ပှၤဖးလံာ်ဖိတဖၣ် အတၢ်သံကွၢ်

တယံာ်လၢၤဘၣ် “တၢ်ကူၣ်တမံၤ” လၢယဟိဝၤယွၤ ကထၢနုာ်ဝဲလၢ ပဒိၣ်တဖၣ် အသးပူၤန့ၣ် မ့ၢ်မနုၤလဲၣ်.

ဘၣ်ဃးဒီး တၢ်နးတၢ်ဖှီၣ်ဖးဒိၣ် ကစးထီၣ်သး အဂ့ၢ်န့ၣ် လီၣ်ဖျါ ၁၇:၁၆, ၁၇ တဲဝဲလၢ “ဆၣ်ဖိကီၢ်ဖိလၢ အအၢတဒု ဒီးအနၢၤအဘိတဆံ လၢနထံၣ်ဘၣ်အီၤန့ၣ် ကသးဟ့ဝဲ ပိာ်မုၣ်ဆါလီၤအီၣ်သးတဂၤအံၤ, ကဂုာ်န့ၢ်ဆူၣ် အတၢ်ဖိတၢ်လံၤခဲလၢာ်, ကဒုးအိၣ်ဘ့ၣ်ဆ့အီၤ, ကအီၣ်ကွံာ်အညၣ် ဒီးကဒွဲၣ်အူထီၣ်အီၤလၢ မ့ၣ်အူလၢာ်လၢာ်ဆ့ဆ့လီၤ. အဝဲသ့ၣ် ကမၤဝဲဒ်န့ၣ် မ့ၢ်လၢ ကစၢ်ယွၤကထၢနုာ် တၢ်ကူၣ်တမံၤလၢ အဝဲသ့ၣ်အသးပူၤ ဒ်သိးအဝဲသ့ၣ် ကမၤလၢပှဲၤထီၣ် ကစၢ်ယွၤအတၢ်တိာ်ပာ် လၢအမ့ၢ်စ့ၢ်ကီး အဝဲသ့ၣ် အတၢ်တိာ်ပာ် တမံၤဃီအဂီၢ်လီၤ. ဒ်သိးကကဲထီၣ်အသးဒ်န့ၣ်အဂီၢ် အဝဲသ့ၣ်ကဟ့ၣ်လီၤ အဘီမုၢ်အစိကမီၤလၢ ဆၣ်ဖိကီၢ်ဖိလၢ အအၢတဒုအအိၣ်.” လၢညါန့ၣ် ပတၢ်ကရၢကရိ လံာ်လဲၢ်ၡဲပၠးဝဲလၢ “တၢ်ကူၣ်တမံၤ” လၢ ယဟိဝၤယွၤ ကထၢနုာ်ဝဲန့ၣ် အမ့ၢ်တၢ်ကူၣ်လၢ ပဒိၣ်တဖၣ် ကမၤဟးဂီၤ တၢ်ဘူၣ်တၢ်ဘါကမၣ်.

ဘၣ်ဆၣ် ဘၣ်ဃးဒီး တၢ်ဂ့ၢ်အံၤန့ၣ် ပဘၣ်မၤဘၣ်ထီၣ်က့ၤ ပတၢ်နၢ်ပၢၢ်. “တၢ်ကူၣ်တမံၤ” လၢယဟိဝၤယွၤ ကထၢနုာ်ဝဲလၢ ပဒိၣ်တဖၣ် အသးပူၤန့ၣ် မ့ၢ်ဝဲဒ်သိး “အဝဲသ့ၣ်ကဟ့ၣ်လီၤ အဘီမုၢ်အစိကမီၤလၢ ဆၣ်ဖိကီၢ်ဖိလၢ အအၢတဒုအအိၣ်.” ဒ်သိး ပကနၢ်ပၢၢ်လၢ တၢ်ဂ့ၢ်အံၤ ကဟဲလၢပှဲၤထီၣ် ဒ်လဲၣ်အဂီၢ် ပကဆိကမိၣ်ကွၢ်သကိး တၢ်သံကွၢ်တနီၤ.

ဝံအတၢ်စံးပာ်အံၤ တဲဘၣ်ဃးဒီး မတဂၤသ့ၣ်လဲၣ်. “ပိာ်မုၣ်ဆါလီၤအီၣ်သး” တဂၤလၢ လံာ်လီၣ်ဖျါ ကိးစ့ၢ်ကီးလၢ “ဘၤဘူၤလိၣ်ဖးဒိၣ်” န့ၣ်အဲၣ်ဒိးတဲဝဲ တၢ်ဘူၣ်တၢ်ဘါကမၣ် လၢဟီၣ်ခိၣ်ဒီဘ့ၣ်ညါ. “ဆၣ်ဖိကီၢ်ဖိလၢ အအၢလၢ အလွဲၢ်ဂီၤဆှုၣ်ကလာ်တဒု” န့ၣ်အဲၣ်ဒိးတဲဝဲ တၢ်ကရၢကရိလၢ ပှၤဒုးအိၣ်ထီၣ်ဝဲလၢ ကမၤဃူမၤဖိးတၢ်လၢ ဟီၣ်ခိၣ်ဒီဘ့ၣ် ဖဲ ၁၉၁၉. တၢ်ကရၢကရိအံၤ လၢညါန့ၣ် အကဲဝဲ ဘီမုၢ်ပာ်ဖှိၣ်ထီၣ်သးကရၢ ဒီးခဲအံၤန့ၣ် အကဲဝဲ ဘီမုၢ်စၢဖှိၣ်ကရၢ. (လီၣ် ၁၇:၃-၅) မ့မ့ၢ် “အနၢၤအဘိတဆံ” န့ၣ် အဲၣ်ဒိးတဲဝဲ ပဒိၣ်ပပှၢ်ခဲလၢာ်လၢ အဆီၣ်ထွဲဝဲ ဆၣ်ဖိကီၢ်ဖိလၢ အအၢတဒု.

ပိာ်မုၣ်ဆါလီၤအီၣ်သးတဂၤ ဒီးဆၣ်ဖိကီၢ်ဖိလၢ အအၢလၢ အလွဲၢ်ဂီၤဆှုၣ်ကလာ်တဒုန့ၣ် အတၢ်ရ့လိာ်သး အိၣ်ဒ်လဲၣ်. ပိာ်မုၣ်တဂၤန့ၣ် “ဆ့ၣ်နီၤလၢ” ဆၣ်ဖိကီၢ်ဖိလၢ အအၢတဒုအံၤအလိၤ. အဲၣ်ဒိးတဲဝဲ ပိာ်မုၣ်အံၤ ဆီၣ်ထွဲမၤစၢၤဝဲ ဆၣ်ဖိကီၢ်ဖိလၢ အအၢတဒုအံၤ ဒီးဂုာ်ကျဲးစၢး ဒိၣ်စိလၢအဖီခိၣ်.

တၢ်ကကဲထီၣ်သးဒီး ပိာ်မုၣ်ဆါလီၤအီၣ်သးတဂၤန့ၣ် ဒ်လဲၣ်. ဆၣ်ဖိကီၢ်ဖိလၢ အအၢတဒု ဒီးအနၢၤအဘိတဆံန့ၣ် “ကသးဟ့ဝဲ ပိာ်မုၣ်ဆါလီၤအီၣ်သးတဂၤအံၤ.” အဝဲသ့ၣ် ကဂုာ်န့ၢ်ဆူၣ် အတၢ်ဖိတၢ်လံၤခဲလၢာ် ဒီးပာ်ဖျါထီၣ်လၢ ပှၤခဲလၢာ်အမဲာ်ညါလၢ ပိာ်မုၣ်တဂၤအံၤ အအၢအသီဒိၣ်မး. ဝံၤဒီး ဒ်ယဟိဝၤယွၤ တဲပာ်စၢၤဝဲအသိး အဝဲသ့ၣ် ကမၤဟးဂီၤကွံာ် ပိာ်မုၣ်တဂၤအံၤ. (လီၣ် ၁၇:၁; ၁၈:၈) ဖဲန့ၣ်ဝံၤအလီၢ်ခံ တၢ်ဘူၣ်တၢ်ဘါကမၣ်တဖၣ် တအိၣ်လၢၤဘၣ်. ဘၣ်ဆၣ် တချုး တၢ်ကဲထီၣ်သးဒ်အံၤ ဒံးဘၣ်န့ၣ် ယဟိဝၤယွၤ ကမၤဝဲဒ်သိး ပဒိၣ်တဖၣ် ကမၤတၢ်တမံၤမံၤလၢ အတကဲထီၣ်သး နီတဘျီဒံးဘၣ်.

ယဟိဝၤယွၤ ကမၤဝဲဒ်သိး ပဒိၣ်တဖၣ် ကမၤမနုၤလဲၣ်. ယဟိဝၤယွၤ ကထၢနုာ်ဝဲ “တၢ်ကူၣ်တမံၤ” လၢပဒိၣ်တဖၣ် အသးပူၤဒ်သိး “အဝဲသ့ၣ် အတၢ်စိတၢ်ကမီၤ ဒီးအတၢ်ခွဲးတၢ်ယာ်လၢ အကပၢတၢ်န့ၣ် အကဟ့ၣ်လီၤဝဲလၢ ဆၣ်ဖိကီၢ်ဖိလၢ အအၢလၢ [အလွဲၢ်ဂီၤဆှုၣ်ကလာ်] တဒု” လၢအမ့ၢ် ဘီမုၢ်စၢဖှိၣ်ကရၢ အအိၣ်. (လီၣ် ၁၇:၁၃) ဆိကမိၣ်ကွၢ် တၢ်ဂ့ၢ်အံၤ. မ့ၢ်ပဒိၣ်လၢ အပၢတၢ်တဖၣ် ကဆၢတဲာ်လီၤ အနီၢ်ကစၢ်သး ဒီးဟ့ၣ်ဝဲ အတၢ်စိတၢ်ကမီၤ ဒီးတၢ်ခွဲးတၢ်ယာ်လၢ ဆၣ်ဖိကီၢ်ဖိလၢ အအၢတဒု အအိၣ်ဧါ. အဝဲသ့ၣ် တမၤဝဲဒ်န့ၣ် နီတစဲးဘၣ်. ဝံအတၢ်စံးပာ် ပာ်ဖျါထီၣ်လၢ ကစၢ်ယွၤ ကမၤဝဲဒ်သိး အဝဲသ့ၣ် ကမၤလၢပှဲၤထီၣ် ကစၢ်ယွၤ အတၢ်တိာ်ပာ်. (ကတိၤ ၂၁:၁; ထိၣ်သတြီၤဒီး ယၡါယၤ ၄၄:၂၈.) ပဒိၣ်တဖၣ် တဟ့ၣ်ဝဲ အတၢ်စိတၢ်ကမီၤ တဘျီတစဲးဘၣ်, ဘၣ်ဆၣ် အကဟ့ၣ်ဝဲ တဘျီဃီ. ဝံၤဒီး ဆၣ်ဖိကီၢ်ဖိလၢ အအၢတဒုအံၤ ကမၤဟးဂီၤဝဲ တၢ်ဘူၣ်တၢ်ဘါကမၣ် ခဲလၢာ်.

ခါဆူညါန့ၣ် တၢ်ကကဲထီၣ်သးဒ်လဲၣ်. ယဟိဝၤယွၤ ကမၤဝဲဒ်သိး ပဒိၣ်တဖၣ် ကဟ့ၣ်ဝဲ အတၢ်စိတၢ်ကမီၤ ခဲလၢာ်လၢ ဆၣ်ဖိကီၢ်ဖိလၢ အအၢတဒုအအိၣ် သတူၢ်ကလာ်. အဃိ ပတလိၣ် မုၢ်လၢ်လၢ ပကထံၣ်ဘၣ် တၢ်ကစီၣ် ဘၣ်ဃးဒီး ပဒိၣ်တဖၣ် ကဆီၣ်ထွဲဝဲ ဘီမုၢ်စၢဖှိၣ်ကရၢ ကယီကယီ ဒ်လဲၣ်အဂ့ၢ်ဘၣ်. ဒီးဖဲပဒိၣ်တဖၣ် မၤဝဲဒ်န့ၣ်အခါ ပကသ့ၣ်ညါလၢ တၢ်နးတၢ်ဖှီၣ်ဖးဒိၣ် ဘူးကစးထီၣ်လံ. ခီဖျိလၢ တၢ်ကကဲထီၣ်သးဒ်အံၤ သတူၢ်ကလာ်အဃိ “မ်ပစီၣ်မဲာ်စီၣ်နါ ဒီးအိၣ်ဆၢပံၢ်ကလာ်တက့ၢ်.”—၁ သ့း ၅:၆.