ထံလုာ်ဘၢတၢ်ဖးဒိၣ် အဂ့ၢ်

လၢကဘီအချၢတခီ ပှၤတဖၣ်အိၣ်ဝဲ ဒ်အအိၣ်ညီနုၢ်အသိးန့ၣ်လီၤ. ထံလၢအလုာ်ဘၢတၢ်ဖးဒိၣ် ကဟဲဝဲန့ၣ် တုၤခဲအံၤဒၣ်လဲာ် တနာ်ဝဲသ့ၣ်ဒံးဘၣ်. နံၤဘၣ်ဖၣ်လဲဝဲသ့ၣ် အါန့ၢ်ဒံးလၢညါန့ၣ်လီၤ. ဘၣ်ဆၣ်သနာ်က့ တယံာ်တမီၢ်န့ၣ် နံၤဝဲသ့ၣ်တကဲလၢၤဘၣ်.

မူခိၣ်အထံဖးဒိၣ် စူၤလီၤ သတူၢ်ကလာ်လီၤ. စူၤလီၤလၢမူခိၣ် ဒ်သိးပှၤဂၢ်လီၤထံလၢထံစဲၤပူၤ န့ၣ်လီၤ. နိအၤအတၢ်ကတိၤတီဝဲလံ. ဘၣ်ဆၣ်သနာ်က့ မတၤမးနုာ်လီၤဆူကဘီပူၤ တသ့လၢၤဘၣ်. စဲၤခံဒိၣ်မးလံ. ယဟိဝၤကးတံာ်ဃာ်ပဲတြီဃံးဃံးလံန့ၣ်လီၤ.

တယံာ်လၢၤဘၣ်န့ၣ် တၢ်လီၢ်လီၤဘံတဖၣ်တုၤလီၤလၢ ထံအဖီလာ်န့ၣ်လီၤသၢၣ်. ထံတဖၣ် ဟဲကဲထီၣ်ဝဲဒ် ထံကျိဖးဒိၣ်တဖၣ်အသိးန့ၣ်လီၤ. မၤလီၤဃံၤသ့ၣ်ထူၣ်တဖၣ်, တလ့ၢ်ကွံာ်ဝဲလၢၢ်သူမိၢ်ပှၢ်ဖးဒိၣ်တဖၣ်ဒီး တၢ်အကလုၢ်တဖၣ် သီၣ်တထြုာ်စ့ၢ်ကီးလီၤသၢၣ်. ပှၤကညီတဖၣ်ပျံၤတၢ်ဒီး ကနိးကစုာ်ဝဲသ့ၣ်, ဒီးဃ့ၢ်ထီၣ်ဝဲသ့ၣ်ဆူ ဟီၣ်ခိၣ်ထီၣ်ထီအလီၢ်န့ၣ်လီၤ. ဖဲန့ၣ်အခါ အဝဲသ့ၣ်ကဆိကမိၢ်လၢ မ့ၢ်ဒိကနၣ်နိအၤအတၢ်ကတိၤဒီး ဖဲကဘီအပဲတြီ အိးထီၣ်အသးအခါ မ့ၢ်နုာ်လီၤတ့ၢ်ဆူကဘီပူၤန့ၣ် ကဂ့ၤမးလီၤ. မ့မ့ၢ်ခဲအံၤဒု စဲၤခံဒိၣ်မးလံ.

ထံတဖၣ်န့ၣ် ဒံးယံာ်ဒံးကစီၤထီၣ်, ဒံးယံာ်ဒံးဒိၣ်ထီၣ်န့ၣ်လီၤ. မူခိၣ်ထံဖးဒိၣ်လၢမူခိၣ်န့ၣ် စူၤလီၤဝဲအနံၤ ၄၀ အနၤ ၄၀ ဒီး တဆိကတီၢ်ဝဲဘၣ်န့ၣ်လီၤ. တုၤထီၣ်လၢကစၢၢ်အကပၤဒီး လၢခံကတၢၢ်န့ၣ် ကစၢၢ်လၢအထီကတၢၢ်တဖၣ်ဒၣ်လဲာ် ထံလုာ်ဘၢကွံာ်အီၤန့ၣ်လီၤ. လၢတၢ်န့ၣ်အဃိ ဒ်ယွၤစံးတ့ၢ်ဝဲအသိး, ပှၤလၢအအိၣ်လၢကဘီအချၢသ့ၣ်တဖၣ် ဒီးဆၣ်ဖိကီၢ်ဖိခဲလၢာ် ဘၣ်သံဝဲသ့ၣ်လီၤ. ဘၣ်ဆၣ် ပှၤကညီ ဒီးဆၣ်ဖိကီၢ်ဖိ လၢအအိၣ်လၢကဘီပူၤသ့ၣ်တဖၣ်တခီ အသးသမူပူၤဖျဲးဝဲသ့ၣ်လီၤသၢၣ်.

နိအၤဒီးအဖိခွါသ့ၣ်တဖၣ် သူၣ်ထီၣ်တ့ၢ်ကဘီန့ၣ် တၢ်ဂ့ၢ်မးလၢအဝဲသ့ၣ်အဂီၢ်လီၤ. ထံစိာ်ကဖီထီၣ်ကဘီဒီး ကဘီထီၣ်ဖီလၢထံဖီခိၣ်လီၤ. မူခိၣ်စူၤကတီၢ်ဝံၤ လၢခံတနံၤန့ၣ် မုၢ်ကပီၤထီၣ်လီၤ. ကွၢ်တဘီ. တၢ်လီၢ်ကိးပူၤဒဲးန့ၣ် အိၣ်ဒၣ်ထဲထံဒီး လီၤဂာ်ဒ်ပီၣ်လဲၣ်ဖးဒိၣ်န့ၣ်လီၤ. တၢ်တခါဧိၤလၢပထံၣ်သ့န့ၣ် အိၣ်ဒၣ်ကဘီလၢ ထီၣ်ဖီလၢထံဖံးခိၣ်န့ၣ်လီၤ.

ဒီးတကါဖးဒိၣ်သ့ၣ်တဖၣ်စ့ၢ်ကီးသံဝဲဒၣ်လီၤ. မၤနးမၤဖှီၣ်ပှၤတသ့လၢၤဘၣ်. အဝဲသ့ၣ်ခဲလၢာ်, ဒီးအဝဲသ့ၣ်အမိၢ်တဖၣ် သံဃုာ်ဝဲဒီး ပှၤအၢပှၤသီအဂၤတဖၣ်ခဲလၢာ်လီၤသၢၣ်. မ့မ့ၢ်အဝဲသ့ၣ်အပၢ်တဖၣ်န့ၣ် တၢ်မၤအသးဒီးအီၤဒ်လဲၣ်.

ဒီးတကါဖးဒိၣ်သ့ၣ်အပၢ်တဖၣ်န့ၣ် တမ့ၢ်ပှၤကညီဒ်ပဝဲအသိးဘၣ်. အဝဲသ့ၣ်မ့ၢ် မူခိၣ်ကလူးတဖၣ် လၢဟဲအိၣ်ဝဲဆိးဝဲလၢဟီၣ်ခိၣ်ချၢ ဒ်ပှၤကညီတဖၣ်အသိးန့ၣ်လီၤ. လၢတၢ်န့ၣ်အဃိ ဖဲထံဟဲဒိၣ်ထီၣ်အခါ တသံဃုာ်ဝဲသ့ၣ်ဒီး ​ပှၤကညီအဂၤတဖၣ်န့ၣ်ဘၣ်. အဝဲသ့ၣ်တသူနီၣ်ကစၢ်လၢ အပျိာ်လဲလိာ်တ့ၢ်အသးလၢၤဘၣ်. က့ၤထီၣ်က့ၤဝဲသ့ၣ်ဆူမူခိၣ် ဒ်မူခိၣ်ကလူးတဖၣ်အသိးန့ၣ်လီၤ. ဘၣ်ဆၣ် ယွၤတဟ့ၣ် အဝဲသ့ၣ်အခွဲးလၢ ကနုာ်လီၤက့ၤဆူ ပှၤမူခိၣ်ဖိ အဒူၣ်ဖိထၢဖိအပူၤန့ၣ်လၢၤဘၣ်. လၢတၢ်န့ၣ်အဃိ ကဲထီၣ်ဝဲသ့ၣ် မုၣ်ကီၤလံၢ်အကလူးတဖၣ် န့ၣ်လီၤ. လၢလံာ်စီဆှံပူၤန့ၣ် တၢ်ကိးအဝဲသ့ၣ်လၢ တၢ်နါတဖၣ်န့ၣ်လီၤ.

ယွၤမၢကလံၤအူဒီး ထံဖးဒိၣ်အံၤ လီၤသံးကဒါက့ၤ ကယီကယီန့ၣ်လီၤ. ယံာ်ယဲၢ်လါဝံၤ ကဘီဖးဒိၣ်အံၤ လဲၤအိၣ်တီၣ်ထီၣ်အသးလၢ ကစၢၢ်တဖျၢၣ်အဒီခိၣ်လီၤ. မုၣ်နံၤမုၣ်သီတဖၣ် လၢာ်ကွံာ်ကဒီးဝဲလီၤ. ပှၤလၢအအိၣ်လၢကဘီပူၤတဖၣ်န့ၣ် ဖဲအကွၢ်တၢ်ဆူကဘီအချၢအခါ ထံၣ်ဘၣ်ဝဲသ့ၣ် ကစၢၢ်အခိၣ်ထိးတဖၣ်လီၤသၢၣ်. ထံဖးဒိၣ်အံၤ လီၤသံးဝဲကွ့ၢ်ကွ့ၢ်လီၤ.

ဖဲကတီၢ်အခါန့ၣ် နိအၤပျၢ်လီၤစိးဝၣ်ဃးတဘ့ၣ် ဆူကဘီအချၢန့ၣ်လီၤ. စိးဝၣ်ဃးယူၤတရံးဝ့ၤဝီၤဝဲတစိၢ်ဖိဒီး ဟဲက့ၤဆူကဘီအအိၣ်လီၤ. တထံၣ်ဘၣ်ဝဲတၢ်စီၢ်လီၤအလီၢ် ဂ့ၤဂ့ၤအဃိလီၤသၢၣ်. စိးဝၣ်ဃးန့ၣ် လဲၤဒီးဟဲက့ၤ, လဲၤဒီးဟဲက့ၤ အဘျီဘျီန့ၣ်လီၤ. မ့ၢ်ဟဲက့ၤဝဲတဘျီန့ၣ် စီၢ်လီၤကဒီးဝဲလၢ ကဘီအဖီခိၣ်န့ၣ်လီၤ.

နိအၤအဲၣ်ဒိးသ့ၣ်ညါ လၢဟီၣ်ခိၣ်လိၤန့ၣ် ထံလီၤသံးလံဧါအဃိ လၢခံတဘျီန့ၣ် ပျၢ်လီၤဝဲ ထိၣ်လွံၢ်တဘ့ၣ်လီၤ. ဘၣ်ဆၣ်သနာ်က့ ထိၣ်လွံၢ်ဖိစ့ၢ်ကီးန့ၣ် တထံၣ်တၢ်လီၢ်လၢကစီၢ်လီၤဝဲအဃိ ဟဲက့ၤဝဲဒၣ်လီၤ. နိအၤပျၢ်လီၤဝဲထိၣ်လွံၢ်ဖိ ခံဘျီတဘျီန့ၣ်လီၤ. တဘျီညါအံၤ ထိၣ်လွံၢ်ဖိန့ၣ် ဟဲက့ၤတံာ်စိာ်သ့ၣ်စၤယံးအလၣ်တဘ့ၣ် လၢအနိးဖိန့ၣ်လီၤ. အဃိ နိအၤသ့ၣ်ညါဝဲဒၣ်လၢ ထံလီၤသံးလံန့ၣ်လီၤ. နိအၤပျၢ်လီၤဝဲထိၣ်လွံၢ်ဖိ သၢဘျီတဘျီန့ၣ်လီၤ. လၢခံကတၢၢ် ထိၣ်လွံၢ်ဖိန့ၣ် ထံၣ်န့ၣ်ဝဲခိလၢအဃ့ထီဒီး စီၢ်လီၤအိၣ်ဝဲဒၣ်လီၤ.

ကစၢ်ယွၤစံးဘၣ် နိအၤ, ‘ဟးထီၣ်လၢကဘီပူၤတက့ၢ်. နပှၤဟံၣ်ဖိဃီဖိဒီး ဆၣ်ဖိကီၢ်ဖိတဖၣ်န့ၣ် ဒုးဟးထီၣ်အီၤတဘျီဃီတက့ၢ်.’ အိၣ်ဝဲသ့ၣ်လၢကဘီပူၤန့ၣ် ယံာ်တနံၣ်လံန့ၣ်လီၤ. ဒ်န့ၣ်အဃိ ခဲအံၤ ဟးထီၣ်ဘၣ်ဝဲသ့ၣ်ဆူကဘီချၢန့ၣ်ဒီး အသးသမူပူၤဖျဲးဝဲသ့ၣ်အဃိ ကသးခုဝဲဆံးဒိၣ်လဲၣ်န့ၣ် ပကွၢ်ဆိကမိၣ်သ့လီၤ.