ပှၤတအီၣ်တၢ်ဖံးတၢ်ညၣ်ဘၣ် (ပှၤအီၣ်သဲးသးလိး)​—⁠ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ဆၢကတီၢ်ခဲအံၤ လၢဟီၣ်ခိၣ်ဒီဘ့ၣ်န့ၣ် ပှၤသးစၢၢ်ဆၢဘၣ်ဃးဒီး ပှၤတအီၣ်တၢ်ဖံးတၢ်ညၣ်ဘၣ်န့ၣ် ဟဲအါထီၣ်ဝဲ.

• ပှၤလၢအတအီၣ်တၢ်ဖံးတၢ်ညၣ်တဖၣ် တဲဝဲလၢ “အဝဲသ့ၣ် တအီၣ်တၢ်ဖံးတၢ်ညၣ် ဒီးတကူသိးဝဲ ဒီးတသူဝဲ တၢ်ကူတၢ်သိး တၢ်ဖိတၢ်လံၤလၢ ပှၤတ့အီၤလၢ ဆၣ်ဖိကီၢ်ဖိ အဖံးဘ့ၣ်, အဃံအကွဲ, အဆူၣ်တဖၣ်ဘၣ်. မ့ၢ်လၢ အဝဲသ့ၣ် တအဲၣ်ဒိးလၢ ပှၤကမၤအၢမၤနး ဆၣ်ဖိကီၢ်ဖိဘၣ်အဃိ တသ့ဖဲအသ့ အဝဲသ့ၣ် ဟးဆှဲးဝဲ တၢ်သ့ၣ်တဖၣ်န့ၣ်.”

ပှၤတနီၤန့ၣ် ခီဖျိလၢ အဘၣ်ယိၣ်တၢ်လၢ ဆၣ်ဖိကီၢ်ဖိအဂီၢ်အဃိ တအီၣ်တၢ်ဖံးတၢ်ညၣ်ဘၣ်. ဘၣ်ဆၣ် တနီၤန့ၣ် မ့ၢ်လၢအဝဲသ့ၣ် အဲၣ်ဒိးဒီသဒၢဝဲ န့ဆၢၣ်, မ့တမ့ၢ် လၢအတၢ်အိၣ်ဆူၣ်အိၣ်ချ့အဂီၢ် ဒီးတနီၤန့ၣ် ခီဖျိလၢ အတၢ်ဘူၣ်တၢ်ဘါအဃိ တအီၣ်တၢ်ဖံးတၢ်ညၣ်ဘၣ်.

• ဘြံးတၢၣ်နံခၤ အခဲဒမံး “ပှၤတအီၣ်တၢ်ဖံးတၢ်ညၣ်ဘၣ်န့ၣ် အလီၤဆီဒီး ပှၤလၢအဆီတလဲ အတၢ်အီၣ် လၢအတၢ်အိၣ်ဆူၣ်အိၣ်ချ့ မ့တမ့ၢ် တၢ်တမံၤမံၤအဂီၢ်. အဝဲသ့ၣ် တအီၣ်တၢ်ညၣ်ဘၣ်န့ၣ် မ့ၢ်လၢ အဝဲသ့ၣ် နာ်ဝဲလၢ ပှၤမ့ၢ်မၤဒ်န့ၣ်န့ၣ် မ့ၢ်ဝဲကျဲတဘိလၢ ပှၤတဂၤစုာ်စုာ် မၤဂ့ၤထီၣ်ဟီၣ်ခိၣ်.”

ပှၤမ့ၢ်တအီၣ် တၢ်ဖံးတၢ်ညၣ်ဘၣ်န့ၣ် ဟီၣ်ခိၣ်အတၢ်အိၣ်သးတဖၣ် ကဂ့ၤထီၣ်ဝဲ သပှၢ်ကတၢၢ်ဧါ. ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်.

ပတၢ်ဘၣ်တ့ကစၢ် ထံၣ်ဝဲ ပှၤဟီၣ်ခိၣ်ဖိ ဒီးဆၣ်ဖိကီၢ်ဖိတဖၣ် ဒ်လဲၣ်

လံာ်စီဆှံ ပာ်ဖျါထီၣ်ဝဲလၢ ပတၢ်ဘၣ်တ့ကစၢ် ယဟိဝၤယွၤa ထံၣ်ဝဲလၢ ပှၤဟီၣ်ခိၣ်ဖိသ့ၣ်တဖၣ်န့ၣ် အပတီၢ်ထီဒိၣ်န့ၢ်ဒံး ဆၣ်ဖိကီၢ်ဖိတဖၣ် ဒီးအဟ့ၣ်လီၤဝဲ ပှၤဟီၣ်ခိၣ်ဖိတဖၣ် တၢ်ခွဲးတၢ်ယာ်လၢ ကဒိၣ်စိလၢ ဆၣ်ဖိကီၢ်ဖိတဖၣ် အဖီခိၣ်. (၁ မိၤၡ့ ၁:​၂၇, ၂၈) ဒီးကစၢ်ယွၤ ဟ့ၣ်အခွဲးလၢ ပှၤဟီၣ်ခိၣ်ဖိတဖၣ် ကအီၣ်ဝဲ ဆၣ်ဖိကီၢ်ဖိ. (၁ မိၤၡ့ ၉:⁠၃) ဘၣ်ဆၣ် အတဟ့ၣ်အခွဲးလၢ ပှၤကမၤအၢမၤသီ ဆၣ်ဖိကီၢ်ဖိဘၣ်.​—⁠ကတိၤဒိ ၁၂:⁠၁၀.

ဒ်လံာ်စီဆှံ တဲဝဲအသိး ပကအီၣ်တၢ်ညၣ်ဧါ တအီၣ်ဘၣ်ဧါန့ၣ် အကဲဝဲ ပနီၢ်ကစၢ် အတၢ်ဃုထၢလီၤ.b ပအီၣ်မ့ၢ်ဂ့ၤ တအီၣ်ဘၣ်မ့ၢ်ဂ့ၤ လၢယဟိဝၤယွၤ အမဲာ်ညါန့ၣ် ပတလီၤဆီဒိၣ်ထီၣ် နီတမံၤဘၣ်. (၁ ကရံၣ်သူး ၈:⁠၈) ပှၤမ့ၢ် ဃုထၢလၢ ကအီၣ်တၢ်တမံၤဂ့ၤတမံၤဂ့ၤနာ်က့ ပတလိၣ် ပာ်ဒ့ၣ်ပာ်ကမၣ် အဝဲသ့ၣ်ဘၣ်.​—⁠ရိမ့ၤ ၁၄:⁠၃.

ခါဆူညါန့ၣ် တၢ်အိၣ်သးကဂ့ၤထီၣ် လၢကျဲဒ်လဲၣ်

လံာ်စီဆှံ ပာ်ဖျါထီၣ်ဝဲလၢ ပအိၣ်မူ ဒ်လဲၣ်ဂ့ၤဒ်လဲၣ်ဂ့ၤန့ၣ် အတမၤဘၣ်ဂီၢ်ထီၣ်က့ၤ တၢ်ကီတၢ်ခဲ လၢဟီၣ်ခိၣ်ဘၣ်. တၢ်ကီတၢ်ခဲအါမံၤန့ၣ် ဟဲကဲထီၣ်အသး ခီဖျိလၢ ထံဂ့ၢ်ကီၢ်ဂ့ၢ်, တၢ်ကရၢကရိတဖၣ် ဒီးစံပွါယ့ အတၢ်ရဲၣ်တၢ်ကျဲၤတဖၣ်အဃိ. ဒီးတၢ်ကီတၢ်ခဲတဖၣ်အံၤန့ၣ် ပှၤမၤဘၣ်ဂီၢ်ထီၣ်ဝဲ တသ့နီတဂၤဘၣ်. လံာ်စီဆှံ တဲဝဲလၢ–

• “တၢ်လၢအက့ၣ်န့ၣ် ပှၤမၤဘျၢထီၣ်အီၤ တသ့ဘၣ်.”​—⁠စံၣ်တဲၤတဲလီၤတၢ် ၁:⁠၁၅.

တၢ်ဘၣ်တ့ကစၢ်န့ၣ် ကမၤလီၤမၢ်ကွံာ် တၢ်ကီတၢ်ခဲ လၢပထံၣ်ဘၣ်ခဲလၢာ်. လံာ်စီဆှံ သူဝဲ တၢ်ကတိၤဒိ ဒ်သိးကပာ်ဖျါထီၣ်ဝဲ တၢ်လၢကစၢ်ယွၤ ကမၤဝဲ.

• “ယထံၣ်ဘၣ်မူခိၣ်အသီ ဒီးဟီၣ်ခိၣ်အသီလီၤ. မ့မ့ၢ်မူခိၣ်အလီၢ်လံၤ ဒီးဟီၣ်ခိၣ် အလီၢ်လံၤန့ၣ် ဒံကွံာ်လံ. ဒီးပီၣ်လဲၣ် တအိၣ်လၢၤဘၣ်.”​—⁠လီၣ်ဖျါ ၂၁:⁠၁.

“မူခိၣ်အလီၢ်လံၤ” လၢအမ့ၢ် ပှၤဟီၣ်ခိၣ်ဖိ အတၢ်ပၢတၢ်ပြး အလီၢ်န့ၣ် ကစၢ်ယွၤ ကပာ်လီၤက့ၤဝဲ “မူခိၣ်အသီ” လၢအမ့ၢ် ယွၤအဘီအမုၢ်. အဘီအမုၢ်န့ၣ် ကမၤလီၤမၢ်ကွံာ် “ဟီၣ်ခိၣ် အလီၢ်လံၤ” လၢအမ့ၢ်ဝဲ ပှၤအၢပှၤသီ ဒီးကပၢက့ၤဝဲ “ဟီၣ်ခိၣ်အသီ” လၢအမ့ၢ် ပှၤလၢအသးအိၣ်ဒိးပၢအသးလၢ ယွၤအဘီအမုၢ်တၢ်ပၢ အဖီလာ်.

ထဲဒၣ်လၢယွၤအဘီအမုၢ် အတၢ်ပၢဖီလာ်န့ၣ် ပှၤဟီၣ်ခိၣ်ဖိတဖၣ် ကသ့ၣ်ညါဝဲလၢ ကဘၣ်အိၣ်ဃူဃူဖိးဖိးဒီး ဆၣ်ဖိကီၢ်ဖိဒ်လဲၣ် ဒီးကဘၣ်ကွၢ်ထွဲဝဲ န့ဆၢၣ်ဒ်လဲၣ်.​—⁠ယၡါယၤ ၁၁:​၆-၉.