ယိၤဟၣ်ဘျၢယ့ၣ်ၡူးလၢထံ အဂ့ၢ်

ကွၢ်ထိၣ်လွံၢ်ဖိတဘ့ၣ် ဟဲလီၤလၢပှၤအံၤအခိၣ်လိၤတက့ၢ်. ပှၤအဝဲအံၤ မ့ၢ်ယ့ၣ်ၡူးလီၤ. ခဲအံၤအသးအိၣ် အနံၣ် ၃၀ လံ. ပှၤလၢအကပၤန့ၣ် မ့ၢ်ယိၤဟၣ်လီၤ. ပသ့ၣ်ညါတ့ၢ်အဂ့ၢ်စှၤကိာ်လံန့ၣ်လီၤ. မၤရံလဲၤဟးဆူ အဘူးအတံၢ် အ့ၤလံၤစါဘ့ၣ်အိၣ်အခါ ဖိသၣ်လၢအ့ၤလံၤစါဘ့ၣ် အဟၢဖၢပူၤစံၣ်န့ၣ် သုသ့ၣ်နီၣ်ထီၣ်ဒံးဧါ. အၢၣ်, ဖိသၣ်လၢအ့ၤလံၤစါဘ့ၣ် အဟၢဖၢပူၤန့ၣ် မ့ၢ်ဝဲဖိသၣ်ယိၤဟၣ်န့ၣ်လီၤ. ခဲအံၤ ယ့ၣ်ၡူးဒီးယိၤဟၣ် မၤမနုၤဖဲအံၤန့ၣ်လဲၣ်.

ယိၤဟၣ်ဘျၢလီၤ ယ့ၣ်ၡူးဆူထံကျိယၣ်ဒ့ၣ်ပူၤခဲအံၤလီၤ. တၢ်ဒိးဘျၢထံစံးတၢ်န့ၣ် မ့ၢ်ဒ်န့ၣ်လီၤသၢၣ်. လၢအဆိဘၣ်တၢ်ဘျၢလီၤအီၤဆူထံကျါလီၤ. ဝံၤဒီး ဘၣ်တၢ်ဝံၢ်ဆၢထၢၣ်က့ၤအီၤလၢ ထံကျါလီၤ. မ့ၢ်လၢယိၤဟၣ်မၤဝဲဒ်န့ၣ်အဃိ ဘၣ်တၢ်ကိးအိၤလၢ ပှၤဘျၢတၢ်ယိၤဟၣ်န့ၣ်လီၤ. ဘၣ်ဆၣ်သနာ်က့ ဘၣ်မနုၤအဃိလၢ ယိၤဟၣ်ဘၣ်ဘျၢယ့ၣ်ၡူးန့ၣ်လဲၣ်.

မ့ၢ်လၢယ့ၣ်ၡူးဟဲဆူယိၤဟၣ်အအိၣ်ဒီး ဃ့ဒိးဘျၢအသးအဃိ ယိၤဟၣ်ဘၣ်ဘျၢန့ၢ်ယ့ၣ်ၡူးန့ၣ်လီၤ. ယိၤဟၣ်ဘျၢန့ၢ် ပှၤလၢအမၤတ့ၢ်ဘၣ်တၢ်အၢဒီး အသးအိၣ်ပာ်ဖျါတၢ်သးအုးတဖၣ်န့ၣ်လီၤ. ဘၣ်ဆၣ် မ့မ့ၢ်ယ့ၣ်ၡူးတခီ မၤတၢ်အၢဒီးကပီၢ်ယၢ်လီၤအသးအဂီၢ်အိၣ်ဧါ. တအိၣ်ဘၣ်, ယ့ၣ်ၡူးတမၤဝဲတၢ်အၢနီတဘျီဘၣ်. ဘၣ်မနုၤအဃိလဲၣ်န့ၣ် အဝဲမ့ၢ်ယွၤအဖိခွါလၢ အဟဲလီၤလၢမူခိၣ်န့ၣ်လီၤ. လၢတၢ်န့ၣ်အဃိ အဝဲဃ့ဒိးဘျၢအသးလၢယိၤဟၣ်အအိၣ်န့ၣ် အိၣ်ဒီးတၢ်ဂ့ၢ်အဂၤတခါလီၤ. တၢ်ဂ့ၢ်မနုၤလဲၣ်. ပကွၢ်သကိးတက့ၢ်.

တချုးဟဲဝဲဆူ ယိၤဟၣ်အအိၣ်န့ၣ် ယ့ၣ်ၡူးမ့ၢ်ပှၤစုသ့တဂၤလီၤ. တၢ်လၢပှၤစုသ့စံးတၢ်န့ၣ် ပှၤလၢအမၤစီၤနီၤခိၣ်, လီၢ်ဆ့ၣ်နီၤ, လီၢ်ဆ့ၣ်နီၤထီတဖၣ် လၢသ့ၣ်န့ၣ်လီၤ. မၤရံအဝၤယိၤသးန့ၣ် မ့ၢ်ပှၤစုသ့တဂၤအဃိ သိၣ်လိန့ၢ်ဝဲယ့ၣ်ၡူး ပှၤစုသ့အတၢ်ကူၣ်ဘၣ်ကူၣ်သ့တဖၣ်န့ၣ်လီၤ. ဘၣ်ဆၣ်သနာ်က့ တမ့ၢ်ယဟိဝၤမၢလီၤအဖိခွါလၢ အကမၤတၢ်စုသ့အတၢ်မၤဘၣ်. တၢ်မၤလီၤဆီလၢကဘၣ်မၤဝဲအိၣ်ဒီး ခဲအံၤ တၢ်ဆၢကတီၢ်ဘၣ်လံ. လၢတၢ်န့ၣ်အဃိ ဒ်သိးကပာ်ဖျါထီၣ် အဝဲဟဲလၢကမၤတၢ်ဘၣ်အပၢ်အသးအဂီၢ် ဃ့ဒိးဘျၢအသးလၢထံလီၤ. ယွၤဘၣ်အသးလၢတၢ်အံၤန့ၣ်ဧါ.

ဘၣ်ဝဲအသးန့ၣ်လီၤ. ဘၣ်မနုၤပစံးသ့န့ၣ်လဲၣ်. ဖဲယ့ၣ်ၡူးဟဲက့ၤထီၣ်လၢထံကျါအခါ တၢ်ကလုၢ်သီၣ်ထီၣ်လၢမူခိၣ်တခါ ဒီးစံးဝဲဒၣ် ‘အဝဲဒၣ်အံၤမ့ၢ်ယဖိခွါ လၢယအဲၣ်အီၤလီၤ’ န့ၣ်လီၤ. ဝံၤဒီး မၤသးဒ်မူခိၣ်အိးထီၣ်အသးဝံၤ ထိၣ်လွံၢ်ဖိတဘ့ၣ် ဟဲလီၤဆူယ့ၣ်ၡူးအလိၤန့ၣ်လီၤ. ဘၣ်ဆၣ် တၢ်န့ၣ် တမ့ၢ်ထိၣ်လွံၢ်နီၢ်ကီၢ်ဘၣ်. မ့ၢ်ဒၣ် တၢ်လၢအလီၤဂာ်ဒ် ထိၣ်လွံၢ်အက့ၢ်အဂီၤလီၤ. နီၢ်နီၢ်တခီ တၢ်န့ၣ် မ့ၢ်ယွၤအသးစီဆှံလီၤ.

မ့မ့ၢ်ခဲအံၤ ယ့ၣ်ၡူးအိၣ်ဒီး တၢ်လၢကဘၣ်ဆိကမိၣ်ဝဲ အါမးန့ၣ်လီၤ. လၢတၢ်န့ၣ်အဃိ လဲၤဝဲဒၣ်ဆူ လီၢ်အိၣ်ဘှ့ၣ်အိၣ်ဘှီၣ် ဒီးအိၣ်ဝဲဖဲန့ၣ်အသီ ၄၀ လီၤ. ဖဲန့ၣ်အခါ မုၣ်ကီၤလံၢ်ဟဲဆူအအိၣ်လီၤ. ဒ်သိးယ့ၣ်ၡူး ကလုၢ်သ့ၣ်ခါပတာ်ယွၤအတၢ်သိၣ်တၢ်သီ ဒီးကမၤတၢ်တမ့ၢ်တတီအဂီၢ် မုၣ်ကီၤလံၢ်ဂုာ်ကျဲးစၢးလ့ပစီအီၤသၢဘျီန့ၣ်လီၤ. သနာ်က့ ယ့ၣ်ၡူးတမၤဝဲဒၣ်ဘၣ်.

တၢ်န့ၣ်ဝံၤအလီၢ်ခံ ယ့ၣ်ၡူးဟဲက့ၤဝဲဒၣ်ဒီး ထံၣ်ဝဲပှၤတနီၤလၢကပိာ်ဆိအခံ, မ့တမ့ၢ် အပျဲၢ်အဆိတဖၣ်န့ၣ်လီၤ. လၢအဝဲသ့ၣ်အကျါ တနီၤန့ၣ်မ့ၢ်ဝဲဒၣ် အၣ်ဒရ့း, ၡံမိၣ် (ဘၣ်တၢ်ကိးစ့ၢ်ကီးအီၤလၢ ပ့းတရူး), ဖံလံးပူး ဒီးနၤသန့လး (ဘၣ်တၢ်ကိးစ့ၢ်ကီးအီၤလၢ ဘၢ်သလီးမဲ) တဖၣ်န့ၣ်လီၤ. ယ့ၣ်ၡူးဒီးအပျဲၢ်အသီတဖၣ် ဟးထီၣ်ဝဲဆူ ကၤလံၤလါကီၢ်န့ၣ်လီၤ. တုၤဆူကီၢ်ကၤလံၤလါန့ၣ် အိၣ်ဘှံးဝဲသ့ၣ်တတီၤ ဖဲနၤသန့လးအဝ့ၢ်ကၤနါလီၤ. ဖဲန့ၣ် ယ့ၣ်ၡူးလဲၤဆူ တၢ်တ့တၢ်ဖျီအမူးဖးဒိၣ်တခါဒီး ပာ်ဖျါထီၣ်ဝဲ တၢ်လီၤလးအဆိကတၢၢ်တခါန့ၣ်လီၤ. မနုၤလဲၣ်န့ၣ်သုသ့ၣ်ညါဧါ. မၤကဲထီၣ်ဝဲဒၣ်ထံလၢစပံးထံန့ၣ်လီၤ.