ပှၤကူၣ်ဘၣ်ကူၣ်သ့စီၤပၤၡလိၤမိၤ အဂ့ၢ်

ဖဲၡလိၤမိၤကဲထီၣ်စီၤပၤအခါ အသးအိၣ်ဒၣ်စၢ်စၢ်ဖိဒံးလီၤ. အဝဲအဲၣ်ယဟိဝၤဒီး လူၤမၤထွဲဝဲစ့ၢ်ကီး အပၢ်အတၢ်ဟ့ၣ်ကူၣ်ဟ့ၣ်ဖး လၢအဂ့ၤတဖၣ်န့ၣ်လီၤ. ယဟိဝၤ ဘၣ်သူၣ်ဘၣ်သးလၢ ၡလိၤမိၤန့ၣ်လီၤ. လၢတၢ်န့ၣ်အဃိ ဘၣ်မုၢ်တနၤန့ၣ် ယဟိဝၤကတိၤတၢ်ဒီးအီၤလၢ တၢ်မံမီၢ်ပူၤ စံးဝဲဒၣ်, ‘ၡလိၤမိၤဧၢ, နအဲၣ်ဒိးလၢ ယကဟ့ၣ်နၤမနုၤလဲၣ်.’ န့ၣ်လီၤ.

ၡလိၤမိၤစံးဆၢဝဲဒၣ်, ‘ယွၤယကစၢ်ယဟိဝၤဧၢ, ယသးစၢ်ဒိၣ်နးမးလီၤ. ယပၢတၢ်စ့ၢ်ကီးတသ့ဘၣ်. လၢတၢ်န့ၣ်အဃိ ဒ်သိးယပၢနပှၤဂီၢ်မုၢ် တီတီလိၤလိၤကသ့အဂီၢ် ဟ့ၣ်သးကညီၤယၤ တၢ်ကူၣ်ဘၣ်ကူၣ်သ့တက့ၢ်’ န့ၣ်လီၤ.

တၢ်ဃ့လၢၡလိၤမိၤဃ့န့ၣ် ဘၣ်ယဟိဝၤအသးန့ၣ်လီၤ. ယွၤစံးဘၣ်အီၤ, ‘နတဃ့ တၢ်အိၣ်ကၢအိၣ်ခိး, တၢ်ထူးတၢ်တီၤဒီး, မ့ၢ်နဃ့တၢ်ကူၣ်ဘၣ်ကူၣ်သ့အဃိ ယကဟ့ၣ်နၤတၢ်ကူၣ်ဘၣ်ကူၣ်သ့အါန့ၢ် ပှၤအိၣ်မူတ့ၢ်လၢဟီၣ်ခိၣ်ချၢခဲလၢာ်န့ၣ်လီၤ. ယကဟ့ၣ်ဒံးနၤ တၢ်ထူးတၢ်တီၤ, ဒီးတၢ်လၤတၢ်ကပီၤ လၢနတဃ့န့ၣ်လီၤ.’

တၢ်န့ၣ်အလီၢ်ခံ တယံာ်တမီၢ်ဘၣ်ဒီး ပိာ်မုၣ်ခံဂၤလၢအအိၣ်ဒီး တၢ်သဘံၣ်ဘူၣ်ကီခဲဖးဒိၣ် ဟဲဆူၡလိၤမိၤအအိၣ်လီၤ. တဂၤခီစံးဝဲဒၣ် ‘ပိာ်မုၣ်အဝဲအံၤဒီးယၤ ပအိၣ်လၢဟံၣ်တဖျၢၣ်ဃီအပူၤလီၤ. ယအိၣ်ဖျဲၣ်ထီၣ်ဖိပိာ်ခွါတဂၤဝံၤခံသီန့ၣ် အဝဲစ့ၢ်ကီး အိၣ်ဖျဲၣ်ထီၣ်ဖိပိာ်ခွါတဂၤန့ၣ်လီၤ. ဘၣ်မုၢ်တနၤအဖိသံလီၤ. ဖဲယမံဘၣ်ယသးအခါ ဟဲပာ်ဝဲအဖိအသံလၢယကပၤဒီး ဟံးထီၣ်ကွံာ်ယဖိန့ၣ်လီၤ. ဖဲယပၢၢ်ထီၣ်အခါ ယထံၣ်ဖိသၣ်လၢအသံန့ၣ်လီၤ. ဒီးယသ့ၣ်ညါလၢ တၢ်န့ၣ် တမ့ၢ်ယဖိဘၣ်’ န့ၣ်လီၤ.

ဖဲအခါန့ၣ် ပိာ်မုၣ်လၢအတဂၤတခီစံးဝဲ ‘တမ့ၢ်ဘၣ်. ဖိသၣ်လၢအမူန့ၣ်မ့ၢ်ယဖိ ဒီးဖိသၣ်လၢအသံန့ၣ် မ့ၢ်အဖိလီၤ.’ ပိာ်မုၣ်အဆိတဂၤစံးဝဲ ‘တမ့ၢ်ဘၣ်. ဖိသၣ်လၢအသံန့ၣ် မ့ၢ်နဖိ ဒီးဖိသၣ်လၢအမူန့ၣ် မ့ၢ်ယဖိလီၤ’ န့ၣ်လီၤ. ပိာ်မုၣ်ခံဂၤန့ၣ် ဂ့ၢ်လိာ်အသးဒ်န့ၣ်လီၤ. ၡလိၤမိၤကမၤဝဲဒ်လဲၣ်.

မၢပှၤဟဲစိာ်ဃဲာ်တဘ့ၣ်လီၤ. ဒီးအဝဲဒၣ်စံး ‘ကျီတဲာ်ဖိသၣ်ခံကူာ်ဒီး ဟ့ၣ်လီၤပိာ်မုၣ်တဖၣ် တဂၤတကူာ်န့ၣ်တက့ၢ်’ န့ၣ်လီၤ.

မိၢ်တံၢ်နီၢ်န့ၣ် ကိးသသြီထီၣ်ဒီးစံးဝဲ, ‘ဝံသးစူၤ, တဘၣ်မၤသံဖိသၣ်န့ၣ်တဂ့ၤ. ဟ့ၣ်လီၤအီၤတက့ၢ်’ န့ၣ်လီၤ. ဘၣ်ဆၣ်ဒီး ပိာ်မုၣ်အဂၤတဂၤစံးဝဲ ‘တဘၣ်ဟ့ၣ်ပှၤနီတဂၤတဂ့ၤ ကျီတဲာ်ကွံာ်ခံကူာ်တက့ၢ်’ န့ၣ်လီၤ.

လၢခံကတၢၢ်န့ၣ် ၡလိၤမိၤစံးဝဲ ‘မၤသံဖိသၣ်တဂ့ၤ. ဟ့ၣ်လီၤပိာ်မုၣ်အဆိတဂၤန့ၣ်တက့ၢ်. အဝဲဒၣ်မ့ၢ်မိၢ်တံၢ်နီၢ်လီၤ.’ ၡလိၤမိၤသ့ၣ်ညါဝဲလၢ မိၢ်တံၢ်နီၢ်န့ၣ် အဲၣ်အဖိဒိၣ်မးအဃိ အသးအိၣ်ဟ့ၣ်လီၤဝဲဆူပိာ်မုၣ်အဂၤတဂၤ ဒ်သိးအဖိတသံအဂီၢ်န့ၣ်လီၤ. ဖဲပှၤအါဂၤနၢ်ဟူ ၡလိၤမိၤစံၣ်ညီၣ်တဲာ်တၢ်ဒ်အံၤအခါ သးခုဝဲသ့ၣ်လၢ မၤန့ၢ်စီၤပၤလၢ အအိၣ်ဒီးတၢ်ကူၣ်ဘၣ်ကူၣ်သ့ ဒ်အံၤသိးတဂၤအဃိလီၤ.

ဖဲၡလိၤမိၤပၢတၢ်အဆၢကတီၢ်အခါ ယွၤဆိၣ်ဂ့ၤပှၤတဖၣ်လၢ ဘုကၠူၣ်, ဘုမုယီၤ, စပံးသၣ်, ချၢၣ်ဒၢသၣ်ဒီး တၢ်အီၣ်တၢ်အီအဂၤတဖၣ် သၣ်ထီၣ်အါထီၣ်ဂီၢ်မုၢ်ဂီၢ်ပၤန့ၣ်လီၤ. ထံဖိကီၢ်ဖိတဖၣ် အိၣ်ဒီးတၢ်ကူဂ့ၤကၤဝါ, ဒီးအိၣ်ဘၣ်ဆိးဘၣ်လၢ ဟံၣ်လၢအဂ့ၤတဖၣ်အပူၤန့ၣ်လီၤ. ပှၤခဲလၢာ်အိၣ်ဒီး တၢ်လၢအဂ့ၤတဖၣ် အါလုာ်ကွံာ်န့ၣ်လီၤ.