သူန “နီၢ်သးအတၢ်ဟ့ၣ်”

ဖဲပရ့ဒီး ပဒီပုၢ်ဝဲၢ်မုၣ်ခွါအခါ ပသးခုဒိၣ်မး. ဘၣ်ဆၣ်ဒ်သိး ပကန့ၢ်ဂံၢ်န့ၢ်ဘါအဂီၢ် ထဲပထံၣ်ဖှိၣ်လိာ်သး ဒီးရ့လိာ်သးန့ၣ် အတလၢပှဲၤဒံးဘၣ်. လံာ်စီဆှံတဲဝဲလၢ ပဟ့ၣ်ဂံၢ်ဟ့ၣ်ဘါလိာ်သး ယၢ်ခီယၢ်ခီ ခီဖျိလၢ ပတၢ်နာ်န့ၣ် အကဲဝဲ “နီၢ်သးအတၢ်ဟ့ၣ်” တခါ. (ရိ ၁:၁၁, ၁၂) ဒ်သိးပကသူ နီၢ်သးအတၢ်ဟ့ၣ်အံၤအဂီၢ် ပမၤမနုၤသ့လဲၣ်.

ဟ့ၣ်ဂံၢ်ဟ့ၣ်ဘါပှၤဂၤ ခီဖျိနတၢ်ကတိၤ. အဒိ ဖဲနဟ့ၣ်တၢ်စံးဆၢလၢ တၢ်အိၣ်ဖှိၣ်ပူၤအခါ တဘၣ်တဲ နနီၢ်ကစၢ်အဂ့ၢ် အါတလၢတဂ့ၤ. ဂုာ်ကျဲးစၢးတဲ တၢ်ဂ့ၢ်လၢ နမၤလိဘၣ် ဘၣ်ဃးဒီး ယဟိဝၤယွၤ, လံာ်စီဆှံ ဒီးအခ့အပှၤလၢ အသးတီတဖၣ်အဂ့ၢ်. ဖဲပတဲသကိးတၢ်ဒီး ပဒီပုၢ်ဝဲၢ်မုၣ်ခွါ တဘျီဂ့ၤ တဘျီဂ့ၤအခါ ပတဲတၢ်ဂ့ၢ်လၢ ကမၤဂၢၢ်ကျၢၤထီၣ် အတၢ်နာ်သ့.

ဟ့ၣ်ဂံၢ်ဟ့ၣ်ဘါပှၤဂၤ ခီဖျိနတၢ်ဆၢတဲာ် ဒီးနတၢ်မၤ. အဒိ ဖဲနဆၢတဲာ်လီၤသးလၢ နကဆဲးမၤ ကစၢ်ယွၤအတၢ်မၤ လၢဆၢကတီၢ်လၢပှဲၤအခါ အတညီလၢနဂီၢ်ဘၣ်. သနာ်က့ ဖဲဒီပုၢ်ဝဲၢ်မုၣ်ခွါတဖၣ် ထံၣ်ဝဲလၢ နမၤဒ်န့ၣ်အခါ ကကဲထီၣ် တၢ်ဟ့ၣ်ဂံၢ်ဟ့ၣ်ဘါ လၢအဝဲသ့ၣ်အဂီၢ်. ဒီးဖဲဒီပုၢ်ဝဲၢ်မုၣ်ခွါတဖၣ် ထံၣ်ဝဲလၢ နတၢ်အိၣ်ဆူၣ်အိၣ်ချ့ တဂ့ၤဘၣ် မ့တမ့ၢ် နဖံးတၢ်မၤတၢ် ဒီတနံၤကျၢၤ ဒီးနလီၤဘှံးဒိၣ်မး ဘၣ်ဆၣ် နဂုာ်ကျဲးစၢး လဲၤထီၣ်ဒံး နွံဖးဖီ တၢ်အိၣ်ဖှိၣ် ထီဘိအဃိ ကကဲထီၣ် တၢ်ဟ့ၣ်ဂံၢ်ဟ့ၣ်ဘါ လၢအဝဲသ့ၣ်အဂီၢ်.

မ့ၢ်နဟ့ၣ်ဂံၢ်ဟ့ၣ်ဘါ နဒီပုၢ်ဝဲၢ်မုၣ်ခွါ ခီဖျိနတၢ်ကတိၤ ဒီးနတၢ်မၤလံဧါ. ဒီးတၢ်လၢ နဒီပုၢ်ဝဲၢ်မုၣ်ခွါ တဲဝဲဒီးမၤဝဲတဖၣ်န့ၣ် မ့ၢ်နထံၣ်လၢ အကဲဝဲ နီၢ်သးအတၢ်ဟ့ၣ် လၢနဂီၢ်ဧါ.