“ပှၤလၢအစံၣ်ညီၣ် ဟီၣ်ခိၣ်ဒီဘ့ၣ်ညါတဂၤ”န့ၣ် ကမၤတၢ်တီတၢ်လိၤထီဘိ

၁. စီၤအၤဘြၤဟၣ်နာ်ဝဲလၢ ယဟိဝၤယွၤကစံၣ်ညီၣ်တၢ် တီတီလိၤလိၤဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)

“ပှၤလၢအစံၣ်ညီၣ် ဟီၣ်ခိၣ်ဒီဘ့ၣ်ညါတဂၤန့ၣ် ကမၤတၢ်တီတၢ်လိၤ တမ့ၢ်ဘၣ်ဧါ.” (၁ မိၤၡ့ ၁၈:၂၅) စီၤအၤဘြၤဟၣ်သံကွၢ်ဝဲဒ်အံၤန့ၣ် တမ့ၢ်လၢအသးဒ့ဒီအဃိဘၣ်. လၢတၢ်န့ၣ်အလီၢ် အတၢ်သံကွၢ်အံၤ ပာ်ဖျါထီၣ်လၢ အဝဲနာ်ဝဲလၢ ယဟိဝၤယွၤကစံၣ်ညီၣ် ဝ့ၢ်စဒိၣ်ဒီးဂမိရၤ တီတီလိၤလိၤလီၤ. ယဟိဝၤယွၤ ကမၤသံ “ပှၤအတီအလိၤ ဒီးပှၤတတီတလိၤ” တပူၤဃီန့ၣ် စီၤအၤဘြၤဟၣ် တဆိကမိၣ်ဘၣ်ဝဲ “ဒ်န့ၣ်” နီတဘျီဘၣ်. အဝဲနာ်ဝဲသပှၢ်တၢၢ်လၢ ယဟိဝၤယွၤ ကစံၣ်ညီၣ်တၢ်တီတီလိၤလိၤလီၤ. တကးဒံးဘၣ် ယဟိဝၤယွၤတဲစ့ၢ်ကီးဝဲလၢ အဝဲမ့ၢ်– “လၢၢ်တဖျၢၣ်, အတၢ်မၤလၢဝဲပှဲၤဝဲ, အဂ့ၢ်ဒ်အံၤ, အကျဲခဲလၢာ်မ့ၢ်တၢ်စံၣ်ညီၣ်လီၤ. မ့ၢ်တၢ်မ့ၢ်တၢ်တီအကစၢ်, ဒီးတၢ်အၢတအိၣ်လၢအီၤ, တၢ်တီဒီးတၢ်လိၤမ့ၢ်အဝဲဒၣ်လီၤ.”—၅ မိၤၡ့ ၃၁:၁၉; ၃၂:၄.

၂. ဘၣ်မနုၤအဃိ ယဟိဝၤယွၤစံၣ်ညီၣ်တၢ် တီတီလိၤလိၤထီဘိလဲၣ်.

^၂ ဘၣ်မနုၤအဃိ စီၤအၤဘြၤဟၣ်နာ်ဝဲလၢ ယဟိဝၤယွၤ ကမၤဝဲတၢ်လၢအဘၣ် ထီဘိန့ၣ်လဲၣ်. ဘၣ်ဃးဒီး တၢ်စံၣ်ညီၣ်တီ ဒီးတၢ်တီတၢ်လိၤန့ၣ် ယဟိဝၤယွၤမ့ၢ်ပှၤလၢ အဒိအတဲာ်ဂ့ၤကတၢၢ်တဂၤလီၤ. လံာ်စီဆှံလၢ ဧ့ၤဘြံၤအကျိာ်တကတြူၢ်အပူၤ တၢ်ကတိၤလၢအမ့ၢ် “တၢ်တီတၢ်လိၤ, ဒီးတၢ်စံၣ်ညီၣ်တီ” န့ၣ်ပှၤသူဃုာ်အီၤ မ့ၢ်လၢအခီပညီ လီၤဂာ်လိာ်အသးအဃိလီၤ. ဒီးယဟိဝၤယွၤအတၢ်ဘျၢန့ၣ် ဘၣ်ဝဲအဃိ အဝဲကစံၣ်ညီၣ်တၢ် တီတီလိၤလိၤထီဘိလီၤ. လံာ်စီဆှံစံးဝဲလၢ– ယွၤ ‘အဲၣ်ဝဲတၢ်တီတၢ်လိၤ, ဒီးတၢ်စံၣ်ညီၣ်တီလီၤ.’—စံးထီၣ်ပတြၢၤ ၃၃:၅.

၃. မုၢ်မဆါတနံၤအံၤ ပှၤတနီၤနီၤထံၣ်ဘၣ်ဝဲ တၢ်တတီတလိၤ မနုၤတဖၣ်လဲၣ်, ဟ့ၣ်တၢ်အဒိတက့ၢ်.

^၃ ပသ့ၣ်ညါဘၣ်လၢ ယဟိဝၤယွၤန့ၣ် မၤတၢ်တီတီလိၤလိၤထီဘိအဃိ ပသးမုာ်ဒိၣ်မးလီၤ. ဘၣ်ဆၣ်မုၢ်မဆါတနံၤအံၤ ဟီၣ်ခိၣ်ဒီဘ့ၣ်န့ၣ် ပှဲၤဝဲဒီးတၢ်တတီတလိၤတဖၣ်လီၤ. အဒိ, ပှၤတနီၤနီၤန့ၣ် အဝဲသ့ၣ်တမၤကမၣ်တၢ်နီတမံၤဘၣ် ဘၣ်ဆၣ် ပှၤပာ်ဒ့ၣ်ပာ်ကမၣ်အီၤဒီး ပၢနုာ်အီၤလၢဃိာ်ပူၤလီၤ. လၢခံပူၤကွံာ်အနံၣ်တဖၣ်ဝံၤအလီၢ်ခံ ပှၤမၤကွၢ် DNA ဒီးပှၤသ့ၣ်ညါလၢ အတၢ်ကမၣ် တအိၣ်နီတမံၤဘၣ်. တၢ်တတီတလိၤသ့ၣ်တဖၣ်အံၤ ကဲထီၣ်ဝဲတၢ်သးဘၣ်တံာ်တာ်ဒီး တၢ်သူၣ်အ့န့သးအ့န့လီၤ. ဘၣ်ဆၣ် တၢ်တတီတလိၤလၢ ပတူၢ်ဘၣ်အီၤကီန့ၢ်ဒံးတၢ်အဂၤ အိၣ်ဝဲတမံၤလီၤ. ကမ့ၢ်ဝဲတၢ်မနုၤလဲၣ်.

တၢ်တတီတလိၤလၢ အကဲထီၣ်အသးလၢ တၢ်အိၣ်ဖှိၣ်ပူၤ

၄. ခရံာ်ဖိသ့ၣ်တဖၣ် အတၢ်နာ်ဘၣ်တၢ်မၤကွၢ်အီၤ သ့လၢကျဲဒ်လဲၣ်.

^၄ ခရံာ်ဖိသ့ၣ်တဖၣ် သ့ၣ်ညါဝဲလၢ မုၢ်မဆါတနံၤအံၤ ကထံၣ်ဘၣ်ဝဲ တၢ်တတီတလိၤတဖၣ်လီၤ. ဘၣ်ဆၣ် ဖဲပထံၣ်ဘၣ်တၢ်တတီတလိၤလၢ တၢ်အိၣ်ဖှိၣ်ပူၤအခါ ကကဲထီၣ်တၢ်မၤကွၢ်တခါလၢ ပတၢ်နာ်အဂီၢ်လီၤ. ဖဲန့ၣ်အခါ နကမၤဒ်လဲၣ်. မ့ၢ်နကပျဲ တၢ်တတီတလိၤ မၤလီၤဃံၢ်နၤဧါ.

၅. လၢတၢ်အိၣ်ဖှိၣ်အပူၤ ပမ့ၢ်တူၢ်ဘၣ်လၢ ပှၤမၤပှၤတတီတလိၤန့ၣ် ဘၣ်မနုၤအဃိ ပတကြၢးကမၢကမၣ်ဘၣ်လဲၣ်.

^၅ ပဝဲခဲလၢာ် ပမ့ၢ်ပှၤတလၢတပှဲၤအဃိ ပမၤဘၣ်တၢ်ကမၣ်လီၤ. လၢတၢ်န့ၣ်အဃိ တဘျီတခီၣ် လၢတၢ်အိၣ်ဖှိၣ်ပူၤန့ၣ် ပှၤအဂၤကမၤကမၣ်ဘၣ်ပှၤဒီး ပဝဲစ့ၢ်ကီးပကမၤကမၣ်ဘၣ် အဝဲသ့ၣ်လီၤ. (၁ ယိၤဟၣ် ၁:၈) လၢတၢ်အိၣ်ဖှိၣ်အပူၤန့ၣ် တၢ်သ့ၣ်တဖၣ်အံၤ တကဲထီၣ်အသးကြီကြီဘၣ်. ဒီးဖဲတၢ်သ့ၣ်တဖၣ်အံၤ ကဲထီၣ်အသးလၢတၢ်အိၣ်ဖှိၣ်ပူၤအခါ ခရံာ်ဖိလၢ အသးတီသ့ၣ်တဖၣ် တကမၢကမၣ်ဘၣ် ဒီးအဝဲသ့ၣ်တပျဲတၢ်သ့ၣ်တဖၣ်အံၤ မၤလီၤဃံၢ်အီၤဘၣ်. ဖဲပတူၢ်ဘၣ်တၢ်တတီတလိၤလၢ ပဒီပုၢ်ဝဲၢ်အကျါအခါ ဒ်သိးပဆဲးပၢၤဃာ် ပတၢ်နာ်ကန့ၢ်အဂီၢ် ယဟိဝၤယွၤ ဟ့ၣ်ပှၤတၢ်ဟ့ၣ်ကူၣ် လၢလံာ်စီဆှံအပူၤလီၤ.—စံးထီၣ်ပတြၢၤ ၅၅:၁၂-၁၄.

၆, ၇. လၢတၢ်အိၣ်ဖှိၣ်အပူၤန့ၣ် ဒီပုၢ်ဝဲၢ်တဂၤ တူၢ်ဘၣ်ဝဲ တၢ်တတီတလိၤဒ်လဲၣ်. ဒီးတၢ်ဂ့ၤတၢ်ဝါ မနုၤတမံၤ မၤစၢၤအီၤလဲၣ်.

^၆ ပကတဲသကိး ဒီပုၢ်ဝဲၢ် ဝံလံဒဲ အဂ့ၢ်လီၤ. စးထီၣ်ဖဲ ၁၉၃၁ န့ၣ်ဒီပုၢ်ဝဲၢ် ဝံလံဒဲ မၤကစၢ်ယွၤအတၢ်မၤလၢ ကီၢ်စွံးစလဲၣ် အဘ့ၤသ့လးန့ၣ်လီၤ. ဒီးဖဲ ၁၉၄၆ န့ၣ်အဝဲလဲၤထီၣ်ဝဲ ကံးလဧးကၠိ လၢဘၣ်တၢ်မၤအီၤ ဃိးဘျီတဘျီလၢ ကီၢ်အမဲရကၣ် ဝ့ၢ်နူယီးလီၤ. အဝဲထီၣ်ကၠိဝံၤ ဒိးန့ၢ်ဘၣ်မူဒါလၢ ကမၤကဝီၤအပှၤကွၢ်တၢ် အတၢ်မၤလၢ ကီၢ်စွံးစလဲၣ်န့ၣ်လီၤ. လၢဒီပုၢ်ဝဲၢ်ဝံလံဒဲ အတၢ်အိၣ်မူ တၢ်လဲၤခီဖျိအပူၤန့ၣ် အဝဲတဲဝဲလၢ ဖဲ ၁၉၄၉ နံၣ်န့ၣ်ယဒုးသ့ၣ်ညါ စွံးစလဲၣ် အဝဲၤတြၢ် လၢကဆီဟံၣ်ဆီဃီလီၤ. ဒီပုၢ်ဝဲၢ်တဖၣ်စံးဆၢက့ၤအီၤလၢ အဝဲမ့ၢ်ဆီဟံၣ်ဆီဃီန့ၣ် အတၢ်ခွဲးတၢ်ယာ်တဖၣ် ကလီၤမၢ်ကွံာ်ဝဲခဲလၢာ်လီၤ. ဒီးအဝဲစံးဝဲလၢ “ယဟ့ၣ်တၢ်စံၣ်တဲၤတဲလီၤတၢ် တန့ၢ်လၢၤဘၣ်” ယမၤန့ၢ်ထဲဒၣ် ပှၤလဲၤလၢညါတခါဧိၤလီၤ. တကးဒံးဘၣ် “ဒီပုၢ်ဝဲၢ်တဖၣ် တရ့ဒီးပှၤဒ်လၢညါအသိးလၢၤဘၣ်. အဝဲသ့ၣ်အါဂၤ ထံၣ်ပှၤဒ်ပှၤလၢအဘၣ် တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤအသိးန့ၣ်လီၤ.”

^၇ ဒီပုၢ်ဝဲၢ် ဝံလံဒဲ မၤဝဲဒ်လဲၣ်. အဝဲစံးဝဲလၢ– “ပသ့ၣ်ညါလၢ တၢ်ဆီဟံၣ်ဆီဃီန့ၣ် တထီဒါလိာ်အသးဒီး လံာ်စီဆှံတၢ်သိၣ်တၢ်သီဘၣ်. လၢတၢ်န့ၣ်အဃိ ပပာ်ဂံၢ်ပာ်ဘါ ယဟိဝၤယွၤ ဒီးဃ့ဘါထုကဖၣ်လၢအအိၣ် ဒီးပနာ်န့ၢ်အီၤလီၤ.” ဖဲန့ၣ်အဆၢကတီၢ် ဒီပုၢ်ဝဲၢ်တဖၣ် တနၢ်ပၢၢ်ဝဲ ယဟိဝၤယွၤ အတၢ်ထံၣ်လၢ ဘၣ်ဃးဒီးတၢ်ဆီဟံၣ်ဆီဃီ အဂ့ၢ်ဘၣ်သနာ်က့ လၢခံကယီကယီန့ၣ် အဝဲသ့ၣ်နၢ်ပၢၢ်ထီၣ်က့ၤဝဲအဃိ ဒီပုၢ်ဝဲၢ်ဝံလံဒဲ ဒိးန့ၢ်ဘၣ်က့ၤဝဲ အမူဒါခဲလၢာ်လီၤ. ယဟိဝၤယွၤ ဆိၣ်ဂ့ၤဒီပုၢ်ဝဲၢ် ဝံလံဒဲ အတၢ်သးတီလီၤ.a (ကွၢ်တၢ်ဂ့ၢ်အဘျဲၣ်တက့ၢ်.) ပကြၢးသံကွၢ်လီၤက့ၤပသးလၢ– ‘ယမ့ၢ်ထံၣ်ဘၣ် တၢ်တတီတလိၤဒ်အံၤန့ၣ် မ့ၢ်ယကအိၣ်ဒီးတၢ်ဝံသးစူၤဒီး နာ်လၢယဟိဝၤယွၤ ကမၤဘၣ်လိာ်က့ၤ တၢ်အိၣ်သးအဝဲအံၤဧါ. မ့တမ့ၢ် မ့ၢ်ယကဂုာ်ကျဲးစၢး မၤဘၣ်လိာ်က့ၤ တၢ်ဂ့ၢ်တဖၣ်အံၤလၢ ယနီၢ်ကစၢ်ဧါ.’—ကတိၤဒိ ၁၁:၂; ဖး မံကၤ ၇:၇ တက့ၢ်.

၈. လၢတၢ်အိၣ်ဖှိၣ်အပူၤ ပမ့ၢ်ဆိကမိၣ်ဘၣ်လၢ ပနီၢ်ကစၢ် မ့တမ့ၢ် ပှၤတဂၤဂၤ ပှၤမၤအီၤတတီတလိၤဘၣ်န့ၣ် ဘၣ်မနုၤအဃိ ပတၢ်ဆိကမိၣ်ကမၣ်ဝဲသ့လဲၣ်.

^၈ နမ့ၢ်ဆိကမိၣ်ဘၣ်လၢ တၢ်အိၣ်ဖှိၣ်အပူၤ ဒီပုၢ်ဝဲၢ်တနီၤနီၤ စံၣ်ညီၣ်တၢ်တတီတလိၤဘၣ်န့ၣ် ဘၣ်သ့ၣ်သ့ၣ် နတၢ်ဆိကမိၣ် ကမၣ်ဝဲသ့လီၤ. ဘၣ်မနုၤအဃိလဲၣ်. မ့ၢ်လၢပတလၢတပှဲၤအဃိ တဘျီတခီၣ်န့ၣ် ပနၢ်ပၢၢ်ကမၣ်တၢ်သ့ဝဲလီၤ. တကးဒံးဘၣ် ပတသ့ၣ်ညါတၢ်ဂ့ၢ်တၢ်ကျိၤခဲလၢာ်ဘၣ်. ဘၣ်ဆၣ် ပတၢ်ဆိကမိၣ်ဘၣ်မ့ၢ်ဂ့ၤ ကမၣ်မ့ၢ်ဂ့ၤ ပကဘၣ်ဃ့ဘါထုကဖၣ်လၢ ယဟိဝၤယွၤအအိၣ် လၢတၢ်ခဲလၢာ်အဂီၢ် ဒီးသန့ၤသးလၢအီၤ ဒီးဆဲးတီဒီးအီၤလီၤ. ပမ့ၢ်မၤဒ်န့ၣ်န့ၣ် ကမၤစၢၤပှၤဒ်သိး ပသုတကဲထီၣ်ပှၤလၢ “ကဒူးကဒ့ၣ်တၢ်လၢယွၤအလိၤ” တဂ့ၤန့ၣ်လီၤ.—ဖး ကတိၤဒိ ၁၉:၃ တက့ၢ်.

၉. လၢတၢ်မၤလိအံၤ ဒီးတၢ်မၤလိလၢခံတခါအပူၤန့ၣ် ပကမၤလိသကိး တၢ်ဂ့ၢ်မနုၤလဲၣ်.

^၉ လၢညါယွၤအပှၤဂီၢ်မုၢ်သ့ၣ်တဖၣ် ကွၢ်ဆၢၣ်မဲာ်ဘၣ်ဒီး တၢ်တတီတလိၤဒ်လဲၣ်န့ၣ် ပကကွၢ်သကိး တၢ်ဂ့ၢ်သၢခါလီၤ. လၢတၢ်မၤလိအံၤအပူၤ ပကတဲသကိးဘၣ်ဃး စီၤအၤဘြၤဟၣ်အလိၤ စီၤယိၤသးဒီးအဒီပုၢ်ဝဲၢ်တဖၣ်အဂ့ၢ်လီၤ. ဒီးတၢ်မၤလိလၢခံတခါန့ၣ် ပကတဲသကိးဘၣ်ဃး စီၤပၤအၤဃာ် အတၢ်ဖံးတၢ်မၤတဖၣ် ယဟိဝၤယွၤ စံၣ်ညီၣ်ဝဲဒ်လဲၣ်. ဒီးတၢ်လၢအကဲထီၣ်အသးဒီး စီၤပ့းတရူး လၢဝ့ၢ်အၣ်တံၤအီာ် ဖဲကီၢ်စူၤရံအပူၤန့ၣ်လီၤ. ဖဲပတဲသကိး တၢ်ဂ့ၢ်သ့ၣ်တဖၣ်အံၤအခါ ပကဟံးန့ၢ်တၢ်မၤလိလၢ အဝဲသ့ၣ်အအိၣ်ဒီး ဖဲနဆိကမိၣ်ဘၣ်လၢ ပှၤမၤနၤတတီတလိၤအခါ သန့ၤနသးလၢယဟိဝၤယွၤ ဒီးအိၣ်ဒီးတၢ်ရ့လိာ်သးဒီး ယဟိဝၤယွၤလၢအဂ့ၤတက့ၢ်.

စီၤယိၤသး တူၢ်ဘၣ်ဝဲတၢ်တတီတလိၤ

၁၀, ၁၁. (က) စီၤယိၤသးတူၢ်ဘၣ်ဝဲ တၢ်မနုၤလဲၣ်. (ခ) ဖဲအအိၣ်လၢဃိာ်ပူၤအခါ ဒိးန့ၢ်ဘၣ်တၢ်ခွဲးတၢ်ယာ် ဒ်လဲၣ်.

^၁၀ စီၤယိၤသး မ့ၢ်ယဟိဝၤယွၤ အခ့အပှၤလၢအိၣ်ဒီး တၢ်သးတီသနာ်က့ ပှၤဂၤမၤအီၤတတီတလိၤဘၣ်န့ၣ်လီၤ. ဘၣ်ဆၣ် တၢ်လၢအမၤဘၣ်ဒိအသး အဒိၣ်ကတၢၢ်န့ၣ်မ့ၢ်ဝဲ အဒီပုၢ်ဝဲၢ်တဖၣ် အတၢ်မၤအီၤ တတီတလိၤဘၣ်န့ၣ်လီၤ. ဖဲစီၤယိၤသးအသးအိၣ် ၁၇ နံၣ်အခါ အဒီပုၢ်ဝဲၢ်တဖၣ် ဆါလီၤကွံာ်အီၤလၢ ကုၢ်အလီၢ်အဃိ ဘၣ်တၢ်က့ၤကိးအီၤလၢ ကီၢ်အဲၤကူပတူးန့ၣ်လီၤ. (၁ မိၤၡ့ ၃၇:၂၃-၂၈; ၄၂:၂၁) တကးဒံးဘၣ် ဖဲအအိၣ်လၢ ကီၢ်အဲၤကူပတူးအခါ ပှၤပာ်ဒ့ၣ်ပာ်ကမၣ်အီၤလၢ အဖီၣ်ဆူၣ်ပှၤမါအဃိ ပှၤပၢနုာ်အီၤလၢ ဃိာ်ပူၤန့ၣ်လီၤ. (၁ မိၤၡ့ ၃၉:၁၇-၂၀) စီၤယိၤသးဘၣ်ကဲကုၢ်ဒီးဘၣ်အိၣ်လၢဃိာ်ပူၤ ၁၃ နံၣ်ဃၣ်ဃၣ်လီၤ. ပဝဲဒၣ်သ့ၣ်တဖၣ် ဖဲပဒီပုၢ်ဝဲၢ်မၤကမၣ်ပှၤအခါ ပကွၢ်လိမၤဒိး စီၤယိၤသးကသ့ဒ်လဲၣ်.

^၁၁ ဖဲစီၤယိၤသး အိၣ်လၢဃိာ်ပူၤအခါ ပှၤလၢအစိာ်န့ၢ်စီၤပၤ အစပံးထံခွးတဂၤစ့ၢ်ကီး ဘၣ်တၢ်ပၢနုာ်အီၤလၢ ဃိာ်ပူၤလီၤ. ဘၣ်တနၤပှၤလၢအစိာ်န့ၢ် စီၤပၤအစပံးထံခွးတဂၤ မံမီၢ်တၢ်ဒီးယဟိဝၤယွၤ မၤစၢၤစီၤယိၤသးလၢ ကဖးန့ၢ်အီၤတၢ်မံမီၢ်အံၤ အခီပညီန့ၣ်လီၤ. စီၤယိၤသးတဲဘၣ်ဝဲ ပှၤစိာ်န့ၢ်စီၤပၤ အစပံးထံခွးတဂၤလၢ တယံာ်လၢၤဘၣ်န့ၣ် နကဟးထီၣ်ဘၣ်လၢဃိာ်ပူၤ ဒီးနကဒိးန့ၢ်ဘၣ်က့ၤ တၢ်မၤလၢနမၤတ့ၢ်န့ၣ်လီၤ. ဖဲန့ၣ်အခါ စီၤယိၤသးဟံးန့ၢ်တၢ်ခွဲးတၢ်ယာ်လၢ ကတဲပၠးဝဲ ပှၤလၢအစိာ်န့ၢ် စီၤပၤအစပံးထံခွးတဂၤအံၤလၢ အဂ့ၢ်န့ၣ်လီၤ. တၢ်ဂ့ၢ်လၢစီၤယိၤသး တဲဖျါထီၣ်ဝဲမ့ၢ်ဂ့ၤ တတဲဖျါထီၣ်ဝဲမ့ၢ်ဂ့ၤ ပဟံးန့ၢ်တၢ်မၤလိလၢအအိၣ် သ့ဝဲအါမးလီၤ.— ၁ မိၤၡ့ ၄၀:၅-၁၃.

၁၂, ၁၃. (က) စီၤယိၤသး တအိၣ်ဃိကဒိဒီး တတူၢ်မူသူ တၢ်တတီတလိၤဘၣ်န့ၣ် ပသ့ၣ်ညါဒ်လဲၣ်. (ခ) စီၤယိၤသးတတဲဘၣ် ပှၤလၢအစိာ်န့ၢ် စီၤပၤအစပံးထံခွးလၢ တၢ်ဂ့ၢ်မနုၤဘၣ်လဲၣ်.

^၁၂ ဖး ၁ မိၤၡ့ ၄၀:၁၄, ၁၅ တက့ၢ်. ပာ်သူၣ်ပာ်သးလၢ စီၤယိၤသး တဲဝဲလၢအဘၣ် “တၢ်ဟုၣ်န့ၢ်” အီၤန့ၣ်တက့ၢ်. လၢတၢ်န့ၣ်အဃိ ပသ့ၣ်ညါဘၣ်လၢ အဝဲတူၢ်ဘၣ်တၢ်တတီတလိၤန့ၣ်လီၤ. ဒီးစီၤယိၤသးတဲဝဲလၢ ပှၤပာ်ဒ့ၣ်ပာ်ကမၣ်အီၤသနာ်က့ နီၢ်နီၢ်န့ၣ် အတၢ်ကမၣ်တအိၣ် နီတမံၤဘၣ်. လၢတၢ်န့ၣ်အဃိ အဝဲမၢပှၤလၢအစိာ်န့ၢ် စီၤပၤအစပံးထံခွးတဂၤ က့ၤတဲဘၣ်စီၤပၤဖၤရိၤ လၢအဂ့ၢ်န့ၣ်လီၤ. ဘၣ်မနုၤအဃိ အဝဲမၢဝဲပှၤတဂၤအံၤဒ်န့ၣ်လဲၣ်. ဒ်သိးအက “ဟးထီၣ်” ဘၣ်လၢဃိာ်ပူၤအဂီၢ်လီၤ.

^၁၃ စီၤယိၤသးတူၢ်ဘၣ် တၢ်တတီတလိၤဘၣ်ဆၣ် အဝဲအိၣ်ဃိကဒိဒီး တူၢ်မူသူဝဲဒ်န့ၣ်ဧါ. တမ့ၢ်ဒ်န့ၣ်ဘၣ်. အဝဲသ့ၣ်ညါဝဲလၢ အတၢ်ကမၣ်တအိၣ်နီတမံၤဘၣ် ဘၣ်ဆၣ် ပှၤမၤအီၤတတီတလိၤလီၤ. လၢတၢ်န့ၣ်အဃိ အဝဲတဲဘၣ်အတၢ်အိၣ်သးလၢ ပှၤလၢအစိာ်န့ၢ် စီၤပၤအစပံးထံခွးတဂၤ ဒီးမုၢ်လၢ်ဝဲလၢ ပှၤတဂၤအံၤကမၤစၢၤအီၤလီၤ. ဘၣ်ဆၣ် လံာ်စီဆှံတပာ်ဖျါဝဲလၢ အဝဲတဲဘၣ်ပှၤတဂၤဂၤလၢ အဒီပုၢ်ဝဲၢ်တဖၣ် ဆါလီၤကွံာ်အီၤအဂ့ၢ်န့ၣ်ဘၣ်. စီၤပၤဖၤရိၤဒၣ်လဲာ် အဝဲတတဲဘၣ်ဝဲဘၣ်. လၢတၢ်န့ၣ်အဃိ ဖဲအဒီပုၢ်ဝဲၢ်တဖၣ် ဟဲလၢအဲၤကူပတူး ဒီးမၤဃူမၤဖိးတၢ်ဒီးအီၤဝံၤအခါ စီၤပၤဖၤရိၤ တူၢ်လိာ်အဝဲသ့ၣ်ဒီး ကွဲမုာ်အဝဲသ့ၣ်လၢ ကအိၣ်ဖဲ ကီၢ်အဲၤကူပတူး အတၢ်လီၢ်လၢအ “ဂ့ၤကတၢၢ်” အပူၤန့ၣ်လီၤ.—၁ မိၤၡ့ ၄၅:၁၆-၂၀, ခ့ခါစှီၤကျိာ်.

၁၄. ပမ့ၢ်တူၢ်ဘၣ် တၢ်တတီတလိၤလၢ တၢ်အိၣ်ဖှိၣ်အပူၤန့ၣ် ဒ်သိးပသုတတဲဟးဂီၤဘၣ် ပှၤဂၤတဂ့ၤအဂီၢ် တၢ်မနုၤကမၤစၢၤပှၤလဲၣ်.

^၁၄ လၢတၢ်အိၣ်ဖှိၣ်အပူၤ ပမ့ၢ်ဆိကမိၣ်လၢ ပှၤမၤပှၤတတီတလိၤဘၣ်န့ၣ် ပကဘၣ်ပလီၢ်ပသးဒ်သိး ပသုတဟးတဲဘၣ် ပှၤဂၤလၢတၢ်ဂ့ၢ်အံၤတဂ့ၤန့ၣ်လီၤ. ဘၣ်ဆၣ် ပတၢ်ဂ့ၢ်ကီမ့ၢ်အိၣ်ထီၣ်န့ၣ် ပကဘၣ်ဃ့တၢ်မၤစၢၤလၢ တၢ်အိၣ်ဖှိၣ်သးပှၢ်အအိၣ် ဒီးပဒီပုၢ်ဝဲၢ်တဂၤဂၤ မ့ၢ်မၤဘၣ်တၢ်ကမၣ်ဖးဒိၣ်န့ၣ် ပကဘၣ်တဲဘၣ် တၢ်အိၣ်ဖှိၣ်သးပှၢ်လီၤ. (၃ မိၤၡ့ ၅:၁) မ့မ့ၢ်တၢ်ဂ့ၢ်ဆံးဆံးဖိန့ၣ် ပကြၢးမၤဘၣ်လိာ်က့ၤအီၤလၢ ပနီၢ်ကစၢ်လီၤ. ပတကြၢးတဲဘၣ် ပှၤအဂၤတဖၣ်ဘၣ် ဒီးတလိၣ်တဲဘၣ် တၢ်အိၣ်ဖှိၣ်သးပှၢ်စ့ၢ်ကီးဘၣ်. (ဖး မးသဲ ၅:၂၃, ၂၄; ၁၈:၁၅ တက့ၢ်.) တၢ်အိၣ်သးဒ်အံၤ မ့ၢ်ကဲထီၣ်န့ၣ် မ်ပကအိၣ်ဒီးတၢ်သးတီ ဒီးမၤထွဲလံာ်စီဆှံ အတၢ်ဟံးစုနဲၣ်ကျဲတက့ၢ်. တဘျီတခီၣ်တၢ်ဂ့ၢ်တနီၤနီၤန့ၣ် လၢခံပသ့ၣ်ညါထီၣ်ဘၣ်လၢ ပတၢ်ဆိကမိၣ်ကမၣ်ဝဲ ဒီးပှၤတမၤကမၣ်ဘၣ်ပှၤနီတမံၤဘၣ်. ဖဲန့ၣ်အခါ မ့ၢ်လၢပတတဲဟးဂီၤဘၣ် ပဒီပုၢ်ဝဲၢ်နီတမံၤဘၣ်အဃိ ပကသးခုလီၤ. ထီဘိန့ၣ်သ့ၣ်နီၣ်ထီၣ်လၢ ပတၢ်ဆိကမိၣ်ဘၣ်မ့ၢ်ဂ့ၤ ကမၣ်မ့ၢ်ဂ့ၤ တၢ်ကတိၤလၢ အမၤဘၣ်ဒိပှၤဂၤန့ၣ် ပတကြၢးတဲဘၣ်. မ့ၢ်လၢတၢ်ကတိၤတဖၣ်အံၤ တမၤဘၣ်လိာ်က့ၤ ပတၢ်ဂ့ၢ်ကီဘၣ်အဃိလီၤ. ပမ့ၢ်အိၣ်ဒီးတၢ်သးတီ လၢယဟိဝၤယွၤ ဒီးပဒီပုၢ်ဝဲၢ်တဖၣ်အဖီခိၣ်န့ၣ် ကမၤစၢၤပှၤဒ်သိး ပသုတမၤကမၣ်ဘၣ် တၢ်တဂ့ၤအဂီၢ်လီၤ. ပှၤကွဲးထါစံးထီၣ်ပတြၢၤတဲဝဲလၢ “ပှၤလၢအလဲၤတၢ်လၢလၢပှဲၤပှဲၤ” န့ၣ် တကတိၤခဲၣ်သူခဲၣ်ဂီၤတၢ် “လၢအပျ့ၤ” ဒီး “တမၤအၢဘၣ်အတံၤသကိး” ဘၣ်.—စံးထီၣ်ပတြၢၤ ၁၅:၂, ၃; ယၤကိာ် ၃:၅.

နတၢ်ရ့လိာ်သးဒီး ယဟိဝၤယွၤန့ၣ် မ့ၢ်တၢ်လၢအရ့ဒိၣ်ကတၢၢ်

၁၅. စီၤယိၤသးအတၢ်ရ့လိာ်သးဒီး ယဟိဝၤယွၤဂ့ၤအဃိ ဒိးန့ၢ်ဘၣ်တၢ်မနုၤလဲၣ်.

^၁၅ ပဟံးန့ၢ်တၢ်မၤလိအဂၤတမံၤလၢ စီၤယိၤသးအအိၣ် သ့ဒံးဝဲလီၤ. ဖဲစီၤယိၤသးတူၢ်ဘၣ်ဝဲ တၢ်တတီတလိၤလၢ ၁၃ နံၣ်အတီၢ်ပူၤန့ၣ် အဝဲအိၣ်ဒီးတၢ်ထံၣ်ဒ် ယဟိဝၤယွၤအသိးလီၤ. (၁ မိၤၡ့ ၄၅:၅-၈) တၢ်လၢအကဲထီၣ်အသးဒီးအီၤန့ၣ် အဝဲတပာ်ဒ့ၣ်ပာ်ကမၣ် ယဟိဝၤယွၤဘၣ်. ဒီးတၢ်လၢအတူၢ်ဘၣ်ဝဲန့ၣ် အဝဲသးပ့ၤနီၣ်ဝဲတန့ၢ်ဘၣ် ဘၣ်ဆၣ် အဝဲတသးဆါပှၤဂၤဘၣ်. တၢ်လၢအရ့ဒိၣ်ကတၢၢ်တခါန့ၣ် အဝဲတပျဲဝဲ ပှၤဂၤအတၢ်တလၢတပှဲၤ ဒီးအတၢ်မၤအၢမၤသီ ကမၤလီၤဖးအီၤဒီး ယဟိဝၤယွၤဘၣ်. စီၤယိၤသးတီဒီး ယဟိဝၤယွၤအဃိ ဒိးန့ၣ်ဘၣ်တၢ်ခွဲးတၢ်ယာ်လၢ ထံၣ်ဘၣ်ဝဲယဟိဝၤယွၤ မၤဘၣ်လိာ်က့ၤအတၢ်ဂ့ၢ် တကးဒံးဘၣ် အဝဲဒီးအပှၤဟံၣ်ဖိဃီဖိ ဒိးန့ၢ်ဘၣ်ဝဲယွၤအတၢ်ဆိၣ်ဂ့ၤတဖၣ်လီၤ.

၁၆. ပမ့ၢ်တူၢ်ဘၣ် တၢ်တတီတလိၤလၢ တၢ်အိၣ်ဖှိၣ်ပူၤန့ၣ် ဘၣ်မနုၤအဃိ ပဘၣ်သုးဘူးအါထီၣ်ပသးဆူ ယဟိဝၤယွၤအအိၣ်လဲၣ်.

^၁၆ ဒ်န့ၣ်အသိး ပဝဲဒၣ်စ့ၢ်ကီး ပကဘၣ်ပာ်လုၢ်ပာ်ပှ့ၤဒီး မၤဂၢၢ်ကျၢၤထီၣ်ပတၢ်ရ့လိာ်သးဒီး ယဟိဝၤယွၤလီၤ. ပတကြၢးပျဲပှၤဂၤ အတၢ်တလၢတပှဲၤ ကမၤလီၤဖးပှၤဒီး ယဟိဝၤယွၤဘၣ်. (ရိမ့ၤ ၈:၃၈, ၃၉) လၢတၢ်န့ၣ်အလီၢ် ပမ့ၢ်တူၢ်ဘၣ်တၢ်တတီတလိၤလၢ တၢ်အိၣ်ဖှိၣ်အပူၤန့ၣ် မ်ပကကွၢ်လိမၤဒိး စီၤယိၤသးဒီး သုးဘူးအါထီၣ်ပသးဆူ ယဟိဝၤယွၤအအိၣ်တက့ၢ်. ဒီးဂုာ်ကျဲးစၢးအိၣ်ဒီး တၢ်ထံၣ်ဒ်ယဟိဝၤယွၤအသိးတက့ၢ်. ပဂုာ်ကျဲးစၢးမၤဘၣ်လိာ်က့ၤ တၢ်ဂ့ၢ်ကီဒ်လံာ်စီဆှံ အတၢ်ဟံးစုနဲၣ်ကျဲအသိးဘၣ်ဆၣ် မ့ၢ်တဘၣ်လိာ်ဒံးဘၣ်န့ၣ် ပာ်လီၤလၢယဟိဝၤယွၤအစုပူၤတက့ၢ်. ပမ့ၢ်မၤဒ်န့ၣ်န့ၣ် ပနာ်သ့သပှၢ်ကတၢၢ်လၢ အခါမ့ၢ်ဘၣ်န့ၣ် ယဟိဝၤယွၤ ကမၤဘၣ်လိာ်က့ၤ ပတၢ်ဂ့ၢ်ကီလီၤ.

နာ်န့ၢ် “ပှၤလၢအစံၣ်ညီၣ် ဟီၣ်ခိၣ်ဒီဘ့ၣ်တဂၤ” တက့ၢ်

၁၇. ပပာ်ဖျါထီၣ်လၢပနာ် “ပှၤလၢအစံၣ်ညီၣ်ဟီၣ်ခိၣ်ဒီဘ့ၣ်” တဂၤန့ၣ် သ့လၢကျဲဒ်လဲၣ်.

^၁၇ ပအိၣ်မူဘၣ်ဒံးလၢ ဟီၣ်ခိၣ်လၢမုၣ်ကီၤလံၢ် ပၢဝဲအံၤအဃိ ပကဘၣ်သဂၢၢ်ဒီး တၢ်တတီတလိၤတဖၣ်လီၤ. တဘျီတခီၣ် လၢတၢ်အိၣ်ဖှိၣ်အပူၤန့ၣ် နၤ မ့တမ့ၢ် ပှၤလၢနသ့ၣ်ညါတဂၤဂၤ ကထံၣ်ဘၣ် မ့တမ့ၢ် ကတူၢ်ဘၣ်ဝဲတၢ်တတီတလိၤ တမံၤမံၤလီၤ. ဖဲန့ၣ်အခါတဘၣ်ပျဲ တၢ်သ့တဖၣ်အံၤ မၤလီၤဃံၢ်နၤတဂ့ၤ. (စံးထီၣ်ပတြၢၤ ၁၁၉:၁၆၅) မ့မ့ၢ်ဆဲးတီဒီးကစၢ်ယွၤ, ဃ့တၢ်မၤစၢၤလၢအအိၣ် ဒီးသန့ၤနသးလၢအီၤတက့ၢ်. သ့ၣ်နီၣ်ထီၣ်လၢ ပတလၢတပှဲၤဘၣ်အဃိ ပတၢ်နၢ်ပၢၢ်ကမၣ်ဝဲသ့ ဒီးဘၣ်သ့ၣ်သ့ၣ် ပတသ့ၣ်ညါ တၢ်ဂ့ၢ်တၢ်ကျိၤခဲလၢာ်ဘၣ်. လၢတၢ်န့ၣ်အဃိ ကွၢ်လိမၤဒိးစီၤယိၤသးဒီး ဟးဆှဲးတၢ်တဲဟးဂီၤပှၤဂၤ လၢကမၤအါထီၣ် တၢ်သဘံၣ်သဘုၣ်န့ၣ်တက့ၢ်. တၢ်ဂ့ၢ်တနီၤနီၤန့ၣ် တဘၣ်ဆၢတဲာ်ဒီး ဘှါၡဲလၢနနီၢ်ကစၢ်တဂ့ၤ မ့မ့ၢ်အိၣ်ဒီးတၢ်သးတီ ဒီးလၢတၢ်သးစူၤအပူၤ အိၣ်ခိးယဟိဝၤယွၤလၢ ကမၤဘၣ်လိာ်က့ၤ နတၢ်ဂ့ၢ်ကီအဂီၢ်တက့ၢ်. နမ့ၢ်မၤဒ်န့ၣ်န့ၣ် နကမၤသးခုယဟိဝၤယွၤအသး ဒီးနကဒိးန့ၢ်ဘၣ်အတၢ်ဆိၣ်ဂ့ၤဒ် စီၤယိၤသးအသိးလီၤ. ယဟိဝၤယွၤမ့ၢ် “ပှၤလၢအစံၣ်ညီၣ်ဟီၣ်ခိၣ်ဒီဘ့ၣ်ညါတဂၤ” အဃိပနာ်သ့သပှၢ်ကတၢၢ်လၢက “စံၣ်ညီၣ်” တၢ်တီတီလိၤလိၤလီၤ.—၁ မိၤၡ့ ၁၈:၂၅; ၅ မိၤၡ့ ၃၂:၄.

၁၈. တၢ်မၤလိလၢခံတခါအပူၤန့ၣ် ပကတဲသကိးတၢ်ဂ့ၢ်မနုၤလဲၣ်.

^၁၈ တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်ခံခါလၢ အပာ်ဖျါထီၣ်ဝဲ ယွၤအပှၤဂီၢ်မုၢ်လၢပျၢၤတဖၣ် ကွၢ်ဆၢၣ်မဲာ်ဘၣ်ဒီး တၢ်တတီတလိၤန့ၣ်လီၤ. ဒ်သိးပတၢ်ထံၣ် ကလီၤဂာ်ဒီးယဟိဝၤယွၤအဂီၢ် တၢ်အဒိတဖၣ်အံၤ ကမၤစၢၤပှၤလၢ ပကပာ်ဖျါထီၣ်တၢ်ဆီၣ်လီၤသး ဒီးတၢ်ပျၢ်ပှၤဂၤအတၢ်ကမၣ်န့ၣ်လီၤ.