သုဂုာ်ကျဲးစၢး စံၣ်တဲၤတဲလီၤတၢ် တဟံၣ်ဘၣ်တဟံၣ်လၢ သုကဒိးန့ၢ် တၢ်အုၣ်က့ၤခီၣ်က့ၤအဂီၢ်ဧါ

တမ့ၢ်ဘၣ်. ပပာ်ဃုာ်လၢ တၢ်စံၣ်တဲၤတဲလီၤတၢ် တဟံၣ်ဘၣ်တဟံၣ် ဘၣ်ဆၢဘၣ်ကတီၢ်လီၤ. ဘၣ်ဆၣ် ပတနာ်လၢပကဒိးန့ၢ်တၢ်အုၣ်က့ၤခီၣ်က့ၤလၢ တၢ်မၤအံၤအဃိဘၣ်. (အ့းဖ့းစူး ၂:၈) လၢမနုၤအဃိလဲၣ်.

ဆိကမိၣ်ကွၢ်တၢ်အဒိအံၤတက့ၢ်. ပှၤလၢအသူၣ်ဂ့ၤသးဝါတဂၤ အၢၣ်လီၤဝဲလၢကဟ့ၣ်ဝဲ တၢ်ဟ့ၣ်လုၢ်ဒိၣ်ပှ့ၤဒိၣ်တခါလၢ ပှၤကိးဂၤဒဲးလၢ အဟဲတုၤဖဲ တၢ်လီၢ်လီၤတံၢ်လၢသ့ၣ်ဆၢဖးကတီၢ်ပာ်ဝဲနံၤသီန့ၣ်လီၤ. နမ့ၢ်နာ်နီၢ်နီၢ် ပှၤအံၤအတၢ်အၢၣ်လီၤန့ၣ်, နကမၤထွဲအဝဲအတၢ်နဲၣ်လိ တမ့ၢ်ဘၣ်ဧါ. နကမၤသပှၢ်တၢၢ်လီၤ. ဒ်န့ၣ်အသိး, နကတဲဘၣ်စ့ၢ်ကီး နတံၤသကိး ဒီးနဟံၣ်ဖိဃီဖိလၢ တၢ်ခွဲးတၢ်ယာ်အံၤအဂ့ၢ် လၢအဝဲသ့ၣ်စ့ၢ်ကီး ဒိးန့ၢ်ဘၣ်ဝဲကသ့အဂီၢ်လီၤ. ဘၣ်ဆၣ်, နတဒိးန့ၢ် တၢ်ဟ့ၣ်လၢနမၤထွဲအဝဲအတၢ်နဲၣ်လိအဃိဘၣ်. နကဒိးန့ၢ်ဘၣ်လၢ အဝဲအတၢ်သးအိၣ်အဃိလီၤ.

ဒ်န့ၣ်အသိး, ယဟိဝၤပှၤအုၣ်အသးတဖၣ်နာ်ဝဲ ကစၢ်ယွၤအတၢ်စံးပာ် လၢတၢ်မူအထူအယိာ်လၢ ပှၤလၢအစူၢ်အီၤခဲလၢာ်အဂီၢ်လီၤ. (ရိမ့ၤ ၆:၂၃) ပဂုာ်ကျဲးစၢးနီၤလီၤ ပတၢ်နာ်ဆူပှၤဂၤ, ဒီးပလုၢ်လၢ်လၢအဝဲသ့ၣ်ကဒိးန့ၢ်ဘၣ်တၢ်အဘျုးလၢ ကစၢ်ယွၤအတၢ်စံးပာ်လီၤ. ဘၣ်ဆၣ်, ပတနာ်လၢပ ဒိးန့ၢ် တၢ်အုၣ်က့ၤခီၣ်က့ၤခီဖျိပပာ်ဃုာ်လၢ ပတၢ်သးခုကစီၣ် တၢ်မၤအပူၤအဃိဘၣ်. (ရိမ့ၤ ၁:၁၇; ၃:၂၈) နီၢ်နီၢ်, မတၤတဂၤဂ့ၤဂ့ၤ မၤဝဲဒ်သိးကကြၢးဒီး ယွၤအတၢ်ဆိၣ်ဂ့ၤလၢ လီၤကမၢကမၣ်ဒ်သိးအံၤတသ့ဘၣ်. “တၢ်အံၤတမ့ၢ်လၢပကစၢ်ဒၣ်ပဝဲ ပမၤတၢ်အဂ့ၤတမံၤမံၤအဃိဘၣ်. မ့ၢ်ဒၣ်လၢအဝဲအတၢ်သးကညီဒၣ်ဝဲအဃိ အဝဲအုၣ်က့ၤခီၣ်က့ၤပှၤ” လီၤ.—တံတူး ၃:၅, ခ့ခါစှီၤကျိာ်.