ. ဒီပုၢ်ဝဲၢ်ခွါတဲဝဲလၢ “ယမ့ၢ်တဲတီတီန့ၣ် ပကဟးကသုၣ်ကသီ ဒ်သိးသိးအဂီၢ် ပတၢ်ဆၢကတီၢ် တအိၣ်အါအါဘၣ်. ဘၣ်ဆၣ် ပမၤသကီးတၢ်ဒ်သိးသိးဒံး. အဒိ ဖဲယသ့ဃၢၤလီခီအခါ ယမါထွါသူထီၣ်က့ၤလီခီ. ဒီးဖဲယမၤပျီတၢ်လၢ ဟံၣ်ကရၢၢ်ပူၤအခါ ယမါဟဲမၤစၢၤယၤအဃိ ယသးခုဒိၣ်မး. တကးဒံးဘၣ် ပမၤသကိးတၢ် တပူၤဃီအဃိ ပတၢ်ရ့လိာ်သးဂ့ၤထီၣ် ဒီးပအဲၣ်လိာ်သးဒိၣ်ထီၣ်.”
၁၃ ပှၤဒီမိၢ်ဝၤခံဂၤ မ့ၢ်အိၣ်တပူၤဃီနာ်က့ အဝဲသ့ၣ် ကဘၣ်မၤဂ့ၤထီၣ် အတၢ်ရ့လိာ်သး ဒီးမၤဂၢၢ်ကျၢၤထီၣ် အတၢ်ဆီဟံၣ်ဆီဃီဒံး. မါတဂၤ လၢအအိၣ်လၢ ကီၢ်ဘြၣ်စ့န့ၣ် တဲဝဲလၢ “ဆၢကတီၢ်ခဲအံၤ ပဝဲအါတက့ၢ်န့ၣ် ပတၢ်မၤအိၣ်အါမးအဃိ ပဟ့ၣ်လိာ်သး တၢ်ဆၢကတီၢ် တချုးအါအါဘၣ်. ဒီးပအိၣ်ဟံၣ်တဖျၢၣ်ဃီအဃိ ပကဆိမိၣ်လၢ ပဟ့ၣ်လိာ်သး ပတၢ်ဆၢကတီၢ်လံ. ဘၣ်ဆၣ် ယသ့ၣ်ညါဘၣ်လၢ ပအိၣ်ဟံၣ်တဖျၢၣ်ဃီနာ်က့ ပကဘၣ်မၤဂ့ၤထီၣ် ပတၢ်ရ့လိာ်သး ဒီးဟ့ၣ်လိာ်သး တၢ်ဆၢကတီၢ်ဒံး.” ဒီပုၢ်ဝဲၢ်ခွါဘြူနိၤ ဒီးအမါထ့န့ၣ် ဟ့ၣ်လိာ်သး တၢ်ဆၢကတီၢ်ထီဘိ. ဒီပုၢ်ဝဲၢ်ခွါဘြူနိၤ တဲဝဲလၢ “ဖဲပအိၣ်တပူၤဃီအခါ အကဲဝဲ တၢ်ဆၢကတီၢ်လၢ ပဝဲခံဂၤအဂီၢ် အဃိ ဖဲန့ၣ်အဆၢကတီၢ် ပတကွၢ်ပလီတဲစိဘၣ်.”
၁၄ တဘျီတခီၣ် နၤဒီးနသးသမူတံၤသကိး တၢ်ဘၣ်သး မ့ၢ်တဒ်သိးဘၣ်န့ၣ် နကဘၣ်မၤဒ်လဲၣ်. ဆိမိၣ်ထီၣ်က့ၤ တၢ်အဒိဘၣ်ဃး မ့ၣ်အူပူၣ်လၢ ပတဲသကီးလၢ တၢ်မၤလိအံၤအခီၣ်ထံး. ပသ့ၣ်ညါဘၣ်လၢ မ့ၣ်အူတပူၣ်န့ၣ် အတကဲၤကပျီၤထီၣ်ဖးဒိၣ် တဘျီဃီဘၣ်. ဒ်သိး အကဆဲးကဲၤထီဘိအဂီၢ် ပှၤကဘၣ်ပၢနုာ် သ့ၣ်မုၣ်ခံခဲအံၤခဲအံၤ. ဒ်န့ၣ်အသိး နၤဒီးနသးသမူတံၤသကိးစ့ၢ်ကီး သုတၢ်ဘၣ်သး မ့ၢ်တဒ်သိးဘၣ်နာ်က့ သုဘၣ်ဟ့ၣ်လိာ်သး တၢ်ဆၢကတီၢ် ဒီးရ့လိာ်သးအါထီၣ်. ဒီးဖဲသုရ့လိာ်သးအခါ မၤသကိးတၢ်လၢ သုခံဂၤလၢာ်မၤအီၤမုာ် ဒီးတဘၣ်မၤတၢ်လၢ ကဒုးအိၣ်ထီၣ် တၢ်တဲအါလိာ်သးတဂ့ၤ. (ယၤကိာ် ၃:၁၈) နမ့ၢ်မၤဂ့ၤထီၣ် နတၢ်ရ့လိာ်သး ကယီကယီန့ၣ် နတၢ်အဲၣ်လိာ်သး ကဂၢၢ်ကျၢၤဒိၣ်ထီၣ်.
ဆဲးကဲၤကပျီၤထီၣ် ဒ်သိးဒီး “ယဟိဝၤယွၤ အမ့ၣ်အူလၣ်”
၃ ဒ်သိး “ယဟိဝၤယွၤ အမ့ၣ်အူလၣ်” ကဆဲးကဲၤထီဘိအဂီၢ် ပှၤဒီမိၢ်ဝၤခံဂၤလၢာ် ကဘၣ်မၤဂ့ၤထီၣ် အတၢ်ရ့လိာ်သးဒီး ယဟိဝၤယွၤ. နတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် အကမၤစၢၤ နတၢ်ဆီဟံၣ်ဆီဃီဒ်လဲၣ်. ဖဲပှၤဒီမိၢ်ဝၤခံဂၤ အတၢ်ရ့လိာ်သးဒီး ယဟိဝၤယွၤ ဂ့ၤဝဲအခါ အဝဲသ့ၣ် ကမၤထွဲဝဲ ယဟိဝၤယွၤအတၢ်ဟ့ၣ်ကူၣ်. ဒီးတၢ်ဟ့ၣ်ကူၣ်တဖၣ်န့ၣ် ကမၤစၢၤအဝဲသ့ၣ်လၢ အကဟးဆှဲး တၢ်ကီတၢ်ခဲ ဒီးလဲၤခီဖျိ တၢ်ကီတၢ်ခဲလၢ ကမၤလီၤစၢ်အဝဲသ့ၣ် အတၢ်အဲၣ်လိာ်သး တဂၤဒီးတဂၤ. (ဖး စံၣ်တဲၤတဲလီၤတၢ် ၄:၁၂.) ပှၤလၢအတၢ်ရ့လိာ်သးဒီး ယဟိဝၤယွၤဂ့ၤန့ၣ် အဝဲသ့ၣ်ကျဲးစၢး ကွၢ်လိ ယဟိဝၤယွၤ ဒီးမၤထွဲ ယဟိဝၤယွၤ အတၢ်ဂ့ၤတၢ်ဝါ ဒ်သိးဒီး တၢ်သူၣ်ဂ့ၤသးဝါ, တၢ်ဝံသးစူၤ ဒီးတၢ်ပျၢ်ပှၤဂၤတၢ်ကမၣ်. (အ့းဖ့းစူး ၄:၃၂–၅:၁) အဃိ ပှၤဒီမိၢ်ဝၤခံဂၤ မ့ၢ်ပာ်ဖျါထီၣ် တၢ်ဂ့ၤတၢ်ဝါတဖၣ်အံၤန့ၣ် အဝဲသ့ၣ်တၢ်အဲၣ်လိာ်သး ကဂၢၢ်ကျၢၤဒိၣ်ထီၣ်. အဒိ ဒီပုၢ်ဝဲၢ်မုၣ်လံနၤန့ၣ် အထီၣ်ပှၢ်န့ၢ် ၂၅ နံၣ်လံ. ဒီးအတဲဝဲလၢ “ပှၤတဂၤ အတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် နအဲၣ်ဘၣ်အီၤ ဒီးနပာ်ကဲဘၣ်အီၤညီ.”
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဖဲပဒိၣ်ပပှၢ်တြီဃာ် ပတၢ်ဖံးတၢ်မၤတဖၣ်အခါ ဆဲးဘူၣ်ထီၣ်ဘါထီၣ် ယဟိဝၤယွၤ
၁၄ ဘၣ်ဃးဒီး တၢ်ဂ့ၢ်တၢ်ကျိၤလၢ နတဲဘၣ်ပှၤဂၤတဖၣ်န့ၣ် ပလီၢ်နသးတက့ၢ်. ဖဲပှၤတြီဃာ် ပတၢ်စံၣ်တဲၤတဲလီၤ တၢ်မၤအဆၢကတီၢ် ပကဘၣ်သ့ၣ်ညါတၢ် ‘အကတီၢ်လၢ ပကအိၣ်ဘှီၣ်ကလာ်အဂီၢ်’ န့ၣ်လီၤ. (စံၣ်တဲၤတဲလီၤတၢ် ၃:၇) တၢ်ဂ့ၢ်တၢ်ကျိၤဒ်သိးဒီး ပဒီပုၢ်ဝဲၢ်မုၣ်ခွါတဖၣ်အမံၤ, တၢ်လီၢ်တၢ်ကျဲလၢ ပထံၣ်ဖှိၣ်လိာ်သး, ပမၤတၢ်စံၣ်တဲၤတဲလီၤတၢ်မၤဒ်လဲၣ် ဒီးပဒိးန့ၢ်ဘၣ် နီၢ်သးအတၢ်အီၣ်တၢ်အီဒ်လဲၣ်န့ၣ် မ့ၢ်တၢ်ဂ့ၢ်တၢ်ကျိၤလၢ ပကြၢးပာ်ခူသူၣ်အီၤတဖၣ်လီၤ. အဃိ ပကဘၣ်ပာ်ခူသူၣ်အီၤ ဒီးပတဘၣ်တဲဘၣ် ပဒိၣ်အခ့အပှၤတဖၣ်ဘၣ်. တကးဒံးဘၣ် ပသကိးတဖၣ် ဒီးပဘူးပတံၢ်တဖၣ် မ့ၢ်အိၣ်လၢ ပထံပကီၢ်ပူၤမ့ၢ်ဂ့ၤ မ့ၢ်အိၣ်လၢ ထံကီၢ်အဂၤမ့ၢ်ဂ့ၤ ပတတဲဘၣ်အဝဲသ့ၣ်လၢ တၢ်ဂ့ၢ်တဖၣ်အံၤန့ၣ်ဘၣ်. ပမ့ၢ်တဲဘၣ် အဝဲသ့ၣ်န့ၣ် ကကဲထီၣ် တၢ်လီၤဘၣ်ယိၣ်လၢ ပဒီပုၢ်ဝဲၢ်မုၣ်ခွါတဖၣ်အဂီၢ်လီၤ.—ဖး စံးထီၣ်ပတြၢၤ ၃၉:၁ တက့ၢ်.
လါအီးကထိဘၢၣ် ၆-၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၅-၆
ပာ်ဖျါထီၣ် တၢ်ပာ်ကဲ ယဟိဝၤယွၤ ဒိၣ်ဒိၣ်မုၢ်မုၢ်
တၢး၀၈-E ၈/၁၅ ၁၅-၁၆ ¶၁၇-၁၈
အိၣ်ဒီးတၢ်ပာ်ကဲ ဒီးမၤလၤကပီၤ ယဟိဝၤယွၤ
၁၇ ပကြၢးပာ်ဖျါထီၣ် တၢ်ပာ်ကဲ လီၤဆီဒၣ်တၢ် ဖဲပဘူၣ်ထီၣ်ဘါထီၣ် ယဟိဝၤယွၤအခါ. စံၣ်တဲၤတဲလီၤတၢ် ၅:၁ တဲဝဲလၢ “ဖဲနလဲၤလၢ ယွၤလၢ အမ့ၢ်အတီတဂၤ အဟံၣ် တဘျီဂ့ၤ တဘျီဂ့ၤအခါ ပလီၢ်နသးတက့ၢ်.” စီၤမိၤၡ့ ဒီးစီၤယိၤၡူန့ၣ် ဖဲအဝဲသ့ၣ် အိၣ်လၢတၢ်လီၢ်လၢ အစီဆှံအခါ ကစၢ်ယွၤမၢ အဝဲသ့ၣ် ဘ့ၣ်လီၤကွံာ် အခီၣ်ဖံး. (၂ မိၤ ၃:၅; ၡူ ၅:၁၅) အဝဲသ့ၣ် မၤဝဲဒ်န့ၣ် ဒ်သိး ကပာ်ဖျါထီၣ် တၢ်ပာ်ကဲအဂီၢ်. ဒီးပှၤအံၣ်စရ့လးဖိ ပှၤလုၢ်တၢ်ဒိၣ်တဖၣ်စ့ၢ်ကီး ဘၣ်ကူဝဲဖျီၣ်ခံဖုၣ်ခီၣ် “ဒ်သိး အဝဲသ့ၣ် ကကးဘၢ အတၢ်အဂီၢ်လီၤ.” (၂ မိၤ ၂၈:၄၂, ၄၃) အဝဲသ့ၣ် ဘၣ်မၤဝဲဒ်န့ၣ် ဒ်သိး ပှၤတထံၣ်ဘၣ် တၢ်လၢအလီၤမဲာ်ဆှးတဂ့ၤအဂီၢ်. ပှၤလုၢ်တၢ်ဒိၣ် အဟံၣ်ဖိဃီဖိ ကိးဂၤဒဲးန့ၣ် ဘၣ်မၤထွဲဝဲ ကစၢ်ယွၤအတၢ်သိၣ်တၢ်သီ ဒ်သိး ကစၢ်ယွၤအလၤကပီၤ တဘၣ်ဒိတဂ့ၤအဂီၢ်.
၁၈ တၢ်ဘူၣ်ထီၣ်ဘါထီၣ် ကအိၣ်ဒီး အလၤကပီၤအဂီၢ် ပှၤကဘၣ်ပာ်ဖျါထီၣ် တၢ်ပာ်ကဲ. ဒ်သိး ပှၤကပာ်ကဲပှၤအဂီၢ် ပကဘၣ်အိၣ်ထဲ အလီၤပာ်ကဲ. ပကဘၣ်ပာ်ဖျါထီၣ် တၢ်ပာ်ကဲန့ၣ် တဘၣ်မ့ၢ်ထဲ တၢ်လၢအဖျါလၢခိ မ့တမ့ၢ် ပပာ်မၤပသးန့ၣ်ဘၣ်, အကဘၣ်ဟဲထီၣ်လၢ ပသးပူၤ. (၁ မူၤ ၁၆:၇; ကတိၤ ၂၁:၂) ထီဘိန့ၣ် ပကဘၣ်ပာ်ဖျါထီၣ် တၢ်ပာ်ကဲလၢ ပတၢ်ဟူးတၢ်ဂဲၤ, တၢ်ပာ်သူၣ်ပာ်သး, တၢ်ရ့လိာ်သးဒီးပှၤဂၤ ဒီးပနီၢ်ကစၢ်အဖီခိၣ်. တကးဒံးဘၣ် ပကဘၣ်ပာ်ဖျါထီၣ် တၢ်ပာ်ကဲလၢ ပတၢ်စံးတၢ်ကတိၤ ဒီးတၢ်ဖံးတၢ်မၤထီဘိ. ဖဲပပာ်ဖျါထီၣ် တၢ်ပာ်ကဲလၢ ပတၢ်ဖံးတၢ်မၤ, ပတၢ်ဟူးတၢ်ဂဲၤ, ပတၢ်ကူတၢ်သိး ဒီးတၢ်မၤဃံမၤလၤတဖၣ်အခါ မ့ၢ်ဝဲ ပမၤထွဲ စီၤပီလူးအတၢ်ကတိၤ. စီၤပီလူးတဲဝဲလၢ “ဒ်သိးပှၤသုတထံၣ်န့ၢ် တၢ်ပာ်တၢ်ကမၣ်အလီၢ်လၢ ပတၢ်စံၣ်တဲၤတဲလီၤတၢ်မၤ အပူၤတဂ့ၤအဂီၢ် ပတဒုးအိၣ်ထီၣ် တၢ်လီၤဃံၢ်အလီၢ်လၢ ကျဲနီတဘိဘၣ်. မ့မ့ၢ် လၢတၢ်ကိးမံၤဒဲးအပူၤန့ၣ် ပပာ်ဖျါထီၣ်လၢ ပမ့ၢ်ကစၢ်ယွၤ အခ့အပှၤတဖၣ်.” (၂ ကရံၣ် ၆:၃, ၄) တကးဒံးဘၣ် အလီၤဂာ်ဒ်ပ “မၤဃံမၤလၤထီၣ် ကစၢ်ယွၤလၢအမ့ၢ် ပှၤလၢ အအုၣ်က့ၤခီၣ်က့ၤပှၤတဂၤ အတၢ်သိၣ်လိတဖၣ်.”—တံ ၂:၁၀.
ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ကဃ့ဘါထုကဖၣ်တၢ်အဂီၢ်
၁၈ ဘၣ်သ့ၣ်သ့ၣ် ဒီပုၢ်ဝဲၢ်ခွါတဂၤ ပှၤကမၢ အဃ့ဘါထုကဖၣ်န့ၢ်တၢ်လၢ တၢ်အိၣ်ဖှိၣ်ရိဖှိၣ် လၢတၢ်စံၣ်တဲၤတဲလီၤတၢ်အဂီၢ် မ့တမ့ၢ် လၢပှၤကထီၣ် တၢ်အိၣ်ဖှိၣ်အဂီၢ်. ဒီပုၢ်ဝဲၢ်ခွါလၢ အဒိးန့ၢ်ဘၣ် တၢ်ခွဲးတၢ်ယာ်တဂၤ ဒ်သိး အတၢ်ဃ့ဘါထုကဖၣ် ကကဲဘျုးအဂီၢ် အကဘၣ်နီၣ်ဘၣ် တၢ်ဂ့ၢ်မနုၤလဲၣ်. တၢ်ဃ့ဘါထုကဖၣ်န့ၣ် တမ့ၢ်တၢ်ဆၢကတီၢ်လၢ နကသိၣ်ပှၤဂၤ ဒီးဘိးဘၣ်သ့ၣ်ညါလီၤ တၢ်တမံၤမံၤဘၣ်. အဒိ ပှၤပာ်ပနီၣ် တၢ်ဆၢကတီၢ် ယဲၢ်မံးနံးလၢ တၢ်သးဝံၣ် ဒီးတၢ်ဃ့ဘါထုကဖၣ်အဂီၢ်. အဃိ ဒီပုၢ်ဝဲၢ်ခွါလၢ အဒိးန့ၢ်ဘၣ်မူဒါ လၢအကဘၣ် ဃ့ဘါထုကဖၣ်န့ၣ် ဖဲအဃ့ဘါထုကဖၣ် အဆၢကတီၢ် အတဘၣ် “တဲတၢ်အါအါ” ဘၣ်. လီၤဆီဒၣ်တၢ် ဖဲပှၤကစးထီၣ် တၢ်အိၣ်ဖှိၣ်အခါ.—မးသဲ ၆:၇.
“တုၤနဆိၣ်တၢ်ဒီးယွၤဒီး, မၤတီနကလုၢ်တက့ၢ်”
၁၂ ဖဲနဒိးဘျၢထံအခါ နအၢၣ်လီၤအီလီၤယဟိဝၤယွၤလၢ နကသူနတၢ်အိၣ်မူလၢ နကမၤအတၢ်မၤ ဒီးနကဂုာ်ကျဲးစၢးမၤပိာ်ထွဲ အတၢ်သိၣ်တၢ်သီတဖၣ်လီၤ. ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ်ဝဲအသိး ပဝဲခဲလၢာ်ပကဘၣ် သံကွၢ်လီၤက့ၤပသးလီၤ. ပကြၢးသံကွၢ်လီၤပသးလၢ– ‘စးထီၣ်လၢယဒိးဘျၢထံ တုၤခဲအံၤန့ၣ် ယတၢ်ရ့လိာ်သးဒီးယဟိဝၤယွၤ အိၣ်ဝဲဒ်လဲၣ်. မ့ၢ်ယမၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်ဒံးဧါ. (ကလီးစဲ ၃:၂၃) မ့ၢ်ယဃ့ဘါထုကဖၣ်တၢ်ထီဘိဧါ. မ့ၢ်ယဖးလံာ်စီဆှံ ကိးနံၤဒဲးဧါ. မ့ၢ်ယလဲၤထီၣ်တၢ်အိၣ်ဖှိၣ်ရိဖှိၣ်ထီဘိဧါ. တသ့ဖဲအသ့န့ၣ် မ့ၢ်ယဂုာ်ကျဲးစၢးလဲၤ စံၣ်တဲၤတဲလီၤတၢ်ဧါ. ဒီးမ့ၢ်ယတၢ်သူၣ်ဆူၣ်သးဆူၣ်လၢ ကစၢ်ယွၤအတၢ်ဖံးတၢ်မၤအပူၤန့ၣ် လီၤစၢ်ဝဲဧါ.’ တၢ်မၢဖိပ့းတရူးဟ့ၣ်ပလီၢ်ပှၤ ဒ်သိးပသုတပတုာ်မၤ ကစၢ်ယွၤအတၢ်မၤတဂ့ၤအဂီၢ်လီၤ. ပမ့ၢ်မၤအါထီၣ်ပတၢ်နာ်, ပတၢ်သ့ၣ်ညါ, အိၣ်ဒီးတၢ်တူၢ်န့ၢ်ခီၣ်ကဲ ဒီးအိၣ်ဒီးတၢ်ယူးယီၣ်ယွၤန့ၣ် ပကအိၣ်ဒီးတၢ်သူၣ်ဆူၣ်သးဆူၣ်လၢ ယွၤအတၢ်မၤအပူၤလီၤ.—ဖး ၂ ပ့းတရူး ၁:၅-၈ တက့ၢ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ပှၤဖးလံာ်ဖိတဖၣ် အတၢ်သံကွၢ်
စံၣ်တဲၤတဲလီၤတၢ် ၅:၈ န့ၣ် တဲဝဲဘၣ်ဃးဒီး ပှၤပၢတၢ်တဂၤလၢ အမၤနးမၤဖှီၣ် ပှၤဖှီၣ်ဖိယာ်ဖိ ဒီးရ့ဒီးအဝဲသ့ၣ် တတီတလိၤဘၣ်. ပှၤပၢတၢ်တဂၤန့ၣ် အကဘၣ်သ့ၣ်ညါဝဲလၢ ပှၤလၢအလီၢ်အလၤ ဒိၣ်န့ၢ်အီၤန့ၣ် အိၣ်ခိးကွၢ်ဝဲ အတၢ်ဖံးတၢ်မၤတဖၣ်လီၤ. ဒီးပှၤအဂၤလၢ အလီၢ်အလၤ ဒိၣ်န့ၢ်အီၤန့ၣ် အိၣ်ဒံးဝဲလီၤ. ဘၣ်ဆၣ် လီၤသးအုးဒိၣ်မးလၢ ဟီၣ်ခိၣ်ပဒိၣ်ပပှၢ်တဖၣ်န့ၣ် ပၢတၢ်တတီတလိၤဘၣ်လီၤ. ခီဖျိလၢ အဝဲသ့ၣ်ပၢတၢ် တတီတလိၤဘၣ်အဃိ ပှၤဟီၣ်ခိၣ်ဖိတဖၣ် ထံၣ်ဘၣ်တၢ်နးတၢ်ဖှီၣ်လီၤ.
ပသ့ၣ်ညါလၢ ယဟိဝၤယွၤမ့ၢ် တၢ်ထီကတၢၢ်တဂၤလၢ အကွၢ်ဝဲ ဟီၣ်ခိၣ်ပဒိၣ်ပပှၢ်တဖၣ် အတၢ်ဖံးတၢ်မၤအဃိ ဖဲပထံၣ်ဘၣ်လၢ တၢ်အိၣ်သးဂ့ၤထီၣ် တသ့လၢၤဘၣ်အခါဒၣ်လဲာ် ပသးမုာ်ထီၣ်က့ၤဝဲသ့လီၤ. အဃိ ပဃ့ယဟိဝၤယွၤ အတၢ်မၤစၢၤ ဒီးပပာ်ထီၣ် ပတၢ်ဘၣ်ယိၣ်ဘၣ်ဘှီလၢ အလိၤသ့ဝဲလီၤ. (စံးထီၣ်ပတြၢၤ ၅၅:၂၂; ဖံလံးပံၤ ၄:၆, ၇) ပသ့ၣ်ညါလၢ “ယွၤအမဲာ်ဟးဝ့ၤဝီၤတၢ်လၢ ဟီၣ်ခိၣ်ချၢဒီဘ့ၣ်ညါ, ဒ်သိးအကပာ်ဆူၣ်ထီၣ်အသးလၢ ပှၤလၢအအိၣ်ဒီး အသးဒီဖျၢၣ်ဒီးအီၤတဖၣ်အဂီၢ်န့ၣ်လီၤ.”—၂ ကွဲးနီၣ်တၢ် ၁၆:၉.
အဃိ စံၣ်တဲၤတဲလီၤတၢ် ၅:၈ ဒုးသ့ၣ်နီၣ်ထီၣ်ပှၤလၢ ဟီၣ်ခိၣ်ပဒိၣ်ပပှၢ်တဖၣ်န့ၣ် အိၣ်ဒီးတၢ်စိတၢ်ကမီၤလီၤ. တၢ်လၢအရ့ဒိၣ်ကတၢၢ်န့ၣ် လံာ်စီဆှံတဆၢအံၤ မၤစၢၤပှၤလၢ ပသ့ၣ်ညါထီၣ်လၢ ယဟိဝၤယွၤမ့ၢ်ပှၤလၢ အထီကတၢၢ်ဒီး အတၢ်စိတၢ်ကမီၤ အိၣ်အါကတၢၢ်လီၤ. ခဲအံၤ အဝဲဟ့ၣ်လီၤဝဲအဖိခွါ ယ့ၣ်ၡူးခရံာ်လၢကပၢတၢ် ဒ်စီၤပၤတဂၤလၢ အဘီအမုၢ်အပူၤလီၤ. သ့တၢ်လၢာ်ကစၢ်န့ၣ် ထံၣ်တၢ်ခဲလၢာ်ဒီး လၢဝဲပှဲၤဝဲဒီးတၢ်တီတၢ်လိၤ ဒီးတၢ်စံၣ်ညီၣ်တီ အဃိ အဖိခွါစ့ၢ်ကီး လီၤဂာ်ဒ်သိးဒီးအီၤလီၤ.
လါအီးကထိဘၢၣ် ၁၃-၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၇-၈
“လဲၤလၢ ဟံၣ်တဖျၢၣ်လၢ ပှၤဟီၣ်လၢပှၤသံအဃိ”
it-E “ပှၤဟီၣ်လၢပှၤသံအဃိ” ¶၉
“ပှၤဟီၣ်လၢပှၤသံအဃိ”
တၢ်ဆၢကတီၢ်လၢ နကဘၣ်ပာ်ဖျါထီၣ် တၢ်သးအုး. စံၣ်တဲၤတဲလီၤတၢ် ၃:၁, ၄ တဲဝဲလၢ “တၢ်ဆၢကတီၢ်လၢ ပှၤကဟီၣ်အဂီၢ် ဒီးတၢ်ဆၢကတီၢ်လၢ ပှၤကနံၤအဂီၢ်, တၢ်ဆၢကတီၢ်လၢ ပှၤကသးအုးအဂီၢ် ဒီးတၢ်ဆၢကတီၢ်လၢ ပှၤကဂဲၤကလံၣ်အဂီၢ်” အိၣ်ဝဲလီၤ. ပှၤဟီၣ်ခိၣ်ဖိတဖၣ်န့ၣ် ဘၣ်သံဝဲ ကိးဂၤဒဲးအဃိ ပှၤလၢအအိၣ်ဒီး တၢ်ကူၣ်သ့န့ၣ် ကသူၣ်အိၣ်သးအိၣ်လဲၤလၢ “ဟံၣ်တဖျၢၣ်လၢ ပှၤဟီၣ်လၢပှၤသံအဃိ” အါန့ၢ်ဒံး ဟံၣ်လၢ ပှၤအီၣ်သကိးအီသကိးတၢ်ဒံး. (စံၣ် ၇:၂, ၄; ထိၣ်သတြီၤဒီး ကတိၤ ၁၄:၁၃.) ဖဲပှၤတဂၤသံအခါ ပှၤလၢအအိၣ်ဒီး တၢ်ကူၣ်သ့န့ၣ် ကသးစၢၢ်ဆၢ တၢ်မၤမုာ်မၤဖှံသးအလီၢ် အကဟံးန့ၢ် တၢ်ခွဲးတၢ်ယာ်လၢ ကပာ်ဖျါထီၣ် တၢ်ဒိသူၣ်ဒိသး ဒီးဟ့ၣ်ဂံၢ်ဟ့ၣ်ဘါတၢ်အဂီၢ်. ပမ့ၢ်မၤဒ်န့ၣ်န့ၣ် ကမၤစၢၤပှၤ ဒ်သိးပကသ့ၣ်နီၣ်ထီၣ်လၢ ပဝဲနာ်က့ ပမ့ၢ်ပှၤဟီၣ်ခိၣ်ဖိလၢ အကဘၣ်သံ ဒီးကမၤစၢၤပှၤ ဒ်သိး ပကဆိကမိၣ်ထံက့ၤ ဘၣ်ဃးဒီး ပတၢ်ရ့လိာ်သးဒီး တၢ်ဘၣ်တ့ကစၢ် အိၣ်ဒ်လဲၣ်.
မၤစၢၤပှၤဂၤ ဒ်သိးအဝဲသ့ၣ် လဲၤခီဖျိ တၢ်သူၣ်ကိၢ်သးဂီၤတဖၣ် ကန့ၢ်အဂီၢ်
၁၅ ဝ့လံၤယၢၤ(မ်)လၢ အမါသံသဒၣ်ကွံာ်အီၤ လၢအပူၤကွံာ်အနံၣ်တဖၣ်န့ၣ် တဲဝဲလၢ “ဖဲပှၤဂၤ တဲဘၣ်က့ၤယၤ ယမါအတၢ်ဂ့ၤတၢ်ဝါ လၢအဝဲသ့ၣ် သ့ၣ်နီၣ်ဝဲတဖၣ်အခါ ယစံးဘျုးဘၣ် အဝဲသ့ၣ်ဒိၣ်မး, ဒီးယတူၢ်ဘၣ်လၢ ပှၤအဲၣ်အီၤဒီး ပာ်ကဲအီၤလီၤ. အဃိ မၤမုာ်ယသးဒိၣ်မးလီၤ. ယပာ်လုၢ်ပာ်ပှ့ၤယမါ ဒီးအဝဲမ့ၢ် ပှၤအရ့ဒိၣ်လၢယဂီၢ်အဃိ အဝဲသ့ၣ် အတၢ်ကတိၤတဖၣ်န့ၣ် မၤမုာ်ထီၣ်ယသး ဒိၣ်မးလီၤ.” ဘံၤယါခၤ လၢအမ့ၢ် မုၣ်ကမဲတဂၤ တဲဝဲလၢ “ဖဲပှၤဂၤ ဃ့ဘါထုကဖၣ် ဒီးဖးလံာ်စီဆှံဒီးယၤ တဆၢ မ့တမ့ၢ် ခံဆၢအခါ ယသးမုာ်ထီၣ်လီၤ. ဖဲအဝဲသ့ၣ် တဲဘၣ်ယၤလၢ ယဝၤအဂ့ၢ် ဒီးဖဲယတဲဘၣ် အဝဲသ့ၣ် လၢယဝၤအဂ့ၢ်အခါ အဝဲသ့ၣ် ဒိကနၣ်ယၤအဃိ ကဲထီၣ်တၢ်မၤစၢၤလၢ ယဂီၢ်ဒိၣ်မးလီၤ.”
“ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်”
၁၆ ပတၢ်ဃ့ဘါထုကဖၣ်န့ၣ် မၤစၢၤပဒီပုၢ်ဝဲၢ်လၢ အသူၣ်အုးသးအုးတဖၣ်သ့ဝဲလီၤ. ပဃ့ဘါထုကဖၣ် ဒီးအဝဲသ့ၣ်ဒ်သိးသိး မ့တမ့ၢ် ပဃ့ဘါထုကဖၣ်န့ၢ်တၢ်လၢ အဝဲသ့ၣ်အဂီၢ်သ့စ့ၢ်ကီးလီၤ. ဒီးမ့ၢ်ကီလၢနကဃ့ဘါထုကဖၣ်တၢ် ခီဖျိနဘၣ်ယိၣ်လၢ နကဟီၣ်အဃိဒၣ်လဲာ် နမ့ၢ်ဃ့ဘါထုကဖၣ်လၢ သူၣ်ဒီဖျၢၣ်သးဒီဖျၢၣ်န့ၣ် ကမၤမုာ်ထီၣ်က့ၤ အဝဲသ့ၣ်အသးလီၤ. ဒံလ့(န်) တဲဝဲ “တဘျီတခီၣ် ဖဲဒီပုၢ်ဝဲၢ်မုၣ်သ့ၣ်တဖၣ် ဟဲဟ့ၣ်ဂံၢ်ဟ့ၣ်ဘါယၤအခါ ယမၢအဝဲသ့ၣ် ဃ့ဘါထုကဖၣ်န့ၢ်တၢ်လၢယဂီၢ်လီၤ. အါတက့ၢ် ဖဲအဝဲသ့ၣ် စးထီၣ်ဃ့ဘါထုကဖၣ်အခါ အကလုၢ်ကနိးဝဲ ဘၣ်ဆၣ် လၢခံန့ၣ်အကလုၢ်တကနိးလၢၤဘၣ် ဒီးဃ့ဝဲလၢတၢ်သူၣ်အိၣ်သးအိၣ်အပူၤလီၤ. အဝဲသ့ၣ်အတၢ်နာ်လၢအဂၢၢ်ကျၢၤ, အတၢ်အဲၣ်ဒီး အတၢ်ကဟုကယာ်န့ၣ် မၤဂၢၢ်ကျၢၤထီၣ် ယတၢ်နာ်စ့ၢ်ကီးလီၤ.”
“ပှၤလၢအဟီၣ်တဖၣ်န့ၣ်, ဟီၣ်ဃုာ်ဒီးအီၤတက့ၢ်”
၁၇ ပှၤတဂၤအတၢ်သူၣ်အုးသးအုး ကလီၤမၢ်အဂီၢ် ကယံာ်ဝဲထဲလဲၣ်န့ၣ် ပတဲလီၤတံၢ်လီၤဆဲးတသ့ဘၣ်. ဖဲပှၤလၢပအဲၣ်ဘၣ်တဂၤ သံသီသီအခါ ပဘူးပတံၢ် ဒီးပတံၤသကိးသ့ၣ်တဖၣ် ကဟဲလၢပအိၣ်အါမးလီၤ. ဘၣ်ဆၣ်လၢခံ ယံာ်ထီၣ်ယံာ်ထီၣ်န့ၣ် ပှၤတဟဲကြီကြီလၢၤဘၣ်. ဘၣ်ဆၣ်ပှၤလၢအသူၣ်အုးသးအုးတဖၣ် လိၣ်ဘၣ်ဒံးတၢ်မၤမုာ်ထီၣ်က့ၤန့ၣ်လီၤ. လၢတၢ်န့ၣ်အဃိ အိၣ်ကတဲာ်ကတီၤနသးဒ်သိး နကမၤစၢၤအဝဲသ့ၣ်တက့ၢ်. လံာ်စီဆှံတဲဝဲ “ပှၤအတံၤအသကိးအဲၣ်တၢ် ကိးအဆၢအကတီၢ်ဒဲး, ဒီးပှၤဒီပုၢ်ဝဲၢ်အိၣ်ဖျဲၣ်ဝဲလၢ တၢ်မၤကိၢ်မၤဂီၤအဂီၢ်လီၤ.” (ကတိၤဒိ ၁၇:၁၇) ပကဘၣ်မၤမုာ်ထီၣ်က့ၤ ပှၤလၢအသူၣ်အုးသးအုးတဖၣ် တုၤလၢအသးမုာ်ထီၣ်က့ၤတစုလီၤ.—ဖး ၁ သ့းစၤလနံ ၃:၇ တက့ၢ်.
၁၈ ထီဘိန့ၣ်သ့ၣ်နီၣ်ထီၣ်လၢ အဝဲသ့ၣ်အသူၣ်အုးသးအုးအဃိ အဝဲသ့ၣ်အသးလီၤညီမးလီၤ. အဒိ, ဘၣ်သ့ၣ်သ့ၣ် ဖဲအဝဲသ့ၣ်ဖျီသးအနံၤဆၢက့ၤအမုၢ်နံၤအဆၢကတီၢ်မ့ၢ်ဂ့ၤ, နၢ်ဟူဘၣ်တၢ်သးဝံၣ်တယုၢ်ယုၢ်မ့ၢ်ဂ့ၤ, ထံၣ်ဘၣ်တၢ်ဂီၤတဖၣ်မ့ၢ်ဂ့ၤ, မၤတၢ်တမံၤမံၤအဆၢကတီၢ်မ့ၢ်ဂ့ၤ, တၢ်နၢတခါခါမ့ၢ်ဂ့ၤ, တၢ်သီၣ်တမံၤမံၤ မ့တမ့ၢ် ကလံၤသီၣ်ဂီၤ ဆီတလဲအဆၢကတီၢ်မ့ၢ်ဂ့ၤ အဝဲသ့ၣ်အသးလီၤသ့ဝဲလီၤ. ပှၤလၢအသးသမူတံၤသကိး သံသဒၣ်အီၤသီသီတဂၤ ဖဲလဲၤထီၣ်တၢ်အိၣ်ဖှိၣ်ဖးဒိၣ် မ့တမ့ၢ် လဲၤထီၣ်တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး အဆိကတၢၢ်တဘျီအခါ အဝဲကသူၣ်အုးသးအုးဒိၣ်မးလီၤ. ဒီပုၢ်ဝဲၢ်တဂၤတဲဝဲ “ယသ့ၣ်ညါ မ့ၢ်တုၤလၢယဖျီသးအနံၤဆၢက့ၤမုၢ်နံၤ မ့တမ့ၢ် ယမါသံအမုၢ်နံၤန့ၣ် ကကီလၢယဂီၢ်ဖးဒိၣ်ညါ. ဘၣ်ဆၣ် မ့ၢ်လၢဒီပုၢ်ဝဲၢ်မုၣ်ဒီပုၢ်ဝဲၢ်ခွါတနီၤ ရဲၣ်ကျဲၤဝဲ တၢ်အီၣ်သကိးအီသကိးတၢ် ဒီးတံၤသကိးတဖၣ်အဃိ ယတတူၢ်ဘၣ်လၢ ယအိၣ်သယုၢ်သညိလၢၤဘၣ်.”
၁၉ ထီဘိန့ၣ်သ့ၣ်နီၣ်ထီၣ်လၢ ပှၤလၢအသူၣ်အုးသးအုးတဖၣ် တလိၣ်ဘၣ်တၢ်ဟ့ၣ်ဂံၢ်ဟ့ၣ်ဘါထဲ မုၢ်နံၤလၢအရ့ဒိၣ်လၢ အဝဲသ့ၣ်အဂီၢ်န့ၣ်ဘၣ်. ကၠူနံယါ တဲဝဲ “တဘျီတခီၣ် မ့တမ့ၢ်မုၢ်နံၤလၢ အလီၤဆီဘၣ်သနာ်က့ ပှၤမ့ၢ်ရ့ဒီးယၤဒီး မၤစၢၤယၤန့ၣ် ကဲဘျုးလၢယဂီၢ်ဒိၣ်မးလီၤ. ဖဲန့ၣ်အခါ မ့ၢ်တၢ်ဆၢကတီၢ်လၢ အလုၢ်ဒိၣ်ပှ့ၤဒိၣ်ဒီး မၤမုာ်ထီၣ်က့ၤယၤနီၢ်နီၢ်လီၤ.” ပမၤလီၤမၢ်ကွံာ် အဝဲသ့ၣ်အတၢ်သူၣ်အုးသးအုး ဒီးအတၢ်သယုၢ်သညိတဖၣ်တသ့ဘၣ် ဘၣ်ဆၣ် ပမၤမုာ်ထီၣ်က့ၤ အဝဲသ့ၣ်သ့ခီဖျိ ပမၤန့ၢ်တၢ်တမံၤမံၤလၢ အဝဲသ့ၣ်အဂီၢ်န့ၣ်လီၤ. (၁ ယိၤဟၣ် ၃:၁၈) ကဲဘံၤ တဲဝဲ “ဖဲယထံၣ်ဘၣ် တၢ်သူၣ်အုးသးအုးအဆၢကတီၢ် တၢ်အိၣ်ဖှိၣ်သးပှၢ်လၢအိၣ်ဒီး တၢ်အဲၣ်တၢ်ကွံတဖၣ် မၤစၢၤယၤအဃိ ယစံးဘျုးယဟိဝၤယွၤ ဒိၣ်မးလီၤ. ဒီးယတူၢ်ဘၣ် ယဟိဝၤယွၤအတၢ်ကဟုကယာ်လၢ အပှဲၤဒီးတၢ်အဲၣ်တၢ်ကွံန့ၣ်လီၤ.”
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
“ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်”
၁၈ တဘျီတခီၣ် ပဒီပုၢ်ဝဲၢ်မုၣ်ခွါတဂၤဂၤ မ့ၢ်မၤသးထီၣ်ပှၤန့ၣ် ပကဘၣ် လဲၤတဲသကီးတၢ်ဒီးအီၤ. သနာ်က့ အဆိကတၢၢ်န့ၣ် ပကဘၣ် သံကွၢ်လီၤပသးလၢ ‘ယသ့ၣ်ညါ တၢ်ဂ့ၢ်တၢ်ကျိၤ ခဲလၢာ်ဧါ.’ (ကတိၤဒိ ၁၈:၁၃) ‘ယမ့ၢ်ဆိမိၣ်လၢ အမၤသးထီၣ်ယၤနာ်က့ ဘၣ်သ့ၣ်သ့ၣ် အတပာ်လီၤသးလၢ အကမၤယၤဒ်န့ၣ်ဘၣ်ဟီဧါ.’ (စံၣ်တဲၤတဲလီၤတၢ် ၇:၂၀) ‘ယမၤသးထီၣ်ဘၣ် ပှၤဂၤဒ်န့ၣ် ကၠ့ၤဧါ.’ (စံၣ်တဲၤတဲလီၤတၢ် ၇:၂၁, ၂၂) ‘ယမ့ၢ်လဲၤတဲတၢ်ဒီးအီၤန့ၣ် မ့ၢ်ယကမၤအါထီၣ် တၢ်ဂ့ၢ်ကီဧါ.’ (ဖး ကတိၤဒိ ၂၆:၂၀.) ပမ့ၢ်ဆိမိၣ်ထံ တၢ်သံကွၢ်တဖၣ်အံၤန့ၣ် ကမၤစၢၤပှၤလၢ ပကအဲၣ် ပဒီပုၢ်ဝဲၢ်မုၣ်ခွါ ဒီးကွၢ်ကပာ်ကွံာ် အတၢ်ကမၣ်.
ဘၣ်ဃးဒီးတၢ်ခူၣ်လီၤပှၤသံန့ၣ် ယဟိဝၤပှၤအုၣ်အသးတဖၣ် ထံၣ်ဝဲဒ်လဲၣ်
ပတၢ်ထံၣ်ဘၣ်ဃးဒီး တၢ်ခူၣ်လီၤပှၤသံလၢဘၣ်တၢ်ပာ်ဖျါထီၣ်အီၤလၢလာ်အံၤန့ၣ် ဒိးသန့ၤထီၣ်အသးလၢ လံာ်စီဆှံအတၢ်သိၣ်တၢ်သီလီၤ.
ဖဲပှၤလၢပအဲၣ်ဘၣ်တဂၤသံအခါ ပသူၣ်အုးသးအုးလီၤ. ယ့ၣ်ၡူးအပျဲၢ်အဘီၣ်တဖၣ်စ့ၢ်ကီး သူၣ်အုးသးအုးဝဲဖဲပှၤလၢ အဝဲသ့ၣ်အဲၣ်ဘၣ်ဝဲတဖၣ်သံဝဲအခါလီၤ. (ယိၤဟၣ် ၁၁:၃၃-၃၅, ၃၈; မၤတၢ် ၈:၂; ၉:၃၉) ဘၣ်ဃးဒီးတၢ်ခူၣ်လီၤပှၤသံန့ၣ် ပတမၤအီၤဒ်ပှၤတနီၤ မၤဝဲမူးဧိၤပွဲဧိၤလၢ အပၣ်ဃုာ်ဒီးတၢ်အီလုၣ်ကိသံးဧိၤဂာ်ဧိၤအသိးဘၣ်. (စံၣ်တဲၤတဲလီၤတၢ် ၃:၁, ၄; ၇:၁-၄) လၢတၢ်န့ၣ်အလီၢ် တၢ်ခူၣ်လီၤပှၤသံန့ၣ် ပထံၣ်အီၤဒ်အမ့ၢ်တၢ်ဆၢကတီၢ်လၢ ပကပာ်ဖျါထီၣ်ပတၢ်ဒိသူၣ်ဒိသးလၢ ပှၤဂၤအဖီခိၣ်လီၤ.—ရိမ့ၤ ၁၂:၁၅.
ပှၤသံန့ၣ်တသ့ၣ်ညါတၢ်နီတမံၤလၢၤဘၣ်. ပကလုာ်ဒူၣ်ဒီးတၢ်ဆဲးတၢ်လၤအိၣ်ဒ်လဲၣ်ဂ့ၤဒ်လဲၣ်ဂ့ၤ သနာ်က့ ပဟးဆှဲးလုၢ်လၢ်ဒီးတၢ်စူၢ်တၢ်နာ်တဖၣ်လၢ အတလီၤပလိာ်အသးဒီးလံာ်စီဆှံလီၤ. အဒိ ပှၤတနီၤနာ်ဝဲလၢ ပှၤသံန့ၣ်အကလၤအိၣ်ဝဲဒီး မၤစၢၤ မ့တမ့ၢ် မၤဘၣ်ဒိပှၤလၢအမူဒံးသ့ဝဲန့ၣ်လီၤ. (စံၣ်တဲၤတဲလီၤတၢ် ၉:၅, ၆, ၁၀) လၢတၢ်န့ၣ်အဃိ အဝဲသ့ၣ်အိၣ်ဒီးလုၢ်လၢ်သ့ၣ်တဖၣ် ဒ်သိးဒီး တၢ်ဆိးသီပှၤသံလုၢ်လၢ်, တၢ်သ့ၣ်နီၣ်ဆၢက့ၤပှၤသံအမုၢ်နံၤ, တၢ်လုၢ်တၢ်ပာ်လၢ ပှၤသံအဂီၢ်, တဲတၢ်ဒီးပှၤသံ ဒီးမူးပွဲလီၤဆီလၢ မုၣ်ကမဲအဂီၢ်န့ၣ်လီၤ. ပဟးဆှဲးလုၢ်လၢ်ဒီး တၢ်နာ်တဖၣ်အံၤခဲလၢာ်လီၤ. မ့ၢ်လၢပဒိကနၣ်ဒီးလူၤပိာ်ထွဲ လံာ်စီဆှံအတၢ်မၤလိာ်လၢအစံးဝဲ– “အိၣ်လီၤဆီတက့ၢ်. ဒီးထိးဘၣ်တၢ်တကဆှီဘၣ်န့ၣ်တဂ့ၤ.”—၂ ကရံၣ်သူး ၆:၁၇.
လၢပှၤသံတဖၣ်အဂီၢ်န့ၣ် တၢ်မုၢ်လၢ်အိၣ်ဝဲ. လံာ်စီဆှံသိၣ်လိဝဲလၢ တၢ်ဆၢကတီၢ်ကအိၣ်ဝဲလၢ ပှၤသံတဖၣ်ကဂဲၤဆၢထၢၣ်သမူထီၣ်က့ၤ ဒီးတၢ်သံတအိၣ်လၢၤဘၣ်. (မၤတၢ် ၂၄:၁၅; လီၣ်ဖျါ ၂၁:၄) တၢ်မုၢ်လၢ်အံၤ မၤစၢၤပှၤဒ်သိးပသုတသူၣ်အုးသးအုး အါတလၢတဂ့ၤအဂီၢ်လီၤ. တၢ်မုၢ်လၢ်အံၤ မၤမုာ်ထီၣ်က့ၤ ခရံာ်ဖိလၢညါတဖၣ်အသးလီၤ.—၁ သ့းစၤလနံ ၄:၁၃.
လံာ်စီဆှံပာ်ဖျါထီၣ်ဝဲလၢ ပဘၣ်အိၣ်ဒီးတၢ်ဆီၣ်လီၤသး. (ကတိၤဒိ ၁၁:၂) ပတမၤဘူၣ်ဧိၤပွဲဧိၤလၢ ပှၤသံအဂီၢ် ဒ်သိးပက “ပာ်ကဖၢလၢပသး” ဘၣ်. (၁ ယိၤဟၣ် ၂:၁၆, ခ့ခါစှီၤကျိာ်) လၢပှၤသံအဂီၢ်န့ၣ် ပတရဲၣ်ကျဲၤဝဲဘူၣ်ဧိၤပွဲဧိၤလၢ အလီၤဘီလီၤမုၢ်လၢအလၢာ်ကျိၣ်ဧိၤစ့ဧိၤအါအါဂီၢ်ဂီၢ် ဒီးပၣ်ဃုာ်ဒီး တၢ်မၤမုာ်မၤပၠီၣ်သးဘၣ်. ဒီးပတပှ့ၤပှၤသံအတလါလၢ အပှ့ၤဒိၣ်တလၢဒီးဖျါကပြုၢ်ကပြီၤ ဒ်သိးပှၤလၢအဟဲလၢတၢ်သံအမူးန့ၣ် ကပတြၢၤပှၤအဂီၢ်ဘၣ်.
ဘၣ်ဃးဒီးတၢ်ခူၣ်လီၤပှၤသံန့ၣ် ပတမၢဆူၣ်ပှၤဂၤလၢ ကနာ်ဝဲ မ့တမ့ၢ် ကမၤဝဲဒ်သိးဒီးပှၤဘၣ်. ပလူၤပိာ်ထွဲဝဲလံာ်စီဆှံအတၢ်ဟံးစုနဲၣ်ကျဲလၢအစံးဝဲ-“ပဘၣ်ဟ့ၣ်တၢ်စံးဆၢလၢ ယွၤလၢပကစၢ်ဒၣ်ပဝဲအဂ့ၢ်ကိးဂၤဒဲးလီၤ.” (ရိမ့ၤ ၁၄:၁၂) ကလီးစဲ ၄:၆ တဲဝဲလၢ- “မ်သုကလုၢ်ကထါအိၣ်ဒီးတၢ်ဘျုးတၢ်ဖှိၣ်ဒီး ဟီဒီးအံသၣ်တဘိယူၢ်ဃီတက့ၢ်.” အဃိ ပမ့ၢ်အိၣ်ဒီးတၢ်ခွဲးတၢ်ယာ်န့ၣ် ပကဂုာ်ကျဲးစၢးတဲနၢ်ပၢ်ပှၤဂၤ ဘၣ်ဃးဒီးပတၢ်စူၢ်တၢ်နာ်လၢ တၢ်ဆီၣ်လီၤသးဒီး တၢ်ယူးယီၣ်ပာ်ကဲအပူၤန့ၣ်လီၤ.
တၢ်ခူၣ်လီၤပှၤသံန့ၣ် ယဟိဝၤပှၤအုၣ်အသးတဖၣ်မၤဝဲဒ်လဲၣ်
တၢ်လီၢ်တၢ်ကျဲ- ဘၣ်ဃးဒီးတၢ်လီၢ်လၢ ပှၤကဟ့ၣ်တၢ်စံၣ်တဲၤတဲလီၤတၢ်လၢ ပှၤသံတဂၤအဂီၢ်န့ၣ် ပှၤသံအဟံၣ်ဖိဃီဖိဃုထၢဝဲ တၢ်လီၢ်တတီၤတီၤဒ်သိးဒီး ဘီမုၢ်ဘျီၣ်ဒိၣ်, တၢ်ခူၣ်လီၤပှၤသံအဒၢး, ပှၤတဂၤဂၤအဟံၣ်, လၢပှၤကုၢ်ပှၤသံအလီၢ် မ့တမ့ၢ် လၢတၢ်သွၣ်ခိၣ်အကပၤသ့ဝဲလီၤ.
တၢ်ခူၣ်လီၤပှၤသံအတၢ်ရဲၣ်တၢ်ကျဲၤ- ပှၤလၢအဟ့ၣ်တၢ်စံၣ်တဲၤတဲလီၤတၢ်တဂၤန့ၣ် ကတဲဖျါထီၣ်ဝဲဘၣ်ဃးဒီး တၢ်သံဒီးတၢ်မုၢ်လၢ်လၢ တၢ်ဂဲၤဆၢထၢၣ်သမူထီၣ်က့ၤအဂ့ၢ် လၢအအိၣ်လၢလံာ်စီဆှံအပူၤလီၤ. (ယိၤဟၣ် ၁၁:၂၅; ရိမ့ၤ ၅:၁၂; ၂ ပ့းတရူး ၃:၁၃) ပှၤလၢအဟ့ၣ်တၢ်စံၣ်တဲၤတဲလီၤတၢ်တဂၤန့ၣ် ကပာ်ဖျါထီၣ်စ့ၢ်ကီးဝဲ ပှၤလၢအသံတဂၤ အတၢ်ဂ့ၤတၢ်ဝါတဖၣ်လီၤ. အဒိ ကတဲဖျါထီၣ်ဝဲပှၤလၢအသံတဂၤ အဒိအတဲာ်လၢအဂ့ၤဒ်သိး ကဟ့ၣ်ဂံၢ်ဟ့ၣ်ဘါပှၤဂၤတဖၣ်အဂီၢ်လီၤ.—၂ ၡမူၤအ့လး ၁:၁၇-၂၇.
ဒီးပှၤကသးဝံၣ်တၢ်သးဝံၣ်လၢ အဒိးသန့ၤထီၣ်အသးဒီးလံာ်စီဆှံန့ၣ်လီၤ. (ကလီးစဲ ၃:၁၆) တၢ်ခူၣ်လီၤပှၤသံအတၢ်ရဲၣ်တၢ်ကျဲၤ ကဘၣ်တၢ်မၤကျၢၢ်တံၢ်အီၤလၢ တၢ်ထုကဖၣ်န့ၣ်လီၤ.—ဖံလံးပံၤ ၄:၆, ၇.
ဃ့တၢ်ဘူးတၢ်လဲ မ့တမ့ၢ် ဟးထၢစ့- ဖဲပမၤတၢ်ခူၣ်လီၤပှၤသံ မ့တမ့ၢ် ပတၢ်ဘူၣ်တၢ်ဘါအတၢ်ရဲၣ်တၢ်ကျဲၤ တခါဂ့ၤတခါဂ့ၤအဆၢကတီၢ်, ပတဃ့စ့လၢတၢ်အိၣ်ဖှိၣ်ဖိအအိၣ် ဒီးပတဟးထၢစ့လၢ ပတၢ်အိၣ်ဖှိၣ်အပူၤဘၣ်.—မးသဲ ၁၀:၈.
ပှၤတမှံၤတဖၣ်- ပှၤလၢအတမ့ၢ် ယဟိဝၤပှၤအုၣ်အသးတဖၣ်ဒၣ်လဲာ် ဟဲထီၣ်ဒိကနၣ်ဝဲ တၢ်ဟ့ၣ်တၢ်စံၣ်တဲၤတဲလီၤတၢ်လၢ ဘီမုၢ်ဘျီၣ်ဒိၣ်အပူၤသ့ဝဲလီၤ. ဒ်ပတၢ်အိၣ်ဖှိၣ်ရိဖှိၣ်အဂၤတဖၣ်အသိး ဖဲပမၤတၢ်ခူၣ်လီၤပှၤသံအတၢ်ရဲၣ်တၢ်ကျဲၤအခါ ပှၤကိးဂၤဒဲးဟဲထီၣ်သ့ဝဲလီၤ.
တၢ်ဘူၣ်တၢ်ဘါအဂၤတဖၣ် မ့ၢ်မၤတၢ်ခူၣ်လီၤပှၤသံတၢ်ရဲၣ်တၢ်ကျဲၤန့ၣ် မ့ၢ်ယဟိဝၤပှၤအုၣ်အသးတဖၣ်လဲၤဝဲဧါ
ယဟိဝၤပှၤအုၣ်အသးတဂၤစုာ်စုာ် ကဘၣ်ဆၢတဲာ်တၢ်လၢ အနီၢ်ကစၢ်ဒၣ်ဝဲ ဒ်အသးလၢအသ့ၣ်ညါဒၣ်တၢ် ဟံးစုနဲၣ်ကျဲၤအီၤအသိးန့ၣ်လီၤ. (၁ တံၤမသ့း ၁:၁၉) ဘၣ်ဆၣ်သနာ်က့ တၢ်ဘူၣ်တၢ်ဘါအတၢ်ရဲၣ်တၢ်ကျဲၤလၢ အတလီၤပလိာ်လိာ်သးဒီးလံာ်စီဆှံအတၢ်သိၣ်တၢ်သီန့ၣ် ပတပၣ်ဃုာ်ဘၣ်.—၂ ကရံၣ်သူး ၆:၁၄-၁၇.
လါအီးကထိဘၢၣ် ၂၀-၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၉-၁၀
ဘၣ်ယိၣ်တၢ် ဘၣ်ဃးဒီး နတၢ်ကီတၢ်ခဲ အါတလၢတဂ့ၤ
ယဟိဝၤယွၤ မၤစၢၤနၤလၢ နလဲၤခီဖျိတၢ်ကီတၢ်ခဲကန့ၢ်
၄ လံာ်စီဆှံတဲဝဲလၢ “တၢ်အၢတၢ်သီ ဘၣ်ပှၤကိးဂၤဒဲး.” (စံၣ်တဲၤတဲလီၤတၢ် ၉:၁၁, Holy Bible—Easy-to-Read Version) တဘျီတခီၣ်န့ၣ် ပထံၣ်ဘၣ် တၢ်ကီတၢ်ခဲ ဒ်သိးဒီး “ပှၤကိးဂၤဒဲး” ထံၣ်ဘၣ်ဝဲ. (၁ ကရံၣ်သူး ၁၀:၁၃) ဒီးခီဖျိလၢ ပကဲယ့ၣ်ၡူးအပျဲၢ်အဘီၣ်အဃိ ပှၤမၤကီမၤခဲပှၤ. အဒိ ခီဖျိလၢ ပတၢ်စူၢ်တၢ်နာ် အဃိ ပှၤတဲအၢတဲသီပှၤ, ပှၤထီဒါပှၤ ဒီးမၤအၢမၤနးပှၤ. (၂ တံၤမသ့း ၃:၁၂) ဘၣ်ဆၣ် ပမ့ၢ်ထံၣ်ဘၣ် တၢ်ကီတၢ်ခဲ တမံၤဂ့ၤတမံၤဂ့ၤ နာ်က့ ယဟိဝၤယွၤ မၤစၢၤပှၤသ့. ဖဲစီၤယိၤသးထံၣ်ဘၣ် တၢ်ကီတၢ်ခဲအခါ ယဟိဝၤယွၤမၤစၢၤအီၤဒ်လဲၣ်.
ယဟိဝၤယွၤ ပာ်လုၢ်ပာ်ပှ့ၤအခ့အပှၤလၢ အအိၣ်ဒီးတၢ်ဆီၣ်လီၤသးတဖၣ်
၁၀ ပမ့ၢ်အိၣ်ဒီး တၢ်ဆီၣ်လီၤသးန့ၣ် ကညီလၢ ပတၢ်အိၣ်မူအဂီၢ် စ့ၢ်ကီးလီၤ. တဘျီတခီၣ် ပကထံၣ်ဘၣ် မ့တမ့ၢ် လဲၤခီဖျိဘၣ် တၢ်လၢပဆိကမိၣ်လၢ အတတီတလိၤဘၣ်န့ၣ်လီၤ. စီၤပၤၡလိၤမိၤ လၢအမ့ၢ် ပှၤကူၣ်တၢ်သ့တဂၤ တဲဝဲလၢ “ယထံၣ်တၢ်အခ့အပှၤ လၢကသ့ၣ်လိၤ, ဒီးပဒိၣ်ဖးဒိၣ် လဲၤတၢ်လၢအခီၣ် ဒ်တၢ်အခ့အပှၤအသိးန့ၣ်လီၤ.” (စံၣ်တဲၤတဲလီၤတၢ် ၁၀:၇) တဘျီတခီၣ် ပှၤလၢအအိၣ်ဒီး တၢ်သ့တၢ်ဘၣ်အါမးတဂၤန့ၣ် တဘၣ်တၢ်မၤလၤကပီၤအီၤဘၣ်. ဘၣ်ဆၣ် တဘျီတခီၣ် ပှၤလၢအတအိၣ်ဒီး တၢ်သ့တၢ်ဘၣ် အါအါတဖၣ်န့ၣ် ဘၣ်တၢ်မၤလၤကပီၤအီၤလီၤ. အဃိ စီၤၡလိၤမိၤသ့ၣ်ညါဝဲလၢ ပမ့ၢ်တူၢ်လိာ် တၢ်လၢအကဲထီၣ်အသးလၢ ပတၢ်အိၣ်မူအပူၤန့ၣ် မ့ၢ်တၢ်လၢအဂ့ၤ ဒိၣ်န့ၢ်ဒံး ပသူၣ်အုးသးအုးလၢ တၢ်သ့ၣ်တဖၣ်န့ၣ်အဃိဒံးလီၤ. (စံၣ်တဲၤတဲလီၤတၢ် ၆:၉) ပမ့ၢ်အိၣ်ဒီးတၢ်ဆီၣ်လီၤသးန့ၣ် ကညီလၢပကတူၢ်လိာ် တၢ်လၢအကဲထီၣ်အသးလၢ ပတၢ်အိၣ်မူအပူၤ လၢပတဘၣ်သူၣ်ဘၣ်သးအီၤတဖၣ်န့ၣ်လီၤ.
ဆိကမိၣ်ထံ ယဟိဝၤယွၤ အတၢ်အဲၣ်အထူအယိာ်
၄ ဖဲပကွၢ်ယဟိဝၤယွၤ အတၢ်ဘၣ်တ့တဖၣ်အခါ ပသ့ၣ်ညါဘၣ်လၢ ယဟိဝၤယွၤ အဲၣ်ပှၤဒိၣ်မးန့ၣ်လီၤ. (ရိမ့ၤ ၁:၂၀) အဒိ ယဟိဝၤယွၤ တ့လီၤဝဲဟီၣ်ခိၣ် ထဲပကအိၣ်မူဘၣ်လၢအပူၤ တမ့ၢ်ဘၣ်. ကစၢ်ဟ့ၣ်ပှၤ တၢ်လၢပလိၣ်ဘၣ်လၢ ပသးသမူအဂီၢ် ကိးမံၤဒဲးန့ၣ်လီၤ. ယဟိဝၤယွၤ ဟ့ၣ်ပှၤတၢ်အီၣ်တၢ်အီ အကလုာ်ကလုာ် လၢပကသူၣ်ဖှံသးညီအဂီၢ်လီၤ. (စံၣ်တဲၤတဲလီၤတၢ် ၉:၇) ဒီပုၢ်ဝဲၢ်မုၣ် ခဲးသရ့ အိၣ်ဒီးတၢ်သူၣ်ဖှံသးညီ ခီဖျိလၢအထံၣ်ဘၣ် ယွၤအတၢ်ဘၣ်တ့ လီၤဆီဒၣ်တၢ်ဖဲ တၢ်ယီၤထီၣ်သီလၢ ကီၢ်ခဲနဒၣ်အပူၤန့ၣ်လီၤ. အဝဲစံးဝဲလၢ– “အဆၢကတီၢ်ဝဲန့ၣ် မ့ၢ်တၢ်ဆၢကတီၢ်လၢ အဃံလၤဒိၣ်မးလီၤ. မ့ၢ်လၢဖီဖိတဖၣ် ဘိၣ်ထီၣ်ဖးထီၣ် ဒီးထိၣ်ဖိလံၣ်ဖိ လၢသုးလီၢ်သုးကျဲတဖၣ် ဟဲက့ၤကဒါက့ၤ လၢအလီၢ်အဃိလီၤ. ဒီးယထံၣ်ဘၣ် ထိၣ်ကနဲဖိ ဟဲအီၣ်အဆၣ်လၢ ယဟံၣ်ကပၤစ့ၢ်ကီးလီၤ. ပဒိးန့ၢ်ဘၣ် တၢ်သူၣ်ဖှံသးညီ မ့ၢ်လၢယဟိဝၤယွၤ အဲၣ်ပှၤအဃိန့ၣ်လီၤ.” ပပၢ်သးဘိ အဲၣ်ဝဲအတၢ်ဘၣ်တ့ ဒီးအဲၣ်ဒိးဝဲလၢ ပကဒိးန့ၢ်ဘၣ် တၢ်သူၣ်ဖှံသးညီ လၢအတၢ်ဘၣ်တ့တဖၣ် အဃိန့ၣ်လီၤ.—မၤတၢ် ၁၄:၁၆, ၁၇.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ကတိၤတၢ်ကတိၤ “အဂ့ၤလၢအမၤထီၣ်မၤထီတၢ်” တက့ၢ်
၁၁ တၢ်ဃဲၤပှၤမီၣ်လၢ အဘၣ်ဒိပှၤ, တၢ်ကတိၤခဲၣ်သူခဲၣ်ဂီၤ. ပှၤကညီတဖၣ် တဲပှၤဂၤအဂ့ၢ် မ့တမ့ၢ် ပှၤဂၤအတၢ်အိၣ်မူအဂ့ၢ်လီၤ. တၢ်တဲပှၤဂၤအဂ့ၢ်န့ၣ် ဘၣ်ဒိပှၤထီဘိဧါ. တၢ်တဲပှၤဂၤအဂ့ၢ်လၢအဂ့ၤ မ့တမ့ၢ် တၢ်ကစီၣ်လၢအဘျုးအိၣ်ဒ်သိးဒီး ပှၤဒိးဘျၢထံတယံာ်ဒံးဘၣ်တဂၤအဂ့ၢ် မ့တမ့ၢ် ပှၤလၢအလိၣ်ဘၣ် တၢ်ကတိၤဟ့ၣ်ဂံၢ်ဟ့ၣ်ဘါတဂၤအဂ့ၢ်န့ၣ် ပစံးလၢတဂ့ၤတသ့ဘၣ်. ခရံာ်ဖိလၢနံၣ်တၢကယၤအပူၤတဖၣ်န့ၣ် သးစဲလိာ်သးတဂၤဒီးတဂၤအဘျုးဒီး တဲလိာ်သကိးအသး တၢ်ဂ့ၢ်အကြၢးအဘၣ် လၢဘၣ်ဃး ပှၤစူၢ်တၢ်နာ်တၢ်ကဒဲကဒဲလီၤ. (အ့းဖ့းစူး ၆:၂၁, ၂၂; ကလီးစဲ ၄:၈, ၉) ဘၣ်ဆၣ် တၢ်ဃဲၤပှၤဂၤအဂ့ၢ်န့ၣ် ဘၣ်ဒိပှၤသ့ ဖဲတၢ်ကတိၤမ့ၢ်ဒၢက့ၣ် မ့တမ့ၢ် တဲဖျါပှၤဂၤအတၢ်ခူသူၣ်အဂ့ၢ်အခါန့ၣ်လီၤ. အၢန့ၢ်အန့ၣ်, တၢ်အံၤကဲထီၣ် တၢ်ကတိၤခဲၣ်သူခဲၣ်ဂီၤ လၢအမၤဟးဂီၤတၢ်သ့ထီဘိလီၤ. တၢ်ကတိၤခဲၣ်သူခဲၣ်ဂီၤန့ၣ်မ့ၢ် “တၢ်ကတိၤလၢ အဆှိးကမၣ်ပှၤ. . . လၢအကတိၤဟးဂီၤပှၤမံၤဒီး မၤဘၣ်ဒိပှၤဂၤအလၤကပီၤလီၤ.” အဒိ, ပှၤဖၤရံၤၡဲတဖၣ်, လၢတၢ်သးက့ၣ်အပူၤ သူဝဲတၢ်ကတိၤခဲၣ်သူခဲၣ်ဂီၤဒီး ကူၣ်ထီၣ်ဝဲလၢ ပှၤသုတနာ်ယ့ၣ်ၡူးအဂီၢ်န့ၣ်လီၤ. (မးသဲ ၉:၃၂-၃၄; ၁၂:၂၂-၂၄) တၢ်ကတိၤခၢၣ်သူခၢၣ်ဂီၤန့ၣ် ဒုးအိၣ်ထီၣ်တၢ်အ့ၣ်လိာ်ဆိးက့လီၤ.—ကတိၤဒိ ၂၆:၂၀.
၁၂ ပှၤလၢအသူ တၢ်သ့ကတိၤတၢ်အတၢ်ဟ့ၣ် လၢအကမၤဘၣ်ဒိပှၤဂၤ မ့တမ့ၢ် ကမၤလီၤဖးတၢ်န့ၣ် ယဟိဝၤတပာ်တၢ်အံၤလၢ တၢ်ဖှံဖှံညီညီဘၣ်. ကစၢ်သးဟ့ပှၤလၢ “အထိၣ်အ့ၣ်လိာ်ဆိးက့တၢ်လၢ ဒီပုၢ်ဝဲၢ်အကျါလီၤ.” (ကတိၤဒိ ၆:၁၆-၁၉) ကြံးခ်တၢ်ကတိၤလၢ ဘၣ်တၢ်ကွဲးကျိးအီၤလၢ “ပှၤကတိၤခၢၣ်သူ ခၢၣ်ဂီၤတၢ်” န့ၣ်မ့ၢ် ဒံၣ်အါဘိၣ်လိးစ် (dia’bolos), ဒီးကိးဝဲစၤတၣ်ဒ်န့ၣ်စ့ၢ်ကီးလီၤ. အဝဲမ့ၢ် “မုၣ်ကီၤလံၢ်”, ပှၤကတိၤခဲၣ်သူခဲၣ်ဂီၤ ယွၤလီၤ. (လီၣ်ဖျါ ၁၂:၉, ၁၀) လီၤတံၢ်လၢ ပကအဲၣ်ဒိးဟးဆှဲး တၢ်ကတိၤလၢ ကဒုးလီၤဂာ်ပှၤလၢ မုၣ်ကီၤလံၢ်လီၤ. တၢ်ကတိၤခဲၣ်သူခဲၣ်ဂီၤလၢ အထိၣ်ဂဲၤထီၣ် နီၢ်ခိတၢ်ဖံးတၢ်မၤဒ်သိး “တၢ်ဂ့ၢ်လိာ်ဘှီလိာ်” ဒီး “တၢ်လီၤမုၢ်လီၤဖး” န့ၣ်တၢ်တူၢ်လိာ်အီၤလၢ တၢ်အိၣ်ဖှိၣ်ပူၤတသ့ဘၣ်. (ကလၤတံ ၅:၁၉-၂၁) လၢတၢ်န့ၣ်အဃိ, တချုးနတဲပှၤတဂၤဂၤအဂ့ၢ်န့ၣ် သံကွၢ်လီၤက့ၤနသးလၢ ‘တၢ်အံၤမ့ၢ်ကစီဒီဧါ. မ့ၢ်တဲတၢ်အံၤန့ၣ် တၢ်သးကညီၤကအိၣ်ကစီဒီဧါ. တၢ်ကစီၣ်အံၤ လိၣ်လၢမ့တမ့ၢ် ကြၢးလၢကဘၣ်တဲအီၤကစီဒီဧါ.’—၁ သ့းစၤလနံ ၄:၁၁.
လါအီးကထိဘၢၣ် ၂၇–လါနိၣ်ဝ့ဘၢၣ် ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၁၁-၁၂
ကွၢ်ထွဲတၢ်အိၣ်ဆူၣ်အိၣ်ချ့ ဒီးအိၣ်သူၣ်ဖှံသးညီ
သိၣ်လိနဖိလၢ ယဟိဝၤယွၤ အတၢ်ဘၣ်တ့
၁၆ ဟံၣ်ဖိဃီဖိတဖၣ် မ့ၢ်ကွၢ်သကီး ယဟိဝၤယွၤ အတၢ်ဘၣ်တ့န့ၣ် အဝဲသ့ၣ် ကသးခု ဒီးအတၢ်ရ့လိာ်သး ကဂ့ၤဒိၣ်ထီၣ်. လံာ်စီဆှံ တဲဝဲလၢ “တၢ်ဆၢကတီၢ်လၢ ပှၤကနံၤအဂီၢ်” ဒီး “တၢ်ဆၢကတီၢ်လၢ ပှၤကဂဲၤကလံၣ်အဂီၢ်” အိၣ်ဝဲ. (စံၣ်တဲၤတဲလီၤတၢ် ၃:၁, ၄) လၢဟီၣ်ခိၣ်ချၢန့ၣ် ယဟိဝၤယွၤ တ့လီၤန့ၢ်ပှၤ တၢ်လီၢ်ဃံလၤဒီဒူၣ်. အဃိ ပဘၣ်သးလဲၤဖဲလဲၣ်န့ၣ် ပလဲၤသ့. အဒိ ဟံၣ်ဖိဃီဖိတနီၤန့ၣ် လဲၤဟးမုာ်လၢ ပှၢ်ကျါ, လဲၤဟးလၢသဝီ, လဲၤဟးထီၣ်ကစၢၢ် ဒီးတနီၤန့ၣ် လဲၤဟးမုာ်လၢပီၣ်လဲၣ်နံၤ. ဒီးဖိသၣ်တနီၤန့ၣ် ကၠံၣ်လိၣ်ကွဲ လၢဖီကရၢၢ်, ကွၢ်ကီဆၣ်ဖိကီၢ်ဖိ, ပီၢ်ထံလၢထံကျိ, လၢနိၣ်ပူၤ ဒီးလၢပီၣ်လဲၣ်ပူၤ မုာ်မး. ပမ့ၢ်ဟးလိၣ်ကွဲ ဒီးကွၢ်ကီ ကစၢ်ယွၤ အတၢ်ဘၣ်တ့န့ၣ် ပကသးခု.
ပာ်လုၢ်ပာ်ပှ့ၤသးသမူ လၢကစၢ်ယွၤဟ့ၣ်ပှၤ
၆ လံာ်စီဆှံန့ၣ် အတကဲ တၢ်အိၣ်ဆူၣ်အိၣ်ချ့အလံာ် ဒီးအတတဲပှၤလၢ ပကဘၣ်အီၣ်မနုၤလဲၣ် ဒီးအီၣ်တၢ်အါထဲလဲၣ်ဘၣ်. ဘၣ်ဆၣ် အပာ်ဖျါန့ၢ်ပှၤ ယဟိဝၤယွၤ အတၢ်ထံၣ် ဘၣ်ဃးဒီး တၢ်အိၣ်ဆူၣ်အိၣ်ချ့ ဒီးတၢ်အီၣ်တၢ်အီ. အဒိ ယဟိဝၤယွၤ ဟ့ၣ်ပလီၢ်ပှၤ ဘၣ်ဃးဒီး “တၢ်လၢ အကမၤဘၣ်ဒိ” ပတၢ်အိၣ်ဆူၣ်အိၣ်ချ့. (စံၣ်တဲၤတဲလီၤတၢ် ၁၁:၁၀) လံာ်စီဆှံ တဲဝဲလၢ ပတဘၣ်အီၣ်တၢ် အါတလၢ ဒီးပတဘၣ်အီသံး အါတလၢဘၣ်. ပမ့ၢ်အီၣ်တၢ်အါတလၢ ဒီးအီသံးအါတလၢန့ၣ် အကမၤဘၣ်ဒိ ပတၢ်အိၣ်ဆူၣ်အိၣ်ချ့ ဒီးပသံသ့. (ကတိၤဒိ ၂၃:၂၀) အဃိ ပကအီၣ်ကအီ မနုၤလဲၣ် ဒီးပကအီၣ်ကအီအီၤ ထဲလဲၣ်န့ၣ် ယဟိဝၤယွၤ ဘၣ်သးလၢ ပကဆိမိၣ်ထံတၢ် လီၤတံၢ်လီၤဆဲး ဒီးပၢၤပသး.—၁ ကရံၣ်သူး ၆:၁၂; ၉:၂၅.
၇ တချုးပဆၢတဲာ်တၢ် တမံၤမံၤဒံးဘၣ်န့ၣ် ပကဘၣ် ဆိမိၣ်ထံတၢ် မူာ်မူာ်နီၢ်နီၢ်. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်လၢအမ့ၢ် သးသမူ. (စံးထီၣ်ပတြၢၤ ၁၁၉:၉၉, ၁၀၀; ဖး ကတိၤဒိ ၂:၁၁.) အဒိ ပကအီၣ်မနုၤလဲၣ်န့ၣ် ပကဆိမိၣ်ထံအီၤ လီၤတံၢ်လီၤဆဲး. ဒီးတၢ်အီၣ် တခါခါ မ့ၢ်တတဲးဒီးပှၤဘၣ်န့ၣ် ပသ့ၣ်ညါလၢ ပတဘၣ် အီၣ်အီၤဘၣ်. တကးဒံးဘၣ် ပမ့ၢ်မံဘျဲဘျဲ, ကျဲးစၢးမၤ နီၢ်ခိတၢ်ဟူးတၢ်ဂဲၤ, အိၣ်ကဆှဲကဆှီ ဒီးမၤကဆှဲကဆှီဟံၣ် ထီဘိန့ၣ် ပပာ်ဖျါထီၣ်လၢ ပကဲပှၤလၢ အဆိကမိၣ် ပဲာ်ထံနီၤဖးတၢ်သ့.
“ကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါ”
၂ ခီဖျိလၢ ပဘူၣ်ထီၣ်ဘါထီၣ် ယဟိဝၤယွၤအဃိ ပသးခု. ဘၣ်မနုၤအဃိ ပတဲဒ်န့ၣ်လဲၣ်. ပသးခု ခီဖျိလၢ တၢ်ဂ့ၢ်အါမံၤအဃိ. ဒီးတၢ်ဂ့ၢ်အရ့ဒိၣ် တခါန့ၣ်မ့ၢ်ဝဲ ပဖးလံာ်စီဆှံ ကိးနံၤဒဲး ဒီးဂုာ်ကျဲးစၢး မၤထွဲ တၢ်ဂ့ၢ်လၢ ပမၤလိဘၣ်.—ဖး ယၤကိာ် ၁:၂၂-၂၅.
၃ ပမ့ၢ် “ကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါ” န့ၣ် ကကဲဘျုးလၢ ပဂီၢ်အါမး. အဒိ ပမ့ၢ်အိၣ်မူမၤထွဲ ကစၢ်ယွၤ အတၢ်မၤလိာ် လၢပမၤလိဘၣ်န့ၣ် မ့ၢ်ဝဲ ပမၤသးခု ယဟိဝၤယွၤအသး ဒီးပကသးခုစ့ၢ်ကီး. (စံၣ် ၁၂:၁၃) ဖဲပမၤထွဲ ကစၢ်ယွၤ အတၢ်ဟံးစုနဲၣ်ကျဲအခါ ပတၢ်ရ့လိာ်သးဒီး ပဟံၣ်ဖိဃီဖိ ဒီးပဒီပုၢ်ဝဲၢ်မုၣ်ခွါ ဂ့ၤဒိၣ်ထီၣ်. ပမၤဒ်အံၤအဃိ ပဒိးန့ၢ်ဘၣ် အဘျုးနီၢ်ကီၢ်. ဒီးခီဖျိလၢ ပဒိကနၣ် ဒီးမၤထွဲ ကစၢ်ယွၤ အတၢ်သိၣ်တၢ်သီအဃိ ပတထံၣ်ဘၣ် တၢ်ကီတၢ်ခဲအါအါ ဒ်သိးဒီး ပှၤလၢတဒိကနၣ် ယဟိဝၤယွၤ အတၢ်သိၣ်တၢ်သီတဖၣ် ထံၣ်ဘၣ်ဝဲဘၣ်. စီၤဒၤဝံး တဲဝဲလၢ ယဟိဝၤယွၤ အတၢ်သိၣ်တၢ်သီ, အတၢ်ဘျၢ ဒီးအတၢ်စံၣ်ညီၣ်တဖၣ်န့ၣ် တီဝဲလိၤဝဲ ဒီးအတဲစ့ၢ်ကီးဝဲလၢ “ပှၤလၢ အမၤထွဲဝဲန့ၣ် ဒိးန့ၢ်ဘၣ်အဘျုး အါမး.” (စံး ၁၉:၇-၁၁) တၢ်လၢစီၤဒၤဝံး တဲဝဲန့ၣ် အဘၣ်သပှၢ်တၢၢ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
လံာ်စီဆှံန့ၣ် နနာ်အီၤသ့ဧါ
လၢလံာ်စီဆှံပူၤန့ၣ် အိၣ်ဒီး “တၢ်ကတိၤ အမ့ၢ်အတီ လၢအဘၣ်လီၤတံၢ်လီၤဆဲး” လီၤ. (စံၣ်တဲၤတဲလီၤတၢ် ၁၂:၁၀) လံာ်စီဆှံပာ်ဖျါထီၣ်ဝဲ တၢ်ကဲထီၣ်အသး အနီၢ်ကီၢ် ဒီးပှၤလၢ လံာ်စီဆှံပာ်ဖျါထီၣ်ဝဲ အဂ့ၢ်တဖၣ်န့ၣ် လၢညါ အဝဲသ့ၣ်အိၣ်မူနီၢ်ကီၢ်လီၤ. (ဖး လူၤကၣ် ၁:၃; ၃:၁, ၂.) ပှၤလၢအဃုသ့ၣ်ညါ တၢ်စံၣ်စိၤတဲစိၤ ဒီးပှၤလၢအဃုသ့ၣ်ညါ တၢ်ဖိတၢ်လံၤလၢပျၢၤ အါဂၤန့ၣ် အဝဲသ့ၣ် ပာ်ဂၢၢ်ပာ်ကျၢၤဝဲလၢ မုၢ်နံၤမုၢ်သီလၢအရ့ဒိၣ်, ပှၤကညီ, တၢ်လီၢ်တၢ်ကျဲတဖၣ် ဒီးတၢ်မၤအသး လၢလံာ်စီဆှံပူၤန့ၣ် မ့ၢ်ဝဲတၢ်နီၢ်ကီၢ်လီၤ.