ယိၤနါဒီးညၣ်ဖးဒိၣ် အဂ့ၢ်

ကွၢ်ပှၤလၢထံကျါန့ၣ်တက့ၢ်. အဝဲ ဘၣ်ကီဘၣ်ခဲဝဲဒိၣ်မးလီၤ, တမ့ၢ်ဘၣ်ဧါ. ညၣ်ဖးဒိၣ်ကယူၢ်လီၤအီၤလီၤ. အဝဲမ့ၢ်မတၤလဲၣ်သုသ့ၣ်ညါဧါ. အမံၤမ့ၢ် ယိၤနါလီၤ. ဘၣ်မနုၤအဃိ ဘၣ်ကီဘၣ်ခဲဝဲဒ်အံၤန့ၣ်လဲၣ်. ပကကွၢ်သကိးတက့ၢ်.

ယိၤနါမ့ၢ်ယဟိဝၤအဝံတဂၤလီၤ. ဝံအလံၤၡါသံဝံၤ တယံာ်တမီၢ်န့ၣ် ယဟိဝၤတဲဘၣ်ယိၤနါဒ်အံၤလီၤ. ‘လဲၤဆူဝ့ၢ်ဖးဒိၣ်နံၤနဝ့န့ၣ်တက့ၢ်. ပှၤလၢအအိၣ်လၢတၢ်လီၢ်ဖဲန့ၣ်တဖၣ် မၤတၢ်အၢဒိၣ်မးလီၤ. ယအဲၣ်ဒိးလၢ နလဲၤတဲဘၣ်အဝဲသ့ၣ် လၢတၢ်ဂ့ၢ်အဝဲန့ၣ်လီၤ.’

ဘၣ်ဆၣ်သနာ်က့ ယိၤနါတခီ တအဲၣ်ဒိးလဲၤဝဲဘၣ်. လၢတၢ်န့ၣ်အဃိ ဒိးထီၣ်ကဘီတဘ့ၣ်လၢ အလဲၤဆူ အတမ့ၢ်နံၤနဝ့အကျဲ, ကျဲအဂၤတဘိန့ၣ်လီၤ. ယိၤနါဃ့ၢ်ပူၤဖျဲးအသးန့ၣ် တဘၣ်ယဟိဝၤအသးဘၣ်. လၢတၢ်န့ၣ်အဃိ မၤကဲထီၣ်ဝဲကလံၤမုၢ်ဖးဒိၣ်န့ၣ်လီၤ. ကလံၤမုၢ်ဖးဒိၣ်ဆူၣ်တုၤဒၣ်လဲာ် ကဘီကလီၤဘျၢဃၣ်ဃၣ်န့ၣ်လီၤ. ပှၤကဘီဖိတဖၣ် ပျံၤဝဲသ့ၣ်တၢ်န့ၣ်လီၤ. တုၤနုၤတစု, ကိးထီၣ်ဝဲသ့ၣ် အယွၤတဖၣ်န့ၣ်လီၤ.

လၢခံန့ၣ် ယိၤနါတဲအဝဲသ့ၣ်, ‘ယမ့ၢ်ပှၤတဂၤလၢ အဘူၣ်ထီၣ်ဘါထီၣ်ယဟိဝၤယွၤ, လၢအတ့လီၤ မူခိၣ်ဒီးဟီၣ်ခိၣ်န့ၣ်လီၤ. ယတမၤတၢ်လၢ ယဟိဝၤမၢယၤ ဒီးဃ့ၢ်ပူၤဖျဲးယဲဒၣ်အဃိလီၤ.’ ပှၤကဘီဖိတဖၣ် သံကွၢ်အီၤ ‘ဒ်သိးကလံၤမုၢ်အံၤကဂၢၢ်ဝဲအဂီၢ်န့ၣ် ပကဘၣ်မၤနၤဒ်လဲၣ်’ န့ၣ်လီၤ.

ယိၤနါစံးဘၣ်အဝဲသ့ၣ် ‘တ့ၢ်လီၤယၤဆူပီၣ်လဲၣ်ပူၤတက့ၢ်. လပီကအိၣ်ဂၢၢ်က့ၤဝဲလီၤ.’ ပှၤကဘီဖိတဖၣ်တခီ တအဲၣ်ဒိးမၤဝဲသ့ၣ်ဒ်န့ၣ်ဘၣ်. ဘၣ်ဆၣ်သနာ်က့, ကလံၤမုၢ်ဒံးယံာ်ဒံးဆူၣ်ထီၣ်အဃိ အကတၢၢ်န့ၣ် တ့ၢ်လီၤဝဲယိၤနါဆူပီၣ်လဲၣ်ပူၤန့ၣ်လီၤ. ကလံၤမုၢ်အိၣ်ကတီၢ်တဘျီဃီဒီး ပီၣ်လဲၣ်စ့ၢ်ကီး ဂၢၢ်လီၢ်က့ၤဝဲန့ၣ်လီၤ.

ယိၤနါလီၤဘျၢလၢထံကျါဒီး ညၣ်ဖးဒိၣ်ယူၢ်လီၤ ကွံာ်အီၤန့ၣ်လီၤ. ဘၣ်ဆၣ်သနာ်က့ အဝဲတသံဘၣ်. ဘၣ်အိၣ်ဝဲလၢညၣ်ဖးဒိၣ်အဟၢဖၢပူၤ သၢနံၤဒီးသၢနၤန့ၣ်လီၤ. ယိၤနါပီၢ်ယၢ်လီၤက့ၤအသးဒိၣ်မးလၢ အတဒိကနၣ် ယဟိဝၤယွၤအတၢ်ကတိၤ, ဒီးတလဲၤဝဲဆူနံၤနဝ့အဃိန့ၣ်လီၤ. လၢတၢ်န့ၣ်အဃိ ယိၤနါမၤမနုၤလဲၣ်န့ၣ် နသ့ၣ်ညါဧါ.

ဃ့ဘါထုကဖၣ်ဝဲလၢ ယဟိဝၤကမၤစၢၤအီၤလီၤ. တုၤနုၤတစု, ယဟိဝၤမၤဒ်သိးညၣ်ဖးဒိၣ် ကဘှိးထီၣ်ယိၤနါဆူ သိၣ်ဃ့ခိၣ်န့ၣ်လီၤ. လၢတၢ်န့ၣ်အလီၢ်ခံ ယိၤနါလဲၤဝဲဆူ ဝ့ၢ်နံၤနဝ့န့ၣ်လီၤ. တၢ်အံၤ ဟ့ၣ်ပှၤတၢ်မၤလိလၢ ပကမၤတၢ်လၢ ယဟိဝၤမၢပှၤန့ၣ် အကါဒိၣ်ဝဲဒၣ်ဆံးဒိၣ်လဲၣ်န့ၣ်လီၤ, တမ့ၢ်ဘၣ်ဧါ.