ပှၤသးစၢ်တဖၣ်အတၢ်သံကွၢ်
ယမ့ၢ်မၤကမၣ်ဘၣ် ယမိယပါ အတၢ်သိၣ်တၢ်သီန့ၣ် ယကဘၣ်မၤဒ်လဲၣ်
ဟံၣ်ဖိဃီဖိအါတက့ၢ်န့ၣ် အဝဲသ့ၣ် အိၣ်ဒီးတၢ်သိၣ်တၢ်သီ လၢအဖိတဖၣ်အဂီၢ်. အဒိ အဖိကဘၣ်ဟဲက့ၤလၢ ဟံၣ်လၢအခါဖဲလဲၣ်, ကဘၣ်သူ အံၣ်လဲးထြီနံး တၢ်ပီးတၢ်လီတဖၣ် ဒ်လဲၣ် ဒီးကဘၣ်ရ့ဒီး ပှၤဂၤဒ်လဲၣ် ဒီးတၢ်သိၣ်တၢ်သီ အဂၤတဖၣ်.
နမ့ၢ်မၤကမၣ်ဘၣ် နမိနပါ အတၢ်သီၣ်တၢ်သီန့ၣ် နကဘၣ်မၤဒ်လဲၣ်. တၢ်လၢအဝံၤလံန့ၣ် နဆီတလဲအီၤတသ့လၢၤဘၣ်. သနာ်က့ ဒ်သိးတၢ်အိၣ်သး တနးထီၣ်တဂ့ၤအဂီၢ် တၢ်လၢနမၤသ့န့ၣ်အိၣ်ဝဲ. နမၤအီၤ ကသ့ဒ်လဲၣ်န့ၣ် ဖးကွၢ်တၢ်ဂ့ၢ်လၢ တၢ်ဖီလာ်အံၤ.
တၢ်လၢနတကြၢးမၤတဖၣ်
နမိၢ်နပၢ် မ့ၢ်တသ့ၣ်ညါလၢ နမၤကမၣ် အတၢ်သိၣ်တၢ်သီန့ၣ် ဘၣ်သ့ၣ်သ့ၣ် နကအဲၣ်ဒိး ပာ်ခူသူၣ် နတၢ်ကမၣ်.
နမိၢ်နပၢ်မ့ၢ်သ့ၣ်ညါလၢ နမၤကမၣ် အတၢ်သိၣ်တၢ်သီန့ၣ် ဘၣ်သ့ၣ်သ့ၣ် နကအဲၣ်ဒိး တဲပူၤဖျဲးသး မ့တမ့ၢ် ပာ်တၢ်ကမၣ်လၢ ပှၤဂၤအလိၤ.
နတကြၢးမၤဒ်န့ၣ် နီတခါဘၣ်. နမ့ၢ်ပာ်ခူသူၣ်တၢ်ကမၣ် မ့တမ့ၢ် တဲပူၤဖျဲးသးန့ၣ် ပာ်ဖျါထီၣ်ဝဲလၢ နတမ့ၢ် ပှၤလၢ အဒိၣ်တုာ်ခိၣ်ပှဲၤဒံးဘၣ်. ဒီးနမိၢ်နပၢ် ကတူၢ်ဘၣ်လၢ တၢ်လၢနကဘၣ်မၤဂ့ၤထီၣ်န့ၣ် အိၣ်ဒံး.
“နမ့ၢ်တဲလံၣ်တၢ်န့ၣ် တမၤဘၣ်ထီၣ်က့ၤ တၢ်ဂ့ၢ်ကီဘၣ်. လၢခံန့ၣ် တၢ်မ့ၢ်တၢ်တီကဖျါထီၣ် ဒီးနကန့ၢ်ဘၣ် တၢ်သိၣ်ဃီၣ် နးန့ၢ်အလီၢ်ဒံး.”—ဒၤယဲနၤ.
တၢ်လၢနကြၢးမၤအီၤ
အၢၣ်လီၤနတၢ်ကမၣ်. လံာ်စီဆှံတဲဝဲလၢ “ပှၤလၢအပာ်ခူသူၣ် အတၢ်ကမၣ်တဖၣ်န့ၣ် တဘီၣ်ထီၣ်ညီထီၣ်ဘၣ်.” (ကတိၤဒိ ၂၈:၁၃) နမိၢ်နပၢ်သ့ၣ်ညါလၢ နတကဲ ပှၤလၢပှၤပှဲၤဘၣ်. ဘၣ်ဆၣ် အဝဲသ့ၣ် အဲၣ်ဒိးသ့ၣ်ညါလၢ နကတဲတၢ် တီတီလိၤလိၤဧါ, တတဲဧါ.
“နမ့ၢ်တဲဘၣ် နမိနပါ တီတီလိၤလိၤန့ၣ် အဝဲသ့ၣ် ကအဲၣ်ဒိးပျၢ် နတၢ်ကမၣ်. နမ့ၢ်တဲတၢ် တီတီလိၤလိၤန့ၣ် နမိနပါ ကနာ်န့ၢ်နၤအါထီၣ်.”—အီၣ်လံဘံယါ.
ဃ့ဝံသးစူၤတၢ်. လံာ်စီဆှံ တဲဝဲလၢ “ရ့လိာ်သးတဂၤဒီးတဂၤလၢ တၢ်ဆီၣ်လီၤသးအပူၤ.” (၁ ပ့းတရူး ၅:၅) ဒ်သိး ပကဃ့ဝံသးစူၤတၢ် ဒီးတတဲပူၤဖျဲးသးအဂီၢ် ပလိၣ်ဘၣ် တၢ်ဆီၣ်လီၤသး.
“ပှၤလၢအတဲပူၤဖျဲးအသးထီဘိန့ၣ် လၢခံကယီကယီန့ၣ် အသးလၢအသ့ၣ်ညါဒၣ်တၢ် တမၤတၢ်မၤ အါအါလၢၤဘၣ် တုၤဒၣ်လဲာ် လၢခံ အဝဲမ့ၢ်မၤတၢ်ကမၣ်သနာ်က့ အတတူၢ်ဘၣ်ဝဲလၢ အမၤတၢ်ကမၣ်လၢၤဘၣ်.”—ဟဲသၣ်.
တူၢ်လိာ် တၢ်သိၣ်က့ၤသီက့ၤ. လံာ်စီဆှံ တဲဝဲလၢ “ဒိကနၣ် တၢ်သိၣ်က့ၤသီက့ၤ.” (ကတိၤဒိ ၈:၃၃) ကဒူးကဒ့ၣ်တၢ်တဂ့ၤ ဒီးမၤထွဲဒ် နမိၢ်နပၢ် ဟ့ၣ်နၤတၢ်ကမၣ်အသိး.
“ဖဲပှၤဟ့ၣ်နၤတၢ်ကမၣ်အခါ နကဒူးကဒ့ၣ်တၢ် ဒံးအါန့ၣ် ပှၤကဟ့ၣ်နၤတၢ်ကမၣ်အါထီၣ်. အဃိ ဖဲပှၤဟ့ၣ်နၤတၢ်ကမၣ်အခါ နမ့ၢ်တကၠဲးဘၣ်သနာ်က့ ဂုာ်ကျဲးစၢးတူၢ်လိာ်အီၤ.”—ကၠ့စၢၤ.
ဂုာ်ကျဲးစၢးဒ်သိး နကဒိးန့ၢ်ဘၣ်က့ၤ အဝဲသ့ၣ်အတၢ်နာ်. လံာ်စီဆှံ တဲဝဲလၢ “ပတုာ်ကွံာ် သုလုၢ်လၢ်သကဲာ်ပဝးလၢ အပူၤကွံာ် လၢအဘၣ်ထွဲဒီး သုတၢ်အိၣ်မူလီၢ်လံၤ.” (အ့းဖ့းစူး ၄:၂၂) ပာ်ဖျါထီၣ် လုၢ်လၢ်သကဲာ်ပဝးလၢအဂ့ၤ ထီဘိ.
“နမ့ၢ်ဆဲးမၤ တၢ်ဆၢတဲာ်လၢအဂ့ၤ ဒီးတက့ၤမၤတၢ်ကမၣ်လီၢ်လီၢ်လၢၤဘၣ်န့ၣ် လၢခံကယီကယီန့ၣ် နမိနပါ ကက့ၤနာ်အီၣ်က့ၤနၤ.”—ခဲရဲၤ.
တၢ်ဟ့ၣ်ကူၣ်– ဒ်သိး နမိၢ်နပၢ် နာ်န့ၢ်နၤကသ့အဂီၢ် ဂုာ်ကျဲးစၢးအါန့ၢ်အလီၢ်. အဒိ ဖဲနဟးလိာ်ကွဲအခါ နဟဲက့ၤ မ့ၢ်တစဲၤခံဘၣ်ဒၣ်လဲာ်န့ၣ် ဒုးသ့ၣ်ညါဆိ အဝဲသ့ၣ်လၢ နကဟဲက့ၤ အခါဖဲလဲၣ်. နမ့ၢ်မၤဒ်န့ၣ်န့ၣ် လီၤဂာ်ဒ်သိး နပာ်ဖျါထီၣ်န့ၢ် နမိၢ်နပၢ်လၢ နအဲၣ်ဒိး ဒိးန့ၢ်ဘၣ်က့ၤ အဝဲသ့ၣ် အတၢ်နာ်.