ပှၤဖးလံာ်ဖိတဖၣ် အတၢ်သံကွၢ်
တၢ်မၢဖိပီလူး အတၢ်ကတိၤဖဲ ၁ ကရံၣ်သူး ၁၅:၂၉ အပူၤန့ၣ် ပာ်ဖျါထီၣ်ဝဲလၢ ခရံာ်ဖိလၢအစိၤတနီၤန့ၣ် ဒိးဘျၢထံလၢပှၤသံတဖၣ်အဂီၢ်ဧါ
▪ တအဲၣ်ဒိးတဲဝဲဒ်န့ၣ်ဘၣ်. လၢလံာ်စီဆှံအပူၤမ့ၢ်ဂ့ၤ, လၢတၢ်စံၣ်တဲၤတဲစိၤအပူၤမ့ၢ်ဂ့ၤ ပတထံၣ်ဘၣ်လၢ ခရံာ်ဖိတဖၣ်ဒိးဘျၢထံလၢပှၤသံအဂီၢ်ဘၣ်.
ခီဖျိလၢလံာ်စီဆှံအါဘ့ၣ် အတၢ်ကွဲးကျိာ်ထံအဃိ ပှၤတနီၤဆိကမိၣ်ကမၣ်ဝဲလၢ ဖဲစီၤပီလူးအစိၤန့ၣ် ပှၤတနီၤဒိးဘျၢထံလၢပှၤသံအဂီၢ်လီၤ. အဒိ လံာ်စီဆှံ မ့ၤစံၣ် တဲဝဲလၢ “ပှၤသံတဖၣ် မ့ၢ်တဂဲၤဆၢထၢၣ်ဘၣ်ဒီး, ပှၤလၢအဒိးဘျၢအသးလၢပှၤသံအဂီၢ်တဖၣ်န့ၣ် ကမၤဝဲဒ်လဲၣ်.”
ဘၣ်ဆၣ် ပှၤကူၣ်ဘၣ်ကူၣ်သ့လၢလံာ်စီဆှံတကပၤ လၢအမံၤမ့ၢ် Dr. Gregory Lockwood န့ၣ်တဲဝဲလၢ “လၢလံာ်စီဆှံအပူၤမ့ၢ်ဂ့ၤ, လၢတၢ်စံၣ်စိၤတဲစိၤအပူၤမ့ၢ်ဂ့ၤ, ပှၤတဂၤဂ့ၤတဂၤဂ့ၤ ဒိးဘျၢထံလၢပှၤသံအဂီၢ်န့ၣ် တၢ်အုၣ်အသးတအိၣ်ဘၣ်.” Professor Gordon D. Fee အိၣ်ဝဲဒီးတၢ်ထံၣ် ဒ်န့ၣ်စ့ၢ်ကီးလီၤ. အဝဲကွဲးဝဲလၢ “တၢ်အဒိလၢအဘၣ်ဃးဒီး ပှၤဒိးဘျၢထံလၢပှၤသံအဂီၢ်န့ၣ် တအိၣ်လၢလံာ်စီဆှံအပူၤ ဒီးတၢ်စံၣ်စိၤတဲစိၤအပူၤဘၣ်. ဒီးတကးဒံးဘၣ် လၢလံာ်တၢ်အၢၣ်လီၤအီလီၤအသီအပူၤန့ၣ် တတဲဖျါထီၣ်တၢ်ဂ့ၢ်အံၤနီတဘျီဘၣ်. ခရံာ်ဖိလၢညါတဖၣ်မ့ၢ်ဂ့ၤ, သရိာ်တဖၣ်မ့ၢ်ဂ့ၤ မၤဝဲဒ်န့ၣ်န့ၣ် တၢ်အုၣ်အသးတအိၣ်ဘၣ်.”
လံာ်စီဆှံတဲဝဲလၢ ယ့ၣ်ၡူးတဲအပျဲၢ်အဘီၣ်တဖၣ်လၢ “လဲၤဒုးကဲထီၣ် ပှၤကလုာ်တဖၣ် လၢယပျဲၢ်အဘီၣ်တက့ၢ်. ဒီးဒိးဘျၢအဝဲသ့ၣ် . . . သိၣ်လိအဝဲသ့ၣ်ဒ်သိး အကမၤထွဲတၢ်လၢ ယမၤလိာ်သု ခဲလၢာ်တက့ၢ်.” (မးသဲ ၂၈:၁၉, ၂၀) တချုးလၢ ပှၤတဂၤကဒိးဘျၢထံန့ၣ် အဝဲကဘၣ်မၤလိလံာ်စီဆှံ, ကဘၣ်နာ်တၢ်လၢအမၤလိဝဲ ဒီးကဘၣ်ဒိကနၣ်ယဟိဝၤယွၤဒီး အဖိခွါအကလုၢ်လီၤ. ပှၤလၢအသံဒီး အိၣ်လၢတၢ်သွၣ်ခိၣ်န့ၣ် မၤဝဲဒ်န့ၣ်တသ့ဘၣ်. ဒီးခရံာ်ဖိလၢအမူတဖၣ်န့ၣ် မၤန့ၢ်တၢ်လၢအဝဲသ့ၣ်အဂီၢ် ဒ်န့ၣ်အသိးတသ့စ့ၢ်ကီးဘၣ်.—စံၣ်တဲၤတဲလီၤတၢ် ၉:၅, ၁၀; ယိၤဟၣ် ၄:၁; ၁ ကရံၣ်သူး ၁:၁၄-၁၆.
မ့မ့ၢ်ဒ်န့ၣ်န့ၣ် စီၤပီလူးအဲၣ်ဒိးတဲတၢ်မနုၤလဲၣ်.
ပှၤကရံၣ်သူးဖိတနီၤန့ၣ်တဲဝဲလၢ တၢ်ဂဲၤဆၢထၢၣ်သမူထီၣ်က့ၤတအိၣ်ဘၣ်. (၁ ကရံၣ်သူး ၁၅:၁၂) စီၤပီလူးဂ့ၢ်လိာ်ဝဲဘၣ်ဃးဒီး တၢ်ထံၣ်အံၤလီၤ. စီၤပီလူးပာ်ဖျါထီၣ်ဝဲလၢ အ ‘ထံၣ်ဘၣ်ဒီးတၢ်သံကိးနံၤဒဲး’ လီၤ. ဘၣ်ဆၣ် အတသံဝဲဘၣ်. အဃိ အဝဲတဲဝဲလၢ အသးသမူန့ၣ်အိၣ်လၢ တၢ်လီၤဘၣ်ယိၣ်အပူၤ ကိးနံၤဒဲးသနာ်က့ အဝဲနာ်ဝဲလၢ အကဂဲၤဆၢထၢၣ်သမူထီၣ်က့ၤဒ် ပှၤနီၢ်သးဖိဒ်ယ့ၣ်ၡူးအသိးလီၤ.—၁ ကရံၣ်သူး ၁၅:၃၀-၃၂, ၄၂-၄၄.
ပှၤကရံၣ်သူးဖိတဖၣ် ကဘၣ်သ့ၣ်ညါဝဲလၢ ခရံာ်ဖိလၢအဘၣ်တၢ်ဒိးဖှူအီၤတဖၣ် ကထံၣ်ဘၣ်ဒီး တၢ်နးတၢ်ဖှီၣ်ဒီးတၢ်သံ တချုးလၢအဝဲသ့ၣ် ဂဲၤဆၢထၢၣ်သမူထီၣ်က့ၤဒံးဘၣ်န့ၣ်လီၤ. တၢ် “ဒိးဘျၢအသးလၢ ယ့ၣ်ၡူးခရံာ်အပူၤ” န့ၣ်ပၣ်ဃုာ်ဒီး တၢ် “ဒိးဘျၢပသးလၢ အတၢ်သံအပူၤ” လီၤ. (ရိမ့ၤ ၆:၃) အဃိ အဲၣ်ဒိးတဲဝဲလၢ ဒ်ယ့ၣ်ၡူးအသိး အဝဲသ့ၣ်ကထံၣ်ဘၣ်တၢ်မၤကွၢ်ဒီး သံဝံၤမး အဝဲသ့ၣ်ကဂဲၤဆၢထၢၣ်သမူထီၣ်က့ၤ လၢမူခိၣ်လီၤ.
ယ့ၣ်ၡူးဒိးဘျၢထံ ခံနံၣ်ဝံၤအလီၢ်ခံ အဝဲတဲဘၣ် အတၢ်မၢဖိခံဂၤလၢ “တၢ်ဒိးဘျၢထံလၢ ယဒိးဘျၢယသးန့ၣ် မ့ၢ်သုဒိးဘျၢသုသးကကဲစ့ၢ်ကီးဧါ.” (မၤတၢ် ၁၀:၃၈, ၃၉) ယ့ၣ်ၡူးတအဲၣ်ဒိး တဲဘၣ်ဃးဒီး အတၢ်ဒိးဘျၢထံဘၣ်. လၢတၢ်န့ၣ်အလီၢ် အဝဲအဲၣ်ဒိးတဲဝဲ ခီဖျိလၢအသးတီဒီးယဟိဝၤယွၤအဃိ အဝဲကထံၣ်ဘၣ်ဒီးတၢ်သံလီၤ. စီၤပီလူးကွဲးန့ၢ် ပှၤလၢအဘၣ်တၢ်ဒိးဖှူအီၤတဖၣ် ဒီးတဲဝဲလၢ “ဒ်သိးပကဒိးန့ၢ်ဘၣ် တၢ်လၤတၢ်ကပီၤ ဃုာ်ဒီးအီၤအဂီၢ် ပကဘၣ်တူၢ်ဆိ တၢ်နးတၢ်ဖှီၣ်ဃုာ်ဒီးအီၤလီၤ.” (ရိမ့ၤ ၈:၁၆, ၁၇; ၂ ကရံၣ်သူး ၄:၁၇) အဃိ အဝဲသ့ၣ်စ့ၢ်ကီးကဘၣ်သံဝံၤမး ကဂဲၤဆၢထၢၣ်သမူထီၣ်က့ၤလၢမူခိၣ်လီၤ.
နီၢ်နီၢ်န့ၣ် စီၤပီလူးအဲၣ်ဒိးတဲဝဲအခီပညီဒ်အံၤ “မ့တမ့ၢ်ဒ်န့ၣ်ဘၣ်န့ၣ် ပှၤလၢအဒိးဘျၢအသး ဒ်သိးကကဲထီၣ်ပှၤသံအဂီၢ်န့ၣ် ကမၤဝဲတၢ်မနုၤလဲၣ်. ဒီးပှၤသံတဖၣ် လ့ၤတက့ၤ မ့ၢ်တဂဲၤဆၢထၢၣ် သမူထီၣ်က့ၤဘၣ်န့ၣ် ဘၣ်မနုၤအဃိ ပှၤဒိးဘျၢအသး ဒ်သိးကကဲထီၣ် ပှၤသံအဂီၢ်လဲၣ်.”