တၢ်ဟ့ၣ်လၢအတဒ်သိးဒီး တၢ်ဟ့ၣ်လၢအဂၤတဖၣ်

ဒ်တၢ်ဂီၤလၢထး ပာ်ဖျါထီၣ်ဝဲအသိး တၢ်ပီးတၢ်လီလၢ ပှၤကမၤစူထီၣ်စၢၢ်ဘိအခိၣ်လၢ အလီၤဂာ်ချံအံၤန့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ကၠီဒၢၣ် အဂီၢ်လီၤ. ကၠီဒၢၣ် တဲဝဲလၢ “ရးစၢၤ မ့ၢ်ယဟံၣ်ဖိဃီဖိ အတံၤသကိးတဂၤ ဒီးအဝဲဟ့ၣ်ယၤတၢ်ဟ့ၣ်အံၤ ဖဲယနီၢ်ဆံးဒံးအခါန့ၣ်လီၤ.” ဖဲ ရးစၢၤ သံဝံၤအလီၢ်ခံ ကၠီဒၢၣ် သ့ၣ်ညါဘၣ်ဝဲလၢ ရးစၢၤ မၤစၢၤဘၣ်အဖံဒီးအဖုအါမး ဒီးမၤမုာ်ထီၣ်က့ၤ အဟံၣ်ဖိဃီဖိအသး ဖဲတၢ်ကီတၢ်ခဲအိၣ်ထီၣ်အခါန့ၣ်လီၤ. ဒီးကၠီဒၢၣ်တဲဝဲလၢ “ခဲအံၤမ့ၢ်လၢ ယသ့ၣ်ညါအါထီၣ်ဘၣ် ရးစၢၤ အဂ့ၢ်အဃိ အတၢ်ဟ့ၣ်ဆံးဆံးဖိတခါအံၤ ကဲထီၣ်တၢ်ဟ့ၣ်လၢ အလုၢ်ဒိၣ်ပှ့ၤဒိၣ်လၢယဂီၢ်လီၤ.”

ဒ် ကၠီဒၢၣ် အတၢ်လဲၤခီဖျိအံၤ ပာ်ဖျါထီၣ်ဝဲအသိး တၢ်ဟ့ၣ်တခါအံၤ အလုၢ်အပှ့ၤမ့ၢ်တအိၣ်လၢ ပှၤအါဂၤအဂီၢ်သနာ်က့ ကၠီဒၢၣ်ပာ်လုၢ်ပာ်ပှ့ၤဝဲဒိၣ်မးလီၤ. လံာ်စီဆှံပာ်ဖျါထီၣ်ဝဲတၢ်ဟ့ၣ်လၢ ပဂံၢ်ထီၣ်ဒွးထီၣ်အီၤတလၢာ်ဘၣ်န့ၣ် အိၣ်ဝဲတမံၤလီၤ. လံာ်စီဆှံတဲဝဲလၢ– “ယွၤအဲၣ်ဟီၣ်ခိၣ်ဖိ တုၤအဟ့ၣ်လီၤကွံာ် အဖိခွါအိၣ်တဂၤဃီ, ဒ်သိးကယဲၢ်ပှၤလၢ အစူၢ်က့ၤနာ်က့ၤအီၤ တဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်လီၤ.”—ယိၤဟၣ် ၃:၁၆.

ပဒိးန့ၢ်ဘၣ်တၢ်မူအထူအယိာ် လၢတၢ်ဟ့ၣ်တခါအံၤအဃိသ့ဝဲလီၤ. တၢ်ဟ့ၣ်အဂၤလၢ အလုၢ်ဒိၣ်ပှ့ၤဒိၣ်န့ၢ်ဒံး တၢ်ဟ့ၣ်အံၤန့ၣ် တအိၣ်ဝဲဘၣ်. ဘၣ်ဆၣ် တၢ်ဟ့ၣ်အံၤအလုၢ်အပှ့ၤ ဒိၣ်ဝဲထဲလဲၣ်န့ၣ် ပှၤတနီၤတနၢ်ပၢၢ်ဝဲအခီပညီဘၣ်. မ့မ့ၢ်ခရံာ်ဖိလၢ အမ့ၢ်အတီန့ၣ် ထံၣ်ဝဲတၢ်ဟ့ၣ်အံၤဒ်အမ့ၢ် “တၢ်လုၢ်ဒိၣ်ပှ့ၤဒိၣ်” တခါလီၤ. (စံးထီၣ်ပတြၢၤ ၄၉:၈; ၁ ပ့းတရူး ၁:၁၈, ၁၉) ဘၣ်မနုၤအဃိ ကစၢ်ယွၤဟ့ၣ်လီၤဝဲ အဖိခွါလၢပှၤဟီၣ်ခိၣ်ဖိအဂီၢ် ဒ်အမ့ၢ်တၢ်ဟ့ၣ်တခါအသိးလဲၣ်.

ဘၣ်ဃးဒီးတၢ်ဂ့ၢ်အံၤန့ၣ် တၢ်မၢဖိပီလူးပာ်ဖျါထီၣ်ဝဲလၢ– “ဒ်တၢ်ဒဲးဘးဟဲနုာ်ဆူဟီၣ်ခိၣ်ချၢ လၢပှၤတဂၤအဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိအသိးန့ၣ်, ဒီးဒ်န့ၣ်အသိးပှၤခဲလၢာ်မၤတ့ၢ် တၢ်ဒဲးဘးသတးဒီး, ပှၤခဲလၢာ်ဘၣ်တၢ်သံတၢ်ပှၢ်” လီၤ. (ရိမ့ၤ ၅:၁၂) ပှၤဟီၣ်ခိၣ်ဖိအဆိကတၢၢ်တဂၤ လၢအမ့ၢ်စီၤအၤဒၣ်န့ၣ် ခီဖျိလၢအဝဲတဒိကနၣ် ကစၢ်ယွၤအကလုၢ်အဃိ ဘၣ်သံဝဲလီၤ. တကးဒံးဘၣ် ခီဖျိလၢ စီၤအၤဒၣ်မၤတၢ်ဒဲးဘးအဃိ အဖိအလံၤခဲလၢာ်လၢအမ့ၢ် ပှၤဟီၣ်ခိၣ်ဖိကိးဂၤဒဲးန့ၣ် ဘၣ်သံဝဲစ့ၢ်ကီးလီၤ.

“တၢ်ဒဲးဘးအဘူးအလဲမ့ၢ်တၢ်သံလီၤ. မ့မ့ၢ်ယွၤအတၢ်ဟ့ၣ်န့ၣ်, မ့ၢ်တၢ်မူအထူအယိာ်လၢ ပကစၢ်ယ့ၣ်ၡူးခရံာ်အဃိန့ၣ်လီၤ.” (ရိမ့ၤ ၆:၂၃) ဒ်သိးပှၤဟီၣ်ခိၣ်ဖိတဖၣ် ကထူၣ်ဖျဲးထီၣ်လၢတၢ်သံအဂီၢ် ကစၢ်ယွၤဆှၢလီၤအဖိခွါ ယ့ၣ်ၡူးဆူဟီၣ်ခိၣ်ချၢ ဒ်သိးကဟ့ၣ်လုၢ်ထီၣ်အသးသမူ အလၢအပှဲၤလၢ ပှၤဟီၣ်ခိၣ်ဖိအဂီၢ်လီၤ. ယ့ၣ်ၡူးအတၢ်ဟ့ၣ်လုၢ်ထီၣ်အသးအံၤ ဘၣ်တၢ်သ့ၣ်ညါစ့ၢ်ကီးအီၤလၢ “တၢ်ပှ့ၤက့ၤ” လီၤ. ခီဖျိလၢ ယ့ၣ်ၡူးအတၢ်ပှ့ၤက့ၤအဃိ ကယဲၢ်ပှၤလၢ အစူၢ်က့ၤနာ်က့ၤအီၤ တဂၤလၢ်လၢ်န့ၣ် ကဒိးန့ၢ်ဘၣ် တၢ်မူအထူအယိာ်လီၤ.—ရိမ့ၤ ၃:၂၄.

ပှၤလၢအဘူၣ်ထီၣ်ဘါထီၣ် ကစၢ်ယွၤန့ၣ် ကဒိးန့ၢ်ဘၣ်ဝဲတၢ်ဆိၣ်ဂ့ၤအါမး ခီဖျိလၢယ့ၣ်ၡူးအဃိလီၤ. တၢ်ပှ့ၤက့ၤမ့ၢ်တၢ်ဟ့ၣ်လၢ အလုၢ်ဒိၣ်ပှ့ၤဒိၣ်ထဲလဲၣ်န့ၣ် ပတဲဖျါထီၣ်အီၤတဘၣ်ဘၣ်. လၢတၢ်န့ၢ်အဃိ စီၤပီလူးတဲဝဲလၢ– “မ်ပကစံးဘျုးယွၤလၢ အတၢ်ဟ့ၣ်လၢအဒိၣ်မးဝဲတုၤပဒွး အလုၢ်အပှ့ၤတသ့ဘၣ်အဃိန့ၣ်တက့ၢ်.” (၂ ကရံၣ်သူး ၉:၁၅, ခ့ခါစှီၤကျိာ်) လၢကစၢ်ယွၤ အတၢ်ဟ့ၣ်ခဲလၢာ်အကျါန့ၣ် ဘၣ်မနုၤအဃိ တၢ်ပှ့ၤက့ၤမ့ၢ်တၢ်ဟ့ၣ်လၢ အလီၤဆီတခါလဲၣ်. ဘၣ်မနုၤအဃိ ကစၢ်ယွၤအတၢ်ဟ့ၣ်တခါအံၤ လီၤဆီဒီးတၢ်ဟ့ၣ်လၢအဂၤတဖၣ်လဲၣ်. ဒီးခီဖျိလၢ ပဒိးန့ၢ်ဘၣ်တၢ်ဟ့ၣ်အံၤအဃိ ကြၢးထိၣ်ဟူးထိၣ်ဂဲၤထီၣ်နၤလၢ နကမၤတၢ်မနုၤလဲၣ်.a တၢ်မၤလိလၢခံခံခါန့ၣ် ကပာ်ဖျါထီၣ်ဝဲ တၢ်သံကွၢ်တဖၣ်အံၤအတၢ်စံးဆၢအဃိ ပမုၢ်လၢ်လၢနကဖးကွၢ်အီၤလီၤ.