“လ့ၣ်ကွၢ်” ယဟိဝၤယွၤ အတၢ်ဂ့ၤတက့ၢ်

၁-၂. ဒ် စံးထီၣ်ပတြၢၤ ၃၄:၈ ပာ်ဖျါထီၣ်ဝဲအသိး ပမၤလိန့ၢ်ဘၣ်​ ယဟိဝၤယွၤ အတၢ်မၤဂ့ၤတၢ်ကသ့ဒ်လဲၣ်.

ထံၣ်တမှံကွၢ် ပှၤမၢနအီၣ်ကွၢ် တၢ်အီၣ်တခါလၢ နတအီၣ်ဘၣ်အီၤ နီတဘျီဘၣ်န့ၣ်တက့ၢ်. ဒ်သိးနကသ့ၣ်ညါ တၢ်အီၣ်အံၤအဝံၣ်ဧါတဝံၣ်ဧါအဂီၢ် နကကွၢ်ထံအီၤ, နကနၢကွၢ်အီၤ, နကသံကွၢ်ပှၤတ့အီၤဒ်လဲၣ်​ ဒီးနကသံကွၢ် ပှၤလၢအအီၣ်ဘၣ်ဝဲတဖၣ်​ အတၢ်ထံၣ်လီၤ. ဘၣ်ဆၣ်​ ဒ်သိးနကသ့ၣ်ညါ လီၤတံၢ်လီၤဆဲးအဂီၢ် နကဘၣ်အီၣ်ကွၢ်လၢ နနီၢ်ကစၢ်လီၤ.

^၂ ပသ့ၣ်ညါ ယဟိဝၤယွၤ တၢ်မၤဂ့ၤတၢ် သ့ခီဖျိ ပဖးလံာ်စီဆှံ ဒီးလံာ်လဲၢ်လၢ ပတၢ်ကရၢကရိ ထုးထီၣ်ဝဲတဖၣ်လီၤ. တကးဒံးဘၣ်​ ပသ့ၣ်ညါအီၤသ့ခီဖျိ ပနၢ်ဟူဘၣ်​ ပှၤဂၤတဲဘၣ်ဃးဒီး ယဟိဝၤယွၤမၤတ့ၢ်တၢ်လၢ အဝဲသ့ၣ်အဂီၢ် ဒ်လဲၣ်န့ၣ်လီၤ. ဖဲပ “လ့ၣ်ကွၢ်” ယဟိဝၤယွၤမ့ၢ်တၢ်ဂ့ၤအခါ ပကသ့ၣ်ညါထီၣ်လၢ အမ့ၢ်ကစၢ်ယွၤ ဒ်လဲၣ်တဂၤလဲၣ်. (ဖး စံးထီၣ်ပတြၢၤ ၃၄:၈ တက့ၢ်.) ပကကွၢ်သကိး တၢ်အဒိတခါ လၢပကလ့ၣ်ကွၢ် ယဟိဝၤယွၤ တၢ်မၤဂ့ၤတၢ်. ဘၣ်သ့ၣ်သ့ၣ်​ ပအဲၣ်ဒိးမၤ ယဟိဝၤယွၤ အတၢ်မၤလၢ တၢ်ဆၢကတီလၢပှဲၤ ဘၣ်ဆၣ်​ ဒ်သိးပကမၤလၢပှဲၤ ပဖီတၢၣ်အဂီၢ် ပကဘၣ်အိၣ်မူယိယိဖိ. တကးဒံးဘၣ်​ ပသ့ၣ်နီၣ်ထီၣ်က့ၤ ယ့ၣ်ၡူးအတၢ်အၢၣ်လီၤလၢ ပမ့ၢ်ပာ်ဆိ ယွၤအဘီအမုၢ်လၢ နီၣ်ဂံၢ်တၢန့ၣ်​ ယဟိဝၤယွၤ ကမၤလၢပှဲၤတၢ်လၢ ပလိၣ်ဘၣ်တဖၣ်လီၤ. ဘၣ်ဆၣ်​ ပမ့ၢ်တထံၣ်ဘၣ်​ တၢ်အၢၣ်လီၤအံၤ ဟဲလၢထီၣ်ပှဲၤထီၣ်​ လၢပနီၢ်ကစၢ် နီတဘျီဘၣ်မီၤ. (မးသဲ ၆:၃၃) လၢတၢ်န့ၣ်အလီၢ် ပကဘၣ်နာ်ယ့ၣ်ၡူး အတၢ်အၢၣ်လီၤဒီး ပမၤလီၤစှၤ ပတၢ်လၢာ်ဘူၣ်လၢာ်စ့, ပတၢ်ဖံးတၢ်မၤ ဒီးပပၣ်ဃုာ်အါထီၣ်လၢ တၢ်စံၣ်တဲၤတဲလီၤ တၢ်မၤအပူၤလီၤ. ဖဲပမၤဒ်န့ၣ်အခါ ပထံၣ်ဘၣ်လၢ ယဟိဝၤယွၤ သူၣ်အိၣ်သးအိၣ်ပှၤ သပှၢ်ကတၢၢ်. ဒီးပက “လ့ၣ်ကွၢ်” ဘၣ်ယဟိဝၤယွၤ အတၢ်ဂ့ၤလၢ ပနီၢ်ကစၢ်လီၤ.

၃. ဒ် စံးထီၣ်ပတြၢၤ ၁၆:၁, ၂ ပာ်ဖျါထီၣ်ဝဲအသိး ယဟိဝၤယွၤ မၤဂ့ၤတၢ်လၢ မတဂၤအဖီခိၣ်လဲၣ်.

^၃ ယဟိဝၤယွၤ “မၤဂ့ၤတၢ်ခဲလၢာ်” ဃုာ်ဒီးပှၤလၢအတသ့ၣ်ညါအီၤဘၣ်တဖၣ်လီၤ. (စံးထီၣ်ပတြၢၤ ၁၄၅:၉; မးသဲ ၅:၄၅) ဘၣ်ဆၣ်ပှၤလၢအအဲၣ်​ ယဟိဝၤယွၤဒီးမၤအတၢ်မၤလၢ အသးဒီဖျၢၣ်တဖၣ်န့ၣ်​ ဒိးန့ၢ်ဘၣ်တၢ်ဆိၣ်ဂ့ၤအါမးလီၤ. (ဖး စံးထီၣ်ပတြၢၤ ၁၆:၁, ၂ တက့ၢ်.) ပကကွၢ်သကိး ကျဲတနီၤလၢ ယဟိဝၤယွၤ မၤဂ့ၤတၢ်လၢ ပဖီခိၣ်ဒ်လဲၣ်န့ၣ်လီၤ.

၄. ယဟိဝၤယွၤမၤဂ့ၤတၢ်လၢ ပှၤလၢအသုးဘူးအသးလၢ အအိၣ်တဖၣ်န့ၣ်​ ဒ်လဲၣ်.

^၄ ဖဲပမၤထွဲ တၢ်လၢပမၤလိဘၣ်ဃးဒီး ယဟိဝၤယွၤအဂ့ၢ် တဘျီလၢ်လၢ်အခါ ကဲဘျုးဝဲလၢ ပဂီၢ်ဒ်လဲၣ်န့ၣ်​ ပထံၣ်ဘၣ်အီၤလီၤ. ဖဲပသ့ၣ်ညါထီၣ်​ အဂ့ၢ်ဂ့ၤဂ့ၤအခါ ပအဲၣ်အီၤဒိၣ်ထီၣ်​ ဒီးအဝဲမၤစၢၤပှၤဒ်သိး ပကမၤနၢၤကွံာ် ပလုၢ်လၢ်လၢ အတဂ့ၤဘၣ်တဖၣ်လီၤ. (ကလီးစဲ ၁:၂၁) ဒီးဖဲပဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်​ ဒီးဒိးဘျၢထံအခါ အဝဲဟ့ၣ်ပှၤ သးလၢအသ့ၣ်ညါဒၣ်တၢ်လၢအဂ့ၤ ဒီးပတၢ်ရ့လိာ်သးဒီးအီၤ ဘူးဒိၣ်ထီၣ်ဝဲလီၤ.—၁ ပ့းတရူး ၃:၂၁.

၅. လၢပတၢ်စံၣ်တဲၤတဲလီၤ တၢ်မၤအပူၤန့ၣ်​ ပထံၣ်ဘၣ်​ ယဟိဝၤယွၤ အတၢ်မၤဂ့ၤတၢ်ဒ်လဲၣ်.

^၅ ဖဲပပၣ်ဃုာ်လၢ တၢ်စံၣ်တဲၤတဲလီၤတၢ်မၤအခါ ပထံၣ်ဘၣ်​ ယဟိဝၤယွၤ အတၢ်မၤဂ့ၤတၢ်တဖၣ်လီၤ. မ့ၢ်နကဲပှၤလၢ အမဲာ်ဆှးသ့ဧါ. ယဟိဝၤယွၤ အခ့အပှၤအါဂၤန့ၣ်​ အမဲာ်ဆှးသ့လီၤ. ဘၣ်သ့ၣ်သ့ၣ်​ တချုးလၢ နကဲထီၣ်ဘၣ်​ ယဟိဝၤပှၤအုၣ်အသး ဒံးဘၣ်အခါ နတဆိကမိၣ်ဘၣ်လၢ နကလဲၤလၢပှၤလၢ နတသ့ၣ်ညါဘၣ်အဟံၣ်​ ဒီးတဲလံာ်စီဆှံ အဂ့ၢ်န့ၣ်ဘၣ်. ဘၣ်ဆၣ်​ ခဲအံၤန့ၣ်​ နမၤအီၤဒ်န့ၣ်လီၤ. တကးဒံးဘၣ်​ ခီဖျိလၢ ယဟိဝၤယွၤ မၤစၢၤနၤအဃိ နစံၣ်တဲၤတဲလီၤတၢ်မုာ်မးလီၤ. ဒီးယဟိဝၤယွၤ မၤစၢၤနၤလၢ ကျဲအါဘိလီၤ. ဖဲနထံၣ်ဘၣ်​ ပှၤထီဒါနၤလၢ တၢ်စံၣ်တဲၤတဲလီၤ တၢ်မၤပူၤအခါ ယဟိဝၤယွၤ မၤစၢၤနၤဒ်သိး နကပာ်သးမုာ်မုာ်အဂီၢ်လီၤ. တကးဒံးဘၣ်​ အဝဲမၤစၢၤနၤဒ်သိး နကသ့ၣ်နီၣ်ထီၣ်​ လံာ်စီဆှံအဆၢတဖၣ်​ လၢနကတဲဘၣ်​ ပှၤလၢအသးအိၣ်ဒိကနၣ်​ တၢ်ကစီၣ်တဖၣ်အဂီၢ်လီၤ. ဒီးတၢ်လီၢ်လၢ ပှၤတဒိကနၣ်​ ပတၢ်သးခုကစီၣ်​ ဘၣ်ဒၣ်လဲာ် အဝဲဟ့ၣ်နၤ တၢ်ဂံၢ်တၢ်ဘါ ဒ်သိး နကဆဲးစံၣ်တဲၤတဲလီၤတၢ် အဂီၢ်လီၤ.—ယံးရမံယၤ ၂၀:၇-၉.

၆. တၢ်သိၣ်လိလၢ ပဒိးန့ၢ်ဘၣ်န့ၣ်​ ပာ်ဖျါထီၣ်ဝဲ ယဟိဝၤယွၤအတၢ်မၤဂ့ၤတၢ်ဒ်လဲၣ်.

^၆ ယဟိဝၤယွၤပာ်ဖျါထီၣ်​ အတၢ်မၤဂ့ၤတၢ် ခီဖျိအဝဲသိၣ်လိပှၤလၢ တၢ်စံၣ်တဲၤတဲလီၤတၢ်မၤအပူၤလီၤ. (ယိၤဟၣ်​ ၆:၄၅) လၢနွံဖးဖီတၢ်အိၣ်ဖှိၣ်အဂီၢ်န့ၣ်​ ပထံၣ်ဘၣ်​ တၢ်ဟ့ၣ်ကူၣ်လၢ ပကတဲသကိးတၢ်ဒီး ပှၤဂၤအဂီၢ်လီၤ. ဒီးပှၤဟ့ၣ်ဂံၢ်ဟ့ၣ်ဘါပှၤလၢ ပကသူတၢ်အဒိတဖၣ်အံၤ လၢပတၢ်စံၣ်တဲၤတဲလီၤတၢ်မၤအပူၤလီၤ. လၢအခီၣ်ထံးခါန့ၣ်​ ပကသးကနိးလၢ ပကမၤကွၢ်တၢ်လၢအသီ ဘၣ်ဆၣ်​ ဖဲပမၤအီၤအခါ ပကထံၣ်ဘၣ်လၢ တၢ်ဟ့ၣ်ကူၣ်တဖၣ်အံၤန့ၣ်​ ကဲဘျုးဝဲလီၤ. လၢတၢ်အိၣ်ဖှိၣ်ဒီး တၢ်အိၣ်ဖှိၣ်ဖးဒိၣ်တဖၣ်န့ၣ်​ ပှၤဟ့ၣ်ဂံၢ်ဟ့ၣ်ဘါပှၤလၢ ပကမၤကွၢ်တၢ်စံၣ်တဲၤတဲလီၤ အကျိၤအကျဲလၢ အသီတဖၣ်လီၤ. အဃိ ပကမၤကွၢ်အီၤအဂီၢ် ပကဘၣ်ယိၣ်တၢ် ဘၣ်ဆၣ်​ ဖဲပမၤအီၤအခါ ပကဒိးန့ၢ်ဘၣ်​ ယဟိဝၤယွၤအတၢ်ဆိၣ်ဂ့ၤလီၤ. ခဲအံၤ ပကတဲသကိး ပတၢ်အိၣ်သးမ့ၢ်အိၣ်​ ဒ်လဲၣ်ဂ့ၤဒ်လဲၣ်ဂ့ၤ ပမ့ၢ်မၤကွၢ် တၢ်စံၣ်တဲၤတဲလီၤ အကျိၤအကျဲလၢအသီ ဒီးပမ့ၢ်နာ်န့ၢ် ယဟိဝၤယွၤန့ၣ်​ ပကဒိးန့ၣ်ဘၣ်​ ယဟိဝၤယွၤအတၢ်ဆိၣ်ဂ့ၤဒ်လဲၣ်. ဝံၤဒီး ပကကွၢ်သကိး ကျဲတနီၤလၢ ပပၣ်ဃုာ်အါထီၣ်​ လၢတၢ်စံၣ်တဲၤတဲလီၤတၢ်မၤ အပူၤသ့န့ၣ်လီၤ.

ယဟိဝၤယွၤဆိၣ်ဂ့ၤ ပှၤလၢအနာ်န့ၢ်အီၤတဖၣ်

၇. ဖဲပမၤအါထီၣ်​ တၢ်စံၣ်တဲၤတဲလီၤတၢ်မၤအခါ ပဒိးန့ၢ်ဘၣ်​ တၢ်ဆိၣ်ဂ့ၤမနုၤလဲၣ်.

^၇ ပသုးဘူးပသးလၢ ယဟိဝၤယွၤ အအိၣ်အါထီၣ်လီၤ. ပကကွၢ်သကိး တၢ်အိၣ်ဖှိၣ်သးပှၢ် စဲမၠိၤb အဂ့ၢ်လီၤ. အဝဲဒီးအမါန့ၣ်​ မၤကစၢ်ယွၤအတၢ်မၤလၢ ကီၢ်ခိၣ်လီၣ်ဘံၣ်ယၣ်လီၤ. ပှၤနီၢ်ဒီမါဝၤခံဂၤအံၤ မၤပှၤလဲၤလၢညါလၢ အနီၢ်ကစၢ်တၢ်လီၢ်န့ၣ်​ မုာ်ဝဲ ဘၣ်ဆၣ်​ အဝဲသ့ၣ်အဲၣ်ဒိး လဲၤမၤစၢၤတၢ်အိၣ်ဖှိၣ်လၢ အလိၣ်ဘၣ်အါထီၣ်​ ပှၤစံၣ်တဲၤတဲတၢ်ဖိလီၤ. ဒ်သိးအဝဲသ့ၣ်ကမၤလၢပှဲၤ အဖီတၢၣ်အဂီၢ် အဝဲသ့ၣ်အိၣ်မူက့ၤ ယိယိဖိလီၤ. ဒီပုၢ်ဝဲၢ်ခွါစဲမၠိၤ တဲဝဲလၢ “ပအိၣ်မူမၤထွဲဝဲ မးသဲ ၆:၃၃ ဒီးပတပှ့ၤတၢ်လၢ ပတလိၣ်ဘၣ်တဖၣ်ဘၣ်. ဘၣ်ဆၣ်​ တၢ်အကီကတၢၢ် လၢပဂီၢ်န့ၣ်မ့ၢ်ဝဲ ပဘၣ်ပာ်တီၢ်က့ၤ ပဟံၣ်ပဃီလီၤ. ပသူၣ်ထီၣ်ပဟံၣ်လၢပဘၣ်သးဒီး ပတဘၣ်ဟ့ၣ်စ့ၢ်ကီးဟံၣ်လဲဘၣ်.” ဖဲအဝဲသ့ၣ်လဲၤသုးအသးလၢ တၢ်အိၣ်ဖှိၣ်အသီအခါ အဝဲသ့ၣ်အတၢ်လၢာ်ဘူၣ်လၢာ်စ့ၤ စှၤန့ၢ်ဒံးလၢအပူၤကွံာ်လီၤ. ဒီပုၢ်ဝဲၢ်ခွါစဲမၠိၤ တဲဝဲလၢ “ပထံၣ်ဘၣ်ယဟိဝၤယွၤ ဟံးစုနဲၣ်ကျဲပတၢ်အိၣ်မူ ဒီးစံးဆၢပတၢ်ထုကဖၣ်​ လၢကျဲဒ်လဲၣ်န့ၣ်လီၤ. ယဟိဝၤယွၤအတၢ်ဘၣ်သးဒီး အတၢ်အဲၣ်ဒ်အံၤန့ၣ်​ ပတလဲၤခီဖျိဘၣ်အီၤနီတဘျီဘၣ်.” မ့ၢ်နမၤအါထီၣ်​ တၢ်စံၣ်တဲၤတဲလီၤတၢ်မၤလၢ ကျဲတဘိဘိ ကသ့ဧါ. နမၤမ့ၢ်သ့န့ၣ်​ နတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်​ ဒီးအဝဲကကွၢ်ထွဲနတၢ်လိၣ်ဘၣ်တဖၣ်လီၤ.—စံးထီၣ်ပတြၢၤ ၁၈:၂၅.

၈. ဘၣ်ဃးဒီး ဒီပုၢ်ဝဲၢ်အါဘဲၤ ဒီးအမါဝံးထိရံယါ အတၢ်လဲၤခီဖျိန့ၣ်​ ပမၤလိန့ၢ်တၢ်မနုၤလဲၣ်.

^၈ ပဒိးန့ၢ်ဘၣ်တၢ်သးခု လၢပတၢ်စံၣ်တဲၤတဲလီၤတၢ်မၤအပူၤလီၤ. ပကကွၢ်သကိး ဒီပုၢ်ဝဲၢ်အါဘဲၤ ဒီးအမါ ဝံးထိရံယါ လၢအမၤပှၤလဲၤလၢညါလၢ ခဲကၢၤစထၢၤ အဂ့ၢ်န့ၣ်လီၤ. အဝဲသ့ၣ်အိၣ်မူယိယိဖိအဃိ အဝဲသ့ၣ်မၤဝဲမူဒါ တခါဂ့ၤတခါဂ့ၤသ့ဝဲ တကးဒံးဘၣ်​ အဝဲသ့ၣ်မၤဘၣ်တၢ်လၢ တၢ်သူၣ်ထီၣ်ဘှီထီၣ်တကပၤလီၤ. ဒီပုၢ်ဝဲၢ်ခွါအါဘဲၤ တဲဝဲလၢ “မူဒါတခါဘၣ်တခါလၢ ပဒိးန့ၢ်ဘၣ်အီၤန့ၣ်​ ပမၤအီၤလၢအဂ့ၤကတၢၢ်လီၤ. ပမၤတၢ်ဒီတနံၤကျၢၤဝံၤ ပလီၤဘှံးလီၤတီၤ ဘၣ်ဆၣ်​ ပသးခု မ့ၢ်လၢပသ့ၣ်ညါလၢ ပသူဘၣ်ပတၢ်ဂံၢ်တၢ်ဘါလၢ ယဟိဝၤယွၤတၢ်မၤပူၤအဃိလီၤ. တကးဒံးဘၣ်​ ပဒိးန့ၢ်ဘၣ်​ တံၤသကိးအသီအါဂၤဒီး ပအိၣ်ဒီးတၢ်လဲၤခီဖျိလၢ အပှဲၤဒီးတၢ်သးခုလီၤ.”—မၢ်ကူး ၁၀:၂၉, ၃၀.

၉. ဒီပုၢ်ဝဲၢ်မုၣ်တဂၤလၢအအိၣ်ဒီး တၢ်ကီတၢ်ခဲတဖၣ်န့ၣ်​ အမၤအါထီၣ်​ ယဟိဝၤယွၤအတၢ်မၤဒ်လဲၣ်​ ဒီးအဒိးန့ၢ်ဘၣ်အဘျုးဒ်လဲၣ်.

^၉ ပတၢ်ကီတၢ်ခဲ မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ သနာ်က့ ပမၤယဟိဝၤယွၤ အတၢ်မၤလၢ တၢ်သးခုအပူၤသ့ဝဲ. အဒိ, ဒီပုၢ်ဝဲၢ်မုၣ်သးပှၢ်မံရဲၣ်​ အမ့ၢ်မုၣ်ကမဲလၢအအိၣ်လၢ အၤဖြံၤကၤမုၢ်နုာ် ဒီးအမ့ၢ်ဝဲကသံၣ်သရၣ်မုၣ်လီၤ. ဖဲအအိၣ်ဘှံးလၢ တၢ်မၤအခါ အဝဲစးထီၣ်မၤ ပှၤလဲၤလၢညါလီၤ. ဒီပုၢ်ဝဲၢ်မုၣ်မံရဲၣ်​ အိၣ်ဒီးစုကမဲာ်ဆါ ခီၣ်ကမဲာ်ဆါတၢ်ဆါ အဃိ အဝဲဟးစံၣ်တဲၤတဲလီၤတၢ် တဟံၣ်ဘၣ်တဟံၣ်​ ကဲထဲတနၣ်ရံၣ်ဧိၤလီၤ. ဘၣ်ဆၣ်​ အဝဲမၤတၢ်လၢ တၢ်စံၣ်တဲၤတဲလီၤလၢ ကမျၢၢ်အမဲာ်ညါ န့ၢ်အါမး. ဒီးအပှၤမၤလိလံာ်စီဆှံဖိ ဒီးတၢ်က့ၤဟးအိၣ်သကိးကဒါက့ၤ အိၣ်တဘျုးခါညါ. ဒီးအကျါတနီၤန့ၣ်​ ဒီပုၢ်ဝဲၢ်မုၣ်ဆဲးကျိးအဝဲသ့ၣ်လၢ လီတဲစိအပူၤလီၤ. တၢ်မနုၤ ထိၣ်ဟူးထိၣ်ဂဲၤထီၣ်​ ဒီပုၢ်ဝဲၢ်မုၣ်မံရဲၣ်​ လၢကမၤအါထီၣ်​ ယဟိဝၤယွၤအတၢ်မၤလဲၣ်. အတဲဝဲလၢ “ယအဲၣ်​ ယဟိဝၤယွၤဒီး ယ့ၣ်ၡူးခရံာ်လၢ ယသးဒီဖျၢၣ်ညါ. ဒီးယဃ့ယဟိဝၤယွၤလၢ ကမၤစၢၤယၤဒ်သိး ယကမၤအတၢ်မၤ လၢအဂ့ၤကတၢၢ်လီၤ.”—မးသဲ ၂၂:၃၆, ၃၇.

၁၀. ဒ် ၁ ပ့းတရူး ၅:၁၀ ပာ်ဖျါထီၣ်ဝဲအသိး ဒ်သိးပကဒိးန့ၢ်ဘၣ်​ တၢ်သိၣ်လိလၢ ယဟိဝၤယွၤအအိၣ်အဂီၢ် ပကဘၣ်မၤ တၢ်မနုၤလဲၣ်.

^၁၀ ပဒိးန့ၢ်ဘၣ်အါထီၣ်​ တၢ်သိၣ်လိလၢ ယဟိဝၤယွၤအအိၣ်လီၤ. ဒီပုၢ်ဝဲၢ်ခွါခဲနံၤ မၤပှၤလဲၤလၢညါလၢ Mauritius န့ၣ်​ ဒိးန့ၢ်ဘၣ်ဝဲ တၢ်သိၣ်လိလၢ ယဟိဝၤယွၤအအိၣ်လီၤ. ဖဲအမၤလိ တၢ်မ့ၢ်တၢ်တီအခါ အဝဲဟးထီၣ်ကွံာ်လၢ ဖၠၣ်စိမိၤကၠိ ဝံၤဒီးအဒိးဘျၢထံ ဒီးစးထီၣ်မၤယဟိဝၤယွၤ အတၢ်မၤလၢ ဆၢကတီၢ်လၢပှဲၤလီၤ. အဝဲတဲဝဲလၢ “ယဂုာ်ကျဲးစၢးအိၣ်မူ ဒ်ဝံယၡါယၤ အတၢ်ကတိၤလၢ ‘ကွၢ်ကွၢ်, ယၤလီၤ. မၢလီၤယၤတက့ၢ်.’” (ယၡါယၤ ၆:၈) ဒီပုၢ်ဝဲၢ်ခွါခဲနံၤ မၤစၢၤဘၣ်တၢ်လၢ တၢ်သူၣ်ထီၣ်ဘှီထီၣ်​ တၢ်အါဘျီဒီး အမၤစၢၤတၢ်လၢ တၢ်ကွဲးကျိာ်ထံတၢ် စ့ၢ်ကီးလီၤ. အတဲဝဲလၢ “တၢ်သိၣ်လိလၢ ယဒိးန့ၢ်ဘၣ်တဖၣ်န့ၣ်​ မၤစၢၤယၤလၢ ယကအိၣ်ဒီး တၢ်သ့တၢ်ဘၣ်လၢ ယကမၤလၢပှဲၤ ယမူဒါအဂီၢ်လီၤ.” ဘၣ်ဆၣ်​ အဝဲဒိးန့ၢ်ဘၣ်​ တၢ်သိၣ်လိအါန့ၢ်ဒံး တၢ်လၢအကဘၣ်မၤဝဲတဖၣ်လီၤ. အဆဲးတဲဝဲလၢ “ယသ့ၣ်ညါဘၣ်လၢ ယမၤတၢ်တသ့ခဲလၢာ်ဘၣ်​ ဒီးယကဘၣ်မၤအါထီၣ်​ တၢ်ဂ့ၤတၢ်ဝါတဖၣ်​ ဒ်သိးယကကဲထီၣ်​ ယဟိဝၤယွၤအခ့အပှၤ လၢအမၤဆူၣ်ဆူၣ်​ လၢယဟိဝၤယွၤဒီး ဒီပုၢ်ဝဲၢ်တဖၣ်အဂီၢ်လီၤ.” (ဖး ၁ ပ့းတရူး ၅:၁၀ တက့ၢ်.) ဘၣ်မနုၤအဃိ ပကဘၣ်​ သမံသမိးလီၤက့ၤ ပတၢ်အိၣ်သးတဖၣ်လဲၣ်. ဘၣ်သ့ၣ်သ့ၣ်​ နကမၤ တၢ်ဆီတလဲတနီၤ ဒ်သိးနကဒိးန့ၢ်ဘၣ်​ တၢ်သိၣ်လိလၢ ယဟိဝၤယွၤအအိၣ်လီၤ.

၁၁. ဒီပုၢ်ဝဲၢ်မုၣ်လၢ ကလံၤထံး ခိၣ်ရံယါ ဂုာ်ကျဲးစၢးပၣ်ဃုာ်လၢတၢ်စံၣ်တဲၤတဲလီၤ တၢ်မၤအပူၤဒ်လဲၣ်​ ဒီးမၤဝဲဒ်အံၤအဃိ အဘျုးအိၣ်ဝဲဒ်လဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)

^၁၁ ပှၤလၢအမၤ ယဟိဝၤယွၤအတၢ်မၤ အနံၣ်ယံာ်လံဒၣ်လဲာ် လိၣ်ဘၣ်တၢ်သိၣ်လိလၢ ကဟံးထီၣ်ဖီၣ်ထီၣ်​ မူဒါအသီအဂီၢ်လီၤ. ဖဲ COVID-19 တၢ်ဆါသံသတြိာ် အဆၢကတီၢ်န့ၣ်​ တၢ်အိၣ်ဖှိၣ်သးပှၢ်လၢ ကလံၤထံး ခိၣ်ရံယါ တဲဝဲလၢ “ပှၤတနီၤလၢ အဆိကမိၣ်ဝဲလၢ အဟးစံၣ်တဲၤတဲလီၤ တၢ်တသ့ဘၣ်​ ခီဖျိလၢ အတၢ်အိၣ်ဆူၣ်အိၣ်ချ့ တဂ့ၤဘၣ်အဃိန့ၣ်​ ခဲအံၤအဝဲသ့ၣ်​ စံၣ်တဲၤတဲလီၤတၢ်လၢ လီတဲစိအပူၤလီၤ. ဒီပုၢ်ဝဲၢ်မုၣ်သးပှၢ် လၢအသးနံၣ်အိၣ်​ ၈၀ ဘျဲၣ်သၢဂၤန့ၣ်​ မၤလိဝဲ စဲးဖီကဟၣ်​ အကျိၤအကျဲအသီ ဒီးစးထီၣ်ပၣ်ဃုာ်လၢ တၢ်စံၣ်တဲၤတဲလီၤတၢ် အကျိၤအကျဲ အသီတဖၣ်​ ဘူးကအိၣ်​ ကိးနံၤဒဲး ဃၣ်ဃၣ်ညါ.” (စံးထီၣ်ပတြၢၤ ၉၂:၁၄, ၁၅) မ့ၢ်နအဲၣ်ဒိး ပၣ်ဃုာ်အါထီၣ်​ လၢတၢ်စံၣ်တဲၤတဲလီၤ တၢ်မၤအပူၤ ဒီးလ့ၣ်ကွၢ် ယဟိဝၤယွၤ အတၢ်မၤဂ့ၤတၢ်တဖၣ်န့ၣ်ဧါ. ဆိကမိၣ်ထီၣ်​ ခီၣ်ခါတနီၤလၢ နကမၤလၢပှဲၤ နဖီတၢၣ်န့ၣ်တက့ၢ်.

နမၤလၢပှဲၤနဖီတၢၣ်​ ကသ့ဒ်လဲၣ်

၁၂. ပှၤလၢအသန့ၤအသးလၢ ယဟိဝၤယွၤန့ၣ်​ ယဟိဝၤယွၤမၤစၢၤအီၤဒ်လဲၣ်.

^၁၂ သန့ၤနသးလၢ ယဟိဝၤယွၤတက့ၢ်. ပမ့ၢ်နာ်န့ၢ်ယဟိဝၤယွၤ ဒီးမၤအတၢ်မၤ လၢအဂ့ၤကတၢၢ်န့ၣ်​ အဝဲအၢၣ်လီၤပှၤလၢ ကဆိၣ်ဂ့ၤပှၤလီၤ. (မၤလကံ ၃:၁၀) ဒီပုၢ်ဝဲၢ်မုၣ်ဖဲဘိလၤ လၢအအိၣ်လၢ ခိၣ်လီၣ်ဘံၣ်ယၣ်န့ၣ်​ အထံၣ်ဘၣ်ဝဲ ယဟိဝၤယွၤ မၤလၢပှဲၤထီၣ်​ အတၢ်အၢၣ်လီၤ လၢအဖီခိၣ်လီၤ. အဝဲအဲၣ်ဒိး မၤပှၤလဲၤလၢညါ ဖဲအဒိးဘျၢထံဝံၤအခါလီၤ. ဘၣ်ဆၣ်​ အကဘၣ်မၤတၢ်မၤလၢ ကမၤစၢၤ အဟံၣ်ဖိဃီဖိအဂီၢ်လီၤ. အဃိ ဖဲအအိၣ်ဘှံးက့ၤလၢ အတၢ်မၤအဆၢကတီၢ် အဝဲဃ့ဘါထုကဖၣ်​ လၢယဟိဝၤယွၤအအိၣ်ဒ်သိး ကမၤစၢၤအီၤအဂီၢ်လီၤ. အတဲဝဲလၢ “ညီနုၢ် ပှၤတီၣ်ထီၣ်စ့လၢ ပဒိၣ်အအိၣ်ကန့ၢ်အဂီၢ် ပှၤဘၣ်အိၣ်ခိးဖးယံာ်ညါ. ဘၣ်ဆၣ်​ မ့မ့ၢ်ယၤန့ၣ်​ ယတီၣ်ထီၣ်အီၤ တလါဝံၤအလီၢ်ခံ ပှၤတူၢ်လိာ်ဝဲလီၤ. အဃိ ယကမၢကမၣ်ဒိၣ်မး.” ခံလါဝံၤအလီၢ်ခံ ဒီပုၢ်ဝဲၢ်မုၣ်အံၤမၤ ပှၤလဲၤလၢညါလီၤ. ခဲအံၤအသးနံၣ်အိၣ်​ ၇၀ ဘျဲၣ်လံဒီး အမၤပှၤလဲၤညါအိၣ်ဝဲ အနံၣ်​ ၂၀ ဘျဲၣ်လံ. ဖဲန့ၣ်အဆၢကတီၢ် အမၤစၢၤဘၣ်ပှၤ ၈ ဂၤလၢ ကဲထီၣ်ဘၣ်​ ယဟိဝၤပှၤအုၣ်အသးလီၤ. အတဲဝဲလၢ “တဘျီတခီၣ်​ ယတူၢ်ဘၣ်လၢ ယဂံၢ်စၢ်ဘါစၢ် သနာ်က့ ယဟိဝၤယွၤမၤစၢၤယၤ ကိးနံၤဒဲးလၢ ယကမၤလၢပှဲၤ ယဖီတၢၣ်အဂီၢ်လီၤ.”

၁၃-၁၄. ဒ်သိးနကနာ်န့ၢ် ယဟိဝၤယွၤ ဒီးမၤအါထီၣ်​ တၢ်စံၣ်တဲၤတဲလီၤ တၢ်မၤအဂီၢ် မတဂၤအဒိအတဲာ် မၤစၢၤနၤသ့လဲၣ်.

^၁၃ မၤလိန့ၢ်တၢ်လၢ ပှၤလၢအသန့ၤအသးလၢ ယဟိဝၤယွၤအအိၣ်န့ၣ်တက့ၢ်. ပှၤလၢ အမၤယဟိဝၤယွၤ အတၢ်မၤ ဆူၣ်ဆူၣ်တဖၣ်​ အဒိအတဲာ်န့ၣ်​ ပထံၣ်ဘၣ်အီၤသ့လၢ လံာ်စီဆှံအပူၤလီၤ. ဖဲယဟိဝၤယွၤ အခ့အပှၤတဖၣ်​ နာ်န့ၢ်အီၤအခါ ယဟိဝၤယွၤဆိၣ်ဂ့ၤ အဝဲသ့ၣ်န့ၣ်​ ပထံၣ်ဘၣ်​ အဒိအတဲာ် အိၣ်အါမးလီၤ. အဒိ, ဖဲစီၤအၤဘြၤဟၣ်​ ပာ်တ့ၢ်အဟံၣ်အဃီ ဒီး “ကဘၣ်လဲၤလၢ တၢ်လီၢ်ဖဲလဲၣ်န့ၣ်​ အတသ့ၣ်ညါဝဲဘၣ်” အခါ ယဟိဝၤယွၤ ဆိၣ်ဂ့ၤအီၤလီၤ. (ဧ့ၤဘြံၤ ၁၁:၈) ဖဲစီၤယၤကိာ် ကနိလိာ်သးဒီး မူခိၣ်ကလူးဝံၤအလီၢ်ခံ အဒိးန့ၢ်ဘၣ်ဝဲ တၢ်ဆိၣ်ဂ့ၤ လီၤဆီတခါလီၤ. (၁ မိၤၡ့ ၃၂:၂၄-၃၀) ဖဲပှၤလုၢ်တၢ်ဒိၣ်တဖၣ်​ ယီၢ်လီၤဝဲထံကျိယၢ်ဒ့ၣ်​ ဝံၤအလီၢ်ခံမး ပှၤအံၣ်စရ့လးဖိ လၢကနုာ်လီၤလၢ ကီၢ်တၢ်စံးပာ်တဖၣ်​ ခီဂာ်ဝဲ ထံကျိသ့ဝဲလီၤ.—ယိၤၡူ ၃:၁၄-၁၆.

^၁၄ မုၢ်မဆါတနံၤအံၤ ပှၤလၢအသန့ၤအသးဒီး ယဟိဝၤယွၤဒီး ဒိးန့ၢ်ဘၣ်တၢ်ဆိၣ်ဂ့ၤန့ၣ်​ နမၤလိန့ၢ်တၢ်လၢ အဝဲသ့ၣ်အအိၣ်သ့လီၤ. အဒိ, ဒီပုၢ်ဝဲၢ်ခွါဖ့ထၢၤ ဒီးအမါဒၤယဲနၤ ဖးဝဲဒီပုၢ်ဝဲၢ်မုၣ်ခွါ လၢအမၤအါထီၣ်​ ယဟိဝၤယွၤ အတၢ်မၤတဖၣ်​ အဂ့ၢ်လီၤ. အဝဲသ့ၣ်အဂ့ၢ်န့ၣ်အိၣ်လၢ တၢ်ဂ့ၢ်လၢအခိၣ်တီမ့ၢ်ဝဲ “They Offered Themselves Willingly.”c ဒီပုၢ်ဝဲၢ်ခွါဖ့ထၢၤ တဲဝဲလၢ “ဖဲပဖးအဝဲသ့ၣ်​ တၢ်လဲၤခီဖျိအခါ လီၤဂာ်လၢ ပကွၢ်ဝဲပှၤတဂၤ အီၣ်တၢ်အီၣ်​ ဝံၣ်ဝံၣ်ဘဲဘဲလီၤ. ပဆဲးကွၢ်အီၤ ဒီးပတူၢ်ဘၣ်လၢ ပအဲၣ်ဒိး ‘လ့ၣ်ကွၢ်, ဒီးထံၣ်လၢ ယွၤမ့ၢ်တၢ်ဂ့ၤ’ လီၤ.” လၢတၢ်ဂ့ၢ်အံၤအဃိ ဒီပုၢ်ဝဲၢ်ခွါဖ့ထၢၤ ဒီးအမါဒၤယဲနၤ လဲၤမၤစၢၤတၢ်လၢ တၢ်လီၢ်လၢပှၤလိၣ်ဘၣ်​ တၢ်မၤစၢၤလီၤ. မ့ၢ်နဖးဘၣ်​ တၢ်လဲၤခီဖျိ ဒ်န့ၣ်စ့ၢ်ကီးဧါ. မ့ၢ်နကွၢ်တၢ်ဂီၤမူ ဘၣ်ဃးဒီး Witnessing in Isolated Territory—Australia and Witnessing in Isolated Territory—Ireland လၢအအိၣ်လၢ jw.org အပူၤဧါ. တၢ်ဂ့ၢ်သ့ၣ်တဖၣ်အံၤ ကမၤစၢၤနၤလၢ နကမၤအါထီၣ်​ နတၢ်စံၣ်တဲၤတဲလီၤ တၢ်မၤလီၤ.

၁၅. တံၤသကိးလၢအဂ့ၤန့ၣ်​ မၤစၢၤပှၤဒ်လဲၣ်.

^၁၅ ဃုထၢတံၤသကိးလၢ အဂ့ၤတက့ၢ်. ဖဲပအိၣ်ဒီးပှၤဂၤအခါ ညီဒိၣ်မးလၢ ပကအီၣ်ကွၢ်တၢ်အီၣ်လၢ ပတအီၣ်ဘၣ်ဝဲ နီတဘျီဘၣ်. ဒ်န့ၣ်အသိး ပမ့ၢ်ရ့ဒီးပှၤလၢအပာ် ယဟိဝၤယွၤလၢ နီၣ်ဂံၢ်တၢန့ၣ်​ ပဝဲစ့ၢ်ကီး ပကအဲၣ်ဒိးမၤအါထီၣ်​ ယဟိဝၤယွၤအတၢ်မၤလီၤ. ဒီပုၢ်ဝဲၢ်ခွါခဲၣ်​ ဒီးအမါဘရါနံၤခၤ န့ၣ်လဲၤခီဖျိဘၣ်ဝဲလၢ အနီၢ်ကစၢ်လီၤ. ဒီပုၢ်ဝဲၢ်ခွါခဲၣ်​ တဲဝဲလၢ “ပဟံၣ်ဖိဃီဖိ ဒီးပတံၤသကိးတဖၣ်​ ဟ့ၣ်ဂံၢ်ဟ့ၣ်ဘါပှၤလၢ ပကမၤကွၢ် ယဟိဝၤယွၤတၢ်မၤလၢ ကျဲလၢအဂၤလီၤ. ပသ့ၣ်ညါထီၣ်ဘၣ်လၢ ပမ့ၢ်ရ့ဒီးပှၤလၢ အပာ်ယဟိဝၤယွၤ လၢနီၣ်ဂံၢ်တၢန့ၣ်​ ပကအဲၣ်ဒိးမၤအါထီၣ်​ ယဟိဝၤယွၤတၢ်မၤ လၢကျဲလၢအဂၤလီၤ.” ခဲအံၤန့ၣ်​ ဒီပုၢ်ဝဲၢ်ခွါခဲၣ်​ ဒီးအမါန့ၣ်​ မၤဝဲပှၤလဲၤလၢညါလီၤဆီလၢ စဲဘံယါ အပူၤလီၤ.

၁၆. ယ့ၣ်ၡူးဟ့ၣ်တၢ်အဒိ ဖဲ လူၤကၣ်​ ၁၂:၁၆-၂၁ န့ၣ်​ ပာ်ဖျါထီၣ်ဝဲလၢ ဘၣ်မနုၤအဃိ ပကဘၣ်သးအိၣ်​ တူၢ်ဆါပသးလဲၣ်.

^၁၆ ဟ့ၣ်လီၤသးလၢ ယဟိဝၤယွၤအဂီၢ်တက့ၢ်. ပကမၤတၢ်ဘၣ်​ ယဟိဝၤယွၤသးအဂီၢ် ပတဘၣ်​ ဟ့ၣ်ၡူကွံာ် တၢ်ခဲလၢာ်ဘၣ်. (စံၣ်တဲၤတဲလီၤတၢ် ၅:၁၉, ၂၀) ဘၣ်ဆၣ်​ ပမ့ၢ်တမၤအါထီၣ်​ ယဟိဝၤယွၤအတၢ်မၤ ခီဖျိပတအဲၣ်ဒိး ဟ့ၣ်ၡူကွံာ် တၢ်တမံၤမံၤဘၣ်န့ၣ်​ ပကလီၤဂာ်ဒ် ပှၤပိာ်ခွါလၢ ယ့ၣ်ၡူးဟ့ၣ်ဝဲ တၢ်အဒိလၢ အဝဲမၤတၢ်ဆူၣ်ဆူၣ်လၢ အကအိၣ်မူဘၣ်​ မုာ်မုာ်ခုၣ်ခုၣ်အဂီၢ် သနာ်က့ အဝဲတမၤ ယဟိဝၤယွၤတၢ်မၤဘၣ်. (ဖး လူၤကၣ်​ ၁၂:၁၆-၂၁ တက့ၢ်.) ဒီပုၢ်ဝဲၢ်ခွါခရံာ်ၡၢၤ လၢအအိၣ်လၢ ကီၢ်ဖြၣ်စ့ၣ်န့ၣ်​ တဲဝဲလၢ “ယတဟ့ၣ်​ ယဟိဝၤယွၤ ဒီးယဟံၣ်ဖိဃီဖိ တၢ်ဆၢကတီၢ်ဒီး တၢ်ဂံၢ်တၢ်ဘါလၢ အဂ့ၤကတၢၢ်ဘၣ်.” ဒီးဒီပုၢ်ဝဲၢ်ခွါဒီးအမါအံၤ ဆၢတဲာ်လီၤအသးလၢ ကမၤဝဲ ပှၤလဲၤလၢညါလီၤ. ဘၣ်ဆၣ်​ ဒ်သိးမၤဝဲ ပှၤလဲၤလၢညါကန့ၢ်အဂီၢ် ကဘၣ်ပာ်တ့ၢ်ကွံာ် အတၢ်မၤတဖၣ်လီၤ. အဝဲသ့ၣ်စးထီၣ်​ မၤဝဲ တၢ်ကဆှဲကဆှီတၢ်မၤ ဒ်သိးကလုၢ်အီၣ်​ သးသမူအဂီၢ်လီၤ. အဝဲသ့ၣ်တဒိးန့ၢ်ဘၣ်​ ကျိၣ်စ့အါအါဘၣ်​ သနာ်က့ သးမံဝဲလီၤ. ဒ်သိးအဝဲသ့ၣ်ကမၤဘၣ်​ ပှၤလဲၤလၢညါအဂီၢ် ဘၣ်တူၢ်ဆါအသးန့ၣ်​ မ့ၢ်အဝဲသ့ၣ်သးခုဧါ. ဒီပုၢ်ဝဲၢ်ခွါတဲဝဲလၢ “ပဟးစံၣ်တဲၤတဲလီၤတၢ် မုာ်ဒိၣ်ထီၣ်​ ဒီးပထံၣ်ဘၣ်​ ပှၤမၤလိလံာ်စီဆှံ ဒီးပှၤလၢပက့ၤဟးကဒါက့ၤ လၢအအိၣ်တဖၣ်​ မၤလိယဟိဝၤယွၤအဂ့ၢ်န့ၣ်​ ပသးခုဒိၣ်မးလီၤ.”

၁၇. ဘၣ်မနုၤအဃိ ကီလၢပကမၤကွၢ် တၢ်စံၣ်တဲၤတဲလီၤကျိၤကျဲ လၢအသီလဲၣ်.

^၁၇ မၤကွၢ်တၢ်စံၣ်တဲၤတဲလီၤ ကျိၤကျဲအသီ အကလုာ်ကလုာ်တက့ၢ်. (မၤတၢ် ၁၇:၁၆, ၁၇; ၂၀:၂၀, ၂၁) ဒီပုၢ်ဝဲၢ်မုၣ်ၡဲလ့ၤ လၢအမၤပှၤလဲၤလၢညါ လၢကီၢ်အမဲရကၤန့ၣ်​ ဖဲ COVID-19 တၢ်ဆါရၤလီၤသး အဆၢကတီၢ် အဝဲမၤဝဲ တၢ်စံၣ်တဲၤတဲလီၤတၢ်မၤ အကျိၤအကျဲလၢ အသီလီၤ. အခီၣ်ထံးခါန့ၣ်​ အကစံၣ်တဲၤတဲလီၤတၢ်လၢ လီတဲစိပူၤအဂီၢ် အဝဲမၤဝဲတဘူၣ်ဘၣ်. ဘၣ်ဆၣ်​ ဖဲကဝီၤအပှၤကွၢ်တၢ် ဟဲဟးလၢအဝဲသ့ၣ်​ အတၢ်အိၣ်ဖှိၣ်ဒီး မၤလိအဝဲသ့ၣ်လၢ ကဘၣ်စံၣ်တဲၤတဲလီၤတၢ်လၢ လီတဲစိပူၤဒ်လဲၣ်​ ဝံၤအလီၢ်ခံ အဝဲစးထီၣ်​ စံၣ်တဲၤတဲလီၤတၢ်လၢ လီတဲစိပူၤထီဘိလီၤ. ဒီပုၢ်ဝဲၢ်မုၣ်အံၤ တဲဝဲလၢ “ဖဲအခီၣ်ထံးခါန့ၣ်​ ယသးပျံၤတၢ် ဘၣ်ဆၣ်​ အခဲအံၤဒု ယစံၣ်တဲၤတဲလီၤတၢ် မုာ်ဒိၣ်မး. ပစံၣ်တဲၤတဲလီၤဘၣ်ပှၤလၢ လီတဲစိပူၤန့ၣ်​ အါန့ၢ်ဒံး ပလဲၤလၢပှၤဟံၣ်​ တဟံၣ်ဘၣ်တဟံၣ်လီၤ.”

၁၈. ဖဲပထံၣ်ဘၣ်​ တၢ်ကီတၢ်ခဲအခါ တၢ်မနုၤမၤစၢၤပှၤသ့လဲၣ်.

^၁၈ ပာ်လီၤဖီတၢၣ်​ ဒီးမၤလၢပှဲၤအီၤတက့ၢ်. ဖဲပထံၣ်ဘၣ်​ တၢ်ကီတၢ်ခဲတဖၣ်အခါ ပဃ့ဘါထုကဖၣ်​ လီၤတံၢ်လီၤဆဲး ဒ်သိးပကမၤ တၢ်ဆၢတဲာ် လၢအဘၣ်​ ကသ့အဂီၢ်လီၤ. (ကတိၤဒိ ၃:၂၁) ဒီပုၢ်ဝဲၢ်မုၣ်စိနံယၤ မၤပှၤလဲၤလၢညါလၢ ကီၢ်ယူရပၣ်​ လၢပှၤတဲဝဲရိမ့ၤနံ ကျိာ်အကရူၢ်လီၤ. အတဲဝဲလၢ “ယကွဲးလီၤယတၢ်ရဲၣ်တၢ်ကျဲၤ လၢလံာ်က့အလိၤ ဒီးယပာ်အီၤလၢ တၢ်လီၢ်လၢ ယထံၣ်အီၤညီလီၤ. ဒီးယဆွဲလီၤကျဲခံဘိအဂီၤ ဒီးယပာ်လီၤအီၤလၢ စပွဲခိၣ်လီၤ. ဖဲယဘၣ်မၤတၢ်ဆၢတဲာ် တဘျီလၢ်လၢ်အခါ ယကွၢ်လီၤတၢ်ဂီၤအံၤဒီး ယသ့ၣ်ညါလၢ ယကဘၣ်ဆၢတဲာ်တၢ် ဒ်လဲၣ်န့ၣ်လီၤ.” ဒီပုၢ်ဝဲၢ်မုၣ်အံၤ ဖဲအထံၣ်ဘၣ်​ တၢ်ကီတၢ်ခဲအခါန့ၣ်​ အဝဲဂုာ်ကျဲးစၢးအိၣ်ဒီး တၢ်ထံၣ်လၢအဂ့ၤလီၤ. ဒီပုၢ်ဝဲၢ်မုၣ်​ တဲဝဲလၢ “ယတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ သနာ်က့ မ့ၢ်ယထံၣ်အီၤဒ် တၢ်ဒူၣ်လၢ အတြီဃာ်ယၤလၢ ယကမၤလၢပှဲၤ ယဖီတၢၣ်အဂီၢ်ဧါ မ့တမ့ၢ် ဒ်တိၤလၢ အကမၤစၢၤယၤလၢ ယကမၤလၢပှဲၤ ယဖီတၢၣ်အဂီၢ်ဧါ.”

၁၉. ယဟိဝၤယွၤ မၤဂ့ၤတၢ်လၢပဂီၢ်အဃိ ပပာ်ဖျါထီၣ်လၢ ပစံးဘျုးစံးဖှိၣ်အီၤသ့ဒ်လဲၣ်.

^၁၉ ယဟိဝၤယွၤန့ၣ်​ ဆိၣ်ဂ့ၤပှၤလၢ ကျဲအါဘိလီၤ. ပစံးဘျုးစံးဖှိၣ်​ ယဟိဝၤယွၤ ခီဖျိ ပဂုာ်ကျဲးစၢးမၤ အတၢ်မၤ လၢအဂ့ၤကတၢၢ်လီၤ. (ဧ့ၤဘြံၤ ၁၃:၁၅) ပမၤအါထီၣ်​ ယဟိဝၤယွၤအတၢ်မၤသ့ လၢကျဲအဘိဘိလီၤ. ဒီးယဟိဝၤယွၤ ကဆိၣ်ဂ့ၤ အါထီၣ်ပှၤလီၤ. ကိးနံၤဒဲးန့ၣ်​ မ်ပကကွၢ်ဃုကျဲလၢ ပက “လ့ၣ်ကွၢ်, ဒီးထံၣ်လၢ ယွၤမ့ၢ်တၢ်ဂ့ၤန့ၣ်တက့ၢ်.” ပမ့ၢ်မၤဒ်န့ၣ်န့ၣ်​ ပကလီၤဂာ်ဒ် ယ့ၣ်ၡူးအသိး လၢအတဲဝဲ “ယတၢ်အီၣ်န့ၣ်​ မ့ၢ်ဝဲလၢ ယကမၤပှၤလၢ အဆှၢလီၤယၤတဂၤန့ၣ်​ အတၢ်ဘၣ်သးဒီး မၤဝံၤက့ၤ အတၢ်မၤလီၤ.”—ယိၤဟၣ်​ ၄:၃၄.