တၢ်အိၣ်မူလၢအကီအခဲစးထီၣ် အဂ့ၢ်

လၢဧ့ၤဒ့ၣ်တၤသၣ်အလီၢ်အချၢန့ၣ် အၤဒၣ်ဒီးအံၣ်အုထံၣ်ဘၣ် တၢ်နးတၢ်ဖှီၣ်အကလုာ်ကလုာ်လီၤ. လၢကအီၣ်ဘၣ်အီဘၣ်အဂီၢ် ဘၣ်မၤဝဲကီကီခဲခဲလီၤ. ဝးတရံးအဝဲသ့ၣ်အဃၢၤန့ၣ် လၢတၢ်မုၢ်တၢ်ဘိဃံလၤတဖၣ်အလီၢ် ထံၣ်ဘၣ်ဝဲသ့ၣ် တၤဆှုၣ်တၤမဲတဖၣ် အါဒိၣ်မးန့ၣ်လီၤ. အၤဒၣ်ဒီးအံၣ်အုန့ၣ် တဒိကနၢ်ယွၤအကလုၢ်ကထါဒီး တၢ်ရ့လိာ်မုာ်လိာ်သးဟးဂီၤဒီးယွၤအဃိ ဘၣ်ကဲထီၣ်ဝဲဒ်အံၤလီၤ.

တၢ်လၢအအၢန့ၢ်တၢ်အံၤတခီ, အၤဒၣ်ဒီးအံၣ်အု ဘၣ်ကတဲာ်ကတီၤအသးလၢ ကသံအဂီၢ်လံန့ၣ်လီၤ. ယွၤတဲဘၣ်တ့ၢ်အဝဲသ့ၣ်လၢ မ့ၢ်အီၣ်သ့ၣ်တမုၢ်အသၣ်န့ၣ် ကသံဝဲသ့ၣ်လီၤန့ၣ် နသ့ၣ်နီၣ်ထီၣ်နဲဧါ. ဖဲအဝဲသ့ၣ်အီၣ်ဝဲအနံၤန့ၣ် လၢကသံအဂီၢ်စးထီၣ်ဝဲလီၤ. တၢ်တဒိကနၢ်ယွၤအတၢ်ကတိၤန့ၣ် အၢဒိၣ်နးမးလီၤ.

အၤဒၣ်ဒီးအံၣ်အုအဖိအလံၤခဲလၢာ်န့ၣ် အိၣ်ဖျဲၣ်ထီၣ်ဝဲသ့ၣ်ဖဲ ယွၤဟီထီၣ်ကွံာ်အမိၢ်အပၢ်လၢ ဧ့ၤဒ့ၣ်တၤသၣ်လီၢ် အလီၢ်ခံန့ၣ်လီၤ. ဒ်န့ၣ်ဒီး ဖိတဖၣ်စ့ၢ်ကီး ဘၣ်ပှၢ်ထီၣ်ဝဲကယီကယီ, ဝံၤဒီးကဘၣ်သံဝဲလီၤ.

အၤဒၣ်ဒီးအံၣ်အုန့ၣ် မ့ၢ်ဒိကနၣ်ယွၤအတၢ်ကတိၤသၢပျၢၤ အဝဲသ့ၣ်ဒီးအဖိအလံၤသ့ၣ်တဖၣ် အတၢ်အိၣ်မူန့ၣ် ကအိၣ်ခုၣ်ခုၣ်မုာ်မုာ်န့ၣ်လီၤ. ကအိၣ်မူဘၣ်လၢဟီၣ်ခိၣ်ချၢထီဘိဒီး တၢ်သူၣ်ဖှံသးညီအပူၤန့ၣ်လီၤ. တမ့ၢ်လၢအသးကပှၢ်, ကအိၣ်ဆူးအိၣ်ဆါဒီး, ကသံဝဲသ့ၣ် နီတဂၤဘၣ်.

ယွၤဆၢထံၣ်ဘၣ် ပှၤကညီတဖၣ် အိၣ်ဒီး တၢ်သူၣ်ဖှံသးညီ လၢဟီၣ်ခိၣ်ချၢန့ၣ်လီၤ. လၢကအိၣ်ဘၣ်ဝဲဒ်အံၤန့ၣ် ယွၤအတၢ်စံးပာ်အိၣ်ပာ်ဝဲန့ၣ်လီၤ. တမ့ၢ်ထဲဟီၣ်ခိၣ်ဒီဘ့ၣ် ကဟဲဃံလၤဘၣ်, ​ပှၤကညီခဲလၢာ် ကအိၣ်ဆူၣ်အိၣ်ချ့စ့ၢ်ကီးန့ၣ်လီၤ. တဂၤဒီးတဂၤကအိၣ်ဒီးတၢ် အဲၣ်တၢ်ကွံလီၤ. ကကဲစ့ၢ်ကီး ယွၤအတံၤသကိးတဖၣ်န့ၣ်လီၤ.

ဘၣ်ဆၣ်သနာ်က့ အံၣ်အုန့ၣ် တမ့ၢ်ယွၤအတံၤသကိးတဂၤလၢၤဘၣ်. လၢတၢ်န့ၣ်အဃိ, ဖဲအဆံးစၢ်အဖိအခါ တညီလၢအဂီၢ်ဘၣ်. ဆါဒိၣ်မးလီၤ. လၢတဒိကနၣ် ယဟိဝၤအတၢ်ကတိၤအဃိ ဘၣ်ကွၢ်ဆၢၣ်မဲာ်လိာ်အသးဒီး တၢ်သူၣ်အုးသးအုးအကလုာ်ကလုာ် သပှၢ်ကတၢၢ်န့ၣ်လီၤ. တမ့ၢ်ဘၣ်ဧါ.

အၤဒၣ်ဒီးအံၣ်အုန့ၣ် မၤန့ၢ်အဖိမုၣ်ဖိခွါ အါမးန့ၣ်လီၤ. ဖဲအဖိဝဲၢ်ကိအိၣ်ဖျဲၣ်အခါ ယုၢ်ဝဲအမံၤလၢ ကၤယံၣ်န့ၣ်လီၤ. အဝဲသ့ၣ်အဖိခံဂၤတဂၤန့ၣ် ကိးဝဲလၢ ဟ့းဘ့းလးလီၤ. တၢ်မၤအသးဒီးအဝဲသ့ၣ်ဒ်လဲၣ်. သုသ့ၣ်ညါဧါ.