တၢ်မၤလိ ၅၄
ယဟိဝၤယွၤပာ်ဖျါထီၣ် တၢ်ဝံသးစူၤလၢ ဝံယိၤနါအဖီခိၣ်
ဝ့ၢ်နံၤနဝ့န့ၣ်အိၣ်လၢ ကီၢ်အၤၡူၢ်အပူၤ ဒီးပှၤနံၤနဝ့ဖိတဖၣ် အၢဝဲသီဝဲဒိၣ်မး. လၢတၢ်န့ၣ်အဃိ ယဟိဝၤယွၤမၢဝံယိၤနါ ဒ်သိးကလဲၤလၢ ဝ့ၢ်နံၤနဝ့ဒီး ဟ့ၣ်ပလီၢ်ပှၤဝ့ၢ်ဖိတဖၣ် လၢအဝဲသ့ၣ် ကဆီတလဲကွံာ် အတၢ်အိၣ်မူအဂီၢ်. ဘၣ်ဆၣ် ဝံယိၤနါ တအဲၣ်ဒိးလဲၤဝဲဘၣ်. ဒီးအဝဲဃ့ၢ်ကွံာ်ဝဲလၢအယံၤ. ဝံယိၤနါ ဒိးထီၣ်ဝဲကဘီလၢ အလဲၤဝဲဆူဝ့ၢ်တၢ်ၡံၣ်လၢ အအိၣ်ယံၤဒီး ဝ့ၢ်နံၤနဝ့.
ဖဲကဘီလဲၤတၢ်အခါ ကလံၤမုၢ်ဖးဒိၣ် ဟဲအူထီၣ်ဝဲ အဃိ ပှၤကဘီဖိတဖၣ် ပျံၤတၢ်ဒိၣ်မး. ပှၤကဘီဖိတဖၣ် ဃ့ဘါထုကဖၣ်တၢ်လၢ အဝဲသ့ၣ် အကစၢ်ယွၤ အအိၣ်လၢ ‘ဘၣ်မနုၤအဃိ တၢ်ဟဲကဲထီၣ်အသး ဒ်အံၤလဲၣ်.’ လၢခံ ဝံယိၤနါ တဲဘၣ်အဝဲသ့ၣ်လၢ ‘တၢ်လၢယဟိဝၤယွၤ မၢယမၤန့ၣ် ယတမၤဘၣ် အဃိ ကလံၤမုၢ်ဖးဒိၣ် ဟဲအူထီၣ်ဝဲ. သုမ့ၢ်တၢၤလီၤယၤလၢ ပီၣ်လဲၣ်ပူၤန့ၣ် ကလံၤမုၢ်ကပတုာ်ဝဲ.’ ပှၤကဘီဖိတဖၣ် တအဲၣ်ဒိးတၢၤလီၤ ဝံယိၤနါလၢပီၣ်လဲၣ်ပူၤဘၣ်. ဘၣ်ဆၣ် ဝံယိၤနါ ဆဲးတဲဘၣ် အဝဲသ့ၣ်လၢ သုကဘၣ်တၢၤလီၤယၤလၢ ပီၣ်လဲၣ်ပူၤ. အဃိ လၢခံန့ၣ်အဝဲသ့ၣ် တၢၤလီၤဝံယိၤနါလၢ ပီၣ်လဲၣ်ပူၤ. ဒီးကလံၤမုၢ် အိၣ်ပတုာ်ဝဲ.
ဝံယိၤနါ ဆိကမိၣ်ဝဲလၢ တဘျီအံၤဒု ယကသံ. ဖဲဝံယိၤနါ လီၤဘျၢလၢထံဖီလာ် ယိာ်ထီၣ်ယိာ်ထီၣ်အခါ အဝဲဃ့ဘါထုကဖၣ်တၢ်ဆူ ယဟိဝၤယွၤအအိၣ်. ဝံၤဒီး ယဟိဝၤယွၤ ဆှၢလီၤဝဲ ညၣ်ဖးဒိၣ်တဘ့ၣ် ဒီးညၣ်အံၤ ယူၢ်လီၤကွံာ်ဝဲ ဝံယိၤနါ. ဘၣ်ဆၣ် ဝံယိၤနါတသံဘၣ်. ဖဲဝံယိၤနါအိၣ်လၢ ညၣ်ဖးဒိၣ် အဟၢဖၢပူၤအခါ အဝဲဃ့ဘါထုကဖၣ်တၢ်ဆူ ယဟိဝၤယွၤအအိၣ်လၢ ‘ယအၢၣ်လီၤအီလီၤနၤလၢ ယကဒိကနၣ် နကလုၢ်ထီဘိ.’ ယဟိဝၤယွၤ ကွၢ်ထွဲဝံယိၤနါ ဂ့ၤဂ့ၤအဃိ ဖဲအဝဲအိၣ်လၢ ညၣ်ဟၢဖၢပူၤ သၢသီဝံၤအလီၢ်ခံန့ၣ် ညၣ်ဖးဒိၣ် ဘှိးထီၣ်ကွံာ်အီၤ လၢခိခိၣ်.
မ့ၢ်လၢ ယဟိဝၤယွၤမၤစၢၤ ဝံယိၤနါဒ်အံၤအဃိ မ့ၢ်ဝံယိၤနါတလိၣ်လဲၤလၢ ဝ့ၢ်နံၤနဝ့လၢၤဘၣ်ဧါ. တမ့ၢ်ဒ်န့ၣ်ဘၣ်. ယဟိဝၤယွၤမၢကဒီး ဝံယိၤနါဒ်သိးကလဲၤလၢ ဝ့ၢ်နံၤနဝ့. တဘျီအံၤ ဝံယိၤနါ ဒိကနၣ်ဝဲ ကစၢ်ယွၤအကလုၢ်. ဝံယိၤနါလဲၤဝဲဆူ ဝ့ၢ်နံၤနဝ့ ဒီးတဲဘၣ်ပှၤဝ့ၢ်ဖိလၢ အအၢအသီတဖၣ်န့ၣ်လၢ ‘ဆူမဲာ်ညါအသီ ၄၀ န့ၣ်ဝ့ၢ်နံၤနဝ့ ကဘၣ်တၢ်မၤဟးဂီၤအီၤ.’ ဘၣ်ဆၣ် လၢခံန့ၣ် တၢ်မၤအသးဒ်လဲၣ်. ပှၤနံၤနဝ့ဖိတဖၣ် ဒိကနၣ်ဝဲ ဝံယိၤနါအကလုၢ် ဒီးအဝဲသ့ၣ် ဆီတလဲကွံာ် အတၢ်အိၣ်မူ. နံၤနဝ့ အစီၤပၤတဲဘၣ် အထံဖိကီၢ်ဖိလၢ ‘ပကဘၣ်ကိးထီၣ်ဆူ ယွၤအအိၣ် ဒီးပီၢ်ယၢ်လီၤက့ၤပသး, ဘၣ်သ့ၣ်သ့ၣ် ကစၢ်ယွၤ တမၤဟးဂီၤပှၤဘၣ်.’ ဖဲယဟိဝၤယွၤ ထံၣ်ဘၣ်ဝဲ ပှၤနံၤနဝ့ဖိတဖၣ် ပီၢ်ယၢ်လီၤက့ၤအသးအခါ ကစၢ်ယွၤ တမၤဟးဂီၤ အဝဲသ့ၣ်လၢၤဘၣ်.
မ့ၢ်လၢကစၢ်ယွၤ တမၤဟးဂီၤကွံာ် ပှၤနံၤနဝ့ဖိဘၣ်အဃိ ဝံယိၤနါ သးပှံၢ်ထီၣ်တၢ်ဒိၣ်မး. ဆိကမိၣ်ကွၢ်မီၤ ယဟိဝၤယွၤ ပာ်ဖျါထီၣ် တၢ်ဝံသးစူၤ ဒီးတၢ်သးကညီၤလၢ ဝံယိၤနါ အဖီခိၣ်, ဘၣ်ဆၣ် ဝံယိၤနါ တပာ်ဖျါထီၣ် တၢ်သးကညီၤလၢ ပှၤနံၤနဝ့ဖိတဖၣ် အဖီခိၣ်ဘၣ်. လၢတၢ်န့ၣ်အလီၢ် ဝံယိၤနါ ဟးထီၣ်လၢ ဝ့ၢ်နံၤနဝ့ ဒီးလဲၤဆ့ၣ်နီၤဝဲလၢ မာ်တိတထူၣ် အကဒုဖီလာ်. လၢခံန့ၣ် ဖဲမာ်တိတထူၣ်အံၤ သံကွံာ်ဝဲအခါ ဝံယိၤနါ သးပှံၢ်ထီၣ်တၢ်. အဃိ ယဟိဝၤယွၤ တဲဘၣ်အီၤလၢ ‘မ့ၢ်နထံၣ်လၢ မာ်တိတထူၣ်အံၤ အလုၢ်အပှ့ၤ အိၣ်အါန့ၢ်ဒံး ပှၤနံၤနဝ့ဖိတဖၣ် အသးသမူဧါ. ယပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ် အဃိ ယတမၤဟးဂီၤ အဝဲသ့ၣ်ဘၣ်.’ ကစၢ်ယွၤ အတၢ်ကတိၤအံၤန့ၣ် အဲၣ်ဒိးတဲဝဲ အခီပညီဒ်လဲၣ်. ပှၤနံၤနဝ့ဖိ အသးသမူန့ၣ် အလုၢ်အပှ့ၤ အိၣ်အါန့ၢ်ဒံး မာ်တိတထူၣ်အံၤ.
“ယဟိဝၤယွၤ . . . ဝံသးစူၤသု မ့ၢ်လၢ အတအဲၣ်ဒိးလၢ ပှၤကတုၤလၢ တၢ်ဟးဂီၤ နီတဂၤဘၣ်. ဒီးအအဲၣ်ဒိးဝဲလၢ ပှၤခဲလၢာ် ကပီၢ်ယၢ်လီၤက့ၤအသးလီၤ.”—၂ ပ့းတရူး ၃:၉