တၢ်ဒိးဘျၢထံ—မ့ၢ်တၢ်လၢခရံာ်ဖိတဖၣ် ကဘၣ်မၤဝဲ
“တၢ်ဒိးဘျၢပသး အုၣ်က့ၤခီၣ်က့ၤစ့ၢ်ကီးပှၤ ခဲကနံၣ်အံၤ.”—၁ ပ့းတရူး ၃:၂၁.
၁, ၂. (က) ဖဲဖိတဖၣ် အဲၣ်ဒိးဒိးဘျၢထံအခါ မိၢ်ပၢ်တနီၤ တူၢ်ဘၣ်ဝဲဒ်လဲၣ်. (ခ) ပှၤလၢအဲၣ်ဒိးဒိးဘျၢထံတဖၣ်န့ၣ် ဘၣ်မနုၤအဃိ ပှၤကဘၣ်သံကွၢ်အီၤလၢ မ့ၢ်အဟ့ၣ်လုၢ်ထီၣ်အသးလၢ ယဟိဝၤယွၤအအိၣ်ဝံၤလံဧါန့ၣ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
မရံယၤ အမိၢ်အပၢ် ကွၢ်စိဝဲအီၤ ဖဲအဝဲဂဲၤဆၢထၢၣ် လၢပှၤကဒိးဘျၢထံတဖၣ်အကျါအခါလီၤ. ဒီးဖဲန့ၣ် ပှၤလၢအဟ့ၣ် တၢ်စံၣ်တဲၤတဲလီၤတၢ်တဂၤ သံကွၢ်ဝဲ တၢ်သံကွၢ်ခံဖျၢၣ် ဒီးမရံယၤ စံးဆၢက့ၤဝဲလၢ အကလုၢ်ဖးဒိၣ်လီၤ. တစိၢ်ဖိဒီး အဝဲဒိးဘျၢထံလီၤ.
၂ မ့ၢ်လၢ မရံယၤ ဟ့ၣ်လုၢ်ထီၣ်အသးလၢ ယဟိဝၤယွၤအအိၣ် ဒီးဒိးဘျၢထံအဃိ အမိၢ်အပၢ်သးခုဒိၣ်မးလီၤ. ဘၣ်ဆၣ် တချုးလၢ မရံယၤဒိးဘျၢထံဒံးဘၣ်အခါ အမိၢ်ဘၣ်ယိၣ်တၢ်လၢအဂီၢ်တစဲးဖိလီၤ. အမိၢ်ဆိကမိၣ်ဝဲလၢ ‘မရံယၤကဒိးဘျၢထံအဂီၢ် အညါဘီၣ်တလၢဧါ. တၢ်ဟ့ၣ်လုၢ်ထီၣ်သးလၢ ယဟိဝၤယွၤအအိၣ်ဒီးတၢ်ဒိးဘျၢထံ မ့ၢ်တၢ်လၢအရ့ဒိၣ်ထဲလဲၣ်န့ၣ် မ့ၢ် မရံယၤနၢ်ပၢၢ်ဝဲဧါ. ဒ်သိးအကဒိးဘျၢထံအဂီၢ် မ့ၢ်အဝဲလိၣ်ဘၣ်အါထီၣ်တၢ်ဆၢကတီၢ်ဒံးဧါ.’ ဖဲဖိတဖၣ် တဲဘၣ်အမိၢ်အပၢ်လၢ အဝဲသ့ၣ်အဲၣ်ဒိး ဒိးဘျၢထံအခါ မိၢ်ပၢ်တဖၣ် ကသံကွၢ်ဘၣ်ဝဲတၢ်သံကွၢ်ဒ်အံၤ စ့ၢ်ကီးလီၤ. (စံၣ်တဲၤတဲလီၤတၢ် ၅:၅) ဘၣ်ဆၣ် တၢ်ဆၢတဲာ်လၢ အရ့ဒိၣ်ကတၢၢ်လၢ ခရံာ်ဖိတဖၣ်အဂီၢ်န့ၣ် မ့ၢ်ဝဲတၢ်ဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်ဒီး ဒိးဘျၢထံလီၤ.—ကွၢ်တၢ်လွံၢ်နၢၣ်လၢအမ့ၢ် “မ့ၢ်နဟ့ၣ်လုၢ်ထီၣ်နသးလၢ ယဟိဝၤယွၤအအိၣ်ဝံၤလံဧါ.”
၃, ၄. (က) တၢ်ဒိးဘျၢထံ မ့ၢ်တၢ်လၢအရ့ဒိၣ်န့ၣ် တၢ်မၢဖိပ့းတရူး ပာ်ဖျါထီၣ်ဝဲဒ်လဲၣ်. (ခ) ဘၣ်မနုၤအဃိ စီၤပ့းတရူးထိၣ်သတြီၤ တၢ်ဒိးဘျၢထံ ဒီးစီၤနိအၤ တ့ထီၣ်ကဘီလဲၣ်.
၃ တၢ်မၢဖိ ပ့းတရူးထိၣ်သတြီၤဝဲ တၢ်ဒိးဘျၢထံဒီး စီၤနိအၤတ့ထီၣ်ကဘီန့ၣ်လီၤ. အဝဲတဲဝဲ “တၢ်ဒိးဘျၢပသးအုၣ်က့ၤခီၣ်က့ၤစ့ၢ်ကီးပှၤခဲကနံၣ်အံၤ” လီၤ. (ဖး ၁ ပ့းတရူး ၃:၂၀, ၂၁ တက့ၢ်.) တၢ်တ့ထီၣ်ကဘီန့ၣ် ပာ်ဖျါထီၣ်ဝဲလၢ စီၤနိအၤ အဲၣ်ဒိးမၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်န့ၣ်လီၤ. တၢ်မၤလၢ ယဟိဝၤယွၤဟ့ၣ်လီၤအီၤန့ၣ် စီၤနိအၤ မၤဝဲလၢသူၣ်ဒီဖျၢၣ်သးဒီဖျၢၣ်လီၤ. မ့ၢ်လၢစီၤနိအၤ အိၣ်ဒီးတၢ်နာ်အဃိ ဖဲထံလုၢ်ဘၢတၢ်အခါ ယဟိဝၤယွၤ အုၣ်က့ၤခီၣ်က့ၤအီၤဒီး အဟံၣ်ဖိဃီဖိလီၤ. စီၤပ့းတရူးအဲၣ်ဒိးတဲပှၤတၢ်ဂ့ၢ်မနုၤလဲၣ်.
၄ လၢညါဖဲပှၤထံၣ်ကဘီအခါ အဝဲသ့ၣ်သ့ၣ်ညါဝဲ စီၤနိအၤ အိၣ်ဒီးတၢ်နာ်ယွၤန့ၣ်လီၤ. ဖဲပှၤထံၣ်ပှၤတဂၤဂၤ ဒိးဘျၢထံအခါ အဝဲသ့ၣ်သ့ၣ်ညါဝဲလၢ ပှၤအံၤနာ်ဝဲ ယ့ၣ်ၡူးခရံာ်အဃိ အဝဲဟ့ၣ်လုၢ်ထီၣ်အသးလၢ ယွၤအအိၣ်လီၤ. ဒ်စီၤနိအၤအသိး ပှၤလၢအဒိးဘျၢထံတဖၣ်န့ၣ် ဒိကနၣ်ကစၢ်ယွၤအကလုၢ်ဒီး မၤတၢ်မၤလၢယွၤဟ့ၣ်လီၤအဝဲသ့ၣ်န့ၣ်လီၤ. ဒ်ယဟိဝၤယွၤ မၤပူၤဖျဲးစီၤနိအၤလၢ ထံလုၢ်ဘၢတၢ်အသိး ဖဲအဝဲမ့ၢ်မၤဟးဂီၤကွံာ် တၢ်အၢတၢ်သီအဆၢကတီၢ် အဝဲကမၤပူၤဖျဲး ပှၤလၢအဒိးဘျၢထံဝံၤလၢ အအိၣ်ဒီးတၢ်သးတီတဖၣ်န့ၣ်လီၤ. (မၢ်ကူး ၁၃:၁၀; လီၣ်ဖျါ ၇:၉, ၁၀) ဖဲအံၤပသ့ၣ်ညါဘၣ် လီၤတံၢ်လီၤဆဲးလၢ တၢ်ဟ့ၣ်လုၢ်ထီၣ်သးဆူ ယဟိဝၤယွၤအအိၣ် ဒီးတၢ်ဒိးဘျၢထံန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. ပှၤတဂၤဂၤမ့ၢ်ထုးယံာ်တၢ်ဆၢကတီၢ်လၢကဒိးဘျၢထံန့ၣ် ဘၣ်သ့ၣ်သ့ၣ်အတဒိးန့ၢ်ဘၣ် တၢ်မူအထူအယိာ်ဘၣ်.
၅. လၢတၢ်မၤလိအံၤအပူၤ ပကမၤလိသကိးတၢ်ဂ့ၢ်မနုၤလဲၣ်.
၅ ခဲအံၤပသ့ၣ်ညါဘၣ်လၢ တၢ်ဒိးဘျၢထံန့ၣ် မ့ၢ်တၢ်လၢအရ့ဒိၣ်ဒိၣ်မးအဃိ ပကတဲသကိး တၢ်သံကွၢ်သၢဖျၢၣ်အံၤ အတၢ်စံးဆၢန့ၣ်လီၤ. ဘၣ်ဃးဒီး တၢ်ဒိးဘျၢထံန့ၣ် လံာ်စီဆှံတဲဝဲဒ်လဲၣ်. တချုးလၢပဒိးဘျၢထံဒံးဘၣ်န့ၣ် ပကဘၣ်မၤတၢ်မနုၤလဲၣ်. ဖဲပသိၣ်လိ ပဖိတဖၣ် မ့တမ့ၢ် ပပှၤမၤလိလံာ်စီဆှံဖိအခါ ဘၣ်မနုၤအဃိ ပကဘၣ်သ့ၣ်နီၣ်ထီၣ်လၢ တၢ်ဒိးဘျၢထံ မ့ၢ်တၢ်လၢအရ့ဒိၣ်လဲၣ်.
ဘၣ်ဃးဒီးတၢ်ဒိးဘျၢထံန့ၣ် လံာ်စီဆှံတဲဝဲဒ်လဲၣ်
၆, ၇. (က) စီၤယိၤဟၣ် အတၢ်ဒိးဘျၢန့ၣ် အခီပညီဒ်လဲၣ်. (ခ) ပှၤဒိးဘျၢထံခဲလၢာ်အကျါ ပှၤလၢအလီၤဆီတဂၤန့ၣ် မ့ၢ်မတၤလဲၣ်. ဒီးဘၣ်မနုၤအဃိလဲၣ်.
၆ လၢလံာ်စီဆှံအပူၤ ပှၤအဆိကတၢၢ်တဂၤလၢ အဒိးဘျၢပှၤဂၤလၢထံန့ၣ် မ့ၢ်ဝဲပှၤဘျၢတၢ်စီၤယိၤဟၣ်လီၤ. (မးသဲ ၃:၁-၆) ဘၣ်မနုၤအဃိ ပှၤဟဲဒိးဘျၢထံလၢ အအိၣ်လဲၣ်. မ့ၢ်လၢအဝဲသ့ၣ်ပာ်ဖျါထီၣ်ဝဲလၢ အပီၢ်ယၢ်လီၤက့ၤအသးလၢ တၢ်ဒဲးဘးလၢ အမၤဝဲတဖၣ်အဃိလီၤ. အဲၣ်ဒိးတဲဝဲ အဝဲသ့ၣ်အၢၣ်လီၤတူၢ်လိာ်ဝဲလၢ အဝဲသ့ၣ်မၤကမၣ် စီၤမိၤၡ့တၢ်သိၣ်တၢ်သီဒီး အသူၣ်အုးသးအုးဒိၣ်မးန့ၣ်လီၤ. ဒီးစီၤယိၤဟၣ်ဒိးန့ၢ်ဘၣ် တၢ်ခွဲးတၢ်ယာ်လီၤဆီလၢ ကဒိးဘျၢဝဲ ယွၤအဖိခွါလၢအမ့ၢ် ယ့ၣ်ၡူးန့ၣ်လီၤ. ဖဲစီၤယိၤဟၣ်ဒိးဘျၢ ယ့ၣ်ၡူးအခါ အခီပညီလီၤဆီလိာ်အသးဒီး ပှၤအဂၤလၢ စီၤယိၤဟၣ်ဒိးဘျၢဝဲတဖၣ်န့ၣ်လီၤ. (မးသဲ ၃:၁၃-၁၇) ယ့ၣ်ၡူးန့ၣ် အတၢ်ဒဲးဘးတအိၣ်ဘၣ်အဃိ အဝဲတလိၣ်ပီၢ်ယၢ်လီၤက့ၤ အသးဘၣ်. (၁ ပ့းတရူး ၂:၂၂) မ့မ့ၢ်ဒ်န့ၣ်န့ၣ် ဘၣ်မနုၤအဃိ ယ့ၣ်ၡူးဘၣ်ဒိးဘျၢထံလဲၣ်. မ့ၢ်လၢ အဝဲပာ်ဖျါထီၣ်ဝဲလၢ အဝဲဟ့ၣ်လီၤအသးလၢ ကမၤယွၤအတၢ်ဘၣ်သးလၢ အတၢ်အိၣ်မူဒီတစိၤအဃိလီၤ.—ဧ့ၤဘြံၤ ၁၀:၇.
၇ ဖဲယ့ၣ်ၡူးစးထီၣ်ဟးစံၣ်တဲၤတဲလီၤတၢ်အခါ အပျဲၢ်အဘီၣ်သ့ၣ်တဖၣ် စးထီၣ်ဒိးဘျၢပှၤဂၤလၢထံလီၤ. (ယိၤဟၣ် ၃:၂၂; ၄:၁, ၂) မ့ၢ်လၢအဝဲသ့ၣ်လုၢ်သ့ၣ်ခါပတာ်ဘၣ် စီၤမိၤၡ့အတၢ်မၤလိာ်အဃိ ပီၢ်ယၢ်လီၤက့ၤအသးဒီး ဒိးဘျၢအသးလၢထံန့ၣ်လီၤ. ဘၣ်ဆၣ် ဖဲယ့ၣ်ၡူးသံ ဒီးဂဲၤဆၢထၢၣ်သမူထီၣ်က့ၤဝံၤအလီၢ်ခံ ပှၤလၢအဲၣ်ဒိးကဲထီၣ်ယ့ၣ်ၡူးအပျဲၢ်အဘီၣ်တဖၣ် အတၢ်ဒိးဘျၢထံအခီပညီ ဆီတလဲဝဲလီၤ.
၈. (က) ယ့ၣ်ၡူးဂဲၤဆၢထၢၣ်သမူထီၣ်က့ၤဝံၤအလီၢ်ခံ အဝဲမၤလိာ်အပျဲၢ်အဘီၣ်တဖၣ်ဒ်လဲၣ်. (ခ) ဘၣ်မနုၤအဃိ ခရံာ်ဖိတဖၣ် ကဘၣ်ဒိးဘျၢထံလဲၣ်.
၈ ဖဲ ခ.န ၃၃ ယ့ၣ်ၡူးဂဲၤဆၢထၢၣ် သမူထီၣ်က့ၤဝံၤအလီၢ်ခံ ယ့ၣ်ၡူးတဲတၢ်လၢ ပှၤကအိၣ်အဂၤ ၅၀၀ ပျဲၣ်အမဲာ်ညါလီၤ. ဒီးလၢအဝဲသ့ၣ်အကျါ ကပၣ်ဃုာ်ဒီး ပိာ်မုၣ်ပိာ်ခွါ တဖၣ်လီၤ. ဖဲန့ၣ်အခါ ဘၣ်သ့ၣ်သ့ၣ် ယ့ၣ်ၡူးကတဲဝဲလၢ “လဲၤဒုးကဲထီၣ် ပှၤအကလုာ်တဖၣ် ခဲလၢာ်လၢ ယပျဲၢ်ယဘီၣ်တက့ၢ်. ဒီးဘျၢအီၤလၢပၢ်, ဒီးဖိခွါ, ဒီးသးစီဆှံအမံၤ အပူၤတက့ၢ်. ဒီးသိၣ်လိသီလိအီၤ, ဒ်သိးအကတိၢ်န့ၢ် ကယဲၢ်တၢ်လၢ ယမၤလိာ်တ့ၢ်သုခဲလၢာ်တက့ၢ်.” (မးသဲ ၂၈:၁၉, ၂၀; ၁ ကရံၣ်သူး ၁၅:၆) ယ့ၣ်ၡူးမၤလိာ် အပျဲၢ်အဘီၣ်တဖၣ်လၢ ကဘၣ်လဲၤဒုးကဲထီၣ် ပှၤဂၤလၢအပျဲၢ်အဘီၣ်လီၤ. ဒီးပှၤလၢအဲၣ်ဒိးကဲထီၣ်အပျဲၢ်အဘီၣ် မ့တမ့ၢ် အဲၣ်ဒိးယိးအ “နီၣ်ယိးဘိ” န့ၣ် ကဘၣ်ဒိးဘျၢထံလီၤ. (မးသဲ ၁၁:၂၉, ၃၀) ပမၤယွၤအတၢ်မၤ ဒ်ယွၤအတၢ်ဘၣ်သးအသိး ကသ့ဝဲအဂီၢ် ပကဘၣ်တူၢ်လိာ်လၢ ယဟိဝၤယွၤသူဝဲ ယ့ၣ်ၡူးဒ်သိး အတၢ်ဘၣ်သး ကလၢပှဲၤအဂီၢ်လီၤ. ပမ့ၢ်မၤဒ်န့ၣ်မး ကစၢ်ယွၤကတူၢ်လိာ် ပတၢ်ဒိးဘျၢထံန့ၣ်လီၤ. လံာ်စီဆှံ ပာ်ဖျါထီၣ်န့ၢ်ပှၤ တၢ်အုၣ်အသးလၢ ခရံာ်အပျဲၢ်အဘီၣ်လၢညါတဖၣ် သ့ၣ်ညါဝဲလၢ တၢ်ဒိးဘျၢထံန့ၣ် မ့ၢ်တၢ်လၢ အရ့ဒိၣ်အဂ့ၢ်န့ၣ်လီၤ. အဝဲသ့ၣ်တမၤယံာ်မၤနီၢ်အသးလၢ ကဒိးဘျၢထံအဂီၢ်ဘၣ်.—မၤတၢ် ၂:၄၁; ၉:၁၈; ၁၆:၁၄, ၁၅, ၃၂, ၃၃.
တဘၣ်မၤယံာ်မၤနီၢ်နသးလၢ နကဒိးဘျၢထံတဂ့ၤ
၉, ၁၀. ဘၣ်ဃးဒီးတၢ်ဒိးဘျၢထံန့ၣ် ပဟံးန့ၢ်တၢ်မၤလိလၢ စီၤပီလူးဒီးပှၤအဲၤသံအီးပးဖိ အအိၣ်ကသ့ဒ်လဲၣ်.
၉ ဖး မၤတၢ် ၈:၃၅, ၃၆ တက့ၢ်. ပှၤအဲၤသံအီးပးဖိလၢ အတူၢ်လိာ်ဝဲ ပှၤယူဒၤဖိအတၢ်နာ်တဂၤ အဝဲလဲၤဘါတၢ်လၢ ဝ့ၢ်ယရူၤၡလ့ၣ် အတၢ်လုၢ်ဟံၣ်လီၤ. ဖဲအဝဲဟဲက့ၤလၢကျဲအခါ ယဟိဝၤယွၤပျဲလီၤအမူခိၣ်ကလူးတဂၤ ဒ်သိးကလဲၤတဲဘၣ် စီၤဖံလံးပူးလၢ ကလဲၤသိၣ်လိအီၤဒီး “စံၣ်တဲၤတဲလီၤအီၤလၢ ယ့ၣ်ၡူးအဂ့ၢ်အကျိၤလီၤ.” ဖဲန့ၣ်ပှၤအဲၤသံအီးပးဖိတဂၤ မၤဝဲဒ်လဲၣ်. အဝဲနၢ်ပၢၢ်ထီၣ်ဝဲလၢ အဝဲကဘၣ်တူၢ်လိာ်ယ့ၣ်ၡူး ဒ်အမ့ၢ်ကစၢ်န့ၣ် ဒီးအဝဲအဲၣ်ဒိးမၤဝဲ တၢ်လၢယဟိဝၤယွၤ မၢဝဲခရံာ်ဖိတဖၣ်မၤဝဲန့ၣ်လီၤ. လၢတၢ်န့ၣ်အဃိ အဝဲတမၤယံာ်မၤနီၢ်အသးလၢ ကဒိးဘျၢထံအဂီၢ်ဘၣ်. အဝဲဒိးဘျၢထံတဘျီဃီလီၤ.
၁၀ ပှၤအဒိအတဲာ်လၢ အဂၤတဂၤန့ၣ် မ့ၢ်ဝဲစီၤစီလူးလီၤ. ပှၤယူဒၤဖိဒီတကလုာ်န့ၣ် မ့ၢ်ဝဲပှၤလၢ အဟ့ၣ်လုၢ်ထီၣ်တ့ၢ်အသးလၢ ယဟိဝၤယွၤအအိၣ်လီၤ. ဘၣ်ဆၣ်မ့ၢ်လၢ အဝဲသ့ၣ်တဒိကနၣ် ကစၢ်ယွၤအကလုၢ်အဃိ ယွၤညိကွံာ်အဝဲသ့ၣ်လီၤ. ဘၣ်ဆၣ် စီၤစီလူးဆိကမိၣ်ဝဲလၢ ပှၤယူဒၤဖိတဖၣ်မၤတၢ်ဘၣ်ယွၤအသးဒံးအဃိ အဝဲလူၤမၤအၢမၤနးဝဲ ခရံာ်ဖိသ့ၣ်တဖၣ်န့ၣ်လီၤ. ဘၣ်တနံၤ ဖဲယ့ၣ်ၡူးဂဲၤဆၢထၢၣ်သမူထီၣ်က့ၤဝံၤအလီၢ်ခံ အဝဲတဲတၢ်ဒီး စီၤစီလူးလီၤ. ဖဲန့ၣ်အခါ စီၤစီလူးမၤဝဲဒ်လဲၣ်. အဝဲတူၢ်လိာ်ဝဲ တၢ်မၤစၢၤလၢ ခရံာ်အပျဲၢ်အဘီၣ် စီၤအနၤနံ အအိၣ်တဘျီဃီလီၤ. လံာ်စီဆှံတဲဝဲလၢ အဝဲ “ဂဲၤဆၢထၢၣ်ဒီးဒိးဘျၢအသးလီၤ.” (မၤတၢ် ၉:၁၇, ၁၈; ကလၤတံ ၁:၁၄) လၢခံအဝဲကဲထီၣ်ဝဲ တၢ်မၢဖိပီလူးလီၤ. ပာ်သူၣ်ပာ်သးလၢ ဖဲစီၤပီလူးသ့ၣ်ညါထီၣ်ဝဲလၢ ယွၤသူဝဲယ့ၣ်ၡူးဒ်သိး ကမၤလၢပှဲၤအတၢ်ဘၣ်သးအခါ အဝဲဒိးဘျၢထံတဘျီဃီလီၤ.—ဖး မၤတၢ် ၂၂:၁၂-၁၆ တက့ၢ်.
ပှၤမၤလိလံာ်စီဆှံဖိလၢ အပာ်လုၢ်ပာ်ပှ့ၤ တၢ်မ့ၢ်တၢ်တီန့ၣ် ကသူၣ်ဆူၣ်သးဆူၣ်လၢ ကဒိးဘျၢထံအဂီၢ်
၁၁. (က) ဒ်သိးပှၤမၤလိလံာ်စီဆှံဖိတဂၤ ကဒိးဘျၢထံအဂီၢ် တၢ်မနုၤထိၣ်ဟူးထိၣ်ဂဲၤထီၣ်အီၤလဲၣ်. (ခ) ဖဲပထံၣ်ဘၣ် ပှၤဒိးဘျၢထံအခါ ပတူၢ်ဘၣ်ဒ်လဲၣ်.
၁၁ မုၢ်မဆါတနံၤအံၤ ပှၤမၤလိလံာ်စီဆှံဖိ လၢအသးစၢ်မ့ၢ်ဂ့ၤ အသးပှၢ်မ့ၢ်ဂ့ၤ မၤဝဲဒ်န့ၣ်အသိးလီၤ. မ့ၢ်လၢအဝဲသ့ၣ်အဲၣ် ဒီးနာ်ဝဲတၢ်လၢလံာ်စီဆှံတဲဝဲတဖၣ်အဃိ အဝဲသ့ၣ်အသူၣ်ဆူၣ်သးဆူၣ်လၢ ကဟ့ၣ်လုၢ်ထီၣ်အသးလၢ ယဟိဝၤယွၤအအိၣ် ဒီးဒိးဘျၢထံလီၤ. တကးဒံးဘၣ် လၢကဝီၤတၢ်အိၣ်ဖှိၣ်ဒီး တၢ်အိၣ်ဖှိၣ်ဖးဒိၣ်န့ၣ် ဖဲပှၤဟ့ၣ်တၢ်စံၣ်တဲၤတဲလီၤတၢ်လၢ ပှၤကဒိးဘျၢထံအဂီၢ်အခါ မ့ၢ်ဝဲတၢ်ဆၢကတီၢ်လၢ အလီၤသူၣ်ခုသးခုလီၤ. ယဟိဝၤပှၤအုၣ်အသးတဖၣ် ဖဲအပှၤမၤလိလံာ်စီဆှံဖိ တူၢ်လိာ်တၢ်မ့ၢ်တၢ်တီ ဒီးဆၢတဲာ်လီၤအသးလၢ ကဒိးဘျၢထံအခါ အဝဲသ့ၣ်အသးခုဒိၣ်မးလီၤ. ဒီးမိၢ်ပၢ်တဖၣ် ဖဲအဖိတဖၣ်ဒိးဘျၢထံအခါ အဝဲသ့ၣ်သးခုဝဲစ့ၢ်ကီးလီၤ. ဖဲ ၂၀၁၇ န့ၣ်ပှၤအသီအဂၤ ၂၈၄,၀၀၀ ဘျဲၣ်ဒိးဘျၢအသးလၢထံ ဒ်သိးကပာ်ဖျါထီၣ်ဝဲလၢ အဝဲသ့ၣ်ဟ့ၣ်လုၢ်ထီၣ်အသးလၢ ယဟိဝၤယွၤအအိၣ်လီၤ. (မၤတၢ် ၁၃:၄၈) ဖဲအံၤပသ့ၣ်ညါဘၣ်လၢ အဝဲသ့ၣ်နၢ်ပၢၢ်ဝဲလၢ ခရံာ်ဖိတဖၣ်ကဘၣ်ဒိးဘျၢထံန့ၣ်လီၤ. ဘၣ်ဆၣ် တချုးလၢ အဝဲသ့ၣ်ဒိးဘျၢထံဒံးဘၣ်န့ၣ် ကဘၣ်မၤဝဲတၢ်မနုၤလဲၣ်.
၁၂. ပှၤမၤလိလံာ်စီဆှံဖိတဂၤ တချုးလၢအဒိးဘျၢထံဒံးဘၣ်န့ၣ် ကဘၣ်မၤဝဲတၢ်မနုၤလဲၣ်.
၁၂ တချုးလၢ ပှၤမၤလိလံာ်စီဆှံဖိတဖၣ် ဒိးဘျၢထံဒံးဘၣ်န့ၣ် အဝဲသ့ၣ်ကဘၣ်မၤလိ တၢ်မ့ၢ်တၢ်တီလၢအဘၣ်ဃးဒီး ကစၢ်ယွၤ, ကစၢ်ယွၤအတၢ်တိာ်ပာ်လၢ ဟီၣ်ခိၣ် ဒီးပှၤဟီၣ်ခိၣ်ဖိအဂီၢ် ဒီးဒ်သိး ပှၤဟီၣ်ခိၣ်ဖိတဖၣ် ကပူၤဖျဲးအဂီၢ် ကစၢ်ယွၤမၤဝဲ တၢ်မနုၤလဲၣ်အဂ့ၢ်န့ၣ်လီၤ. (၁ တံၤမသ့း ၂:၃-၆) တကးဒံးဘၣ် အဝဲသ့ၣ်ကဘၣ်မၤအါထီၣ် အတၢ်နာ် ဒ်သိးကမၤစၢၤအီၤလၢ ကဒိကနၣ်ဒီးမၤထွဲ ယွၤအတၢ်သိၣ်တၢ်သီ ဒီးကပတုာ်မၤတၢ်လၢ ယွၤသးဟ့ဝဲတဖၣ်အဂီၢ်လီၤ. (မၤတၢ် ၃:၁၉) တၢ်အံၤမ့ၢ်တၢ်လၢအရ့ဒိၣ် မ့ၢ်လၢအဝဲသ့ၣ်မ့ၢ်ဆဲးမၤဝဲတၢ်လၢ ယွၤသးဟ့ဝဲန့ၣ် ယွၤတတူၢ်လိာ် အတၢ်ဟ့ၣ်လုၢ်ထီၣ်အသးဘၣ်. (၁ ကရံၣ်သူး ၆:၉, ၁၀) တကးဒံးဘၣ် ပှၤလၢ အအဲၣ်ဒိး ဟ့ၣ်လုၢ်ထီၣ်အသးလၢ ယဟိဝၤယွၤအအိၣ်န့ၣ် အဝဲကသ့ၣ်ဘၣ်ထီၣ်တၢ်အိၣ်ဖှိၣ် ဒီးကဘၣ်ဟးစံၣ်တဲၤတဲလီၤ ဘီမုၢ်တၢ်သးခုကစီၣ်ထီဘိလီၤ. ပှၤလၢအအဲၣ်ဒိးပိာ်ခရံာ်အခံန့ၣ် ကဘၣ်မၤဝဲဒ်န့ၣ် ကိးဂၤဒဲးလီၤ. (မၤတၢ် ၁:၈) တချုးလၢပှၤမၤလိလံာ်စီဆှံဖိတဂၤ ဒိးဘျၢထံဒံးဘၣ်န့ၣ် အဝဲကဘၣ်မၤဝဲ တၢ်သ့ၣ်တဖၣ်အံၤခဲလၢာ်လီၤ. ဝံၤဒီးအဝဲဟ့ၣ်လုၢ်ထီၣ်အသးလၢ ယဟိဝၤယွၤအအိၣ်လၢ တၢ်ထုကဖၣ် ဒီးဒိးဘျၢထံသ့ဝဲလီၤ.
မၤစၢၤနပှၤမၤလိလံာ်စီဆှံဖိလၢ ကအိၣ်ဒီး အဖီတၢၣ်လၢ ကဒိးဘျၢထံအဂီၢ်
ဖဲနသိၣ်လိပှၤဂၤအခါ မ့ၢ်နဟံးန့ၢ်တၢ်ခွဲးတၢ်ယာ်လၢ ကမၤစၢၤ အဝဲသ့ၣ်လၢ ကနၢ်ပၢၢ်ထီၣ် တၢ်ဒိးဘျၢထံန့ၣ် မ့ၢ်တၢ်လၢအရ့ဒိၣ်န့ၣ်ဧါ (ကွၢ်လံာ်အဆၢ ၁၃)
၁၃. ဖဲပသိၣ်လိပှၤဂၤအခါ ဘၣ်မနုၤအဃိ ပကဘၣ်သ့ၣ်နီၣ်ထီၣ်လၢ အဝဲသ့ၣ်ကကဲထီၣ်ခရံာ်ဖိအဂီၢ် ကဘၣ်ဒိးဘျၢထံလဲၣ်.
၁၃ ဖဲပမၤစၢၤ ပပှၤမၤလိလံာ်စီဆှံဖိ ဒီးပဖိတဖၣ်လၢ ကကဲထီၣ် ခရံာ်အပျဲၢ်အဘီၣ်အခါ ပကဘၣ်သ့ၣ်နီၣ်ထီၣ်လၢ တၢ်ဒိးဘျၢထံန့ၣ် မ့ၢ်တၢ်လၢအရ့ဒိၣ်လီၤ. ပမ့ၢ်သ့ၣ်နီၣ်ထီၣ်တၢ်ဂ့ၢ်အံၤန့ၣ် ဖဲတၢ်ဆၢကတီၢ်ဘၣ်လၢ ပကတဲပၠးအဝဲသ့ၣ် တၢ်ဟ့ၣ်လုၢ်ထီၣ်သး ဒီးတၢ်ဒိးဘျၢထံ မ့ၢ်တၢ်လၢအရ့ဒိၣ်ထဲလဲၣ်အခါ ပတဘၣ်ယိၣ်တၢ်လၢၤဘၣ်. ပအဲၣ်ဒိးလၢ ပဖိတဖၣ် ဒီးပပှၤမၤလိလံာ်စီဆှံဖိတဖၣ် ကဆဲးလဲၤထီၣ်လဲၤထီ ဒီးဒိးဘျၢထံလီၤ.
၁၄. ဘၣ်မနုၤအဃိ ပတဘၣ်မၢဆူၣ်ပှၤဂၤလၢ ကဒိးဘျၢထံအဂီၢ်ဘၣ်လဲၣ်.
၁၄ ပတကြၢးမၢဆူၣ်ပဖိ မ့တမ့ၢ် ပပှၤမၤလိလံာ်စီဆှံဖိလၢ ကဒိးဘျၢထံအဂီၢ်ဘၣ်. ယဟိဝၤယွၤစ့ၢ်ကီး တမၢဆူၣ်ပှၤလၢ ပကမၤအတၢ်မၤနီတဂၤဘၣ်. (၁ ယိၤဟၣ် ၄:၈) ဖဲပသိၣ်လိပှၤဂၤအခါ ပကဘၣ်မၤစၢၤအဝဲသ့ၣ် ဒ်သိးကနၢ်ပၢၢ်ထီၣ်ဝဲလၢ အဝဲသ့ၣ်ကဘၣ်ဒုးအိၣ်ထီၣ် အတၢ်ရ့လိာ်သးဒီး ယဟိဝၤယွၤလီၤ. ဒီးအဝဲသ့ၣ် မ့ၢ်ပာ်လုၢ်ပာ်ပှ့ၤ လံာ်စီဆှံတၢ်မ့ၢ်တၢ်တီလၢ အဘၣ်ဃးဒီးကစၢ်ယွၤ ဒီးမ့ၢ်အဲၣ်ဒိးမၤတၢ်လၢ ခရံာ်ဖိနီၢ်နီၢ်တဖၣ် ကဘၣ်မၤဝဲန့ၣ် အဝဲသ့ၣ်ကအဲၣ်ဒိး ဒိးဘျၢထံလီၤ.—၂ ကရံၣ်သူး ၅:၁၄, ၁၅.
၁၅, ၁၆. (က) ပှၤတဂၤကဒိးဘျၢထံအဂီၢ် တၢ်ပာ်ပနီၣ်အသးအနံၣ်အလါအိၣ်ဧါ, တဲနၢ်ပၢၢ်တက့ၢ်. (ခ) ပှၤမၤလိလံာ်စီဆှံဖိတဂၤ မ့ၢ်ဒိးဘျၢဘၣ်ထံလၢ တၢ်ဘူၣ်တၢ်ဘါအဂၤဘၣ်ဆၣ် ဒ်သိးအဝဲကကဲထီၣ် ယဟိဝၤပှၤအုၣ်အသးတဂၤအဂီၢ် ဘၣ်မနုၤအဃိ အဝဲဘၣ်ဒိးဘျၢကဒီးထံလဲၣ်.
၁၅ ပှၤမၤလိ လံာ်စီဆှံဖိတဖၣ် အတၢ်လဲၤထီၣ်လဲၤထီန့ၣ် တဂၤဒီးတဂၤ တဒ်သိးလိာ်အသးဘၣ်. လၢတၢ်န့ၣ်အဃိ ဒ်သိး ပှၤတဂၤကဒိးဘျၢထံအဂီၢ် တၢ်ပာ်ပနီၣ် အသးအနံၣ်အလါတအိၣ်ဘၣ်. ပှၤအါဂၤဒိးဘျၢထံဖဲ အသးစၢ်ဒံးအခါ ဒီးဆဲးတီဒီးယဟိဝၤယွၤ တုၤအသးပှၢ်ထီၣ်တစုလီၤ. မ့မ့ၢ်ပှၤအဂၤတနီၤနီၤန့ၣ် အဝဲသ့ၣ်မၤလိဘၣ်လံာ်စီဆှံလၢ အညါအိၣ်ထီၣ် ဒီးဒိးဘျၢထံလီၤ. လၢအကျါတနီၤန့ၣ် ဖဲအဝဲသ့ၣ်ဒိးဘျၢထံအခါ အသးကအိၣ်လၢ အနံၣ် ၁၀၀ ဘျဲၣ်လံ.
၁၆ ပိာ်မုၣ်တဂၤဆီတလဲ အတၢ်ဘူၣ်တၢ်ဘါတခါဝံၤတခါ အဃိ အဝဲဒိးဘျၢဘၣ်ထံ တဘျုးဘျီညါလီၤ. လၢတၢ်န့ၣ်အဃိ အဝဲသံကွၢ် ပှၤလၢအသိၣ်လိအီၤ လံာ်စီဆှံတဂၤလၢ မ့ၢ်အလိၣ်လၢ ကဘၣ်ဒိးဘျၢထံ လၢအသီတဘျီဒံးဧါ. ပှၤလၢအသိၣ်လိအီၤ လံာ်စီဆှံတဂၤ ဖးပၠးအီၤလံာ်စီဆှံ အဆၢတနီၤဒ်သိး ကစံးဆၢက့ၤအတၢ်သံကွၢ်န့ၣ်လီၤ. ဖဲအဝဲနၢ်ပၢၢ်ဝဲ လံာ်စီဆှံအတၢ်ဟံးစုနဲၣ်ကျဲအခါ အဝဲဒိးဘျၢထံလီၤ. ဖဲအဝဲဒိးဘျၢထံအခါ အသးကအိၣ်အနံၣ် ၈၀ ဃၣ်ဃၣ်လံ. ဖဲအံၤ ပဒိးန့ၢ်ဘၣ်တၢ်မၤလိဒ်လဲၣ်. ပမ့ၢ်သ့ၣ်ညါ တၢ်မ့ၢ်တၢ်တီလၢအဘၣ်ဃးဒီး ယဟိဝၤယွၤအတၢ်ဘၣ်သးမး အဝဲကတူၢ်လိာ် ပတၢ်ဒိးဘျၢထံန့ၣ်လီၤ. အဃိ ပမ့ၢ်ဒိးဘျၢဘၣ်ထံလၢ တၢ်ဘူၣ်တၢ်ဘါအဂၤ ဘၣ်ဆၣ် ဒ်သိးပကကဲထီၣ် ယဟိဝၤပှၤအုၣ်အသးတဂၤအဂီၢ် ပကဘၣ်ဒိးဘျၢကဒီးထံလီၤ.—ဖး မၤတၢ် ၁၉:၃-၅ တက့ၢ်.
၁၇. ပှၤတဂၤဖဲအဒိးဘျၢထံအနံၤန့ၣ် အဝဲကြၢးဆိကမိၣ်ထံက့ၤဝဲ တၢ်ဂ့ၢ်မနုၤလဲၣ်.
၁၇ ဖဲပှၤတဂၤဒိးဘျၢထံအနံၤန့ၣ် မ့ၢ်ဝဲမုၢ်နံၤလၢ အလီၤသူၣ်ခုသးခုဒိၣ်မးလၢအဂီၢ်လီၤ. တကးဒံးဘၣ် မ့ၢ်ဝဲတၢ်ဆၢကတီၢ်လၢ အဝဲကဘၣ်ဆိကမိၣ်ထံဝဲ အတၢ်ဟ့ၣ်လုၢ်ထီၣ်သးဒီး တၢ်ဒိးဘျၢထံအဂ့ၢ်ထံထံဆးဆးလီၤ. ဒ်သိးအဝဲကမၤတၢ်ခဲလၢာ်လၢ ခရံာ်ဖိနီၢ်နီၢ်တဖၣ်ကဘၣ်မၤဝဲအဂီၢ် အဝဲကဘၣ်ထဲးဂံၢ်ထဲးဘါလီၤ. ယ့ၣ်ၡူးအပျဲၢ်အဘီၣ်တဖၣ်န့ၣ် တဘၣ်အိၣ် “မူလၢၤလၢအဂီၢ်ဒၣ်ဝဲ” ဘၣ်. လၢတၢ်န့ၣ်အလီၢ် အဝဲကဘၣ်အိၣ်မူလၢ “ပှၤလၢအဒိးသံအသးလၢအဃိ, ဒီးဂဲၤဆၢထၢၣ်က့ၤဝဲတဂၤအဂီၢ်လီၤ.”—၂ ကရံၣ်သူး ၅:၁၅; မးသဲ ၁၆:၂၄.
၁၈. တၢ်မၤလိလၢခံတခါန့ၣ် ပကတဲသကိးတၢ်သံကွၢ် မနုၤတဖၣ်လဲၣ်.
၁၈ ဒ်ပမၤလိတ့ၢ်လၢ တၢ်မၤလိအခီၣ်ထံးအသိး တၢ်ဆၢတဲာ်လၢ ပကကဲထီၣ်ခရံာ်ဖိနီၢ်နီၢ်အဂီၢ်န့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. လၢတၢ်န့ၣ်အဃိ မရံယၤအမိန့ၣ် သံကွၢ်လီၤအသးလၢ တၢ်သံကွၢ်လၢ တၢ်ပာ်ဖျါထီၣ်အီၤလၢ တၢ်မၤလိအခီၣ်ထံးန့ၣ်လီၤ. နမ့မ့ၢ် မိၢ်ပၢ်န့ၣ် သံကွၢ်လီၤနသးလၢ ‘မ့ၢ်ယဖိန့ၣ် အိၣ်ကတဲာ်ကတီၤအသးလၢ ကဒိးဘျၢထံအဂီၢ်လံဧါ. ယဖိကဟ့ၣ်လုၢ်ထီၣ်အသးအဂီၢ် မ့ၢ်အသ့ၣ်ညါယဟိဝၤယွၤ အဂ့ၢ်ဖဲအကြၢးအဘၣ်လံဧါ. တချုးလၢ အဝဲဒိးဘျၢထံဒံးဘၣ်န့ၣ် အဝဲကြၢးအိၣ်ဒီး တၢ်ကူၣ်ဘၣ်ကူၣ်သ့ ဒီးတၢ်မၤလၢအပတီၢ်ထီဧါ. ယဖိဒိးဘျၢထံမ့ၢ်ဝံၤ ဒီးမ့ၢ်မၤဘၣ်တၢ်ကမၣ်ဖးဒိၣ်န့ၣ် တၢ်ကမၤအသးဒ်လဲၣ်.’ တၢ်သံကွၢ်တဖၣ်အံၤအတၢ်စံးဆၢန့ၣ် ပကတဲသကိး လၢတၢ်မၤလိလၢခံတခါအပူၤန့ၣ်လီၤ. ဒီးပကမၤလိဘၣ်စ့ၢ်ကီးလၢ မိၢ်ပၢ်တဖၣ်အိၣ်ဒီးတၢ်ထံၣ် အကြၢးအဘၣ်လၢ တၢ်ဒိးဘျၢထံအဂီၢ်ကသ့ဒ်လဲၣ်န့ၣ်လီၤ.