တၢ်မၤလိ ၃၀
ဝံအတၢ်စံးပာ်တခါလၢ အကမၤဂၢၢ်ကျၢၤထီၣ် ပတၢ်နာ်
“ယကဒုးအိၣ်ထီၣ် တၢ်ထီဒုၣ်ထီဒါ လၢနၤ ဒီးပိာ်မုၣ် အဘၢၣ်စၢၤ.”—၁ မိၤၡ့ ၃:၁၅.
တၢ်သးဝံၣ် ၁၅ စံးပတြၢၤယဟိဝၤယွၤအဖိဝဲၢ်ကိ
တၢ်မၤလိအံၤ အတၢ်တိာ်ပာ်a
၁. နီၢ်အံၣ်အုဒီးစီၤအၤဒၣ် မၤတၢ်ဒဲးဘးဝံၤ တယံာ်ဘၣ်န့ၣ် ယဟိဝၤယွၤ မၤမနုၤလဲၣ်. (၁ မိၤၡ့ ၃:၁၅)
နီၢ်အံၣ်အုဒီးစီၤအၤဒၣ် မၤတၢ်ဒဲးဘးဝံၤ တယံာ်ဘၣ်န့ၣ် ယဟိဝၤယွၤ တဲဘၣ်အဝဲသ့ၣ်လၢ ဝံအတၢ်စံးပာ်တခါ. ဒီးဝံအတၢ်စံးပာ်အံၤ ဒုးအိၣ်ထီၣ်တၢ်မုၢ်လၢ်လၢ အဖိအလံၤတဖၣ်အဂီၢ်. ဝံအတၢ်စံးပာ်တခါအံၤ အိၣ်ဝဲဖဲ ၁ မိၤၡ့ ၃:၁၅ အပူၤ.—ဖး.
၂. ဘၣ်မနုၤဃိ ဝံအတၢ်စံးပာ်တခါအံၤ အရ့ဒိၣ်လၢပဂီၢ်လဲၣ်.
၂ ဝံအတၢ်စံးပာ်တခါအံၤ အိၣ်ဝဲဖဲ လံာ်စီဆှံ အဆိကတၢၢ်တကတြူၢ်အပူၤ. ဘၣ်ဆၣ် လံာ်စီဆှံအကတြူၢ် လၢအဂၤခဲလၢာ်န့ၣ် ဘၣ်ဃးလိာ်သးဒီး ဝံအတၢ်စံးပာ်တခါအံၤ. အဒိ လံာ်အပျိၢ်ဃံန့ၣ် မၤဘုးတာ်ဝဲ လံာ်ကဘျံးခဲလၢာ်. ဒ်န့ၣ်အသိး လံာ်စီဆှံအကတြူၢ် လၢအဂၤတဖၣ် အတၢ်ဂ့ၢ်မိၢ်ပှၢ်န့ၣ် ဘၣ်ဃးဒီး ဝံအတၢ်စံးပာ် လၢအအိၣ်ဖဲ ၁ မိၤၡ့ ၃:၁၅ အပူၤ. ကစၢ်ယွၤ ကဆှၢလီၤပှၤတဂၤ လၢအကမၤပူၤဖျဲးတၢ် ဒီးပှၤတဂၤန့ၣ် ကမၤဟးဂီၤမုၣ်ကီၤလံၢ် ဒီးပှၤလၢ အပိာ်မုၣ်ကီၤလံၢ်အခံတဖၣ်.b တၢ်ကစီၣ်တခါအံၤ အကဲထီၣ်တၢ်သးခု လၢပှၤလၢအအဲၣ် ယဟိဝၤယွၤအဂီၢ်.
၃. လၢတၢ်မၤလိ တခါအံၤအပူၤန့ၣ် ပကတဲသကိး တၢ်ဂ့ၢ်မနုၤလဲၣ်.
၃ ပကတဲသကိး တၢ်သံကွၢ်သၢဖျၢၣ် လၢအဘၣ်ဃးဒီး ဝံအတၢ်စံးပာ် လၢအအိၣ်လၢ ၁ မိၤၡ့ ၃:၁၅ အပူၤ. ဝံအတၢ်စံးပာ်အံၤ အဲၣ်ဒိးတဲဝဲ မတဂၤသ့ၣ်တဖၣ်လဲၣ်. ဝံအတၢ်စံးပာ်အံၤ လၢထီၣ်ပှဲၤထီၣ်ဒ်လဲၣ် ဒီးဝံအတၢ်စံးပာ်အံၤ ကဲဘျုးလၢပဂီၢ်ဒ်လဲၣ်.
ဝံအတၢ်စံးပာ်အံၤ အဲၣ်ဒိးတဲဝဲ မတဂၤသ့ၣ်တဖၣ်လဲၣ်
၄. “ဂုၢ်” န့ၣ်အကဲမတဂၤလဲၣ် ဒီးဘၣ်မနုၤဃိ ပတဲဒ်န့ၣ်လဲၣ်.
၄ ၁ မိၤၡ့ ၃:၁၄, ၁၅ န့ၣ်ပာ်ဖျါထီၣ်ဝဲ “ဂုၢ်” ဒီးဂုၢ် ‘အချံအသၣ်,’ “ပိာ်မုၣ်” ဒီးပိာ်မုၣ် “အချံအသၣ်” အဂ့ၢ်. လံာ်စီဆှံပာ်ဖျါထီၣ်န့ၢ်ပှၤလၢ အဝဲသ့ၣ်မ့ၢ် မတဂၤလဲၣ်.c အဆိကတၢၢ်န့ၣ် ပကတဲသကိးဘၣ်ဃး ဂုၢ်န့ၣ်အကဲမတဂၤလဲၣ်. လံာ်စီဆှံတဆၢအံၤ တအဲၣ်ဒိးတဲဝဲ ဂုၢ်အနီၢ်ကီၢ်ဘၣ်. ဘၣ်မနုၤဃိလဲၣ်န့ၣ် မ့မ့ၢ်ဂုၢ်နီၢ်ကီၢ်န့ၣ် အတနၢ်ပၢၢ်တၢ်လၢ ယဟိဝၤယွၤတဲဝဲဖဲ ဧ့ၤဒ့ၣ်တၤသၣ်လီၢ်ဘၣ်. အဃိ ပှၤလၢယဟိဝၤယွၤ ကစံၣ်ညီၣ်ဝဲတဂၤန့ၣ် ကဘၣ်မ့ၢ်ယဟိဝၤယွၤ အတၢ်ဘၣ်တ့ လၢအအိၣ်ဒီးတၢ်ကူၣ်သ့. မ့မ့ၢ်ဒ်န့ၣ်န့ၣ် အကအဲၣ်ဒိးတဲဝဲ မတဂၤလဲၣ်. လီၣ်ဖျါ ၁၂:၉ ပာ်ဖျါထီၣ်န့ၢ်ပှၤ လီၤတံၢ်လီၤဆဲးလၢ “ဂုၢ်လၢအခီၣ်ထံးတဘိ” န့ၣ်အကဲဝဲမုၣ်ကီၤလံၢ်. ဒီးဂုၢ်အချံအသၣ်န့ၣ် အကဲမတဂၤလဲၣ်.
ဂုၢ်
လီၣ်ဖျါ ၁၂:၉ ပာ်ဖျါထီၣ်ဝဲ “ဂုၢ်လၢအခီၣ်ထံးတဘိ” န့ၣ်အကဲမုၣ်ကီၤလံၢ် (ကွၢ်လံာ်အဆၢ ၄)
၅. ဂုၢ်အချံအသၣ်န့ၣ် အကဲမတဂၤလဲၣ်.
၅ တဘျီတခီၣ် လံာ်စီဆှံသူဝဲ တၢ်ကတိၤလၢအမ့ၢ် ချံသၣ်န့ၣ် အဲၣ်ဒိးတဲဝဲ ပှၤလၢအဆိကမိၣ်တၢ် ဒီးမၤတၢ်ဒ်သိးဒီး ပှၤတဂၤန့ၣ်ခဲလၢာ် အဃိ အလီၤဂာ်ဒ်သိးဒီး ပှၤတဂၤန့ၣ်အဖိ. အဃိဂုၢ်အချံအသၣ်န့ၣ် မ့ၢ်ဝဲပှၤနီၢ်သးဖိတဖၣ် ဒီးပှၤဟီၣ်ခိၣ်ဖိတဖၣ်လၢ အတၢ်ပာ်သူၣ်ပာ်သး လီၤဂာ်ဒ်သိးဒီးမုၣ်ကီၤလံၢ်, ဒီးအဝဲသ့ၣ်ထီဒါယဟိဝၤယွၤ ဒီးယဟိဝၤယွၤအပှၤဂီၢ်မုၢ်. အဃိ မူခိၣ်ကလူးလၢ အပာ်တ့ၢ်ကွံာ် အမူဒါလၢ မူခိၣ် လၢစီၤနိအၤအစိၤ ဒီးပှၤဟီၣ်ခိၣ်ဖိလၢ အအိၣ်ဒီးတၢ်ပာ်သူၣ်ပာ်သး ဒ်သိးဒီးမုၣ်ကီၤလံၢ်န့ၣ် အလီၤဂာ်ဒ်သိးဒီး အကဲမုၣ်ကီၤလံၢ်အဖိ.—၁ မိၤၡ့ ၆:၁, ၂; ယိၤဟၣ် ၈:၄၄; ၁ ယိၤဟၣ် ၅:၁၉; ယူဒၤ ၆.
ဂုၢ်အချံအသၣ်
ဂုၢ်အချံအသၣ်န့ၣ် မ့ၢ်ဝဲပှၤနီၢ်သးဖိလၢ အအၢအသီ ဒီးပှၤဟီၣ်ခိၣ်ဖိလၢ အအၢအသီ လၢအထီဒါယဟိဝၤယွၤ ဒီးယဟိဝၤယွၤ အပှၤဂီၢ်မုၢ် (ကွၢ်လံာ်အဆၢ ၅)
၆. ဘၣ်မနုၤအဃိ “ပိာ်မုၣ်” န့ၣ်တအဲၣ်ဒိးတဲဝဲ နီၢ်အံၣ်အုဘၣ်လဲၣ်.
၆ ခဲအံၤပကတဲသကိး “ပိာ်မုၣ်” န့ၣ်အကဲမတဂၤလဲၣ်. ပိာ်မုၣ်န့ၣ် အတကဲနီၢ်အံၣ်အုဘၣ်. ဘၣ်မနုၤအဃိ ပတဲဒ်န့ၣ်လဲၣ်. ပကကွၢ်သကိး တၢ်ဂ့ၢ်တခါ. ဝံအတၢ်စံးပာ်အိၣ်လၢ ပိာ်မုၣ်အချံအသၣ်န့ၣ် “ကမၤသဘှံး” ဂုၢ်အခိၣ်သၣ်ဃံ. ဒ်ပတဲသကိး ပာ်စၢၤအသိး ပသ့ၣ်ညါဘၣ်လၢ ဂုၢ်န့ၣ်အကဲမုၣ်ကီၤလံၢ် ဒီးမုၣ်ကီၤလံၢ်န့ၣ် အကဲပှၤနီၢ်သးဖိ. ဒီးနီၢ်အံၣ်အုအချံအသၣ်န့ၣ် မ့ၢ်ပှၤဟီၣ်ခိၣ်ဖိလၢ အတလၢတပှဲၤဘၣ် အဃိ အဝဲသ့ၣ်မၤသဘှံး မုၣ်ကီၤလံၢ်အခိၣ်သၣ်ဃံ တသ့ဘၣ်. မ့မ့ၢ်ဒ်န့ၣ်န့ၣ် တၢ်ကတိၤတခါအံၤ အဲၣ်ဒိးတဲဝဲ အခီပညီဒ်လဲၣ်.
၇. လီၣ်ဖျါ ၁၂:၁, ၂, ၅ ဒီး ၁၀ ပာ်ဖျါထီၣ်ဝဲလၢ ပိာ်မုၣ်လၢ ၁ မိၤၡ့ ၃:၁၅ အပူၤတဂၤန့ၣ် အကဲမတဂၤလဲၣ်.
၇ ပိာ်မုၣ်လၢ ၁ မိၤၡ့ ၃:၁၅ ပာ်ဖျါထီၣ်ဝဲတဂၤန့ၣ် လံာ်လီၣ်ဖျါ ပာ်ဖျါထီၣ်ဝဲလၢ အတကဲ ပိာ်မုၣ်အနီၢ်ကီၢ်ဘၣ်. (ဖး လီၣ်ဖျါ ၁၂:၁, ၂, ၅, ၁၀.) ဘၣ်မနုၤအဃိ ပတဲဒ်န့ၣ်လဲၣ်. လံာ်လီၣ်ဖျါ ပာ်ဖျါထီၣ်ဝဲလၢ လါအိၣ်ဝဲလၢ ပိာ်မုၣ်အံၤအခီၣ်အဖီလာ် ဒီးခိၣ်သလုးလၢ အဘၣ်တၢ်တ့အီၤလၢ ဆၣ် ၁၂ ဖျၢၣ်န့ၣ် အိၣ်ဝဲလၢအခိၣ်လိၤ. တကးဒံးဘၣ် ပိာ်မုၣ်အံၤအိၣ်ဖျဲၣ်ထီၣ် ဖိတဂၤလၢအကဲဝဲ ကစၢ်ယွၤဘီမုၢ်. ဒီးကစၢ်ယွၤဘီမုၢ်န့ၣ် အိၣ်လၢမူခိၣ် အဃိပိာ်မုၣ်အံၤ ကဘၣ်အိၣ်လၢမူခိၣ်. ပိာ်မုၣ်အံၤ လံာ်စီဆှံဒိလီၤအီၤလၢ ယဟိဝၤယွၤ အတၢ်ကရၢကရိလၢမူခိၣ် လၢအပၣ်ဃုာ်ဒီး ပှၤနီၢ်သးဖိ လၢအသးတီတဖၣ်.—ကလၤတံ ၄:၂၆.
ပိာ်မုၣ်
ပိာ်မုၣ်န့ၣ် မ့ၢ်ဝဲယဟိဝၤယွၤ အတၢ်ကရၢကရိလၢမူခိၣ် လၢအပၣ်ဃုာ်ဒီး ပှၤနီၢ်သးဖိလၢအအိၣ်ဒီး တၢ်သးတီတဖၣ် (ကွၢ်လံာ်အဆၢ ၇)
၈. ပိာ်မုၣ်အချံအသၣ် လၢအရ့ဒိၣ်ကတၢၢ်တဂၤန့ၣ် အကဲမတဂၤလဲၣ်. ဒီးအဝဲကဲထီၣ် ပိာ်မုၣ်အချံအသၣ် လၢအရ့ဒိၣ်ကတၢၢ်တဂၤ လၢအခါဖဲလဲၣ်. (၁ မိၤၡ့ ၂၂:၁၅-၁၈)
၈ လံာ်စီဆှံပာ်ဖျါထီၣ်န့ၢ်ပှၤလၢ ပိာ်မုၣ်အချံအသၣ်လၢ အရ့ဒိၣ်ကတၢၢ်တဂၤန့ၣ် အကဲဝဲပှၤတဂၤလၢ အဟဲလီၤစၢၤလီၤသွဲၣ်လၢ စီၤအၤဘြၤဟၣ်. (ဖး ၁ မိၤၡ့ ၂၂:၁၅-၁၈.) ဒီးဒ်ဝံတဲဆိပာ်စၢၤဝဲအသိးန့ၣ် ယ့ၣ်ၡူးဟဲလီၤစၢၤလီၤသွဲၣ်လၢ စီၤအၤဘြၤဟၣ်. (လူၤကၣ် ၃:၂၃, ၃၄) ဘၣ်ဆၣ်ပိာ်မုၣ်အချံအသၣ်န့ၣ် အကဘၣ်မၤသဘှံး မုၣ်ကီၤလံၢ်ခိၣ်သၣ်ဃံအဃိ အကဘၣ်အိၣ်ဒီး တၢ်စိတၢ်ကမီၤ ဒိၣ်န့ၢ်ဒံးပှၤဟီၣ်ခိၣ်ဖိ. ဒီးဖဲယ့ၣ်ၡူးအနံၣ်အိၣ် ၃၀ အခါ ယဟိဝၤယွၤဒိးဖှူအီၤလၢ သးစီဆှံအဃိ အဝဲကဲထီၣ်ပိာ်မုၣ်အချံအသၣ်လၢ အရ့ဒိၣ်ကတၢၢ်တဂၤ. (ကလၤတံ ၃:၁၆) ယ့ၣ်ၡူးဂဲၤဆၢထၢၣ်သမူထီၣ် ဝံၤအလီၢ်ခံ ကစၢ်ယွၤ “ဟ့ၣ်လီၤအီၤလၢ တၢ်လၤကပီၤဒီး တၢ်ကဟုကညီၢ်.” တကးဒံးဘၣ် ကစၢ်ယွၤဟ့ၣ်လီၤအီၤ တၢ်စိတၢ်ကမီၤ “ဒ်သိး အကမၤဟးဂီၤကွံာ်ဝဲ မုၣ်ကီၤလံၢ် အတၢ်မၤတဖၣ်.”—ဧ့ၤဘြံၤ ၂:၇; မးသဲ ၂၈:၁၈; ၁ ယိၤဟၣ် ၃:၈.
ပိာ်မုၣ်အချံအသၣ်
ပိာ်မုၣ်အချံအသၣ်န့ၣ် မ့ၢ်ဝဲယ့ၣ်ၡူးခရံာ်ဒီး ပှၤ ၁၄၄,၀၀၀ လၢကပၢဃုာ်တၢ်ဒီးအီၤ (ကွၢ်လံာ်အဆၢ ၈-၉)
၉-၁၀. (က) မတဂၤသ့ၣ်တဖၣ်ကဲ ပိာ်မုၣ်အချံအသၣ်လဲၣ်, ဒီးအဝဲသ့ၣ်ကဲထီၣ် ပိာ်မုၣ်အချံအသၣ် လၢအခါဖဲလဲၣ်. (ခ) ခဲအံၤ ပကတဲသကိး တၢ်ဂ့ၢ်မနုၤလဲၣ်.
၉ စီၤပီလူးတဲပှၤယူဒၤဖိ ဒီးပှၤကလုာ်အဂၤ လၢအဘၣ်တၢ်ဒိးဖှူအီၤတဖၣ်လၢ “သုမ့မ့ၢ်ခရံာ်အတၢ်န့ၣ် သုမ့ၢ် စီၤအၤဘြၤဟၣ် အချံအသၣ်နီၢ်ကီၢ် ဒီးသုမ့ၢ် ပှၤန့ၢ်သါဘၣ်တၢ်တဖၣ် ဒ်တၢ်စံးပာ်အိၣ်ဝဲ အသိး.” အဃိ စီၤပီလူးအတၢ်ကတိၤအံၤ ပာ်ဖျါထီၣ်ဝဲလၢ ပိာ်မုၣ်အချံအသၣ် လၢအဂၤတဖၣ် အိၣ်ဝဲစ့ၢ်ကီး. (ကလၤတံ ၃:၂၈, ၂၉) ဖဲယဟိဝၤယွၤဒိးဖှူ ခရံာ်ဖိတဂၤအခါ ပှၤတဂၤန့ၣ်ကဲထီၣ် ပိာ်မုၣ်အချံအသၣ်. အဃိ ပိာ်မုၣ်အချံအသၣ်န့ၣ် မ့ၢ်ဝဲ ယ့ၣ်ၡူးခရံာ် ဒီးပှၤ ၁၄၄,၀၀၀ လၢကပၢဃုာ်တၢ်ဒီးအီၤ. (လီၣ်ဖျါ ၁၄:၁) ဒီးပှၤသ့ၣ်တဖၣ်အံၤ အတၢ်ပာ်သူၣ်ပာ်သးန့ၣ် လီၤဂာ်ဒ်သိးဒီး ယဟိဝၤယွၤ အဃိအဝဲသ့ၣ်ကဲ ယဟိဝၤယွၤအဖိ.
၁၀ ပှၤလၢ ၁ မိၤၡ့ ၃:၁၅ ပာ်ဖျါထီၣ်ဝဲတဖၣ် အကဲမတဂၤလဲၣ်န့ၣ် ပသ့ၣ်ညါလံ. အဃိ ခဲအံၤ ပကမၤလိသကိး ယဟိဝၤယွၤ မၤလၢပှဲၤထီၣ်ဝဲ အတၢ်စံးပာ်တခါအံၤ ဒ်လဲၣ်, ဒီးဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်အဃိ ကဲဘျုးလၢပဂီၢ်ဒ်လဲၣ်.
ဝံအတၢ်စံးပာ်အံၤ လၢထီၣ်ပှဲၤထီၣ်ဒ်လဲၣ်
၁၁. ပိာ်မုၣ်အချံအသၣ် “အခီၣ်နၢၣ်ခံ” သဘှံးဒ်လဲၣ်.
၁၁ ဝံအတၢ်စံးပာ်လၢအအိၣ်ဖဲ ၁ မိၤၡ့ ၃:၁၅ န့ၣ်ပာ်ဖျါထီၣ်ဝဲလၢ ဂုၢ်န့ၣ်ကမၤသဘှံး ပိာ်မုၣ်အချံအသၣ် “အခီၣ်နၢၣ်ခံ.” ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ဖဲ မုၣ်ကီၤလံၢ်သူဝဲ ပှၤယူဒၤဖိဒီးပှၤရိမ့ၤဖိလၢ ကမၤသံကစၢ်ယွၤဖိခွါ. (လူၤကၣ် ၂၃:၁၃, ၂၀-၂၄) ဘၣ်မနုၤဃိ ပတဲဒ်န့ၣ်သ့လဲၣ်. အဒိ ဖဲပှၤတဂၤ အခီၣ်နၢၣ်ခံဘၣ်ဒိအခါ အဝဲဟးတသ့လၢၤဘၣ် တစိၢ်တလီၢ်. ဒ်န့ၣ်အသိး ယ့ၣ်ၡူးသံလၢ တၢ်သွၣ်ခိၣ်အပူၤ သၢသီအဃိ အမၤတၢ်တသ့လၢၤဘၣ် တစိၢ်တလီၢ် အဃိလီၤဂာ်ဒ်သိး ယ့ၣ်ၡူး အခီၣ်နၢၣ်ခံသဘှံး.—မးသဲ ၁၆:၂၁.
၁၂. ဂုၢ်အခိၣ်သၣ်ဃံ ကသဘှံးဒ်လဲၣ် ဒီးအခိၣ်သၣ်ဃံ ကသဘှံး လၢအခါဖဲလဲၣ်.
၁၂ ဝံအတၢ်စံးပာ်လၢ အအိၣ်ဖဲ ၁ မိၤၡ့ ၃:၁၅ န့ၣ်ပာ်ဖျါထီၣ်ဝဲလၢ ယ့ၣ်ၡူးကဘၣ်အိၣ်လၢ တၢ်သွၣ်ခိၣ်ထဲ တစိၢ်တလီၢ်. ဘၣ်မနုၤဃိ ပတဲဒ်န့ၣ်သ့လဲၣ်. ခီဖျိလၢ ဝံအတၢ်စံးပာ်အံၤ တဲဝဲလၢ ပိာ်မုၣ်အချံအသၣ် ကဘၣ်မၤသဘှံး ဂုၢ်အခိၣ်သၣ်ဃံ. အဃိပသ့ၣ်ညါဘၣ်လၢ ယ့ၣ်ၡူး ကဘၣ်ဂဲၤဆၢထၢၣ် သမူထီၣ်က့ၤဒံး. ဖဲယ့ၣ်ၡူး သံသၢသီဝံၤအခါ အဝဲဂဲၤဆၢထၢၣ် သမူထီၣ်က့ၤ ဒ်ပှၤနီၢ်သးဖိတဂၤအသိး. ဒီးလၢခံ ဖဲတၢ်ဆၢကတီၢ်လၢ ကစၢ်ယွၤပာ်ပနီၣ်ဝဲ ဘၣ်အခါ ယ့ၣ်ၡူး ကမၤသဘှံး မုၣ်ကီၤလံၢ် အခိၣ်သၣ်ဃံ. (ဧ့ၤဘြံၤ ၂:၁၄) ယ့ၣ်ၡူးဒီး ပှၤလၢကပၢဃုာ်တၢ်ဒီးအီၤတဖၣ် ကမၤဟးဂီၤ ကစၢ်ယွၤအဒုၣ်အဒါ လၢအကဲဝဲ မုၣ်ကီၤလံၢ် ဒီးအချံအသၣ်ခဲလၢာ်.—လီၣ်ဖျါ ၁၇:၁၄; ၂၀:၄, ၁၀.d
ဝံအတၢ်စံးပာ်အံၤ ကဲဘျုးလၢ ပဂီၢ်ဒ်လဲၣ်
၁၃. ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်အဃိ ကဲဘျုးလၢပဂီၢ် ဒ်လဲၣ်.
၁၃ နမ့ၢ်ကဲ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်လံအဃိ အကဲဘျုးလၢနဂီၢ်လံ. ဖဲယ့ၣ်ၡူး ဟဲအိၣ်မူလၢ ဟီၣ်ခိၣ်ချၢအခါ အဝဲပာ်ဖျါထီၣ်ဝဲလၢ အကွၢ်လိအပါ အတၢ်ပာ်သူၣ်ပာ်သးခဲလၢာ်. (ယိၤဟၣ် ၁၄:၉) ခီဖျိလၢပမၤလိ ယ့ၣ်ၡူးအဂ့ၢ်အဃိ ပသ့ၣ်ညါထီၣ် ယဟိဝၤယွၤ ဒီးပအဲၣ်ယဟိဝၤယွၤ. ဆၢကတီၢ်ခဲအံၤ ယ့ၣ်ၡူးသိၣ်လိပှၤ ဒီးဟံးစုနဲၣ်ကျဲပှၤခီဖျိ ခရံာ်ဖိအတၢ်အိၣ်ဖှိၣ်. ဒီးယ့ၣ်ၡူးသိၣ်လိပှၤဒ်သိးဒီး ပကအိၣ်မူဒ် ယဟိဝၤယွၤအတၢ်ဘၣ်သး. ခီဖျိလၢ ယ့ၣ်ၡူးသံအဃိ ကဲဘျုးလၢပဝဲခဲလၢာ်အဂီၢ်. ဘၣ်မနုၤဃိ ပတဲဒ်န့ၣ်လဲၣ်န့ၣ် ဖဲယ့ၣ်ၡူးသံဝံၤဒီး ယဟိဝၤယွၤ မၤဂဲၤဆၢထၢၣ် သမူထီၣ်က့ၤအီၤဝံၤအခါ ယဟိဝၤယွၤတူၢ်လိာ် အတၢ်လုၢ်ထီၣ် လၢအလၢအပှဲၤအဃိအ “သ့စီကွံာ် ပတၢ်ဒဲးဘးခဲလၢာ်.”—၁ ယိၤဟၣ် ၁:၇.
၁၄. တၢ်လၢယဟိဝၤယွၤ တဲဆိပာ်ဝဲဖဲ ဧ့ၤဒ့ၣ်တၤသၣ်အလီၢ်န့ၣ် အတဟဲလၢပှဲၤထီၣ် တဘျီဃီဘၣ်န့ၣ် ပသ့ၣ်ညါဒ်လဲၣ်.
၁၄ တၢ်ကတိၤလၢ ယဟိဝၤယွၤတဲဝဲဖဲ ဧ့ၤဒ့ၣ်တၤသၣ်အလီၢ်န့ၣ် အတဟဲလၢပှဲၤထီၣ် တဘျီဃီဘၣ်. ဘၣ်မနုၤဃိလဲၣ်, မ့ၢ်လၢဒ်သိး ပိာ်မုၣ်အချံအသၣ် ကအိၣ်ထီၣ် ဒီးမုၣ်ကီၤလံၢ်စ့ၢ်ကီး ကပာ်ဖှိၣ်ထီၣ် ပှၤလၢအဆီၣ်ထွဲအီၤအဂီၢ် လိၣ်ဘၣ်တၢ်ဆၢကတီၢ်. ဒီးဒ်သိးပှၤခံဖုအံၤ ကသးဟ့လိာ်သး ဒီးကထီဒါလိာ်သးအဂီၢ် လိၣ်ဘၣ်တၢ်ဆၢကတီၢ်စ့ၢ်ကီး. ပနၢ်ပၢၢ်ဘၣ် ဝံအတၢ်စံးပာ်တခါအံၤ အဃိ ပသ့ၣ်ညါဘၣ်လၢ ဟီၣ်ခိၣ်လၢ မုၣ်ကီၤလံၢ်ပၢဝဲ လၢအမ့ၢ် ပှၤဟီၣ်ခိၣ်ဖိလၢ အဆီၣ်ထွဲ မုၣ်ကီၤလံၢ်တဖၣ်န့ၣ် ကသးဟ့ ပှၤလၢအဘူၣ်ထီၣ်ဘါထီၣ် ယဟိဝၤယွၤ. လၢခံ ယ့ၣ်ၡူးစ့ၢ်ကီး ဟ့ၣ်ပလီၢ်အပျဲၢ်အဘီၣ် ဘၣ်ဃးဒီးတၢ်ဂ့ၢ်အံၤ. (မၢ်ကူး ၁၃:၁၃; ယိၤဟၣ် ၁၇:၁၄) လၢအပူၤကွံာ် အနံၣ်တကယၤ အတီၢ်ပူၤန့ၣ် ပထံၣ်ဘၣ်လၢ ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ် တနီၤလံ. အဟဲလၢထီၣ်ပှဲၤထီၣ် ဒ်လဲၣ်.
၁၅. ဘၣ်မနုၤဃိ ပှၤလၢ အဆီၣ်ထွဲမုၣ်ကီၤလံၢ်တဖၣ် သးဟ့ ပှၤလၢအဘူၣ်ထီၣ်ဘါထီၣ် ယဟိဝၤယွၤ အါန့ၢ်ဒံးလၢညါလဲၣ်. သနာ်က့ ဘၣ်မနုၤဃိ ပတလိၣ်ပျံၤ မုၣ်ကီၤလံၢ်လဲၣ်.
၁၅ ယ့ၣ်ၡူး ကဲထီၣ်စီၤပၤဖဲ ၁၉၁၄ ဝံၤအလီၢ်ခံ အဝဲကွံာ်လီၤမုၣ်ကီၤလံၢ် လၢဟီၣ်ခိၣ်. ဒီးခဲအံၤန့ၣ် မုၣ်ကီၤလံၢ် အိၣ်လၢဟီၣ်ခိၣ် ဒီးတယံာ်လၢၤဘၣ်န့ၣ် အကဘၣ် တၢ်မၤဟးဂီၤအီၤ. (လီၣ်ဖျါ ၁၂:၉, ၁၂) တချုးလၢမုၣ်ကီၤလံၢ် တၢ်မၤဟးဂီၤအီၤဒံးဘၣ်န့ၣ် အဝဲသးဒိၣ်ထီၣ်တၢ် ဒီးဒုးဝဲ ပှၤလၢအဘူၣ်ထီၣ်ဘါထီၣ် ယဟိဝၤယွၤ. (လီၣ်ဖျါ ၁၂:၁၃, ၁၇) အဃိ ပှၤဟီၣ်ခိၣ်ဖိလၢ အဆီၣ်ထွဲ မုၣ်ကီၤလံၢ်န့ၣ် သးဟ့ ပှၤလၢအဘူၣ်ထီၣ်ဘါထီၣ် ယဟိဝၤယွၤ ဒိၣ်န့ၢ်ဒံးလၢညါ. ဘၣ်ဆၣ် ပတပျံၤမုၣ်ကီၤလံၢ် ဒီးပှၤလၢ အဆီၣ်ထွဲအီၤတဖၣ်ဘၣ်. တကးဒံးဘၣ် ဒ်တၢ်မၢဖိပီလူး တဲဝဲအသိး ပနာ်သပှၢ်တၢၢ်လၢ “ကစၢ်ယွၤ မ့ၢ်အိၣ်လၢ ပအိၣ်တခီန့ၣ် မတဂၤ ကထီဒါပှၤလဲၣ်.” (ရိမ့ၤ ၈:၃၁) ပထံၣ်ဘၣ်လၢ ဝံအတၢ်စံးပာ်ဖဲ အအိၣ်လၢ ၁ မိၤၡ့ ၃:၁၅ အပူၤန့ၣ် ဟဲလၢထီၣ်ပှဲၤထီၣ် အါမးလံအဃိ ပနာ်သ့သပှၢ်တၢၢ်လၢ ယဟိဝၤယွၤ ကမၤလၢပှဲၤ တၢ်လၢ အတဲဆိပာ်စၢၤဝဲခဲလၢာ်.
၁၆-၁၈. ဒီပုၢ်ဝဲၢ်ခွါ ခၢထံၣ်, ဒီပုၢ်ဝဲၢ်မုၣ် အစူၤလၤ ဒီးဒီပုၢ်ဝဲၢ်မုၣ် ကၠဲၤစံၤခၤ နၢ်ပၢၢ်ထီၣ် ဝံအတၢ်စံးပာ်လၢအအိၣ်ဖဲ ၁ မိၤၡ့ ၃:၁၅ အပူၤအဃိ ကဲဘျုးလၢအဝဲသ့ၣ်အဂီၢ်ဒ်လဲၣ်.
၁၆ ယဟိဝၤယွၤ အတၢ်အၢၣ်လီၤဖဲ ၁ မိၤၡ့ ၃:၁၅ ပာ်ဖျါထီၣ်ဝဲန့ၣ် မၤစၢၤပှၤလၢ ပလဲၤခီဖျိတၢ်ကီတၢ်ခဲ တမံၤဂ့ၤ တမံၤဂ့ၤကန့ၢ်. ဒီပုၢ်ဝဲၢ်ခွါ ခၢထံၣ် လၢအမၤ မံၤၡၢၤနရံၤတၢ်မၤလၢ ကွၤန့ၣ် တဲဝဲလၢ “တၢ်လၢ အကဲထီၣ်သးလၢ ယတၢ်အိၣ်မူပူၤတဖၣ်အဃိ ကီလၢယကတီဒီး ယဟိဝၤယွၤ. ဘၣ်ဆၣ်ယဆိမိၣ်ထံ ဝံအတၢ်စံးပာ် လၢအအိၣ်ဖဲ ၁ မိၤၡ့ ၃:၁၅ အဃိ အမၤစၢၤယၤလၢ ယကဆဲးနာ်န့ၢ် ယပၢ်ယဟိဝၤယွၤ.” ဒီပုၢ်ဝဲၢ်ခွါ ခၢထံၣ် ကွၢ်လၢ်ဝဲမုၢ်နံၤလၢ ယဟိဝၤယွၤ ကမၤလီၤမၢ်ကွံာ် ပတၢ်ကီတၢ်ခဲ ခဲလၢာ်.
၁၇ ဒီပုၢ်ဝဲၢ်မုၣ် အစူၤလၤ လၢအအိၣ်လၢ ဘၢၤဘ့ရံၤယၤန့ၣ် တဲဝဲလၢယနၢ်ပၢၢ် ဝံအတၢ်စံးပာ်လၢအအိၣ်ဖဲ ၁ မိၤၡ့ ၃:၁၅ ပူၤအဃိ အမၤစၢၤယၤလၢ ယကနာ်လၢလံာ်စီဆှံမ့ၢ် ကစၢ်ယွၤကလုၢ်ကထါ. အဝဲနၢ်ပၢၢ်ထီၣ်စ့ၢ်ကီးဝဲလၢ ဝံအတၢ်စံးပာ်အဂၤတဖၣ်န့ၣ် ဘၣ်ထွဲလိာ်သးဒီး ဝံအတၢ်စံးပာ်တခါအံၤအဃိ ထုးန့ၢ်အသးဒိၣ်မး. ဒီးအဝဲတဲစ့ၢ်ကီးဝဲလၢ “ဖဲတၢ်ကီတၢ်ခဲအိၣ်ထီၣ်အခါ ယဟိဝၤယွၤ ရဲၣ်ကျဲၤတၢ်တဘျီဃီ ဒ်သိးပကအိၣ်ဒီး တၢ်မုၢ်လၢ်အဂီၢ် အဃိ ယအဲၣ်အီၤဒိၣ်ထီၣ်.”
၁၈ ဒီပုၢ်ဝဲၢ်မုၣ် ကၠဲၤစံၤခၤလၢအအိၣ်လၢ ကီၢ်မဲခြိၤနံၡါန့ၣ် တဲဝဲလၢ “ဖဲယသ့ၣ်ညါထီၣ်လၢ ယထံၣ်န့ၢ်တၢ်မ့ၢ်တၢ်တီလံအခါန့ၣ် ယသးခုထဲလဲၣ်န့ၣ် ယနီၣ်ဘၣ်ဒံး. ယသ့ၣ်ညါထီၣ်ဘၣ်လၢ ဝံအတၢ်စံးပာ်လၢ ၁ မိၤၡ့ ၃:၁၅ ပာ်ဖျါထီၣ်ဝဲန့ၣ် ဟဲလၢထီၣ်ပှဲၤထီၣ်တနီၤလံ. အဃိအမၤစၢၤယၤလၢ ယကသ့ၣ်နီၣ်ထီၣ်လၢ တၢ်ကီတၢ်ခဲလၢ ပထံၣ်ဘၣ်ခဲအံၤန့ၣ် အတမ့ၢ်တၢ်လၢ ယဟိဝၤယွၤ အဲၣ်ဒိးမၢပထံၣ်ဘၣ်ဘၣ်. ဝံအတၢ်စံးပာ်တခါအံၤ မၤစၢၤယၤလၢ ယတၢ်နာ်ကဆူၣ်ထီၣ် ဒီးယကနာ်လၢယမ့ၢ်မၤ ယဟိဝၤယွၤတၢ်မၤန့ၣ် ယကအိၣ်ဒီးတၢ်အိၣ်မူ လၢအဂ့ၤကတၢၢ် လၢဆၢကတီၢ်ခဲအံၤ ဒီးခါဆူညါ.”
၁၉. ဘၣ်မနုၤဃိ ပနာ်လၢ ဝံအတၢ်စံးပာ်လၢ အလီၢ်ခံကတၢၢ်တကူာ်န့ၣ် ကဟဲလၢပှဲၤထီၣ် သပှၢ်တၢၢ်လဲၣ်.
၁၉ ဒ်ပမၤလိတ့ၢ်ဘၣ်အသိး ပသ့ၣ်ညါဘၣ်လၢ ဝံအတၢ်စံးပာ်လၢအအိၣ်ဖဲ ၁ မိၤၡ့ ၃:၁၅ အပူၤန့ၣ် လၢထီၣ်ပှဲၤထီၣ်ဖးအါလံ. ပိာ်မုၣ်အချံအသၣ် ဒီးဂုၢ်အချံအသၣ် အကဲမတဂၤလဲၣ်န့ၣ် ပသ့ၣ်ညါဘၣ် လီၤတံၢ်လီၤဆဲးလံ. ယ့ၣ်ၡူးကဲပိာ်မုၣ်အချံအသၣ် လၢအရ့ဒိၣ်ကတၢၢ်တဂၤ ဒီးအခီၣ်နၢၣ်ခံအပူၤလီၢ်ဘျါလံ. အဃိခဲအံၤ အဝဲကဲထီၣ်စီၤပၤ လၢအစိကမီၤဒိၣ် ဒီးအသံတသ့ဘၣ်တဂၤလံ. ခဲအံၤယဟိဝၤယွၤ ဃုထၢထီၣ်ပှၤလၢ အကပၢဃုာ်တၢ်ဒီး ယ့ၣ်ၡူးလၢမူခိၣ်န့ၣ် ဘူးကဝံၤလံ. ဒီးခဲအံၤန့ၣ် ပနၢ်ပၢၢ်ထီၣ်ဘၣ်လၢ ဝံအတၢ်စံးပာ်တခါအံၤ လၢအဆိကတၢၢ်တကူာ်န့ၣ် ဟဲလၢထီၣ်ပှဲၤထီၣ်လံအဃိ ပနာ်သ့သပှၢ်ကတၢၢ်လၢ ဝံအတၢ်စံးပာ်တခါအံၤ လၢအလီၢ်ခံကတၢၢ်တကူာ် လၢအတဲဝဲလၢ ဂုၢ်အခိၣ်သၣ်ဃံ ကဘၣ်တၢ်မၤသဘှံးအီၤန့ၣ် ကဟဲလၢထီၣ်ပှဲၤထီၣ် သပှၢ်ကတၢၢ်. ဖဲမုၣ်ကီၤလံၢ်တအိၣ်လၢၤဘၣ်အခါ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ကသးခုဒိၣ်မး. ဘၣ်ဆၣ်တချုးလၢ တၢ်ဆၢကတီၢ်ဝဲန့ၣ် ဘၣ်ဒံးဘၣ်အခါ ပတဘၣ်ဟ့ၣ်အၡူဘၣ်. ဒီးပကစၢ်ယဟိဝၤယွၤန့ၣ် အမ့ၢ်ပှၤလၢပနာ်အီၣ်အီၤ သ့သပှၢ်တၢၢ် အဃိပနာ်လၢ အဝဲကသူ ပိာ်မုၣ်အချံအသၣ်လၢအကဆိၣ်ဂ့ၤ “ပှၤကိးကလုာ်ဒဲး လၢဟီၣ်ခိၣ်ချၢ.”—၁ မိၤၡ့ ၂၂:၁၈.
တၢ်သးဝံၣ် ၂၃ ယဟိဝၤယွၤအတၢ်ပၢစးထီၣ်လံ
a ပမ့ၢ်နၢ်ပၢၢ် ဝံအတၢ်စံးပာ် လၢအအိၣ်ဖဲ ၁ မိၤၡ့ ၃:၁၅ အပူၤန့ၣ် ကမၤစၢၤပှၤလၢ ပကပာ်လုၢ်ပာ်ပှ့ၤ တၢ်ဂ့ၢ်တၢ်ကျိၤလၢ အအိၣ်လၢလံာ်စီဆှံပူၤ. ပမ့ၢ်မၤလိအါထီၣ် ဘၣ်ဃးဒီး ဝံအတၢ်စံးပာ်တခါအံၤန့ၣ် ပတၢ်နာ်ယဟိဝၤယွၤ ကအါထီၣ် ဒီးပကနာ်သပှၢ်တၢၢ်လၢ ယဟိဝၤယွၤ ကမၤလၢပှဲၤ အတၢ်စံးပာ်ခဲလၢာ်.
b ကွၢ် တၢ်ဂ့ၢ်ဘၣ်ထွဲလိာ်သး ခ၁, “လံာ်စီဆှံ အတၢ်ကစီၣ်” လၢ ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ အပူၤ.
c ကွၢ်တၢ်လွံၢ်နၢၣ်လၢအမ့ၢ် “ပှၤလၢ ၁ မိၤၡ့ ၃:၁၄, ၁၅ အပူၤန့ၣ် အကဲမတဂၤလဲၣ်.”
d ကွၢ်တၢ်လွံၢ်နၢၣ်လၢ အမ့ၢ် “ဝံအတၢ်စံးပာ်လၢ အအိၣ်လၢ ၁ မိၤၡ့ ၃:၁၅ အပူၤ လၢအလၢထီၣ်ပှဲၤထီၣ်တနီၤ.”