တယံာ်ဘၣ်န့ၣ် ဟီၣ်ခိၣ်တၢ်ဒုး ကကဲထီၣ်ဧါ—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

လၢအပူၤကွံာ် အနံၣ် ၃၀ အတီၢ်ပူၤန့ၣ် ပှၤအါဂၤ ဆိကမိၣ်ဝဲလၢ ထံကီၢ်တဘ့ၣ်ဒီးတဘ့ၣ် အတၢ်ရ့လိာ်သး ဂ့ၤဝဲ ဒီးအလဲၤထီၣ်လဲၤထီဝဲ. သနာ်က့ တၢ်မၤအသးလၢ တယံာ်ဒံးဘၣ်တဖၣ်န့ၣ် ပာ်ဖျါထီၣ်ဝဲလၢ အဝဲသ့ၣ် အတၢ်ထံၣ်န့ၣ် တဘၣ်ဘၣ်.

• “အံးစရ့ ဒီးဟးစဘိလၢ် စးထီၣ်ဒုးလိာ်သးလၢ လၢၤဘနိၤကီၢ်ဆၢအဃိ ပှၤအါဂၤ သးကိၢ်ဝဲလၢ ကၤစၤ အတၢ်ဒုး ကမၤဘၣ်ဒိ ထံကီၢ်လၢအအိၣ်လၢ တၢ်ကပိာ်ကပၤတဖၣ်.”—ရီထၢၤ အတၢ်ကစီၣ်, လါယနူၤအါရံၤ ၆, ၂၀၂၄.

• “ပှၤလၢအအိၣ်လၢ အံၤရၤအစုဖီလာ်တဖၣ်န့ၣ် ထီဒါလိာ်အသးဒီး တၢ်လီၢ်အါတီၤ. ဒီးအံၤရၤန့ၣ် အတ့ထီၣ်ကဒီးဝဲ နယူချံယါ တၢ်စုကဝဲၤတဖၣ်. ဒီးကီၢ်ရၢၡါ ဒီးတရူးကီၢ်န့ၣ် ဖီၣ်လိာ်သးစုဒီး အံၤရၤ အဃိ ကီၢ်မုၢ်နုာ်ထံကီၢ်တဖၣ်န့ၣ် ဘၣ်ယိၣ်တၢ်.”—နူယီး တၢ်ကစီၣ်, လါယနူၤအါရံၤ ၇, ၂၀၂၄.

• “ကီၢ်ရၢၡါ ဆဲးဒုးဝဲ ကီၢ်ယူၣ်ခြ့အဃိ တၢ်ဟးဂုာ်ဟးဂီၤဖးဒိၣ် အိၣ်ထီၣ်လၢ ကီၢ်ယူၣ်ခြ့အပူၤ.”—ဘီမုၢ်စၢဖှိၣ်ကရၢ အတၢ်ကစီၣ်, လါယနူၤအါရံၤ ၁၁, ၂၀၂၄.

• “တရူးကီၢ်န့ၣ် လဲၤထီၣ်လဲၤထီလၢ စံပွါယ့တကပၤ ဒီးအစိကမီၤဒိၣ်ထီၣ်လၢ သုးတကပၤ. ဒီးမ့မ့ၢ်ကီၢ်ထဲၣ်ဝၣ်န့ၣ် အတၢ်အဲၣ်ကလုာ်ဒူၣ် ဒီးတၢ်အဲၣ်ထံကီၢ်န့ၣ် ဒိၣ်ထီၣ်မးဒိၣ်ထီၣ်. တၢ်အိၣ်သးလၢ တရူးကီၢ် ဒီးအမဲရကၤ အဘၢၣ်စၢၤန့ၣ် ဒုးအိၣ်ထီၣ်ဝဲ တၢ်ထီဒုၣ်ထီဒါလိာ်သး သ့ဝဲညီညီဖိ.”—ယပၣ် တၢ်ကစီၣ်, လါယနူၤအါရံၤ ၉, ၂၀၂၄.

ဘၣ်ဃးဒီး ထံကီၢ်တဘ့ၣ်ဒီးတဘ့ၣ် အတၢ်ရ့လိာ်သးလၢ ပထံၣ်ဘၣ်အီၤလၢ ဆၢကတီၢ်ခဲအံၤန့ၣ် လံာ်စီဆှံ တဲဝဲဒ်လဲၣ်. ဒီးတၢ်အိၣ်သးတဖၣ်အံၤန့ၣ် ကဒုးကဲထီၣ်ဝဲ ဟီၣ်ခိၣ်တၢ်ဒုးဧါ.

လံာ်စီဆှံ တဲဆိပာ်စၢၤဝဲ ဘၣ်ဃးဒီး တၢ်မၤအသးလၢ ပစိၤခဲအံၤတဖၣ်

လံာ်စီဆှံ တဲဆိပာ်စၢၤဝဲ ဘၣ်ဃးဒီး တၢ်ဒုးတၢ်ယၤလၢ အကဲထီၣ်အသးလၢ ပစိၤခဲအံၤအဂ့ၢ် ဘၣ်ဆၣ် အတပာ်ဖျါထီၣ်ဝဲ တၢ်ဂ့ၢ်လီၤတံၢ်လီၤဆဲး ကိးမံၤဒဲးဘၣ်. အတဲဝဲဒၣ်လၢ တၢ်သဘံၣ်သဘုၣ် ကအိၣ်အါထီၣ်လၢ ဟီၣ်ခိၣ်ချၢ ဒီးတၢ်သဘံၣ်သဘုၣ်တဖၣ်အံၤ ကမၤလီၤမၢ်ကွံာ် “တၢ်မုာ်တၢ်ခုၣ်လၢ ဟီၣ်ခိၣ်ချၢ.”—လီၣ် ၆:၄.

လံာ်ဒၤနံးယ့လး တဲဆိပာ်စၢၤဝဲလၢ “ဖဲတၢ်အကတၢၢ် အဆၢကတီၢ်” န့ၣ် ဟီၣ်ခိၣ်ပဒိၣ်ပပှၢ်လၢ အထီဒါလိာ်အသးတဖၣ် က “ဘျၢၣ်လိာ်သး.” အအဲၣ်ဒိးတဲဝဲ အဝဲသ့ၣ် ကပြၢလိာ်သး. အဝဲသ့ၣ် အဲၣ်ဒိးပာ်ဖျါဝဲလၢ အအိၣ်ဒီး တၢ်စိတၢ်ကမီၤဖးဒိၣ်လၢ သုးမုၢ်သံၣ်ဘိတကပၤ ဒီးအသူဝဲ “တၢ်ထူးတၢ်တီၤ,” ကျိၣ်စ့အါအါဂီၢ်ဂီၢ်.—ဒၤနံးယ့လး ၁၁:၄၀, ၄၂, ၄၃.

တၢ်ဒုးလၢ အကဟဲတခါ

လံာ်စီဆှံ ပာ်ဖျါထီၣ်ဝဲလၢ ဟီၣ်ခိၣ်တၢ်အိၣ်သး ကဂ့ၤထီၣ်. သနာ်က့ တချုးလၢ တၢ်အိၣ်သး ဂ့ၤထီၣ်ဒံးဘၣ်န့ၣ် တၢ်အိၣ်သး ကနးထီၣ်ဝဲ. ယ့ၣ်ၡူးတဲဆိပာ်စၢၤဝဲလၢ “ဖဲန့ၣ်အခါ တၢ်နးတၢ်ဖှီၣ်ဖးဒိၣ် ကအိၣ်ထီၣ်ဝဲလီၤ. လၢဟီၣ်ခိၣ် ကဲထီၣ်သီလံၤလံၤ တုၤလီၤလၢ ဆၢကတီၢ်ခဲအံၤန့ၣ် တၢ်နးတၢ်ဖှီၣ် တကဲထီၣ်အသးဒ်အံၤ နီတဘျီဒံးဘၣ်.” (မး ၂၄:၂၁) “တၢ်နးတၢ်ဖှီၣ်ဖးဒိၣ်” ကဲထီၣ်မ့ၢ်ဝံၤန့ၣ် “တၢ်ဒုးလၢ အကမၤအသး ဖဲသ့တၢ်လၢာ်ကစၢ်ယွၤ အမုၢ်နံၤဖးဒိၣ်” လၢအမ့ၢ်ဝဲ အၢ်မက့းဒိၣ်တၢ်ဒုး ကကဲထီၣ်ဝဲ.—လီၣ် ၁၆:၁၄, ၁၆.

ဘၣ်ဆၣ် အၢ်မက့းဒိၣ်တၢ်ဒုးန့ၣ် အကမၤပူၤဖျဲးပှၤ, အတမၤဟးဂီၤပှၤဘၣ်. လၢအၢ်မက့းဒိၣ်တၢ်ဒုးန့ၣ် ကစၢ်ယွၤ ကမၤဟးဂီၤကွံာ် ဟီၣ်ခိၣ်အတၢ်ပၢတၢ်ပြးလၢ အဒုးအိၣ်ထီၣ် တၢ်ဒုးတၢ်ယၤတဖၣ်. ဒ်သိး နကသ့ၣ်ညါအါထီၣ် ဘၣ်ဃးဒီး အၢ်မက့းဒိၣ် ကဒုးအိၣ်ထီၣ် တၢ်မုာ်တၢ်ခုၣ် လီၤထူလီၤယိာ် ဒ်လဲၣ်အဂီၢ် ဖးကွၢ် တၢ်ဂ့ၢ်လၢအမ့ၢ်–

• “အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်”

• “အၢ်မက့းဒိၣ်န့ၣ် မ့ၢ်တၢ်သးခုကစီၣ်”