အိၣ်ပလီၢ်သးထီဘိ
ဘၣ်ဃးဒီး တၢ်ဘူၣ်တၢ်ဘါလၢ အမၤဘၣ်ဃးအသးဒီးတၢ်ဒုး လၢအကဲထီၣ်သး လၢကီၢ်ယူၣ်ခြ့န့ၣ် လံာ်စီဆှံ တဲဝဲဒ်လဲၣ်
တၢ်ဘူၣ်တၢ်ဘါခိၣ်နၢ်တဖၣ် မၤဘၣ်ဃးအသးဒီးတၢ်ဒုး လၢအကဲထီၣ်သး လၢကီၢ်ယူၣ်ခြ့ဒ်လဲၣ်န့ၣ် ဒ်သိးနကသ့ၣ်ညါအဂီၢ် ဖးတၢ်ဂ့ၢ်လၢလာ်အံၤ–
“ဘၣ်ဃးဒီး ကီၢ်ရၢၡါ အပှၤသုးဖိ နုာ်လီၤဒုးဝဲ ကီၢ်ယူၣ်ခြ့န့ၣ် သရၣ်ဒိၣ် ကံၤရံ လၢအမ့ၢ်ဝဲ ကီၢ်ရၢၡါ အီသဒီးခရံာ်ဖိအခိၣ်န့ၣ် တဲဝဲလၢ တၢ်ဒုးအံၤန့ၣ် အတကမၣ်ဘၣ်. . . . အတၢ်အိၣ်ဖှိၣ်ဖိတဖၣ် ဆဲးရၤလီၤဝဲ တၢ်လံၣ်တၢ်လီ လၢအဘၣ်ဃးဒီး ကီၢ်ယူၣ်ခြ့အဂ့ၢ် ဒီးဖူထ့ၤ သူဝဲ တၢ်လံၣ်တၢ်လီတဖၣ်အံၤ လၢကဒုးတၢ်အဂီၢ်.”—အံယူၤ ပှၤခိးကွၢ်တၢ်ဖိကရူၢ်, လါမၢ်ၡး ၇, ၂၀၂၂.
“သရၣ်ဒိၣ် ကံၤရံ . . . တဲဝဲလၢ ကီၢ်ရၢၡါ အပှၤသုးဖိ နုာ်လီၤဒုးဝဲ ကီၢ်ယူၣ်ခြ့န့ၣ် အတကမၣ်ဘၣ်. ဒီးအဆဲးတဲဝဲလၢ အဝဲသ့ၣ် နုာ်လီၤဒုးတၢ်န့ၣ် မ့ၢ်ဝဲဒ်သိး ကီၢ်ရၢၡါ အပှၤသုးဖိ ကဒုးဖျီးထီၣ်ကွံာ် တၢ်ဒဲးဘး.”—အ့ၤဖံၤ တၢ်ကစီၣ်, လါမၢ်ၡး ၈, ၂၀၂၂.
“ဖဲမုၢ်တနံၤန့ၣ် ကီၢ်ယူၣ်ခြ့ အီသဒီးခရံာ်ဖိ ခိၣ်နၢ်တဂၤ လၢအမ့ၢ် အဲးပံၤဖံနံယၢၤ လၢအအိၣ်လၢ ဝ့ၢ်ခိၣ်ခံၣ်န့ၣ် အဆိၣ်ဂ့ၤဝဲ ကီၢ်ယူၣ်ခြ့ အပှၤသုးဖိ ဒ်သိးအဝဲသ့ၣ် ‘ကဒုးဆၢက့ၤဝဲ ကီၢ်ရၢၡါ အပှၤသုးဖိ’ . . . တကးဒံးဘၣ် အတဲစ့ၢ်ကီးဝဲလၢ အဝဲသ့ၣ် မ့ၢ်မၤသံ ကီၢ်ရၢၡါ အပှၤသုးဖိန့ၣ် အတကမၣ်ဘၣ်.”—ယရူၤၡလ့ၣ် တၢ်ကစီၣ်, လါမၢ်ၡး ၁၆, ၂၀၂၂.
“ပဝဲလၢအမ့ၢ် ယူၣ်ခြ့သရီာ် ဒီးတၢ်ဘူၣ်တၢ်ဘါ တၢ်ကရၢကရိ အတၢ်အိၣ်ဖှိၣ် (UCCRO) န့ၣ်ပဆီၣ်ထွဲ ကီၢ်ယူၣ်ခြ့ အပှၤသုးဖိ ဒီးပှၤဂီၢ်မုၢ်ခဲလၢာ် လၢအဒုးတၢ် ဒ်သိးကဒီသဒၢ ပထံပကီၢ်. ခီဖျိလၢ ပှၤသုးဖိ ဒီးပှၤဂီၢ်မုၢ်တဖၣ် ဂုာ်ကျဲးစၢး ဒီသဒၢဝဲ ကီၢ်ယူၣ်ခြ့ လၢဒုၣ်ဒါအစုပူၤအဃိ ပဆိၣ်ဂ့ၤအဝဲသ့ၣ် ဒီးဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်.”—UCCROa အတၢ်ကတိၤ, လါဖ့ၤဘြူၤအါရံၤ ၂၄, ၂၀၂၂.
နဆိကမိၣ်ဒ်လဲၣ်. တၢ်ဘူၣ်တၢ်ဘါလၢ အတဲလီၤအသးလၢ အပိာ်ယ့ၣ်ၡူးခရံာ်အခံန့ၣ် မ့ၢ်အဝဲသ့ၣ် ကြၢးဆီၣ်ထွဲ အတၢ်အိၣ်ဖှိၣ်ဖိလၢ ကလဲၤဒုးတၢ်ဧါ. လံာ်စီဆှံ တဲဝဲဒ်လဲၣ်.
တၢ်စံၣ်စိၤတဲစိၤ ပာ်ဖျါထီၣ်ဝဲလၢ တၢ်ဘူၣ်တၢ်ဘါ မၤဘၣ်ဃးအသးဒီး တၢ်ဒုးတၢ်ယၤ
တၢ်စံၣ်စိၤတဲစိၤ ပာ်ဖျါထီၣ်ဝဲလၢ တၢ်ဘူၣ်တၢ်ဘါ အတၢ်ကရၢကရိ တနီၤန့ၣ် တဲလီၤအသးလၢ အဝဲသ့ၣ် အဲၣ်ဒီးဒုးအိၣ်ထီၣ် တၢ်ဃူတၢ်ဖိး. သနာ်က့ အဝဲသ့ၣ် တဲဝဲလၢ ပှၤမ့ၢ်ဒုးတၢ်န့ၣ် အဂ့ၤလီၤ, ပှၤဒုးတၢ်န့ၣ် တကမၣ်ဘၣ်. ဘၣ်ဆၣ် တၢ်လၢတၢ်ဘူၣ်တၢ်ဘါ အတၢ်ကရၢကရိ မၤဝဲတဖၣ်အံၤ တမ့ၢ်တၢ်လၢ အဘၣ်ဘၣ်န့ၣ် ယဟိဝၤပှၤအုၣ်အသးတဖၣ် မၤစၢၤပှၤဂၤဒ်သိး အဝဲသ့ၣ် ကသ့ၣ်ညါဘၣ်ဝဲန့ၣ် အိၣ်လၢအနံၣ်အါမးလံ. ဒ်သိးနကသ့ၣ်ညါ တၢ်ဂ့ၢ်အံၤအဂီၢ် ဖးကွၢ် တၢ်ဂ့ၢ်တနီၤလၢ ပတၢ်ကရၢကရိလံာ်လဲၢ် ပာ်ဖျါထီၣ်ဝဲ.
တၢ်ဂ့ၢ်လၢ အခိၣ်တီမ့ၢ်ဝဲ “တၢ်ဘူၣ်တၢ်ဘါ အတၢ်ဒုးဖးဒိၣ်န့ၣ် မ့ၢ်ဝဲ တၢ်လံၣ်တၢ်လီ လၢအလီၤသးအုး” န့ၣ်ပာ်ဖျါထီၣ်ဝဲလၢ ရိမ့ၤခဲးသလ့း တၢ်ဘူၣ်တၢ်ဘါ တဲလီၤအသးလၢ အဝဲသ့ၣ် မၤန့ၢ်တၢ်လၢ ကစၢ်ယွၤ ဒီးခရံာ်အဂီၢ် ဘၣ်ဆၣ် အဝဲသ့ၣ် မၤဘၣ်ဃးအသးဒီး ထံဂ့ၢ်ကီၢ်ဂ့ၢ်အဃိ တၢ်မၤသံမၤဝီ အိၣ်ထီၣ်ဝဲဖးဒိၣ်.
တၢ်ဂ့ၢ်လၢ အခိၣ်တီမ့ၢ်ဝဲ “ခဲးသလ့း တၢ်ဘူၣ်တၢ်ဘါ လၢကီၢ်အၤဖြံၤကၤ” န့ၣ်ပာ်ဖျါထီၣ်ဝဲလၢ တၢ်ဘူၣ်တၢ်ဘါ ခိၣ်နၢ်တဖၣ်န့ၣ် ဆီၣ်ထွဲဝဲ ကလုာ်ဒူၣ် တၢ်ဒုးတၢ်ယၤ ဒီးတၢ်မၤလီၤတူာ် ကလုာ်ဒူၣ်.
တၢ်ဂ့ၢ်လၢ အခိၣ်တီမ့ၢ်ဝဲ “တၢ်ဘူၣ်တၢ်ဘါ အတၢ်ကမၣ်ဧါ,” “တၢ်ဘူၣ်တၢ်ဘါ မၤဘၣ်ဃးအသးဒီး တၢ်ဒုးတၢ်ယၤ” ဒီး “တၢ်ဘူၣ်တၢ်ဘါ ဆီၣ်ထွဲဝဲ တၢ်ဒုးတၢ်ယၤ” န့ၣ်ပာ်ဖျါထီၣ်ဝဲလၢ ခဲးသလ့း, အီသဒီးခရံာ်ဖိ ဒီးခရံာ်ဖိတၢ်ဘူၣ်တၢ်ဘါအဂၤ အခိၣ်အနၢ်တဖၣ်န့ၣ် ဆီၣ်ထွဲဝဲ ပှၤဒုးတၢ် ခံဖုလၢာ် အဘျီအါမး.
ခရံာ်ဖိနီၢ်ကီၢ်န့ၣ် မ့ၢ်အကြၢးဆီၣ်ထွဲ တၢ်ဒုးတၢ်ယၤဧါ
ယ့ၣ်ၡူး သိၣ်လိဝဲဒ်လဲၣ်– “နကဘၣ်အဲၣ် ပှၤလၢနဃၢၤ ဒ်နအဲၣ်လီၤ နနီၢ်ကစၢ်အသး အသိးလီၤ.” (မးသဲ ၂၂:၃၉) “ဆဲးအဲၣ်သုဒုၣ်သုဒါတက့ၢ်.”—မးသဲ ၅:၄၄-၄၇.
ဆိကမိၣ်ကွၢ်– တၢ်ဘူၣ်တၢ်ဘါတခါလၢ အဆီၣ်ထွဲ အတၢ်အိၣ်ဖှိၣ်ဖိလၢ ကလဲၤဒုးတၢ်န့ၣ် အတဲလီၤအသးလၢ အဒိကနၣ် ဒီးမၤထွဲ ယ့ၣ်ၡူးအတၢ်မၤလိာ်လၢ ကဘၣ်အဲၣ် ပှၤလၢအဃၢၤန့ၣ် ကသ့ဧါ. ဒ်သိး နကသ့ၣ်ညါဘၣ် တၢ်စံးဆၢအဂီၢ် ဖးကွၢ် တၢ်ဂ့ၢ်လၢ အခိၣ်တီမ့ၢ်ဝဲ “ခရံာ်ဖိအမ့ၢ်အတီ ဒီးတၢ်ဒုးတၢ်ယၤ” ဒီး “ပအဲၣ်ပဒုၣ်ပဒါ ကသ့ဧါ” လၢကီၤလၤဝါကျိာ်.
ယ့ၣ်ၡူး သိၣ်လိဝဲဒ်လဲၣ်– “ယဘီယမုၢ်န့ၣ် တဘၣ်ဃးဒီး ဟီၣ်ခိၣ်အံၤဘၣ်. ယဘီယမုၢ် မ့ၢ်ဘၣ်ဃးဒီး ဟီၣ်ခိၣ်အံၤန့ၣ် ယခ့ယပှၤတဖၣ် ကဒုးတၢ် ဒ်သိးပှၤယူဒၤဖိ သုတဖီၣ်န့ၢ်ယၤတဂ့ၤအဂီၢ်လီၤ.” (ယိၤဟၣ် ၁၈:၃၆) “ကယဲၢ်ပှၤလၢ အဟံးထီၣ်နးန့ၣ် ကသံလၢနးလီၤ”—မးသဲ ၂၆:၄၇-၅၂.
ဆိကမိၣ်ကွၢ်– ဒ်သိး ယ့ၣ်ၡူး အပျဲၢ်အဘီၣ်တဖၣ် ကဒီသဒၢအီၤအဂီၢ် အဝဲသ့ၣ်ဒုးတၢ် မ့ၢ်တန့ၢ်ဘၣ်န့ၣ် မ့ၢ်ခရံာ်ဖိအမ့ၢ်အတီတဖၣ် ကြၢးဒုးတၢ်လၢ တၢ်ဂ့ၢ်အဂၤ တမံၤမံၤအဃိဧါ. ဒ်သိး နကသ့ၣ်ညါဘၣ် ခရံာ်ဖိအမ့ၢ်အတီ လၢညါတဖၣ် မၤထွဲဝဲ ယ့ၣ်ၡူး အဒိအတဲာ် ဒီးအတၢ်သိၣ်လိအဂီၢ် ဖးကွၢ် တၢ်ဂ့ၢ်လၢ အခိၣ်တီမ့ၢ်ဝဲ “ခရံာ်ဖိတဖၣ် ကြၢးဒုးတၢ်ဧါ” လၢကီၤလၤဝါကျိာ်.
တၢ်ဘူၣ်တၢ်ဘါလၢ အဆီၣ်ထွဲ တၢ်ဒုးတၢ်ယၤန့ၣ် တၢ်ကကဲထီၣ်သးဒီး အဝဲသ့ၣ်ဒ်လဲၣ်
လံာ်စီဆှံ ပာ်ဖျါထီၣ်ဝဲလၢ တၢ်ဘူၣ်တၢ်ဘါလၢ အတဲလီၤအသးလၢ အပိာ်ယ့ၣ်ၡူးအခံ ဘၣ်ဆၣ် တမၤထွဲဝဲ ယ့ၣ်ၡူး အတၢ်သိၣ်လိဘၣ်န့ၣ် ကစၢ်ယွၤ တတူၢ်လိာ်အဝဲသ့ၣ်ဘၣ်.—မးသဲ ၇:၂၁-၂၃; တံတူး ၁:၁၆.
လံာ်လီၣ်ဖျါ ပာ်ဖျါထီၣ်ဝဲလၢ “ပှၤလၢအဘၣ်တၢ်မၤသံအီၤလၢ ဟီၣ်ခိၣ်ချၢကိးဂၤဒဲး” န့ၣ်မ့ၢ်ဝဲလၢ ဘၤဘူၤလိၣ်ဖးဒိၣ်အဃိလီၤ. (လီၣ်ဖျါ ၁၈:၂၁, ၂၄) ဒ်သိး နကသ့ၣ်ညါအါထီၣ် တၢ်ဂ့ၢ်အံၤအဂီၢ် ဖးကွၢ် တၢ်ဂ့ၢ်လၢ အခိၣ်တီမ့ၢ်ဝဲ “ဘၤဘူၤလိၣ်ဖးဒိၣ်န့ၣ် မ့ၢ်မနုၤလဲၣ်.”
ယ့ၣ်ၡူးတဲဝဲလၢ တၢ်ဘူၣ်တၢ်ဘါလၢ ကစၢ်ယွၤ တတူၢ်လိာ်ဝဲဘၣ်တဖၣ်န့ၣ် ခီဖျိလၢ အဝဲသ့ၣ် မၤတၢ်အၢတၢ်သီအဃိ ကစၢ်ယွၤ ကမၤဟးဂီၤကွံာ် အဝဲသ့ၣ် ဒ်သိးဒီး သ့ၣ်လၢအတဂ့ၤ လၢအသၣ်ထီၣ် တၤသၣ်လၢအတဂ့ၤဘၣ် ဒီးအ “ကဘၣ်တၢ်ကူာ်လီၤကွံာ်အီၤ ဒီးကွံာ်လီၤအီၤလၢ မ့ၣ်အူပူၤ.” (မးသဲ ၇:၁၅-၂၀) အဃိ ကစၢ်ယွၤ ကမၤဟးဂီၤ တၢ်ဘူၣ်တၢ်ဘါကမၣ် ဒ်လဲၣ်န့ၣ် ဒ်သိး နကသ့ၣ်ညါဘၣ်အဂီၢ် ဖးကွၢ် တၢ်ဂ့ၢ်လၢ အခိၣ်တီမ့ၢ်ဝဲ “တၢ်ဘူၣ်တၢ်ဘါကမၣ် ကဟးဂီၤ ဘူးထီၣ်လံ.”
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a UCCRO လၢအမ့ၢ် ယူၣ်ခြ့သရီာ် ဒီးတၢ်ဘူၣ်တၢ်ဘါ တၢ်ကရၢကရိ အတၢ်အိၣ်ဖှိၣ်န့ၣ် အကဲဝဲ သရီာ် ၁၅ ဖျၢၣ် လၢအပာ်ဖှိၣ်ထီၣ်အသး. လၢအကျါန့ၣ် ပၣ်ဃုာ်ဒီး အီသဒီးခရံာ်ဖိ, ကြံးဒီးရိမ့ၤခဲးသလ့း, ပှၤယူဒၤဖိ, ပှၤမူးစလ့ၣ်ဖိ ဒီးခရံာ်ဖိတၢ်ဘူၣ်တၢ်ဘါ လၢအဂၤတဖၣ်.