“အခဲအံၤ ယစံၣ်တဲၤ တဲလီၤတၢ်မုာ်မး”

ယတသးခုလၢၤဘၣ်

ဖဲယသးနံၣ်ကအိၣ်​ ၁၃ နံၣ်အခါ ယတၢ်ရ့လိာ်သး ဒီးယဟိဝၤယွၤ တဂ့ၤအါအါလၢၤဘၣ်. ယတံၤသကိးလၢကၠိတဖၣ်​ ဖျါလၢအဝဲသ့ၣ်အိၣ်ဒီး တၢ်သဘျ့အဃိ ယၤစ့ၢ်ကီးယအဲၣ်ဒိးအိၣ်ဒ်သိးဒီး အဝဲသ့ၣ်လီၤ. ယတူၢ်ဘၣ်လၢ ယမိယပါအတၢ်ဘျၢ ဒီးယဟိဝၤယွၤအတၢ်ဘျၢတဖၣ်​ ဃံးတလၢလၢယဂီၢ် ဒီးတညီစ့ၢ်ကီးလၢ ယကဘူၣ်ထီၣ်ဘါထီၣ်​ ယဟိဝၤယွၤဘၣ်. ယသ့ၣ်ညါလၢယဟိဝၤယွၤန့ၣ်​ အိၣ်ဝဲအနီၢ်ကီၢ် ဘၣ်ဆၣ်​ ယသ့ၣ်ညါလီၤယသးလၢ ယတအိၣ်ဘူးဒီးအီၤဘၣ်.

လၢခံ ယတဟးစံၣ်တဲၤတဲလီၤတၢ် အါအါလၢၤဘၣ်. ဖဲယဟးစံၣ်တဲၤတဲလီၤတၢ်အခါ ယတကတဲာ်ကတီၤပာ်စၢၤယသးဘၣ်. အဃိ ယကဘၣ်တဲတၢ်ဒီးပှၤဂၤဒ်လဲၣ်န့ၣ်​ ယတဲတၢ်တဘၣ်ဘၣ်. ယတၢ်က့ၤဟးကဒါက့ၤ ဒီးယတၢ်မၤလိလံာ်စီဆှံ တအိၣ်နီတခါဘၣ်​ အဃိ ယတသးခုလၢၤဘၣ်​ ဒီးယဟးစံၣ်တဲၤတဲလီၤတၢ် တမုာ်လၢၤစ့ၢ်ကီးဘၣ်. ယသံကွၢ်လီၤယသးလၢ ‘မ့ၢ်မတဂၤ ဟးစံၣ်တဲၤတဲလီၤတၢ်ကမုာ် ကိးနွံဒဲးကိးလါဒဲးတဂၤလဲၣ်.’

ဖဲယသးနံၣ်ပှဲၤထီၣ်​ ၁၇ နံၣ်အခါ ယအဲၣ်ဒိးဆၢထၢၣ်လၢ ယနီၢ်ကစၢ်ခီၣ်လီၤ. အဃိ ယဘိၣ်ထီၣ်ယထၢၣ်​ ယဟးထီၣ်လၢဟံၣ်ပူၤ ဒီးယလဲၤပၠီအိၣ်လၢ ကီၢ်အီးစတြ့လံယါလီၤ. ဖဲယဟးထီၣ်လၢဟံၣ်ပူၤအခါ ယမိၢ်ယပၢ်သးဘၣ်ဒိဝဲ ဒိၣ်မးလီၤ. အဝဲသ့ၣ်ဘၣ်ယိၣ်န့ၢ်တၢ်လၢ ယဂီၢ်ဒိၣ်မး ဒီးအဝဲသ့ၣ်မုၢ်လၢ်ဝဲလၢ ယကဆဲးမၤယဟိဝၤယွၤအတၢ်မၤလီၤ.

ဖဲယအိၣ်လၢ အီးစတြ့လံယါအခါန့ၣ်​ ယတဟးစံၣ်တဲၤတဲလီၤတၢ်အါအါလၢၤဘၣ်. ဒီးယတလဲၤထီၣ်​ တၢ်အိၣ်ဖှိၣ်ထီဘိလၢၤဘၣ်. ယရ့လိာ်သးဒီးပှၤသးစၢ်လၢ အလဲၤထီၣ်တၢ်အိၣ်ဖှိၣ်မုာ်တနံၤ ဒီးလၢခံတနံၤ လဲၤအီၣ်သံးဒီး ဂဲၤကလံၣ်လၢ nightclubs လီၤ. ယမ့ၢ်ဆိကမိၣ်ထီၣ်က့ၤ ယတၢ်အိၣ်မူန့ၣ်​ လီၤဂာ်လၢ ယအိၣ်မူခံမၠိ ယအိၣ်မူလၢတၢ်မ့ၢ်တၢ်တီအပူၤ ဒီးယအိၣ်မူဒ်ပှၤတၢ်ချၢအသိးစ့ၢ်ကီးလီၤ. ဘၣ်ဆၣ်​ ယတကၠဲးတၢ်အိၣ်မူဒ်အံၤဘၣ်.

လၢတၢ်တမုၢ်လၢ်အပူၤ ယမၤလိန့ၢ်ဘၣ်တၢ်လၢ အလုၢ်ဒိၣ်ပှ့ၤဒိၣ်

ခံနံၣ်ဝံၤအလီၢ်ခံ ယထံၣ်လိာ်သးဒီး ဒီပုၢ်ဝဲၢ်မုၣ်တဂၤ အဃိ ယတၢ်အိၣ်မူဆီတလဲဝဲလီၤ. ဖဲန့ၣ်အဆၢကတီၢ် ယအိၣ်ဒီးဒီပုၢ်ဝဲၢ်မုၣ်သဘျ့ယဲၢ်ဂၤ ဒီးပကွဲမုာ်ဝဲ ကဝီၤအပှၤကွၢ်တၢ်ဒီးအမါ ထဲမရၤ လၢကဟဲအိၣ်လၢပဟံၣ်တနွံလီၤ. ဖဲအဝၤတၢ်ဖံးတၢ်မၤအါလၢ တၢ်အိၣ်ဖှိၣ်အတၢ်မၤအခါန့ၣ်​ ဒီပုၢ်ဝဲၢ်မုၣ်ထဲမရၤ အိၣ်ဒီးပှၤလီၤ. ဖဲဒီပုၢ်ဝဲၢ်မုၣ်ထဲမရၤ ရ့ဒီးပှၤအဆၢကတီၢ်န့ၣ်​ ပသူၣ်ခုသးခုဒိၣ်မးလီၤ. အဝဲမ့ၢ်ပှၤလၢ နရ့ဘၣ်အီၤညီ ဒီးအနၢ်ပၢၢ်စၢၤပှၤဂၤလီၤ. အဝဲမ့ၢ်ပှၤလၢအနီၢ်သးဆူၣ်​ သနာ်က့ အရ့ဒီးပှၤဒ်အံၤအဃိ ယကၠဲးအီၤညါ.

ဒီပုၢ်ဝဲၢ်မုၣ်ထဲမရၤန့ၣ်​ မ့ၢ်ပှၤလၢအသူၣ်ဆူၣ်သးဆူၣ်တဂၤလီၤ. အဝဲအဲၣ်တၢ်မ့ၢ်တၢ်တီ ဒီးအသးဆူၣ်လၢ တၢ်စံၣ်တဲၤတဲလီၤတၢ်မၤအပူၤလီၤ. အဝဲဟ့ၣ်ယဟိဝၤယွၤ တၢ်လၢအဂ့ၤကတၢၢ်အဃိ အဝဲသးခုဝဲ, မ့မ့ၢ်လၢယၤန့ၣ်​ ယတသးခုဘၣ်​ ဒီးယတဟ့ၣ်ယဟိဝၤယွၤ တၢ်လၢအဂ့ၤကတၢၢ်ဘၣ်အဃိလီၤ. အဝဲအိၣ်ဒီးတၢ်ထံၣ်လၢအဂ့ၤ ဒီးအဝဲသးခုထီဘိ အဃိ ယတၢ်ထံၣ်ဆီတလဲထီၣ်ဝဲလီၤ. ဒီပုၢ်ဝဲၢ်မုၣ်ထဲမရၤ အတၢ်ဒိဂ့ၤတဲာ်ဘၣ်န့ၣ်​ မၤစၢၤယၤလၢ ယကဆိကမိၣ်ထီၣ်​ တၢ်အရ့ဒိၣ်ကတၢၢ်လၢ ယတၢ်အိၣ်မူအပူၤလီၤ. တၢ်လၢအရ့ဒိၣ်ကတၢၢ်န့ၣ်မ့ၢ်ဝဲ ပကမၤယဟိဝၤယွၤအတၢ်မၤလၢ “တၢ်သးခု” အပူၤလီၤ.—စံးထီၣ်ပတြၢၤ ၁၀၀:၂.

ယစံၣ်တဲၤတဲလီၤတၢ် မုာ်ထီၣ်ကဒါက့ၤ

ယအဲၣ်ဒိးသးခုဒ်သိးဒီး ဒီပုၢ်ဝဲၢ်မုၣ်ထဲမရၤ ဘၣ်ဆၣ်​ ယသ့ၣ်ညါ ယကသးခုဒ်န့ၣ်အဂီၢ် ယကဘၣ်မၤ တၢ်ဆီတလဲဖးဒိၣ်တနီၤလီၤ. ယဆီတလဲယသး တဘျီဃီတန့ၢ်ဘၣ်​ အဃိ ယစးထီၣ်မၤအီၤ ကယီကယီလီၤ. ယစးထီၣ်​ ယကတဲာ်ကတီၤယသးဂ့ၤဂ့ၤ လၢတၢ်စံၣ်တဲၤတဲလီၤအဂီၢ် ဒီးတဘျီတခီၣ်န့ၣ်​ ယမၤပှၤလဲၤလၢညါမၤစၢၤတၢ်လီၤ. ခီဖျိလၢ ယမၤဒ်အံၤအဃိ မၤစၢၤယၤလၢ ယတၢ်နာ်န့ၢ်လီၤသးအါထီၣ်​ ဒီးယတပျံၤတၢ်အါအါလၢၤဘၣ်. ခီဖျိလၢ ယဘၣ်သူဝဲလံာ်စီဆှံ လၢတၢ်စံၣ်တဲၤတဲလီၤအပူၤထီဘိ အဃိ ယဟးစံၣ်တဲၤတဲလီၤတၢ် မုာ်ထီၣ်မးမုာ်ထီၣ်လီၤ. တယံာ်ဘၣ်ဒီး ယမၤပှၤလဲၤလၢညါမၤစၢၤတၢ် ကိးလါဒဲးလီၤ.

ယစးထီၣ်ရ့လိာ်သးဒီး ပှၤလၢအသးဆူၣ်လၢ တၢ်မ့ၢ်တၢ်တီအပူၤ ဒီးပှၤလၢအမၤ ယဟိဝၤယွၤအတၢ်မၤလၢ တၢ်သးဆူၣ်အပူၤတဖၣ်လီၤ. အဝဲသ့ၣ်ဒိဂ့ၤတဲာ်ဘၣ်န့ၣ်​ မၤစၢၤယၤလၢ ယကဆိကမိၣ်ထီၣ်က့ၤ တၢ်အရ့ဒိၣ်ကတၢၢ်လၢ ယတၢ်အိၣ်မူအပူၤလီၤ. တကးဒံးဘၣ်​ ယစးထီၣ်ဖးလံာ်စီဆှံ ကိးမုၢ်နံၤဒဲးလီၤ. လၢခံန့ၣ်​ ယမၤပှၤလဲၤလၢညါလီၤ. အခဲအံၤန့ၣ်​ ယတဘၣ်ယိၣ်တၢ်လၢၤဘၣ်, ယအိၣ်ဒီးတၢ်သးခု ဒီးယတၢ်အိၣ်ဖှိၣ်ဖိတဖၣ်န့ၣ်​ ယထံၣ်အဝဲသ့ၣ်ဒ်သိး ယဟံၣ်ဖိဃီဖိလီၤ.

ယထံၣ်န့ၢ်ယသးသမူတံၤသကိး လၢကမၤသကိး ပှၤလဲၤလၢညါဒီးယၤထီဘိ

တနံၣ်ဝံၤအလီၢ်ခံ ယထံၣ်လိာ်သးဒီး ဒီပုၢ်ဝဲၢ်ခွါအဲလဲး ဒီးအဝဲမ့ၢ်ပှၤလၢအသးဂ့ၤ, အဲၣ်ယဟိဝၤယွၤဒီး သးဆူၣ်လၢတၢ်စံၣ်တဲၤတဲလီၤတၢ်မၤအပူၤလီၤ. အဝဲမ့ၢ်တၢ်အိၣ်ဖှိၣ်အပှၤမၤစၢၤတၢ် ဒီးအမၤပှၤလဲၤလၢညါန့ၢ်ဃုနံၣ်လံ. ဒီပုၢ်ဝဲၢ်ခွါအဲလဲး လဲၤမၤစၢၤဘၣ်တၢ်စ့ၢ်ကီးလၢ တၢ်လီၢ်လၢ ပှၤလိၣ်ဘၣ်တၢ်မၤစၢၤလၢ ကီၢ်မလၣ်ဝံၣ်လီၤ. ဖဲန့ၣ်အဝဲရ့ဘၣ်ဒီး မံးၡ့ၣ်နရ့ၣ်​ လၢအပာ်လီၤဒိဂ့ၤတဲာ်ဘၣ်​ လၢအဂီၢ် ဒီးဟ့ၣ်ဂံၢ်ဟ့ၣ်ဘါအီၤလၢ အကဆဲးပာ်ဆိ ယဟိဝၤယွၤအတၢ်မၤ လၢနီၣ်ဂံၢ်တၢ လၢအတၢ်အိၣ်မူအပူၤလီၤ.

ဖဲ ၂၀၀၃ န့ၣ်​ ယၤဒီးဒီပုၢ်ဝဲၢ်ခွါအဲလဲး ပဖျီပသးလီၤ. စးထီၣ်ဖဲန့ၣ်​ ပဆဲးမၤဝဲ ယဟိဝၤယွၤအတၢ်မၤလၢ ဆၢကတီၢ်လၢပှဲၤန့ၣ်လီၤ. ပမၤလိန့ၢ်ဘၣ်​ တၢ်မၤလိလၢအရ့ဒိၣ်အါမး ဒီးယဟိဝၤယွၤဆိၣ်ဂ့ၤပှၤလၢ ကျဲအါဘိလီၤ.

ယဟိဝၤယွၤဆဲးဆိၣ်ဂ့ၤပှၤ အါန့ၢ်ဒံးအလီၢ်

ဖဲ ၂၀၀၉ န့ၣ်​ ပကဲထီၣ်ဘၣ်မံးၡ့ၣ်နရ့ၣ်​ ဒီးပလီၤဘၣ်မူဒါလၢ ထံမိၣ်​ လဲးတံၣ်​ လၢအမ့ၢ်ဝဲ ထံကီၢ်ဆံးဆံးဖိတဘ့ၣ်​ လၢအအိၣ်လၢအ့ၣ်ဒိၣ်နံၡါ အကီးတဖၣ်အကျါလီၤ. တကတီၢ်ဃီန့ၣ်​ ပကမၢကမၣ်, သူၣ်ခုသးခု ဒီးဘၣ်ယိၣ်ဘၣ်ဘှီတၢ်ဒိၣ်မးလီၤ. ဒီးယဲၢ်လါဝံၤအလီၢ်ခံ ပဟဲတုၤလၢဝ့ၢ်ခိၣ်​ Dili န့ၣ်လီၤ.

ပတၢ်အိၣ်မူဖဲအံၤန့ၣ်​ လီၤဆီလိာ်အသးဒီး ပတၢ်အိၣ်မူလၢ ကီၢ်အီးစတြ့လံယါဒိၣ်မးလီၤ. ပကဘၣ်စးထီၣ်​ မၤလိသ့ထီၣ်ပသးလၢ တၢ်ဆဲးတၢ်လၤအသီ, ကျိာ်, တၢ်အီၣ်တၢ်အီ ဒီးတၢ်အိၣ်တၢ်ဆိးအလီၢ်လီၤ. လၢတၢ်စံၣ်တဲၤတဲလီၤတၢ်မၤအပူၤန့ၣ်​ ညီနုၢ်ပထံၣ်ဘၣ်ဒီး ပှၤဖှီၣ်ပှၤယာ်, ပှၤလၢအတသ့လံာ်သ့လဲၢ် ဒီးပှၤလၢအသူၣ်ဟးဂီၤသးဟးဂီၤတဖၣ်လီၤ. ပထံၣ်ဘၣ်အဝဲသ့ၣ်အါဂၤန့ၣ်​ အတၢ်အိၣ်ဆူၣ်အိၣ်ချ့တဂ့ၤ ဒီးသူၣ်ဟးဂီၤသးဟးဂီၤ ခီဖျိလၢတၢ်ဒုးတၢ်ယၤဒီး တၢ်မၤဆူၣ်မၤဆိးအဃိလီၤ.a

ဘၣ်ဆၣ်​ မ့မ့ၢ်တၢ်စံၣ်တဲၤတဲလီၤတခီန့ၣ်​ လဲၤထီၣ်လဲၤထီဂ့ၤမး. အဒိ, ဘၣ်တဘျီ ယထံၣ်လိာ်သးဒီးပိာ်မုၣ်ဖိတဂၤ လၢအအိၣ်​ ၁၃ နံၣ်​ အမံၤမ့ၢ်မရံယၤ န့ၣ်လီၤ.b ပူၤကွံာ်စှၤကိာ်နံၣ်န့ၣ်​ အမိၢ်သံသဒၣ်အီၤ ဒီးအဝဲတအိၣ်ဘၣ်​ အပါကြီကြီဘၣ်. အဝဲအဲၣ်ဒိးမၤတၢ်မနုၤလၢ အတၢ်အိၣ်မူအပူၤလဲၣ်န့ၣ်​ အတသ့ၣ်ညါဝဲဘၣ်. ယနီၣ်ဘၣ်တဘျီဖဲ အဟီၣ်အခါအတဲဘၣ်ယၤ အတၢ်တူၢ်ဘၣ်တဖၣ်လီၤ. ဘၣ်ဆၣ်​ အတဲဘၣ်ယၤတၢ်သ့ၣ်တဖၣ်န့ၣ်​ ယတနၢ်ပၢၢ်ဘၣ်​ မ့ၢ်လၢယတဲအကျိာ် တဘၣ်ဂ့ၤဂ့ၤဘၣ်အဃိလီၤ. ယဃ့ထုဘါကဖၣ်လၢ ယဟိဝၤယွၤအအိၣ်​ ဒ်သိးကမၤစၢၤယၤလၢ ယကဟ့ၣ်ဂံၢ်ဟ့ၣ်ဘါ မရံယၤ အဂီၢ်လီၤ. ဒီးယဖးပၠးအီၤ လံာ်စီဆှံအဆၢလၢ ကဟ့ၣ်ဂံၢ်ဟ့ၣ်ဘါအီၤလီၤ. စှၤနံၣ်ဝံၤအလီၢ်ခံ ယထံၣ်ဘၣ်လၢ တၢ်မ့ၢ်တၢ်တီဆီတလဲ မရံယၤ အတၢ်ပာ်သူၣ်ပာ်သး ဒီးအတၢ်အိၣ်မူလီၤ. အဝဲဒိးဘျၢထံ ဒီးခဲအံၤအပှၤမၤလိလံာ်စီဆှံဖိ အိၣ်ဝဲခံဂၤလံ. မုၢ်မဆါတနံၤအံၤ မရံယၤ အိၣ်ဘၣ်လၢယဟိဝၤယွၤ အဟံၣ်ဖိဃီဖိဖးဒိၣ်အကျါ ဒီးဒိးန့ၢ်ဘၣ်တၢ်အဲၣ်​ လၢလၢပှဲၤပှဲၤလီၤ.

ယဟိဝၤယွၤဆိၣ်ဂ့ၤဝဲ တၢ်မၤလၢထံမိၣ်​ လဲးတံၣ်​ န့ၣ်လီၤ. လၢအနံၣ်တဆံအတီၢ်ပူၤန့ၣ်​ ပှၤလၢအကဲထီၣ်ယဟိဝၤပှၤအုၣ်အသး တယံာ်ဒံးဘၣ်တဖၣ်န့ၣ်​ အဝဲသ့ၣ်အါဂၤမၤပှၤလဲၤလၢညါ, ကဲထီၣ်တၢ်အိၣ်ဖှိၣ်အပှၤမၤစၢၤတၢ် ဒီးတၢ်အိၣ်ဖှိၣ်သးပှၢ်တနီၤလီၤ. အဂၤတနီၤန့ၣ်​ မၤစၢၤတၢ်လၢ ပှၤကွဲးကျိာ်ထံတၢ်အရူ ဒီးမၤစၢၤတၢ်လၢ တၢ်ကွဲးကျိာ်ထံလံာ်လဲၢ်လၢ အဘၣ်ထွဲဒီးလံာ်စီဆှံ လၢအဝဲသ့ၣ်အနီၢ်ကစၢ်အကျိာ်လီၤ. ဖဲယထံၣ်ဘၣ်​ အဝဲသ့ၣ်သးဝံၣ်တၢ်လၢ တၢ်အိၣ်ဖှိၣ်အပူၤအခါ အဝဲသ့ၣ်အမဲာ်ပှဲၤဒီး တၢ်နံၤတၢ်အ့ ဒီးဒိၣ်ထီၣ်ထီထီၣ်လၢ နီၣ်သးတခီန့ၣ်​ ယသးခုဒိၣ်မးလီၤ.

ယကသးခုထဲထဲအံၤန့ၣ်​ ယတဆိကမိၣ်ဘၣ်​ နီတဘျီဘၣ်

ပတၢ်အိၣ်မူလၢထံမိၣ်​ လဲးတံၣ်​ န့ၣ်​ လီၤဆီလိာ်သးဒီးပတၢ်အိၣ်မူ လၢကီၢ်အီးစတြ့လံယါ ဒိၣ်မးလီၤ. ဘၣ်ဆၣ်​ ယကသးခုထဲထဲအံၤန့ၣ်​ ယတဆိကမိၣ်ဘၣ်နီတဘျီဘၣ်. တဘျီတခီၣ်​ ပဘၣ်လဲၤဒိးဝဲ ဘၢး(စ်)ကါဖိလၢ အိၣ်ဒီးပှၤကညီပှဲၤပှဲၤ ဒီးပၣ်ဃုာ်တၢ်ဖိတၢ်လံၤ ဒ်သိးဒီးညၣ်ဃ့, တၢ်ဒိးတၢ်လၣ်တဖၣ်လီၤ. ဘၣ်တနံၤနံၤန့ၣ်​ ပလဲၤမၤလိလံာ်စီဆှံလၢပှၤဟံၣ်​ ဒီးတၢ်ကိၢ်တအိး ဒီးပဘၣ်ဆ့ၣ်နီၤလၢ ကီၤလၤဒ့လိၤ ဒီးဆီတဖၣ်ဟးဝ့ၤဝီၤ လၢဟံၣ်ပူၤန့ၣ်လီၤ. ယထံၣ်ဘၣ်​ တၢ်ကီတၢ်ခဲဒ်အံၤသနာ်က့ ယဆိကမိၣ်လၢ “တၢ်တခါအံၤဒုး ထံဆးလီၤ.”

ယမ့ၢ်ဆိကမိၣ်ထီၣ်က့ၤ တၢ်အိၣ်မူလၢညါန့ၣ်​ ယစံးဘျုးဘၣ်​ ယမိယပါဒိၣ်မး လၢအဝဲသ့ၣ်သိၣ်လိယၤ ယဟိဝၤယွၤအဂ့ၢ်လီၤ. ယထံၣ်ဘၣ်တၢ်ကီတၢ်ခဲ ဖဲယသးစၢ်အခါန့ၣ်​ အဝဲသ့ၣ်ဆီၣ်ထွဲမၤစၢၤယၤလီၤ. ယတၢ်အိၣ်မူန့ၣ်​ လီၤဂာ်ဒ်သိးဒီး တၢ်ကတိၤလၢ ကတိၤဒိ ၂၂:၆ အပူၤလီၤ. မ့ၢ်လၢယမိယပါထံၣ်ဘၣ်ဝဲလၢ ယၤဒီးယဝၤအဲလဲး မၤယဟိဝၤယွၤအတၢ်မၤအဃိ အဝဲသ့ၣ်သးခုလၢပဃိလီၤ. ဖဲ ၂၀၁၆ န့ၣ်​ ပစးထီၣ်မၤဝဲ ကဝီၤတၢ်မၤလၢ အီးစတြ့လံယါ အဝဲၤတြၢ်အဟီၣ်ကဝီၤလီၤ.

လၢညါန့ၣ်​ ယဟးစံၣ်တဲၤတဲလီၤတၢ်တမုာ်ဘၣ်​ ဘၣ်ဆၣ်​ ခဲအံၤန့ၣ်​ ယဟးစံၣ်တဲၤတဲလီၤတၢ် မုာ်ဒိၣ်မး. ယသ့ၣ်ညါလၢ တၢ်မ့ၢ်ကဲထီၣ်အသးလၢ ပတၢ်အိၣ်မူအပူၤဒ်လဲၣ်ဂ့ၤဒ်လဲၣ်ဂ့ၤ သနာ်က့ ပသးခုသ့ခီဖျိလၢ ပမၤယဟိဝၤယွၤအတၢ်မၤလၢ ပသးဒီဖျၢၣ်ညါအဃိလီၤ. ယမ့ၢ်တဲတီတီန့ၣ်​ ယမၤသကိးဘၣ်​ ယဟိဝၤယွၤအတၢ်မၤ ဒီးယဝၤအဲလဲး လၢ ၁၈ နံၣ်အတီၢ်ပူၤန့ၣ်​ မ့ၢ်တၢ်သးခုအဒိၣ်ကတၢၢ် လၢယတၢ်အိၣ်မူအပူၤလီၤ. ခဲအံၤ ပနၢ်ပၢၢ်ထီၣ်ဘၣ်​ ပှၤကွဲးထါစံးထီၣ်ပတြၢၤအတၢ်ကတိၤ လၢအတဲဘၣ်​ ယဟိဝၤယွၤလၢ “ကယဲၢ်ပှၤလၢ အသန့ၤအသးလၢနၤန့ၣ်​ မ်အသူၣ်ခုသးခု, သူၣ်ဖှံသးညီတထံၣ်ဃီ . . . ဒီးပှၤလၢအအဲၣ်နမံၤန့ၣ်​ မ်အသူၣ်ဖှံသးညီလၢ နပူၤတက့ၢ်.”—စံးထီၣ်ပတြၢၤ ၅:၁၁.