ၡလိၤမိၤသူၣ်ထီၣ် တၢ်လုၢ်ဟံၣ် အဂ့ၢ်

ဒၤဝံးတချုးသံဒံးဘၣ်အခါ ဟ့ၣ်တ့ၢ်ဝဲၡလိၤမိၤ တၢ်ရဲၣ်လီၤကျဲၤလီၤတဖၣ်လၢ ကသူၣ်ထီၣ်ယဟိဝၤအတၢ်လုၢ်ဟံၣ်အဂီၢ် န့ၣ်လီၤ. ဖဲၡလိၤမိၤပၢတၢ်တုၤလွံၢ်နံၣ်အခါ စးထီၣ်သူၣ်ထီၣ်ဝဲ တၢ်လုၢ်ဟံၣ်ဒီး တုၤအဝံၤန့ၣ် ယံာ်နွံနံၣ်တခီလီၤ. ဖဲတၢ်သူၣ်ထီၣ်တၢ်လုၣ်ဟံၣ်အခါ ပှၤအကထိတဖၣ်အကထိ ဘၣ်မၤတၢ် ဒီးလၢာ်ကျိၣ်လၢာ်စ့ဒိၣ်မးစ့ၢ်ကီးန့ၣ်လီၤ. ဘၣ်တၢ်သူ ထူဒီးစ့ ဂီၢ်မုၢ်ဂီၢ်ပၤအဃိန့ၣ်လီၤသၢၣ်.

လၢတၢ်လုၢ်ဟံၣ်န့ၣ် ဒၢးအိၣ်ဝဲခံဒၢး ဒ်ဒဲစီဆှံအသိးန့ၣ်လီၤ. ဘၣ်ဆၣ်သနာ်က့ ဒၢးတဖၣ်အံၤ အိၣ်ဒဲစီဆှံအဒၢးခံစးန့ၣ်လီၤ. ၡလိၤမိၤဒၢနုာ် တၢ်အၢၣ်လီၤအီလီၤတလါဆူ တၢ်လုၢ်ဟံၣ်အဒၢး အအိပူၤတဒၢးန့ၣ်လီၤ. တၢ်ဖိတၢ်လံၤ လၢအအိၣ်လၢဒဲစီဆှံအပူၤတဖၣ်တခီ ဘၣ်တၢ်ပာ်အီၤလၢ တၢ်လုၢ်ဟံၣ်လၢခံတဒၢးအပူၤန့ၣ်လီၤ.

ဖဲတၢ်လုၢ်ဟံၣ်ဝံၤအခါ ဘၣ်တၢ်မၤဘူၣ်တၢ်ပာ်စီဆှံအဒိၣ်အမုာ်န့ၣ်လီၤ. ဒ်ပထံၣ်လၢတၢ်ဂီၤပူၤအသိး ၡလိၤမိၤတီၤလီၤကဒွံကျိာ် လၢတၢ်လုၢ်ဟံၣ်အမဲာ်ညါ ဒီးဃ့ထုကဖၣ်တၢ်လီၤ. ‘မူခိၣ်ဒီခါလၢာ်စ့ၢ်ကီး တတြီၢ်လၢနဂီၢ်ဘၣ်. လၢတၢ်န့ၣ်အဃိ တၢ်လုၢ်ဟံၣ်အံၤ ကတြီၢ်လၢနၤဒ်လဲၣ်. ဘၣ်ဆၣ်သနာ်က့ ယွၤယကစၢ်ဧၢ ဖဲနပှၤဂီၢ်မုၢ်ဃၣ်အသးဆူတၢ်လီၢ်အံၤဒီး ဃ့ထုကဖၣ်တၢ်အခါ ဝံသးစူၤဒီးဒိကနၣ်တက့ၢ်.’

ၡလိၤမိၤဃ့ဘါထုကဖၣ်တၢ်ဝံၤဒီး မ့ၣ်အူဟဲလီၤလၢမူခိၣ် ဒီးအီၣ်ကွံာ်ဝဲတၢ်လုၢ်တၢ်ပာ် လၢတၢ်ပာ်ထီၣ်အီၤန့ၣ်လီၤ. တၢ်ကပီၤဟဲလၢယဟိဝၤအအိၣ်န့ၣ် ဆဲးကပြုၢ်ကပြီၤလၢ တၢ်လုၢ်ဟံၣ်ဒီဖျၢၣ်ညါအပူၤန့ၣ်လီၤ. တၢ်အံၤပာ်ဖျါထီၣ်ဝဲဒၣ် ယဟိဝၤဒိကနၣ်ဝဲဒၣ် ဒီးတၢ်လုၢ်ဟံၣ်ဒီးၡလိၤမိၤအတၢ်ထုကဖၣ်န့ၣ် ဘၣ်အသးဝဲဒၣ်န့ၣ်လီၤ. ခဲအံၤ လၢဒဲစီဆှံအလီၢ်န့ၣ် တၢ်လုၢ်ဟံၣ်အံၤ ကဲထီၣ်ပှၤကဘူၣ်တၢ်ဘါတၢ်အလီၢ်န့ၣ်လီၤသၢၣ်.

ၡလိၤမိၤပၢတၢ် အနံၣ်တဖၣ်အနံၣ်ဒီး တၢ်ကူၣ်ဘၣ်ကူၣ်သ့န့ၣ်လီၤ. ကမျၢၢ်တဖၣ်စ့ၢ်ကီး သးခုဝဲသ့ၣ်န့ၣ်လီၤ. ဘၣ်ဆၣ်သနာ်က့ ၡလိၤမိၤဟံးန့ၢ် ပိာ်မုၣ်အါမး လၢအမ့ၢ်ပှၤတခီဘီမုၣ်ဖိ လၢအတဘူၣ်တဘါယဟိဝၤန့ၣ်လီၤ. လၢအဝဲသ့ၣ်အကျါတဂၤ ဘါထီၣ်တၢ်ဂီၤန့ၣ် နထံၣ်ဧါ. လၢခံကတၢၢ်န့ၣ် ၡလိၤမိၤအမါတဖၣ် လွဲန့ၢ်အီၤလၢကဘူၣ်ထီၣ်ဘါထီၣ် ယွၤအဂၤတဖၣ်န့ၣ်လီၤ. လၢၡလိၤမိၤမၤဝဲဒ်အံၤအဃိ မနုၤကဲထီၣ်ဝဲလဲၣ် နသ့ၣ်ညါဧါ. တဒီသူၣ်ပာ်သးလၢကမျၢၢ်အလိၤ ဂ့ၤဂ့ၤဘၣ်ဘၣ်လၢၤဘၣ်. အၢထီၢ်သီထီၣ်ဝဲဒၣ်လီၤ. ကမျၢၢ်စ့ၢ်ကီး သူၣ်တဖှံသးတညီလၢၤဘၣ်.

လၢတၢ်န့ၣ်အဃိ ယဟိဝၤသးထီၣ်ဝဲဒၣ်ၡလိၤမိၤန့ၣ်လီၤ. ယွၤစံးဘၣ်အီၤ, ‘ယကဟံးထီၣ်ကွံာ်ဘီမုၢ်လၢနအိၣ် ဒီးဟ့ၣ်လီၤကွံာ်အီၤဆူ ပှၤဂၤတဂၤအစုပူၤလီၤ. ယတမၤတၢ်အံၤလၢ နအိၣ်မူအကတီၢ်န့ၣ်ဒံးဘၣ်. ယကမၤလၢ နဖိခွါပၢတၢ်အကတီၢ်န့ၣ်လီၤ. ဘၣ်ဆၣ် ယတဟံးန့ၢ် ထံဖိကီၢ်ဖိခဲလၢာ် လၢနဖိခွါအစုပူၤဘၣ်’ န့ၣ်လီၤ. ပကကွၢ်သကိး လၢခံတၢ်ကဲထီၣ်ဒ်လဲၣ်န့ၣ်တက့ၢ်.