တၢ်မၤလိ ၂
ကစၢ်ယွၤတ့လီၤ ပှၤဟီၣ်ခိၣ်ဖိအဆိကတၢၢ်ခံဂၤ
ယဟိဝၤယွၤတ့လီၤဝဲကရၢၢ်လၢ အဃံအလၤတကရၢၢ်, တၢ်ကိးဝဲအမံၤလၢ ဧ့ၤဒ့ၣ်တၤသၣ်အလီၢ်. လၢကရၢၢ်အပူၤန့ၣ် ပှဲၤဝဲဒီးဖီအကလုာ်ကလုာ်, သ့ၣ်ထူၣ်ဝၣ်ထူၣ်တဖၣ် ဒီးဆၣ်ဖိကီၢ်ဖိအကလုာ်ကလုာ်. ဝံၤဒီး ကစၢ်ယွၤတ့လီၤ ပိာ်ခွါအဆိကတၢၢ်တဂၤ ဒီးအမံၤမ့ၢ်ဝဲစီၤအၤဒၣ်. ကစၢ်ယွၤတ့လီၤအီၤဒ်လဲၣ်န့ၣ် မ့ၢ်နသ့ၣ်ညါဧါ. ကစၢ်ယွၤတ့လီၤဝဲပိာ်ခွါတဂၤအံၤလၢ ဟီၣ်ခိၣ်ကမူၣ် ဒီးအူနုာ်ဝဲကလံၤလၢ အနါဒ့ပူၤ. ဒီးပိာ်ခွါတဂၤအံၤကဲထီၣ် ပှၤဟီၣ်ခိၣ်ဖိအဆိကတၢၢ်တဂၤလၢ အိၣ်ဒီးအသးသမူ. ယဟိဝၤယွၤ မၢစီၤအၤဒၣ်ကွၢ်ထွဲဝဲ ကရၢၢ်လၢ အဃံအလၤတကရၢၢ်အံၤ ဒီးမၢစ့ၢ်ကီးအီၤလၢကကိးန့ၢ်ဝဲ ဆၣ်ဖိကီၢ်ဖိခဲလၢာ် အမံၤ.
ယဟိဝၤယွၤဟ့ၣ်လီၤဝဲ စီၤအၤဒၣ်တၢ်သိၣ်တၢ်သီလၢ အရ့ဒိၣ်တခါ. ကစၢ်ယွၤတဲဘၣ် စီၤအၤဒၣ်လၢ ‘ကယဲၢ်သ့ၣ်သူဝၣ်သၣ်န့ၣ် နအီၣ်အီၤသ့ခဲလၢာ်. ဘၣ်ဆၣ် သ့ၣ်တထူၣ်လၢ အအိၣ်လၢ ကရၢၢ် အသးကံၢ်ပူၤန့ၣ် အီၣ်အသၣ်တဂ့ၤ. နမ့ၢ်အီၣ်န့ၣ် နကသံလီၤ.’
လၢခံ ယဟိဝၤယွၤတဲဝဲလၢ ‘ယကတ့န့ၢ်စီၤအၤဒၣ် အတံၤသကိးတဂၤလၢ ကမၤစၢၤအီၤ.’ ဒီးကစၢ်ယွၤမၤမံ စီၤအၤဒၣ်. ဝံၤဒီးကစၢ်ယွၤဟံးန့ၢ် စီၤအၤဒၣ်အဂုာ်ဃံတဘိ ဒ်သိးကတ့လီၤဝဲ ပိာ်မုၣ်တဂၤလၢ စီၤအၤဒၣ်အဂီၢ်. စီၤအၤဒၣ်ကိးန့ၢ်အမါအမံၤလၢ နီၢ်အံၣ်အု. နီၢ်အံၣ်အုဒီးစီၤအၤဒၣ် ကဲထီၣ်ဝဲဟံၣ်ဖိဃီဖိ အဆိကတၢၢ်တဒူၣ်လၢ ဟီၣ်ခိၣ်ချၢ. ဖဲစီၤအၤဒၣ် န့ၢ်ဘၣ်အမါအခါ အသးမၤ အသးဒ်လဲၣ်. စီၤအၤဒၣ်သးခုဖးဒိၣ် ဒီးတဲဝဲလၢ ‘ယဟိဝၤယွၤဟံးန့ၢ်ယဂုာ်ဃံတဘိ ဒီးတ့လီၤဝဲပိာ်မုၣ်တဂၤလၢ ယဂီၢ်လီၤ.’
ယဟိဝၤယွၤမၢနီၢ်အံၣ်အု ဒီးစီၤအၤဒၣ်လၢ ကဘၣ်ထီၣ်ဖိထီၣ်လံၤ ဒီးကဘၣ်မၤပှဲၤဟီၣ်ခိၣ်ဒီဘ့ၣ်လၢ အဝဲသ့ၣ်အဖိအလံၤ. ကစၢ်ယွၤအဲၣ်ဒိးလၢ အဝဲသ့ၣ်ကမၤသကိးတၢ်လၢ တၢ်သူၣ်ဖှံသးညီအပူၤလၢ ကမၤကဲထီၣ်ဝဲ ဟီၣ်ခိၣ်ဒီဘ့ၣ်လၢ ပၤရဒံစူး ဒ်သိးကလီၤဂာ်ဒ် ဧ့ၤဒ့ၣ်တၤသၣ်လီၢ်အသိး. ဘၣ်ဆၣ် ခဲအံၤန့ၣ် ဘၣ်မနုၤအဃိ ဟီၣ်ခိၣ်ဒီဘ့ၣ် တကဲထီၣ်ပၤရဒံစူးလဲၣ်. ဘၣ်ဃးဒီးတၢ်ဂ့ၢ်အံၤန့ၣ် ပကမၤလိအါထီၣ်လၢ တၢ်မၤလိလၢခံတခါ.
“လၢအခီၣ်ထံးန့ၣ် ပှၤလၢအတ့လီၤ ပှၤဟီၣ်ခိၣ်ဖိန့ၣ် တ့လီၤဝဲ ပိာ်ခွါတဂၤ ဒီးပိာ်မုၣ်တဂၤ.”—မးသဲ ၁၉:၄