ယ့ၣ်ၡူးမ့ၢ် ပှၤလုၢ်တၢ်ခိၣ် အဒိၣ်ကတၢၢ် လၢအဒိသူၣ်ဒိသး ဒီးနၢ်ပၢၢ်စၢၤပှၤ

၁-၂. (က) ဘၣ်မနုၤအဃိ ယဟိဝၤယွၤ ဆှၢလီၤ အဖိခွါလၢ ဟီၣ်ခိၣ်ချၢလဲၣ်. (ခ) လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်. (ဧ့ၤဘြံၤ ၅:၇-၉)

ပူၤကွံာ်အနံၣ် ၂,၀၀၀ ဃၣ်ဃၣ်န့ၣ် ယဟိဝၤယွၤ ဆှၢလီၤ အဖိခွါလၢ အလုၢ်ဒိၣ်ပှ့ၤဒိၣ်ကတၢၢ်တဂၤ လၢဟီၣ်ခိၣ်ချၢ. ဘၣ်မနုၤအဃိလဲၣ်. တၢ်ဂ့ၢ်အကျါ တမံၤန့ၣ် မ့ၢ်ဝဲဒ်သိး အကမၤပူၤဖျဲးထီၣ် ပှၤဟီၣ်ခိၣ်ဖိလၢ တၢ်သံဒီးတၢ်ဒဲးဘး ဒီးမၤလီၤမၢ်ကွံာ် တၢ်ကီတၢ်ခဲတဖၣ်လၢ မုၣ်ကီၤလံၢ် ဒုးအိၣ်ထီၣ်ဝဲ. (ယိၤ ၃:၁၆; ၁ ယိၤ ၃:၈) တၢ်ဂ့ၢ် အဂၤတမံၤန့ၣ် ယဟိဝၤယွၤ သ့ၣ်ညါပာ်စၢၤဝဲလၢ ဖဲယ့ၣ်ၡူး အိၣ်လၢဟီၣ်ခိၣ်ချၢအခါ တၢ်လၢ အကလဲၤခီဖျိဘၣ်ဝဲန့ၣ် ကမၤစၢၤအီၤဒ်သိး အကကဲထီၣ် ပှၤလုၢ်တၢ်ခိၣ် အဒိၣ်ကတၢၢ်လၢ အဒိသူၣ်ဒိသး ဒီးနၢ်ပၢၢ်စၢၤ ပှၤဂၤတၢ်အိၣ်သး. ဒီးဖဲ ခ.န ၂၉a န့ၣ် ယ့ၣ်ၡူး ဒိးဘျၢထံ ဒီးအကဲထီၣ်ဝဲ ပှၤလုၢ်တၢ်ခိၣ် အဒိၣ်ကတၢၢ်.

^၂ လၢတၢ်မၤလိအံၤ ပကတဲသကိး ဘၣ်ဃးဒီး ဖဲယ့ၣ်ၡူး အိၣ်လၢ ဟီၣ်ခိၣ်ချၢအခါ တၢ်လၢ အဘၣ်လဲၤခီဖျိဝဲန့ၣ် မၤစၢၤအီၤဒ်သိး အကကဲထီၣ် ပှၤလုၢ်တၢ်ခိၣ် အဒိၣ်ကတၢၢ်လၢ အဒိသူၣ်ဒိသး ဒီးနၢ်ပၢၢ်စၢၤပှၤ ဒီးအ “တုၤထီၣ်ထီၣ်ဘး လၢလၢပှဲၤပှဲၤ” ဒ်လဲၣ်အဂ့ၢ်. ပမ့ၢ်နၢ်ပၢၢ် တၢ်ဂ့ၢ်အံၤ ဂ့ၤဂ့ၤန့ၣ် ကမၤစၢၤပှၤ ဒ်သိး ပကဆဲး ဃ့ထုကဖၣ်လၢ ယဟိဝၤယွၤအအိၣ် ဒီးပသးမ့ၢ်လီၤစၢ် ခီဖျိလၢ ပတၢ်ကမၣ်အဃိ သနာ်က့ ပကအဲၣ်ဒိး ဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ.—ဖး ဧ့ၤဘြံၤ ၅:၇-၉.

ကစၢ်ယွၤ အဖိခွါသးဘိ ဟဲလီၤလၢ ဟီၣ်ခိၣ်ချၢ

၃-၄. ဒ်သိး ယ့ၣ်ၡူး ကဟဲလီၤလၢ ဟီၣ်ခိၣ်ချၢအဂီၢ် အသးအိၣ် ပာ်တ့ၢ်ကွံာ် မနုၤလဲၣ် ဒီးအတၢ်အိၣ်မူလၢ ဟီၣ်ခိၣ်ချၢ မၤသးဒ်လဲၣ်.

^၃ ပဝဲအါဂၤန့ၣ် ပလဲၤခီဖျိဘၣ် တၢ်ဆီတလဲ လၢပတၢ်အိၣ်မူပူၤ ဒ်သိးဒီး ပလဲၤပၠီလၢ တၢ်လီၢ်အဂၤ ဒီးအိၣ်ယံၤဒီး ပဟံၣ်ဖိဃီဖိ ဒီးပသကိးတဖၣ်. တၢ်ဆီတလဲတဖၣ်အံၤ အတညီလၢ ပဂီၢ်ဘၣ်. ဘၣ်ဆၣ် တၢ်ဆီတလဲလၢ ပလဲၤခီဖျိဘၣ်န့ၣ် အတအါထဲသိးဒီး ယ့ၣ်ၡူး ဘၣ်လဲၤခီဖျိဝဲဘၣ်. အဒိ ဖဲယ့ၣ်ၡူးအိၣ်လၢ မူခိၣ်အခါ အကဲဝဲမူခိၣ်ကလူး အဆိကတၢၢ်တဂၤ ဒီးလၢမူခိၣ်ကလူး ခဲလၢာ်အကျါန့ၣ် အကဲပှၤလၢ အရ့ဒိၣ်ကတၢၢ်. ယဟိဝၤယွၤ အဲၣ်အီၤဒိၣ်မး ဒီးအအိၣ်ဘၣ်လၢ ယဟိဝၤယွၤအ “စုထွဲတခီ” ဒီးမၤသကိးဘၣ်တၢ်အဃိ အသးခုထီဘိ. (စံး ၁၆:၁၁; ကတိၤ ၈:၃၀) သနာ်က့ ဖံလံးပံၤ ၂:၇ တဲဝဲလၢ ဒ်သိး အကအိၣ်မူလၢ ပှၤဟီၣ်ခိၣ်ဖိလၢ အတလၢတပှဲၤဘၣ် အကျါအဂီၢ် အသးအိၣ် “ပာ်တ့ၢ်ကွံာ်တၢ်လၢ အအိၣ်ဒီးအီၤခဲလၢာ်.”

^၄ ဆိကမိၣ်ကွၢ် တၢ်အိၣ်သးလၢ အကဲထီၣ်သးဖဲ ယ့ၣ်ၡူး အိၣ်ဖျဲၣ်ထီၣ် ဒီးအကဲဖိသၣ်အခါ. ယ့ၣ်ၡူး အဟံၣ်ဖိဃီဖိန့ၣ်အဖှီၣ်အယာ်. ပသ့ၣ်ညါဘၣ် ခီဖျိလၢ ဖဲယ့ၣ်ၡူး အမိအပါ ဟ့ၣ်လုၢ်ထီၣ်တၢ်လၢ တၢ်လုၢ်ဟံၣ်အခါ အဝဲသ့ၣ်ဟ့ၣ်ဝဲန့ၢ်ထဲ ထိၣ်ဖိခံဘ့ၣ်လီၤ. (၃ မိၤ ၁၂:၈; လူၤ ၂:၂၄) ဒီးဖဲ စီၤပၤဟ့ၤရိာ် သ့ၣ်ညါလၢ ယ့ၣ်ၡူး အိၣ်ဖျဲၣ်ထီၣ်အခါ အဂုာ်ကျဲးစၢး မၤသံယ့ၣ်ၡူး. အဃိ ဒ်သိးယ့ၣ်ၡူး အသးသမူ ကပူၤဖျဲးအဂီၢ် အဘၣ်လဲၤအိၣ်လၢ ကီၢ်အဲၤကူပတူး ဒ်သိးဒီး ပှၤဘၣ်ကီဘၣ်ခဲဖိ တတီၤဖိ. (မး ၂:၁၃, ၁၅) ယ့ၣ်ၡူး အတၢ်အိၣ်မူလၢ ဟီၣ်ခိၣ်ချၢန့ၣ် လီၤဆီဒီး အတၢ်အိၣ်မူလၢ မူခိၣ်ဖးဒိၣ်ညါ တမ့ၢ်ဧီၤ.

၅. ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အထံၣ်ဘၣ် တၢ်အိၣ်သး မနုၤလဲၣ်. ဒီးတၢ်လၢအထံၣ်ဘၣ်ဝဲန့ၣ် မၤစၢၤအီၤဒ်သိး အကကဲထီၣ် ပှၤလုၢ်တၢ်ခိၣ် အဒိၣ်ကတၢၢ်လၢ အအိၣ်ဒီး တၢ်ဒိသူၣ်ဒိသး ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၅ ဖဲယ့ၣ်ၡူး အိၣ်လၢ ဟီၣ်ခိၣ်ချၢခါ အထံၣ်ဘၣ်ဝဲ ပှၤအါဂၤ လဲၤခီဖျိဘၣ် တၢ်ကီတၢ်ခဲ. ဒီးဖဲအအိၣ်လၢ ဟီၣ်ခိၣ်ချၢအခါ ဘၣ်သ့ၣ်သ့ၣ် အကထံၣ်ဘၣ်ဝဲ ပှၤလၢအသ့ၣ်ညါဝဲန့ၣ် သံကွံာ်တဘျုးဂၤ ဒီးဖျါလၢ ကပၣ်ဃုာ်ဒီး အပါစီၤယိၤသးအဃိ အကတူၢ်ဘၣ် တၢ်သးအုးနးမး. တကးဒံးဘၣ် ဖဲအစံၣ်တဲၤတဲလီၤတၢ်အခါ အထံၣ်ဘၣ် ပှၤဘၣ်တၢ်ဆါအၢ, ပှၤမဲာ်ချံတထံၣ်တၢ်ဘၣ်, ပှၤစုလီၤဘျ့ခီၣ်လီၤဘျ့ ဒီးမိပါလၢ အဖိသံသဒၣ်အီၤ. ဖဲအထံၣ် ပှၤတဖၣ်အံၤအခါ အသးကညီၤ အဝဲသ့ၣ်ဒိၣ်မး. (မး ၉:၂, ၆; ၁၅:၃၀; ၂၀:၃၄; မၢ် ၁:၄၀, ၄၁; လူၤ ၇:၁၃) နီၢ်ကီၢ်န့ၣ် ဖဲယ့ၣ်ၡူး အိၣ်လၢမူခိၣ်အခါ အထံၣ်ဘၣ်ဝဲ တၢ်ကီတၢ်ခဲလၢ ပှၤဟီၣ်ခိၣ်ဖိ လဲၤခီဖျိဘၣ်ဝဲလံ. သနာ်က့ ဖဲအအိၣ်လၢ ဟီၣ်ခိၣ်ချၢအခါ တၢ်လၢ အလဲၤခီဖျိဘၣ်ဝဲန့ၣ် မၤစၢၤအီၤဒ်သိး အကနၢ်ပၢၢ်စၢၤ တၢ်ကီတၢ်ခဲလၢ ပှၤဟီၣ်ခိၣ်ဖိ တူၢ်ဘၣ်ဝဲ. (ၡါ ၅၃:၄) ဒီးဒ်ပှၤဂၤအသိး ယ့ၣ်ၡူးစ့ၢ်ကီး တူၢ်ဘၣ် တၢ်သူၣ်ကိၢ်သးဂီၤ, တၢ်သူၣ်လီၤဘှံးသးလီၤတီၤ ဒီးတၢ်သးအုးနးမး. ပထံၣ်ဘၣ်လၢ ပှၤဟီၣ်ခိၣ်ဖိ ဘၣ်တူၢ်တၢ် ခီဖျိလၢ တၢ်ကီတၢ်ခဲအဃိ ထဲလဲၣ်န့ၣ် ယ့ၣ်ၡူး နၢ်ပၢၢ်ဝဲဂ့ၤဂ့ၤ.

ယ့ၣ်ၡူးပာ်ဖျါထီၣ် တၢ်သးကညီၤပှၤဂၤ

၆. ဘၣ်ဃးဒီး ယ့ၣ်ၡူး ကပာ်ဖျါထီၣ် တၢ်သးကညီၤအဂ့ၢ်န့ၣ် ဝံယၡါယၤ ကွဲးဆိပာ်စၢၤဝဲဒ်လဲၣ်. (ယၡါယၤ ၄၂:၃)

^၆ တဘျီတခီၣ် လံာ်စီဆှံလၢ ဧ့ၤဘြံၤတကတြူၢ် ထိၣ်သတြီၤဝဲ ပှၤလၢအတၢ်အိၣ်တၢ်ယၢၤ ဒီးအိၣ်ဘၣ် ဘီၣ်ဘီၣ်ညီညီတဖၣ် ဒ်သိးဒီး ကရၢၢ်လၢ အန့ၢ်ဘၣ် ထံအါအါဂီၢ်ဂီၢ် မ့တမ့ၢ် သ့ၣ်ထူၣ်လၢ အထီဒီးအကျၢၤ. (စံး ၉၂:၁၂; ၡါ ၆၁:၃; ယံး ၃၁:၁၂) မ့မ့ၢ် ပှၤဖှီၣ်ဖိယာ်ဖိ ဒီးပှၤလၢ ပှၤတရ့အီၤဂ့ၤဂ့ၤဘၣ်န့ၣ် လံာ်စီဆှံ ထိၣ်သတြီၤအီၤ ဒ်သိးဒီး တပိၢ်တဘိလၢ အသဘှံး ဒီးမ့ၣ်အူဒၢအပှံာ်လၢ အကဲၤဒံးထဲ တစဲးဖိ. (ဖး ယၡါယၤ ၄၂:၃; မး ၁၂:၂၀) ယဟိဝၤယွၤ မၢဝဲဝံယၡါယၤကွဲးလီၤ တၢ်အဒိတဖၣ်အံၤ ဒ်သိးကပာ်ဖျါထီၣ် ဘၣ်ဃးဒီး ယ့ၣ်ၡူး အတၢ်အဲၣ် ဒီးတၢ်သးကညီၤလၢ အကပာ်ဖျါထီၣ်ဝဲလၢ ပှၤလၢအပတီၢ်ဖုၣ် ဒီးပှၤပာ်ဆံးအီၤတဖၣ် အဖီခိၣ်. ပထံၣ်ဘၣ်လၢ ဖဲယ့ၣ်ၡူး မၤတၢ်စံၣ်တဲၤတဲလီၤ တၢ်မၤအခါ အပာ်ဖျါထီၣ် တၢ်သးကညီၤလၢ ပှၤလၢအဂံၢ်စၢ် ဒီးပှၤတရ့အီၤ ဂ့ၤဂ့ၤဘၣ်တဖၣ် အဖီခိၣ်. ခီဖျိလၢ အမၤဝဲဒ်န့ၣ်အဃိ အမၤလၢပှဲၤထီၣ် ဝံအတၢ်စံးပာ်.

၇-၈. ယ့ၣ်ၡူး မၤလၢပှဲၤထီၣ် ဝံယၡါယၤ အတၢ်စံးပာ်ဒ်လဲၣ်.

^၇ ယ့ၣ်ၡူး မၤလၢပှဲၤထီၣ် ဝံယၡါယၤ အတၢ်စံးပာ် ဒ်လဲၣ်န့ၣ် ပှၤကွဲးတၢ်သးခုကစီၣ် စီၤမးသဲကွဲးဝဲဒ်အံၤ. “တပိၢ်တဘိလၢ အသဘှံးန့ၣ် အဝဲ တမၤတဲာ်ကွံာ်ဝဲဘၣ် ဒီးမ့ၣ်အူဒၢအပှံာ်လၢ အကဲၤဒံး ထဲတစဲးဖိန့ၣ် အဝဲ တမၤလီၤပံာ်ဝဲဘၣ်.” တၢ်လီၤလးတဖၣ်လၢ ယ့ၣ်ၡူးမၤဝဲန့ၣ် ကဲဘျုးလၢ ပှၤလၢ ပှၤတရ့အီၤဂ့ၤဂ့ၤဘၣ် ဒီးပှၤလၢ အတၢ်မုၢ်လၢ် တအိၣ်ဘၣ်တဖၣ်အဂီၢ် ဒိၣ်မး. အဒိ ယ့ၣ်ၡူးထံၣ်ဝဲ ပိာ်ခွါတဂၤလၢ အဘၣ်တၢ်ဆါအၢ ဒီးခီဖျိလၢ အတၢ်ဆါအဃိ အအိၣ်လၢ ပှၤကျါတသ့ဘၣ်. ဘၣ်သ့ၣ်သ့ၣ် ပိာ်ခွါအံၤ ကတူၢ်ဘၣ်လၢ အဘျါက့ၤ တသ့လၢၤဘၣ် ဒီးတအိၣ်ဘၣ် တပူၤဃီဒီး အဟံၣ်ဖိဃီဖိ ဒီးအသကိးလၢၤဘၣ်. (လူၤ ၅:၁၂, ၁၃) တကးဒံးဘၣ် ယ့ၣ်ၡူးဝဲ ပိာ်ခွါတဂၤလၢ အတနၢ်ဟူတၢ် ဒီးတဲတၢ် တသ့ဂ့ၤဂ့ၤဘၣ်. ဆိကမိၣ်ကွၢ် ဖဲပှၤတဲသကိးတၢ်အခါ အထံၣ်ဝဲ သနာ်က့ အတနၢ်ပၢၢ်ဝဲဘၣ်. (မၢ် ၇:၃၂, ၃၃) တၢ်ကီတၢ်ခဲ လၢအဂၤ အိၣ်ဒံးဧါ.

^၈ ဖဲယ့ၣ်ၡူးအစိၤန့ၣ် ပှၤယူဒၤဖိအါဂၤ နာ်ဝဲလၢ ပှၤလၢအဆိးက့ မ့တမ့ၢ် အနီၢ်ခိဂံၢ်ဘါစၢ်န့ၣ် မ့ၢ်ဝဲခီဖျိလၢ အဝဲသ့ၣ်အနီၢ်ကစၢ် မ့တမ့ၢ် အမိအပါ တၢ်ဒဲးဘးအဃိ. (ယိၤ ၉:၂) ခီဖျိလၢ တၢ်နာ်ကမၣ်အံၤအဃိ ပှၤလၢအတူၢ်ဘၣ်တၢ် တဖၣ်အံၤ အါဘျီန့ၣ် ပှၤတပာ်လုၢ်ပာ်ပှ့ၤ အဝဲသ့ၣ်ဘၣ်. ယ့ၣ်ၡူး မၤလၢပှဲၤထီၣ် ဝံယၡါယၤ အတၢ်စံးပာ် ဒီးမၤစၢၤဝဲ ပှၤလၢပှၤထံၣ်ဆံးအီၤ တဖၣ်အံၤ ဒ်သိးအဝဲသ့ၣ် ကသ့ၣ်ညါလၢ ကစၢ်ယွၤ သးအိၣ်အဝဲသ့ၣ်. တၢ်ဂ့ၢ်အံၤ ဒုးသ့ၣ်ညါပှၤ ယ့ၣ်ၡူး အတၢ်တူၢ်ဘၣ် လၢပဖီခိၣ်ဒ်လဲၣ်.

၉. ဒ် ဧ့ၤဘြံၤ ၄:၁၅, ၁၆ ပာ်ဖျါထီၣ်ဝဲအသိး ယ့ၣ်ၡူး ပာ်ဖျါထီၣ် တၢ်သးကညီၤလၢ ပှၤဟီၣ်ခိၣ်ဖိလၢ အတလၢတပှဲၤဘၣ် အဖီခိၣ်ဒ်လဲၣ်.

^၉ ဖး ဧ့ၤဘြံၤ ၄:၁၅, ၁၆. ကြံးအတၢ်ကတိၤလၢ ပှၤကွဲးကျိာ်ထံဝဲလၢ တၢ်သးကညီၤန့ၣ် အဲၣ်ဒိးတဲဝဲ ပဒိသူၣ်ဒိသး ဒီးနၢ်ပၢၢ်စၢၤ ပှၤလၢအသးအုး ဒီးအတူၢ်ဘၣ်တၢ်တဂၤ အတၢ်တူၢ်ဘၣ်. ဒီးဖဲ ဧ့ၤဘြံၤ ၁၀:၃၄ န့ၣ် စီၤပီလူး သူစ့ၢ်ကီးဝဲ တၢ်ကတိၤ တဖျၢၣ်ဃီလၢ အပာ်ဖျါထီၣ် အခီပညီလၢ ပဒိသူၣ်ဒိသး ဒီးနၢ်ပၢၢ်စၢၤ ပှၤအိၣ်လၢ ဃိာ်ပူၤတဖၣ် အတၢ်အိၣ်သး. တကးဒံးဘၣ် ဖဲပဖးဘၣ်ဃးဒီး ယ့ၣ်ၡူး မၤစၢၤပှၤဂၤ အဂ့ၢ်အခါ ပထံၣ်ဘၣ်လၢ အပာ်ဖျါထီၣ် တၢ်ဒိသူၣ်ဒိသးလၢ ပှၤဂၤအဖီခိၣ်စ့ၢ်ကီး. အမၤဘျါက့ၤပှၤဂၤန့ၣ် အတပာ်ဝဲဒ်သိးဒီး မူဒါလၢ အဘၣ်မၤဝဲဘၣ်. အသးအိၣ်မၤစၢၤပှၤဂၤ နီၢ်ကီၢ်. အဒိ ဖဲအမၤဘျါက့ၤ ပှၤဘၣ်တၢ်ဆါအၢအခါ အမ့ၢ်အိၣ်လၢအယံၤ ဒီးမၤတၢ်လီၤလးန့ၣ် အမၤဝဲသ့. ဘၣ်ဆၣ် အလဲၤထိးဝဲ ပိာ်ခွါတဂၤန့ၣ် ဒီးမၤဘျါက့ၤအီၤ. ဘၣ်သ့ၣ်သ့ၣ် ပိာ်ခွါတဂၤအံၤ ကတူၢ်ဘၣ်ဝဲလၢ ပှၤတထိးဘၣ်အီၤ ဒ်အံၤဘၣ်န့ၣ် ကအိၣ်ဝဲ တဘျုးနံၣ်လံ. တကးဒံးဘၣ် ပိာ်ခွါလၢ အတနၢ်ဟူတၢ်ဘၣ် တဂၤန့ၣ် ယ့ၣ်ၡူး ပာ်ဖျါထီၣ်တၢ်သးကညီၤ လၢအဖီခိၣ် ဒီးလဲၤကိးအီၤလၢ တၢ်လီၢ်လၢ အယံၤထီၣ်ဒီး ပှၤဂီၢ်မုၢ် ဒီးမၤဘျါက့ၤအီၤ. ဆိကမိၣ်ကွၢ်စ့ၢ်ကီး ပိာ်မုၣ်လၢ အမၤကမၣ်တၢ်လၢ အပီၢ်ယၢ်လီၤက့ၤသး ဒီးအထွါကွံာ် ယ့ၣ်ၡူးအခီၣ်လၢ အမဲာ်ထံတဂၤန့ၣ်အဂ့ၢ်. ပှၤဖၤရံၤၡဲတဖၣ် ထံၣ်ဆံးဝဲ ပိာ်မုၣ်တဂၤအံၤ ဘၣ်ဆၣ် ယ့ၣ်ၡူး ဒီသဒၢအီၤ ဒီးဘှီဘၣ်ထီၣ်က့ၤ ပှၤဖၤရံၤၡဲတဖၣ်ဆူၣ်ဆူၣ်. (မး ၈:၃; မၢ် ၇:၃၃; လူၤ ၇:၄၄) အဃိ ပထံၣ်ဘၣ်လၢ ပှၤလၢအဆိးက့ ဒီးအမၤဘၣ် တၢ်ကမၣ်ဖးဒိၣ်န့ၣ် ယ့ၣ်ၡူး တကွၢ်ကပာ် အဝဲသ့ၣ်ဘၣ်. အအဲၣ်ဒိးလၢ ပှၤတဖၣ်အံၤ ကဟဲလၢအအိၣ် ဒီးအပာ်ဖျါထီၣ် တၢ်အဲၣ်လၢ အဝဲသ့ၣ်အဖီခိၣ်. ဒ်ယ့ၣ်ၡူး ပာ်ဖျါထီၣ် တၢ်သးကညီၤ လၢပှၤတဖၣ်အံၤ အဖီခိၣ်အသိး ပနာ်သ့သပှၢ်တၢၢ်လၢ အကပာ်ဖျါထီၣ် တၢ်သးကညီၤ လၢပဖီခိၣ်စ့ၢ်ကီး.

ပဂုာ်ကျဲးစၢး ကွၢ်လိမၤဒိး ပပှၤလုၢ်တၢ်ခိၣ် အဒိၣ်ကတၢၢ်

၁၀. ပမၤစၢၤ ပှၤလၢတနၢ်ဟူတၢ် ဒီးတထံၣ်တၢ်ဘၣ်တဖၣ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၀ ပကဲယ့ၣ်ၡူး အပျဲၢ်အဘီၣ်အဃိ ပဂုာ်ကျဲးစၢး ကွၢ်လိအဒိအတဲာ် ဒီးပာ်ဖျါထီၣ်တၢ်အဲၣ် ဒီးတၢ်သးကညီၤလၢ ပှၤဂၤအဖီခိၣ်. (၁ ပ့း ၂:၂၁; ၃:၈) ပှၤလၢအတနၢ်ဟူတၢ် ဒီးတထံၣ်တၢ်ဘၣ် တဖၣ်န့ၣ် ပမၤဘျါက့ၤအဝဲသ့ၣ် တသ့ဘၣ်သနာ်က့ ပမၤစၢၤအီၤလၢ ကသ့ၣ်ညါထီၣ် ယဟိဝၤယွၤအဂ့ၢ်သ့. အဒိ လံာ်လဲၢ်လၢ အဒိးသန့ၤထီၣ်သးလၢ လံာ်စီဆှံ လၢပထုးထီၣ်လၢ စုပနီၣ်ကျိာ်န့ၣ် အိၣ်ဝဲ ၁၀၀ ဘျဲၣ်လံ. ဒီးပှၤလၢ အတထံၣ်တၢ်ဘၣ် အဂီၢ်န့ၣ် ပထုးထီၣ် လံာ်လဲၢ်လၢကျိာ် ၆၀ ဘျဲၣ် ဒီးတၢ်ကလုၢ်လၢ အတဲဖျါထီၣ် တၢ်ဂီၤမူအဂ့ၢ်လၢ ကျိာ် ၁၀၀ ဘျဲၣ်. လံာ်လဲၢ် ဒီးတၢ်ကလုၢ်လၢ ပထုးထီၣ်အံၤ မၤစၢၤဝဲ ပှၤလၢတနၢ်ဟူတၢ် ဒီးတထံၣ်တၢ်ဘၣ်တဖၣ် ဒ်သိး အဝဲသ့ၣ် ကအိၣ်ဒီး တၢ်ရ့လိာ်သးဒီး ယဟိဝၤယွၤ ဒီးအဖိခွါယ့ၣ်ၡူး.

၁၁. ဒ်ယ့ၣ်ၡူးအသိး ယဟိဝၤယွၤ အတၢ်ကရၢကရိ ဂုာ်ကျဲးစၢး မၤစၢၤဝဲ ပှၤအကလုာ်ကလုာ် ဒ်လဲၣ်. (မၤတၢ် ၂:၅-၇, ၃၃) (ကွၢ်စ့ၢ်ကီးတၢ်ဂီၤ.)

^၁၁ ယဟိဝၤယွၤ အတၢ်ကရၢကရိ ဂုာ်ကျဲးစၢး မၤစၢၤဝဲ ပှၤအကလုာ်ကလုာ် ဒ်သိး ကသ့ၣ်ညါထီၣ် ယဟိဝၤယွၤအဂ့ၢ်. အဒိ ယ့ၣ်ၡူး ဂဲၤဆၢထၢၣ် သမူထီၣ်က့ၤ ဝံၤအလီၢ်ခံ အလူလီၤ အသးစီဆှံလၢ အပျဲၢ်အဘီၣ် အလိၤအဃိ ပှၤခဲလၢာ်လၢ အဟဲပာ်ဖှိၣ်ထီၣ်သးလၢ ကမၤဝဲ ဘူၣ်ယဲၢ်ဆံအမူးန့ၣ် အဝဲသ့ၣ် နၢ်ဟူဘၣ် တၢ်သးခုကစီၣ်လၢ “အနီၢ်ကစၢ် အကျိာ်.” (ဖး မၤတၢ် ၂:၅-၇, ၃၃.) ခဲအံၤစ့ၢ်ကီး ခီဖျိလၢ ယ့ၣ်ၡူး အတၢ်ဟံးစုနဲၣ်ကျဲအဃိ ပတၢ်ကရၢကရိ ထုးထီၣ်လံာ်လဲၢ်လၢ အဒိးသန့ၤထီၣ်သးလၢ လံာ်စီဆှံ လၢကျိာ် ၁,၀၀၀ ဘျဲၣ်ညါ ဒီးကျိာ်တနီၤန့ၣ် ပှၤတဲဝဲ အနီၣ်ဂံၢ် အိၣ်ထဲစှၤဂၤလီၤ. အဒိ ပှၤလၢအတဲ အမရ့ဒံယါကျိာ်တနီၤန့ၣ် အဝဲသ့ၣ်အိၣ်လၢ ကလံၤစိး ဒီးကလံၤထံး အမဲရကၤ ဒီးပှၤတဲကျိာ်အံၤ အနီၣ်ဂံၢ် တအိၣ်အါအါဘၣ်. သနာ်က့ ဒ်သိး အဝဲသ့ၣ် ကနၢ်ဟူဘၣ် တၢ်သးခုကစီၣ်အဂီၢ် ပတၢ်ကရၢကရိ ထုးထီၣ်လံာ်လဲၢ်လၢ ကျိာ်အံၤ ၁၆၀ ဘျဲၣ်ညါ. တကးဒံးဘၣ် ပတၢ်ကရၢကရိ ထုးထီၣ်စ့ၢ်ကီး လံာ်လဲၢ်လၢ ရိမနံၤကျိာ် ၂၀ ဘျဲၣ်. ပှၤအကထိတဖၣ် လၢအတဲကျိာ် တဖၣ်အံၤန့ၣ် သ့ၣ်ညါထီၣ် တၢ်မ့ၢ်တၢ်တီ ဒီးဘူၣ်ထီၣ်ဘါထီၣ် ယဟိဝၤယွၤလံ.

၁၂. ကျဲအဂၤလၢ ယဟိဝၤယွၤ အတၢ်ကရၢကရိ ဂုာ်ကျဲးစၢး မၤစၢၤပှၤဂၤန့ၣ်မ့ၢ်မနုၤလဲၣ်.

^၁၂ ယဟိဝၤယွၤ အတၢ်ကရၢကရိ ဂုာ်ကျဲးစၢး မၤစၢၤပှၤဂၤ ဒ်သိးကနၢ်ဟူဘၣ် တၢ်သးခုကစီၣ် တကးဒံးဘၣ် အဝဲသ့ၣ် မၤစၢၤဝဲ ပှၤလၢအထံၣ်ဘၣ် န့ဆၢၣ် တၢ်ဘၣ်ဒိဘၣ်ထံး စ့ၢ်ကီး. အဃိ ပဒီပုၢ်ဝဲၢ်မုၣ်ခွါလၢ အကထိတဖၣ် ဟ့ၣ်လီၤသး ဒီးမၤစၢၤဝဲ ပှၤလၢအထံၣ်ဘၣ် တၢ်ကီတၢ်ခဲတဖၣ်. တကးဒံးဘၣ် ပတၢ်ကရၢကရိ တ့ထီၣ်ဝဲ တၢ်ဘူၣ်ထီၣ်ဘါထီၣ်အလီၢ် ယိယိဖိလၢ ကမၤစၢၤပှၤဂၤဒ်သိး ကပာ်ဖှိၣ်ထီၣ်သး ဒီးမၤလိအါထီၣ် ဘၣ်ဃးဒီး ယဟိဝၤယွၤ အဲၣ်အဝဲသ့ၣ် ဒီးသူၣ်အိၣ်သးအိၣ် အဝဲသ့ၣ်အဂ့ၢ်.

ပပှၤလုၢ်တၢ်ခိၣ် အဒိၣ်ကတၢၢ် ကမၤစၢၤနၤ

၁၃. ကျဲတနီၤလၢ ယ့ၣ်ၡူး မၤစၢၤပှၤန့ၣ် မ့ၢ်မနုၤလဲၣ်.

^၁၃ ယ့ၣ်ၡူးန့ၣ် အကဲပှၤကွၢ်သိလၢ အဂ့ၤတဂၤအဃိ ဒ်သိးပတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤဒိၣ်ထီၣ်အဂီၢ် အသးအိၣ်မၤစၢၤပှၤ. (ယိၤ ၁၀:၁၄; အ့း ၄:၇) အဒိ ခီဖျိလၢ ပအိၣ်တဆူၣ်ဘၣ်, ပမၤဘၣ်တၢ်ကမၣ် မ့တမ့ၢ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါတဂၤဂၤ တဂ့ၤဘၣ်အဃိ ပသးကလီၤစၢ်ဒိၣ်မး. ဖဲန့ၣ်အခါ ပကတူၢ်ဘၣ်လၢ ပလီၤဂာ်ဒ်သိးဒီး မ့ၣ်အူဒၢအပှံာ်လၢ အကဲၤဒံး ထဲတစဲးဖိ ဒီးတပိၢ်တဘိလၢ အသဘှံး. ဒီးဘၣ်သ့ၣ်သ့ၣ် ပကဆိကမိၣ်ထဲ ပနီၢ်ကစၢ် တၢ်ကီတၢ်ခဲ ဒီးပတဆိကမိၣ်ထံ ပတၢ်မုၢ်လၢ် အဂ့ၢ်လၢၤဘၣ်. ဘၣ်ဆၣ် ပကဘၣ်သ့ၣ်နီၣ်လၢ ပတၢ်ကီတၢ်ခဲ ဒီးပတၢ်တူၢ်ဘၣ်န့ၣ် ယ့ၣ်ၡူး သ့ၣ်ညါဝဲ ဒီးအနၢ်ပၢၢ်စၢၤပှၤ. ဒီးဖဲပသးလီၤစၢ်အခါ ယ့ၣ်ၡူး ကမၤဆူၣ်ထီၣ် ပဂံၢ်ပဘါခီဖျိ အဟ့ၣ်လီၤပှၤ သးစီဆှံ. (ယိၤ ၁၆:၇; တံ ၃:၆) တကးဒံးဘၣ် ယ့ၣ်ၡူးကသူဝဲ တၢ်အိၣ်ဖှိၣ်သးပှၢ် ဒီးဒီပုၢ်ဝဲၢ်မုၣ်ခွါတဖၣ် လၢကဟ့ၣ်ဂံၢ်ဟ့ၣ်ဘါ ဒီးဆီၣ်ထွဲမၤစၢၤပှၤ.—အ့း ၄:၈.

၁၄. ဖဲပသးလီၤစၢ်အခါ ပမၤမနုၤသ့လဲၣ်.

^၁၄ ဖဲပသးလီၤစၢ်အခါ ပမၤမနုၤသ့လဲၣ်. ပကဘၣ် ဆိကမိၣ်ထီၣ်က့ၤ ယ့ၣ်ၡူးအမူဒါ ဒ်ပပှၤလုၢ်တၢ်ခိၣ် အဒိၣ်ကတၢၢ် အသိးန့ၣ် ကဲဘျုးလၢပဂီၢ် ဒ်လဲၣ်အဂ့ၢ်. သ့ၣ်နီၣ်ထီၣ်လၢ ယဟိဝၤယွၤ ဆှၢလီၤအီၤလၢ ဟီၣ်ခိၣ်ချၢဒ်သိး အကပှ့ၤက့ၤပှၤ ဒီးကသ့ၣ်ညါ နၢ်ပၢၢ်စၢၤ တၢ်ကီတၢ်ခဲလၢ ပှၤဟီၣ်ခိၣ်ဖိ လဲၤခီဖျိဘၣ်ဝဲ. အဃိ “ဖဲပလိၣ်ဘၣ် တၢ်မၤစၢၤ အဆၢကတီၢ်,” လီၤဆီဒၣ်တၢ် ဖဲပသးလီၤစၢ် ခီဖျိလၢ ပတၢ်ကမၣ် မ့တမ့ၢ် ပတၢ်ဂံၢ်စၢ်ဘါစၢ်အခါ ယ့ၣ်ၡူး သးအိၣ်မၤစၢၤပှၤ တဘျီဃီ.—ဧ့ၤ ၄:၁၅, ၁၆.

၁၅. ဒ်သိး ဒီပုၢ်ဝဲၢ်ခွါတဂၤ ကဟဲက့ၤကဒါလၢ တၢ်အိၣ်ဖှိၣ်ပူၤအဂီၢ် အဒိးန့ၢ်ဘၣ် တၢ်မၤစၢၤဒ်လဲၣ်.

^၁၅ ဆၢကတီၢ်ခဲအံၤ ပှၤလၢအပာ်တ့ၢ်ကွံာ် ယဟိဝၤယွၤန့ၣ် ဒ်သိး အဝဲသ့ၣ် ကဟဲက့ၤကဒါလၢ တၢ်အိၣ်ဖှိၣ်ပူၤအဂီၢ် ယ့ၣ်ၡူး ဟံးစုနဲၣ်ကျဲ အခ့အပှၤဒ်သိး ကဃုကွၢ် ဒီးမၤစၢၤအဝဲသ့ၣ်. (မး ၁၈:၁၂, ၁၃) ဆိကမိၣ်ကွၢ် ဒီပုၢ်ဝဲၢ်ခွါ စတံၤဖါနိၤ အတၢ်လဲၤခီဖျိ.b ဒီပုၢ်ဝဲၢ်ခွါအံၤ ပှၤထုးထီၣ်ကွံာ်အီၤလၢ တၢ်အိၣ်ဖှိၣ် ယံာ်ဝဲ ၁၂ နံၣ် ဝံၤအလီၢ်ခံ အပာ်လီၤသးလၢ ကဟဲက့ၤထီၣ်ကဒါ တၢ်အိၣ်ဖှိၣ်. ဒီပုၢ်ဝဲၢ်ခွါ တဲဝဲလၢ “ယကဟဲက့ၤ ဘူၣ်ထီၣ်ဘါထီၣ် ယဟိဝၤယွၤ တပူၤဃီဒီး ဒီပုၢ်ဝဲၢ်မုၣ်ခွါအဂီၢ် အတညီဘၣ်ယၤဘၣ်. ဒီးဖဲယဆိကမိၣ်ထီၣ်က့ၤ ဘၣ်ဃးဒီး ယပာ်တ့ၢ် ယဟိဝၤယွၤအခါ ယသးတမုာ်ဘၣ် ဒီးယဘၣ်သးဟ့ၣ်အၡူ. ဘၣ်ဆၣ် တၢ်အိၣ်ဖှိၣ်သးပှၢ်လၢ အထံၣ်လိာ်သးဒီးယၤန့ၣ် ဒုးသ့ၣ်နီၣ်ထီၣ်ယၤလၢ ယဟိဝၤယွၤ ဒီးယ့ၣ်ၡူး တအဲၣ်ဒိးလၢ ယဟ့ၣ်အၡူဘၣ်. ဖဲပှၤတူၢ်လိာ်က့ၤယၤ လၢတၢ်အိၣ်ဖှိၣ်ပူၤအခါ တၢ်အိၣ်ဖှိၣ်ဖိခဲလၢာ် ပာ်ဖျါထီၣ်တၢ်အဲၣ် ဒီးတူၢ်လိာ်မုာ်ယၤ ဒီးယဟံၣ်ဖိဃီဖိ. လၢခံန့ၣ် ယမါမၤလိလံာ်စီဆှံ ဒီးခဲအံၤန့ၣ် ယၤဒီးယဟံၣ်ဖိဃီဖိ ဘူၣ်ထီၣ်ဘါထီၣ် ယဟိဝၤယွၤ ဒ်သိးသိး.” ဖဲပပှၤလုၢ်တၢ်ခိၣ် အဒိၣ်ကတၢၢ် ထံၣ်ဘၣ်ဝဲလၢ ပှၤလၢအပီၢ်ယၢ်လီၤက့ၤသးတဖၣ် ဒိးန့ၢ်ဘၣ် တၢ်မၤစၢၤဒ်သိး အကဟဲက့ၤကဒါလၢ တၢ်အိၣ်ဖှိၣ်ပူၤအခါ အကသးခုဒိၣ်မး.

၁၆. ပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ်လၢ အဒိသူၣ်ဒိသး ဒီးနၢ်ပၢၢ်စၢၤပှၤအဃိ ပဒိးန့ၢ်ဘၣ် အဘျုးဒ်လဲၣ်.

^၁၆ ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အမၤစၢၤ ပှၤအါဂၤလၢ အလိၣ်ဘၣ် တၢ်မၤစၢၤ. ခဲအံၤစ့ၢ်ကီး ပနာ်သ့သပှၢ်တၢၢ်လၢ ဖဲပလိၣ်ဘၣ် တၢ်မၤစၢၤ တဘျီဂ့ၤတဘျီဂ့ၤန့ၣ် အကမၤစၢၤပှၤ. ဒီးခါဆူညါ လၢဟီၣ်ခိၣ်သီန့ၣ် အကမၤစၢၤ ပှၤဟီၣ်ခိၣ်ဖိလၢ အအိၣ်ဒီး တၢ်ဒိကနၣ်တဖၣ် ဒ်သိးအဝဲသ့ၣ် ကကဲထီၣ် ပှၤလၢပှၤပှဲၤ. ယဟိဝၤယွၤ ပာ်ဖျါထီၣ် အတၢ်အဲၣ် ဒီးတၢ်သးကညီၤ လၢပဖီခိၣ်ခီဖျိ အဃုထၢထီၣ်အဖိခွါ ဒ်ပပှၤလုၢ်တၢ်ခိၣ် အဒိၣ်ကတၢၢ်လၢ အအိၣ်ဒီး တၢ်ဒိသူၣ်ဒိသး ဒီးနၢ်ပၢၢ်စၢၤပှၤအဃိ ပစံးဘျုးအီၤဒိၣ်မး.